မၼ်းၵေႃႈဢဝ်တင်းထူင်ၶဝ်ႈမုၼ်းသေ ႁဵတ်းတူၺ်းထႅင်ႈၵမ်းၼိုင်ႈလီလီ ဢမ်ႇႁူႉသၢႆတႃၼၼ်ႉယၵ်ႉတူၺ်းၸူးမၼ်းယူႇ သမ်ႉပေႃးဢမ်ႇတၼ်းဝူၼ်ႉဝႃႈမၼ်းမိူၼ်ႁိုဝ်ဢမ်ႇမိူၼ်ယဝ်ႉ သတိမၼ်းႁၢႆၵႂႃႇလႂ်မူတ်းၵေႃႈဢမ်ႇႁူႉ။
“တေဢဝ်ထႅင်ႈယူႇၶႃႈႁ”
သႅင်လိုၼ်းဝၢင်းထူင်ၶဝ်ႈမုၼ်းၼၼ်ႉသေယဝ်ႉ
“ၼပ်ႉၵႃႈမၼ်းၶႃႈလႄႈ”
ၸိုၼ်ႈမိူင်းသွၼ်ႇပၼ်ယဝ်ႉ မၼ်းဢၢင်ႈၸၢႆႇၵႃႈ ထူၵ်းတူၺ်းၼႂ်းထွင်း ဢမ်ႇမီးငိုၼ်းလႄႈ
“မိူဝ်းဢဝ်ငိုၼ်းၵမ်ႉ”
သမ်ႉပေႃးဢဝ်ၸိုၼ်ႈမိူင်းယုမ်ႉဢွၵ်ႇမႃးသေ
“ၸွင်ႇၵွႆႈမႃးပၼ်ၵေႃႈလႆႈ”
သႅင်လိုၼ်းယိပ်းဢဝ်ၶဝ်ႈမုၼ်းမၼ်းၼၼ်ႉသေယဝ်ႉ တင်ႈၸႂ်ယၵ်ႉတူၺ်းၸိုၼ်ႈမိူင်းၼၼ်ႉသေလၢတ်ႈ
“မေႃယုမ်ႉႁေၵွၼ်ႇႁႃႉ” ယိုၼ်ႈမိုဝ်းၸူးၸိုၼ်ႈမိူင်းသေ “မႃးႁဝ်းပဵၼ်ဢူၺ်းၵေႃႉၵၼ်လႃႈ ယူႇၼႂ်းဝၢၼ်ႈၼႆႉ ဢမ်ႇမီးၵူၼ်းပၢၼ်လဵဝ်ၵၼ်လူင် တေဢုပ်ႇတေလၢတ်ႈႁင်ၵေႃႈ ဢမ်ႇမီးၽႂ်တၼ်းထွမ်ႇလူင်”
“ပဵၼ်လႆႈယူႇ ၵူၺ်းၵႃႈ ၵွပ်ႈသင်လႄႈတေလႆႈၸပ်းမိုဝ်းလႃႇ”
“ပေႃးပဵၼ်လႆႈၵေႃႈ ၸပ်းလႄႈ ပေႃးဢမ်ႇၶႂ်ႈပဵၼ်ၵေႃႈဢမ်ႇလူဝ်ႇ”
ၸိုၼ်ႈမိူင်းတေႃႉတႄႉယိပ်းဢဝ်ပၢႆၼိဝ်ႉမိုဝ်းၵူၺ်းလႄႈ
“ဢမ်ႇလူဝ်ႇႁူႉၸၵ်းၵၼ်ယဝ်ႉ ယိပ်းၵမ်ႉၵူၺ်းမၼ်းပဵၼ်ႁင်ဢႃႈ ၵူဝ်သၢဝ်သူၶႅၼ်ႁႃႉတေႃႈ”
သႅင်လိုၼ်းၶုၼ်ႇၵမ်ႁၢဝ်ႉဢဝ်မိုဝ်းၸိုၼ်ႈမိူင်း မိုဝ်းၶႅင်ၶႅင်မၼ်းၼၼ်ႉ ၵိုင်ႉၵၢင်ႉၵမ်ပွႆႇၵႂႃႇၵႅပ်ႉၼိုင်ႈ ၵူၺ်းၵႃႈမၼ်းႁပ်ႉႁူႉလႆႈထိုင် မိုဝ်းဢုၼ်ႇဢုၼ်ႇၼႂ်းၶမ်ႈၼၼ်ႉၵမ်းလဵဝ်ယဝ်ႉ။
