တွၼ်ႈသၢဝ်းသၢမ်
ပဵၼ်သၽႃႇဝၵူၺ်းႁိုဝ် ပဵၼ်ၾိင်ႈယၢမ်ႈၵူၼ်းႁိုဝ်ဢမ်ႇႁူႉ၊ ဢူႈမႄႈၵမ်ႈၼမ်ၼၼ်ႉ မိူဝ်ႈႁၼ်လုၵ်ႈပိူၼ်ႈလႆႈလီလႆႈပဵၼ် ပဵၼ်လုၵ်ႈဢွၼ်ႇဢၼ်ၵတ်ႉၶႅၼ်ႇလႅတ်းၽၢႆ၊ တေလႆႈၸႂ်ႁႂ်ႈလုၵ်ႈႁဝ်းၼၼ်ႉႁဵတ်းမိူၼ်ပိူၼ်ႈ၊ တေၸႂ်ႉႁႂ်ႈလုၵ်ႈႁဵတ်းၼင်ႇပိူၼ်ႈ လူၺ်ႈဢမ်ႇထၢမ်ၵၢင်ၸႂ်လုၵ်ႈဝႃႈ ၶႂ်ႈႁဵတ်းႁိုဝ်ဢမ်ႇၶႂ်ႈႁဵတ်း။ ပေႃးလုၵ်ႈထဵင်ၶိုၼ်းၵေႃႈ ၵႆႉလႄႇပွင်ႉဝႃႈလုၵ်ႈၼၼ်ႉဝႃႈယၢပ်ႇၼႃႇ ဢမ်ႇလႆႈလွင်ႈ ဢမ်ႇထွမ်ႇၵႂၢမ်း၊ ပွင်ႉထႃႉလုၵ်ႈသေယဝ်ႉ ဢဝ်ၵႂႃႇတႅၵ်ႈၼိူင်းတင်းၵေႃႉပုၼ်ႉၵေႃႉၼႆႉ၊ ဢမ်ႇတူၺ်းႁၼ်ဝႃႈ လုၵ်ႈတူဝ်ၸဝ်ႈၵဝ်ႇၼၼ်ႉၵေႃႈ မီးၼမ်ႉၵတ်ႉႁင်းမၼ်းယူႇ မၼ်းတေမိူၼ်ၵၼ်လႆႈၸိူင်ႉႁိုဝ်၊ ၵေႃႉၼိုင်ႈလႄႈၵေႃႉၼိုင်ႈၼၼ်ႉ တၢင်းသူင်ဢမ်ႇမိူၼ်ၵၼ် ၼမ်ႉၵတ်ႉဢမ်ႇမိူၼ်ၵၼ် တေႁဵတ်းႁႂ်ႈမိူၼ်ၵၼ် တေတႅၵ်ႈၼိူင်းၵၼ်ဢမ်ႇလႆႈ။
လုၵ်ႈဢွၼ်ႇၼၼ်ႉမီးပၢႆးဝူၼ်ႉ မေႃႁဵတ်းမေႃသၢင်ႈႁင်းၶဝ်ယူႇယဝ်ႉ၊ ဢမ်ႇဝႃႈၶဝ်တေဝူၼ်ႉၸိူင်ႉႁိုဝ် ထုၵ်ႇလီၼပ်ႉယမ်ပၢႆးဝူၼ်ႉၶဝ်ယူႇ၊ မိူဝ်ႈႁဵတ်းၽိတ်းၵေႃႈ ၶဝ်ၵေႃႈတေလႆႈမေႃႁူႉၽိတ်းမႃး၊ မိူဝ်ႈႁဵတ်းလီၵေႃႈတေလႆႈမေႃႁူႉလွင်ႈလီမႃး၊ ပၼ်ႁႂ်ႈၶဝ်လႆႈႁဵၼ်းႁူႉၵႂႃႇလူၺ်ႈတူဝ်ၸဝ်ႈၵဝ်ႇလႄႈ၊ ယွၼ်ႉပိူဝ်ႈၸၢတ်ႈပၢၼ်လုၵ်ႈၵေႃႈ ပဵၼ်ၶွင်လုၵ်ႈၵူၺ်း၊ ဢမ်ႇဝႃႈတေပဵၼ်ဢူႈမႄႈ ဢၼ်လဵင်ႉလူၶဝ်မႃးၵေႃႈယဝ်ႉ ၸၢတ်ႈပၢၼ်လုၵ်ႈၼၼ်ႉ ဢမ်ႇၸႂ်ႈၶွင်ဢူႈမႄႈ၊ တွၼ်ႈတႃႇလုၵ်ႈတေၵေႃႉယႂ်ႇၼၼ်ႉ ထုၵ်ႇလီပၼ်ၶဝ်လႆႈၸႂ်ႉၸၢတ်ႈပၢၼ်ႁင်းၶဝ်ၵႂႃႇ လွတ်ႈလွတ်ႈလႅဝ်းလႅဝ်းယူႇ။
