ၵၢင်ၼႂ်မႃးၵေႃႈ မႄႈၶဝ်ပူၵ်းမၼ်းလုၵ်ႉၸဵမ်ၸဝ်ႉသေ မိူဝ်းၵႂႃႇတၢင်းႁိူၼ်းပူႇသြႃႇၸေႃးၵ၊ ၼႂ်းႁိူၼ်းပူႇသြႃႇၼၼ်ႉၵေႃႈ သုမ်ႇလမ်ၽိုတ်းလူင်ဝႆႉ သႅင်လိုၼ်းႁၼ်ၼင်ႇၼၼ် သမ်ႉပေႃးဢမ်ႇၶႂ်ႈႁတ်းယၢင်ႈတိၼ်ၶဝ်ႈႁိူၼ်းၵႂႃႇသေ ထွႆလင်ၵႂႃႇၶိုၼ်း။
“ၵႂႃႇလႄႈ”
“ႁွင်ႉၶႃႈမႃးႁဵတ်းသင်တီႈၼႆႈ”
“ဢေးလိုၼ်းႁႃႉၼၼ်ႉ ငိၼ်းဝႃႈမၼ်းမႃးယဝ်ႉႁၢင်ႈဢမ်ႇႁၼ်မၼ်းႁေပွၵ်ႈလႃႇ”
“ၼၼ်ႉယဝ်ႉ ၸင်ႇလႆႈဢဝ်မႃးၸူးလုင်းသြႃႇႁဝ်းၶႃႈဢေႃႈၼႆႉ”
“မၼ်းႁမ်ႉပဵၼ်ႁင်လႃႇ”
“ၼွၼ်းတိၵ်းတိၵ်းၶႃႈဢေႃႈၼၼ်ႉ ဢမ်ႇႁူႉမၼ်းပဵၼ်ႁင်ၶႃႈၼေႈ”
လုင်းသြႃႇၵေႃႈဢွၵ်ႇမႃးတူၺ်းတႂ်ႈတူၺ်းၼိူဝ်သေ
ယၵ်ႉတူၺ်းၼႃႈသႅင်လိုၼ်း ဢၼ်လုၵ်းဢူင်ႈၶူင်ႈလူင်ဝႆႉၼၼ်ႉ။
“ၼွၼ်းတိၵ်းတိၵ်း ဢမ်ႇၶႂ်ႈၵိၼ်ၶႂ်ႈယႅမ်ႉၸွင်ႇၸႂ်ႈ”
“ၸႂ်ႈၶႃႈဢေႃႈလုင်းသြႃႇႁဝ်း”
“ဢိူဝ်ႈ ပွႆႇဝႆႉၸိူင်ႉၼႆႁိုင်ႁိုင်တႄႉဢမ်ႇလီၼၼ်ႉမႂ်း မီးၽီမႃးႁွင်ႉမၼ်းၵႂႃႇယဝ်ႉဢိူဝ်ႈၼႆႉ”
“တေလႆႈႁဵတ်းႁိုဝ်ၶႃႈလႃႇပေႃးၼၼ်”
“လူဝ်ႇႁေႃႈပႅတ်ႈဢိူဝ်ႈ”
“ၼႅတ်ႈႁဵတ်းၶႃႈလႄႈပေႃးၼၼ်”
မႄႈၶဝ်ၵေႃႈဢဝ်ငိုၼ်းတၢင်ႇၽိူၼ်ဝႆႉပၼ်သေ လုင်းသြႃႇၵေႃႈ ၶဝ်ႈမိူဝ်းၼႂ်းႁိူၼ်းယဝ်ႉ မိူဝ်းမုၼ်းၵႃႇထႃႇ ဢုမ်းၾသျထဵၵ်း တီႈၶဝ်ႈသၢၼ်ၼမ်ႉမုၼ်းမၼ်းၼၼ်ႉသေ ႁွင်ႉႁႂ်ႈသႅင်လိုၼ်းၶဝ်ႈႁိူၼ်းမိူဝ်းယူႇ။
