“မိူဝ်ႈၵႆႉၼွင်ႉဝႃႈၽူႈၸတ်းၵၢၼ်ႁွင်ႉၼႆႁိုဝ်လႃႇ”
“ဢေႃႈ..မၼ်းဝႃႈပေႃးပီႈမႃးထိုင်ႁႂ်ႈၵႂႃႇၸူးမၼ်းၼႆဝႃႇ”
သႅင်လိုၼ်းၵေႃႈ ၶဝ်ႈၵႂႃႇၼႂ်းႁွင်ႈၼၼ်ႉသေ ၵႂႃႇၼင်ႈတီႈတင်ႇယဝ်ႉ။
“ၸဵမ်မိူဝ်ႈမႃးၶိုၼ်းႁဝ်းၵေႃႈဢမ်ႇလႆႈႁူပ်ႉၵၼ်ထႅင်ႈၼႆႉၼေႃ ပဵၼ်ႁိုဝ်မႃးလႃႇ ႁဵတ်းၵၢၼ်ၶိုၼ်းဢူဝ်ႇၶေႇယူႇၼႄႇ”
“ဢေႃႈ..ႁႂ်ႈမိူၼ်မိူဝ်ႈဢွၼ်တၢင်းတႄႉဢမ်ႇမိူၼ် ပေႃးပဵၼ်လႆႈတႄႉၶႃႈၶႂ်ႈၶၢႆႉၽၢႆႇၼႆႉၵႂႃႇပဵၼ်တၢင်ႇၽၢႆႇၵေႃႈလီ”
“မၼ်းသမ်ႉဢမ်ႇမီးၽႂ်ယဝ်ႉၼႃႇ ဢၼ်ပေႉၵၢၼ်ပေႉငၢၼ်းမၼ်းၵေႃႈ ႁဝ်းၸူမ်းဝႃႈၸူမ်းဢိူဝ်ႈဢၼ်သူၶိုၼ်းမႃး၊ ပေႃးၼၼ်ၵေႃႈ ၽိုၵ်းပၼ်လုၵ်ႈဢွၼ်ႇၶႃႁႂ်ႈပေႉတူဝ်သေၵွၼ်ႇလႄႈ ၸွင်ႇၵွႆႈဝႃႈၵၼ်ထႅင်ႈ”
“ဢေႃႈၶႃႈ”
“ၸွင်ႇလႆႈဢုပ်ႇတင်းၸၢႆးၸွမ်ၼႄႇ”
“ပဵၼ်မိူဝ်ႈပဵၼ်ပွၵ်ႈတႄႉလႆႈလၢတ်ႈတေႃႇယူႇၵွၼ်ႇဢေႃႈ”
“မၼ်းဢမ်ႇလၢတ်ႈသင်သူၵွၼ်ႇႁႃႉ လွင်ႈဢၼ်မၼ်းဢွၵ်ႇၵၢၼ်ၼႆႉ”
“ဢမ်ႇလၢတ်ႈသင်ၶႃႈ မၼ်းမီးလွင်ႈတၢင်းထႅင်ႈတၢင်ႇလွင်ႈၵွၼ်ႇၶႃႈႁႃႉ”
“ဢိုမ်ႈ…ဝၢႆးသေၸွႆႈသူမႃးလႆႈယဝ်ႉၼၼ်ႉ မီးၵူၼ်းၸွမ်းတူၺ်းလွင်ႈတူင်ႉၼိုင်ယူႇတႃႇသေႇၼႆဢိူဝ်ႈ မၼ်းသမ်ႉမီးၼႃႈႁိူၼ်းဝႆႉၼၼ်ႉၼႃႇ မႆႈၸႂ်ၼႃႈႁိူၼ်းမၼ်းၽွင်ႈႁေ မၼ်းၵေႃႈလႆႈယွၼ်းဢွၵ်ႇၵႂႃႇၼၼ်ႉယိုင် ႁဝ်းဝႃႈသူၵေႃႈလူဝ်ႇၾၢင်ႉတူဝ်ၽွင်ႈၵွၼ်ႇဢိူဝ်ႈၼႃႈ”
“ဢေႃႈ..”
