ၵၢင်ၼႂ်မႃးၵေႃႈပေႃးဢမ်ႇႁၼ်ၸိုၼ်ႈမိူင်းယဝ်ႉၼႃႇ၊ သႅင်လိုၼ်းၵေႃႈၵႂႃႇၶဝ်ႈၵၢတ်ႇၼႂ်းဝဵင်းၸဵမ်ၸဝ်ႉသေ ပွၵ်ႈမႃးဝႄႉသႅင်ႇပႃႈၸိင်ႇၶဝ်ၵမ်ႉၼိုင်ႈလႄႈ
“ၵႂႃႇယဝ်ႉယူဝ်ႉထၢင်ႇ”
“ၵႂႃႇယဝ်ႉဝႃႈ..”
“ၵႂႃႇလႂ်မႃးလႂ်ၵေႃႈဢမ်ႇသင်ႇဢမ်ႇလၢတ်ႈၵၼ်သေပွၵ်ႈတေႉႁေႉ..သင်ဢမ်ႇႁူႉၸၵ်းၵၼ်တင်းဝႃႈလႆႈယူႇၼႆႉ”
“မႂ်းယႃႇပွင်ႉယူႇလႃႈ တေႃႈၼင်ႇမၼ်းၵႂႃႇၵဝ်တင်းဢမ်ႇႁူႉ ၵႂႃႇၵေႃႈဢမ်ႇလၢတ်ႈမႃးၵေႃႈဢမ်ႇလၢတ်ႈ”ယၵ်ႉတူၺ်းသႅင်လိုၼ်းလီလီသေ“မႂ်းႁမ်ႉၵႂႃႇတၢင်းလႂ်မႃးလႃႇၼႆႉ”
“မိူဝ်းၵၢတ်ႇဝဵင်းမႃး ႁဵတ်းၽၵ်းႁင်လႃႇ”
“ပႆႇႁဵတ်းၽၵ်းသင် ၶႃႈသိုဝ်ႉထူဝ်ႇၽူးၽိူၵ်ႇမႃးၶႅမ်ႉၵျႃႉ”
ယိပ်းသေသွင်ၸွၵ်းမႃးပၼ်ပႃႈၸိင်ႇယဝ်ႉ၊
“မႂ်းႁမ်ႉပေႉပၼ်ၵဝ်ၼမ်လႃႇ မီးႁႃးဢူႈသူၵူၺ်းဢိူဝ်ႈ”
“ဢဝ်ၵႂႃႇလႃႈ..ၶႃႈသိုဝ်ႉမႃးၼမ်ၼႃႇ”
“မႂ်းၵေႃႈမႃးႁဵတ်းၶႅၵ်ႇႁႃးၽွင်ႈၵဝ်ႇလေႃႇ”
“ၸိုင်ဝႃႈမီးလုၵ်ႈၸၢႆး”
“မႂ်းၵေႃႈပဵၼ်လုၵ်ႈပႂ်ႉၵဝ်ယဝ်ႉၼႃႇ”
“ပႆႇပဵၼ်သႄႈ တင်းပႆႇဢဝ်ၵၼ်လူး”
“မႂ်းၼႆႉၶေႃႈသဵတ်ႈမၼ်းၼမ်တေႉဢိူဝ်ႈ”