သႅင်လိုၼ်းၼၼ်ႉၵေႃႈ ႁၼ်တီႈၵႅပ်ႈမိူဝ်ႈလႂ် ၼႂ်းတႃႁၼ်မႅၼ်ႈႁွင်ႈၵႅပ်ႈဢၼ်မၼ်းလႆႈယူႇမႃးၼၼ်ႉ မိူၼ်တိုၵ်ႉၶမ်ဝႆႉယူႇတီႈၼၼ်ႈသေ ဢဝ်ဢမ်ႇၶႂ်ႈၶဝ်ႈပႅတ်ႈ၊ တေႃႈၼင်ႇၼွၼ်းၵၢင်ၶိုၼ်း တိုၼ်းတႆႈၾႆးသေၼွၼ်း။
“ၶဝ်ႈမိူဝ်းလႄႈလုၵ်ႈ မႂ်းတေလႆႈယူႇလီၵိၼ်ဝၢၼ်ၶိုၼ်းဢိူဝ်ႈ”
“မၼ်းၸၢင်ႈၵဵဝ်ႇသင်”
“မႂ်းတေႁူႉလႆႈၼႄႇ ၵႂႃႇလႄႈလုင်းသြႃႇတေပတ်းပၼ်မႂ်းဢိူဝ်ႈ”
“ၶႃႈႁၼ်ယူႇ ၼႂ်းႁိူၼ်းၼၼ်ႉ ၸွၵ်ႉၼၼ်ႉၼင်ႈပေႃးသႅမ်းယူႇသဵင်ႈ တေၶဝ်ႈမိူဝ်းႁဵတ်းသင်လႃႇ ႁိူၼ်းလုင်းသြႃႇၽီလိူင်ႇပေႉတၢၼ်ႇၼၢၼ်ႉ”
လုင်းသြႃႇသမ်ႉပေႃးလိုမ်းၵႃႇထႃႇမၼ်းယဝ်ႉ တူၺ်းသႅင်လိုၼ်းသေ
“မႂ်းႁၼ်တေႉႁႃႉဢေးလိုၼ်း”
“ႁၼ်ဢိူဝ်ႈ ၶဝ်ထုၵ်ႇမတ်ႉဝႆႉဢမ်ႇၸၢင်ႈၵႂႃႇတၢင်းလႂ်လႆႈ လုင်းသြႃႇႁဝ်းၵေႃႈ ၽုၺ်ႇၽၵ်းတူၽွင်ႈလႄႈ”
“ဢဝ်ငိုၼ်းႁဝ်းၶိုၼ်းလႄႈမႄႈ ႁဝ်းမိူဝ်း ၽီလႄႈတင်းၶႃႈပဵၼ်ဢူၺ်းၵေႃႉၵၼ်ၵူၺ်း ၶႃႈၸွင်ႇၵွႆႈမိူဝ်းလၢတ်ႈတေႃႇၶဝ်ၼ”
သႅင်လိုၼ်းၵေႃႈ ယိပ်းဢဝ်ငိုၼ်းမႄႈၶဝ်သႂ်ႇထွင်းမၼ်းသေ မိူဝ်းၵႂႃႇယဝ်ႉ။
“ပေႃးၼၼ်တေႁဵတ်းႁိုဝ်ၶႃႈလႃႇၼၼ်ႉလုင်းသြႃႇႁဝ်းဝႃႈ”
“ပေႃးမၼ်းပဵၼ်ၼၼ်ၵေႃႈ ပွႆႇမၼ်းၵႂႃႇသေလႃႈၵဝ်ၵေႃႈဢမ်ႇယႃႇလႆႈယဝ်ႉၵဝ်ႇၸိူင်ႉၼႆတႄႉ ႁူဝ်မၼ်းၶႅင်ၼႃႇလူင်”
“ဢေႃႈဢေႃႈ..”