ထိုင်ၼင်ႇႁူဝ်ၶမ်ႈ ၽွင်းၶၢဝ်းပွၵ်ႈႁိူၼ်း သႅင်လိုၼ်းၵေႃႈဝႄႉသိုဝ်ႉၽၵ်းၼႂ်းၵၢတ်ႇသေ တေဢဝ်ၵႂႃႇသႂ်ႇတီႈလူတ်ႉၼၼ်ႉ ယူႇယူႇၵေႃႈ မီးၽူႈလၵ်ႉမႃးၸၼ်ထူင်မၼ်းလႅၼ်ႈၵႂႃႇ မၼ်းၵေႃႈလႅၼ်ႈလမ်းၸွမ်းၽူႈလၵ်ႉၵေႃႉၼၼ်ႉတိၵ်းတိၵ်း တၢင်းၼႃႈၼၼ်ႉသမ်ႉလႅပ်ႈမီးၵူၼ်းဝႆႉလႄႈ ၸၼ်ဢဝ်ထူင်မၼ်းပႅတ်ႈၵၢင်တၢင်းယဝ်ႉ ၵူၼ်းၵေႃႉၼၼ်ႉၵေႃႈႁိဝ်ႈဢဝ်ၽူႈလၵ်ႉၼၼ်ႉ ၶဝ်ႈၵႂႃႇၸွမ်းသွႆးဝၢၼ်ႈလႄႈ ၽိူဝ်ႇသႅင်လိုၼ်းၶိုတ်းၵေႃႈ ဢမ်ႇႁၼ်ၶဝ်ယဝ်ႉၼႃႇ။
မၼ်းၵေႃႈမႃးၵဵပ်းဢဝ်ၶူဝ်းမၼ်းသေပွၵ်ႈမိူဝ်းၵႂႃႇ ဢမ်ႇပေႃးတမ်းၸႂ်လႆႈလႄႈ ၵမ်းၵမ်းဝိၼ်ႇတူၺ်း ၵူၺ်းသမ်ႉဢမ်ႇႁၼ်ၽႂ်။
မိူဝ်းလိုဝ်ႈတီႈယူႇၵေႃႈၵႆႉငွၵ်ႈတူၺ်းယူႇသမ်ႉဢမ်ႇႁၼ်၊ တီႈသႅင်လိုၼ်းၶဝ်ယူႇၼၼ်ႉတႄႉ ပဵၼ်ႁိူၼ်းၶၢတ်ႈလႄႈ ၸုမ်းၶၢဝ်ႇၶဝ် တေၶၢတ်ႈယူႇဝႆႉပဵၼ်လင်ၸိူင်ႉၼၼ်၊ ပေႃးဢမ်ႇမီးၼႃႈႁိူၼ်းတႄႉမႃးယူႇၸွမ်းၵၼ်ဝႆႉ။
ယၢမ်းၵၢင်ၼႂ်မၼ်းၵေႃႈ တင်ႈၸႂ်ပႆဢွၵ်ႇၵႂႃႇႁင်းၵူၺ်းမၼ်းသေ ဝႄႉၵိုတ်းၵႂႃႇတီႈၸဵင်ႇသွႆးတၢင်းၶဝ်ႈၼၼ်ႉလႄႈ မီးၵူၼ်းၵေႃႉၼိုင်ႈဝႄႉၶဝ်ႈၸွမ်းသေ သႅင်လိုၼ်းတွင်းလႆႈဝႃႈ ပဵၼ်ၵူၼ်းၵေႃႉဢၼ်ၺွပ်းၽူႈလၵ်ႉမိူဝ်ႈဝႃးၼၼ်ႉ။
