တွၼ်ႈႁႃႈ
ၸဵမ်မိူဝ်ႈၶိုၼ်ႈႁူင်းႁဵၼ်းမႃးၼၼ်ႉ ပေႃးမႃးဝူၼ်ႉတူၺ်းယဝ်ႉ ၼင်ႇႁၢင်ႈႁိုင်ဝႃႈႁိုင် ၽိူဝ်ႇၼပ်ႉၵႂႃႇၼပ်ႉၶိုၼ်း တိုၵ်ႉႁႃလႆႈၼိုင်ႈဝူင်ႈၵူၺ်းဝႃႇ၊ မိူဝ်ႈၼႆႉၵေႃႈ ယင်းတိုၵ်ႉပဵၼ်ဝၼ်းသဝ် လိုဝ်ႈထႅင်ႈမိူဝ်ႈၽုၵ်ႈႁေၵူၺ်းၵေႃႈ သမ်ႉပေႃးၶိုၼ်ႈႁူင်းႁဵၼ်းၶိုၼ်းယဝ်ႉ။ ပဵၼ်သင်လႄႈ ဝၼ်းၶိုၼ်ႈႁူင်းႁဵၼ်း တေလႆႈၼမ်လိူဝ်သေဝၼ်းလိုဝ်ႈလႃႇ ႁဵတ်းၽဵင်ႇၽဵင်ႇၵၼ်ဢမ်ႇလႆႈႁႃႉ၊ ၶႃႈၶၢၼ်ႉၵႂႃႇႁူင်းႁဵၼ်းၼႃႇယဝ်ႉဝႃႈ။
မိူဝ်ႈၼႆႉဝၼ်းလိုဝ်ႈၼႆၵေႃႈ ဢဝ်ၵၢင်ၸႂ်ယူႇတီႈႁိူၼ်းၼင်ႇၵႃႈၶႂ်ႈပဵၼ်ၼၼ်ႉ လွတ်ႈလွတ်ႈလႅဝ်းလႅဝ်း။ ၵၢင်ၼႂ်ၵေႃႈလႆႈၼွၼ်းဢိမ်ႇၼွၼ်းတဵမ်လီၼႃႇ ၼွၼ်းသမ်ႉပေႃးငိူဝ်ႈသိုဝ်ႈလူင်ၵႂႃႇ ၼွၼ်းယူႇၵေႃႈယင်းတိုၵ်ႉၼွၼ်းလႆႈထႅင်ႈယူႇ ၵၢင်ဝၼ်းပေႃးတဵင်ႈယဝ်ႉ ၶႃႈဢမ်ႇပႆႇဢွၵ်ႇႁွင်ႈလႄႈ ၼၢႆးႁဝ်းသမ်ႉပေႃးလႆႈမႃးတွႆႇၽၵ်းတူယူႇ။
“ဢေးယိင်း…မႂ်းပဵၼ်သင်လႃႇ! ဢမ်ႇယူႇလီႁႃႉ..”
“ဢေႃႈ..ယူႇလီယူႇၵူၺ်း..ယွၼ်းၼွၼ်းထႅင်ႈဢိတ်ႉၶႃႈၼၢႆး..”
တေဝႃႈႁိုဝ်လႃႇ ၶမ်ႈဝႃးၶႃႈဢမ်ႇလႆႈၼွၼ်း ၶႃႈဢၢၼ်ႇၸိူင်းတင်းၶိုၼ်း မၼ်းၸၼ်ၸႂ်ၼႃႇ ၵႃႈဢမ်ႇသုတ်းၶႃႈၼၼ်ႉ သမ်ႉဢမ်ႇၶႂ်ႈလိုဝ်ႈလႄႈ လူတေႃႇပေႃးသုတ်းႁေၵေႃႈ တိုၵ်ႉႁႃလႆႈၼွၼ်းမိူဝ်ႈ မိူင်းၸမ်တေလႅင်းၼႆႉၵူၺ်း။
“မႂ်းတေၼွၼ်းဢဝ်ဝၢၼ်ႈဢဝ်မိူင်းႁႃႉ..ၶၢဝ်းၼႆႉယဝ်ႉၵေႃႈပႆႇလုၵ်ႉ!..လုၵ်ႉမႃးႁႃၵိၼ်ၶဝ်ႈမႂ်းလႄႈ..ၵမ်ႉၵေႃႈလူဝ်ႇၵႂႃႇသူၼ်ယဝ်ႉ”
“ဢမ်ႇၵႂႃႇယဝ်ႉ!…”
“ၸိုင်မႂ်းဝႃႈၶႂ်ႈၵိၼ်ထူဝ်ႇၽူးဢုၼ်ႇဢမ်ႇၸႂ်ႈႁႃႉ..ပေႃးမႂ်းၵႂႃႇၵဵပ်းၽၵ်း..မိူဝ်ႈၽုၵ်ႈပေႃးၵဝ်ၵႂႃႇၵၢတ်ႇၶၢႆၽၵ်းမႃး..ၵဝ်တေမႃးႁဵတ်းလဵင်ႉမႂ်းလႂ်”
“ဢမ်ႇၵိၼ်ယဝ်ႉ!..”
