မိုဝ်းသဵမ်ႈသဵမ်ႈမၼ်းၸၢႆးၼၼ်ႉ တုမ်ႉတွတ်ႇႁၼ်မႃးၼႂ်းတႃ ၶမ်ႈၶိုၼ်းလပ်းသိင်ႇလူင်ၼၼ်ႉ ႁူႉတူဝ်မႃးၵႅပ်ႉၼိုင်ႈသေ မိုဝ်းဢၼ်ဢမ်ႇမီးႁႅင်းယူႇၼၼ်ႉၵေႃႈ မီးၵူၼ်းၼူတ်ႈမိပ်ႇပၼ်ဝႆႉယူႇ၊ သၢႆတႃဢၼ်တူၺ်းႁၼ်ယူႇဢိတ်းၼိုင်ႈၼၼ်ႉၵေႃႈ လႆႈႁၼ်ၵူၼ်းသုပ်းမၢၵ်ႇႁူဝ်လမ် ပူၵ်ႉႁေႃႇတင်းၼႃႈ ဝႆႉႁူးႁူၺ်ႇတႃဢိတ်ႉၼိုင်ႈၵူၺ်း မၼ်းလပ်းသိင်ႇၼႃႇလႄႈ ဢမ်ႇႁၼ်ၸႅင်ႈလီသေယဝ်ႉၵေႃႈႁဵတ်းႁႂ်ႈမၼ်းလပ်းၵႂႃႇၶိုၼ်းယဝ်ႉ။
သႅင်လိုၼ်းၼၼ်ႉၵေႃႈယင်းတိုၵ်ႉမိူၼ်ႇတူၺ်းၸိုၼ်ႈမိူင်း တေႃႇၸဝ်ႈမၼ်းပေႃးဝၢႆႇၼႃႈၸူးယဝ်ႉ ယၵ်ႉတူၺ်းႁူၺ်ႇတႃၼၼ်ႉသေ ၵူၺ်းၵႃႈဢမ်ႇႁူႉပဵၼ်သင်လႄႈ သၢႆတႃၸိုၼ်ႈမိူင်းဢၼ်ယၵ်ႉတူၺ်းမၼ်းၼၼ်ႉ ဢဝ်မၼ်းသမ်ႉပေႃးလႆႈပၢႆႈပႅတ်ႈၵမ်းလဵဝ်။
“ႁၼ်ၽႂ်ၵေႃႈထၢင်ႇပဵၼ်ၵူၼ်းၵေႃႉၼၼ်ႉယူႇတိၵ်းတိၵ်းတႄႉ ဢမ်ႇၸႂ်ႈလၢႆးမၼ်းယဝ်ႉသႅင်လိုၼ်း” လၢတ်ႈယူႇၼႂ်းၸႂ်မၼ်း။
“ယဝ်ႉႁဢေးလိုၼ်း” ပႃႈၸိင်ႇႁွင်ႉထၢမ်။
“ယဝ်ႉၶႃႈ”
“ပေႃးယဝ်ႉၵေႃႈ ၵႂႃႇလႄႈႁဝ်းမိူဝ်း”
သႅင်လိုၼ်းၵေႃႈၼင်ႈတီႈၼင်ႈတၢင်းလင်သေယၵ်ႉတူၺ်းၸိုၼ်ႈမိူင်းမိူဝ်းၵႂႃႇတိၵ်းတိၵ်း။
သႅင်လိုၼ်းလႆႈၾူၼ်းမႂ်ႇမႃးယဝ်ႉ ဢၼ်ၶဝ်ႈလႆႈၵေႃႈၶဝ်ႈၶိုၼ်းဢၼ်ၵဝ်ႇ၊ ဢၼ်ဢမ်ႇၶဝ်ႈလႆႈၵေႃႈ ႁဵတ်းမႂ်ႇၶိုၼ်းသေ ၸင်ႇၵပ်းသိုပ်ႇတၵ်ႉၸူးပီႈၸွမ်ၵႂႃႇ ပီႈၸွမ်ဢၼ်လႆႈႁၼ်ဝႃႈပဵၼ်သႅင်လိုၼ်းၼႆၵေႃႈ ၼႅတ်ႈသိုပ်ႇၾူၼ်းဢုပ်ႇၵမ်းလဵဝ်၊ သႅင်လိုၼ်းသမ်ႉပေႃးဢမ်ႇတၼ်းလႆႈလၢတ်ႈသင်
“ႁၢႆၵႂႃႇတၢင်းလႂ်လႃႇ တေၵႂႃႇလႂ်ၵေႃႈဢမ်ႇလၢတ်ႈ ယွၼ်းဢွၵ်ႇၵၢၼ်ၵေႃႈဢမ်ႇလၢတ်ႈ မိူဝ်းႁႃတီႈႁိူၼ်းၵေႃႈဢမ်ႇၺႃး ၵပ်းသိုပ်ႇၵေႃႈဢမ်ႇလႆႈ”
“ၶႃႈၵႂႃႇလိုဝ်ႈတီႈဝတ်ႉဢေႃႈ”
သဵင်မၼ်းၸင်ႇၼိမ်ၵႂႃႇသေ “ၼၼ်ႁႃႉ ပဵၼ်ႁိုဝ်မႃးလႃႇမိူဝ်ႈလဵဝ်”
“လီမႃးယဝ်ႉဢေႃႈ”
“တေမႃးၶိုၼ်းယူႇႁႃႉ”
“ပႆႇႁူႉယဝ်ႉၶႃႈ..”