“ပႃႈႁဝ်းၶႅၼ်းၼႃႇလႃႈ ယွၵ်းယွၵ်းႁေမိူဝ်းထၢမ် ဢမ်ႇလၢတ်ႈၵၼ်ဝႆႉႁေဢိတ်း”
“မႂ်းလၢတ်ႈဝႆႉလူး ၵဝ်ၵေႃႈမိူဝ်းတေႉၵူၺ်းဢိူဝ်ႈ ၽႂ်ၸႂ်ႉမႂ်းၶႂ်ႈလၢတ်ႈ”
“ၶႃႈဝႃႈလဵၼ်ႈၵူၺ်းလႄႇၼၼ်ႉ”
“ဢၢႆႈၸၢႆးႁဝ်းမၼ်းဢမ်ႇဝႃႈလဵၼ်ႈမိူၼ်မႂ်းလူး”
“ပႃးႁဝ်းၵေႃႈပႃးၵွၼ်ႇလႃႈ ပေႃးဢမ်ႇပႃးပႃႈႁဝ်းၸွင်ႇမၼ်းတေႁူႉၵေႃႈဢမ်ႇၸႂ်ႈ”
“မႂ်းၶႂ်ႈႁဵတ်းၶႅၵ်ႇမိူဝ်ႈလႂ်လႃႇ မိူဝ်ႈၽုၵ်ႈၵေႃႈဝၼ်းလီယူႇဢိူဝ်ႈ”
“ႁမ်ႉဢမ်ႇႁဵတ်းမိူဝ်ႈၼႆႉႁေ ပေႃးမၼ်းငၢႆႈပေႉတၢၼ်ႇၼၼ်ႉတႄႉ”
“မႂ်းဝႃႈတေႉႁႃႉ”
“ၶႃႈဝႃႈယဝ်ႉၵူၺ်း..လၢတ်ႈလဵၼ်ႈၵေႃႈဢမ်ႇၶႂ်ႈႁတ်းယဝ်ႉၵမ်းၼႆႉတႄႉ”
ပႃႈၸိင်ႇယုမ်ႉသေယဝ်ႉ”မႂ်းသမ်ႉၶႂ်ႈႁဵတ်းမိူဝ်ႈလႂ်လႃႇ မၼ်းတႄႉဢဝ်မႂ်းဝႃႈၵူၺ်းဢိူဝ်ႈ”
“ဢွၵ်ႇဝႃႇပုၼ်ႉလႄႈ လၢႆဝၼ်းၵူၺ်းပေႃးတေၶဝ်ႈဝႃႇယဝ်ႉ ၶႃႈဝႃႈၼႂ်းဝႃႇၼႆႉ တေၵႂႃႇၼင်ႈတြႃးႁေဢိၼ်ႉၼႆၵႃႈ ”
“မႂ်းဝႃႈတေႉႁႃႉ”
“တေႉၵႃႈ..ၶႃႈဢၢင်ႈမႃးလၢတ်ႈမၼ်းၵူၺ်းၵဝ်ႇ မၼ်းဢမ်ႇယူႇၵေႃႈလၢတ်ႈတီႈပႃႈႁဝ်းဝႆႉၵူၺ်းယဝ်ႉ ၵမ်ႉတေဝႃႈၶႃႈပၢႆႈပႅတ်ႈမၼ်းၼႆ”
“ႁွင်ႉပႃႈယူႇတိၵ်းတိၵ်းမႂ်းၼႆႉၵေႃႈ”
“မၼ်းပႆႇယၢမ်ႈလႄႇ..”
