တွၼ်ႈသၢဝ်းဢဵတ်း
ယိုင်ႈႁူပ်ႉထူပ်းၵူၼ်းၼမ်မႃး ၵူၼ်းႁူႉၸၵ်းၼမ်မႃး ဢူၺ်းၵေႃႉဢၼ်ဝႃႈၼၼ်ႉၵေႃႈ တိူဝ်းမီးၼမ်မႃးယူႇယဝ်ႉ။ ၵူၺ်းၵႃႈ ၵူၼ်းၵေႃႉဢၼ် ႁူႉၸၵ်းႁဝ်းလီ၊ ပဵၼ်တီႈဢုပ်ႇၵုမ်ပၼ်ႁဝ်းလႆႈၵူႈလွင်ႈလွင်ႈ၊ ပၼ်ႁႅင်းၸႂ်ႁဝ်းမိူဝ်ႈထူပ်းလွင်ႈၶီ၊ မီးတၢင်းသိူဝ်းၸွမ်းမိူဝ်ႈထူပ်းလွင်ႈလီ၊ ၽႄမႅင်ႇတၢင်းတုၵ်ႉပၼ်ၵၼ်လႆႈႁပ်ႉႁူႉ လွင်ႈမႂ်းဢမ်ႇလီၵေႃႈၵဝ်ၶီ လွင်ႈလီၵဝ်ၵေႃႈမႂ်းသိူဝ်း၊ ႁူပ်ႉလွင်ႈသင်ၵေႃႈ မေႃၸွႆႈထႅမ်ၵၼ် ၼႂ်းဢူၺ်းၵေႃႉတင်းမူတ်းၼၼ်ႉ ၵူၼ်းၸိူင်ႉၼႆ တေႁူပ်ႉလႆႈလၢႆၵေႃႉလႃႇ။
မၢင်ၵေႃႉၵေႃႈ ပဵၼ်ဢူၺ်းၵေႃႉ မိူဝ်ႈတေႃႇၼႃႈ၊ မၢင်ၵေႃႉၵေႃႈ ပဵၼ်ဢူၺ်းၵေႃႉဢဝ်ၸိုဝ်ႈဢဝ်သဵင်၊ မၢင်ၵေႃႉၵေႃႈ ပဵၼ်ဢူၺ်းၵေႃႉၵၼ် မိူဝ်ႈယူႇၸွမ်းၵၼ်၊ မၢင်ၵေႃႉၵေႃႈ ပဵၼ်ဢူၺ်းၵေႃႉၵၼ်မိူဝ်ႈလူဝ်ႇၸိူဝ်းၼႆႉယူႇ။ မၢင်ၵေႃႉၵေႃႈ ပဵၼ်ဢူၺ်းၵေႃႉလီသေ လဵၼ်ႈၵေႃႉၵၼ်၊ ယူႇၸွမ်းၵၼ်၊ ၸႂ်ႉၶၢဝ်းယၢမ်းႁူမ်ႈၵၼ် မိုတ်ႈၵိုဝ်းၵၼ် သၢင်ႈပၼ်လွင်ႈၸမ်ၸႂ်ဢၼ်လီလီ၊ မၢႆတွင်းဢၼ်လီလီ ဢၼ်ႁႃယၢပ်ႇလႄႈ မၢႆတွင်းဢၼ်ဢမ်ႇမေႃလိုမ်းၼၼ်ႉယူႇ။
ၵိၼ်ၶဝ်ႈဝၼ်းယဝ်ႉၼႆၵေႃႈ ၶဝ်ၸိူဝ်းၼၼ်ႉ ယင်းဢမ်ႇပႆႇၶၢႆႉတီႈယူႇၶဝ် ၶႃႈတေၼင်ႈငႅၵ်ႈႁိုဝ် တေငူပ်ႉၼႃႈၵေႃႈဢမ်ႇၸၢင်ႈယဝ်ႉ။ ယိုင်ႈလိုပ်ႈယိုင်ႈယူႇတိၵ်းတိၵ်း ၶၢၼ်ႉႁၼ်ၼႃႇယဝ်ႉလႄႈ ၶႃႈၵေႃႈ ဢွၵ်ႇႁွင်ႈမႃး ပၢႆႈၶဝ်ၵႂႃႇႁႃတီႈယူႇၼႂ်းသႃလႃးတၢင်းလင်ႁူင်းႁဵၼ်းၼၼ်ႉၼႆယူႇ၊ လိူၵ်ႈလိူၵ်ႈသမ်ႉ လႆႈႁၼ်မႅၼ်ႈ ဢၢႆႈဢွင်ႇလႄႈ ဝၼ်းလၢဝ်ၼၼ်ႉ တင်းပွင်ႉတင်းလႃႇ ၸၢႆးသႅင်ၶဵဝ်ယူႇ။