“ဢမ်ႇၶႂ်ႈမႃးၵေႃႈဢမ်ႇပဵၼ်သင် ပေႃးတေမႃးၶိုၼ်းၵေႃႈ ၶႂ်ႈၶၢႆႉပုၼ်ႈၽွၼ်းတူၺ်းၵေႃႈလႆႈယူႇ”
“ဝူၼ်ႉတူၺ်းၵွၼ်ႇၶႃႈ ၵိုတ်းပဵၼ်လၢႆလိူၼ်ၵမ်းလဵဝ်”
“ဢိူဝ်ႈ..ပေႃးဢမ်ႇၸၢင်ႈႁဵတ်းႁင်ၵေႃႈ မႃးလႄႇၵၼ်ၽွင်ႈလႄႈ ဢၢႆႈၸၢႆးၶႃၵမ်းၵမ်းထၢမ်ႁႃၼွင်ႉယူႇၼေႈ”
“ဢေႃႈ..”
“ပေႃးမီးလွင်ႈသင်လူဝ်ႇၸွႆႈၵေႃႈလၢတ်ႈလႄႈၼ”
“တေႉဢေႃႈပီႈၸွမ် ၶႃႈယွၼ်းထၢမ်ဢိတ်ႉလူး”
“ထၢမ်မႃးလႄႈ”
“ၶမ်ႈၼၼ်ႉ..ၶမ်ႈဢၼ်ၵႂႃႇၸွႆႈၶႃႈၼၼ်ႉ..ပီႈၸွမ်ၵႂႃႇယူႇႁႃႉ”
“ၵႂႃႇဢိူဝ်ႈ..ႁဝ်းၵႂႃႇထိုင်ၵေႃႈ ပိူၼ်ႈပေႃးႁွပ်ႇမႂ်းၶိုၼ်ႈၵႃးယဝ်ႉၼႃႇ”
“ပီႈၸွမ်ၸွင်ႇတၼ်းႁၼ်ၼႃႈမၼ်းၼႄႇ ၵေႃႉဢၼ်ႁွပ်ႇၶႃႈၶိုၼ်ႈၵႃးၼၼ်ႉ”
“ႁၼ်ၼႃႈၵေႃႈၸၢင်ႈတေႁၼ်သင်လႃႇ မီးႁူးတႃၵူၺ်း”
“မိူဝ်ႈၵႂႃႇႁူင်းယႃလူး ၶဝ်ဢမ်ႇၵႂႃႇသူင်ႇႁ”
“ၶဝ်ၸိူဝ်းဢၼ်မႃးၸွမ်းၼၼ်ႉတႄႉလၢတ်ႈဢိူဝ်ႈ မၼ်းဢဝ်ၼွင်ႉမွၼ်တၵ်းမၼ်းသေ ၼူတ်ႈပၼ်မိုဝ်းၼွင်ႉတေႃႇထိုင်ႁူင်းယႃယဝ်ႉ ဢုမ်ႈသႂ်ႇပၼ်ၼိူဝ်ၵူႇသေ ၶဝ်ၵေႃႈပွၵ်ႈၵႂႃႇၶိုၼ်း ပီႈၶဝ်သမ်ႉယူႇလမ်းလင်လႄႈ ဢမ်ႇတၼ်းလႆႈႁၼ်”
“ပီႈဢမ်ႇႁူႉၸၵ်းၶဝ်ၵႃႈ”
“တေႁဵတ်းႁိုဝ်ႁူႉၼႄႇ ႁၼ်ၼႃႈၵၼ်ၵေႃႈပူၵ်ႉၼႃႈပူၵ်ႉတႃသေႇသေႇ မီးႁူဝ်ၼႃႈၶဝ်ၵူၺ်းဢိူဝ်ႈ”
“ၸွင်ႇလႆႈထႆႇဝႆႉၼႄႇၶႅပ်းႁၢင်ႈၶဝ်”
“ၶဝ်ဢမ်ႇပၼ်ထႆႇ”