ၶၢဝ်းတၢင်းၼႂ်းဝႃႇ သႅင်လိုၼ်းၵေႃႈပႅတ်ႈၵၢၼ်ပႅတ်ႈငၢၼ်းသေ ၵႂႃႇၼင်ႈတြႃးယူႇတီႈၵျွင်းမႄႈၶၢဝ်ၶဝ်ၼၼ်ႉယဝ်ႉ။
ၸိုၼ်ႈမိူင်းၵေႃႈ ဝၢႆးသေဝၼ်းၼၼ်ႉႁၢႆလူင်ၵႂႃႇ ဢမ်ႇၶိုၼ်းမႃးပေႃးမီးပဵၼ်သွင်လိူၼ်၊ ယူႇယူႇၵေႃႈ လႆႈႁူႉဝႃႈမၼ်းမၢတ်ႇၸဵပ်းၶိုၼ်ႈႁူင်းယႃသေ ပႃႈၸိင်ႇၶဝ်ၵေႃႈ ၵူဝ်ၵႂႃႇယႃႉသႅင်လိုၼ်းၼႆလႄႈ ဢမ်ႇၵႂႃႇလၢတ်ႈသင်။
မၼ်းမၢတ်ႇၸဵပ်းႁႅင်းထိုင်တီႈပေႃးဢမ်ႇတူင်ႉတူဝ်လႆႈ၊ သင်ဢမ်ႇမႃးၶိုတ်းႁူင်းယႃ လူမ်းထူၺ်ႈၸႂ်သမ်ႉပေႃးတေၶၢတ်ႇယဝ်ႉ။
သဵင်မၢၵ်ႇတႅၵ်ႇလင်မေႃးပၼ်း သဵင်ၵွင်ႈလင်ယွၼ်ႈမေႃးဢူၼ်၊ သဵင်ၵူၼ်းႁွင်ႉပေႃးဢမ်ႇငိၼ်း၊ ၸိုၼ်ႈမိူင်းဢၼ်ၵႂႃႇၸွပ်ႇၶၢဝ်ႇၽူႈၶဵၼ်ၶဝ်ၼၼ်ႉ လႆႈထုၵ်ႇတီႉၺွပ်းၵႂႃႇ၊ လႆႈၶၢမ်ႇတၢင်းပိူၼ်ႈမတ်ႉၸွၵ်း ပေႃႉထုပ်ႉႁႅမ်ၸွပ်ႇထၢမ်ယူႇလၢႆဝၼ်းလႄႈ ၵူၼ်းၶဝ်ၶိုၼ်းၵႂႃႇၸွႆႈသေ မၼ်းၸင်ႇလွတ်ႈမႃးယဝ်ႉ၊ လွတ်ႈမႃးသေတႃႉ တေႃႉတႄႉၵိုတ်းလူမ်းထူၺ်ႈၸႂ်ၵူၺ်းယဝ်ႉလႄႈ တူဝ်မၼ်းတႄႉဢမ်ႇတူင်ႉၼိုင်လႆႈသေဢိတ်း၊ ၶႅၼ်ၶႃႁၵ်းၵႂႃႇမူတ်း။
သႅင်လိုၼ်းၼၼ်ႉတႄႉၵေႃႈဢမ်ႇႁူႉငိၼ်းသင် ဝၼ်းၶမ်ႈၼင်ႈတြႃးမၼ်းၵႂႃႇၵူၺ်း၊ မၢင်ၵမ်းၵေႃႈၸႂ်ပေႉမႃးဢမ်ႇလီၼႆ ႁူႉလႆႈယူႇၵူၺ်းဢမ်ႇႁူႉဝႃႈပဵၼ်သင်။
ၸိုၼ်ႈမိူင်းမိုၼ်းတႃမႃး လႆႈႁၼ်မႄႈမီးယူႇႁိမ်းမၼ်းၼၼ်ႉလႄႈ ထၢမ်ႁႃသႅင်လိုၼ်းၸင်ႇတေႁူႉဝႃႈသႅင်လိုၼ်းၵႂႃႇၼင်ႈတြႃးၼႆၼၼ်ႉယဝ်ႉ။
မၼ်းၵေႃႈယူႇတီႈႁူင်းယႃ ႁိုင်ယူႇသၢမ်ဝူင်ႈၼႆႉသေ မိူဝ်းယူႇတီႈႁိူၼ်း ယင်းတိုၵ်ႉလႆႈၼင်ႈလေႃႉသေလႄႈၵုပ်းၶႅၼ်ၵုပ်းၶႃမၼ်းဝႆႉယူႇ ပႆႇပေႉတူဝ်ႁင်းၵူၺ်းလႆႈ။
သႅင်လိုၼ်းမိူဝ်းယူႇႁိူၼ်းၶိုၼ်း ၸင်ႇတေႁူႉဝႃႈၸိုၼ်ႈမိူင်းမၢတ်ႇၸဵပ်းသေ ၼႅတ်ႈမိူဝ်းတူၺ်းၵမ်းလဵဝ်၊ မိူဝ်းႁၼ်ၸိုၼ်ႈမိူင်းၼင်ႈလေႃႉယူႇၸိူင်ႉၼၼ်ၵေႃႈ ဢဝ်ၼမ်ႉတႃမၼ်းသမ်ႉပေႃးၸိုမ်းယဝ်ႉ။
“သူ..”
