ၼႂ်းထိူၼ်ႇပႃႇမႆႉယႂ်ႇလွႆလူင် သဵင်တဵတ်ႇယဵၼ်ႁၢမ်းၵူၼ်း လႆႈမႃးငွႆးယိုဝ်းၶဵၼ်ယူႇဝၼ်းၶိုၼ်းပေႃးဢမ်ႇလႆႈလိုဝ်ႈ၊ ၸႂ်ထိုင်ႁိူၼ်းယူႇၵေႃႈဢမ်ႇၸၢင်ႈပွၵ်ႈ၊ ၶႂ်ႈႁူႉတၢင်းႁိူၼိးပဵၼ်ႁိုဝ်ယူႇၵေႃႈ ဢမ်ႇၸၢင်ႈၵပ်းသိုပ်ႇၸူး၊ ၵူၺ်းလႆႈတၢင်းမွင်းယူႇဝၼ်းၶိုၼ်းၵူၺ်းယဝ်ႉ။
သႅင်လိုၼ်းၵေႃႈ ၵိူတ်ႇဢွၵ်ႇမႃးလုၵ်ႈၽႃၽႄၸၢႆးဢွၼ်ႇသွင်ၵေႃႉ၊ မီးမႄႈၶဝ်ၸွႆႈလဵင်ႉလုမ်းလႃးၵၼ်ၵႂႃႇ၊ ၼင်ႇၾိင်ႈထုင်းမိူဝ်ႈၵွၼ်ႇ ပိူၼ်ႈႁႂ်ႈၵမ်ၵေႃႈၵႃႈလႆႈၸွမ်းယဝ်ႉ။
လဵင်ႉလုၵ်ႈတင်းၶိုၼ်းတင်းဝၼ်း ဢမ်ႇပဵၼ်လပ်းပဵၼ်ၼွၼ်းလႆႈႁင်းမၼ်း၊ ဢူႈၶဝ်ၵေႃႈၸဵမ်မိူဝ်ႈလုၵ်ႈဢွၼ်ႇယူႇၼႂ်းတွင်ႉ မီးသၢမ်လိူၼ်ယဝ်ႉၽၢတ်ႇၵႂႃႇ ဢမ်ႇလႆႈၶိုၼ်းမႃး၊ ပေႃးဝႃႈၵႂႃႇယဝ်ႉၵပ်းသိုပ်ႇၵေႃႈဢမ်ႇလႆႈ ၶႆႈဢုပ်ႇၵေႃႈဢမ်ႇၸၢင်ႈ လုၵ်ႈမၼ်းပဵၼ်ယိင်းႁိုဝ်ၸၢႆးၵေႃႈဢမ်ႇႁူႉယဝ်ႉ။
မီးမႄႈၶဝ်ၼၼ်ႉၵူၺ်းယဝ်ႉၸူမ်းၼႃႇ မႃးၸႂ်းၶမ်ႈၸႂ်းၼႂ်၊ ၸဵမ်မိူဝ်ႈတွင်ႉယႂ်ႇတေႃႇၵိူတ်ႇ ပႃႈၸိင်ႇၵူၺ်းၼႃႇ ဢၼ်ယူႇၸွမ်းမၼ်းတႃႇသေႇ။ ႁူႉဝႃႈပဵၼ်ၽႃၽႄၼႆၵေႃႈၸူမ်းၼႃႇ ဢၼ်မၼ်းဢမ်ႇပေႃးၸူမ်းၼၼ်ႉတႄႉ ပဵၼ်ၽူႈၸၢႆးၼၼ်ႉၼေႈ မၼ်းၶႂ်ႈမီးလၢၼ်ယိင်းၼႃႇ၊ ႁူႉဝႃႈပဵၼ်ၵူၼ်းၸၢႆးယူႇၵေႃႈ တင်းတိုၵ်ႉဝႃႈလၢၼ်ယိင်းယူႇတိၵ်းတိၵ်း။
