တွၼ်ႈၼိုင်ႈ
ပီႊ 2013…
ဝၼ်းၶိုၼ်ႈႁူင်းႁဵၼ်းဝၼ်းဢွၼ်တၢင်းသုတ်း တွင်ႉၾႃႉၵေႃႈၸိုၼ်ႈသႂ်လီ ဝၢႆးၾူၼ်ႁိူတ်ႇ လူမ်းၵေႃႈၵတ်းၸိုၼ်ႈယဵၼ်ၸႂ် တူၺ်းမိူၼ်လုၵ်ႈႁဵၼ်းၶဝ် တေမူၼ်ႈသိူဝ်းတေႉတေႉ ၼၼ်ႉယဝ်ႉ။ လႆႈမႃးႁူပ်ႉဢူၺ်းၵေႃႉဢူၺ်းသေႈ ဢၼ်ဢမ်ႇလႆႈႁူပ်ႉၵၼ်တင်းႁိုင်သေ ၸႂ်ထိုင်ၵၼ်ၼႃႇၼႃႇၼၼ်ႉ မိူဝ်ႈလႆႈႁူပ်ႉၵေႃႈ ၸူမ်းဢုပ်ႇၸူမ်းလၢတ်ႈ ယုမ်ႉယုမ်ႉယၢႆႈယၢႆႈ ပဵၼ်ဝၼ်းဢၼ်လီလိူဝ်ပိူၼ်ႈသုတ်း ၼႂ်းပီႊဢၼ်လႆႈၶိုၼ်ႈႁူင်းႁဵၼ်းၵေႃႈဝႃႈလႆႈ ၼၼ်ႉယဝ်ႉ။
ၵူၺ်းၵႃႈ တီႈႁူင်းႁဵၼ်းၼႆႉသမ်ႉ မီးၵူၼ်းၸိူင်ႉၼင်ႇၶႃႈ ဢၼ်မီးၸိုဝ်ႈဝႃႈ သႅင်ၶမ်း ၼၼ်ႉလႄႈ ဝၼ်းလႂ်ဢၼ်လႆႈမႃးယဵပ်ႇယၢင်ႈတီႈႁူင်းႁဵၼ်းၼႆႉ ႁဵတ်းႁႂ်ႈၶႃႈငဝ် တႃႇသေႇယဝ်ႉ။ ႁၼ်ပိူၼ်ႈဢုပ်ႇၵၼ်ယုမ်ႉယုမ်ႉယၢႆႈယၢႆႈ ႁၼ်ပိူၼ်ႈယဝ်ႉယွၵ်ႇၵၼ် မီးတၢင်းသိူဝ်း ယိုင်ႈႁဵတ်းႁႂ်ႈၶႃႈ ၶႂ်ႈပၢႆႈဢွၵ်ႇႁၢင်ႇတီႈၼၼ်ႈတႄႉတႄႉ။ ၶႃႈဢမ်ႇၶႂ်ႈမႃးႁူင်းႁဵၼ်းသေဢိတ်း တႃႉၼွၼ်းၶူတ်းၽႃႈဢုၼ်ႇဢုၼ်ႇၵူၺ်းႁေလႃႈ ၼၼ်ႉပဵၼ် လွင်ႈဢၼ်ၶႃႈဝူၼ်ႉၵူၺ်း ဢမ်ႇလႆႈပဵၼ်ၸွမ်းၼင်ႇ လွင်ႈပဵၼ်တေႉ။
ယၢမ်းၵၢင်ၼႂ်ၸဝ်ႉမိူင်းပႆႇလႅင်း မိူဝ်ႈၶႃႈတိုၵ်ႉၼွၼ်းၾၼ်လီၾၼ်ဝၢၼ်ယူႇၼၼ်ႉ ၼႃႇရီႇပူၵ်းပေႃးႁွင်ႉလုၵ်ႉယဝ်ႉ။ ၶႃႈၵေႃႈဢမ်ႇႁူႉဝႃႈ ပဵၼ်သင်လႄႈတေလႆႈပူၵ်း ၵူႈၼႂ် သင်ပဵၼ်ၼႃႇရီႇတေႉတႄႉ တေၸၢင်ႈပိၵ်ႉလႆႈယူႇ ၵူၺ်းၵႃႈ ၼၼ်ႉသမ်ႉပဵၼ် သဵင်ၼၢႆးႁဝ်း ဢၼ်လၢတ်ႈသင်တိၵ်းတိၵ်းၵေႃႈဢမ်ႇႁူႉလႄႈ ႁဵတ်းႁႂ်ႈၶႃႈ သမ်ႉပေႃးတိုၼ်ႇယဝ်ႉ။ ဢၼ်တိုၼ်ႇမႃးၼၼ်ႉတႄႉ ဢမ်ႇပေႃးၵႃႈႁိုဝ် ဢၼ်လုၵ်ႉမႃးႁေ လႆႈငိၼ်းဝႃႈ ပေႃးဢမ်ႇၵႂႃႇႁူင်းႁဵၼ်း ၶႃႈတေဢမ်ႇလႆႈၵႃႈၶဝ်ႈမုၼ်းၼႆၼၼ်ႉယဝ်ႉ ႁဵတ်းႁႂ်ႈၶႃႈလႆႈမႃးႁူင်းႁဵၼ်းၸိူင်ႉၼႆ။