“ဢေးယိင်းဢူၺ်ႉ!..ဢေးယိင်း..မႂ်းၵေႃႈ ၵေႃႉယႂ်ႇမႃးၵူႈမိုဝ်ႉၵူႈဝၼ်းယဝ်ႉ တေႁဵတ်းလုၵ်ႈဢွၼ်ႇၵႂႃႇတိၵ်းတိၵ်းဢမ်ႇလႆႈယဝ်ႉၼႃႈ ၵဝ်ၵေႃႈထဝ်ႈမႃးတိၵ်းတိၵ်းယဝ်ႉ..ဢမ်ႇႁူႉတေယူႇၸွမ်းသူပီႈၼွင်ႉလႆႈထႅင်ႈႁိုင်ၵႃႈႁိုဝ်..ၵိုတ်းသူသွင်ၵေႃႉပီႈၼွင်ႉၵူၺ်းၵေႃႈ လူဝ်ႇမေႃၸွႆႈထႅမ်ၵၼ်ၵႂႃႇဢိူဝ်ႈ!.. ပဵၼ်သၢဝ်ပဵၼ်ၼၢင်း ၼွၼ်းလိုၵ်းလုၵ်ႉလႃႈ ပိူၼ်ႈႁူႉတင်းဝၢၼ်ႈတင်းဝဵင်း ဢမ်ႇဢၢႆၽွင်ႈႁႃႉ၊ ဢီႇၶီႈၶၢၼ်ႉၶီႈဢိူၼ် ၽႂ်ႁၼ်မႂ်းၵေႃႈ ဢမ်ႇၶႂ်ႈလႆႈမႂ်းၶိုၼ်ႈပႂ်ႉ ႁဵတ်းမေးပိူၼ်ႈယဝ်ႉလေႃႇ”
“လုၵ်ႉလႄႈဢေးယိင်း..ထိုင်ၶၢဝ်းပိူၼ်ႈလုၵ်ႉၵေႃႈလုၵ်ႉလႄႈ..ပေႃးလုၵ်ႉယဝ်ႉၵေႃႈၵိၼ်ၶဝ်ႈမႂ်းႁေ..ၵႂႃႇၸူးႁဝ်းဢၢႆႈၸၢႆးၶဝ်ၼႂ်းသူၼ်လႄႈၼႃႈ..ၵဝ်ၵႂႃႇယဝ်ႉ”
ထိုင်တီႈၼၢႆးႁဝ်းပေႃးလၢတ်ႈၸိူင်ႉၼႆမႃး တေႁႂ်ႈၶႃႈသိုပ်ႇၼွၼ်းလႆႈၸိူင်ႉႁိုဝ် ၶႃႈၵေႃႈၽုၼ်ႇၽၢၼ်ႇလုၵ်ႉမႃး ၼႃႈၵေႃႈဢမ်ႇသုၵ်ႈယဝ်ႉ ၼင်ႈၵိၼ်ၶဝ်ႈၼႂ်းသွင်ႇၾႆးၼၼ်ႉႁေၵေႃႈ ဢွၵ်ႇၵႂႃႇယူႇ။
လုၵ်ႉတီႈႁိူၼ်းႁဝ်းႁေၵႂႃႇတီႈသူၼ်ၼၼ်ႉၵေႃႈ ၶႂ်ႈဝႃႈၵႆယူႇတၢၼ်ႇတၢၼ်ႇ တင်းသူၼ်လႄႈတင်းၼႃးႁဝ်းၼၼ်ႉ ႁဵတ်းၸပ်းၵၼ်ဝႆႉယဝ်ႉ။ ပေႃးပႆဢဝ်တႄႉ တေႁိုင်ယူႇမွၵ်ႈ 20 မိၼိတ်ႉၼႆႉ ၵူၺ်းၵႃႈ ၶႃႈၶီႇလူတ်ႉထိပ်ႇၵႂႃႇဢဝ်တႄႉ ဢမ်ႇထိုင်မွၵ်ႈၼၼ်ႉၼင်ႇၵဝ်ႇ။ တီႈၼႂ်းသူၼ်ၼၼ်ႉ လိူဝ်သေၼၢႆးႁဝ်းလႄႈဢၢႆႈၸၢႆးယဝ်ႉ သမ်ႉမီးတင်း ၶူးပိူင်းၾႃႉ၊ ၸွမ်ၶိူဝ်း၊ သႅင်ၶိူဝ်း၊ သၢႆႁိူဝ်ႈ ၶဝ်ၵေႃႈမႃးၸွႆႈ ယူႇယဝ်ႉ။
