တွၼ်ႈၼမ်း
ပီႊ 2023 ၼႂ်းဝဵင်းလူင်ဢၼ်ၵႂၢင်ႈယႂ်ႇ ၵူၼ်းၼမ်ၵိုၼ်းၶွၼ်ႈ ႁိူၼ်းတႅၵ်ႈဢုတ်ႇ ၶပ်ႉယႆၸႅၼ်ႇ သဵင်လူတ်ႉသဵင်ၵႃးတဵၵ်းႁွၼ်းလင်မေႃး ဢၢႆၵႂၼ်းတေႃႈလူတ်ႉပိဝ်ၽူင်ႉ ဢွၵ်ႇ လႅတ်ႇလူင်ႁွၼ်ႉမႆႈ ၵႃးၸႅၼ်ႇၶပ်ႉယႆၵၼ်လူင်ၵႂႃႇ ၸွမ်းသၢႆသဵၼ်ႈတၢင်း ထၢၼ်ႈပေႃးဢမ်ႇၸၢင်ႈႁိပ်ႈလႆႈယဝ်ႉ။ ၼူၼ်းမူဝ် ဢၼ်ၶပ်းၵႃးယူႇၼၼ်ႉၵေႃႈ ၸင်ႇသမ်ႉမီးသဵင်ၾူင်းသိုပ်ႇၸူးမႃး
“ဢေးၼူၼ်း!..ႁွတ်ႈထိုင်လႂ်ယဝ်ႉ”
“တိုၵ်ႉမီးယူႇၸွမ်းတၢင်းၼႆႉၼေႈ..ၵႃးၼမ်ၼႃႇပႆႇၸၢင်ႈပူၼ်ႉတၢင်းလူင်လႆႈ”
“ပေႃးၼၼ်ႁဝ်းၵႂႃႇပႂ်ႉဝႆႉတီႈလၢၼ်ႉၼႃႈ..”
“ဢူဝ်ႇၶေႇ!..”
သႅင်ၶမ်းဝၢင်းၾူၼ်းၼူၼ်းမူဝ်ယဝ်ႉၼႆၵေႃႈ ႁေႃႈၵႃးမၼ်းဢွၵ်ႇဝၢင်းလုမ်း တႅပ်းတတ်းတြႃးၼၼ်ႉၵႂႃႇ ယူႇယဝ်ႉ။ တီႈၼႂ်းလၢၼ်ႉ Cafe ဢၼ်ႁၢင်ႈလီ ၸိုၼ်ႈၸၢင်ႇမူတ်းသႂ် ၼႂ်းလၢၼ်ႉၼၼ်ႉၵေႃႈတဵတ်ႇယဵၼ်လီ သႅင်ၶမ်းၵေႃႈ ၵိုတ်းလူတ်ႉမၼ်းဝႆႉတၢင်းၼႃႈလၢၼ်ႉသေ မိူဝ်ႈဢၼ်လူင်းၵႃးမႃးၼၼ်ႉ ၸင်ႇသမ်ႉမီးၽူႈၸၢႆးလႄႈၽူႈယိင်းၵူႈၼိုင်ႈ လူင်းလူတ်ႉမႃး ၺႃးမိူဝ်ႈလဵဝ်ၵၼ် လီလီ ယဝ်ႉ။ သႅင်ၶမ်းၼၼ်ႉတႄႉ ဢမ်ႇလႆႈသူၼ်ၸႂ်သင် ပႆပူၼ်ႉၶဝ်ႈလၢၼ်ႉၵႂႃႇယူႇ။