ၶႃႈဢမ်ႇလႆႈမႃးၶိုၼ်ႈႁူင်းႁဵၼ်းၼႆႉမီးၸမ်ပီႊယဝ်ႉ ၶႃႈဢမ်ႇလႆႈတွပ်ႇလိၵ်ႈလႄႈ ၶႃႈၵေႃႈဢမ်ႇၽၢၼ်ႇပူၼ်ႉၸၼ်ႉ ပီႊၼႆႉ ၶႃႈၵေႃႈယင်းတိုၵ်ႉယူႇၸၼ်ႉပႅတ်ႇ ပဵၼ်ပီႊထိသွင် ၼႂ်းႁွင်ႈဢၼ်ၶႃႈမႃးႁဵၼ်းယူႇၼႆႉ သမ်ႉဝႃႈ တေပဵၼ်ၸၼ်ႉၵဝ်ႇသေတႃႉ လုၵ်ႈႁဵၼ်းဢၼ်မီးယူႇၼႂ်းႁွင်ႈႁဵၼ်းၼႆႉတႄႉ ပဵၼ်ၵူၼ်းမႂ်ႇတွၼ်ႈတႃႇၶႃႈမူတ်းယဝ်ႉ။
ၵူၼ်းၼႂ်းႁွင်ႈႁဵၼ်း ဢွၼ်ၵၼ်ၼင်ႈဢုပ်ႇလၢတ်ႈၸူးၵၼ် လၢတ်ႈထိုင် ၶိူဝ်းပိၵ်ႉႁူင်းႁဵၼ်း လွင်ႈယူႇသၢင်ႈၵိၼ်သဝ်း ပဵၼ်ၸိူင်ႉႁိုဝ် မီးၸိူင်ႉႁိုဝ် မိူၼ်တေလႅပ်ႈ မီးတၢင်းသိူဝ်းၵၼ်တေႉယူႇ။ သမ်ႉဝႃႈၼႂ်းႁွင်ႈၼၼ်ႉ တေမီးၵူၼ်းၼင်ႈပေႃးတဵမ်လူင်ဝႆႉၵေႃႈယဝ်ႉ တွၼ်ႈတႃႇၶႃႈ ဢမ်ႇပိူင်ႈသင်ၵၼ်တင်း ယူႇၵေႃႉလဵဝ်ၵူၺ်း ၽႂ်ၵေႃႈဢမ်ႇႁူႉၸၵ်းၶႃႈ၊ ၶႃႈၵေႃႈဢမ်ႇႁူႉၸၵ်းၽႂ် ငဝ်တေႉယဝ်ႉ ဢမ်ႇၶႂ်ႈယူႇသေဢိတ်း ၶႂ်ႈလၵ်ႉမိူဝ်းႁိူၼ်းသေယဝ်ႉဝႃႈ၊ ဝၼ်းဢွၼ်တၢင်းသုတ်း ယင်းပႆႇလႆႈတႄႇႁဵၼ်း ၶႃႈသမ်ႉပေႃးၶၢၼ်ႉၼႃႇယဝ်ႉတေႁဵတ်းႁိုဝ်လႃႇၼႆႉ။
ၸၼ်ႉ 8 ႁွင်ႈ B မိူဝ်ႈဢၼ်လုၵ်ႈႁဵၼ်း ဢွၼ်ၵၼ်ၼင်ႈတဵမ်ၽိူၼ်ၵၼ်ၵူႈၵေႃႉသေ ၵမ်ႈၽွင်ႈၵေႃႈ ယင်းတိုၵ်ႉယဝ်ႉယွၵ်ႇၵၼ်ယူႇၼၼ်ႉ ၸင်ႇမီးၶူးၵေႃႉၼိုင်ႈ ၶဝ်ႈႁွင်ႈမႃးလႄႈ လုၵ်ႈႁဵၼ်းၶဝ်ၵေႃႈ ဢွၼ်ၵၼ်ယဵၼ်ၵႂႃႇယဝ်ႉ ၶူးၵေႃႈလႆႈတူင်ႉတၵ်ႉၸူးသေဝႃႈ−
“မႂ်ႇသုင်လုၵ်ႈႁဵၼ်းၶဝ်ၵူႈၵေႃႉ..ၶိုၼ်ႈႁူင်းႁဵၼ်းဝၼ်းဢွၼ်တၢင်းသုတ်း ပဵၼ်ၸိူင်ႉႁိုဝ်ၵၼ်ၽွင်ႈ”
လုၵ်ႈႁဵၼ်းၶဝ်ၵေႃႈ ငႅၼ်ႈၵႂႃႇငႅၼ်ႈမႃးၸူးၵၼ်သေ ဢမ်ႇတၵ်းသဵင်သင်ယဝ်ႉ ယၢမ်းၼၼ်ႉ ၸင်ႇမီးယိင်းၵေႃႉၼိုင်ႈ ဢၼ်ၼင်ႈယူႇတၢင်းၼႃႈသုတ်းၼၼ်ႉ လၢတ်ႈၵႂႃႇ “လီၶႃႈဢေႃႈ”
“လီယဝ်ႉ.. ပေႃးၼၼ် မိူဝ်ႈၼႆႉၵွပ်ႈပဵၼ်ဝၼ်းဢွၼ်တၢင်းသုတ်းၵူၺ်းလႄႈ ၵမ်ႈၽွင်ႈၵေႃႈ ယင်းတေပႆႇႁူႉၸၵ်းၵၼ်ၵႃႈႁိုဝ်”
“ႁဝ်းႁူႉၸၵ်းၵၼ်လီယူႇယဝ်ႉ..ဢမ်ႇလူဝ်ႇသုမ်းၶၢဝ်းယၢမ်းသေလၢတ်ႈၵေႃႈလႆႈၶႃႈ” လုၵ်ႈႁဵၼ်းထႅင်ႈၵေႃႉၼိုင်ႈ ဢၼ်ယူႇၽၢႆႇၼႃႈၼၼ်ႉ ၵေႃႉလၢတ်ႈၸူး။