“သူင်ႇမႃးပၼ်လႄႈ ၶႃႈႁူႉယူႇဝႃႈပီႈမီး”
“ပေႃးမိူၼ်ၼႆတႄႉ လူဝ်ႇမႃးႁဵတ်းၵၢၼ်ၶိုၼ်းယဝ်ႉ ပေႃးမႃးၸင်ႇမႃးတူၺ်းဢဝ်လႄႈၼႃႈ ၵၢၼ်သုၵ်ႉၼႃႇမိူဝ်ႈလဵဝ် မီးၵေႃႉလဵဝ်ၵူၺ်းၼႆႉ”
“ႁဵတ်းၼႆတႃႇသေႇယဝ်ႈ”
သႅင်လိုၼ်းၵေႃႈ ႁၼ်ဢူႈၶဝ်ႁဵတ်းၶဵင်ႇတၢင်ႇယူႇၼႃႈႁိူၼ်းလႄႈ မၼ်းၵေႃႈၵႂႃႇၸွႆႈဢူႈၶဝ် သၢၼ်ၽႃၶဵင်ႇတၢင်ႇယူႇ။ တေဝႃႈဢမ်ႇမေႃၵေႃႈ
ပဵၼ်ႁိူၼ်းၸဝ်ႈသၢၼ်ပဵတ်ႈသၢၼ်ၵူၺ်သၢၼ်သွင်းၶၢႆယဝ်ႉၼႃႇ။
“ဢၢႆႈၸၢႆးဢမ်ႇလၢတ်ႈႁင်မႃးၵွၼ်ႇၼႄႇတီႈႁိူၼ်း”
“မၼ်းထၢမ်ႁႃမႂ်းၵူၺ်းဢိူဝ်ႈ”
“ဢမ်ႇယွၼ်းငိုၼ်းဢူႈႁဝ်းၶဝ်ၵွၼ်ႇၼႄႇ”
“ယွၼ်းဢိူဝ်ႈ..ၶွင်မၼ်းဢမ်ႇၸၢင်ႈယွၼ်းမႂ်းယဝ်ႉလႄႇ”
“ပေႃးၶႃႈဢမ်ႇၵႂႃႇႁဵတ်းၵၢၼ်ၶိုၼ်းလႆႈႁဢူႈ”
“မႂ်းႁမ်ႉတေႁဵတ်းႁင်လႃႇ ႁႂ်ႈမႂ်းႁဵတ်းသူၼ်ႁဵတ်းၼႃးၵေႃႈဢမ်ႇပဵၼ်လႆႈၵွၼ်ႇ”
“သၢၼ်ၵူၺ်သၢၼ်သွင်းၶၢႆၸိူင်ႉဢူႈႁဝ်းၼႆႉၼႃႇ ၶႃႈမေႃယူႇလူး”
“ႁူး…မိူဝ်ႈလဵဝ်ၼႆႉမႂ်းႁူႉ ပိူၼ်ႈၸူးငၢႆႈၼႃႇမႂ်း ၸူးဢဝ်ၵေႃႇဢၼ်ပိူၼ်ႈႁဵတ်းၼၼ်ႉလၢႆလၢႆယဝ်ႈ ၵႃႈမၼ်းၵေႃႈထုၵ်ႇ၊ ပိူၼ်ႈဢမ်ႇပေႃးသူႈၸႂ်ႉယဝ်ႉ ၸိူင်ႉၼႆ မႂ်းႁၼ်ႁိုဝ် လူင်ႈလူင်ၵဝ်ႁွႆႈၽႃၼၼ်ႉ မီးပီယဝ်ႉယူဝ်ႉ ဢမ်ႇႁၼ်ၽႂ်မႃးထၢမ်သိုဝ်ႉႁေပွၵ်ႈ”
“ၶွင်တမ်ၶဝ်ၼႆၵေႃႈ ပိူၼ်ႈဢမ်ႇၽတ်းမိူၼ်ၵူႈပွၵ်ႈယဝ်ႉလႄႇ ယဝ်ႉၶူၵ်ႉၸၢၵ်ႈလၢႆလၢႆ ၵူၺ်းလူးၼေႃႈ”
