ၶဝ်သၢမ်ၵေႃႉၼၼ်ႉၵေႃႈ ပွႆႇၵူၼ်းၵေႃႉၼၼ်ႉလွတ်ႈဢွၵ်ႇလႆႈ မိူဝ်ႈလဵဝ်ႉႁူဝ်ၵႃးၼၼ်ႉလႄႈ မၼ်းၵေႃႈတၼ်းၸၼ်ၵွင်ႈၶိုၼ်ႈမႃးသေ ၵွင်ႈပွတ်းမၼ်းငႃသႂ်ႇသႅင်လိုၼ်းၵမ်းလဵဝ် ႁႂ်ႈသႅင်လိုၼ်းၽုၺ်ႇၽၵ်းတူၵႃးယဝ်ႉၵေႃႈ မၼ်းလူင်းၵႃးယဝ်ႉ လၢၵ်ႈၸၼ်သႅင်လိုၼ်းသမ်ႉပေႃးထူလူင်းတူၵ်းၵႃးၵႂႃႇ၊ မၼ်းၶုၼ်ႇၸၼ်ဢဝ်သႅင်လိုၼ်းၸုၵ်းၶိုၼ်ႈယဝ်ႉ မိူဝ်ႈမၼ်းတိုၵ်ႉၵူမ်ႈၸၼ်ယူႇၼၼ်ႉ သဵင်ၵွင်ႈၵေႃႈလင်ၸွမ်းသေ ၵွင်ႈပွတ်းဢၼ်မၼ်းယိပ်းယူႇၼၼ်ႉ လုတ်ႈတူၵ်းမိုဝ်းၵႂႃႇယဝ်ႉ။ သဵင်ၵွင်ႈလင်ထႅင်ႈၵမ်းၼိုင်ႈ တူဝ်မၼ်းၵေႃႈလူမ်ႉၼွၼ်းၶျႃးယူႇၼိူဝ်လိၼ်ၼၼ်ႉယဝ်ႉၼႃႇ။
သႅင်လိုၼ်းၵေႃႈလူမ်ၸႂ်လွတ်ႈယဝ်ႉၼႆသေ ပွႆႇတူဝ်ပွႆႇႁႅင်းမၼ်းလူမ်ႉၼွၼ်းၵႂႃႇယဝ်ႉ မီးၵူၼ်းၵေႃႉၼိုင်ႈလႅၼ်ႈႁွင်းႁပ်ႉမၼ်းဝႆႉလႄႈ ဢုမ်ႈမၼ်းၶိုၼ်ႈၵႃးၶဝ်ၵႂႃႇ။
ၽူႈယိင်းသၢမ်ၵေႃႉၼၼ်ႉၵေႃႈ လွတ်ႈမိူဝ်းၵႂႃႇၸွမ်းၵၼ်သေ ၶိုၼ်းဢဝ်ၵႂႃႇၸႅတ်ႈတူၺ်းပၢႆးယူႇလီတီႈႁူင်းယႃယူႇ၊ သႅင်လိုၼ်းၼၼ်ႉၵေႃႈ ၼွၼ်းထႅမ်ၼမ်ႉၵိူဝ်ဝႆႉယူႇတီႈႁူင်းယႃၼၼ်ႉမိူၼ်ၵၼ်။
