ၵိၼ်ၶဝ်ႈႁေဢုပ်ႇၵၼ် ၵၢင်ဝၼ်းသမ်ႉပေႃးလပ်းသိင်ႇယဝ်ႉၼႃႇ၊ သႅင်လိုၼ်းၼၼ်ႉၵေႃႈ ၸူးဢဝ်လႅင်းလၢဝ်လႄႈလႅင်းႁိင်ႇႁွႆႈၸွမ်းတၢင်းၼၼ်ႉသေ မိူဝ်းၵႂႃႇႁင်းမၼ်း။
“ၵႂႃႇလႂ်မႃးလႃႇ ၾႆးၵေႃႈဢမ်ႇပႃး”
“တႆႈၾႆးထွင်ႇပၼ်တႃၵူၼ်းပေႃးဢမ်ႇႁၼ်သင်ယဝ်ႈ”
ၾႆးသၢႆဝွႆးလူင်းသႅင်လိုၼ်းၸင်ႇႁႃႁၼ်လီလီဝႃႈပဵၼ်ၸိုၼ်ႈမိူင်း။
“ၵႂႃႇလႂ်မႃးလႃႇၼႆႉႁမ်ႉ”
“မိူဝ်းႁိူၼ်းၼႃႉႁဝ်းၶဝ်မႃး”
“မိူဝ်းလွႆးလွႆးပေႃးၼၼ်”
“မိူဝ်းလီလီၼႃႉ ၵွင်ၶီႈၵႂၢႆးၼမ်ၼႃႇၵူၺ်ႉၼႃႈ ဢဝ်ၾႆးႁဝ်းမိူဝ်းလႄႈ ၸွင်ႇၵွႆႈမႃးသူင်ႇၶိုၼ်းၵေႃႈလႆႈ”
“ပေႃးသူမိူဝ်းသူင်ႇႁဝ်း ႁဝ်းပေႃးတေဢမ်ႇလႆႈဢဝ်မႃးသူင်ႇၶိုၼ်းယဝ်ႉႁိုဝ်လႃႇ”
“ၵႂႃႇလႄႈႁဝ်းမိူဝ်းသူင်ႇ”
“ဢမ်ႇပဵၼ်သင် လၢတ်ႈလဵၼ်ႈၵူၺ်း ႁဝ်းႁၼ်တၢင်းမိူဝ်းယူႇ တၢင်းလင်ပုၼ်ႉၵေႃႈ ၶီႈၵႂၢႆးၼမ်ထူၼ်ႈယဝ်ႉဝႃႈ”
“ပေႃးႁဝ်းၶႂ်ႈမိူဝ်းသူင်ႇတေႉလူး”
“ၵေႃႈမိူဝ်းလႄႈ..ၸၢင်ႈပဵၼ်သင်”
ၵေႃႉၼိုင်ႈထွင်ႇၾႆးၸွမ်း ပႆၶႅပ်ႇၶၢင်ႈၵၼ်ၵႂႃႇ
“ဢမ်ႇလႆႈႁဵတ်းၵၢၼ်ႁ မႃးယူႇႁိူၼ်းႁိုင်ၵျ” သႅင်လိုၼ်း ထၢမ်ၸိုၼ်ႈမိူင်း
“ပေႃးမီးၵၢၼ်ၸွင်ႇၵွႆႈၵႂႃႇၶိုၼ်း သူလူးဢမ်ႇၵႂႃႇယဝ်ႉၼႄႇ”
“ပႆႇႁူႉယဝ်ႉ တိုၵ်ႉဝူၼ်ႉယူႇ ၵႂႃႇမိူင်းထႆးလီႁႃႉ ယူႇႁိူၼ်းသေႁဵတ်းၵၢၼ်ၼႆ”
“ၸိုင်ဝႃႈႁဵတ်းၵၢၼ်တီႈသိုဝ်ႇၶၢဝ်ႇ ဢမ်ႇႁဵတ်းယဝ်ႉၵႃႈ”
“ႁဝ်းယွၼ်းဢွၵ်ႇယဝ်ႉ ၵူၺ်းၵႃႈၶဝ်ၵေႃႈပႆႇဝႃႈႁိုဝ် ႁႂ်ႈႁဝ်းလိုဝ်ႈသေ ဝူၼ်ႉတူၺ်းလီလီၼႆဝႃႇ”
“ၵၢၼ်တီႈၼၼ်ႈၵေႃႈလီယူႇလူးႁဝ်းဝႃႈ”
“လီယူႇၵူၺ်း ၵူၺ်းၵႃႈ ႁဝ်းဢမ်ႇၶႂ်ႈႁဵတ်းယဝ်ႉ”
“ပဵၼ်သင်လႃႇ..”