တီႈဢၼ်သႅင်ၶမ်းၵႂႃႇၼင်ႈၼၼ်ႉသမ်ႉ တေႃႇၼႃႈႁၼ်ဢဝ် ၽူႈၸၢႆးၵေႃႉမိူဝ်ႈၵႆႈ ၼၼ်ႉလီလီ ၵူၺ်းၵႃႈ ဢမ်ႇလႆႈႁၼ်ၽူႈယိင်းၵေႃႉဢၼ်မႃးႁွတ်ႈၸွမ်းၵၼ်ၼၼ်ႉ ၵူၺ်းသမ်ႉ ၼင်ႈဢုပ်ႇတင်းၽူႈယိင်းထႅင်ႈၵေႃႉၼိုင်ႈ လၢတ်ႈၵႂၢမ်းဝၢၼ်ၸူးၵၼ် မူတ်ႉသမ်ႉပေႃးတေၶိုၼ်ႈ ယူႇယဝ်ႉ။ သႅင်ၶမ်းၼၼ်ႉ သမ်ႉဝႃႈ ဢမ်ႇလႆႈသူၼ်ၸႂ် သေတႃႉ လွင်ႈႁဵတ်းသၢင်ႈၽူႈၸၢႆးၵေႃႉၼၼ်ႉတႄႉ ၸပ်းတႃမၼ်းၵႂႃႇယဝ်ႉ။ လၵ်ႉလၢတ်ႈယူႇၼႂ်းၸႂ်
“ၵူၼ်းလဝ်းၼႆႉလီၵူဝ်တေႉယဝ်ႉ ၽူႈၸၢႆးၸိူင်ႉၼႆဝႆႉၸႂ်ဢမ်ႇလႆႈတေႉလူး”
ၶၢႆႉပၢႆႈသၢႆတႃမၼ်းသေ ၼင်ႈၵိၼ် ၵေႃႇၾီႇၵတ်းၵတ်းယဵၼ်ယဵၼ် ယူႇယဝ်ႉ။ ယၢမ်းၼၼ်ႉ ၼူၼ်းမူဝ်ၵေႃႈႁွတ်ႈမႃးသေ
“ဢမ်ႇငၢႆႈငၢႆႈတေႉလူင်..ၼႂ်းဝဵင်းလူင်ၼႆႉ လူတ်ႉၼမ်ဝႃႈၼမ်”
“ယူႇယူႇဢွၵ်ႇၸႂ်သင်သေသမ်ႉမႃးလႃႇ!..”
“ၸႂ်ထိုင်သူၼၼ်ႉၼႃႇ ဢမ်ႇမိူဝ်းလႄႇမိူဝ်းၸႂ်းၵၼ်ႁေပွၵ်ႈလူး ယဝ်ႉၵေႃႈ.. ႁဝ်းမီးၶၢဝ်ႇလီတေမႃးလၢတ်ႈ..ႁဝ်းယဵၼ်ႉၸႂ်ပႂ်ႉဢမ်ႇလႆႈယဝ်ႉဝႃႈ ပေႃးလၢတ်ႈၼႂ်းၾူင်းဢမ်ႇပေႃးလီလႄႈ မႃးလၢတ်ႈတီႈတူဝ်ၼၼ်ႉလီလိူဝ်ပိူၼ်ႈယဝ်ႉ”
ၼူၼ်းမူဝ်မိူၼ်တေၸႂ်တိုၼ်ႇတဵၼ်ႈတေႉၼၼ်ႉယဝ်ႉ သႅင်ၶမ်းၵေႃႈ ဢဝ်ၼမ်ႉသူမ်ႈ ဢၼ်မၼ်းသင်ႇဝႆႉပၼ်ၼၼ်ႉ ယိုၼ်ႈပၼ်မၼ်းၵႂႃႇ။
“ၸႂ်ယဵၼ်ယဵၼ်လႄႈ မီးလွင်ႈဢၼ်သူဢမ်ႇလၢတ်ႈၼႄႁဝ်းႁေႁႃႉ ႁၼ်ဝႃႈမီးၶၢဝ်ႇလီ လွင်ႈသင်လႃႇ တေမႃးယူႇၸွမ်းႁဝ်းႁႃႉ..”