ဢမ်ႇလၢၵ်ႇလၢႆးသင် ပေႃးဝႃႈၶဝ်တေမႃးၸွႆႈ ၶူးပိူင်းၾႃႉၵေႃႈ ပဵၼ်ၵူၼ်းႁိမ်းႁိူၼ်းၸမ်ၵၼ် မီးသင်ၵေႃႈၸွႆႈၵၼ်ယူႇတႃႇသေႇ၊ ၸွမ်ၶိူဝ်းၼၼ်ႉၵေႃႈ ပဵၼ်လုၵ်ႈၸၢႆးၵေႃႉလဵဝ်ၵူၺ်းလႄႈ ပေႃႈမႄႈၼႆၵေႃႈ မီးငိုၼ်းမီးတွင်းလဵင်ႉလူလႆႈလီ ဢမ်ႇပၼ်ႁဵတ်းႁင်ယူႇယဝ်ႉ ဝၼ်းလိုဝ်ႈဢမ်ႇမီးၵၢၼ်ႁင် ဢမ်ႇၸၢင်ႈႁဵတ်းၵၢၼ်သင်ၵေႃႈ ၵႂႃႇလႄႇၼၼ်ႉၼႃႇ၊ သႅင်ၶိူဝ်းၵေႃႈ ပဵၼ်လုၵ်ႈၸၢႆးၵေႃႉလဵၵ်ႉသုတ်းၼႂ်းႁိူၼ်းလႄႈ ပေႃႈမႄႈၸွမ်းၸႂ် ဢမ်ႇပၼ်ႁဵတ်းၵၢၼ်တီႈႁိူၼ်းမိူၼ်ၵၼ် ပေႃးဝႃႈသူၼ်ၸႂ်ၵၢၼ်ႁဵၼ်းယူႇၵေႃႈလႆႈယဝ်ႉ၊ သၢႆႁိူဝ်ႈၼၼ်ႉတႄႉ တိုၼ်းပဵၼ်ၸွမ်ၶိူဝ်းၶႃသႅင်ၶိူဝ်းႁွင်ႉမႃးၵူၺ်း ပိူၼ်ႈဝႃႈႁင်ၵေႃႈဝႃႈၸွမ်းၸိူင်ႉၼၼ်ယဝ်ႉ ဢမ်ႇပေႃးသုၵ်ႉယုင်ႈၵႃႈႁိုဝ် သမ်ႉဝႃႈႁဵတ်းသင်ၵေႃႈ ပေႃႈမႄႈၵေႃႈဢမ်ႇဝႃႈႁင် ပေႃးဢမ်ႇၵႂႃႇႁဵတ်းလွင်ႈဢမ်ႇလီၵေႃႈပေႃးယဝ်ႉ ၶဝ်ၸိူဝ်းၼႆႉပဵၼ်ၵူၼ်းဢၼ် ၵႆႉမႃးႁိူၼ်းႁဝ်းလိူဝ်သေပိူၼ်ႈ ၼၼ်ႉယဝ်ႉ။
ၶဝ်သၢမ်ၵေႃႉၼႆႉ ပဵၼ်ၵူၼ်းဢၼ်ၵၢမ်ႇလီတေႉတေႉယူႇ ပေႃႈမႄႈၸွမ်းၸႂ် ဢမ်ႇလႆႈႁဵတ်းၵၢၼ်ၼႆၵေႃႈ မႃးႁႃၵၢၼ်ႁဵတ်းၼၼ်ႉၼႃႇ။ ၼႂ်းၶဝ်ပဵၼ်ဢူၺ်းၵေႃႉၵၼ်တင်းမူတ်းၼၼ်ႉ ဢၢႆႈၸၢႆးႁဝ်းၼၼ်ႉတႄႉ ႁဵတ်းၵၢၼ်ပေႃးဢမ်ႇမီးၶၢဝ်းယၢမ်းတၼ်းလႄႇမိူၼ်ၶဝ်ႁေပွၵ်ႈၼၼ်ႉယဝ်ႉ ယွၼ်ႉမီးၼွင်ႉယိင်း ဢၼ်ဢမ်ႇႁူႉၵႂၢမ်းၸိူင်ႉၼင်ႇၶႃႈၼႆႉယူဝ်ႉထၢင်ႇ။
မၢင်ပွၵ်ႈၶႃႈၵေႃႈၶႂ်ႈလႅၵ်ႈလၢႆႈယူႇၵူၺ်းၼင်ႇၵဝ်ႇ ၵူၺ်းၵႃႈမိူဝ်ႈဝူၼ်ႉလႆႈယဝ်ႉ ဢမ်ႇႁူႉဝႃႈတေႁဵတ်းႁိုဝ်ၼၼ်ႉၼေႈ၊ တိုၵ်ႉဝူၼ်ႉၵူၺ်းဝႃႈတေလႅၵ်ႈလၢႆႈ လွင်ႈဢၼ်ႁဵတ်းယူႇၼၼ်ႉသမ်ႉ ပေႃးၵႂႃႇပဵၼ်ပိူင်ၵဝ်ႇၶိုၼ်းယဝ်ႉ ၶႃႈလႅၵ်ႈလၢႆႈဢမ်ႇလႆႈယဝ်ႉဝႃႈ ဢၼ်“ပဵၼ်ၵူၼ်းလီ”ၼၼ်ႉ။ ပိူၼ်ႈၵေႃႈဝႃႈယူႇလူး ၸေႈၽိူၵ်ႇဢၼ်ဢိူၵ်ႇၼမ်ႉမိုၵ်ႉၼၼ်ႉ မိူဝ်ႈၸပ်းသီလမ်ယဝ်ႉ တေဢမ်ႇၸၢင်ႈပဵၼ်သီၽိူၵ်ႇမႃးလႆႈၶိုၼ်းယဝ်ႉ။