“သူပွၵ်ႈမႃးယဝ်ႉႁႃႉ..”
“ဢိုမ်ႈ..” သၢႆတႃၸိူဝ်ႈတူၺ်းၵႂႃႇတီႈၸိုၼ်ႈမိူင်းသေ
“ပဵၼ်ၸိူင်ႉၼႆၵေႃႈလီယူႇလူး”
“ဢမ်ႇဢီးလူႁဝ်းသေဢိတ်းယဝ်ႉၵႃႈ”
“တေႃႈၼင်ႇၸဝ်ႈၵဝ်ႇယင်းဢမ်ႇဢီးလူၸႂ်ၸဝ်ႈၵဝ်ႇ ၸၢင်ႈလူဝ်ႇႁႂ်ႈပိူၼ်ႈမႃးဢီးလူႁဵတ်းသင်”
“ဢမ်ႇႁၵ်ႉႁဝ်းယဝ်ႉႁႃႉ”
“ႁဝ်းယၢမ်ႈလၢတ်ႈယူႇၵႃႈဝႃႈႁဝ်းႁၵ်ႉသူၼႆ”
“ၸဵပ်းလိူဝ်သေပိူၼ်ႈယဝ်ႉ”
“လီၸႂ်သူယဝ်ႉ”
“ၵူၼ်းၸႂ်ႁၢႆႉ..”
“ၵႆႉလၢတ်ႈယူႇတႃႇသေႇ..ႁဝ်းႁူႉယူႇၼႃႈ”
“သူလီတေႃႇႁဝ်းဢိတ်ႉၼိုင်ႈဢမ်ႇလႆႈၼႄႇ..”
“သူၵေႃႈႁဵတ်းႁႂ်ႈပိူၼ်ႈယႃႇလႆႈမႆႈၸႂ်ၽွင်ႈလႄႈ လႆႈႁၼ်သူမီးသၢႆၸႂ်ယူႇၵူၺ်းၵေႃႈ တွၼ်ႈတႃႇႁဝ်းတႄႉဝႃႈလီၼႃႇယဝ်ႉ မၢတ်ႇၸဵပ်းၵေႃႈမေႃၶႅၼ်းလႆႈယူႇ သင်သူႁၢႆၵႂႃႇတႄႉ ဢမ်ႇၸၢင်ႈမႃးၶိုၼ်းလႆႈလူး ယဝ်ႉၵေႃႈ ယူႇၸိူင်ႉၼႆၵႂႃႇႁိုင်ႁိုင်ၵေႃႈဢမ်ႇပဵၼ်သင်ၼႃ”
“ပေႃးၼၼ်သူၵေႃႈလုမ်းလႃးႁဝ်းၼၼ်ႉၼႃႇ”
“မိူဝ်းယူႇတီႈႁိူၼ်းလႄႈ ၶိုၼ်ႈၶူၺ်ႁဝ်းယဝ်ႉလူး”
“ဢဝ်ႁဝ်းမိူဝ်းလႄႈ ၶိုၼ်ႈၶိုၼ်ႈလူင်းလူင်းတီႈႁိူၼ်းၼၼ်ႉပေႉလႆႈယူႇၼႄႇ”
ဝၢႆႇတူၺ်းႁိူၼ်းၶႃသုင်ၶဝ်ၼၼ်ႉသေ ၶိုၼ်ႈၶိုၼ်ႈလူင်းလူင်းတီႈႁိူၼ်းၼၼ်ႉဝူၼ်ႉပေႃးဢမ်ႇပွင်ႇယဝ်ႉ။
သႅင်လိုၼ်းၵေႃႈယုမ်ႉယုမ်ႉသေ “လႆႈၵႃႈ ဢမ်ႇယုမ်ႇၸႂ်ႁဝ်းႁႃႉ”
“တီႈလီယုမ်ႇၵေႃႈယုမ်ႇၵႃႈ ၵူၺ်းၼႆႉသမ်ႉ..”