“တေၵႂႃႇလႂ်ၶႃႈလႃႇ”
ၵူၼ်းၵေႃႉၼၼ်ႉ ဢမ်ႇထၢင်ႇတေၺွပ်းလႆႈၸိူင်ႉၼႆလႄႈ ၸွမ်းလူၺ်ႈပုၼ်ႈၽွၼ်းၼၼ်ႉ မၼ်းၵေႃႈပူၼ်ႉၵႂႃႇၸိူင်ႉၼၼ်သေ ဢမ်ႇတူၵ်ႇလၢတ်ႈသင်ယဝ်ႉ။
“ၸူမ်းယဝ်ႉၼႃႈ ၸွႆႈႁဝ်းဝႆႉမိူဝ်ႈဝႃး”
ၵူၼ်းၵေႃႉၼၼ်ႉၵေႃႈ ဢမ်ႇတၵ်းသဵင် ပႆပူၼ်ႉၵႂႃႇပႅတ်ႈယူႇ။ သႅင်လိုၼ်းၵေႃႈ တင်းၵႂႃႇတင်းဝိၼ်ႇတူၺ်း မၼ်းၵေႃႈဢမ်ႇႁၼ်ၽႂ်ယဝ်ႉ၊ ၸင်ႇၶိုၼ်းပူၼ်ႉၵႂႃႇၼင်ႇလူမ်ၸႂ်။
ထိုင်ၼင်ႇႁူဝ်ၶမ်ႈ မိူဝ်ႈတေဢွၵ်ႇလုမ်းမိူဝ်းၼၼ်ႉ ဢမ်ႇထၢင်ႇၵေႃႈလႆႈၺႃး
“သူမႃးႁဵတ်းသင်တီႈၼႆႈ”
“မႃးႁႃသူၼၼ်ႉၼႃႇ ပႂ်ႉပေႃးႁိုင်ၵေႃႈဢမ်ႇဢွၵ်ႇမႃးသေပွၵ်ႈ”
“မႃးႁႃႁဵတ်းသင် ႁဝ်းဢမ်ႇလူဝ်ႇသူလေႃႇ မိူဝ်းၶိုၼ်းလႄႈ”
“ပေႉႁဵတ်းလႆႈတေႃႇၵၼ်ၼႃႇလႃႇ”
“ၽႂ်လႃႇႁဵတ်းလႆႈ သူပႅတ်ႈႁဝ်းဝႆႉၸိူင်ႉႁိုဝ်ၸွင်ႇတွင်း”
“ႁဝ်းၼွမ်းၽိတ်းယဝ်ႉၶႃႈ ဢမ်ႇႁဵတ်းထႅင်ႈယဝ်ႉ”
“ၵူၼ်းၸိူင်ႉၼင်ႇသူၼႆႉ ႁဝ်းဢမ်ႇမီးဝၼ်းယုမ်ႇ”
“ယႃႇယုမ်ႇႁဝ်းလႄႈၼႃႈ”
“ၼင်ၼႃႈသူၼႆႉတေၼႃမွၵ်ႈႁိုဝ်လႃႇ လၢတ်ႈဝႃႈယႃႇႁႂ်ႈလႆႈထူပ်းၵၼ်ထႅင်ႈတီႈႁဵတ်းၵၢၼ် ၵမ်းၼႆႉသမ်ႉမႃးထိုင်တီႈႁဵတ်းၵၢၼ်ၼႆႉ”
“ၸႂ်ထိုင်ယဝ်ႉၼႃႇ တေႁဵတ်းႁိုဝ်”