ဝၢႆးသေၶူးၶဝ်ႁွတ်ႈမႃး ပႃးတင်းၶူးလူင်ၼၼ်ႉၵေႃႈ လႆႈမႃးလိုပ်ႈလုၵ်ႈႁဵၼ်းၵူႈၵေႃႉၼၼ်ႉ ႁႂ်ႈယၢႆႈၵၼ်ၵႂႃႇၼႆယူႇ၊ ၶူးၼုမ်ႇလႅင်းၼၼ်ႉၵေႃႈၸွမ်းမႃးမိူၼ်ၵၼ် ၸင်ႇႁႂ်ႈဢၢႆႈဢွင်ႇၶႃဝၼ်းလၢဝ်ၼၼ်ႉ ၵိုတ်းဝႆႉယူႇ၊ မိူဝ်ႈၶူးလူင်ႁၼ်ၸိူင်ႉၼၼ်ၵေႃႈ ပဵၼ်ဢၼ်ဢမ်ႇႁၢၼ်ႉၸႂ်ႁေ လႆႈမီးသူပ်းမီးသဵင်ၵၼ်တင်း ၶူးၼုမ်ႇလႅင်းမႃးယဝ်ႉ။
“လုၵ်ႈဢွၼ်ႇယင်းပႆႇၽိတ်းၵၼ် တေႁႃလွင်ႈႁႃတၢင်းႁဵတ်းသင်လႃႇ ပေႃးဢမ်ႇတၢၼ်ႇသုၵ်ႉၵေႃႈယႃႇႁႂ်ႈသုၵ်ႉလႄႈ”
“ၶူးဢမ်ႇႁၼ်ႁႃႉ မၼ်းႁဵတ်းၸိူင်ႉႁိုဝ်တင်းလုၵ်ႈဢွၼ်ႇၵေႃႉၼၼ်ႉၼႆ”
မိူဝ်ႈၶူးၶႃထဵင်ၵၼ်ယူႇၼၼ်ႉ ဢၢႆႈဢွင်ႇၶႃၵေႃႈ ပၢႆႈဢွၵ်ႇၵႂႃႇယူႇယဝ်ႉ။
“ပေႃးၶူးႁဵတ်းၸိူင်ႉၼႆတိၵ်းတိၵ်း ႁူင်းႁဵၼ်းၼႆႉတေဢမ်ႇမီးပၵ်းမီးပိူင်မႃးတိၵ်းတိၵ်းယဝ်ႉ” ၶူးၼုမ်ႇလႅင်း။
“ဢမ်ႇမီးပၵ်းမီးပိူင်ၸိူင်ႉႁိုဝ် လုၵ်ႈဢွၼ်ႇယင်းဢမ်ႇပႆႇလႆႈၽိတ်းၵၼ် ၶူးပေႃးတေဢဝ်တၢင်းၽိတ်းယဝ်ႉ ၶူးၵူၺ်းဢိူဝ်ႈဢမ်ႇမေႃတူၺ်းပၵ်းတူၺ်းပိူင်”
“မၼ်းဢမ်ႇၸႂ်ႈပွၵ်ႈလဵဝ်ၵူၺ်းဢၼ်ၶူးႁဵတ်းၸိူင်ႉၼႆ၊ ၶူးတူၺ်းလုၵ်ႈႁဵၼ်းၼႃႈလဵၵ်ႉၼႃႈယႂ်ႇၸိူင်ႉၼႆ မၼ်းၵေႃႈဢမ်ႇထုၵ်ႇမႅၼ်ႈ”
“မၼ်းဢမ်ႇထုၵ်ႇတီႈလႂ် တွၼ်ႈတႃႇႁူင်းႁဵၼ်းၼႆႉပေႃးတေယူႇလွတ်ႈလႆႈၼၼ်ႉ တေလႆႈမေႃယူႇမေႃၵိၼ်ဢိူဝ်ႈ! ၶူးဢမ်ႇႁူႉႁႃႉ ပေႃးဢမ်ႇမီးၵဝ် ဝၼ်းမိူဝ်ႈၼႆႉ ဢမ်ႇႁူႉႁူင်းႁဵၼ်းၼႆႉတေပဵၼ်ၸိူင်ႉႁိုဝ်”
တင်းလၢတ်ႈတင်းၸႂ်လမ်သေ ၽႃႇၽုင်လုၵ်ႈႁဵၼ်း ဢၼ်သူၼ်ၸႂ်တူၺ်းၶူးၶဝ်ထဵင်ၵၼ်ၼၼ်ႉၵႂႃႇယူႇယဝ်ႉ။ လၢတ်ႈလႆႈဝႃႈ ႁူင်းႁဵၼ်းလင်ၼႆႉ ပဵၼ်ဢၼ်ၺၢမ်ႉတေႉတေႉၼၼ်ႉယဝ်ႉ၊ တေႃႈၼင်ႇၶူးယင်းမႃးထဵင်ၵၼ်တေႃႇၼႃႈလုၵ်ႈႁဵၼ်းၸိူင်ႉၼႆ၊ ပဵၼ်ၶူးၵမ်းလဵဝ် ဢမ်ႇဝူၼ်ႉၽွင်ႈႁႃႉဝႃႈ လုၵ်ႈႁဵၼ်းတေဝူၼ်ႉၸိူင်ႉႁိုဝ် မိူဝ်ႈႁၼ်ၶူးမေႃးၵၼ်ၸိူင်ႉၼႆ ၶႃႈတႄႉဢမ်ႇၶႂ်ႈလၢတ်ႈၵႂၢမ်းသင်ယဝ်ႉ။