မၼ်းၵေႃႈပႆႇလၢတ်ႈလႆႈဝႃႈ ပဵၼ်ၸိုၼ်ႈမိူင်းတႄႉယူႇႁႃႉ၊ ၵၢၼ်ယူႇႁိမ်းၸမ်ၵၼ်၊ လွင်ႈပိုတ်ႇဢူၵ်းပိုတ်ႇၸႂ်ၼႄၵၼ်ၼၼ်ႉ မၼ်းၸၢင်ႈတေလႆႈၶေႃႈမုၼ်းထႅင်ႈယူႇလႄႈ မိူဝ်ႈလၢတ်ႈတႄႉဝႃႈဢူၺ်းၵေႃႉ လၢႆးဢုပ်ႇမၼ်းသမ်ႉႁၢင်ႈပဵၼ်ၵႂၢမ်းၵဝ်းၵေႃႈလူဝ်လူဝ်။
မၼ်းၵေႃႈၼင်ႈၵိၼ်ၶဝ်ႈမုၼ်းယူႇတီႈတင်ႇၼႃႈသႅင်ႇၼၼ်ႉသေ ဢုပ်ႇၸူးၸိုၼ်ႈမိူင်းယူႇ။ တေဝႃႈဢမ်ႇမေႃဢုပ်ႇၵေႃႈ ပေႃးယၢမ်ႈပဵၼ်ၽူႈဢဝ်ၶၢဝ်ႇမႃးယဝ်ႉၼႃႇ ၸႂ်ႈႁေဢမ်ႇၸႂ်ႈႁေ မၼ်းၵေႃႈလၢတ်ႈၵႂႃႇယဝ်ႉ။
“ႁဝ်းဢမ်ႇထၢင်ႇဝႃႈသူတေမေႃယုမ်ႉၸိူင်ႉၼႆ”
သၢႆတႃတူၺ်းၸူး ၵူၼ်းဢမ်ႇတွပ်ႇသမ်ႉပေႃးၵဵင်ၸႂ်ယဝ်ႉၼႃႇ။
ပွၵ်ႈမိူဝ်းထိုင်ႁိူၼ်းယဝ်ႉ ၼင်ႈသေဝူၼ်ႉယူႇ ဝူၼ်ႉလွင်ႈလႂ်တႄႉဢမ်ႇႁူႉမၼ်းယဝ်ႉ။ ႁူဝ်ၶမ်ႈ မႃးၵေႃႈ မိူဝ်းၸၢႆႇၼီႈသေ သိုဝ်ႉၼင်ပွင်းမႃးႁုင်လေႃးမၢၵ်ႇၶိူဝ်ပၼ်ဢူႈၶဝ်ယူႇ။
ႁူဝ်ၶမ်ႈမိူင်းၸမ်လပ်းသိင်ႇ ဝၼ်းပီႊမႂ်ႇထိုင်မႃး ဝၢၼ်ႈတႂ်ႈဝၢၼ်ႈၼိူဝ် ပွၵ်ႉဢွၵ်ႇပွၵ်ႉတူၵ်း ဢွၼ်ၵၼ်ၵႂႃႇၸူႉၶွၼ်ႈတုမ်ၵၼ် ယူႇတီႈပၢင်ပွႆးပီမႂ်ႇတႆးၼႂ်းဝၢင်းၵျွင်းလူင်ၼၼ်ႉယဝ်ႉ။ မၢင်ၸိူဝ်းၵေႃႈၵႂႃႇၵႃႈ မၢင်ၸိူဝ်းၵေႃႈၵႂႃႇၵိၼ် မၢင်ၸိူဝ်းၵေႃႈၵႂႃႇတူၺ်းပွႆး ၸုၵ်းယူႇၸဵင်ႇပွႆးတီႈၶႂ်ႈလပ်ႉတႃၵူၼ်းဢိတ်းဢိတ်းၼၼ်ႉၵူႈၼိုင်ႈ။