“ၶူးႁူႉယူႇ သူၶိုၼ်ႈႁူင်းႁဵၼ်းမႃးၸွမ်းၵၼ်ပဵၼ်လၢႆပီႊ တေႁူႉၸၵ်းၵၼ်ယူႇယဝ်ႉ ၵူၺ်းၵႃႈ မၢင်ၵေႃႉ.. ဢၼ်မႃးမႂ်ႇ ဢၼ်ဢမ်ႇလႆႈယူႇႁွင်ႈလဵဝ်ၵၼ်မႃး တေဢမ်ႇပႆႇ ႁူႉၸၵ်းသူၵႃႈႁိုဝ် ပေႃးၼၼ် ၶူးတေၼႄႉၼမ်းတူဝ်ၵႂႃႇဢွၼ်တၢင်းၵႂႃႈ ၶူးၸိုဝ်ႈ ပိူင်းၾႃႉ တေမႃးပဵၼ်ၶူးၵုမ်းၸၼ်ႉသူ..ၼႂ်းပီႊၼႆႉ”
ၶူးၼၼ်ႉၵေႃႈ ႁႅၼ်မုင်ႈတူၺ်းလုၵ်ႈႁဵၼ်းၸိူဝ်းဢၼ်ယူႇတၢင်းလင်ၼၼ်ႉသေ
“တႄႇလၢတ်ႈတၢင်းၸွၵ်ႉၼၼ်ႉမႃးလႄႈပေႃးၼႆ..”
ၵူၼ်းဢၼ်ယူႇတၢင်းလင်ၼၼ်ႉၵေႃႈ သမ်ႉပႃးၶႃႈယူႇၵေႃႉၼိုင်ႈ ၶႃႈတႄႉဢမ်ႇလႆႈတႄႇလၢတ်ႈဢွၼ်တၢင်းၼင်ႇၵဝ်ႇ ၶႃႈဢမ်ႇလႆႈယူႇၼႂ်းၸွၵ်ႉ ၵူၺ်းၵႃႈ ယူႇတၢင်းလင်သုတ်း သမ်ႉပဵၼ်တႅဝ်းၼႂ်းၵၢင်ၼၼ်ႉယဝ်ႉ ၼႂ်းႁွင်ႈႁဝ်းၼၼ်ႉ တေၼင်ႈပဵၼ်ၽိူၼ်သေ မီးဝႆႉသီႇထႅဝ်ယူႇ။ ၵူၼ်းၵေႃႉတၢင်းလင်ၼၼ်ႉ ၸင်ႇလႆႈၼႄႉၼမ်းၵႂႃႇ
“ၶႃႈၸိုဝ်ႈ ၸၢႆးယီႈ” ၵေႃႉၼင်ႈတၢမ်းၵၼ်ၼၼ်ႉလၢတ်ႈထႅင်ႈ “ၶႃႈၸိုဝ်ႈ ၸၢႆးဝီႉ”
ၵမ်းၼႆႉသမ်ႉပဵၼ်ၶႃႈၼၼ်ႉယဝ်ႉ ၶႃႈၵေႃႈလုၵ်ႉၸုၵ်းသေ မိူဝ်ႈၶႃႈလုၵ်ႉၸုၵ်းယူႇၼၼ်ႉ ၼင်ႇႁၢင်ႈလႆႈႁၼ်သၢႆတႃၵူၼ်းၼႂ်းႁွင်ႈ ယၵ်ႉၸူးၶႃႈမူတ်းယူႇ၊ ၶႃႈၵေႃႈ တူၺ်းၼႃႈၶူးသေ လၢတ်ႈၵႂႃႇယဝ်ႉ။
“ၶႃႈၸိုဝ်ႈ သႅင်ၶမ်း ႁွင်ႉ ဢေးယိင်းၵေႃႈလႆႈယူႇၵူၺ်း” ၶႃႈၵေႃႈၼင်ႈသေ ထႅင်ႈၵေႃႉၼိုင်ႈဢၼ်တၢမ်းၶႃႈ ၼင်ႈၼႂ်းၸွၵ်ႉၼၼ်ႉၵေႃႈ သိုပ်ႇလၢတ်ႈၵႂႃႇထႅင်ႈ။
“ၶႃႈၸိုဝ်ႈၸၢႆးဢွင်ႇ”
“ၶႃႈၸိုဝ်ႈ ၸၢႆးသႅင်ၶဵဝ်” ပဵၼ်ၵေႃႉဢၼ်ၼင်ႈပႃႈၼိူဝ် ၸၢႆးဢွင်ႇၼၼ်ႉလၢတ်ႈ။
လႄႈ ၵေႃႉဢၼ်ၼင်ႈတၢင်းၼႃႈၶႃႈၼၼ်ႉသမ်ႉပဵၼ် ၸိုၼ်ႈသႂ်ၼႆယူႇ ၼႂ်းႁွင်ႈႁဝ်းၼၼ်ႉ မီးလုၵ်ႈႁဵၼ်းယူႇတင်းမူတ်း 28 ၵေႃႉ။ ၶႃႈဢမ်ႇလႆႈတွင်းၸိုဝ်ႈၶဝ်မူတ်း ၵူၺ်းတွင်းဢၼ်ၼင်ႈႁိမ်းၶႃႈၼၼ်ႉၵူၺ်း။