ၶႃႈၼၼ်ႉၵေႃႈဢမ်ႇႁူႉဝႃႈဝႃႇသၼႃႇႁိုဝ် တၢင်းယၢမ်ႈမၼ်းႁိုဝ် တီႈလႂ်ၵူၼ်းၽိတ်းၵၼ်၊ ၵူၼ်းမေႃးၵၼ်ၵေႃႈ သမ်ႉၶႂ်ႈႁူႉၶႂ်ႈႁၼ်ၼႃႇ မိူဝ်ႈဢၼ်ပၢင်ပိူၼ်ႈယၢႆႈၵႂႃႇယဝ်ႉၼၼ်ႉၵေႃႈ သႂ်လႅင်းၼႅတ်ႈမႃးႁွင်ႉၶႃႈ ၵႂႃႇၸူးၼူၼ်းမူဝ် ယူႇယဝ်ႉ။
“ဢေးၼူၼ်းႁွင်ႉႁဝ်းမႃးႁဵတ်းသင်လႃႇ!” ပဵၼ်ပွၵ်ႈဢွၼ်တၢင်းသုတ်း ဢၼ်ၶႃႈႁွင်ႉၸိုဝ်ႈၶဝ်ဢွၵ်ႇမႃး လႄႈ ႁွင်ႉလူၺ်ႈဢမ်ႇတၼ်းတင်ႈၸႂ်မိူၼ်ၵၼ်။
“သူႁွင်ႉႁဝ်းၸိူင်ႉၼႆမၼ်းလၢၵ်ႇလၢႆးၸိူင်ႉႁိုဝ်ဝႆႉဢမ်ႇႁူႉယဝ်ႉ”
သႂ်လႅင်းၼၼ်ႉၵေႃႈ မႃးတွႆႇၶႃႈသေယဝ်ႉ “ယွၼ်ႉသင်ၸွင်ႇႁူႉႁႃႉ ဢမ်ႇတွၼ်ႉမီးၽႂ်ႁွင်ႉမၼ်းဝႃႈဢေးၼူၼ်းႁေပွၵ်ႈၼၼ်ႉၼႃႇ ၶဝ်ပဵၼ်ၵူၼ်းယဵၼ်ႇငႄႈ တေႃႈၼင်ႇပေႃႈမႄႈယင်းဢမ်ႇတွၼ်ႉႁွင်ႉဢေးလႃႈ ႁွင်ႉၸိုဝ်ႈဢဝ်လၢႆလၢႆ”
“ဢမ်ႇဝႃႈယူဝ်ႉ တိုၼ်းမီးယူႇၵႂႃႈၵူၼ်းယၢမ်ႈႁွင်ႉမၼ်း ႁွင်ႉဢေးမၼ်းၵေႃႈဢမ်ႇၸႂ်ႈၶေႃႈၵႂၢမ်းလိူင်းၸိူင်းသင်လူး ၸဵမ်လဵၵ်ႉတေႃႇယႂ်ႇ တိုၼ်းမီးယူႇၵႃႈ”
“သႂ်လႅင်းၼႆႉၵေႃႈ ႁၢင်ႈမေႃသႂ်ႇမွၵ်ႇသႂ်ႇမႂ်မၼ်းၼႃႇ ၼၢႆးႁဝ်းၵေႃႈႁွင်ႉယူႇၵူၺ်း ႁဝ်းလႆႈငိၼ်းသူႁွင်ႉယဝ်ႉမၼ်းလၢၵ်ႇလၢႆးဝႆႉလႄႈ ႁဝ်းၵေႃႈလႆႈၸႂ်ယူႇမိူၼ်ၵၼ် မိူၼ်ႁဝ်းၸမ်ၸႂ်ၵၼ်မႃးထႅင်ႈဢိတ်ႉၼိုင်ႈ ဢမ်ႇဝႃႈၼၼ်ႁႃႉ သႂ်လႅင်း”
“ၸႂ်ႈယဝ်ႉ ပေႃးၼၼ်ၵေႃႈႁွင်ႉႁဝ်းဝႃႈဢေးသႂ်ၵေႃႈလႆႈယူႇၼႃ ၽႂ်ဢမ်ႇယၢမ်ႈႁွင်ႉၵဝ်ႇၸိုဝ်ႈၼႆႉတႄႉ ပေႃးသူႁွင်ႉၵေႃႈ တေပဵၼ်ၵေႃႉဢွၼ်တၢင်းသုတ်းၼၼ်ႉၼႃႇ”
“ႁွင်ႉသႂ်လႅင်းၵေႃႈလႆႈယဝ်ႉ.. ယဝ်ႉႁွင်ႉမႃးမီးလွင်ႈသင်လႃႇ!”