“ၵဝ်ႁူႉယူႇၼႃႈဝႃႈၼႆႉဢမ်ႇၸႂ်ႈၶဝ်ႈၽၵ်းဢၼ်မႄႈသူႁဵတ်း! မႂ်းတင်ႈၸႂ်ႁဵတ်းမႃးႁႂ်ႈၵဝ်ၵိၼ်ၸွင်ႇၸႂ်ႈ ၵဝ်ၵိၼ်ဢမ်ႇလူင်းၶေႃးယဝ်ႉ” ဢၢႆႈဢွင်ႇၼၼ်ႉၵေႃႈ ဢီးသႅင်ၶဵဝ်ၼင်ႈလူမ်ႉလူင်းၼိူဝ်ပိုၼ်ႉၼၼ်ႉသေ ဢဝ်တိၼ်မၼ်းယဵပ်ႇသႂ်ႇႁူဝ်မႃႇသႅင်ၶဵဝ် ၼင်ႇၸႂ်လမ်တေႉတေႉၼၼ်ႉယဝ်ႉ မိုဝ်းမၼ်းၶွၼ်ၼိုင်ႈၼၼ်ႉၵေႃႈ ယိပ်းၵွၵ်းၽၵ်းၼၼ်ႉသေယဝ်ႉ ဢဝ်ႁၢတ်ႇသႂ်ၼႃႈသႅင်ၶဵဝ်ၼၼ်ႉႁႅင်းႁႅင်းထႅင်ႈသေ မႄးထိပ်ႇဢီးမၼ်းသမ်ႉပေႃးလူမ်ႉၼွၼ်းလူင်ၵႂႃႇယူႇ။
“ပေႃးဝႃႈမႂ်းဢမ်ႇႁႂ်ႈမႄႈမႂ်းၵေႃႉႁဵတ်းၽၵ်းမႃးပၼ် ၵဝ်တေလၢတ်ႈႁႂ်ႈဢူႈၵဝ် လိုပ်ႈမႄႈမႂ်းဢွၵ်ႇလၢၼ်ႉၵႂႃႇၼၼ်ႉယဝ်ႉ” ဝၼ်းလၢဝ် ဢၼ်ပဵၼ်ဢူၺ်းၵေႃႉ ဢၢႆႈဢွင်ႇၼၼ်ႉၵေႃႈလၢတ်ႈယူႇ။
ပေႃးဝႃႈတေႉ ဝၼ်းလၢဝ်လႄႈဢၢႆႈဢွင်ႇၼၼ်ႉ မိူၼ်တေပဵၼ်လုၵ်ႈၵူၼ်းမီးငိုၼ်းၼင်ႇၵၼ်လႄႈ ပဵၼ်ဢူၺ်းၵေႃႉၵၼ်သေ တေဢွၼ်ၵၼ်ပေႉၵိၼ်သႅင်ၶဵဝ်ယူႇတႃႇသေႇ ၼၼ်ႉယဝ်ႉ။ ၵေႃႉၼိုင်ႈၼင်ႈတၢင်းလင် ၵေႃႉၼိုင်ႈၼင်ႈတၢင်းၼႃႈ ၸၢႆးသႅင်ၶဵဝ်သမ်ႉယူႇၼႂ်းၵၢင်ၶႃၼၼ်ႉယိုင်၊ ပေႃးဝႃႈၶူးၸႂ်ႉႁဵတ်းၵၢၼ်ႁိူၼ်းၼႆၵေႃႈ ၶႃသွင်ၵေႃႉၼၼ်ႉတႄႉ ႁႂ်ႈၸၢႆးသႅင်ၶဵဝ်ၵေႃႉႁဵတ်းပၼ်ၵူၺ်း ဢမ်ႇတွၼ်ႉႁဵတ်းသင်ႁင်းၵူၺ်းႁေပွၵ်ႈ။ ၶႃႈၵေႃႈႁူႉယူႇဝႃႈ ၶဝ်ၵႆႉပေႉၵိၼ်သႅင်ၶဵဝ် ၵူၺ်းၵႃႈ ဢမ်ႇထၢင်ႇဝႃႈတေႁဵတ်းႁၢႆႉႁႅင်းထိုင်တၢၼ်ႇၼႆႉ ႁၼ်ယဝ်ႉၵေႃႈလီၸဵပ်းၸႂ်တေႉယဝ်ႉ။
ပေႃးပိူၼ်ႈႁဵတ်းႁၢႆႉၶဝ်တႄႉ ဢူႈမႄႈၶဝ်တေဢွၼ်ၵၼ်မႃးႁွတ်ႈထိုင်ႁူင်းႁဵၼ်းႁေ တေဢဝ်တၢင်းၽိတ်းပိူၼ်ႈႁႂ်ႈပေႃးလႆႈၼၼ်ႉယဝ်ႉ။ ပေႃးဝူၼ်ႉတူၺ်းၵေႃႈလီၶႂ်ႈၶူဝ်တေႉယဝ်ႉဝႃႈ ၵူၼ်းမီးငိုၼ်း တိုၼ်းႁဵတ်းလႆႈၵူႈလွင်ႈတေႉလူင်၊ ပဵၼ်သင်ဢမ်ႇမီးၵူၼ်းမီးငိုၼ်း မီးၼမ်ႉၸႂ်ၽွင်ႈႁႃႉ၊ ၵူၼ်းၸိူင်ႉၼႆ ပၵ်းပိူင်ၼႂ်းႁူင်းႁဵၼ်းၼၼ်ႉ ႁဵတ်းသင်ၶဝ်ဢမ်ႇလႆႈယူႇယဝ်ႉ၊ သမ်ႉဝႃႈၽိတ်းတၢၼ်ႇလႂ်ၵေႃႈ ဢမ်ႇမီးၽႂ်ႁတ်းႁဵတ်းၶဝ် ပႃးၸဵမ်ၶူးလူင်၊ ၵူၺ်းၵႃႈ မၼ်းၵေႃႈတိုၼ်းတေမီးယူႇ ၵူၼ်းဢၼ်တေပၼ်တၢမ်ႇၵူၼ်းၸိူင်ႉၼင်ႇၶဝ်ၼၼ်ႉလႆႈ။