“ပေႃးမႃးဝူၼ်ႉတူၺ်းယဝ်ႉ ပဵၼ်ၵူၼ်းဢဝ်ၶၢဝ်ႇလႄႈပဵၼ်သိုၵ်းၼႆႉဢမ်ႇပေႃးပိူင်ႈၵၼ်ၼႃ”
“မၼ်းသမ်ႉမိူၼ်ၸိူင်ႉႁိုဝ်လႄႈဝႃႈဢမ်ႇပိူင်ႈ”
“မၼ်းယူႇၼႂ်းၽေးၶဵၼ်လႆႈတႃႇသေႇ ပဵၼ်သိုၵ်းတင်းမီးၵွင်ႈၵႅတ်ႇၶႄတူဝ်ယူႇ ပဵၼ်ၽူႈဢဝ်ၶၢဝ်ႇ ဢမ်ႇမီးသင်ႁူမ်ႇလူမ်ႈပၼ်လူး”
“ၵူၺ်းၵႃႈ ၶၢဝ်ႇၼၼ်ႉၵေႃႈမိူၼ်မၢၵ်ႇၵွင်ႈၼိုင်ႈလုၵ်ႈသေ ယိုဝ်းတိူဝ်ႉသႂ်ႇၵူၼ်းတၢႆလႆႈၼမ်လိူဝ်မၢၵ်ႇၵွင်ႈၵွၼ်ႇလူး၊ ၵွင်ႉမၼ်းႁႅင်းၼႃႇၵွၼ်ႇယဝ်ႈ လိူဝ်ၼၼ်ႉၵေႃႈ ပဵၼ်ယႃလီဢၼ်ၸွႆႈၵူၼ်းလႆႈၼမ်လိူဝ်မေႃယႃၵွၼ်ႇလူး”
“ၵူၺ်းၵႃႈ မၼ်းၵေႃႈတုမ်ႉတိူဝ်ႉပႃးၵူၼ်းယိုဝ်းမၼ်းလႆႈဢိူဝ်ႈ၊ ၵေႃႈယဝ်ႉလႄႈဢမ်ႇၶႂ်ႈလၢတ်ႈယဝ်ႉ ဢမ်ႇၶႂ်ႈၵႂႃႇၵေႃႈဢမ်ႇၵႂႃႇၵူၺ်း”
“သူၵေႃႈယူႇတီႈႁိူၼ်းသေႁဵတ်းၵၢၼ်ၵူၺ်းၵေႃႈလႆႈယူႇၼႃႇ ႁဝ်းၵေႃႈယူႇၸွမ်းၼႆႉၵူၺ်းယဝ်ႉ ႁိုင်ႁိုင်ၵေႃႈၵႆႉလႆႈမႃးႁိူၼ်းယူႇ”
“လၢတ်ႈႁဝ်းႁဵတ်းသင် တၢၼ်ႇဝႃႈ တေမႃးယွၼ်းႁဝ်းယဝ်ႉယိုင်”
“ပေႃးမႃးယွၼ်းလႆႈယူႇၼႄႇ”
“ဢမ်ႇလႆႈ.. ႁဝ်းတေပႂ်ႉၵူၼ်းၵေႃႉဢၼ်ၸွႆႈသၢႆၸႂ်ႁဝ်းဝႆႉၵွၼ်ႇ တေထၢမ်တူၺ်းမၼ်းဝႃႈ ၸွင်ႇမၼ်းပႆႈတေႇၼႃႈႁိူၼ်း ပေႃးမၼ်းပႆႇတေႇ ႁဝ်းတေယွၼ်းတေႇၸွမ်းမၼ်းၵႃႈ”
“ပေႃးမၼ်းတေႇယဝ်ႉၼႃႇ”
“ယွၼ်းႁဵတ်းၼွႆႉမၼ်းလႆႈယူႇယူဝ်ႉ”