ဝၢႆးသေၼႄႉၼမ်းတူဝ်ၵၼ်ယဝ်ႉၼၼ်ႉ ၶူးၵေႃႈႁႂ်ႈလိူၵ်ႈႁူဝ်ၼႃႈႁွင်ႈၼႆယူႇ မိူဝ်ႈၼၼ်ႉ ၶႃႈတႄႉပဵၼ်ၶၢဝ်းယၢမ်းလီယဝ်ႉ။ ၼွၼ်းႁေထွမ်ႇၵူၺ်း ပေႃးတိုၼ်ႇမႃးၵေႃႈ ႁူႉယဝ်ႉဝႃႈၽႂ်တေပဵၼ်၊ ၵေႃႉဢၼ် ၶိုၼ်ႈမႃးပဵၼ် ႁူဝ်ၼႃႈႁွင်ႈႁဝ်းၼၼ်ႉတႄႉ ပဵၼ်ၼူၼ်းမူဝ်ယဝ်ႉ တူၺ်းၶဝ်ၼၼ်ႉမိူၼ်တေလိူၵ်ႈဢဝ် ၵူၼ်းဢၼ်လႆႈထီႉၼိုင်ႈသေ ၶိုၼ်ႈၸၼ်ႉၼၼ်ႉ မႃးႁဵတ်းၼႆယူႇ ၵႅမ်မၼ်းသမ်ႉပဵၼ်သႅင်ဢွင်ႇၼႆဝႃႇ လၢတ်ႈလႆႈဝႃႈ ဢဝ်ၵူၼ်းၶႅၼ်ႇမၼ်းမႃးႁဵတ်းၵေႃႈဝႃႈလႆႈယဝ်ႉ။
ယၢမ်းဝၢႆးဝၼ်း မီးၵၢၼ်လိူၵ်ႈႁူဝ်ၼႃႈလုၵ်ႈႁဵၼ်းၼႆလႄႈ မိူၼ်တေဢဝ်လုၵ်ႈႁဵၼ်းဢၼ်ၵတ်ႉၶႅၼ်ႇလႅတ်းသႅဝ်း ဢၼ်ၶူးၶဝ်ႁၼ်ထိုင်ဝႃႈ တေပဵၼ်ၽူႈတၢင်တူဝ်ႁူင်းႁဵၼ်းလႆႈလႄႈ လိူၵ်ႈဢဝ်မႃးလၢႆလၢႆၵေႃႉသေ ႁႂ်ႈလုၵ်ႈႁဵၼ်းၶဝ်ပဵၼ်ၵေႃႉလိူၵ်ႈဢဝ် ၼႆယူႇ။ လုၵ်ႈႁဵၼ်းယိင်းၵမ်ႈၼမ်ၼၼ်ႉ မိူၼ်တေလိူၵ်ႈဢဝ်သႅင်ၶိူဝ်းလၢႆလၢႆယဝ်ႉ ၶဝ်ၼၼ်ႉ ပဵၼ်ၵူၼ်းၵတ်ႉၶႅၼ်ႇလႄႈ လႆႈထီႉၼိုင်ႈၵူႈပီႊယဝ်ႉ၊ လိူဝ်ၼၼ်ႉသမ်ႉ ပဵၼ်ၵူၼ်းဢၼ်မီးႁၢင်ႈၽၢင်ၼႃႈ တႃႁၢင်ႈလဝ်း မေႃဢုပ်ႇမေႃလၢတ်ႈ မေႃၸွႆႈမေႃထႅမ်ပိူၼ်ႈ ပဵၼ်တီႈဢၼ်ၽႂ်ႁၼ် ၵေႃႈ ၶွႆဢၢမ်း ၶႂ်ႈလႆႈၶႂ်ႈႁၵ်ႉ ၼၼ်ႉယဝ်ႉ။ ၼႂ်းႁူင်းႁဵၼ်းၼႆႉသမ်ႉ မိူၼ်ဝႃႈ လုၵ်ႈႁဵၼ်းယိင်းၼမ်လိူဝ်သေၽူႈၸၢႆး ယုမ်ႇဝႃႈ ၶဝ်ၼၼ်ႉတေလႆႈပဵၼ်ယူႇဢမ်ႇႁၢင်ႉ။
ထိုင်ၶၢဝ်းလူင်းႁူင်းႁဵၼ်းယဝ်ႉ လုၵ်ႈႁဵၼ်းၶဝ်ၵေႃႈ ဢွၼ်ၵၼ်ၶဝ်ႈထႅဝ်တၵ်ႉယမ် တုင်းၸွမ်ပိဝ်သေယဝ်ႉ ၽွင်းၼၼ်ႉၵေႃႈ မီးၽူႈၵွၼ်းႁူင်းႁဵၼ်း ၶူးၸၢႆးလူင် မႃးလၢတ်ႈသူင်ႇသင်ႇတီႈလုၵ်ႈႁဵၼ်းၵႂႃႇသေ ပိုၼ်ၽၢဝ်ႇဢဝ်သႅင်ၶိူဝ်းၼၼ်ႉ ပဵၼ်ႁူဝ်ၼႃႈလုၵ်ႈႁဵၼ်းၵႂႃႇ တေႃႇၼႃႈလုၵ်ႈႁဵၼ်းၶဝ်ၵူႈၵေႃႉ ဢၼ်မႃးၶဝ်ႈထႅဝ် ၼၼ်ႉယူႇ။