ၵိူတ်ႇယဝ်ႉၵေႃႈမႃးယူႇၸွမ်းလုမ်းလႃးၸွႆႈ၊ တင်းမႄႈသႅင်လိုၼ်းၶဝ်သေ ၵဝ်ဢဝ်ၵေႃႉၼိုင်ႈမၼ်းဢဝ်ၵေႃႉၼိုင်ႈ သႅင်လိုၼ်းတႄႉလႆႈဢဝ်မိူဝ်ႈလဵင်ႉၼူမ်းၼၼ်ႉၵူၺ်း။
မိူဝ်ႈသႅင်လိုၼ်းတိုၵ်ႉသၵ်ႉၶူဝ်းယူႇၼၼ်ႉ ၸိုၼ်ႈမိူင်းၵေႃႈမႃးၸူးသေ
“သူၸွင်ႇပဵၼ်ႁင်ႁိုဝ်”
သႅင်လိုၼ်းၵေႃႈတင်းသပျႃႇသေ ၵွတ်ႇဢဝ်ၸိုၼ်ႈမိူင်းၵမ်းလဵဝ်
“သူပေႉၼၢၼ်းမႃးလႃႇ လုၵ်ႈႁဝ်းပေႃးမီးပဵၼ်လိူၼ်ယဝ်ႉၸင်ႇႁႃမႃးၵူၺ်းဝႃႇ”ႁႆႈဢွၵ်ႇမႃးယူႇ။
ၸိုၼ်ႈမိူင်းၸဵတ်ႉပၼ်ၼမ်ႉတႃယဝ်ႉ
“ပေႉၶီႈႁႆႈလႃႇမိူဝ်ႈလဵဝ်” ၵွတ်ႇဢဝ်သႅင်လိုၼ်းပေႃးမၼ်ႈတဵင်ႈတဵင်ႈ ထူင်ၶူဝ်းမၼ်းတင်းပႆႇပူတ်းဢွၵ်ႇပိူဝ်ႉၵွၼ်ႇ။
“ႁဝ်းၸင်ႇႁႃယဝ်ႉၵၢၼ်သေ လႆႈၶိုၼ်ႈလႅင်းၵူၺ်း လႆႈႁၼ်မႄႈႁဝ်းသူင်ႇမႃးယဝ်ႉၵေႃႈ ႁဝ်းၼႅတ်ႈယွၼ်းၶႂၢင်ႉမႃးၵမ်းလဵဝ်ဢိူဝ်ႈ”
ႁၼ်ၵွင်ၶူဝ်းၼၼ်ႉသေ
“မႃးလႄႈႁဝ်းသၵ်ႉ”
“ဢမ်ႇမိူဝ်းတူၺ်းလုၵ်ႈၵွၼ်ႇလႃႇ”
“သူလိုဝ်ႈၵွၼ်ႇလႄႈ ႁဝ်းတေႁဵတ်းၵူၺ်းၸိူဝ်းၼႆႉ”
ပူတ်းထူင်မၼ်းသေ ဢဝ်ၼမ်ႉတွင်ႈပၼ်မိုဝ်းသႅင်လိုၼ်းယဝ်ႉ မႄးထွတ်ႇသိူဝ်ႈသိုၵ်းမၼ်းယဝ်ႉၵေႃႈ ၼင်ႈတီႈသႅင်လိုၼ်းၼင်ႈမိူဝ်ႈၵႆႈၼၼ်ႉသေ
“လုၵ်ႈႁဝ်းၸွင်ႇႁၢႆႉၼႄႇ”
“မိူၼ်ပေႃႈမၼ်းၵူၺ်းၼႆဝႃႇ မႄႈထဝ်ႈၶဝ်ဝႃႈ”
“ၶႂ်ႈဝႃႈဢမ်ႇႁၢႆႉ..”