မႄႈၶဝ်ၵေႃႈလမ်းၸွမ်းမၼ်းႁေထၢမ်ယဝ်ႉ
“မႂ်းႁၼ်ၽီတေႉႁဢေးလိုၼ်း”
“ႁၼ်ဢိူဝ်ႈ ၸုၵ်းယူႇႁိမ်းမႄႈႁဝ်းၼၼ်ႉ”
မႄႈၶဝ်ၵေႃႈတူၺ်းသၢႆႉတူၺ်းၶႂႃ ၼင်ႇဝႃႈၶူၼ်တုမ်ႇၼိူဝ်ႉပေႃးၵီႈမႃးယဝ်ႉ။
“မႂ်းလႅၼ်ၵဝ်ၸွင်ႇၸႂ်ႈ ပေႃးလၢတ်ႈလွင်ႈၸိူင်ႉၼႆ ၵဝ်ဢမ်ႇတွၼ်ႉႁၼ်မႂ်းယုမ်ႇႁေပွၵ်ႈ မႂ်းပွင်ႉၵဝ်ယူႇသေႇသေႇႁိုဝ်လႃႇ”
သႅင်လိုၼ်းဝၢႆႇတူၺ်းမႄႈၶဝ်သေ
“ၶႃႈႁၼ်တေႉဢိူဝ်ႈ ယူႇၼႂ်းလပ်းသိင်ႇမိူဝ်ႈလႂ် ၶႃႈလႆႈငိၼ်းသဵင်ၶၢင်း၊ သဵင်ႁွင်ႉႁႆႈၶဝ် မေႃးယူႇၼႂ်းႁူၼႆႉတႃႇသေႇယဝ်ႉ မိူဝ်ႈၵႆႈၵေႃႈၶႃႈလႆႈငိၼ်းတေႉဢိူဝ်ႈ” ပႆပူၼ်ႉၵႂႃႇပႅတ်ႈယူႇယဝ်ႉ။
“လုင်းသြႃႇၵေႃႈဢမ်ႇဢဝ်ပေႉလႆႈယဝ်ႉမႂ်းၼႆႉ လူဝ်ႇႁႃထႅင်ႈတၢင်ႇတီႈၵူၺ်းယဝ်ႉ”
မိူဝ်ႈၼႆႉၵေႃႈဝႆႉသေ ထိုင်ၼင်ႇမိူဝ်ႈၽုၵ်ႈမႃး မႄႈၶဝ်ၵေႃႈႁႅၼ်းၶူဝ်းႁႅၼ်းလဵင်း သႂ်ႇထူင်ၶူဝ်းမၼ်းယဝ်ႉ ႁွင်ႉမၼ်းလုၵ်ႉသုပ်းၽႃႈယၢင်သေ ဢွၼ်မၼ်းၶီႇလူတ်ႉၶိူင်ႈလူင်မိူဝ်းၵႂႃႇတၢင်းၵျွင်းမႄႈၶၢဝ်ၼႂ်းဝဵင်းၼၼ်ႉယဝ်ႉ။
“မႄႈႁဝ်းႁွင်ႉၶႃႈမႃးႁဵတ်းႁင်တီႈၼႆႈ”
“ၵဝ်ဝူၼ်ႉလႆႈတီႈၼႆႈၵူၺ်းဢိူဝ်ႈမႂ်းႁူႉ ၽီဢၼ်မႂ်းႁၼ်ၸိူဝ်းၼၼ်ႉၵေႃႈဝူၺ်ႇၵုသူဝ်ႇပၼ်ၶဝ်ႁေဢိူဝ်ႈ ထွမ်ႇတြႃး ဢဝ်သိၼ်ဢဝ်ထမ်းႁေ ယူဝ်မႂ်းၸၢင်ႈလီမႃးၶိုၼ်းၼၼ်ႉၼႃႇ ၵဝ်ၵေႃႈဢမ်ႇႁူႉတေႁဵတ်းႁိုဝ်ယဝ်ႉမႂ်း”