“ယႃႇဢဝ်လွင်ႈၸမ်ၸႂ်ႁဝ်းမႃးယဝ်ႉလဵၼ်ႈလႄႈၼႃႈ တီႈၼႆႈပဵၼ်တီႈႁဵတ်းၵၢၼ်ႁဝ်းယဝ်ႉ”
“ႁဝ်းဢမ်ႇႁဵတ်းၸိူင်ႉၼၼ်မိူၼ်ၵမ်ႈၽွင်ႈလေႃႇၼႃႈ ယဝ်ႉၵေႃႈမိူဝ်ႈလဵဝ်သူလိုဝ်ႈၵၢၼ်ယဝ်ႉလူး”
“ႁဵတ်းႁိုဝ်လႄႈဝႃႈလိုဝ်ႈ ၶၢဝ်းယၢမ်းႁဵတ်းၵၢၼ်ႁဝ်းမီးၵူႈၶိင်ႇၼၼ်ႉယဝ်ႈ”
“ယႃႇၸႂ်ႁၢႆႉတေႃႇၵၼ်ၼႃႇလႄႈ”
“သူမႃးႁဵတ်းသင်လႃႇၼႂ်းဝဵင်းၼႆႉ ၵၢၼ်သူမီးၼႂ်းဝဵင်းၸွင်ႇၸႂ်ႈ”
“ယႃႇႁူႉၼမ်ၼႃႇလႄႈၼႃႈ ပေႃးသူဢမ်ႇၶႂ်ႈပဵၼ်မေးႁဝ်းၼႂ်းသၢႆတႃပိူၼ်ႈၵေႃႈ”
“ၶႂ်ႈဝႃႈၸိူင်ႉႁိုဝ်…”
“မိူဝ်းလႄႈႁဝ်းမိူဝ်း”
ယိပ်းၸုင်ဢဝ်မိုဝ်းသႅင်လိုၼ်းမိူဝ်းၵႂႃႇၸွမ်းၵၼ် ၼင်ႇမၢဝ်ႇမိူဝ်းသူင်ႇသၢဝ်ယဝ်ႉ။
“ၵႂႃႇၵူၺ်းမႃးၵူၺ်းတႃႇသေႇ ဢမ်ႇၵူဝ်ၽွင်ႈႁႃႉ”
“တိုၵ်ႉႁူႉဝႃႈမၼ်းလီၵူဝ်ၵေႃႈမိူဝ်ႈၼႆႉယဝ်ႉ”
“ၸွမ်းၼႆႉၵူၼ်းလၵ်ႉၵူၼ်းၸူၼ်ၵေႃႈလိူင်ႇၼႃႇၽႅဝ်လႃႈ”
“မိူဝ်ႈဝႃးတိုၵ်ႉၺႃးၵူၺ်း”
“ၸွင်ႇပဵၼ်သင်ႁိုဝ်”
“ၵူၼ်းသူဢမ်ႇမိူဝ်းလၢတ်ႈၼႄႇ”
“ႁဝ်းမႆႈၸႂ်တေႉဢိူဝ်ႈၼႆႉ”
“ၵူဝ်ၵႂႃႇယႃႉၼႃႈၵၢၼ်သူတႄႉဢမ်ႇဝႃႈ”
“ယႃႇပေၶႂ်ႈၶတ်းၵၼ်ၼႃႇၽႅဝ်လူးသူ”
“သူသမ်ႉတေၸွမ်းမႃးႁဵတ်းသင်”
“ႁဝ်းဢမ်ႇလႆႈမႃးႁဵတ်းသင် မႃးၵႅတ်ႇၶႄပၼ်သူၵူၺ်းဢိူဝ်ႈ”