“ၵႂႃႇလႄႈႁဝ်းမိူဝ်း”
သႅင်လိုၼ်းဢီးလေႃႉထူဝ်းမၼ်းၼၼ်ႉသေဢွၵ်ႇဝၢင်းႁိူၼ်းၵႂႃႇ။
“ၵမ်ႉလႄႈသူ..မႄႈႁဝ်းဢမ်ႇယူႇႁိူၼ်းၵူၺ်ႉၼႆႉ လူဝ်ႇပႂ်ႉလၢၼ်ႉဢိူဝ်ႈ”
“ၵေႃႈယဝ်ႉဢိူဝ်ႈ..ပွႆႇၵူၼ်းတုၶိတ်ႉတယူႇႁိူၼ်းၵူၺ်းၼႆႉမၼ်းၸႂ်ႈလၢႆးယူႇၼႄႇ”
“ယႃႇယဝ်ႉႁဝ်းလႄႈ မၼ်းဢမ်ႇၸႂ်ႈတၢင်းလဵၼ်ႈၼႃသူ”
သႅင်လိုၼ်းၵေႃႈၶိုၼ်းဢဝ်ၶဝ်ႈႁိူၼ်းမႃးသေ
“ပဵၼ်ႁိုဝ်လႃႇ ပေႃးဢမ်ႇၸႂ်ႈတုၶိတ်ႉတၵေႃႈဢမ်ႇလႆႈယူႇႁိူၼ်းႁိုဝ်၊ ၶႂ်ႈမႃးၵေႃႈမႃး တေၵႂႃႇတေမႃးၵေႃႈဢမ်ႇသင်ႇဢမ်ႇလၢတ်ႈ၊ တေမႃးထၢမ်ၵၼ်ၵေႃႈဢမ်ႇသင်ႇၵၼ်ဝႆႉ ႁဝ်းႁူႉၸၵ်းၵၼ်ယူႇႁႃႉ တီႈၵပ်းသိုပ်ႇၵၼ်ၵူၺ်းၵေႃႈဢမ်ႇမီး ႁၼ်ၵၼ်ဢဝ်လၢႆပွၵ်ႈၵူၺ်း ဢုပ်ႇၵၼ်လၢႆၶေႃႈၵူၺ်းၵေႃႈ တေတႄႇၼႃႈႁိူၼ်းၸွမ်းၵၼ်ၼႆႉမၼ်းၸႂ်ႈယူႇၼႄႇ”
“ပေႃးဝႃႈၵျိူၵ်ႈယဝ်ႉ ဢမ်ႇႁၼ်ၵၼ်ၵေႃႈတိုၵ်ႉၵျိူၵ်ႈယူႇဢိူဝ်ႈ တႄႇၼႃႈႁိူၼ်းၼႆႉဢမ်ႇၸႂ်ႈဝႃႈၽႂ်ၵေႃႈလႆႈလူး ၵွပ်ႈပဵၼ်သူလႄႈ ႁဝ်းၸင်ႇၶႂ်ႈတႄႇယဝ်ႉ”
“ပေႃးႁဝ်းဢမ်ႇဢဝ်သေၵႂႃႇႁဵတ်းၼၢႆးၶၢဝ်ပႅတ်ႈလူးသူတေႁဵတ်းႁိုဝ်”
“ႁဝ်းသမ်ႉတေႁဵတ်းႁိုဝ်လႆႈ”
ယူႇယူႇၵေႃႈၶဝ်ႈႁိူၼ်းမႃးသေ
“ၼၼ်ႉမႄႈသူမႃးယဝ်ႉ”
ပႃႈၸိုၼ်ႈႁၼ်သႅင်လိုၼ်းၵေႃႈ
“ၵဝ်ထၢင်ႇမႂ်းပႆႇမႃးဢိူဝ်ႈၼႆႉ တိုၵ်ႉဢၢင်ႈမိူဝ်းၶႆႈယူႇ ၵျွင်းမႂ်းပေႃးမႃးမီးယူႇတီႈႁိူၼ်းၼႆႉ”