ၵူၼ်းသမ်ႉၵိုၼ်း ၽိုတ်ႉၵႂႃႇၽိုတ်ႉၵႂႃႇတၢင်းၼႃႈတၢင်းလင် သမ်ႉပေႃးယူႇဢိပ်ႉၵၼ်လူင်ဝႆႉယဝ်ႉ မိုဝ်းဢမ်ႇထိုဝ်ႉၵေႃႈ တူဝ်တိူဝ်ႉၵၼ်ယဝ်ႉဢိူဝ်ႈ။ ၵူၼ်းတူၺ်းပွႆးၼႆႉၵေႃႈႁမ်ႉ ဢမ်ႇမေႃယူႇတီႈလဵဝ်လူင် ပေႃးၶဝ်ႈယဝ်ႉ သမ်ႉဢွၵ်ႇ တုမ်ႉတွၵ်ႇတမ်တႅင်းႁႅင်းသႅင်လိုၼ်းပေႃးဢမ်ႇထိင်းတိၼ်လႆႈလႄႈ သမ်ႉပေႃးၵိူင်းလူင်ၵႂႃႇတၢင်းလင် မိုဝ်းသွင်ၶွၼ်ႁွင်းႁပ်ႉလႅတ်းဝႆးၼႃႇ ၶွၼ်ၼိုင်ႈၵွတ်ႇမႃႇဝႆႉသေ ၶွၼ်ၼိုင်ႈယိပ်းၶႅၼ်ဝႆႉ။
ႁူဝ်ၸႂ်ၵေႃႉၼိုင်ႈတႄႉဢမ်ႇၼိမ်ဢမ်ႇသဝ်းသေဢိတ်း။ မိူဝ်ႈၼၼ်ႉ မၼ်းၸင်ႇၾၢင်ႉမႅၼ်ႈဢၢႆတူဝ်ဢုၼ်ႇဢုၼ်ႇ ပဵၼ်ဢၢႆဢၼ်လဵဝ်ၵၼ်ၼႂ်းၶမ်ႈၼၼ်ႉလႄႈ မၼ်းၵေႃႈသွတ်ႇၶဝ်ႈၵွတ်ႇၶႅၼ်ၸိုၼ်ႈမိူင်း ဢၼ်တိုၵ်ႉပွႆႇလူင်းၵူၺ်းၼၼ်ႉသေ ဢဝ်ၸဝ်ႈတူဝ်သမ်ႉပေႃးၶႅင်ၼိမ်ၵႂႃႇၵမ်းၼိုင်ႈယဝ်ႉ ဝၢႆႇယၵ်ႉတူၺ်းသႅင်လိုၼ်းဢၼ်ႁဵတ်းမိူၼ်ဢမ်ႇႁူႉတူဝ်ဝႆႉၼၼ်ႉသေ မၼ်းၵေႃႈမႄးဢဝ်ၶႅၼ်သႅင်လိုၼ်းလူင်းယဝ်ႉ ယိပ်းဢဝ်မိုဝ်းသႅင်လိုၼ်း ၼင်ႇဢမ်ႇသူၼ်ၸႂ်ၵၼ်သေ ၵူၺ်းမိုဝ်းၶႃတႄႉ ၵမ်ၼႅၼ်ႈဝႆႉယူႇယဝ်ႉ။
ပွႆးပိူၼ်ႈဝၢႆးၵေႃႈ ၶႃၵေႃႈဝၢႆးၵႂႃႇၸွမ်းယဝ်ႉ။
ၸိုၼ်ႈမိူင်းၵေႃႈၵႂႃႇႁဵတ်းၵၢၼ်ၶိုၼ်းသေ သႅင်လိုၼ်းၵေႃႈ ၶိုၼ်းပွၵ်ႈၵႂႃႇတီႈႁဵတ်းၵၢၼ်မၼ်းၶိုၼ်းယူႇ။ လွင်ႈၵပ်းသိုပ်ႇၶၢတ်ႇႁၢႆၵႂႃႇ ၸိုၼ်ႈမိူင်းမႃးႁိူၼ်းၶိုၼ်း ဢမ်ႇလႆႈႁၼ်သႅင်လိုၼ်းၼႆၵေႃႈ သမ်ႉပေႃးမွင်သေႃႇႁေႃႇလူင်ဝႆႉယဝ်ႉ။