ယူႇတီႈႁူင်းယႃၼႆၵေႃႈ ၵူၺ်းမီးပီႈၸွမ်လႄႈမေးမၼ်းၵူၺ်းမႃးပႂ်ႉတူၺ်းမၼ်း၊ ၵူၼ်းတီႈႁဵတ်းၵၢၼ်ၶဝ်ၵေႃႈ ဢမ်ႇမီးၽႂ်တေႉတေႉ လိူဝ်သေပီႈယိင်း ဢၼ်ႁွင်ႉမၼ်းၵႂႃႇႁဵတ်းၵၢၼ်ၼၼ်ႉလႄႈ ၽူႈၸတ်းၵၢၼ်သေ လၢတ်ႈႁႂ်ႈၸဵဝ်းၶႅၼ်းယဝ်ႉႁႂ်ႈလႆႈၸဵဝ်းႁဵတ်းၵၢၼ်ၶိုၼ်းၼႆ။
ဝၢႆးသေၶႅၼ်းလီယဝ်ႉၵေႃႈ မိူဝ်ႈတိုၵ်ႉၵႂႃႇႁဵတ်းၵၢၼ်ပႆႇလႆႈၼင်ႈၼၼ်ႉ လုၵ်ႈဢွၼ်ႇၽိုၵ်းၵၢၼ်မႃးလၢတ်ႈႁႂ်ႈမၼ်းႁၢင်ႈႁႅၼ်းတူဝ် တႃႇတွင်ႈထၢမ်ငဝ်းလၢႆးဢၼ်မၼ်းလႆႈထူပ်းမႃးၼၼ်ႉၼႆယူႇ။
သႅင်လိုၼ်းၼၼ်ႉၵေႃႈ ၵႂႃႇၸူးၽူႈၸတ်းသေ
“မီးလွင်ႈသင်ၶႃႈ မိူဝ်ႈၵႆႈလုၵ်ႈဢွၼ်ႇၶဝ်လႆႈၵႂႃႇလၢတ်ႈယူႇႁိုဝ်”
“ဢေႃႈလၢတ်ႈယူႇၶႃႈ..ၶႃႈၵေႃႈၶႂ်ႈမႃးလၢတ်ႈလွင်ႈၼႆႉမိူၼ်ၵၼ် ၶႃႈဢမ်ႇၶႂ်ႈဢွၵ်ႇၶႃႈ”
“မၼ်းပဵၼ်သင်လႃႇ ဢမ်ႇၸႂ်ႈဝႃႈမၼ်းလူႉသုမ်းတီႈလႂ်လူး သူၵေႃႈလွတ်ႈၽေးမႃးယဝ်ႉဢမ်ႇၸႂ်ႈႁိုဝ် ပေႃးဢွၵ်ႇလႆႈတႄႉၵူၼ်းတူၺ်းမၼ်းၼမ်ထူၼ်ႈယဝ်ႉၵႃႈ”
“မိူဝ်ႈၼႆႉ ၶႃႈမႃးတႃႇဢွၵ်ႇၵၢၼ်ဢေႃႈ”
သႅင်လိုၼ်းဢဝ်ၽိုၼ်လိၵ်ႈဢွၵ်ႇၵၢၼ်မၼ်းတမ်းၵႂႃႇၼိူဝ်ၽိူၼ်သေ
“ၶႃႈဝူၼ်ႉဝႃႈၶႃႈတေသိုပ်ႇႁဵတ်းၵၢၼ်ၼႆႉဢမ်ႇလႆႈထႅင်ႈယဝ်ႉ သမ်ႉဝႃႈတူဝ်ၶႃႈဢမ်ႇပဵၼ်သင်ၵေႃႈ ၸႂ်ၶႃႈတႄႉဢမ်ႇပႆႇလီလႆႈ ၸွႆႈပွင်ႇၸႂ်ပၼ်သေၵမ်း”
ၽူႈၸတ်းၵၢၼ်ၵေႃႈ ၼင်ႈမိုင်ယူႇႁဵတ်းၼၼ် တေႃႇ
ထိုင်သႅင်လိုၼ်းပေႃးတေပူၼ်ႉၽၵ်းတူယဝ်ႉ။