ဢမ်ႇႁူႉပေႉလၢတ်ႈသင် ႁိုင်ဝႃႈႁိုင် ၵွပ်ႈဝႃႈၶႃႈ ယူႇထႅဝ်တၢင်းလင်ပိူၼ်ႈသုတ်းလႄႈ တၢင်းၼွၵ်ႈသုတ်းၼၼ်ႉယဝ်ႉ ၶႃႈဢမ်ႇလႆႈငိၼ်းသင် ငိၼ်းၵေႃႈ ၶႃႈဢမ်ႇထွမ်ႇၼင်ႇၵဝ်ႇ ပေႃးဝႃႈလူင်းႁူင်းႁဵၼ်းယဝ်ႉၼႆၵေႃႈ လူဝ်ႇလႅၼ်ႈၵႂႃႇ ဢဝ်လူတ်ႉထိပ်ႇ ၵူၺ်းယဝ်ႉၼႃႇ။ ဝၼ်းၶိုၼ်ႈႁူင်းႁဵၼ်း ဢၼ်ၶႃႈမီးတၢင်းသိူဝ်းလိူဝ်ပိူၼ်ႈၼၼ်ႉတႄႉ ပဵၼ်ၶၢဝ်းယၢမ်းလူင်းႁူင်းႁဵၼ်း ၼၼ်ႉယဝ်ႉ။
မိူဝ်ႈဢၼ်မိူဝ်းႁွတ်ႈႁိူၼ်းယဝ်ႉၼၼ်ႉ ၼၢႆးႁဝ်းႁၼ်ၶႃႈမိူဝ်းယဝ်ႉ ဢမ်ႇလႆႈႁၼ်ဢၢႆႈၸၢႆး မႃးၸွမ်းၼႆၵေႃႈ ၼႅတ်ႈထၢမ်ၵမ်းလဵဝ်။
“မႂ်းၵႂႃႇႁူင်းႁဵၼ်းယူႇႁႃႉ ၵႂႃႇလၵ်ႉလႄႇႁေ မႃးၵူၺ်းယူဝ်ႉ ဢၢႆႈၸၢႆးယင်းပႆႇမႃး”
“ၼၢႆး.. မိူဝ်ႈၼႆႉ ယိင်းၵႂႃႇယူႇႁူင်းႁဵၼ်းတေႃႇပေႃးလူင်းႁူင်းႁဵၼ်းၼၼ်ႉယဝ်ႉ.. လႆႈဝႃႈပဵၼ်လွင်ႈလီၶႃႈဢေႃႈၼႆႉ ဢမ်ႇလႆႈလၵ်ႉမႃးၵၢင်ဝၼ်း”
“ပႂ်ႉထၢမ်တူၺ်းၶူးသူၵွၼ်ႇၵႂႃႈ.. လုၵ်ႈဢွၼ်ႇလူဝ်ႇႁဵၼ်းလိၵ်ႈႁဵၼ်းလၢႆး ၼႆႉသမ်ႉ ၶၢဝ်းႁဵၼ်းၵေႃႈဢမ်ႇႁဵၼ်း ၶၢဝ်းလိုဝ်ႈၵေႃႈသမ်ႉလိုဝ်ႈၸွမ်းပိူၼ်ႈယူႇ…”
“ၼၢႆးႁဝ်းႁဵတ်းၽၵ်းသင်ဝႆႉလႃႇ ယိင်းတွင်ႉမႆႈၶဝ်ႈၼႃႇယဝ်ႉ”
ၶႃႈၵေႃႈၼႅတ်ႈၵႂႃႇၽုၺ်ႇသုမ်ႇၽၵ်းၼၼ်ႉသေ ႁၼ်ၼၢႆးႁဵတ်းဝႆႉ ၼမ်ႉၽိတ်ႉၽူး သႂ်ႇၶႆႇၵႆႇ သႂ်ႇလေႃးထူဝ်ႇလိၼ် ဢၼ်မီးတႅင် ၽၵ်းမီႇၽၵ်းၵီး ၽၵ်းၵၢတ်ႇတူမ်ႈ ပဵၼ်ဢၼ်ၵပ်းမၼ်းၼၼ်ႉသေ ႁၼ်ယဝ်ႉႁိုဝ်ယဵၼ်ႉလႆႈ ၼႅတ်ႈၵႂႃႇၵွၼ်ႉၶဝ်ႈ မႃးၵိၼ်ၵမ်းလဵဝ်ၵူၺ်းလေႃႇ ထူင်ၵေႃႈဢမ်ႇတၼ်းပူတ်းၵွၼ်ႇယဝ်ႉ။
ပေႃးဝႃႈၵိၼ်ၶဝ်ႈယဝ်ႉ တွင်ႉၵေႃႈၵႂ်ႈဢိမ်ႇလီဢိမ်ႇငၢမ်းၼႃႇသေ တေႃႈၼင်ႇတေလုၵ်ႉၵႂႃႇႁႃလၢင်ႉဝၢၼ်ႇၵူၺ်းၵေႃႈ ယင်းတိုၵ်ႉၶၢၼ်ႉယူႇ။ ၽွင်းတိုၵ်ႉၼင်ႈလိုဝ်ႈယူႇၼၼ်ႉ ဢၢႆႈၸၢႆးႁွတ်ႈႁိူၼ်းမႃးသေ တင်းဢူၺ်းၵေႃႉမၼ်းၼၼ်ႉၵေႃႈ လႆႈသင်ႇလၢတ်ႈၵၼ်ၵႂႃႇ
“ႁၢင်ႈႁႅၼ်းတူဝ်ယဝ်ႉ ၵႂႃႇႁူပ်ႉၵၼ်တီႈပၢင်ႇမၢၵ်ႇၼင်”
ၶႃႈဢၼ်ငိၼ်းၸိူင်ႉၼၼ်ၵေႃႈ လုၵ်ႉၼႂ်းသွင်ႇၾႆးၼၼ်ႉသေႁွင်ႉဢွၵ်ႇမႃး
“ၶႃႈၵေႃႈတေၵႂႃႇ..”