မိူဝ်ႈဢၼ်ၶႃႈၵႂႃႇၼႂ်းသူၼ်ၼၼ်ႉ ႁၼ်ၸွမ်ၶိူဝ်းယဝ်ႉၵေႃႈ သမ်ႉပေႃးဢမ်ႇယၵ်ႉတူၺ်းၼႃႈၶႃႈသေဢိတ်း။ ႁႃးသွင်ၵေႃႉၼၼ်ႉတႄႉ ယူႇၵေႃႉၸဵင်ႇၸဵင်ႇသေ ၵဵပ်းၽၵ်းၵႂႃႇႁင်းၽႂ်ႁင်းမၼ်းၵူၺ်း။ မိူဝ်ႈဢၼ်ၵဵပ်းၽၵ်းယဝ်ႉၵေႃႈ ဢွၼ်ၵၼ်ပွၵ်ႈမိူဝ်းၵႂႃႇယဝ်ႉ ၶဝ်ၵေႃႈ ၸွႆႈတေႃႉၽၵ်းမႃးထိုင်တီႈႁိူၼ်းယူႇ၊ ႁူဝ်ၶမ်ႈယဝ်ႉလႄႈ ဢွၼ်ၵၼ်ႁုင်ႉမိုဝ်ႉၵႅင်ၵိၼ်ၶဝ်ႈၵုမ်းၵၼ်ၵႂႃႇ။ ၼၢႆးႁဝ်းဢၼ်ႁၼ်ႁႃး ၸွမ်ၶိူဝ်း ဢမ်ႇတေႃႇၼႃႈၵၼ် ဢမ်ႇလၢတ်ႈတေႃႇၵၼ် မိူၼ်မိူဝ်ႈဢွၼ်တၢင်းၼၼ်ႉၵေႃႈ လၢၵ်ႇလၢႆးၵၢႆးတႃမၼ်းဝႆႉလႄႈ ထၢမ်ၸူးယူႇ။
“ၶိူဝ်သွင်ၵေႃႉပဵၼ်ႁင်လႃႇ..ၵူႈပွၵ်ႈၼႆႉ ပေႃးၵိၼ်ၶဝ်ႈၼႆပဵၼ်သဵင်ၶိူဝ်လၢႆလၢႆ”
ၼႂ်းၽိူၼ်မူႇၶဝ်ႈၼၼ်ႉၵေႃႈ ဢမ်ႇႁၼ်ၽႂ်တၵ်းသဵင်သေၵေႃႉ ၼင်ႈယဵၼ်ႁေ ၵိၼ်ယူႇႁင်းၽႂ်ႁင်းမၼ်းၵူၺ်း။ ၶႃႈၵေႃႈၼႅတ်ႈၵိၼ်ၼႅတ်ႈလၢင်ႉဝၢၼ်ႇယဝ်ႉ ၶဝ်ႈၼႂ်းႁိူၼ်းၵႂႃႇပႅတ်ႈၶဝ်ၵႂႃႇယူႇ။
ပေႃးဝၼ်းလိုဝ်ႈမႃးၼႆတီႈႁိူၼ်းႁဝ်းၼႆႉ မိူၼ်ပဵၼ်တီႈယူႇၶဝ်ၸိူဝ်းၼႆႉယဝ်ႉ။ မႃးတႄႇၸဵမ်ၵၢင်ၼႂ်ၸဝ်ႉတေႃႇႁူဝ်ၶမ်ႈ မႃးႁဵတ်းလိၵ်ႈႁဵတ်းလၢႆးၶဝ်၊ မၢင်ပွၵ်ႈၵေႃႈ မႃးလဵၼ်ႈတၢင်းလဵၼ်ႈ၊ ပေႃးမီးၵၢၼ်ႁဵတ်းၵေႃႈ ႁဵတ်းၵၢၼ်ၸွႆႈၵၼ်ႁေ ယူႇၵိၼ်ၶဝ်ႈၼႂ်တေႃႇၶဝ်ႈၶမ်ႈ ၸင်ႇတေပွၵ်ႈမိူဝ်းယူႇ။ မိူၼ်ႁိူၼ်းႁဝ်းၼၼ်ႉ ပဵၼ်ႁူင်းလိုဝ်ႈသဝ်းတွၼ်ႈတႃႇၶဝ်ယဝ်ႉ။ ၼၢႆးႁဝ်းၵေႃႈသမ်ႉၸႂ်လီ ဝႆႉၼင်ႇလုၵ်ႈၼင်ႇလၢၼ်ႁေ၊ ယွၼ်ႉၼၼ် ၶဝ်ၸိူဝ်းၼႆႉၵေႃႈ ၸင်ႇလႆႈမိူၼ်ပဵၼ်ပီႈဢၢႆႈၶႃႈ ယူႇယဝ်ႉ။
ယၢမ်းၵၢင်ၼႂ်မိူင်းပႆႇလႅင်း ၼၢႆးႁဝ်းၵေႃႈသမ်ႉပေႃးသုၵ်ႉသၵ်ႉသုၵ်ႉသိၵ်ႉသေ ႁႅၼ်းၶူဝ်းတႃႇၵႂႃႇၵၢတ်ႇ ယူႇယဝ်ႉ။ ဢၢႆႈၸၢႆးႁဝ်းၼၼ်ႉၵေႃႈ လုၵ်ႉၸဵမ်ၸဝ်ႉ လုၵ်ႉၸွႆႈၼၢႆးႁဝ်းယူႇ။ မိူဝ်ႈၼႆႉၶႃႈၵေႃႈ ငိၼ်းသဵင်ၶႃႁေတိုၼ်ႇၸွမ်းလႄႈ တေၼွၼ်းၶိုၼ်းယဝ်ႉၼွၼ်းဢမ်ႇလပ်း လုၵ်ႉမႃးၸွမ်းၶဝ်ယဝ်ႉ။
“ၶႃႈၵေႃႈတေၵႂႃႇ..”