“ႁဝ်းပဵၼ်ၵူၼ်းၵေႃႉၼၼ်ႉလႆႈယူႇယူဝ်ႉပေႃးၼၼ်”
“တေဝႃႈႁိုဝ်ၵေႃႈ တူၺ်းလီလီယဝ်ႉမိူၼ်သူယူႇလူးၼႆႉ ဢမ်ႇၼၼ်ၵေႃႈပဵၼ်သူတေႉႁႃႉတေႃႈ”
“တေႁဵတ်းႁိုဝ်ပဵၼ်လႆႈလႃႇ” ႁွတ်ႈထိုင်ၽၵ်းတူၵိူၼ်ႇယဝ်ႉၵေႃႈ “ထိုင်ႁိူၼ်းယဝ်ႉ”
“ၸွင်ႇႁဝ်းတေလႆႈမိူဝ်းသူင်ႇၶိုၼ်းၼႄႇ”
“လီယူႇလူး”
“ႁဝ်းဢမ်ႇယွင်ႇပေႉတၢၼ်ႇၼၢၼ်ႉၵဝ်ႇသႄႈ”
“ဢမ်ႇၵႂႃႇႁႃႉပီမႂ်ႇတႆး”
“ဝူၼ်ႉယူႇ ပေႃးၵႆႉၵေႃႈၵႂႃႇၵႃႈ”
“ၵႂႃႇလႃႈ ပဵၼ်ၵေႃႉၵၼ် မႃးလႄႇႁိူၼ်းၶိုၼ်းၵူၼ်းပၢၼ်လဵဝ်ၵၼ်ၵူၺ်းၵေႃႈဢမ်ႇမီးယဝ်ႉ ၵတ်ႉၵႃႈမႃးၺႃးသူၵွၼ်ႇၼႆႉ”
“ၸွင်ႇၵွႆႈဝႃႈၵၼ်ထႅင်ႈ”
ၶမ်ႈၶိုၼ်းလပ်းသိင်ႇတၼ် ၼွၼ်းၶိုၼ်းႁိုဝ်လပ်းလႆႈ ၶႆႈၸႂ်ဝူၼ်ႉၶိုၼ်းႁၼ် ယၢမ်းဢၼ်ဢမ်ႇပိုတ်ႇပၢင်ႇ ၼႂ်းႁိူၼ်းတႅၵ်ႈဢုတ်ႇၶပ်ႉတမ်း မီးလင်လဵဝ်ယူႇလႅၼ်ဝဵင်း ႁဵတ်းႁူဝ်ႉသုင်လွမ်ႉႁွပ်ႈ ပႃႇမႆႉဢုမ်ႇသုမ်ႇၼႃ၊ ယူႇယူႇႁိမ်းၼၼ်ႉ ၵူၼ်းၵႆႉၵႆႉႁၢႆၼႃႇလႄႈ မီးၵူၼ်းပွင်ႇၶၢဝ်ႇမႃးသေ သႅင်လိုၼ်းတင်းပီႈၸွမ် ဢွၼ်ၵၼ်ၵႂႃႇၸွပ်ႇတူၺ်း ၵူၺ်းႁူႉဝႃႈ ၶဝ်ၵမ်းၵမ်းႁၢႆယၢမ်းၵၢင်ၶမ်ႈ ၵူၼ်းႁၢႆၵမ်ႈၼမ်ပဵၼ်ၼၢင်းယိင်းၼုမ်ႇလႄႈလုၵ်ႈဢွၼ်ႇ။
သမ်ႉဝႃႈတိူင်ႇၽူႈမီးပုၼ်ႈၽွၼ်းၶဝ်ယူႇၵေႃႈ ဢမ်ႇမႃးၸွႆႈသင်ပၼ်လႆႈ ဢမ်ႇႁဵတ်းသင်ပၼ်သေမဵဝ်း၊ ၸွမ်းၼၼ်ႉ ပေႃးဝႃႈလပ်းသိင်ႇၼႆ ဝၢၼ်ႈႁိူၼ်းသမ်ႉပေႃးယဵၼ်သီႇသီႇ ဢမ်ႇမီးၽႂ်ႁတ်းဢွၵ်ႇႁိူၼ်း
သေၵေႃႉ။
ၶႃသွင်ၵေႃႉပီႈၸွမ် လႆႈႁၼ်ႁိူၼ်းလင်ၼၼ်ႉ မၼ်းၶႂ်ႈလၢၵ်ႇလၢႆးၵၢႆးတႃဝႆႉလႄႈ ပီႈၸွမ်ၵႂႃႇႁႃလဵပ်ႈပၼ်ႇတူၺ်းၸွမ်းၼၼ်ႉ သႅင်လိုၼ်းသမ်ႉပႂ်ႉယူႇၼႃႈၽၵ်းတူၵူၺ်းသေ မီးပႃႈထဝ်ႈၵေႃႉၼိုင်ႈဢွၵ်ႇမႃး။
“လူဝ်ႇသင်လႃႇလၢၼ်”
“မႃးႁႃဢူၺ်းၵေႃႉၶႃႈဢေႃႈပႃႈ မၼ်းဝႃႈယူႇၸွမ်းၼႆႉဝႃႇ ႁဝ်းႁႃမၼ်းပေႃးၸွတ်ႇၵူႈႁိူၼ်းယဝ်ႉ ၵိုတ်းတီႈၼႆႈၵူၺ်းဢေႃႈ”
“တီႈၼႆႈဢမ်ႇမီးၽႂ် မီးပႃႈၵူၺ်းဢိူဝ်ႈလၢၼ်ဢိူဝ်ႉ”
“ႁိူၼ်းလူင်ၵႂၢင်ႈပဵၼ်တၢၼ်ႇၼႆႉ ယူႇၵေႃႉလဵဝ်ၵူၺ်းၶႃႈႁႃႉ”
“ၸႂ်ႈဢိူဝ်ႈ လုၵ်ႈလၢၼ်ၵေႃႈၵႂႃႇမိူင်းထႆးမူတ်းယဝ်ႉလႄႇ” ယၵ်ႉတူၺ်းသႅင်လိုၼ်းႁူဝ်တေႃႇတိၼ်သေ “မႃးၵေႃႉလဵဝ်ၵူၺ်းႁႃႉယိင်း”
မိူဝ်ႈၼၼ်ႉ မၼ်းဝၢႆႇတူၺ်းပီႈၸွမ်ၵေႃႈဢမ်ႇႁၼ်ယဝ်ႉ ဢမ်ႇတၼ်းႁူႉတူဝ် ၽိူဝ်ႇတိုၼ်ႇၶိုၼ်းၵေႃႈ မၼ်းသမ်ႉပေႃးမီးၵႂႃႇၼႂ်းလပ်းသိင်ႇၼၼ်ႉယဝ်ႉၼႃႇ။
မိုၼ်းတႃမႃးလႆႈႁၼ်လုၵ်ႈဢွၼ်ႇၵူၼ်းလူင် မတ်ႉတိၼ်မတ်ႉမိုဝ်းၼင်ႈသႅမ်းၵွင်ၵၼ်ၶူတ်းၸွၵ်ႉလူင်
ဝႆႉ၊ ဢၢႆတူႇဢၢႆဢုပ်ႉမဵၼ်ၶိုၼ်ႇမဵၼ်ၶႆး ထူၺ်ႈၸႂ်ယူႇၵေႃႈၼင်ႇႁၢင်ႈဢမ်ႇဢိမ်ႇလႆႈ လပ်းသိင်ႇၼႃႇၼႃႇ ၸင်ႇသမ်ႉႁၼ်ၾႆးဝွႆးဝွႆးႁွႆႈယူႇၼႃႈၽၵ်းတူ ဢၼ်မိူၼ်ၶွၵ်ႈၼၼ်ႉၵူၺ်း။