မႄႈၶဝ်ၵေႃႈ ဢဝ်မၼ်းၽၢၵ်ႇဝႆႉတီႈမႄႈၶၢဝ်ႁႂ်ႈသင်ႇပွၼ်ႈသွၼ်ပၼ် ႁႂ်ႈႁူႉၽြႃးတြႃးၽွင်ႈ လႄႈ လၢတ်ႈၼႄလွင်ႈႁဵတ်းတၢင်းသၢင်ႈ သႅင်လိုၼ်းၼၼ်ႉယဝ်ႉ၊ မႄႈၶၢဝ်ၵေႃႈႁပ်ႉၶၢမ်ႇဢဝ်သေ ပႃႈဢူႉၵေႃႈမိူဝ်းၵႂႃႇယဝ်ႉ။
ၸဝ်ႈၶၢဝ်ဢွၼ်ႇၶဝ်ၵေႃႈ ဢဝ်သိူဝ်ႈၶူဝ်းၶၢဝ်မႃးပၼ်မၼ်းသေ၊ ယိပ်းဢဝ်မိုဝ်းမၼ်းယဝ်ႉ ၸူဝ်းဢွၼ်ဢဝ်မၼ်းပႆလႄႇၼႂ်းဝၢင်းၵျွင်းၶဝ်ၼၼ်ႉယူႇ။
မိုဝ်းဢုၼ်ႇဢုၼ်ႇဢွၼ်ႇၸဝ်ႈၶၢဝ်ၼၼ်ႉ ပူၵ်းၸႂ်မၼ်းဢုၼ်ႇမႃးၶိုၼ်း ႁၼ်မႅၼ်ႈၺႃးမိုဝ်းၵူၼ်းၵေႃႉၼိုင်ႈ ဢၼ်ယိပ်းၵမ်မိုဝ်းမၼ်းဝႆႉ သမ်ႉပေႃးဢမ်ႇပွႆႇ။
ယၢမ်းၵၢင်ၶမ်ႈၼႆၵေႃႈ ပိူၼ်ႈၼင်ႈတြႃး မၼ်းၵေႃႈလႆႈၵႂႃႇၼင်ႈၸွမ်းပိူၼ်ႈယဝ်ႉ၊ ၼႂ်းၸႂ်ၵေႃႈမီးလွင်ႈမုင်ႈမွင်းမႃး ၶႂ်ႈႁူႉၶႂ်ႈႁၼ်မႃးဝႃႈ ၵူၼ်းၵေႃႉၼၼ်ႉပဵၼ်ၽႂ် ၼင်ႈတြႃးၼႆၵေႃႈ ၶတ်းၸႂ်ဝူၼ်ႉတူၺ်း ပိူၼ်ႈထွမ်ႇတြႃးယူႇၵေႃႈ ၸႂ်တႄႉဢမ်ႇၸပ်းတူဝ်ယဝ်ႉ။
ၵၢင်ၼႂ်ၵေႃႈလႆႈလုၵ်ႉၸဝ်ႉၸဝ်ႉသေဝႆႈၽြႃးၸွမ်းပိူၼ်ႈထႅင်ႈ၊ ၵၢင်ဝၼ်းၵေႃႈ ပိူၼ်ႈႁႂ်ႈႁဵတ်းၵၢၼ်မၢႆယိူဝ်ႈၽုၵ်ႇမွၵ်ႇၸွမ်းၼႂ်းဝၢင်းၵျွင်းၼၼ်ႉသေ ႁူဝ်ၶမ်ႈမႃးၵေႃႈၼင်ႈတြႃးထႅင်ႈ၊ ၶိင်ႇၵိၼ်ၵေႃႈၵိၼ် ၶိင်ႇၼွၼ်းၵေႃႈၼွၼ်း ၶိင်ႇလိုဝ်ႈၼႆၵေႃႈ မႄႈၶၢဝ်တေဢဝ်တင်းပပ်ႉဢၢၼ်ႇပပ်ႉတႅမ်ႈလႄႈၵမ်သေ ပၼ်မၼ်းတႅမ်ႈမၢႆၵႂႃႇ လွင်ႈဢၼ်ၶမ်ဝႆႉယူႇၼႂ်းၸႂ်မၼ်းယဝ်ႉ။