သမ်ႉဝႃႈဢမ်ႇသူၼ်ၸႂ်သုၵ်ႉယုင်ႈလွင်ႈပိူၼ်ႈသေတႃႉ ၵူၺ်းၵႃႈ ဢၢႆႈဢွင်ႇၼၼ်ႉ မၼ်းမႃးႁဵတ်းႁႂ်ႈၶႃႈ ဢမ်ႇသုၵ်ႉယုင်ႈဢမ်ႇလႆႈ ယွၼ်ႉမၼ်းၵေႃႈ ယၢမ်ႈႁဵတ်းတီႈၶႃႈဝႆႉယူႇလူး ၶႃႈယင်းပႆႇတၼ်းဢဝ်ၶိုၼ်းလႃႈ။ ဢမ်ႇဝႃႈၸိူင်ႉႁိုဝ် ၶႃႈတေဢဝ်ၶိုၼ်းႁႂ်ႈလႆႈၼၼ်ႉယဝ်ႉ။ လိူဝ်သေၶႃႈယဝ်ႉ ၼႂ်းႁူင်းႁဵၼ်းၼႆႉ ၶႃႈယုမ်ႇဝႃႈတိုၼ်းတေမီးၵူၼ်းၸင်းၶဝ်ထႅင်ႈယူႇ။
ၵူၺ်းၵႃႈ ပဵၼ်သင်လႄႈတေလႆႈၵူဝ်ၵူၼ်းၸိူင်ႉၼၼ်လႃႇ ၵူၼ်းၸိူင်ႉၼၼ်ထုၵ်ႇလီပၼ်တၢမ်ႇ ႁႂ်ႈၵိုင်ႇတၢင်းလွင်ႈႁဵတ်းသၢင်ႈၶဝ် ဢၼ်ၶဝ်ထုၵ်ႇလီလႆႈႁပ်ႉၼၼ်ႉယဝ်ႉ။ ပေႃးဢမ်ႇမီးၽႂ်ပၼ်ၶဝ်လႆႈၵေႃႈ ၶႃႈၵေႃႉတေႁႃလွၵ်းလၢႆးပၼ်ၵူၺ်း မၼ်းတေမီးယူႇၵႂႃႈ လၢႆးလီလီမၼ်းတႄႉ။
မိူဝ်ႈၶဝ်ႈၵႂႃႇၼႂ်းႁွင်ႈႁဵၼ်းၼၼ်ႉၵေႃႈ ၸၢႆးသႅင်ၶဵဝ်ၼၼ်ႉတႄႉ ႁိုဝ်တေႁတ်းဝၢႆႇတူၺ်းၼႃႈၶႃႈသေဢိတ်း။ ၶႃႈၵေႃႈဢမ်ႇႁူႉဝႃႈယွၼ်ႉသင် မၼ်းတေမီးလွင်ႈမီးတၢင်းမၼ်းယူႇၵူၺ်းၼင်ႇၵဝ်ႇ ၶႃႈႁၼ်ၶဝ်ပဵၼ်ၸိူင်ႉၼၼ်ယဝ်ႉ ပဵၼ်ဢၼ်ႁၼ်ၸႂ်မၼ်းမႃးမိူၼ်ၵၼ်။
ၽွင်းၼႆႉၵေႃႈ မိူၼ်ၵၢၼ်ႁဵၼ်းၶႃႈၼၼ်ႉ ၶိုတ်းပိူၼ်ႈမႃးယဝ်ႉ ၵႂႃႇလႆႈလီယူႇ။ ပေႃးၶူးပၼ်ၵၢၼ်ႁိူၼ်း ႁႂ်ႈႁဵတ်းၼႆၵေႃႈ ၼင်ႇႁိုဝ်တေဢမ်ႇလႆႈမိူဝ်းသုၵ်ႉသၵ်ႉ ၶၢဝ်းယၢမ်းတီႈႁိူၼ်းၼၼ်ႉ ပေႃးမီးၶၢဝ်းယၢမ်းၵေႃႈႁဵတ်းတီႈႁူင်းႁဵၼ်းႁေ၊ ၵၢၼ်ႁိူၼ်းၵမ်ႈၼမ်ၵေႃႈပဵၼ်ပၢႆးၼပ်ႉၼၼ်ႉယဝ်ႉ။ ပေႃးတင်ႈၸႂ်ႁဵၼ်းၸွမ်းၼင်ႇဢၼ်ၶူးၶဝ်သွၼ် ပွင်ႇၸႂ်ယဝ်ႉၼႆၵေႃႈ ႁဵတ်းငၢႆႈယူႇၵူၺ်းၼင်ႇၵဝ်ႇ၊ ပေႃးဢမ်ႇပွင်ႇၸႂ်ၵေႃႈ ထၢမ်ပိူၼ်ႈဢိတ်းဢွတ်းႁေၵေႃႈယဝ်ႉယဝ်ႉ။ ၵၢင်ၶမ်ႈၵေႃႈ ဢမ်ႇပေႃးလႆႈတူၺ်းလိၵ်ႈၼမ်ၵႃႈႁိုဝ် လူဝ်ႇဢၢၼ်ႇဢၼ်ၶူးႁႂ်ႈဢဝ်ဢူမ်သူပ်းၼၼ်ႉၵူၺ်း၊ ပေႃးလႆႈၸွမ်းတွင်းၸွမ်း ဢၼ်ၶူးသွၼ်ၵူႈဝၼ်းၵူႈဝၼ်းၼၼ်ႉၵူၺ်းၵေႃႈ ဢမ်ႇယၢပ်ႇၵႃႈႁိုဝ်ယဝ်ႉ မိူၼ်ဝႃႈ ၶႃႈၵေႃႈယူႇၸွမ်းမၼ်းမႃးလႆႈယဝ်ႉ။
ဝၼ်းယဝ်ႉဝၼ်းပူၼ်ႉၵႂႃႇ ၶႃႈၵေႃႈမိူၼ်တေပဵၼ်လုၵ်ႈႁဵၼ်း မိူၼ်ပိူၼ်ႈမႃးယဝ်ႉလႄႈ ၶူးၶဝ်ၵေႃႈ ဢမ်ႇပေႃးၵႆႉႁွင်ႉၵႆႉပွင်ႉၶႃႈၵႃႈႁိုဝ်ယဝ်ႉ။ ၵူၺ်းၵႃႈ မၼ်းၵေႃႈဢမ်ႇၸႂ်ႈဝႃႈၶႃႈၼၼ်ႉ တေပဵၼ်လုၵ်ႈႁဵၼ်းလီမႃးႁေၵႃႈႁိုဝ်ၼင်ႇၵဝ်ႇ။
မိူဝ်ႈဢၼ်ပိူၼ်ႈတေလူင်းႁူင်းႁဵၼ်းၼၼ်ႉ ၶႃႈၵေႃႈ ၵႂႃႇၸူးၼူၼ်းမူဝ်ၶဝ်ႁေ
“သူ!..ၶႂ်ႈမီးဢူၺ်းၵေႃႉဢမ်ႇၸႂ်ႈႁႃႉ!”
ၼူၼ်းမူဝ်ၼၼ်ႉၵေႃႈ ယၵ်ႉတူၺ်းၼႃႈၶႃႈသေယဝ်ႉ “သူယွမ်းႁပ်ႉႁဝ်းယဝ်ႉၵႃႈ!”
“ဢမ်ႇ!..”
“ယဝ်ႉ..သူသမ်ႉၶႂ်ႈဝႃႈၸိူင်ႉႁိုဝ်လႃႇ!” သႂ်လႅင်းထၢမ်။
“ႁဝ်းဝႃႈသူလႅပ်ႈတေပဵၼ်ဢူၺ်းၵေႃႉပိူၼ်ႈလႆႈၵူႈၵေႃႉယူႇ ၼႆလႄႈ ၶႂ်ႈၼႄႉၼမ်းႁႂ်ႈသူၵႂႃႇႁဵတ်းၵေႃႉၵူၼ်းတၢင်ႇၵေႃႉၽွင်ႈ လိူဝ်သေႁဝ်း”
“ၸိူင်ႉၼႆၵေႃႈမီးႁႃႉ သူၼႆႉမၼ်းယွင်ႇတေႉတေႉလူး” သႅင်ႁၵ်ႉလၢတ်ႈယူႇ။
“ၽႂ်လႃႇ” ၼူၼ်းမူဝ်လၢတ်ႈၸူးၶိုၼ်းၼင်ႇၸႂ်ယဵၼ်။
ၶႃႈၵေႃႈၸီႉၵႂႃႇတီႈသႅင်ၶဵဝ်ၼၼ်ႉသေ ၶဝ်ၵေႃႈ လၢၵ်ႈၸၼ်ဢဝ်ၶႃႈဢွၵ်ႇႁွင်ႈၵႂႃႇယဝ်ႉ။
“ယွင်ႇယဝ်ႉၼႄႇ သူတေႁႂ်ႈႁဝ်းၵႂႃႇလဵၼ်ႈၵေႃႉသႅင်ၶဵဝ်ၼၼ်ႉၼႃ သူဢမ်ႇႁူႉႁႃႉ မိူဝ်ႈလႂ်လဵၼ်ႈၵေႃႉၶဝ်ယဝ်ႉ တေပဵၼ်ၸိူင်ႉႁိုဝ်မႃးၼႆ” ၶမ်းၽွင်လၢတ်ႈၸူးၼင်ႇၵူဝ်တေႉၵူဝ်ဝႃႈၼၼ်ႉယူႇ။
“ဢမ်ႇႁူႉ..ယဝ်ႉ..ပဵၼ်သင်လႄႈတေလႆႈႁူႉ ပဵၼ်ဢူၺ်းၵေႃႉၵၼ်တင်းၶဝ် မၼ်းၽိတ်းပိူင်ၵူၼ်းတီႈလႂ်လႃႇ!”