“လိုဝ်ႈဝႆႉၵွၼ်ႇလႄႈ ႁဝ်းၵေႃႈႁဵတ်းၵၢၼ်ၸွမ်းၵၼ်မႃးႁိုင် ပေႃးသူၽွမ်ႉယဝ်ႉၸင်ႇမႃးၶိုၼ်းလႄႈၼႃႈ ဝႂ်ဢၼ်ၼႆႉႁဝ်းတေၵဵပ်းဝႆႉပၼ်ၵူၺ်း”
“ဢေႃႈၶႃႈ”
“ၶၢဝ်းတၢင်းႁူၵ်းလိူၼ် ဝူၼ်ႉဝႃႈသူတေပၼ်ၶေႃႈတွပ်ႇႁဝ်းၶိုၼ်းလႆႈယူႇ”
သႅင်လိုၼ်းပႆဢွၵ်ႇၽၵ်းတူၵႂႃႇဢမ်ႇတွပ်ႇသင်ၶိုၼ်းယဝ်ႉ။
ပၢၵ်ႇဝၼ်းႁဵင်ပီ သႅင်လိုၼ်းဢဝ်ၶူဝ်းဢဝ်လဵင်းတၢင်ႇၵႃးလူင်မိူဝ်းသမ်ႉပေႃးတဵမ်
“မႂ်းတေႃႉႁိူၼ်းတေႃႉယေးမႃးမူတ်းယဝ်ႉၵႃႈၼႆႉ” မႄႈၶဝ်ဝႃႈႁင်းမၼ်း
“ဢေႃႈ”
ၼပ်ႉတႄႇဢဝ်ဝၼ်းမၼ်းမႃး ၼွၼ်းတင်းဝၼ်းတင်းဝၼ်း ဢမ်ႇလုၵ်ႉဢမ်ႇၵႂႃႇတၢင်းလႂ် ဢမ်ႇၶႂ်ႈၵိၼ်ၶႂ်ႈယႅမ်ႉသင် ပဵၼ်ၼၼ်ယူႇသၢမ်သီႇဝၼ်းၼႆ့ မႄႈၶဝ်တူၺ်းဢမ်ႇလႆႈယဝ်ႉ။
“မႂ်းပဵၼ်ႁင်လႃႇဢေးလိုၼ်း လုၵ်ႉမႃးႁႃၵိၼ်ၶဝ်ႈၵိၼ်ၼမ်ႉႁေဢိၼ်ႉလႄႈ ၵဝ်ႁၼ်မႂ်းပဵၼ်ၼႆမႃးမီးဝူင်ႈယဝ်ႉၼႆႉ ဢမ်ႇယူႇလီၵေႃႈၵႂႃႇႁူင်းယႃဢိူဝ်ႈမႂ်းၵေႃႈ”
“ၶႃႈၶႂ်ႈၼွၼ်းၵူၺ်း”
“မႂ်းၼွၼ်းမႃးလၢႆဝၼ်းယဝ်ႉၸွင်ႇႁူႉ လုၵ်ႉဢဝ်ၶဝ်ႈၵႂႃႇသူင်ႇဢူႈသူတီႈၼႃးလႄႈ ၵဝ်တေမိူဝ်းမႃႇသႃႇမႄႈထဝ်ႈဢွင်ႇႁိူၼ်းၼိူဝ်ၼၼ်ႉဢိူဝ်ႈ.. လုၵ်ႉႁေၵမ်ႉလႄႈ ဢူႈသူတွင်ႉမႆႈၶဝ်ႈယဝ်ႉဢိူဝ်ႈမႂ်း”
“ဢိူမ်ႈ..”