“ၼႂ်ၵႆႈမႄႈၸိုၼ်ႈသႂ်..မႃးႁႃႁဝ်းတီႈႁိူၼ်း လၢတ်ႈဝႃႈၶမ်ႈဝႃးမၼ်းဢမ်ႇပွၵ်ႈမိူဝ်းႁိူၼ်းၼႆဝႃႇ.. ပေႃးဝႃႈတႄႉမိူဝ်ႈဝႃးမၼ်းယင်းဢမ်ႇမႃးႁူင်းႁဵၼ်းလူးၵွၼ်ႇ”
“ႁွင်ႉႁဝ်းမႃးယဝ်ႉ လွင်ႈၼႆႉမၼ်းၵပ်းၵၢႆႇသင်တင်းႁဝ်းလႃႇ”
“ပဵၼ်ဢူၺ်းၵေႃႉၵၼ်ယဝ်ႉ မီးလွင်ႈသင်ၵေႃႈ တေလႆႈမေႃၸွႆႈထႅမ်ၵၼ်ၼၼ်ႉၼႃႇ ဢမ်ႇၸႂ်ႈႁႃႉ ၼူၼ်းမူဝ်”
“ၸႂ်ႈယဝ်ႈ! ႁဝ်းဝႃႈမိူဝ်ႈၼႆႉပေႃးဢမ်ႇမႃးႁူင်းႁဵၼ်းတႄႉ တေလႆႈဢွၼ်ၵၼ်ၵႂႃႇၸွမ်းၶႆႈယဝ်ႉ”
“ပဵၼ်ႁူဝ်ၼႃႈႁွင်ႈယဝ်ႉ ပဵၼ်သင်လႄႈ တေလႆႈၵႂႃႇႁႃၸွမ်းၶႆႈၵူၼ်းပႃးလႃႇ မၼ်းၶႂ်ႈၵႂႃႇလႄႈ..မၼ်းၸင်ႇၵႂႃႇၵူၺ်း..ဢမ်ႇၸႂ်ႈႁိုဝ်”
“ဢမ်ႇၸႂ်ႈပုၼ်ႈၽွၼ်းႁူဝ်ၼႃႈႁွင်ႈလေႃႇၼႃႈ ၸွမ်းလူၺ်ႈပဵၼ်ဢူၺ်းၵေႃႉၵၼ်ၼၼ်ႉၼႃႇ မိူၼ်သူၶႂ်ႈပဵၼ်ဢူၺ်းၵေႃႉသႅင်ၶဵဝ်ၼၼ်ႉၼင်ႇၵဝ်ႇဢိူဝ်ႈ၊ ႁဝ်းသွင်ၵေႃႉႁူႉယူႇၼႃႈ ဝႃႈသူႁဵတ်းယွၼ်ႉသင် ဝူၼ်ႉဝႃႈသူပဵၼ်ၵူၼ်းမေႃႁၼ်ထိုင်ၵၢင်ၸႂ်ပိူၼ်ႈလႄႈ လႆႈမႃးလၢတ်ႈၼႄသူၼၼ်ႉၼႃႇ” သႂ်လႅင်းလၢတ်ႈ ပၼ်ဢဝ်ၶႃႈသမ်ႉပေႃးဢမ်ႇၶႂ်ႈလၢတ်ႈသင်ယဝ်ႉ။
“မႃးယူႇၸွမ်းသူၼႆႉ ႁဝ်းဝူၼ်ႉၽိတ်းယဝ်ႉ ႁဵတ်းၵေႃႉၵူၼ်းဢၼ်မီးပၼ်ႁႃလၢႆလၢႆ”
မိူၼ်ဝႃႈမိူဝ်ႈၼႆႉၵေႃႈ ၸိုၼ်ႈသႂ်ၼၼ်ႉဢမ်ႇႁွတ်ႈမႃးႁူင်းႁဵၼ်းတေႉၼင်ႇဝႃႈ ၼၼ်ႉယဝ်ႉ။ ၶၢဝ်းလူင်းႁူင်းႁဵၼ်းယဝ်ႉၵေႃႈ ၶႃႈႁိုဝ်ၸၢင်ႈလႆႈမိူဝ်းႁိူၼ်းၵမ်းလဵဝ်လႃႇ ထုၵ်ႇသႂ်လႅင်းၶႃၼူၼ်းမူဝ် ႁွင်ႉၵႂႃႇၸွမ်းၶႆႈၸိုၼ်ႈသႂ် ၸွမ်းလၢၼ်ႉလဵၼ်ႈၵဵမ်းၼႂ်းဝဵင်းၼၼ်ႉယူႇ၊ ၵူၺ်းၵႃႈဢမ်ႇထူပ်း၊ မိူဝ်ႈတိုၵ်ႉဢွၼ်ၵၼ်ၵႂႃႇၸွမ်းၵၢင်တၢင်းၼၼ်ႉ လႆႈႁၼ်ၽူႈမီးပုၼ်ႈၽွၼ်းၶဝ် ပၼ်ႇလဵပ်ႈယူႇၸွမ်းၸိူဝ်းတၢင်းၼၼ်ႉသေယဝ်ႉ ၼူၼ်းမူဝ်ၼၼ်ႉၵေႃႈ ၼႅတ်ႈလၢၵ်ႈဢဝ်ႁႃးသႂ်လႅင်း ၵႂႃႇတၢင်းႁူင်းပလိၵ်ႈၼၼ်ႉယူႇ။ မိူဝ်ႈႁၼ်ၽူႈမီးပုၼ်ႈၽွၼ်း ဢၼ်ႁဵတ်းၵၢၼ်တေပွၵ်ႈမိူဝ်းၼၼ်ႉၼႆၵေႃႈ လၢတ်ႈတီႈၼူၼ်းမူဝ်ၵႂႃႇ။
“ၸိုၼ်ႈသႂ်မီးယူႇတၢင်းၼႂ်းၼၼ်ႉၼေႈ!”