“ၵူၼ်းပေႃးၵေႃႉယႂ်ႇယဝ်ႉ ပဵၼ်သင်လႄႈယင်းႁႂ်ႈပိူၼ်ႈမႃးယူႇၸွမ်းလႃႇ ပေႃးငဝ်ၵေႃႈ ႁႃၵေႃႉႁၵ်ႉသေၵေႃႉၼိုင်ႈလႄႈ”
ပေႃးလၢတ်ႈလွင်ႈၵေႃႉႁၵ်ႉၵေႃႉပႅင်းမႃးၵေႃႈ ၼႃႈသႅင်ၶမ်းၼၼ်ႉ တူႇၵႂႃႇၵမ်းလဵဝ် ယဝ်ႉ။
“ဢမ်ႇႁၼ်ဝႃႈႁဝ်းတေငဝ်တီႈလႂ် ႁဝ်းၵေႃႈယူႇႁင်းၵူၺ်းမႃးပဵၼ်လၢႆပီႊယဝ်ႉ တေဝႃႈႁိုဝ်ၵေႃႈ..ႁဝ်းမီးသူယူႇပဵၼ်ၵေႃႉလူး သင်သူမႃးပဵၼ်ၵေႃႉႁၵ်ႉႁဝ်း တႄႉ ႁဝ်းၽွမ်ႉယူႇၵူၺ်း”
ၼူၼ်းမူဝ်ထူၺ်ႈၸႂ်လူင်ၵမ်းယဝ်ႉၵမ်း မိူၼ်ဝႃႈမီးလွင်ႈၼၵ်းၸႂ်ဝႆႉၼၼ်ႉယဝ်ႉ။
“ပဵၼ်သင်ၵႂႃႇယဝ်ႉလႃႇ”
“လွင်ႈဢၼ်ႁဝ်းတေလၢတ်ႈၼႄသူၼႆႉ မိူၼ်လႅပ်ႈတေဢမ်ႇၸႂ်ႈၶၢဝ်ႇလီသင်ယဝ်ႉ ယႃႇတူၵ်းၸႂ်ၼႃႈ” တင်းမိုဝ်းမၼ်းသေ ႁႄႉႁၢမ်ႈသႅင်ၶမ်းဝႆႉယဝ်ႉ။
“သူတေႁဵတ်းႁင်ႁႂ်ႈႁဝ်းတူၵ်းၸႂ်လႆႈ မီးသင်ဢၼ်ဢမ်ႇၸႂ်ႈၶၢဝ်ႇလီတွၼ်ႈတႃႇႁဝ်း ပေႃးဝႃႈသူဢမ်ႇတေႇၼႃႈႁိူၼ်းပႅတ်ႈႁဝ်းတေႉ”
သီၼႃႈၼူၼ်းမူဝ်ၼၼ်ႉၵေႃႈ သမ်ႉပေႃးႁဵဝ်ႇႁႅင်ႈလူင်ၵႂႃႇ။ သႅင်ၶမ်းဢၼ်လႆႈႁၼ် သီၼႃႈၼူၼ်းမူဝ်ၼၼ်ႉ ၵိုတ်းမိုင်ၵႂႃႇသေ ၼႅတ်ႈဢဝ်မိုဝ်းတူမ်းသူပ်းမၼ်းၵမ်းလဵဝ် လၢတ်ႈသင်ဢမ်ႇလႆႈယဝ်ႉ ဢဝ်မိုဝ်းမၼ်းၸီႉၸူးၼူၼ်းမူဝ် ၼင်ႇဝႃႈၸႂ်ႈႁႃႉ ၼႆလႄႈ ၼူၼ်းမူဝ်ၼၼ်ႉၵေႃႈ ၵႃႈလႆႈငွၵ်းႁူဝ်ၼႄၵႂႃႇလွႆးလွႆးယဝ်ႉ။
“ႁဵတ်းၸိူင်ႉၼႆတီႈၵၼ်လႆႈၸိူင်ႉႁိုဝ် သူႁဵတ်းႁႂ်ႈႁဝ်းတိူဝ်ႉၸႂ်တေႉတေႉၼၼ်ႉယဝ်ႉ ႁၵ်ႉၵၼ်မႃးပေႃးႁိုင် သူတေႁဵတ်းၸိူင်ႉၼႆတေႃႇႁဝ်းဢမ်ႇလႆႈၼႃ”
“ဢေးယိင်း..လၢတ်ႈလွႆးလွႆးဢိတ်ႉၼိုင်ႈလႄႈ ၵမ်ႉပိူၼ်ႈတေထၢင်ႇၽိတ်းယဝ်ႉ”
“ထၢင်ႇၽိတ်းတီႈလႂ်လႃႇ ဢမ်ႇၼၼ်ၵေႃႈသူဢမ်ႇႁၵ်ႉႁဝ်း!”