“ယႃႇႁႂ်ႈႁဝ်းႁူႉဝႃႈသူႁဵတ်းလွင်ႈဢမ်ႇလီတေႃႇႁဝ်း”
“ယဝ်ႉ..ၵႃးသူလူးလႃႇ”
“မီးတီႈႁိူၼ်း”
“ဢမ်ႇဢဝ်မႃးလႃႇဢေႉ”
“ႁဝ်းၵေႃႈၶႂ်ႈဢွၵ်ႇႁႅင်းၽွင်ႈယူႇလေႃႇ ၸွင်ႇၶႅၼ်းၵႆၼႃႇၵေႃႈဢမ်ႇၸႂ်ႈ”
“တေႉၼႆ”
မိူဝ်းထိုင်ႁိူၼ်းယဝ်ႉ
“ၵိၼ်ၶဝ်ႈမႃးယဝ်ႉၼႄႇ” သႅင်လိုၼ်းထၢမ်ၸိုၼ်ႈမိူင်း
“ပႆႇၵိၼ်ၶႃႈ”
“ၵႂႃႇလႄႈႁဝ်းၵႂႃႇၵိၼ်ၶဝ်ႈ”
သႅင်လိုၼ်းၵေႃႈဢဝ်ၵႃးမၼ်းသေ ဢွၼ်ၵၼ်ၵႂႃႇတီႈသႅင်ႇမူၵႃႇထ ၼၼ်ႉလႄႈ ၵႂႃႇၼင်ႈသေသင်ႇၵိၼ်ယဝ်ႉ။
“ဢွၵ်ႇလူမ်းႁင် ၸူဝ်းၵၼ်မႃးၵိၼ်မူၵႃႇထႁၢင်ဝဵင်းၼႆႉ ၸွမ်းၼႂ်းဝဵင်းပုၼ်ႉဢမ်ႇမီးၵႃႈ”
“မၼ်းတဵတ်ႇယဵၼ်လီ”
“ၵေႃႈလီမိူၼ်ၵၼ် လႆႈယူႇၸွမ်းၵၼ်ႁိုင်ဢိၼ်ႉ”
“ဝႆႉဝႃႈယူႇမိူၼ်တီႈႁိူၼ်းသေလႄႈ”
“ဢေႃႈၶႃႈ လၢတ်ႈဢဝ်ႁဝ်းပေႃးဝူၼ်ႉႁၼ်ႁၢင်ႈမၼ်းမႃးယဝ်ႉ”
“ႁၢင်ႈႁင်သူ”
“သူလႄႈႁဝ်း ၼင်ႈၵိၼ်ၶဝ်ႈၵုမ်းၵၼ်ယူႇၼႂ်းႁိူၼ်းဢွၼ်ႇႁဝ်း တင်းလုၵ်ႈဢွၼ်ႇႁဝ်းႁေၼၼ်ႉၼႃႇ”
“သူဝူၼ်ႉၼမ်ၼႃႇယဝ်ႉ ႁၢမ်ႈလႆႈၵေႃႈႁၢမ်ႈမၼ်းဝႆႉသေလႄႈ တၢင်းဝူၼ်ႉသူၼၼ်ႉ”
“ဢမ်ႇလႅပ်ႈပဵၼ်လႆႈႁႃႉ” ဢဝ်မႆႉထူႇငိပ်ႈၼိူဝ်ႉသႂ်ႇပၼ်သႅင်လိုၼ်းၵႂႃႇ။
“သူဢမ်ႇၵိၼ်ႁင်းသူလႃႇ..”