မႄႈၶဝ်ပႃႈၼူႉၵႂႃႇသေၵမ်ႉၼိုင်ႈ ဢမ်ႇပေႃးလိုမ်းၸႂ်လႆႈလႄႈ ၶိုၼ်းမႃးတီႈႁိူၼ်း ႁၼ်ၵွၵ်းၶဝ်ႈတမ်းဝႆႉယူႇ။
“မႂ်းပႆႇလုၵ်ႉႁဢေးလိုၼ်း”
ယိပ်းဢဝ်ၵွၵ်းၼမ်ႉၼိူဝ်ၶဵင်ႇတၢင်းၼွၵ်ႈၼၼ်ႉ ၶဝ်ႈမိူဝ်းပၢၵ်ႈၽႃႈႁူမ်ႇမၼ်းသေယဝ်ႉ ဢဝ်ၼမ်ႉထွၵ်ႇသႂ်ႇၼႃႈမၼ်းသမ်ႉပေႃးလႆႈလုၵ်ႉမႃးယဝ်ႉ။
မၼ်းၵေႃႈၽုၼ်ႇၽၢၼ်ႇလုၵ်ႉမႃးသေ သမ်ႉမႃးၼင်ႈၸိူဝ်ႈယူႇတီႈပႃႇၽၵ်းတူၼၼ်ႉထႅင်ႈ။
“မႂ်းပႆႇၵႂႃႇၵွၼ်ႇႁၼႆႉ”
တႄႇၸဵမ်မိူဝ်ႈမႃး မိူဝ်ႈၼႆႉပဵၼ်ဝၼ်းဢၼ်မၼ်းဢွၵ်ႇၽၵ်းတူဝၢင်းၶဝ် ဢွၵ်ႇလႄႇၼႂ်းဝၢၼ်ႈသေ ၵႂႃႇတီႈၼႃးသမ်ႉဢမ်ႇႁၼ်ပေႃႈၶဝ် ၵႂႃႇထၢမ်ပိူၼ်ႈၵေႃႈ မီးတၢင်းပုၼ်ႉမီးတၢင်းပုၼ်ႉ မၼ်းၵေႃႈမိူၼ်ႇလူင်ၵႂႃႇတိၵ်းတိၵ်း သမ်ႉပေႃးၵႂႃႇထိုင်လႅၼ်ၼႃးပုၼ်ႉယဝ်ႉ။
“ဢေးၼၢင်းမႂ်းမႃးႁဵတ်းႁင်တၢင်းၼႆႉလႃႇ”
လုင်းသိုဝ်ႉ ဢၼ်တိုၵ်ႉၵႂႃႇတူၺ်းၼႅင်ႈတၢင်းၼွင်လူင်ၼၼ်ႉ မႃးၺႃးမၼ်း
“ၶႃႈၵႂႃႇႁႃဢူႈႁဝ်းဢေႃႈ”
“ဢူႈသူမီးပဵၼ်တၢင်းပုၼ်ႉ”
“တၢင်းပုၼ်ႉတိၵ်းတိၵ်း…ထၢမ်ၽႂ်ၵေႃႈတၢင်းပုၼ်ႉတိၵ်းတိၵ်းဝႃႇ” ၼင်ႈႁေႁႆႈယူႇၽၢႆႇၼႃႈလုင်းသိုဝ်ႉၼၼ်ႉယဝ်ႉ။
“ဢေးၼၢင်း မႂ်းတေႁႆႈႁႅင်ႉလႃႇ ၵႂႃႇလႄႈၵဝ်ၵႂႃႇသူင်ႇမႂ်း”
မၼ်းၵေႃႈၸွမ်းလင်လုင်းသိုဝ်ႉၵႂႃႇၼင်ႇလုၵ်ႈဢွၼ်ႇၼၼ်ႉသေ ၸဵတ်ႉၼမ်ႉတႃမၼ်းယူႇသိတ်ႉသိုတ်ႉ။