ယူႇႁိုင်မႃးၵေႃႈ ပၼ်ႁႂ်ႈမၼ်းယူႇၵူၺ်းသေ ဢမ်ႇၸွမ်းလၢတ်ႈၸွမ်းဝႃႈသင်ၵေႃႈ မၼ်းၵေႃႈႁဵတ်းၵၢၼ်ၵႂႃႇမၢၼ်ႇမၢၼ်ႇမိူၼ်ၼင်ႇဢၼ်ယၢမ်ႈႁဵတ်းယူႇၵူႈဝၼ်းၼၼ်ႉယဝ်ႉ။
ႁိုင်ယူႇမွၵ်ႈသၢမ်လိူၼ်ပၢႆပၢႆ ၽွင်းၶၢဝ်းဢွၵ်ႇဝႃႇယဝ်ႉၼႆၵေႃႈ မၼ်းၵေႃႈလႆႈဝႃႈၶႅၼ်းမႃးတေႉတေႉယဝ်ႉ ယွၼ်းပွၵ်ႈမိူဝ်းၶိုၼ်းသေ မႄႈၶၢဝ်ၵေႃႈတမ်းၸႂ်လႆႈယဝ်ႉလႄႈ ႁႂ်ႈမၼ်းမိူဝ်းၶိုၼ်းယူႇ။ မၼ်းၵေႃႈ
လၢႆႈၶူဝ်းၵူၼ်းႁိူၼ်းမၼ်းၶိုၼ်းသေ ႁၼ်ငိုၼ်းဢၼ်ဝႆႉၼႂ်းထူင်ၶူဝ်း ၸဵမ်မိူဝ်ႈတႄႇမႃးၼၼ်ႉ ၸပ်းမႃးၸွမ်းလႄႈ ယုၵ်ႉတမ်းတိၼ်မၼ်းယၢင်ႈၵႂႃႇၼႂ်းၵၢတ်ႇၵမ်းလဵဝ်ယဝ်ႉ။
သမ်ႉဝႃႈဝၢၼ်ႈၶဝ်ဢမ်ႇယူႇၼႂ်းဝဵင်းၵေႃႈ ဢမ်ႇၸႂ်ႈဝႃႈၵႆဝဵင်းႁႅင်းၼႃႇ ပဵၼ်ဝၢၼ်ႈယူႇၵိုၵ်းသဵၼ်ႈတၢင်းၵႃးလႄႈ ၾႆးၾႃႉၵေႃႈလႆႈလီ လႅင်းၾူၼ်းၵေႃႈၶႅမ်ႉ ၼမ်ႉတႄႉၵေႃႈၸႂ်ႉၼမ်ႉမေႃႇသေ ဢဝ်ၾႆးတိုတ်ႉၶိုၼ်ႈၵူၺ်း။
မိူဝ်ႈတေၶဝ်ႈၵၢတ်ႇၼၼ်ႉ ႁူပ်ႉၺႃးပႃႈၸိင်ႇ
“တၼ်းမႃးၶိုၼ်းမိူဝ်ႈလႂ်လႃႇဢေးလိုၼ်း”
ၶဝ်ၵေႃႈဢမ်ႇႁူႉဝႃႈ သႅင်လိုၼ်းမႃးယူႇတီႈၵျွင်းၸဝ်ႈၶၢဝ်ၼႆ၊ ထၢင်ႇဝႃႈၵႂႃႇႁဵတ်းၵၢၼ်သေပွၵ်ႈမႃးၸႂ်းႁိူၼ်းၵူၺ်း။
“တိုၵ်ႉတေမိူဝ်းႁိူၼ်းမိူဝ်ႈလဵဝ်ဢေႃႈၼႆႉ ဢၢင်ႈမႃးႁႃလူတ်ႉယူႇဢေႃႈ”
“မိူဝ်းၸွမ်းႁဝ်းလႄႈပေႃးၼၼ်ၵေႃႈ”
“ဢေႃႈၶႃႈ”