“လၢတ်ႈပေႃးတၢၼ်ႇဝႃႈၶဝ်မႃးယူႇတႃႇသေႇယဝ်ႉ” ၶႃႈဢၼ်လႆႈငိၼ်းၸိူင်ႉၼၼ်ၵေႃႈ တူၵ်းၸႂ်ဝႆႉယူႇဢိတ်ႉၼိုင်ႈ။
“ပွၵ်ႈၼႆႉၵႂႃႇႁဵတ်းသင်မႃးၶႃႈလႃႇ!”
“ၵိၼ်လဝ်ႈၽိတ်းႁူဝ်ပိူၼ်ႈတႅၵ်ႇ! တေႁႂ်ႈမၼ်းမိူဝ်းငၢႆႈငၢႆႈၼင်ႇၵူႈပွၵ်ႈဢမ်ႇလႆႈယဝ်ႉ မိူဝ်းလၢတ်ႈႁႂ်ႈဢူႈမႄႈၶဝ်မႃးၼႆႉတေလီဢိူဝ်ႈ” လၢတ်ႈယဝ်ႉၵေႃႈပူၼ်ႉၵႂႃႇပႅတ်ႈယူႇ။
ႁဝ်းသၢမ်ၵေႃႉၼၼ်ႉၵေႃႈ လႆႈၶဝ်ႈၵႂႃႇတူၺ်းၼႂ်းႁူင်းပလိၵ်ႈ ဢၼ်လႆႈႁၼ်ၽၢင်ႁၢင်ႈၸိုၼ်ႈသႂ် ၼႃႈၸမ်ႉလိူတ်ႈ ပေႃးၵမ်ႇပေႃးမၢၼ်ႉလူင်ဝႆႉ တႃမိုဝ်းၼၼ်ႉၵေႃႈ ပေႃးလွၵ်ႈလႅင်ဝၢၼ်းဝၢၼ်းယူႇ။
ႁႃးသႂ်လႅင်းၼၼ်ႉၵေႃႈ ယူႇၵႆၵႆသေတူၺ်းယူႇ၊ မီးၼူၼ်းမူဝ်ၼၼ်ႉၵူၺ်း ၶဝ်ႈၵႂႃႇၸူးမၼ်းသေ ဢုပ်ႇမၼ်း။
“ပွၵ်ႈၼႆႉ! မိူၼ်ႁဝ်းတေၸွႆႈသူဢမ်ႇလႆႈယဝ်ႉၼႃႈ! ႁဝ်းတေလႆႈလၢတ်ႈတီႈၼႃႉႁဝ်းယဝ်ႉ”
“ၶဝ်ပဵၼ်ပီႈၼွင်ႉၵၼ်ႁႃႉ!” ၶႃႈၵေႃႈသွပ်ႉသႅပ်ႉထၢမ်ႁိမ်းသႂ်လႅင်းၼၼ်ႉယူႇ။
“ဢိုမ်ႈ..ပဵၼ်လုၵ်ႈပီႈလုၵ်ႈၼွင်ႉၵၼ်!”
“ႁဝ်းတမ်ႉဢမ်ႇၸႂ်ႈပီႈၼွင်ႉၵၼ်တင်းမၼ်းလူး လႅၼ်ၵၼ်မႃးၸွမ်းၶႆႈမၼ်းၸွင်ႇၸႂ်ႈႁိုဝ်”
“ယႃႇပွင်ႉယူႇယဝ်ႉၼႃႈ.. မိူဝ်ႈဢူၺ်းၵေႃႉမီးပၼ်ႁႃၵေႃႈ တေလႆႈမေႃၸွႆႈထႅမ်ၵၼ်ၼၼ်ႉၼႃႇ”
ၸိုၼ်ႈသႂ်ၼၼ်ႉၵေႃႈ တူၺ်းၼႃႈၼူၼ်းမူဝ်ၼင်ႇဢမ်ႇပေႃးသႂ်ႇၸႂ်ႁေၵႃႈႁိုဝ်ယဝ်ႉ
“ဢမ်ႇမႃးၸွႆႈ သမ်ႉတေမႃးႁႃႁဵတ်းသင်လႃႇ တႃႉမႂ်းမိူဝ်းလၢတ်ႈၶဝ် တႃႉႁႂ်ႈၵဝ်ယူႇတီႈၼႆႈဢမ်ႇလီႁိုဝ်!”