“လၢတ်ႈလွႆးလွႆးၵေႃႈလႆႈယူႇၵႂႃႈ ပိူၼ်ႈတူၺ်းႁႃးမူတ်းယဝ်ႉၼေႈ…”
သႅင်ၶမ်းၸင်ႇတေၾၢင်ႉႁၼ်မႅၼ်ႈ သၢႆတႃၵူၼ်းၸိူဝ်းၼၼ်ႉသေ ႁဵတ်းၼင်ႇဢမ်ႇသူၼ်ၸႂ်ဝႃႈ မၼ်းလၢတ်ႈသင်ၵႂႃႇၼၼ်ႉယဝ်ႉ။ ၶိုၼ်းထၢမ်ၸူး ၼူၼ်းမူဝ်ၵႂႃႇ
“ပဵၼ်သင်လႄႈပိူၼ်ႈတေလႆႈတူၺ်းၸိူင်ႉၼႆလႃႇ”
“ၵၢပ်ႈပၢၼ်မၼ်းၶိုတ်းၵၢပ်ႈၼႃႇယဝ်ႉလူႉ..သူၵေႃႈ ၽႂ်ႁိုဝ်မိူၼ်ၵူၼ်းပၢႆးဝူၼ်ႉၵဝ်ႇၸိူင်ႉသူၼၼ်ႉလႃႇ ယူႇၼႂ်းဝဵင်းလူင် ၵုမ်ႇမိုင်ႉႁဵတ်းသင်ၵူၺ်း ဝၢၼ်ႈမိူင်းၶိုတ်းၵၢပ်ႈၵေႃႈ ၵူၼ်းယူႇမၼ်းၵေႃႈ ႁူႉလႅၵ်ႈလၢႆႈၼၼ်ႉယဝ်ႉ ၽူႈယိင်းတေႃႇၽူႈယိင်းလၢတ်ႈၸိူင်ႉၼႆတေႃႇၵၼ်ၵေႃႈ ထၢင်ႇဝႃႈပဵၼ်ၵေႃႉႁၵ်ႉၵၼ်ၼၼ်ႉၼႃႇ”
“ယွင်ႇယဝ်ႉႁႃႉ ဢူၺ်းၵေႃႉၵၼ်လၢတ်ႈၸိူင်ႉၼႆတေႃႇၵၼ်ၵေႃႈ ဢမ်ႇလႆႈၵႂႃႈ.. ထၢင်ႇတႄႉဢွၵ်းဢေႃတေယွင်ႇၵႂႃႇမူတ်းယဝ်ႉ” လၢတ်ႈၵႂႃႇလူၺ်ႈဢမ်ႇလႆႈထိင်းသဵင်လႄႈ ၵူၼ်းၼႂ်းလၢၼ်ႉၼၼ်ႉၵေႃႈ ဢွၼ်ၵၼ် ယၵ်ႉတူၺ်းၸူးမၼ်းထႅင်ႈယူႇ။ မၼ်းၼၼ်ႉၵေႃႈ ဢမ်ႇလႆႈသူၼ်ၸႂ်သင်သေ သိုပ်ႇလၢတ်ႈထႅင်ႈ
“ၵၢပ်ႈပၢၼ်ဝၢၼ်ႈမိူင်းၶိုၼ်ႈယႂ်ႇၶိုတ်းၵၢပ်ႈၼႆႁႃႉ ဝၢၼ်ႈမိူင်းတူၵ်းတႅမ်ႇမႃးၵူၺ်းယူဝ်ႉ ဝၼ်းယဝ်ႉဝၼ်း ၵူၼ်းပႅတ်ႉၵူၼ်းလႅၼ်ၵိၼ်ၵၼ်ၵေႃႈ လိူင်ႇၼမ်မႃးတိၵ်းတိၵ်း၊ ၵူၼ်းမိူၵ်ႈၵူၼ်းလိူင်းၵေႃႈတိူဝ်းၼမ်မႃး၊ ၵူၼ်းႁၼ်သုၼ်ႇတူဝ်ၵေႃႈ လိူင်ႇတိူဝ်းၼမ် ၵူၼ်းၸိူဝ်းၼႆႉ ပဵၼ်သင်လႄႈမၼ်းဢမ်ႇႁၢႆၵႂႃႇလႃႇ ၶိုတ်းၵၢပ်ႈၵေႃႈ ပိူၵ်ႇၼွၵ်ႈမၼ်းၵူၺ်း ဢမ်ႇႁၼ်လွင်ႈၸိူဝ်းၼႆႉ မီးလွင်ႈလႅၵ်ႈလၢႆႈသင်မႃး ယိုင်ႈယူႇႁိုင်..ယိုင်ႈပၼ်ႁႃၼမ်ၵူၺ်းယဝ်ႉ”