မိူဝ်ႈၵပ်ႉၵိၼ်းၸႂ်ၼႃႇၼၼ်ႉ လွင်ႈလဵၵ်ႉလဵၵ်ႉဢွၼ်ႇၵူၺ်းၵေႃႈ ႁဵတ်းႁႂ်ႈႁွင်ႉႁႆႈဢွၵ်ႇမႃးလႆႈယဝ်ႉ။ လွင်ႈလဵၵ်ႉဢွၼ်ႇဢၼ်ပိူၼ်ႈႁၼ်ယူႇၼၼ်ႉ တွၼ်ႈတႃႇၵူၼ်းၵေႃႉၼိုင်ႈတႄႉ မၼ်းပဵၼ်ဢၼ်ယႂ်ႇၼႃႇတေႉဢိူဝ်ႈ ဢမ်ႇၸၢင်ႈလၢတ်ႈၼႄၽႂ် ဢမ်ႇၸၢင်ႈႁႃလွင်ႈလႂ်သေႁွင်ႉႁႆႈလူး။
မၼ်းၵေႃႈဢဝ်တင်းၵွၵ်းၶဝ်ႈၼၼ်ႉ ၵႂႃႇဝႆႉပၼ်ဢူႈၶဝ်တီႈထဵင်ၼႃးၼၼ်ႉသေ ၼင်ႈမိူၼ်ႇယူႇၸိူင်ႉၼၼ်၊ ယူႇယူႇၵေႃႈငဝ်ၼွၼ်းတီႈၼႂ်းထဵင်ၼႃးၼၼ်ႉထႅင်ႈ။
“ဢေးလႅင်ၼႆႉၵဝ်ဝႃႈမၼ်းၼွၼ်းတၢင်းဝၼ်းတၢင်းဝၼ်းဢမ်ႇဢိမ်ႇႁၼႆႉမႃႈ မိူဝ်းၼွၼ်းတီႈႁိူၼ်းပုၼ်ႉလႄႈလုၵ်ႈ”
“ၶႃႈၼွၼ်းၵမ်ႉၵူၺ်း”
“ၶူဝ်းမႂ်းၵေႃႈပေႃးယမ်းယူႇသဵင်ႈ ၵုပ်းၵေႃႈဢမ်ႇတိုဝ်း ၽႃႈယၢင်ၵေႃႈမီးယူႇလူးၼၼ်ႉ ဢမ်ႇဢဝ်မႃးလႃႇ မႂ်းတေဢမ်ႇယူႇလီယဝ်ႈ”
မၼ်းၵေႃႈၼွၼ်းလပ်းယဵၼ်လူင်ၵႂႃႇ ဢူႈၶဝ်သွမ်ႈၼႃးမႃးၶိုၼ်းတီႈထဵင်ၵေႃႈ တိုၵ်ႉႁၼ်မၼ်းၼွၼ်းယူႇလႄႈ။
“ဢေးလႅင်ၵႂႃႇႁဝ်းမိူဝ်းလုၵ်ႈ..”
ဢူႈၶဝ်မႃးၸၼ်ၶႅၼ်မၼ်းသေ မၼ်းၵေႃႈလုၵ်ႉမိူဝ်းၵႂႃႇယဝ်ႉ။ ၼမ်ႉၵေႃႈဢမ်ႇဢၢပ်ႇ မိူဝ်းလၢႆႈၶူဝ်းယဝ်ႉဢဝ်ၽႃႈသေ ၼွၼ်းၶူတ်းယူႇၵၢင်ႁိူၼ်းၼၼ်ႉထႅင်ႈ။
ယၢမ်းၵၢင်ၶမ်ႈ ဢူႈမႄႈၶဝ်ႁၼ်မၼ်း ပဵၼ်ၼၼ်ၵေႃႈၸႂ်ဢမ်ႇလီမႃးလႄႈ
“ဢူႈသူဢႃႈ ႁဝ်းဝႃႈတႄႉ ဢေးလိုၼ်းႁဝ်းၼႆႉလူဝ်ႇဢဝ်ၵႂႃႇၸူးလုင်းသြႃႇယူႇယူဝ်ႉ”
“ႁဝ်းၵေႃႈၶႂ်ႈဝႃႈၼၼ်ယူႇဢိူဝ်ႈ မိူဝ်ႈၼႆႉၵေႃႈၵႂႃႇၼွၼ်းထဵင်ၼႃးၼၼ်ႉထႅင်ႈယဝ်ႈ”