“ၶႃႈၵေႃႈမႆႈၸႂ်ၵွၼ်ႇဢိူဝ်ႈ ၽူဝ်ၶႃႈလူး”
“ၸႂ်ႈယူႇတေႉၵႃႈ..ႁၢႆလူင်ၵႂႃႇ ပေႃးတၢၼ်ႇတေၵႂႃႇႁဵတ်းၼၢႆးၶၢဝ်ပႅတ်ႈမၼ်းယဝ်ႉ”
“ၶွင်မၼ်းၵေႃႈပႅတ်ႈၶႃႈၵႂႃႇဢွၼ်တၢင်းလူႉၸၢင်ႈတေႁဵတ်းႁိုဝ်”
“ဢဝ်မိူဝ်းႁေလႄႈၵမ်းၼႆႉ မႃးၶိုၼ်းယဝ်ႉလူး”
“ပေႃးဢမ်ႇလီမႃးၵေႃႈၸႂ်ႉၵၼ်ဢဝ်ယဝ်ႉ”
“မၼ်းပဵၼ်ၶွင်မႂ်းယဝ်ႉလႄႇ ႁဝ်းပေႃးသိုဝ်ႉပၼ်မႂ်းယဝ်ႉလူး”
“လၢတ်ႈပေႃးတၢၼ်ႇၶႃႈပဵၼ်ႁင်ယဝ်ႉ”
“မႂ်းႁမ်ႉပဵၼ်ႁင်လႃႇ ပေႃးလူဝ်ႇၵူၺ်းယဝ်ႉမႃးႁိူၼ်း ပေႃးဢမ်ႇလူဝ်ႇႁင်တႄႉႁၢႆဝိတ်း”
“တေႉၼႆ..”
“ႁၢင်ႈပဵၼ်ၸႂ်ၵၼ်ၼႃႇ..ၶႃႈဢဝ်မေးႁႃႉဢဝ်ဢူၺ်းၵေႃႉမႄႈႁႃႉၼႆႉ”
“ဢဝ်ဢူၺ်းၵေႃႉမႄႈၵူၺ်းဢိူဝ်ႈ..”သႅင်လိုၼ်းယုမ်ႉသေတူၺ်းၸိုၼ်ႈမိူင်းဢၼ်ၼႃႈလဵၵ်ႉတႃၼွႆႉယူႇၼၼ်ႉ။
“ပေႃးမႂ်းတၼ်းၵေႃႈမႃးယူႇႁဵတ်းၵေႃႉမၼ်းႁေလႄႈ မၢင်ပွၵ်ႈၵဝ်ၵေႃႈဢမ်ႇတူၺ်းမၼ်းလႆႈတႃႇသေႇလူး ၵၢင်ၶမ်ႈၵၢင်ၶိုၼ်းၼႆႉၵေႃႈၵဝ်ဢမ်ႇတၼ်းတူၺ်းမၼ်းလႆႈဢိူဝ်ႈ”
“သူဢမ်ႇၶႂ်ႈမႃးၵေႃႈၸၢင်ႈပဵၼ်သင်..”
“လၢတ်ႈပေႃးတၢၼ်ႇႁဝ်းပဵၼ်ပိူၼ်ႈယဝ်ႉ ၶႂ်ႈႁႂ်ႈပဵၼ်ပိူၼ်ႈတေႉႁႃႉတေႃႈ”
“ဢမ်ႇၶႃႈ..”
“တေႁႂ်ႈႁဝ်းမႃးယူႇၸွမ်းႁ”
“ဢုပ်ႇၵၼ်ၵူၺ်းၶိူဝ်လႄႈၼႃႈ” ပႃႈၸိင်ႇၵေႃႈၵႂႃႇပႅတ်ႈယဝ်ႉ။