“တိုၵ်ႉၵိၼ်ၶဝ်ႈယူႇဢမ်ႇၸႂ်ႈႁႃႉ.. ပိူၼ်ႈဢမ်ႇလီဢွၵ်ႇၵႂႃႇလႅၼ်ႈလေႃႇၼႃႈ” ၼၢႆးႁဝ်းၵေႃႉလၢတ်ႈ။
ဢၢႆႈၸၢႆးၼၼ်ႉ ၶဝ်မီးၸိုဝ်ႈဝႃႈၼုမ်ႇႁိူင်း ပဵၼ်ပီႈဢၢႆႈၶႃႈ ၸဵမ်မိူဝ်ႈၶႃႈႁူႉၵႂၢမ်းမႃး ငိၼ်းဢူႈမႄႈလႄႈတင်းၼၢႆး ႁွင်ႉမၼ်းဝႃႈ ဢၢႆႈၸၢႆးၼႆလႄႈ ၶႃႈၵေႃႈႁွင်ႉၸွမ်းဝႃႈဢၢႆႈၸၢႆးၼႆသေ ထိုင်တီႈႁွင်ႉၸပ်းသူပ်းမႃး တေႃႇထိုင်မိူဝ်ႈလဵဝ်ၼႆႉယဝ်ႉ။
ၽွင်းဢၼ်ဢၢႆႈၸၢႆးႁဝ်း ႁၢင်ႈႁႅၼ်းတူဝ် တူဝ်ႈတၼ်းယဝ်ႉၼႆၵေႃႈ ၶႃႈၼၼ်ႉ ၼင်ႇႁၢင်ႈတွင်ႉယွမ်းမႃးယဝ်ႉမိူၼ်ၵၼ် ၼႅတ်ႈသႂ်ႇတင်းသွၵ်းတိၼ်သေ လႅၼ်ႈဢွၵ်ႇၵႂႃႇၸွမ်းမၼ်းယူႇ။ ဝၢႆးသေဢွၵ်ႇဝၢင်းႁိူၼ်းၵႂႃႇၵူၺ်း သဵင်ၼၢႆးႁဝ်း ဢၼ်ယၢမ်ႈငိၼ်းယူႇတႃႇသေႇၼၼ်ႉ
“ဢေးယိင်း!! မႂ်းဢမ်ႇလၢင်ႉဝၢၼ်ႇၶဝ်ႈမႂ်းသေၸင်ႇၵႂႃႇလႃႇ!”
“ၵမ်ႉၶႃႈတေမႃးလၢင်ႉၵူၺ်း!!”
ဢၢႆးၸၢႆးၼၼ်ႉၵေႃႈ “ပဵၼ်သင်လႄႈၵိၼ်ယဝ်ႉဢမ်ႇလၢင်ႉၸွမ်းလႃႇ ဢမ်ႇဢၢႆပိူၼ်ႈ ၽွင်ႈႁႃႉ ၵူၼ်းပေႃးၵေႃႉယႂ်ႇပဵၼ်သၢဝ်ယဝ်ႉ ၵွမ်ႉလၢင်ႉဝၢၼ်ႇၶဝ်ႈၵူၺ်း တေႁႂ်ႈပိူၼ်ႈပေႃးလႆႈႁွင်ႉသေႃႇ ပူၼ်ႉႁိူၼ်းပူၼ်ႉယေးၸိူင်ႉၼႆၵႂႃႈ”
“လၢတ်ႈတီႈၼၢႆးႁဝ်းပုၼ်ႉလေႃႇ ၶႃႈတမ်ႉဢမ်ႇလႆႈႁွင်ႉလူး..ၼၢႆးႁဝ်းႁွင်ႉၵူၺ်းလူင်”
တီႈပၢင်ႇမၢၵ်ႇၼင် ဢၼ်ဢမ်ႇပေႃးၵႂၢင်ႈယႂ်ႇ ၼႂ်းပၢင်ႇၼၼ်ႉၵေႃႈ မီးၵူၼ်းယူႇမွၵ်ႈ သီႇၵေႃႉၼႆႉ။ ယၢမ်းၼၼ်ႉ ၶဝ်ၵေႃႈ ပူၵ်းမိုဝ်းယုၵ်ႉၸူးႁႃးသေ
“မႃးၵၼ်ယဝ်ႉႁႃႉ!..” ၼၼ်ႉတႄႉ ပဵၼ်ၸွမ်ၶိူဝ်းလၢတ်ႈယဝ်ႉ။
“ဢေးယိင်းၵေႃႈမႃးၸွမ်းႁႃႉ!..” ၼႆႉတႄႉပဵၼ်သႅင်ၶိူဝ်းလၢတ်ႈယူႇ။
“မႅၼ်ႈဢဝ်ၵူၺ်းယဝ်ႉ မိူဝ်ႈၼႆႉၸၢႆးသိူဝ်ဢမ်ႇမႃး” လႅင်းမိူင်းလၢတ်ႈ။
“သၢႆႁိူဝ်ႈလူးပႆႇမႃးႁႃႉ” ဢၢႆႈၸၢႆးထၢမ်ၶိုၼ်း။
“ၵမ်ႉၵေႃႈတေမႃးယဝ်ႉ..”သႅင်ၶိူဝ်းလၢတ်ႈ။