“ၸွင်ႇသူႁူႉႁိုဝ် ယွၼ်ႉသင်လႄႈ မၼ်းလႆႈယူႇၸွမ်းဢၢႆႈဢွင်ႇၶႃဢၢႆႈဝၼ်းလၢဝ်တႃႇသေႇ ယွၼ်ႉပိူဝ်ႈမၼ်းပဵၼ်ဢူၺ်းၵေႃႉၶဝ်ၼၼ်ႉၼႃႇ ပေႃးၵႂႃႇသုၵ်ႉယုင်ႈၵေႃႈ ၶဝ်တေၸၢင်ႈမႃးႁဵတ်းႁၢႆႉႁဝ်းလႆႈဢိူဝ်ႈ!” သႅင်ႁၵ်ႉလၢတ်ႈၼႄယူႇ။
“သူၵူဝ်ၶဝ်ၸိူဝ်းၼၼ်ႉႁႃႉ!” ၶဝ်ၵေႃႈဢမ်ႇတွပ်ႇၶိုၼ်း ၶႃႈၸင်ႇလၢတ်ႈထႅင်ႈ “ႁဝ်းႁူႉယဝ်ႉ ယွၼ်ႉသင်လႄႈ ၶဝ်လႆႈထူပ်းလွင်ႈၸိူင်ႉၼၼ် ယွၼ်ႉမီးၵူၼ်းႁၼ်သုၼ်ႇတူဝ် ၸိူင်ႉၼင်ႇသူၶဝ်ၼႆႉၵူၺ်းၼႃႇ”
“သူလၢတ်ႈလိူဝ်ၼႃႇပူၼ်ႉတီႈယဝ်ႉ” ၶမ်းၽွင်ၵေႃႈ ၶိုၼ်ႈသဵင်သႂ်ႇၶႃႈမႃးယဝ်ႉ။
မိူဝ်ႈလၢတ်ႈထိုင်လွင်ႈၼႆႉ ၼူၼ်းမူဝ်လႄႈသႂ်လႅင်းၼၼ်ႉတႄႉ ဢမ်ႇပႆႇတၵ်းသဵင်သင်၊ ၶႃႈၼၼ်ႉၵေႃႈ ၸွမ်းၼင်ႇသူပ်းဝႆးလႄႈ လႆႈလၢတ်ႈၵႂႃႇထႅင်ႈ ၼင်ႇဢမ်ႇသူၼ်ၸႂ်ၽႂ်ယဝ်ႉဝႃႈ။
“ယွၼ်ႉသင်လႄႈႁဝ်းဢမ်ႇၶႂ်ႈမီးဢူၺ်းၵေႃႉ ၸွင်ႇႁူႉႁိုဝ် ႁဝ်းၵူဝ်ဝႃႈတေထူပ်းၵူၼ်းၸိူင်ႉၼင်ႇသူၼႆႉၼၼ်ႉၼႃႇ! မၼ်းမိူၼ်ႁိုဝ်ဝႆႉ ၸွင်ႇႁူႉႁႃႉ သူၵေႃႈပဵၼ်ၵူၼ်းဢၼ်လီတေႃႇၵၼ်လႆႈမိူဝ်ႈလီၵူၺ်း မိူဝ်ႈထူပ်းတၢင်းယၢပ်ႇၽိုတ်ႇတုၵ်ႉၵိၼ်းမႃးၼၼ်ႉ သူၵေႃႈတေပဵၼ်ၵူၼ်းဢၼ်တေလၢတ်ႈဝႃႈ ႁဝ်းၵူဝ်၊ ႁဝ်းမီးတၢင်းလူဝ်ႇ၊ ႁဝ်းႁဵတ်းဢမ်ႇလႆႈ ၶေႃႈၵႂၢမ်းဢၼ်သူတေလၢတ်ႈဢွၵ်ႇလႆႈလီလိူဝ်ပိူၼ်ႈၵေႃႈ ယွမ်းၼွမ်းမွၵ်ႈၼၼ်ႉၵူၺ်း ဢမ်ႇၸႂ်ႈႁိုဝ်၊ ၸႂ်ႈယူႇလႂ်ၽႂ်ၽႂ်ၵေႃႈ ဢဝ်တူဝ်ၵဝ်ႇဝႆႉပဵၼ်ပိူင်လူင်ယူႇယဝ်ႉလူး၊ ပေႃးဝႃႈမၼ်းတေမႃးတုမ်ႉတိူဝ်ႉသုၼ်ႇလႆႈတူဝ်ၵဝ်ႇၼႆ ၽႂ်ႁိုဝ်တေၶႂ်ႈႁဵတ်းလႃႇ ႁၵ်ႉတူဝ်ႁၵ်ႉၸႂ်သူၼမ်ၼမ်လႄႈၼႃႈ ၵူဝ်လိူတ်ႈတူၵ်းယၢင်ဢွၵ်ႇ”