“ၼႃႉႁဝ်းၵေႃႈ မႆႈၸႂ်သူတေႉတေႉဢိူဝ်ႈ ၼႅတ်ႈမိူဝ်းထၢမ်တီႈႁဝ်းၸဵမ်ၸဝ်ႉၼေႈၼႂ်ၵႆႈၼႆႉ”
“မႆႈၸႂ်ႁင်လႃႇ! ဢမ်ႇလႆႈပွင်ႉၵဝ်လႄႈ ၸႂ်ဢမ်ႇလီၵူၺ်းတႄႉဢမ်ႇဝႃႈ၊ ၵဝ်ယူႇတီႈၼႆႈ ၵတ်းယဵၼ်ႁူယဵၼ်ၸႂ်လီလိူဝ်သေတီႈႁိူၼ်းၵွၼ်ႇယဝ်ႉ၊ ပေႃးထၢၼ်ႈဝႃႈၶႂ်ႈယူႇႁိူၼ်း၊ ၵဝ်ၵေႃႈဢမ်ႇဢွၵ်ႇႁိူၼ်းမႃးလေႃႇ မိူဝ်းၶိုၼ်းႁေလႃႈ!”
“ၵူၺ်းၵႃႈ!..သူတေယူႇတီႈၼႆႈယူႇတေႉတေႉႁႃႉ!”
“ဢိူဝ်ႈ!! မိူဝ်းလႄႈ ၸူဝ်ႈယင်းတိုၵ်ႉလၢတ်ႈလီယူႇၼႆႉ”
ဢဝ်ၼူၼ်းမူဝ်ၼၼ်ႉ သမ်ႉပေႃးလႆႈသုတ်ႉဢွၵ်ႇမႃးၸူးႁႃးၶိုၼ်း ယူႇယဝ်ႉ။ ၼူၼ်းမူဝ်ၼၼ်ႉၵေႃႈ ထၢမ်တီႈၽူႈမီးပုၼ်ႈၽွၼ်းတႃႇႁႃလၢႆးၸွႆႈထႅမ်မၼ်းဢွၵ်ႇယူႇ၊ ၵူၺ်းၵႃႈ မၼ်းသမ်ႉၵဵဝ်ႇၶွင်ႈပႃးလွင်ႈငိုၼ်း၊ ၵႃႈယူတ်းယႃၵူၼ်း ဢၼ်လႆႈႁပ်ႉတၢင်းၸဵပ်းၼၼ်ႉပႃးလႄႈ ပေႃးပဵၼ်ၸိူင်ႉၼၼ်ၵေႃႈ တေလႆႈႁွင်ႉဢူႈမႄႈမႃးယူႇ။ ယွၼ်ႉပိူဝ်ႈလုၵ်ႈဢွၼ်ႇၸိူင်ႉၼင်ႇႁဝ်းၼၼ်ႉ ဢမ်ႇမီးငိုၼ်းၼမ်တႃႇတေၸၢႆႇပၼ်ၶဝ်လႆႈလူး။
ၼူၼ်းမူဝ်ၼၼ်ႉၵေႃႈ ႁၢင်ႈသဵင်ႈၸႂ်သဵင်ႈၶေႃးသေယဝ်ႉ ဢွၵ်ႇႁူင်းပလိၵ်ႈ ၼင်ႇဢမ်ႇမီးဢဵၼ်မီးႁႅင်းသေဢိတ်းယူႇ။ ၸွမ်းၼင်ႇဢၼ်လႆႈႁၼ်ၸိုၼ်ႈသႂ် ပဵၼ်ၸိူင်ႉၼၼ်ၼၼ်ႉ ၶႃႈၵေႃႈပဵၼ်ဢၼ်ထၢင်ႇပိူင်ႈမႃး လေႃးပႃးလွင်ႈၶႂ်ႈႁူႉၶႂ်ႈႁၼ်ၼၼ်ႉသေ
“ပဵၼ်သင်လႄႈၶဝ်ဢမ်ႇၶႂ်ႈမိူဝ်းႁိူၼ်းလႃႇ!”