ၼႂ်းပၢင်ႇမၢၵ်ႇၼင်ဢၼ်ၶႃႈမႃးယူႇၼႆႉ ၵူၼ်းၸိူဝ်းဢၼ်မႃးလဵၼ်ႈမၢၵ်ႇၼင်ၸွမ်းၵၼ်ၼႆႉ ၸုမ်းမူႇၽူႈယိင်းၶဝ်တေႁွင်ႉဝႃႈ ၵူၼ်းလဝ်းၼႂ်းႁူင်းႁဵၼ်းႁဝ်း ၼႆယဝ်ႉ။ ၶႃႈလႆႈႁူႉၸၵ်းၶဝ် ယွၼ်ႉၶဝ်ပဵၼ်ဢူၺ်းၵေႃႉ တင်းဢၢႆႈၸၢႆးႁဝ်းလႄႈ ႁၼ်ၵၼ်ယူႇတႃႇသေႇ ႁူႉၸၵ်းၵၼ်မႃးတင်းႁိုင် ၵူၼ်းၸိူဝ်းၼႆႉၵေႃႈ ဢမ်ႇလႆႈလဝ်းသင် ၼႂ်းသၢႆတႃၶႃႈၵႂႃႇယဝ်ႉ ၶဝ်ၵေႃႈ မိူၼ်ပဵၼ်ပီႈဢၢႆႈၶႃႈ၊ ၶႃႈၵေႃႈ တေမိူၼ်ပဵၼ်ၼွင်ႉသၢဝ်ၶဝ်မိူၼ်ၵၼ်ယဝ်ႉ သင်ဢမ်ႇသင်လၢတ်ႈလႆႈဝႃႈ ၶဝ်မိူၼ်ၼၢႆးႁဝ်းၵေႃႈယင်းလႆႈလူးၵွၼ်ႇ ၵႆႉပွင်ႉၶႃႈ၊ ၵႆႉလႃႇၶႃႈၼႃႇ၊ ႁဵတ်းသင်ဢိတ်ႉၵူၺ်းၵေႃႈ ပေႃးၵူဝ်ဢမ်ႇလႆႈဝႃႈႁင်းၶႃႈယဝ်ႉ၊ ပေႃးႁူႉဝႃႈၶႃႈၽိတ်းၼႆတႄႉ ႁူမ်ႈၵၼ်သေလႃႇယဝ်ႉဝႃႈ ႁၼ်ၸိူင်ႉၼႆယူႇတႃႇသေႇ တႃႉၶႂ်ႈႁႂ်ႈၽူႈယိင်းၸိူဝ်းၼၼ်ႉ မႃးႁၼ်ၵူၺ်းယဝ်ႉဝႃႈ။
ပေႃးဢမ်ႇႁဵတ်းသင်ၽိတ်းတႄႉၵေႃႈ လီယူႇၵူၺ်းၼင်ႇၵဝ်ႇ ၸုမ်းၶဝ်ၼႆႉဢမ်ႇၵွမ်ႉၵႃးလဝ်းၵူၺ်း ပဵၼ်ၵူၼ်းၵတ်ႉၶႅၼ်ႇၵၼ်ၵူႈၵေႃႉယဝ်ႉ။ မီးသင်ၵေႃႈ မေႃၸွႆႈထႅမ်ၵၼ် ဢွၼ်ၵၼ်ႁဵတ်းၵၢၼ်လီ ၸွႆႈထႅမ်ပိူၼ်ႈ ဢၼ်လႂ်ဢမ်ႇလီၵေႃႈ ငိူင်ႉဝႄႈ ၸင်ႇလႆႈပဵၼ်တူဝ်ယၢင်ႇလီ တွၼ်ႈတႃႇလုၵ်ႈႁဵၼ်းၶဝ် လႄႈ ၶူးၶဝ်၊ မေႃသွၼ်ၶဝ်ၵေႃႈ ဢွၼ်ၵၼ်ႁၵ်ႉႁူမ်ၸူမ်းပႅင်း ၸုမ်းၶဝ်ယူႇတႃႇသေႇ။ ၵူၺ်းၵႃႈ ၶႃႈဢၼ်ယူႇၸွမ်းၶဝ်ၼၼ်ႉတႄႉ ပဵၼ်ဢၼ်ပႅၵ်ႇပိူင်ႈၵၼ်ဝႆႉယူႇ ယွၼ်ႉပိူဝ်ႈ ၶႃႈၵေႃႈတိုၵ်ႉႁႃမႃးမိုတ်ႈၶဝ်လႆႈ ၸမ်ၸမ်ပီႊၼႆႉၵူၺ်း၊ ၶႃႈၸင်ႇႁႃ မေႃလဵၼ်ႈမၢၵ်ႇၼင်မႃးၵေႃႈ မိူဝ်ႈၽွင်းလႆႈမႃးႁူႉၸၵ်းၶဝ် ၼႆႉယဝ်ႉ။
ၽွင်းမိူဝ်ႈလႅၼ်ႈလမ်း မၢၵ်ႇၼင်ၵၼ်ယူႇၼၼ်ႉ “ဢေးယိင်း! ပီႊၼႆႉ ၼႂ်းႁွင်ႈသူၼၼ်ႉ မီးသၢဝ်ၼမ်ၼႃႇဢမ်ႇၸႂ်ႈႁႃႉ” ၸွမ်ၶိူဝ်းထၢမ်။
“ႁူႉယူႇယဝ်ႉ ယင်းတိုၵ်ႉမႃးထၢမ်ယူႇ ႁူႉၸၵ်းၵူႈၵေႃႉယူႇယဝ်ႉဢမ်ႇၸႂ်ႈႁႃႉ ပေႃးဝႃႈပဵၼ်သၢဝ်ၼႆ ဢၼ်လွင်ႈယႂ်ႇၼႆႉၵူၼ်းႁၢင်ႈလီလီၼၼ်ႉ”
“ႁၢင်ႈႁူႉၼႃႇ..”