မိူၼ်ဝႃႈ ၽူႈၸၢႆးဢၼ်ၼင်ႈတေႃႇၼႃႈမၼ်း ၵေႃႉမိူဝ်ႈၵႆႈၼၼ်ႉၵေႃႈ လႆႈငိၼ်းမႅၼ်ႈမိူၼ်ၵၼ်လႄႈ ယၵ်ႉတူၺ်းၸူးမၼ်းၵႂႃႇယူႇ။
“သူတေဝူၼ်ႉၸွမ်းပၼ်ႁႃ လွင်ႈၵၢၼ်လွင်ႈငၢၼ်းသူၼမ်ၼႃႇပူၼ်ႉတီႈယဝ်ႉ”
“မိူဝ်ႈၼႆႉသူလိုဝ်ႈယူႇၸွင်ႇၸႂ်ႈႁိုဝ်…”
“ဢိုမ်ႈ!..မိူဝ်ႈလႂ်သူမႃးလႄႇယဝ်ႉ မီးၵၢၼ်ၵေႃႈ ယင်ႉဝႆႉလႆႈယူႇၵႂႃႈ သူၶႂ်ႈၵႂႃႇတၢင်းလႂ်လႃႇ ႁဝ်းတေဢွၼ်ၵႂႃႇ..ၼႂ်းဝဵင်းၼႆႉ ႁဝ်းၶႂ်ႈၸွတ်ႇၵႂႃႇၵူႈတီႈယဝ်ႉ”
“ႁူင်းပလိၵ်ႈတႄႉ ႁဝ်းဢမ်ႇၵႂႃႇၸွမ်းၼႃ”
“ႁၼ်ဝႃႈ ႁဝ်းပဵၼ်ၽႂ်လႃႇ ယၢမ်းလဵဝ်ၼႆႉ ႁဝ်းပဵၼ်ဢူၺ်းၵေႃႉသူဢိူဝ်ႈၼႃ ဢမ်ႇၸႂ်ႈၽူႈတၢင်ၼႃႈ..”
သွင်ၶႃၵေႃႈ ဢွၼ်ၵၼ်ၵႂႃႇလႄႇၵႂႃႇလၢဝ်းၸွမ်းၵၼ် ၼႂ်းဝဵင်းလူင်ၼၼ်ႉယဝ်ႉ။ ဝႄႉၵႂႃႇၼႂ်းႁၢၼ်ႉၶၢႆၶူဝ်း ဢၼ်ၶိုၵ်ႉၶႅမ်ႉၼၼ်ႉသေ မိူဝ်ႈဢၼ်တိုၵ်ႉလိူၵ်ႈသိူဝ်ႈၶူဝ်း ပၼ်ၵၼ်ယူႇၼၼ်ႉ လိူၵ်ႈလိူၵ်ႈသမ်ႉ ႁၼ်မႅၼ်ႈၺႃးၽူႈၸၢႆး ၵေႃႉဢၼ်ႁၼ်တီႈလၢၼ်ႉၼၼ်ႉထႅင်ႈယဝ်ႉ ပွၵ်ႈၼႆႉသမ်ႉ တွႆးသၢဝ်ထႅင်ႈၵေႃႉၼိုင်ႈမႃးယူႇ ဢမ်ႇၸႂ်ႈသၢဝ်ဢၼ်ႁၼ် တီႈၵႃးၼၼ်ႉလႄႈ ၼႂ်းလၢၼ်ႉၼၼ်ႉ ၵူၺ်းၵႃႈပဵၼ်ၵေႃႉမႂ်ႇယဝ်ႉ။ သႅင်ၶမ်းဢၼ်ႁၼ်ၸိူင်ႉၼၼ်ၵေႃႈ ပဵၼ်ဢၼ်လၢၵ်ႇလၢႆးတႃႇမၼ်းတႄႉတႄႉယူႇ။
“ပဵၼ်သင်လႄႈႁၼ်ၶဝ်ထႅင်ႈယဝ်ႉလႃႇ ႁၼ်ၶဝ်..မၼ်းၵေႃႈဢမ်ႇလႆႈလၢၵ်ႇလၢႆးသင် ၵူၺ်းၵႃႈ ၵူၼ်းဢၼ်မႃးၸွမ်းၶဝ်ၼၼ်ႉယဝ်ႉ လၢၵ်ႇလၢႆး”