ဢၢႆႈၸၢႆးႁဝ်းၼၼ်ႉ ယၵ်ႉတူၺ်းၼႃႈၶႃႈ ၼင်ႇလၢၵ်ႇလၢႆးဝႆႉႁေလၢတ်ႈယူႇ။
“ၵူၼ်းၸိူင်ႉၼင်ႇဢေးယိင်းၼႆႉ လုၵ်ႉၸဝ်ႉလႆႈႁေႁႃႉ..ၵႂႃႇငဝ်ၼွၼ်းၵူၺ်းယူဝ်ႉၵမ်ႉ”
“ႁႂ်ႈမၼ်းၵႂႃႇႁေလႄႈ..တူၺ်းမၼ်းဢမ်ႇလႆႈၵႂႃႇၵၢတ်ႇမီးၸမ်ပီႊယဝ်ႉယူဝ်ႉၼႆႉ”
ယွၼ်ႉပိူဝ်ႈၵၢတ်ႇမီးၵၢင်ၼႂ်ၸဝ်ႉၵူၺ်းလႄႈ ပေႃးဝႃႈလႃႈယဝ်ႉၼႆၵေႃႈ ၵၢတ်ႇၼၼ်ႉသမ်ႉပေႃးဝၢႆးယဝ်ႉ။ ၶႃႈၼၼ်ႉ ဢမ်ႇတွၼ်ႉလုၵ်ႉၸဝ်ႉလႆႈႁေပွၵ်ႈလႄႈ ၵႂႃႇၵၢတ်ႇဢမ်ႇတၼ်းၶိုတ်းႁေပွၵ်ႈၼၼ်ႉၼႃႇ။
တီႈၼႂ်းၵၢတ်ႇၼၼ်ႉ ႁဝ်းၼၢႆးလၢၼ်ၵေႃႈ ဢွၼ်ၵၼ်ၶျႃႉၶူဝ်း၊ ၶျႃႉၽၵ်းႁဝ်းသေယဝ်ႉၼင်ႈပႂ်ႉၶၢႆယူႇ။ ယွၼ်ႉတိုၵ်ႉၸဝ်ႉၼႃႇလႄႈ ၵူၼ်းလႄႇၵၢတ်ႇတႄႉဢမ်ႇပေႃးႁၼ် ၵူၺ်းမီးၵူၼ်းၶၢႆၵၢတ်ႇၵူၺ်း ယၢမ်းၼၼ်ႉ ၸင်ႇသမ်ႉလႆႈႁၼ် ၵူၼ်းၼႂ်းႁွင်ႈႁဝ်းၼၼ်ႉ ႁၢပ်ႇတင်းသွင်းၽၵ်းသေ မႃးၸွမ်းလင်မႄႈၶဝ်ယဝ်ႉ။ မိူၼ်မၼ်းၵေႃႈတေႁၼ်ၶႃႈသေ
“သႅင်ၶမ်း! ၵေႃႈမႃးႁေႁႃႉ!”
“ဢိုမ်ႈ!..” တူၺ်းမိူၼ် ၶဝ်ၼၼ်ႉတေၸိုဝ်ႈ သႂ်လႅင်းၼႆယူႇ။
ၼၢႆးႁဝ်းဢၼ်လႆႈႁၼ်ၶဝ်မႃးတူင်ႉတၵ်ႉၶႃႈၸိူင်ႉၼၼ်ၵေႃႈ
“လၢၼ်ႁူႉၸၵ်းၶဝ်ႁေႁႃႉ..”
“ဢမ်ႇထိုင်တၢၼ်ႇၼၼ်ႉၼင်ႇၵဝ်ႇ!..ႁဵၼ်းႁွင်ႈလဵဝ်ၵၼ်ၵူၺ်း!”