“သီၼႃႈပီႈၼၼ်ႉ လၢတ်ႈဢွၵ်ႇမႃးမူတ်းယဝ်ႉ”
“ႁႃးႁႃး..”
မိူဝ်ႈဢၼ်တိုၵ်ႉလိုဝ်ႈႁိူဝ်ႉလိုဝ်ႈၸႂ်ၵၼ်ယူႇၼၼ်ႉ “ပီႊၼႆႉတႄႉတေဢမ်ႇၶၢတ်ႇႁူင်းႁဵၼ်းယဝ်ႉၼင်ႇၵဝ်ႇယူဝ်ႉ” သႅင်ၶိူဝ်းထၢမ်။
“ၶႃႈဢမ်ႇၵႂႃႇၵူၺ်း ဢမ်ႇႁဵတ်းႁႂ်ႈႁူဝ်ၼႃႈလုၵ်ႈႁဵၼ်းႁဝ်းလိူတ်ႇမႆႈၼင်ႇၵဝ်ႇသႄႈ”
“ဢမ်ႇၵႂႃႇၵေႃႈဢမ်ႇလႆႈၵႃႈၶဝ်ႈမုၼ်းၵူၺ်းၼႃႇ” ဢၢႆႈၸၢႆးႁဝ်းၵေႃႉလၢတ်ႈ။
ၶဝ်ၵေႃႈဢွၼ်ၵၼ်တူၺ်းၼႃႈၶႃႈသေၶူဝ်ယဝ်ႉ။ “ၵိုင်ႇလီႁဵတ်းၼၼ်ယူႇၵူၺ်း ” ဢွၼ်ၵၼ်လၢတ်ႈသႂ်ႇၶႃႈ။
“ပီႊၼႆႉ ပေႃးလႆႈၶိုၼ်ႈၸၼ်ႉ ပီႊၼႃႈမႃး..တေပၼ်ၵႃႈၶဝ်ႈမုၼ်း တင်းပီႊၼၼ်ႉယဝ်ႉ ၸွင်ႇတေႁဵတ်းလႆႈႁိုဝ်” ၸွမ်ၶိူဝ်းလၢတ်ႈ။
“ၶိုၼ်ႈၸၼ်ႉၼၼ်ႉယင်းဢေႇၵွၼ်ႇ ပေႃးလႆႈထီႉၼိုင်ႈၼႆ ၶႂ်ႈလႆႈသင်ၵေႃႈ တေသိုဝ်ႉပၼ်” သႅင်ၶိူဝ်းလၢတ်ႈ။
“ႁႃးၵေႃႈဢဝ်ၸွမ်း ပေႃးလႆႈထီႉၼိုင်ႈ” သၢႆႁိူဝ်ႈလႄႈလႅင်းမိူင်းလၢတ်ႈၵမ်ႉထႅမ်ၵႂႃႇ။
“ဢိုမ်ႈ!.. ႁႃးၵေႃႈပၼ်ၵႂႃႈ” ဢၢႆႈၸၢႆးႁဝ်းလၢတ်ႈ။
ဢွၼ်ၵၼ်ယၵ်ႉတူၺ်းၸူးၶႃႈ ပေႃးတၢၼ်ႇဝႃႈၶႃႈၼၼ်ႉၶႂ်ႈလႆႈၼႃႇယဝ်ႉ။
“တေပၼ်သင်ၵေႃႈဢမ်ႇႁူႉ တေပၼ်ၵႃႈႁိုဝ်ၵေႃႈဢမ်ႇႁူႉ ၶႃႈဢမ်ႇယုမ်ႇ ဢၼ်ဢမ်ႇႁၼ်ၼမ်ႉႁၼ်တူဝ်လေႃႇၼႃႈ” ၶႃႈၵေႃႈ ဢွၵ်ႇမိူဝ်းၵႂႃႇပႅတ်ႈၶဝ်ယူႇယဝ်ႉ။ ၶဝ်ၼၼ်ႉၵေႃႈ ယင်းတိုၵ်ႉၸွမ်းႁွင်ႉသႅၼ်ႇၵႂႃႇပႃႈလင်ၶႃႈယူႇ။
“ဢမ်ႇႁဵတ်းလႆႈဢမ်ႇၸႂ်ႈႁႃႉ”
“ဢမ်ႇႁဵတ်းလႆႈယူႇယဝ်ႉ ၵူၼ်းၺၢမ်ႉၸိူင်ႉၼင်ႇၶႃႈၼၼ်ႉ ဢမ်ႇထိူၵ်ႈ တေလႆႈၸႂ်ႉငိုၼ်းသူလေႃႇၼႃႈ ဢဝ်ပႂ်ႉလဵင်ႉသၢဝ်သူၵူၺ်းလႃႈ”
တွၼ်ႈၼိုင်ႈသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသွင်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