ဢၼ်မၼ်းထုၵ်ႇပိူၼ်ႈႁၵ်းလင်ၵႂႃႇၼၼ်ႉ ႁဵတ်းႁႂ်ႈမၼ်းဢမ်ႇယုမ်ႇၽႂ်လႆႈထႅင်ႈလႄႈ ႁဵတ်းႁႂ်ႈမၼ်းဢိမ်ႇၸၢၼ်ႈတၢင်းႁၵ်ႉမႃးသေ ဢမ်ႇၼေၼႃႈယုမ်ႉတေႃႇၽႂ်ငၢႆႈငၢႆႈ ဢမ်ႇဝႆႉၼႃႈၵီႈၸူးၽႂ် တေႃႇထိုင်
လႆႈႁူပ်ႉသႅင်လိုၼ်း ဢၼ်ၵႆႉဢုပ်ႇၵႆႉလၢတ်ႈ ၼၼ်ႉလႄႈ မိူၼ်တေထုၵ်ႇၸႂ်ၺႃးသႅင်လိုၼ်းၼၼ်ႉယဝ်ႉ။
ပုၼ်ႉမႃးမွၵ်ႈသွင်ပီပၢႆပၢႆ သႅင်လိုၼ်းမႃးလႄႇႁိူၼ်းသေ ပဵၼ်ၽွင်းၸိုၼ်ႈမိူင်းၵေႃႈ မႃးၸႂ်းႁိူၼ်းမိူၼ်ၵၼ်လႄႈ သမ်ႉမႃးသိုဝ်ႉၶိူင်ႈထူဝ်ႇၽူးတီႈႁိူၼ်းၶဝ် ၸိုၼ်ႈမိူင်းတႄႉမီးယူႇၼႂ်းသွင်ႇၾႆးၼၼ်ႉၵူၺ်း လႆႈငိၼ်းသဵင်ဢုပ်ႇလႄႈသဵင်လၢတ်ႈၶႃမႄႈၶဝ်
“မႃးသိုဝ်ႉႁင်လႃႇ”
“မႃးသိုဝ်ႉၼမ်ႉဢွႆႈႁဵတ်းၵျႃႇၺုၼ်ႉဝႃႇ”
“မႄႈသူႁဵတ်းထူဝ်ႇၽူးထႅင်ႈယဝ်ႉၵႃႈ”
“လုၵ်ႈယိင်းသၢဝ်မႃးႁိူၼ်းပဵၼ်ၵေႃႉလူးပႃႈၵေႃႈ ဢမ်ႇႁဵတ်းလဵင်ႉဢမ်ႇလႆႈၼႄႇ”
“ၵဝ်တႃႉၶႂ်ႈပဵၼ်လုၵ်ႈယိင်းသၢဝ်မႄႈသူလႃႈမႂ်း”
“ဢမ်ႇလႆႈလေႃႇ ပေႃးမီးလုၵ်ႈၸၢႆးမၢဝ်ႇတႄႉမိူဝ်းလႆႈၵႃႈ”
“မီးဢိူဝ်ႈမႂ်းၶႂ်ႈႁၼ်ၼႄႇ လုၵ်ႈၵဝ်လဝ်းၼႃႇမႂ်း ပေႃးႁၼ်တႄႉပေႃးၸွႆးၵွၼ်ႇယဝ်ႉ”
“တႃႉသေဝႃႈပိူၼ်ႈမီးလုၵ်ႈၸၢႆးၵေႃႈၼေႃ ပေႃးဢမ်ႇႁၼ်တူဝ်တႄႉဢမ်ႇယုမ်ႇႁေႉ”
“ပေႃးမႂ်းႁၼ် မႂ်းတေႁဵတ်းလုၵ်ႈပႂ်ႉၵဝ်ၼႄႇ”
“လႆႈၵႂႃႈ..မီးလႂ်”
“ပွႆႇမႂ်းဢမ်ႇႁဵတ်းၵွၼ်ႇမႂ်း..”
“ဢၢႆႈၸၢႆးမႃးၼႆႈၵမ်ႉလူး”
ၸိုၼ်ႈမိူင်းသမ်ႉပေႃးပၢႆႈမႅပ်ႉဝႆႉယူႇယဝ်ႉၼႃႇ။
“တေႉႁႃႉၼၼ်ႉ..”