“ၶဝ်ၵေႃႈၶႂ်ႈမီးၸၢတ်ႈပၢၼ်ပဵၼ်ၶွင်ၶဝ်ၽွင်ႈ ၸိူင်ႉၼၼ်ၼၼ်ႉၼႃႇ၊ ပႃးၵွပ်ႈႁဝ်းယူႇၽွင်ႈ ယွၼ်ႉႁဝ်းလႆႈလိၵ်ႈလႄႈ ၼႃႉႁဝ်းၼၼ်ႉၵေႃႈ လႆႈၸႂ်ဢဝ်တႅၵ်ႈၼိူင်းၵၼ်တင်းႁဝ်းတႃႇသေႇ၊ ဝၢႆးသေၶိုၼ်ႈၸၼ်ႉယႂ်ႇမႃး ၶဝ်ၵေႃႈဢမ်ႇပေႃးၶႂ်ႈလဵၼ်ႈၵေႃႉႁဝ်းၵႃႈႁိုဝ်ယဝ်ႉ၊ ပေႃးႁဵတ်းဢမ်ႇလႆႈလီ ဢမ်ႇမိူၼ်ၼင်ႇဢၼ်ဢၢင်ႈဢၢၼ်း ၸွမ်းၼင်ႇဢူႈၶဝ်ၶႂ်ႈပဵၼ်လႄႈ ပေႃးႁဵတ်းၽိတ်းမႃးၵေႃႈသမ်ႉၺႃးပေႃႉၺႃးႁႅမ်ၼၼ်ႉၼႃႇ၊ ယွၼ်ႉၼၼ်လႄႈ ၶဝ်ဢမ်ႇၶႂ်ႈလၢတ်ႈၼႄ လွင်ႈဢၼ်ၶဝ်ပဵၼ်ယူႇၼၼ်ႉ ပၼ်ၵူၼ်းတီႈႁိူၼ်း၊ သမ်ႉဝႃႈၶဝ်ဢမ်ႇလႆႈၸႂ်ႁဝ်းသေတႃႉ ႁဝ်းၵေႃႈၶႂ်ႈၸွႆႈၶဝ်လႄႈ ၸင်ႇလႆႈမႃးၼၼ်ႉယိုင် ၵူၺ်းၵႃႈ ႁဝ်းၵေႃႈၸွႆႈၶဝ်ဢမ်ႇလႆႈ”
ယၢမ်းၼၼ်ႉ ၾႃႉၵေႃႈၵၢမ်ႈသုမ်ႇလမ်မႃးယဝ်ႉ ၵူဝ်ၾူၼ်တူၵ်းၼႆလႄႈ သႂ်လႅင်းၼၼ်ႉၵေႃႈ ယိပ်းဢဝ်မိုဝ်းႁဝ်းသေ ဢွၼ်ၵၼ်လႅၼ်ႈလူင်ၵႂႃႇ ၼႂ်းၵၢင်တၢင်း ၼၼ်ႉယဝ်ႉ။ ဢမ်ႇႁူႉဝႃႈၵႂႃႇထိုင်တၢင်းလႂ်ယဝ်ႉ ႁူႉလူဝ်ႇလႅၼ်ႈၵႂႃႇတၢင်းၼႃႈတိၵ်းတိၵ်းၵူၺ်း မိူဝ်ႈဢၼ်တိုၵ်ႉလႅၼ်ႈယူႇၼၼ်ႉ လိူၵ်ႈလိူၵ်ႈသမ်ႉၽႃႇၺႃးမႃပဵၼ်ၽုင်လူင်ဝႆႉယူႇ။
မိူဝ်ႈပဵၼ်ၸိူင်ႉၼၼ် ႁိုဝ်တေလႅၼ်ႈလႆႈယဝ်ႉလႃႇ ယိုင်ႈလႅၼ်ႈယိုင်ႈလမ်းတိၵ်းတိၵ်းၵူၺ်းယဝ်ႉလေႃႇ၊ သႂ်လႅင်းၼၼ်ႉတႄႉ တူဝ်ၶႅင်သမ်ႉပေႃးဢမ်ႇႁတ်းတူင်ႉသေဢိတ်း ၼၼ်ႉယဝ်ႉ။ ၶႃႈၵေႃႈဢဝ်မိုင်လူင်ၵႂႃႇမိူၼ်ၵၼ် ၵူၺ်းၵႃႈၼူၼ်းမူဝ်ၼၼ်ႉတႄႉ ထွတ်ႇဢဝ်ၶႅပ်းတိၼ်မၼ်းၼၼ်ႉသေ ၽၢတ်ႈမႃၼၼ်ႉၵႂႃႇယူႇ၊ မႃၸိူဝ်းၼၼ်ႉၵေႃႈ သုတ်ႉၵႂႃႇတၢင်းလင်ဢိတ်ႉၼိုင်ႈ ၵူၺ်းၵႃႈ ယင်းတိုၵ်ႉတူၺ်းႁေႁဝ်ႇယူႇ ၶႅပ်းတိၼ်ၼူၼ်းမူဝ်ၼၼ်ႉတႄႉ မီးယူႇၼႂ်းၵႄႈမႃၼၼ်ႉယဝ်ႉ၊ တေဢဝ်ၶိုၼ်းၵေႃႈဢမ်ႇၸၢင်ႈ သႂ်လႅင်းၼၼ်ႉၵေႃႈ ဢဝ်တင်းသဵင်လႅမ်လႅမ်ဢွၼ်ႇမၼ်းၼၼ်ႉ ႁိုတ်းသႂ်ႇမႃၸိူဝ်းၼၼ်ႉယဝ်ႉ၊ ၵူၺ်းၵႃႈမႃၵေႃႈဢမ်ႇတူင်ႉသေဢမ်ႇၵႃး ယိုင်ႈၶႅၼ်းလေႃႈမႃးထႅင်ႈ ယိုင်ႈမႃလေႃႈမႃး သဵင်ႁွင်ႉသဵင်ႁႆႈၶႃၼၼ်ႉၵေႃႈမေႃးဢွၵ်ႇမႃးယဝ်ႉ။