“ၼၼ်ႉယဝ်ႈ မီးၸဝ်ႈထူဝ်ႇၼဝ်ႈၵူၺ်းဢိူဝ်ႈ ၼိုင်ႈပီၼိုင်ႈပွၵ်ႈမႃးသင်ႇ”
“ႁဵတ်းသူၼ်ၽၵ်းၶၢႆၼႄႇတေႃႈ”
“ၸိူင်ႉၼင်ႇမႂ်းၼႆႉၵႃႈတေၵႆႉႁဵတ်းသူၼ် ၸဵမ်လဵၵ်ႉတေႃႇယႂ်ႇ ၽုၵ်ႇၽၵ်းၵူၺ်းတင်းဢမ်ႇတွၼ်ႉၽုၵ်ႇႁေပွၵ်ႈ”
“ႁဵတ်းႁိုဝ်လႄႈဝႃႇဢမ်ႇမေႃဢႃႈ ၵႂႃႇတူၺ်းလႄႈ မွၵ်ႇၼႂ်းဝၢင်းၵျွင်းၸဝ်ႈၶၢဝ်ၶဝ်ၼၼ်ႉ ဢွၵ်ႇၶႅမ်ႉပေႉတၢၼ်ႇႁင်”
“ဢိူဝ်ႈ..မႂ်းႁဵတ်းတူၺ်းႁေလိူၼ်ၵွၼ်ႇလႃႈ”
“ႁဵတ်းဢီႈႁင်ၶိူဝ်..”
မႄႈၶဝ်ၶဝ်ႈဝၢင်းႁိူၼ်းမႃးသေငိၼ်းၶႃဢုပ်ႇၵၼ်လႄႈလၢတ်ႈၸွမ်း
“မၼ်းဝႃႈတေႁဵတ်းသူၼ်တီႈႁိူၼ်းၼႆႉႁေ ဢမ်ႇၵႂႃႇႁဵတ်းၵၢၼ်ယဝ်ႉၼႆဝႃႇ”
“မဵဝ်းမၼ်းႁဵတ်းလႆႈၵေႃႈဢမ်ႇၸႂ်ႈ ႁဵတ်းသူၼ်ႁဵတ်းၼႃးထၢင်ႇဝႃႈမၼ်းငၢႆႈငၢႆႈၼႄႇမႂ်း မဵဝ်းၵူဝ်ၵူမ်ႇၵူဝ်လိၼ်ၸိူင်ႉၼႆပေႃးမႂ်းႁဵတ်းလႆႈၵဝ်တႃႉဢၢမ်းလႃႈ”
ဢူႈၶဝ်ၵေႃႈယၵ်ႉတူၺ်းမၼ်းသေယုမ်ႉယူႇ။
“မႂ်းႁမ်ႉႁဵတ်းႁိုဝ်မႃးလႃႇၼႆႉ”
“မႃးၸွမ်းပႃႈၸိင်ႇၶဝ်”
“ၵဝ်မီးတီႈသႅင်ႇၶဝ် တမ်ႉဢမ်ႇႁၼ်မႂ်းလႃႇ”
“ၶဝ်မႃးသူင်ႇၶႃႈယဝ်ႉ ၸင်ႇပူၼ်ႉမိူဝ်းႁိူၼ်းၶဝ်”
“ၸႂ်ႈၵႃႈ…”
“မႄႈႁဝ်းသိုဝ်ႉႁင်မႃးလႃႇ..”
“သိုဝ်ႉငႃးမႃးဢိူဝ်ႈ..ၵဝ်လူဝ်ႇႁဵတ်းထူဝ်ႇၽူးၵဝ်”
“မႄႈႁဝ်းႁဵတ်းထူဝ်ႇၽူးႁ ၶမ်ႈၼႆႉ”
“ဢိူဝ်ႈ..”