“တေႉၵူၺ်းဢိူဝ်ႈ ၽႂ်တေလႅၼ်မႂ်း”
“ၶႃႈတႄႉလႅၼ်ပႃႈႁဝ်းယဝ်ႉပေႃးၼႆ”
“မႂ်းၼႆႉ..မဵဝ်းလႆႈၽူဝ်ၵေႃႈဢမ်ႇၸႂ်ႈ မႂ်းဢမ်ႇၶႂ်ႈလႆႈတေႉၵႃႈလုၵ်ႈၸၢႆးၵဝ်”
“မၼ်းဢမ်ႇၶႂ်ႈလႆႈၶႃႈလေႃႇ မၼ်းတမ်ႉဢမ်ႇဢွၵ်ႇမႃး ပေႃးထၢၼ်ႈဝႃႈမၼ်းလဝ်းတေႉ ပႃႈႁဝ်းဢမ်ႇထၢမ်ပၼ်ၶႃႈယူဝ်ႉ တူၺ်းၶႃႈၼႆႉယွင်ႇယွင်ႇယႅင်ႇႁေ ဢမ်ႇလႅပ်ႈလုၵ်ႈၸၢႆးလဝ်းပႃႈႁဝ်းလေႃႇ”
ပႃႈၸိင်ႇပိုတ်ႇၾူၼ်းၼႄသႅင်လိုၼ်းယဝ်ႉ၊
“ၸိုၼ်ႈမိူင်းႁိုဝ်လႃႇ..တၢၼ်ႇၶႃႈဢမ်ႇယၢမ်ႈႁၼ်ယဝ်ႉ ၵေႃႉယႂ်ႇမႃးၵေႃႈလဝ်းဝႆႉၵွၼ်ႇ ႁၢင်ႈယဵၼ်ယဵၼ်ၵူၺ်းႁိုဝ်လႃႇမၼ်းၼၼ်ႉ တမ်ႉပႆႇဢဝ်မေးၵွၼ်ႇႁၼၢၼ်ႉ”
“မၼ်းပႂ်ႉမႂ်းၼႆဝႃႇ”
“မႃးႁႃလၢတ်ႈယူႇ ၵူၼ်းၸိူင်ႉၼၼ်မဵဝ်းမေႃလၢတ်ႈၸိူင်ႉၼႆၵေႃႈဢမ်ႇၸႂ်ႈ”
“မႂ်းဢမ်ႇၸၢမ်းဢုပ်ႇတူၺ်း မႂ်းဢမ်ႇယုမ်ႇၵေႃႈ”
“ပေႃးထၢၼ်ႈမၼ်းမေႃဢုပ်ႇ မၼ်းလႆႈမေးယဝ်ႉလေႃႇ”
“တီႈဝႃႈမၼ်းပႂ်ႉမႂ်းၼႆ”
“ႁႂ်ႈမၼ်းပႂ်ႉထႅင်ႈလႄႈပေႃးၼၼ် မၼ်းတေပႂ်ႉလႆႈၵႃႈႁိုဝ် ၶႃႈၵေႃႈၶႂ်ႈႁူႉဝႆႉၵွၼ်ႇ”
“ပေႃးမႂ်းဢဝ်ၽူဝ်တႄႉၵေႃႈ မၼ်းႁိုဝ်ပႂ်ႉယဝ်ႉၼႄႇ”
“ၶႃႈဢမ်ႇဢဝ် တေမႃးပႂ်ႉတူၺ်းၼႃႈလုၵ်ႈၸၢႆးပႃႈႁဝ်းလီလီၵွၼ်ႇၵႃႈ ၸွင်ႇၵွႆႈဝူၼ်ႉတူၺ်းဝႃႈ မႃးႁဵတ်းလုၵ်ႈပႂ်ႉၶဝ်ႁိူၼ်းၼႆႉၸွင်ႇတေၵိုင်ႇၼႆ”
“မႂ်းၼႆႉတႄႉ..သူပ်းၽၢႆထဵင်ၸႃး..ဝူၼ်ႉၵႂႃႇဝူၼ်ႉမႃးၵဝ်ပေႃးၶႂ်ႈၶိုၼ်ၶိုၼ်းယဝ်ႉမႂ်း”
“လၢတ်ႈယဝ်ႉဢမ်ႇၶိုၼ်းၶိုၼ်လေႃႇ မႄႈႁဝ်းၵေႃႈ ႁဵတ်းလုၵ်ႈပႂ်ႉၶဵဝ်ထႃႈၼႃႈ”
“ၸၢင်ႈလူဝ်ႇၶဵဝ်ႁဵတ်းသင် မိူဝ်းထၢမ်မိူဝ်ႈလဵဝ်ႁေယဝ်ႉၼႃႇ”