ၶႃႈၼၼ်ႉတႄႉ ႁိုဝ်တေႁဵတ်းသင်လႃႇ ႁူၼ်လင်ၵႂႃႇၵမ်းလွႆးလွႆးယဝ်ႉ ထွႆႁၢင်ႇၶႃၵႂႃႇ သမ်ႉပေႃးၶႆႈမီးပဵၼ် 50 မဵတ်ႉၼႆႉသေ ၸုၵ်းတူၺ်းၶႃၵူၺ်း။ မိူၼ်ဝႃႈၾႃႉၵေႃႈၵၢမ်ႈမႃးယဝ်ႉလႄႈ ၶႃႈသမ်ႉၵူဝ်ၾူၼ်သေ ပေႃးဢမ်ႇပူၼ်ႉၵေႃႈ သမ်ႉဢမ်ႇၸၢင်ႈမိူဝ်းႁိူၼ်း ၸင်ႇတေၶုၵ်းၸႂ်လႆႈဝႃႈ တၢင်းလင်ထူင်ပိူဝ်ႉၼၼ်ႉၵွင်ႉၸွင်ႈဝႆႉယူႇ ၶႃႈၵေႃႈ ဢဝ်တင်းၸွင်ႈၼၼ်ႉသေ မႃးၸူးၶႃယဝ်ႉ လိုပ်ႈမႃၸိူဝ်းၼၼ်ႉၵႂႃႇ။
ၶႃသွင်ၵေႃႉၼၼ်ႉၵေႃႈ ၸင်ႇတေၶုၵ်းၸႂ်လႆႈမိူၼ်ၵၼ်၊ ႁဝ်းသၢမ်ၵေႃႉၵေႃႈ လိုပ်ႈမႃၵႂႃႇလႆႈယဝ်ႉ၊ ၼူၼ်းမူဝ်ၼၼ်ႉဢဝ်ၶႅပ်းတိၼ်မၼ်းလႆႈၶိုၼ်းသေ ဢွၼ်ၵၼ်သိုပ်ႇလႅၼ်ႈမိူဝ်းၵႂႃႇထႅင်ႈ။ မိူဝ်ႈပူၼ်ႉဢွင်ႈတီႈၼၼ်ႈယဝ်ႉၼႆၵေႃႈ ႁဝ်းသၢမ်ၵေႃႉၼၼ်ႉတႄႉ ၼင်ႇႁၢင်ႈသမ်ႉပေႃးလူမ်ၸႂ်လူမ်ၶေႃးလူင်ၵႂႃႇသေ ၶူဝ်တေႃႇၵၼ်ယူႇ၊ ဢမ်ႇတၼ်းႁူႉႁင်သဵင်ၶူဝ်ႁဝ်းၼၼ်ႉၵေႃႈ ႁၢႆယဵၼ်ၵႂႃႇ ယွၼ်ႉထိုင်တၢင်းၽႄယဝ်ႉလႄႈ လႆႈၽႄၵၼ်မိူဝ်းႁင်းၽႂ်ႁင်းမၼ်း ယူႇယဝ်ႉ။
ဝၼ်းမိူဝ်ႈၼႆႉ ပဵၼ်ဝၼ်းဢၼ်ၶႃႈလႆႈၶူဝ် လႆႈယုမ်ႉဢွၵ်ႇမႃး မဝ်တူဝ်မဝ်ၸႂ်တေႉယဝ်ႉ၊ မိူဝ်ႈၶႃႈတိုၵ်ႉပႆမူၼ်ႈသိူဝ်းယူႇႁင်းၵူၺ်းလူင်မိူဝ်းၼၼ်ႉ၊ ၾႃႉၵေႃႈၵၢမ်ႈလူင်မႃး ၼႃႈမိူင်းၵေႃႈသမ်ႉပေႃးလမ်သုမ်ႇၶႂ်ႈလပ်းသိင်ႇဝႆႉယူႇယဝ်ႉ။ မိူဝ်ႈပဵၼ်ၸိူင်ႉၼၼ် ၶႃႈၵေႃႈၼႅတ်ႈလႅၼ်ႈလူင်မိူဝ်းဝႆးဝႆးၼင်ႇၵႃႈဝႆးလႆႈယူႇ။
တွၼ်ႈသၢဝ်းသၢမ်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢဝ်းသီႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