“ၼၼ်ႉငိၼ်းသဵင်မႃးယဝ်ႉ”
ၶဝ်ႈႁိူၼ်းမိူဝ်းပႅတ်ႈၸိုၼ်ႈမိူင်းၵႂႃႇယဝ်ႉ။
ၸိုၼ်ႈမိူင်းလႆႈႁၼ်လုၵ်ႈၸၢႆးဢွၼ်ႇမၼ်းသွင်ၵေႃႉ
“သူပေႉမေႃၵိူတ်ႇလႃႇ မိူၼ်သူၼႃႇႁဝ်းဝႃႈ ၵေႃႉယႂ်ႇမႃးတႄႉသၢဝ်ၸွႆးထူၼ်ႈယဝ်ႉၼႆႉ”
“ႁဝ်းဝႃႈမိူၼ်သူၵူၺ်းယဝ်ႈ တူၺ်းၶူႈၼင်ၼၼ်ႉလူး သၼ်လီၼႃႇ ၶူၼ်ႁူဝ်ၵေႃႈလမ်ဝႃႈလမ်”
ၸိုၼ်ႈမိူင်းမႃးယူႇႁိူၼ်းၼႆၵေႃႈ လႆႈဝႃႈၸွႆႈလႆႈတင်းၼမ်ၼၼ်ႉယဝ်ႉ၊ မၼ်းၵေႃႈလႆႈၶႂၢင်ႉလိုဝ်ႈၶႂ်ႈႁိုင်ဝႆႉသေ လႆႈယူႇၸွမ်းလုၵ်ႈ တေႃႇပေႃးမေႃၶွမ်ႈယဝ်ႉၸင်ႇတေၵႂႃႇၶိုၼ်း။
ဝၼ်းယဝ်ႉဝၼ်း သႅင်လိုၼ်းၵေႃႈ လဵင်ႉလုၵ်ႈသေ ပေႃးတၼ်းမႃးၵေႃႈ ႁဵတ်းၵၢၼ်မၼ်းၵႂႃႇ၊ ဢမ်ႇၸၢင်ႈၵႂႃႇလႂ်လႆႈလႄႈ တၢမ်းသၢႆးၶၢဝ်ႇမၼ်းၵူၺ်းသေ သိုပ်ႇသူင်ႇပၼ်ပီႈၸွမ်ႁဵတ်းယဝ်ႉ။
ႁိုင်ႁိုင်မႃးၵေႃႈ မီးၵူၼ်းႁဵတ်းၵၢၼ်ၸွမ်းမႃး ၵေႃႉသွင်ၵေႃႉထႅင်ႈ၊ ၵၢၼ်တႄႉယႃႇဝႃႈတေမဝ်ၶႅၼ်းၼမ်မႃးယဝ်ႉ၊ တႃႇၸုမ်းၶဝ်တေၵႂႃႇၼႃႈလႆႈၼၼ်ႉ ဢွၼ်ၵၼ်ၶတ်းၸႂ်ၽႂ်မၼ်းယူႇယဝ်ႉ။
ၸိုၼ်ႈမိူင်းလႄႈသႅင်လိုၼ်းၼၼ်ႉၵေႃႈ ၵၢၼ်ၽႂ်ၵၢၼ်မၼ်းႁဵတ်းၵႂႃႇ ၵၢၼ်ၼႃႈႁိူၼ်းၶႃၼၼ်ႉၵေႃႈ ပွင်ႇၸႂ်ၵၼ်သေ ဢမ်ႇဝႆႉဝႃႈၵဝ်ႁဵတ်းၼမ်မႂ်းႁဵတ်းဢေႇ ဢၼ်လူဝ်ႇႁဵတ်းၵေႃႈႁဵတ်းၵႂႃႇၵူၺ်း ပေႃးယူႇၸွမ်းၵၼ်ၵေႃႈၸွႆႈၵၼ်၊ ဢမ်ႇယူႇၸွမ်းၵၼ်ၵေႃႈ ပၼ်ႁႅင်းၸႂ်ၵၼ် ၼႃႈႁိူၼ်းဢမ်ႇမူၼ်းၵေႃႈ ပၼ်လွင်ႈဢုၼ်ႇၸႂ်ၵၼ်လႆႈယူႇ။
ၸိူင်းႁူဝ်ၼႆႉတႄႉ တေၶွတ်ႇယွတ်ႈသုတ်းၵႂႃႇတီႈၼႆႈၵူၺ်းယဝ်ႉၶႃႈ။
ၼပ်ႉယမ်ၽူႈလူလိၵ်ႈႁဝ်းၶဝ်ယူႇဢေႃႈ
သႅၼ်ငဝ်း
26.12.2025 – 9.1.2026