“ထၢမ်ၸဝ်ႈမၼ်းယဝ်ႉယဝ်ႉၵႃႈ ပေႃးၸဝ်ႈမၼ်းဢမ်ႇၽွမ်ႉ ၶႃႈၵေႃႈဢမ်ႇၽွမ်ႉၵွၼ်ႇ မိူဝ်းယဝ်ႉဝႃႈ ၵူဝ်ပိူၼ်ႈၶင်ႁဝ်းဝႆႉ”
ၸိုၼ်ႈမိူင်းဢၼ်ထွမ်ႇၸွမ်းၵူႈၶေႃႈၵူႈၵမ်းၼၼ်ႉၵေႃႈ ၶျွင်းတူၺ်းသႅင်လိုၼ်းယူႇတီႈႁူးလႅင်းၼၼ်ႉလႄႈ လႆႈႁၼ်ၼႃႈယုမ်ႉၼႃႈၵီႈၼၼ်ႉသေ ယုမ်ႉဢွၵ်ႇမႃးၸွမ်းယဝ်ႉ။
“ႁဝ်းယုမ်ႉယူႇႁၼႆႉ” လႆႈသတိမႃးသေ မိူၼ်ႇတူၺ်းၸွမ်းသႅင်လိုၼ်းယူႇၼၼ်ႉယဝ်ႉ။
သမ်ႉဝႃႈဢမ်ႇလႅပ်ႈသူၼ်ၸႂ်သေတႃႉၵေႃႈ မိူၼ်ႁၢင်ႈသႂ်ႇၸႂ်မႃးထႅင်ႈယူႇ၊ ၶိင်ႇၶၢဝ်းပိူၼ်ႈလိုဝ်ႈၵၢၼ်မိူဝ်ႈလႂ် မၼ်းၵေႃႈၵႆႉယွၼ်းမႃးၸႂ်းႁိူၼ်းလႄႈ သႅင်လိုၼ်းသမ်ႉမႃးႁိူၼ်းသေ ယူႇယူႇၵေႃႈၺႃးၵၼ် ႁၼ်ၵၼ် သမ်ႉဝႃႈဢမ်ႇဢုပ်ႇလၢတ်ႈသင်ၵေႃႈ လွင်ႈသူၼ်ၸႂ်ၼိူဝ်သႅင်လိုၼ်းၼၼ်ႉ မၼ်းသိူင်ႇသိမ်းဝႆႉယူႇၼႂ်းၸႂ်လိုၵ်ႉလိုၵ်ႉယဝ်ႉ။
မိူဝ်ႈလႆႈႁၼ်ၵွင်ႈယိူင်းသႂ်ႇသႅင်လိုၼ်းယူႇၼၼ်ႉ ႁူဝ်ၸႂ်သမ်ႉပေႃးၶႂ်ႈတႅၵ်ႇလႅဝ်ၵႂႃႇယဝ်ႉ၊ ၵူၺ်းၵႃႈပုၼ်ႈၽွၼ်းဢမ်ႇယဝ်ႉလႆႈလႄႈ သမ်ႉဝႃႈမၼ်းဢမ်ႇလႆႈပဵၼ်ၵေႃႉယိုဝ်းၵေႃႈ ၸႂ်မၼ်းတႄႉသမ်ႉပေႃးယိုဝ်းၵူၼ်းၵေႃႉၼၼ်ႉတၢႆၵႂႃႇယဝ်ႉ။
မိူဝ်ႈသႅင်လိုၼ်းလူမ်ႉလူင်း မၼ်းၼႅတ်ႈႁွင်းႁပ်ႉဢဝ်ၵမ်းလဵဝ်သေ ဢုမ်ႈႁွပ်ႇၶိုၼ်ႈၵႃးၵႂႃႇ ဢဝ်ႁူဝ်မွၼ်တၵ်းသေ ယိပ်းဢဝ်မိုဝ်းၼၼ်ႉမႃးၼူတ်ႈပၼ် ၼင်ႇပဵၼ်မေႃယႃၸမ်တူဝ်ယဝ်ႉ။
သမ်ႉဝႃႈပိူၼ်ႈတေတူၺ်းၸိူင်ႉႁိုဝ်ၵေႃႈ မၼ်းတႄႉဢမ်ႇသူၼ်ၸႂ်သင် တေႃႇပေႃးသူင်ႇသႅင်လိုၼ်းၵႂႃႇထိုင်ႁူင်းယႃ။