ၼၢႆးႁဝ်းၼၼ်ႉၵေႃႈ တူၺ်းၸွမ်းတၢင်းလင်မၼ်းၼၼ်ႉသေယဝ်ႉ ယၵ်ႉတူၺ်းၶႃႈမႃးယူႇ။
“မၢင်ပွၵ်ႈမႃးၵေႃႈ ၶႂ်ႈႁႂ်ႈၶဝ်မႃးပဵၼ်လၢၼ်ၵဝ်ၵူၺ်းယဝ်ႉ.. လၵ်းလႅမ်ဝႃႈငၢႆႈထွမ်ႇၵႂၢမ်း မေႃၶဝ်ႈဢွၵ်ႇၵူၼ်း ယဵၼ်ႇငႄႈ မေႃၵႃႉမေႃၶၢႆ မေႃၸွႆႈပေႃႈမႄႈႁဵတ်းၵၢၼ် တူၺ်းလၢၼ်ၵဝ်ၼႆႉသမ်ႉ ပိူင်ႈၵၼ်တေႉတေႉယဝ်ႉ”
“ၵမ်ႉဢၢႆႈၸၢႆးႁဝ်းတေၸႂ်လဵၵ်ႉယဝ်ႉၼႃႈ..”
“ၵဝ်ဝႃႈႁင်းမႂ်းဢိူဝ်ႈၼႆႉ!..လၢတ်ႈၵႂၢမ်းယင်းပႆႇသုတ်း မႂ်းပေႃးထဵင်ယဝ်ႉယိုင်.. ပေႃးမႃးၵၢတ်ႇၼႆ..ႁၼ်မၼ်းၵူႈပၢတ်ႈၵူႈပၢတ်ႈၼၼ်ႉယဝ်ႉ..ၵဝ်ၵႅၼ်ႇၶႂ်ႈႁႂ်ႈမႂ်းမႃးႁၼ်တေႉတေႉဢိူဝ်ႈ..ယူဝ်မႂ်းတေၸၢင်ႈမေႃပဵၼ်ၵူၼ်းမိူၼ်ၶဝ်ဢိတ်ႉၼိုင်ႈ”
ယၢမ်းၼၼ်ႉ ၸင်ႇသမ်ႉမီးပႃႈဢၼ်ယူႇၼႂ်းပွၵ်ႉႁဝ်းၼၼ်ႉၵေႃႈ မႃးလႄႇၵၢတ်ႇမိူၼ်ၵၼ်လႄႈ ႁၼ်ၶႃႈယဝ်ႉတူၵ်းၸႂ်ႁေ
“ဢလူဝ်ႉ! ဢေးယိင်းမႃးၵၢတ်ႇမိူၼ်ပိူၼ်ႈႁေႁႃႉၼႆႉ”
ပႃႈထႅင်ႈၵေႃႉၼိုင်ႈၵေႃႈလၢတ်ႈၸွမ်း“သၢဝ်ၶီႈၶၢၼ်ႉၼႂ်းဝၢၼ်ႈႁဝ်းမႃးၵၢတ်ႇၸဵမ် ၸဝ်ႉၸိူင်ႉၼႆ..လၢၵ်ႇလၢႆးတေႉၵဝ်ႇဢိူဝ်ႈ”
“ၺႃးၼၢႆးသူၸႂ်ႉမႃးဢဝ်ႁႃႉတေႃႈဝႃႈလႃး”
တူၺ်းၼၢႆးႁဝ်းၼၼ်ႉတႄႉ ၼႃႈဢမ်ႇၵီႈသေဢိတ်းယဝ်ႉ။ တေဝႃႈႁိုဝ်လႃႇ ပႃႈသွင်ၵေႃႉၼႆႉၵေႃႈ ပဵၼ်ပႃႈသူပ်းၼမ်လိူဝ်ပိူၼ်ႈၼႂ်းဝၢၼ်ႈႁဝ်းၼၼ်ႉၼႃႇ ၶႃႈၵေႃႈဢမ်ႇသူၼ်ၸႂ်ႁေ
“ပႃႈၸွင်ႇတေသိုဝ်ႉႁႃႉ!..”
“တူၺ်းမၼ်းလူး..ၶၢႆၽၵ်းၸိူင်ႉၼႆၽႂ်တေၶႂ်ႈသိုဝ်ႉလႃႇ”
“ပေႃးဢမ်ႇသိုဝ်ႉၵေႃႈၵႂႃႇလႄႈ!..”