ၶႃႈၵေႃႈၸႂ်လမ်ႁေ ဢဝ်ထူင်ၶႃႈယဝ်ႉ ဢွၵ်ႇႁွင်ႈႁဵၼ်း ၵႂႃႇပႂ်ႉၶဝ်ႈထႅဝ်ယူႇၼႃႈၸွမ်ပိဝ်ၼၼ်ႉပႅတ်ႈၶဝ်ယူႇ။
ဝၢႆးသေပူတ်းၸွမ်ပိဝ်ယဝ်ႉမိူဝ်ႈၶႃႈပႆမိူဝ်းၵႂႃႇလွႆးလွႆးႁင်းၵူၺ်းၼၼ်ႉၵေႃႈ လႆႈငိၼ်းသဵင်ႁွင်ႉမေႃးမႃး
“ဢေးယိင်း! ပႂ်ႉႁဝ်းၽွင်ႈလႄႈ” မိူဝ်ႈၶႃႈဝၢႆႇတူၺ်း လႆႈႁၼ်ၼူၼ်းမူဝ်ၶႃ သႂ်လႅင်းလႅၼ်ႈလမ်းၸွမ်းၶႃႈမႃးသေယဝ်ႉ မိူဝ်ႈလမ်းၶႃႈၶိုတ်းယဝ်ႉၼႆၵေႃႈ သႂ်လႅင်းၼၼ်ႉ မႃးယိပ်းဢဝ်မိုဝ်းၶႃႈ ၼင်ႇဝႃႈမိုတ်ႈၵၼ်ၼႃႇၼၼ်ႉႁေ
“မိူဝ်ႈလႂ်သူႁၼ်ဝႃႈႁဝ်းပဵၼ်ဢူၺ်းၵေႃႉသူယဝ်ႉ သူပဵၼ်ဢူၺ်းၵေႃႉတင်းၽႂ်ၵေႃႈ ဢူၺ်းၵေႃႉသူၵေႃႈမိူၼ်ဢူၺ်းၵေႃႉႁဝ်းၵူၺ်း”
“ၸႂ်ႈယဝ်ႉ! ႁဝ်းၵေႃႈဝႃႈၼၼ်”
“ၶႂ်ႈဝႃႈၸိူင်ႉႁိုဝ်လႃႇ ပေႃးႁဝ်းႁပ်ႉသူပဵၼ်ဢူၺ်းၵေႃႉယဝ်ႉ သူၵေႃႈတေလဵၼ်ႈၵေႃႉတင်းသႅင်ၶဵဝ်ၸိူင်ႉၼၼ်ၵႃႈ သူဢမ်ႇၵူဝ်ဢၢႆႈၶႃသွင်ၵေႃႉၼၼ်ႉၽွင်ႈၼႄႇ”
“တေႃႈၼင်ႇသူယင်းဢမ်ႇၵူဝ် ႁဝ်းမီးသူပဵၼ်ၵေႃႉတေၵူဝ်လႆႈၸိူင်ႉႁိုဝ်လႃႇ”
ၶႃသွင်ၵေႃႉၼႆႉ ဢမ်ႇၸႂ်ႈဝႃႈၶႂ်ႈပဵၼ်ဢူၺ်းၵေႃႉၶႃႈၼႃႇႁေ ထိုင်တီႈယွမ်းႁဵတ်းၵူႈလွင်ႈၸိူင်ႉၼၼ်ႁႃႉ။ မိူဝ်ႈလႆႈႁၼ်ၽၢင်ႁၢင်ႈ သႅင်ၶဵဝ်မိူဝ်ႈၵၢင်ဝၼ်းၼၼ်ႉ ႁဵတ်းႁႂ်ႈၶႃႈ တေထဵင်ၶႃသွင်ၵေႃႉၼၼ်ႉဢမ်ႇလႆႈမိူၼ်ၵၼ်၊ သင်ဢမ်ႇသင် ပေႃးဝႃႈ ၶဝ်မီးဢူၺ်းၵေႃႉၸွႆႈထႅမ်ၶဝ်ယူႇၼႆ တေၸၢင်ႈၸွႆႈၶဝ်ဢွၵ်ႇပူၼ်ႉ ဢၢႆႈၶႃသွင်ၵေႃႉၼၼ်ႉလႆႈယူႇ ၼႆႉၵေႃႈပဵၼ်ဢၼ်ၶႃႈဝူၼ်ႉလႆႈၼၼ်ႉယဝ်ႉ။ ၵူၺ်းၵႃႈ မၼ်းၵေႃႈမိူၼ်ပဵၼ်ၵၢၼ်ပိုၼ်ၽၢဝ်ႇႁဵတ်းၶဵၼ်ၵၼ်တင်း ဢၢႆႈဢွင်ႇၶႃၼၼ်ႉယူႇ၊ သမ်ႉဝႃႈမီးငိုၼ်းၶမ်းသေတႃႉ ဢမ်ႇလႆႈပွင်ႇဝႃႈ တေမီးပၢႆးဝူၼ်ႉႁေၵႃႈႁိုဝ်ၼင်ႇၵဝ်ႇ၊ သင်မၼ်းမေႃဝူၼ်ႉ တေဢမ်ႇမႃးႁႃလွင်ႈသုၵ်ႉယုင်ႈပိူၼ်ႈ ပၼ်တၢင်းယၢပ်ႇၽိုတ်ႇပိူၼ်ႈၸိူင်ႉၼႆ။
ထိုင်မႃးထႅင်ႈဝၼ်းၼိုင်ႈ ထိုင်ၶၢဝ်းၵိၼ်ၶဝ်ႈဝၼ်းၵၼ်ယဝ်ႉၼႆၵေႃႈ ဢၢႆႈဢွင်ႇၶႃ ဝၼ်းလၢဝ်ၼၼ်ႉတႄႉ ဢွၼ်ၵၼ်ၵွင်ႉၶေႃးသႅင်ၶဵဝ်လူင်ဢွၵ်ႇၵႂႃႇၸွမ်းၵၼ်ယူႇ။ ယၢမ်းၼၼ်ႉ ၶႃႈၵေႃႈ လမ်းၸွမ်းၶဝ်သေယဝ်ႉ
“သႅင်ၶဵဝ်! ႁူဝ်ၼႃႈမီးလွင်ႈတေလၢတ်ႈဝႃႇ!”
ၶႃသွင်ၵေႃႉဢၢႆႈဢွင်ႇၼၼ်ႉၵေႃႈ တူၺ်းၼႃႈၶႃႈသေယဝ်ႉ “ဢမ်ႇႁူႉႁႃႉၶၢဝ်းပိူၼ်ႈၵိၼ်ၶဝ်ႈဝၼ်းယဝ်ႉၼႆ မၼ်းတေႁွင်ႉႁဵတ်းသင်လႃႇ လၢတ်ႈမၼ်းသေလႄႈ ဢၢႆႈသႅင်ၶဵဝ်မၼ်းဢမ်ႇတၼ်း!”
ၶႃႈၵေႃႈၼႅတ်ႈလႅၼ်ႈၵႂႃႇၵႅတ်ႇၶႃဝႆႉသေယဝ်ႉ လၢၵ်ႈၸၼ်ဢဝ်သႅင်ၶဵဝ်ၼၼ်ႉဢွၵ်ႇမႃး။ ၵူၺ်းၵႃႈ ဢမ်ႇထၢင်ႇဝႃႈ ၶႃႈတေထုၵ်ႇမၼ်းထဵင်ၶိုၼ်းၵႂႃႇတေႃႇၼႃႈတေႃႇတႃ
“မီးလွင်ႈသင်ၵေႃႈ ပေႃးၵမ်ႉၸွင်ႇၵွႆႈလၢတ်ႈလႄႈ ႁဝ်းၵႂႃႇယဝ်ႉ” ၵူမ်ႈၼႃႈၵူမ်ႈတႃ လေႃးပႃးလွင်ႈၵူဝ်သေ လၢတ်ႈၸူးၶႃႈယူႇ။ ၶႃသွင်ၵေႃႉၼၼ်ႉၵေႃႈ ၶူဝ်ပၼ်ၼႃႈၶႃႈလင်လင်ႁေယဝ်ႉ လၢတ်ႈၸူးၶႃႈၶိုၼ်း “ႁၼ်ႁိုဝ်..မၼ်းဢမ်ႇတၼ်း!”