“သူတၼ်းသူၼ်ၸႂ်ၽူႈၸၢႆးၸဵမ်မိူဝ်ႈလႂ်လႃႇ”
“ႁဝ်းၵေႃႈဝႃႈ..မၼ်းလီထၢင်ႇပိူင်ႈၼႆၵူၺ်း ၼႂ်းဝဵင်းလူင်ၵႂၢင်ႈပေႃးတၢၼ်ႇၼႆႉ ယင်းတိုၵ်ႉထူပ်းၶဝ်လႆႈယူႇ.. ႁဝ်းႁၼ်ၶဝ်သၢမ်တီႈၵေႃႈ ပႃးယိင်းဢမ်ႇသွၼ်ႉၼႃႈႁေတီႈၼၼ်ႉယဝ်ႉ”
“သူတၼ်းၵႂႃႇႁၼ်ၶဝ်မိူဝ်ႈလႂ်လႃႇ”
“တီႈၼႃႈလၢၼ်ႉၼၼ်ႉ တီႈၼိုင်ႈ၊ ၼႂ်းလၢၼ်ႉတီႈၼိုင်ႈ မိူဝ်ႈလဵဝ်ၼႆႉ ထႅင်ႈႁေၼၼ်ႉၼႃႇ”
“ဢူဝ်ႉ!! တွင်းလႆႈလီတေႉယဝ်ႉ ၵူၺ်းၵႃႈ..မၼ်းၵေႃႈဢမ်ႇလၢၵ်ႇလၢႆးသင်လူး ၶဝ်လဝ်းပေႃးတၢၼ်ႇၼၼ်ႉ ႁူႉမီးသၢဝ်သၢဝ် ၶႂ်ႈဢုပ်ႇၶႂ်ႈၵဝ်းၶဝ်ယူႇၵူၺ်းလေႃႇ”
“သူပဵၼ်ၼၢင်းၽီႁႃႉ ပဵၼ်သင်လႄႈ ဝူၼ်ႉလီပေႃးတၢၼ်ႇၼႆႉလႃႇ”
“မိူၼ်ဝႃႈႁဝ်းလႅပ်ႈယၢမ်ႈႁၼ်ၶဝ်ယူႇသေတီႈတီႈၼႃ ၵူၺ်းၵႃႈဢမ်ႇတွင်းယဝ်ႉ”
“တိူင်းမၼ်းလႃႈ..ႁဝ်းမႃးလႄႇလူင် ပဵၼ်သင်တေလႆႈသူၼ်ၸႂ်ၵူၼ်းၸိူင်ႉၼင်ႇၶဝ်လႃႇ”
သွင်ၶႃဢွၼ်ၵၼ်လႄႇတေႃႇထိုင်ၵၢင်ဝၼ်းၶမ်ႈသေ ဢွၼ်ၵၼ် ဝႄႉၵိၼ်ၶဝ်ႈၸွမ်းလၢၼ်ႉယဝ်ႉ ပွၵ်ႈမိူဝ်းႁိူၼ်းၵႂႃႇယူႇ။
ၼႂ်းႁိူၼ်းသႅင်ၶမ်း ဢၼ်ၵႂၢင်ႈယႂ်ႇယူႇတၢၼ်ႇတၢၼ်ႇ ပေႃးတႃႇၵူၼ်းၼႃႈႁိူၼ်း ၼိုင်ႈလင်ယူႇသဝ်းၼၼ်ႉ၊ မိူၼ်ဝႃႈၼႂ်းႁိူၼ်းၼၼ်ႉသမ်ႉ ပေႃးပဝ်ႇလူင်ဝႆႉ ဢမ်ႇမီးသင်သေဢိတ်း ၼႂ်းႁိူၼ်းလူင်ၼၼ်ႉ တေႃႉတႄႉမီးတင်ႇလႄႈၽိူၼ် တူႈပပ်ႉလိၵ်ႈ တမ်းႁိမ်းၽႃၼၼ်ႉၵူၺ်းလႄႈ ၼႂ်းႁွင်ႈၼွၼ်း သႅင်ၶမ်းၼၼ်ႉၵေႃႈ မီးၵူႇၼွၼ်း၊ တီႈၵဵပ်းသိူဝ်ႈၶူဝ်း တူႈတမ်းၾႆးဢၼ်မီးယူႇႁိမ်းႁူဝ်ၼွၼ်းၼၼ်ႉၵူၺ်း။ ၼႂ်းသိုင်ႇၾႆးၼၼ်ႉတႄႉ သမ်ႉပေႃးဢမ်ႇၶႂ်ႈမီးႁင်လူးၵွၼ်ႇ လိူဝ်သေ တဝ်ႈထၢတ်ႈ လႄႈ ဝၢၼ်ႇသွင်သၢမ်ဝႂ် ၼႂ်းတူႈယဵၼ်ၼၼ်ႉၵေႃႈ မီးၼမ်ႉလႄႈ ၶဝ်ႈမုၼ်း တၢင်းၵိၼ်ယွႆႈ ဢိၵ်ႇတင်း မၢၵ်ႇဢူမ်တင်းၼမ် ၼၼ်ႉယဝ်ႉ။ တူႈၼႂ်းသွင်ႇၾႆးၼၼ်ႉၵေႃႈ မီးၶဝ်ႈသွႆးဢေႃႇတေႃႇၵူၺ်းယူႇ။
“ယူႇမႃးပေႃးမီးပဵၼ်လၢႆပီႊယဝ်ႉ မႃးမိူဝ်ႈလႂ်ၵေႃႈ..ႁၼ်ပဵၼ်ၸိူင်ႉၼႆတႃႇသေႇ လႅၵ်ႈလၢႆႈႁႂ်ႈမိူၼ်ႁွင်ႈၵူၼ်းယူႇၽွင်ႈလႄႈ”
“ႁဝ်းၵေႃႈဝႃႈ..ႁဝ်းယူႇမိူၼ်ၵူၼ်းယူႇလူး ဢမ်ႇမိူၼ်ၵူၼ်းတီႈလႂ် ႁွင်ႈႁဝ်းတင်းလိူမ်ႇလႆႇလႄႈမူတ်းသႂ်လီ..ပေႃးတၢၼ်ႇၼၼ်ႉ..”
“မူတ်းသႂ်တီႈလႂ် ဢမ်ႇမီးႁင်ၼႆႉဢမ်ႇၸႂ်ႈဝႃႈ..ဢမ်ႇမီးၶီႈၽုၼ်ႇၼႃ လိူဝ်ၼၼ်ႉသမ်ႉ တၢင်းၵိၼ်သူၼၼ်ႉ ၵိၼ်ဢၼ်မီးၽွၼ်းလီမၼ်းၽွင်ႈလႄႈ”
“ႁဝ်းၵေႃႈဝူၼ်ႉဝႃႈ မၼ်းမီးၽွၼ်းလီယူႇၼႃ ပေႃးဢမ်ႇမီးၽွၼ်းလီ ၽႂ်တေႁဵတ်းပၼ်ၵူၼ်းၵိၼ်လႃႇ”
“သူၵိၼ်ၶဝ်ႈယူႇႁႃႉ ၵူႈဝၼ်းၼႆႉ..”
“ပေႃးဢမ်ႇၵိၼ်ၶဝ်ႈ သူတေႁႂ်ႈႁဝ်းၵိၼ်ႁင်လႃႇ..”
“ႁဝ်းဝႃႈပၼ်ႁႂ်ႈသူ..ယူႇၵေႃႉလဵဝ်ၵႂႃႇ ႁိုင်ႁိုင်တႄႉဢမ်ႇလႆႈယဝ်ႉ လူဝ်ႇႁႃၵူၼ်းတူၺ်းထိုင်ပၼ်ယဝ်ႉဝႃႈ ႁိူၼ်းသူၼႆႉ”
“ယႃႇမႆႈၸႂ်တႃႇႁဝ်းယူႇယဝ်ႉ ႁဝ်းၵေႃႈဢမ်ႇလႆႈယူႇၵႃႈႁိုဝ်ၼင်ႇၵဝ်ႇ မႃးႁၼ်ႁိူၼ်းၵေႃႈ ပွင်ႉပေႃးတၢၼ်ႇပဵၼ်ၼၢႆးႁဝ်းယဝ်ႉဝႃႈ လၢတ်ႈလွင်ႈသူၽွင်ႈလႄႈ”
“လွင်ႈသင်လႃႇ..”