ပႃႈၼၼ်ႉၶႃၵေႃႈ သွပ်ႉသႅပ်ႉၸၢင်ႉၵၼ်သေပူၼ်ႉၵႂႃႇယူႇ။ ၽွင်းၼၼ်ႉ မိူၼ်ဝႃႈ သႂ်လႅင်းဢၼ်ယူႇဢမ်ႇပေႃးၸမ်ႁဝ်းၼၼ်ႉၵေႃႈ လႆႈႁၼ်ၸွမ်းယူႇယဝ်ႉ။ ဢၢႆႈၸၢႆးႁဝ်းၼၼ်ႉတႄႉ ၼင်ႈယဵၼ်ယူႇႁဵတ်းၼၼ်ၵူၺ်း။ ၼၢႆးႁဝ်းၼၼ်ႉၵေႃႈ ၸင်ႇလၢတ်ႈတီႈၶႃႈၵႂႃႇ
“မႂ်းမႃးၶၢႆၽၵ်းတေႃႇပိူၼ်ႈၸိူင်ႉၼႆ ၽၵ်းၵဝ်တေဢမ်ႇၶၢတ်ႇယဝ်ႉ မႂ်းမိူဝ်းႁေလႃႈ လုၵ်ႈဢွၼ်ႇယူႇတီႈလႂ်ဢမ်ႇလႆႈလွင်ႈၵေႃႈ တိုၼ်းဢမ်ႇလႆႈလွင်ႈတေႉလူင်”
မိူဝ်ႈငိၼ်းၸိူင်ႉၼၼ်ႉၵေႃႈ ၽႂ်ႁိုဝ်တေၶၢမ်ႇလႆႈ ၶႃႈၵေႃႈဢွၵ်ႇၵၢတ်ႇမႃးပႅတ်ႈၵမ်းလဵဝ်ယဝ်ႉ။ ဢၢႆႈၸၢႆးႁဝ်းၼၼ်ႉၵေႃႈ ၼႅတ်ႈလမ်းပၼ်ငိုၼ်းၶႃႈသေ ႁႂ်ႈၶႃႈသိုဝ်ႉၵိၼ်ၶဝ်ႈယဝ်ႉၸင်ႇမိူဝ်းၼႆယူႇ။
ၶႃႈၼၼ်ႉၵေႃႈ သိုဝ်ႉထူဝ်ႇၽူးဢုၼ်ႇဢၼ်ၶႃႈလႆႈၸႂ်ၵိၼ်ၼႃႇၼၼ်ႉ ႁေႃႇမိူဝ်းၵိၼ်တီႈႁိူၼ်းယဝ်ႉ။ မိူဝ်ႈၸမ်တေထိုင်ႁိူၼ်းၼၼ်ႉသမ်ႉ ၸင်ႇၺႃးလူတ်ႉလူင်လမ်းၼိုင်ႈ ႁေႃႈလူင်ၵႂႃႇတၢင်းၼႃႈၶႃႈလွႆးလွႆးယဝ်ႉ ၶႃႈၵေႃႈၶီႇတင်းလူတ်ႉထိပ်ႇသေ ပၼ်ႇၵႂႃႇၸွမ်းလင်လွႆးလွႆးလႄႈ လိူၵ်ႈလိူၵ်ႈၵႃးၼၼ်ႉသမ်ႉ ၶုၼ်ႇၵိုတ်းၵႂႃႇတီႈၼႃႈႁိူၼ်းႁဝ်းၼၼ်ႉဢဝ်လီလီ ၶႃႈၵေႃႈၼႅတ်ႈဢဝ်ပလိၵ်ႈမၼ်းဢမ်ႇတၼ်းၶိုတ်းလႄႈ ၽႃႇၺႃးၵူၼ်ႈၵႃးၶဝ်ၵႂႃႇသေယဝ်ႉ ၶႃႈလႄႈတင်းလူတ်ႉထိပ်ႇၵေႃႈ လူမ်ႉၸွမ်းၵၼ်ၵႂႃႇတီႈၼၼ်ႈၵမ်းလဵဝ်ယူႇ။ ဢၼ်လီသေလၢႆလိူဝ်ပိူၼ်ႈၼၼ်ႉတႄႉ ထူဝ်ႇၽူးဢုၼ်ႇၼၼ်ႉယဝ်ႉ။ ၶႃႈသေလၢႆသမ်ႉပေႃးႁွင်ႉႁႆႈဢွၵ်ႇမႃးတီႈၼၼ်ႈၵမ်းလဵဝ်။
ယၢမ်းၼၼ်ႉၵူၼ်းဢၼ်ယူႇၼႂ်းလူတ်ႉၼၼ်ႉၵေႃႈ ဢွၵ်ႇမႃးတူၺ်းၶႃႈသေ
“ၼွင်ႉ! ပဵၼ်ၸိူင်ႉႁိုဝ်..ၸဵပ်းတီႈလႂ်..”
မႃးၸွႆႈယုၵ်ႉလူတ်ႉထိပ်ႇၶႃႈၶိုၼ်ႈယဝ်ႉ ႁွင်းဢဝ်တူဝ်ၶႃႈလုၵ်ႉၶိုၼ်ႈယူႇ ယၢမ်းၼၼ်ႉၵေႃႈ မိူၼ်ဝႃႈႁူဝ်ၶဝ်ႇၶႃႈၼၼ်ႉ လွၵ်ႈလႅင်ဢွၵ်ႇလိူတ်ႈဝႆႉယဝ်ႉ။ ၵူၺ်းသၢႆတႃၶႃႈၼၼ်ႉတႄႉ တူၺ်းတီႈၸွၵ်းထူဝ်ႇၽူး ဢၼ်သဵၼ်ဢွၵ်ႇသွင်းလူတ်ႉထိပ်ႇၶႃႈၼၼ်ႉသေ တႅၵ်ႇလႅဝ်ယူႇၼိူဝ်ၵၢင်တၢင်းၼၼ်ႉၵူၺ်း ဢမ်ႇလႆႈသူၼ်ၸႂ်ၶဝ်။
“ထူဝ်ႇၽူးၶႃႈ..လႅဝ်မူတ်းယဝ်ႉ..”