“လူၺ်ယဝ်ႉၼႄႇ..”
“တိုၵ်ႉတေမႃးလူၺ်ယူႇဢိူဝ်ႈၼႆႉ..”
“မႄႈႁဝ်းၵႆႉႁဵတ်းထူဝ်ႇၽူးပေႉတၢၼ်ႇၼၢၼ်ႉ ဢမ်ႇသိုဝ်ႉၸၢၵ်ႈမႃးဢဝ်လႃႇ တႃႉဝႆး”
“ၵဝ်ၶၢၼ်ႉသိုဝ်ႉ တၢင်းၾႆးမႃးၵေႃႈဢမ်ႇမၢၼ်ႇၸိူင်ႉၼၼ် မၼ်းၵေႃႈဢမ်ႇၼမ်ႉယဝ်ႉၵွၼ်ႇ တဢဝ်မိုဝ်းၼႆႉလႃႈ”
“ၵမ်ႉၸင်ႇၵႂႃႇၸွႆႈလူၺ်”
ပေႃးဝႃႈငိၼ်းပႃႈဢူႉႁဵတ်းထူဝ်ႇၽူးၼႆတႄႉ ၵၢင်ၶမ်ႈမႃးၵူၼ်းပေႃးၵိုၼ်းလူင်ဝႆႉ ၼႂ်းဝၢင်းႁိူၼ်းလူင်ၼၼ်ႉတေႉဢိူဝ်ႈ။ ၵမ်ႈၽွင်ႈၸွၵ်း ၵမ်ႈၽွင်ႈၵိၼ် လပ်းသိင်ႇယဝ်ႉၵေႃႈ သမ်ႉပေႃးသဵင်ႈမူတ်းယဝ်ႉၼႃႇ။
“ၶၢႆလီဝႆႉၵဝ်ႇလူးၼႆႉ ပေႃးႁဵတ်းၵူႈၶမ်ႈတႄႉ”
“ႁဵတ်းၵူႈၶမ်ႈၵေႃႈ ၸွင်ႇၶႅၼ်းပိူၼ်ႈတေၶႂ်ႈၵိၼ်ၵူႈၶမ်ႈၵေႃႈဢမ်ႇၸႂ်ႈ”
သႅင်လိုၼ်းမႃးယူႇႁိူၼ်းၵေႃႈ တေၵႂႃႇႁႃလႄႇၵူၼ်းပၢၼ်လဵဝ်ၵၼ်ၵူၺ်းပေႃးဢမ်ႇမီး၊ မၢင်ၸိူဝ်းၵေႃႈပၢႆႈၽၢတ်ႇယၢၼ်ႁိူၼ်းယေးသေ ၵႂႃႇႁဵတ်းၵၢၼ်မိူင်းၵႆၵၼ်ၼမ်ၼႃႇယဝ်ႉ၊ ဢၼ်ၵိုတ်းၵေႃႈ ဢမ်ႇပူၼ်ႉသေသွင်သၢမ်ၵေႃႉ ၶဝ်ၸိူဝ်းၼၼ်ႉသမ်ႉ တႄႇၼႃႈႁေႃတေႃႁိူၼ်းသေ မီးလုၵ်ႈမီးလၢင်းၵၼ်ယဝ်ႉလႄႈ ဝၼ်းဝၼ်းၵုမ်ႇမိုင်ႉႁဵတ်းၵၢၼ်ၽႂ်ၵေႃႈဢမ်ႇတၼ်းႁင်းၽႂ်ႁင်းမၼ်းယဝ်ႉ။
မၼ်းၵေႃႈယူႇႁိူၼ်းသေ လဵၼ်ႈၾူၼ်းၵူၺ်းလႄႈ ၵူၼ်းႁဵတ်းၵၢၼ်သေႇသေႇ မႃးယူႇလၢႆလၢႆၼႆၵေႃႈ ၶႂ်ႈၶၢၼ်ႉဝႆႉယူႇႁင်းမၼ်း။ ဢမ်ႇၸၢင်ႈႁဵတ်းႁင် ၵႂႃႇႁႃသိုဝ်ႉတၢင်းၵိၼ်တီႈသႅင်ႇပႃႈၸိင်ႇၶဝ်ယဝ်ႉ။