“ႁၼ်သူၵိၼ်ၵူၺ်းၵေႃႈ ႁဝ်းဢိမ်ႇယဝ်ႉ”
သႅင်လိုၼ်းၵေႃႈ ငိပ်ႈၼိူဝ်ႉဢၼ်သုၵ်းၼိူဝ်မေႃႈၼၼ်ႉသႂ်ႇပၼ်မၼ်းၶိုၼ်းသေ
“ၵိၼ်ၼမ်ၼမ်လႄႈ..ၵမ်ႉတေမိူဝ်းလၢတ်ႈၼႄမႄႈသူဝႃႈမႃးလႄႇႁဝ်းဢမ်ႇလဵင်ႉလီၼႆ”
“သူၵူၺ်းၵႃႈတေမိူဝ်းလၢတ်ႈၶိုၼ်းတႄႉ”
“ႁဝ်းၵေႃႈၶႂ်ႈလဵင်ႉသူလႄႈႁွင်ႉမႃးၵူၺ်း”
“ႁဝ်းႁူႉယူႇဝႃႈ..သူၶႂ်ႈၵိၼ်ၸွမ်းႁဝ်းၵူၺ်းၼႆ”
“ႁိုင်ႁိုင်မႃးၵေႃႈ မေႃထၢင်ႇယႂ်ႇတူဝ်မႃးယဝ်ႉ ဢုပ်ႇၼမ်မႃးယဝ်ႉ တႃႉယႃႇႁူႉၸၵ်းသူသေလႃႈ”
“တူၵ်းလိုၼ်းယဝ်ႉၼႃႈ”
ၼင်ႈၵိၼ်တၢၼ်ႇတၢၼ်ႇ ၸိုၼ်ႈမိူင်းၵေႃႈမီးၶေႃႈၵႂၢမ်းၶဝ်ႈမႃးသေ
“ႁဝ်းၵႂႃႇႁွင်ႈၼမ်ႉၵမ်ႉၼႃႈ”
“ဢိုမ်ႈ..”
တင်းၵႂႃႇတင်းယၵ်ႉတူၺ်းသႅင်လိုၼ်းယူႇ၊ သႅင်လိုၼ်းၼၼ်ႉၵေႃႈ တူၺ်းၸွမ်းလင်ၸိုၼ်ႈမိူင်းသေ၊ မၼ်းလပ်ႉတႃၵႂႃႇယဝ်ႉၼႆၵေႃႈ ၼႅတ်ႈႁွင်ႉပိူၼ်ႈမႃးၵဵပ်းၵႃႈမၼ်းယဝ်ႉ
“ငိုၼ်းဢၢၼ်းပၼ်တီႈပီႈဢၢႆႈၼၼ်ႉၼႃႈ”
ၼႅတ်ႈလုၵ်ႉဢွၵ်ႇၵႂႃႇၵမ်းလဵဝ်လႄႈ ႁေႃႈၵႃးမၼ်းဢွၵ်ႇမိူဝ်းၵႂႃႇပႅတ်ႈယဝ်ႉ။ ၸိုၼ်ႈမိူင်းၵႂႃႇဢမ်ႇႁိုင်သေၵႃႈႁိုဝ် မႃးၶိုၼ်းၵေႃႈဢမ်ႇတၼ်းႁၼ်သႅင်လိုၼ်းယဝ်ႉၼႃႇ။
“ၼႆႉၶႃႈငိုၼ်းထွၼ်း”
လုၵ်ႈဢွၼ်ႇတီႈလၢၼ်ႉၵေႃႈ ဢဝ်တင်းပိၼ်းၸေႈလႄႈငိုၼ်းထွၼ်းပၼ်ၵႂႃႇတီႈၸိုၼ်ႈမိူင်း။
“ၽူႈယိင်းၵေႃႉၼၼ်ႉမိူဝ်းယဝ်ႉႁႃႉ”
“မိူၼ်တေဢွၵ်ႇမိူဝ်းယဝ်ႉၶႃႈ”
ၸိုၼ်ႈမိူင်းၵေႃႈဢမ်ႇတၢင်ႈႁဵတ်းႁိုဝ် ၵႃႈလႆႈႁႂ်ႈပိူၼ်ႈမႃးႁပ်ႉမၼ်းမိူဝ်းယဝ်ႉ၊ မိူဝ်းၶႆႈတီႈႁိူၼ်းၵေႃႈဢမ်ႇၺႃး၊ ၵႃးမၼ်းၵေႃႈဢမ်ႇႁၼ်၊ တီႈလုမ်းၼႆၵေႃႈဢမ်ႇမီး။ ဢဝ်သႅင်လိုၼ်းပၢႆႈၽၢတ်ႇသၢႆတႃမၼ်းၵႂႃႇယဝ်ႉ။