“သူလႄႈတင်းၶဝ်တူၵ်းလူင်းၵၼ်လႆႈၸိူင်ႉႁိုဝ်လႃႇ ႁၼ်သူလၢတ်ႈၼႄႁဝ်း..ပဵၼ်ၸူႉၵၼ်တင်းၶဝ် မိူဝ်ႈလိူၼ်ပူၼ်ႉၵူၺ်း ႁဝ်းဢမ်ႇထၢင်ႇဝႃႈသူတေတေႇၼႃႈႁိူၼ်းၸွမ်းၶဝ်ဝႆးၸိူင်ႉၼႆ”
“ဢိူဝ်ႈ! မၼ်းၵေႃႈ ပေႃးထူပ်းၺႃးၵေႃႉဢၼ်ထုၵ်ႇၸႂ်..ၸိုဝ်ႈၸႂ်ႈယဝ်ႉၼႆၵေႃႈ တေၵုမ်ႇလိူၵ်ႈယူႇႁဵတ်းသင်လႃႇ”
“မၼ်းၵေႃႈၸိုဝ်ႈၸႂ်ႈတွၼ်ႈတႃႇသူမႃးလႆႈ..ပဵၼ်လၢႆသိပ်းပီႊယဝ်ႉဢမ်ႇၸႂ်ႈႁိုဝ်”
“ႁၢင်ႈလၢတ်ႈလိူဝ်ၼႃႇၼင်ႇၵဝ်ႇယဝ်ႈ..”
“ဢမ်ႇၼၼ်ၵေႃႈဢမ်ႇၸႂ်ႈ လၵ်ႉႁၵ်ႉၶဝ်မႃးၸဵမ်မိူဝ်ႈတႄႇထူပ်းႁၼ်ၵမ်းလဵဝ် ၶဝ်ပဵၼ်ႁၵ်ႉဢွၼ်တၢင်းသုတ်းသူ..ဢမ်ႇၸႂ်ႈႁႃႉ”
“ၸႂ်ႈယူႇႁႃႉ..ဢမ်ႇၸႂ်ႈယူဝ်ႉ..”
“ႁူႉယူႇတီႈၸႂ်..လၢတ်ႈလႅၼ်ႁဝ်းဢမ်ႇလႆႈလေႃႇ ႁဝ်းမၢႆဝႆႉမူတ်းယဝ်ႉဝႃႈ”
လုၵ်ႉၵႂႃႇသွၵ်ႈႁႃပပ်ႉမၢႆတွင်းမၼ်းမႃးယူႇ။
“ပပ်ႉၸိူဝ်းၼႆႉယင်းတိုၵ်ႉၵဵပ်းဝႆႉယူႇႁႃႉ ၸဵမ်မိူဝ်ႈပီႊလႂ်ပုၼ်ႉလႃႇၼႆႉ”
“ဢိုမ်ႈ! မၼ်းမီးတီႈပွင်ႇတွၼ်ႈတႃႇၸၢတ်ႈပၢၼ်ႁဝ်းလူး ပွၵ်ႈၼိုင်ႈဢၼ်လႆႈထူပ်းမႃး ဢမ်ႇဝႃႈမၼ်းႁိုင်တၢၼ်ႇႁိုဝ်ၵေႃႈ ႁဝ်းႁိုဝ်တေပႅတ်ႈမၼ်းလႆႈလႃႇ”
“ႁႂ်ႈႁဝ်းတူၺ်းဢိတ်ႉၼိုင်ႈလူႉပေႃးၼၼ်..”
သႅင်ၶမ်းၵေႃႈ ၼႂ်းပပ်ႉမၢႆတွင်းမၼ်းလၢႆလၢႆပပ်ႉၼၼ်ႉ လိူၵ်ႈပၼ်ၵႂႃႇတီႈၼူၼ်းမူဝ်ပပ်ႉၼိုင်ႈယူႇ ၼူၼ်းမူဝ်ၵေႃႈ လႆႈပိုတ်ႇၽုၺ်ႇၵႂႃႇယဝ်ႉ။
ၼႂ်းပပ်ႉမၢႆတွင်းၼၼ်ႉ တေပဵၼ်လွင်ႈသင်ၼႆ ပႂ်ႉသိုပ်ႇပၼ်ႁႅင်းလူဢၢၼ်ႇၵႂႃႇထႅင်ႈ ၼႂ်းတွၼ်ႈၼိုင်ႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