ယၢမ်းၼၼ်ႉ ၸိုၼ်ႈမိူင်းၵေႃႈ ပႆမႃးတၢင်းလင်မႄႈၶဝ်ၼၼ်ႉသေ ယွင်ႈတင်းတိူၵ်ႈမၢၵ်ႇမႆႉဝႆႉလႄႈ
“ၸၢႆး..ဢဝ်ၵႂႃႇဝႆႉၼႂ်းၵႃးလႄႈၼႃႈ”
မၼ်းၵေႃႈဢမ်ႇတၵ်းသဵင်သေ ပႆၵႂႃႇၸူးၵႃးယဝ်ႉ ဢဝ်တိူၵ်ႈၶျႃးသႂ်ႇဝႆႉယဝ်ႉ။
“ဢေးလိုၼ်း မႂ်းဢမ်ႇလူဝ်ႇသိုဝ်ႉၼႄႇမၢၵ်ႇမႆႉ”
“မႄႈႁဝ်းၶဝ်ၸွင်ႇပႆႈမႃးသိုဝ်ႉႁိုဝ်ဢမ်ႇႁူႉ”
“ၶဝ်တႄႉတေမႃးမိူဝ်ႈၽုၵ်ႈဢိူဝ်ႈ ၵၢတ်ႇၽိတ်ႈ ၼၼ်ႉၼႃႇ ၵဝ်တႄႉမႃးသိုဝ်ႉတၢင်းၶၢႆၵဝ်ႁေ သိုဝ်ႉမိူဝ်းၵမ်ႈၽွင်ႈယဝ်ႉ”
“သိုဝ်ႉမိူဝ်းၽွင်ႈၵႃႈ ပေႃးပႂ်ႉသိုဝ်ႉမိူဝ်ႈၽုၵ်ႈၵူၺ်းသမ်ႉတေလႆႈတၢင်ႇၼၵ်းၼႃႇ”
“ဢိူဝ်ႈၵႂႃႇသိုဝ်ႉလႄႈ ႁႃးတေပႂ်ႉတီႈသႅင်ႇၶဝ်ႈၽၵ်းလုင်းလိူၼ်ၶဝ်ၼႃႈ”
“ဢေႃႈဢေႃႈ..”
“ပေႃးလူဝ်ႇသိုဝ်ႉၼမ်ၵေႃႈႁွင်ႉဢၢႆႈၸၢႆးၵႂႃႇၸွမ်းလႄႈ”
“ဢမ်ႇလူဝ်ႇၼမ်ၶႃႈ ၵူဝ်ပႃႈႁဝ်းဢမ်ႇၸၢင်ႈတၢင်ႇၵုၼ်ႇႁေယဝ်ႉဢေႃႈပေႃးသိုဝ်ႉၼမ်”
“ၸိူင်ႉမႂ်းၼႆႉမေႃဢၢၼ်းၼႃႇပိူၼ်ႈႁေၵႃႈမိူဝ်ႈလဵဝ်”
“ၶႃႈၵႂႃႇယဝ်ႉ”
သႅင်လိုၼ်းၵေႃႈတိဝ်ႈတင်းထူင်မၢၵ်ႇမႆႉၼၼ်ႉသေ သိုဝ်ႉပႃးၾူၼ်းႁူၺ်ႇၼိုင်ႈယဝ်ႉ မိူဝ်းၵႂႃႇတၢင်းသႅင်ႇလုင်းလိူၼ်ၶဝ်ၼၼ်ႉသေ ၸိုၼ်ႈမိူင်းဢၼ်ႁၼ်ၼင်ႇၼၼ်ၵေႃႈ ၼႅတ်ႈၵႂႃႇၽုၺ်ႇၽၵ်းတူႁူဝ်ၵႃးၼၼ်ႉသေ ယိပ်းဢဝ်ၸွၵ်းမၢၵ်ႉမႆႉသႅင်လိုၼ်းၶဝ်ႈဝႆႉပၼ်ယဝ်ႉ၊ သႂ်ႇၵႂႃႇသႂ်ႇမႃးယိပ်းပႃးမိုဝ်းသႅင်လိုၼ်းၼၼ်ႉယဝ်ႉၼႃႇ။