မၼ်းၵေႃႈဢမ်ႇယွမ်းၵၢၼ်ႉ ဢဝ်တင်းၶႅၼ်သွင်ၽၢႆႇဢွၼ်ႇမၼ်း ထူထိတ်ႉထူထိတ်ႉၵၼ် သမ်ႉပေႃးလွၵ်ႈလႅင်မႃးယူႇၵေႃႈ ဢမ်ႇႁၼ်ၸိူၵ်ႈမၼ်းလုတ်ႈဢွၵ်ႇမႃး။
ပီႈၸွမ် မႃးၶိုၼ်းတီႈသႅင်လိုၼ်းယူႇၼၼ်ႉ ဢမ်ႇႁၼ်ယဝ်ႉ သိုပ်ႇၾူၼ်းတူၺ်းယူႇ၊ ၵူၺ်းၵႃႈ ၾူၼ်းၵေႃႈဢမ်ႇၵပ်းသိုပ်ႇလႆႈ မႆႈၸႂ်မႆႈၶေႃးမႃးယဝ်ႉ ၵႂႃႇထၢမ်ႁိမ်းႁွမ်းၸိူဝ်းၼၼ်ႉၵေႃႈ ၽႂ်ၵေႃႈဝႃႈဢမ်ႇႁၼ်မၼ်းသေၵေႃႉ။
လဵပ်ႈၵႂႃႇလဵပ်ႈၶိုၼ်း ႁၼ်ၵမ်သႅင်လိုၼ်းတူၵ်းယူႇတီႈၼႃႈၽၵ်းတူယဝ်ႉၼႆၵေႃႈ၊ ၵႂႃႇၵဵပ်းဢဝ်သေသႂ်ႇထူင်မၼ်းယဝ်ႉႁဵတ်းမိူၼ်ပွၵ်ႈမိူဝ်းၵႂႃႇယူႇ။
ၸွမ်းၼင်ႇလဵပ်ႈတူၺ်း ၶႅပ်ႇႁူဝ်ႉၼၼ်ႉ လႆႈႁၼ် ၵွင်ႈ CCTV ၶပ်ႉၸႅၼ်ႇပေႃးတဵမ်ယူႇသဵင်ႈ၊ မၼ်းၵေႃႈ
မႃးၸၼ်ႁၢင်ႈတူၺ်းသေ ၶိုၼ်းထွမ်ႇသဵင်တီႈၵမ်ဢၼ်သႅင်လိုၼ်းဢၢတ်းဝႆႉၼၼ်ႉ လႆႈငိၼ်းသဵင်ၽၵ်းတူ၊ လႆႈငိၼ်းသဵင်ၵူၼ်းဢုပ်ႇၵၼ် သဵင်သႅင်လိုၼ်းလႄႈၼၢႆးထဝ်ႈသေဢမ်ႇၵႃး ဝၢႆးၼၼ်ႉၵေႃႈ ငိၼ်းသဵင်ၵူၼ်းၸၢႆး
“မႃးဢဝ်မၼ်းၶဝ်ႈၵႂႃႇႁဵတ်းတေႉလႄႈ”
“ၵူၼ်းၸၢႆးၵေႃႉၼၼ်ႉလူး”
“ပွႆႇမၼ်းဝႆႉၵွၼ်ႇ ပေႃးမၼ်းမႃးထႅင်ႈၸွင်ႇၵွႆႈၸတ်းၵၢၼ်မၼ်း”
သဵင်ဢိုတ်းၽၵ်းတူလူင်ၼၼ်ႉလင်ၵမ်းၼိုင်ႈယဝ်ႉ ယဵၼ်ၵႂႃႇ ၵိုတ်းၵႅၼ်ႇသဵင်လူမ်းၵူၺ်း။