ယၢမ်းၼၼ်ႉ ၶူးပိူင်းၾႃႉၵေႃႈ ၽုၺ်ႇၽၵ်းတူႁိူၼ်းသေယဝ်ႉ လႆႈႁၼ်ၵူၼ်းၵေႃႉၼၼ်ႉလႄႈ
“ႁိူၺ်ႉ!..ၽိဝ်ၾႃႉ!..မႃးႁွတ်ႈၸဵမ်ၸဝ်ႉလူး”
“ပီႈပိူင်းၾႃႉ..”
တူၺ်းၼႃႈတႃလႄႈလွင်ႈႁဵတ်းသၢင်ႈ ဢၼ်ၶဝ်ႁွင်ႉၸိုဝ်ႈၵၼ်ၼၼ်ႉ လႅပ်ႈပဵၼ်ပီႈၼွင်ႉၵၼ်ယဝ်ႉ။
—————————
ၼူၼ်းမူဝ်ဢၼ်တင်ႈၸႂ်ဢၢၼ်ႇယူႇၼၼ်ႉၵေႃႈ မိူၼ်တေဢၢၼ်ႇသုတ်းပပ်ႉၵႂႃႇယဝ်ႉလႄႈ
“သႅင်ၶမ်း!..ပပ်ႉသူၼႆႉမၼ်းမၢင်တေႉယဝ်ႉ..ဢၼ်သိုပ်ႇမၼ်းမီးလႂ်လႃႇ”
“ၼွၼ်းလႆႈယဝ်ႉၼႃႈ တေထိုင်ၵၢင်ၼႂ်ယဝ်ႉ”
“ႁဝ်းၶႂ်ႈလူထႅင်ႈဢိူဝ်ႈ!…ႁၢင်ႈမီးထႅင်ႈပဵၼ်လၢႆပပ်ႉဢမ်ႇၸႂ်ႈႁႃႉ”
“သူႁူႉလွင်ႈႁဝ်းၼမ်ၼႃႇယဝ်ႉ.. ၸိူင်ႉႁိုဝ်ၵေႃႈမၼ်းပဵၼ်လွင်ႈဝၼ်းလင်ၵႂႃႇယဝ်ႉလူး”
“ႁူႉတီႈလႂ်..ႁဝ်းယင်းပႆႇႁူႉလူးၵွၼ်ႇ ၵူၼ်းၵေႃႉဢၼ်ယူႇၼႂ်းႁူဝ်ၸႂ်သူ ဢၼ်သူဢမ်ႇလိုမ်းလႆႈႁေပွၵ်ႈၼၼ်ႉ ပဵၼ်ၽႂ်တေႉတေႉလႃႇ၊ ဢၼ်ႁဝ်းဝူၼ်ႉလႆႈၵေႃႈ ၼႂ်းဢူၺ်းၵေႃႉပီႈဢၢႆႈသူၼၼ်ႉ မီးၸွမ်ၶိူဝ်းၵူၺ်း ဢၼ်တေပဵၼ်ၵႂႃႇလႆႈ”
သႅင်ၶမ်းယုမ်ႉဢိတ်ႉၼိုင်ႈသေယဝ်ႉ
“ဢမ်ႇၸၢင်ႈဝႃႈၵူၼ်းလဝ်းၸိူင်ႉၼင်ႇသႅင်ၶိူဝ်းၼၼ်ႉၵေႃႈပဵၼ်လႆႈ”
“ၶႂ်ႈဝႃႈၸိူင်ႉႁိုဝ်လႃႇ!”
“သၢႆႁိူဝ်ႈၼၼ်ႉတူၺ်းမိူၼ်ပဵၼ်ၵူၼ်းယဵၼ်ယဵၼ်ၵူၺ်း တၢင်းလဝ်းၶဝ်ၼၼ်ႉ ႁိူဝ်ႈပိူင်းထွင်ႇပၼ်ၼႂ်းႁူဝ်ၸႂ်ၽူႈယိင်း ႁႂ်ႈမဝ်းၸွမ်းလႆႈမိူၼ်ၵၼ်ၼၼ်ႉယဝ်ႉ”
“သူၼႆႉ!..သူပ်းၶႅင်တေႉယဝ်ႉ!..”
ၼူၼ်းမူဝ်ၼၼ်ႉၵေႃႈ မိူဝ်ႈသႅင်ၶမ်းဢမ်ႇလႆႈသူၼ်ၸႂ်မၼ်းယဝ်ႉၵေႃႈ ၸင်ႇတေၼွၼ်းၵႂႃႇယူႇယဝ်ႉ။
တွၼ်ႈႁႃႈသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈႁူၵ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