ၶူဝ်ၵိူဝ်ႉလင်လင်သေပူၼ်ႉၵႂႃႇလွႆးလွႆးယဝ်ႉ။ သင်ၶႃႈမေႃလၢႆးတႄႉပိတ်ႉထိပ်ႇပၼ်ႁေယဝ်ႉဝႃႈ။ ၵူၺ်းၵႃႈ ၶႃႈၵေႃႈဢမ်ႇပွင်ႇၸႂ် ယွၼ်ႉသင်လႄႈသႅင်ၶဵဝ်မၼ်းတေလႆႈထဵင်ၶိုၼ်းလႃႇ မၼ်းဢမ်ႇႁူႉႁႃႉဝႃႈၶႃႈၶတ်းၸႂ်ၸွႆႈမၼ်းယူႇ၊ တေပဵၼ်လႆႈယူႇၵူၺ်း ၵူၼ်းၸိူင်ႉၼင်ႇၶႃႈတေၸွႆႈပိူၼ်ႈၼႆ မၼ်းၵေႃႈလၢၵ်ႇလၢႆးယူႇၼင်ႇၵဝ်ႇ။
မိူဝ်ႈဢၼ်ၶႃႈလမ်းၵႂႃႇၸွမ်းတူၺ်း ၼၼ်ႉ လႆႈႁၼ်ဢၢႆႈၶႃသွင်ၵေႃႉ ပိတ်ႉပိတ်ႉထိပ်ႇထိပ်ႇ ပေႃႉပေႃႉႁႅမ်ႁႅမ်သႂ်ႇတီႈၸၢႆးသႅင်ၶဵဝ်ၵႂႃႇႁႅင်းႁႅင်းယဝ်ႉ လၢတ်ႈၸူးမၼ်းၵႂႃႇ။
“မႂ်းဢမ်ႇႁူႉႁႃႉ! ဝႃႈၵဝ်ပဵၼ်ၽႂ်!! မႂ်းဢမ်ႇႁူႉႁႃႉ.. ဢမ်ႇႁူႉႁႃႉ ဝႃႈမႂ်းပဵၼ်ၽႂ် ပဵၼ်ၵူၼ်းၽႂ်ၼႆ” ဢၢႆႈဢွင်ႇလၢတ်ႈ
“မႂ်းႁတ်းၵႂႃႇႁဵတ်းၵေႃႉပိူၼ်ႈထႅင်ႈႁေႁႃႉ လိူဝ်သေႁႃးၼႆႉ” ဝၼ်းလၢဝ်။
ဢၢႆႈဢွင်ႇၼၼ်ႉၵေႃႈ ၵမ်ၶေႃးသိူဝ်ႈသႅင်ၶဵဝ်ၶိုၼ်ႈမႃးယဝ်ႉ လၢတ်ႈၸူး “မႂ်းႁတ်းၵႂႃႇလဵၼ်ႈၵေႃႉဢေးၶဝ်ၸိူဝ်းၼၼ်ႉႁေႁႃႉ”
“ဢမ်ႇၶႃႈ ၶႃႈဢမ်ႇလႆႈႁဵတ်းၵေႃႉၶဝ်!” ၵူဝ်ၵူဝ်တူဝ်သမ်ႉပေႃးသၼ်ႇတိၼ်းတိၼ်း။
“ပေႃးဢမ်ႇၵႂႃႇႁဵတ်းၵေႃႉၶဝ် မၼ်းသမ်ႉတေမႃးႁွင်ႉမႂ်း ၶၢဝ်းယၢမ်းၵိၼ်ၶဝ်ႈႁဵတ်းသင်လႃႇ”
“ၶႃႈၵူဝ်ယဝ်ႉ ၶႃႈၵူဝ်ယဝ်ႉ ဢမ်ႇႁဵတ်းယဝ်ႉ ၶႃႈတေဢမ်ႇလၢတ်ႈတေႃႇၶဝ်ထႅင်ႈယဝ်ႉ”
ၶႃသွင်ၵေႃႉၼၼ်ႉၵေႃႈ ၸင်ႇယွၼ်ႇႁႅင်းမိုဝ်းၶႃႁေ ပွႆႇမၼ်းၵႂႃႇၶိုၼ်းယူႇ။
မိူဝ်ႈၶႃႈႁၼ်ၸိူင်ႉၼၼ်ၵေႃႈ ႁဵတ်းႁႂ်ႈၶႃႈတူၵ်းၸႂ်ယူႇမိူၼ်ၵၼ် မိူၼ်ဝႃႈဢၼ်ၶဝ်ၺႃးပေႃႉထုပ်ႉဝၼ်းမိူဝ်ႈၼႆႉၼၼ်ႉ ပဵၼ်ယွၼ်ႉၶႃႈၼၼ်ႉယဝ်ႉ။ ၶႃႈပွင်ႇၸႂ်ယဝ်ႉ ယွၼ်ႉသင်လႄႈၽႂ်ဢမ်ႇၶႂ်ႈၸွႆႈမၼ်းၼႆ ယိုင်ႈပိူၼ်ႈၶတ်းၸႂ်ၶဝ်ႈႁႃ ယိုင်ႈမၼ်းထုၵ်ႇႁဵတ်းႁၢႆႉႁႅင်းမႃးထႅင်ႈၼၼ်ႉယဝ်ႉ။ ဢမ်ႇထၢင်ႇဝႃႈ တေပဵၼ်ၸိူင်ႉၼႆ မၢင်ၵမ်းမႃးၵေႃႈ မိူၼ်ၶႃႈတေတႅပ်းတတ်းၽိတ်းၵႂႃႇပႅတ်ႈၼၼ်ႉယဝ်ႉ။
မိူဝ်ႈဢၼ်ၶႃႈတေထွႆလင်ၵႂႃႇၶိုၼ်းၼၼ်ႉ ၸင်ႇသမ်ႉဝူၼ်ႉမႅၼ်ႈ ဢၼ်ၶႃႈမႃးၸွမ်းၼႆႉ ဢမ်ႇၸႂ်ႈတႃႇမႃးထွမ်ႇၶဝ်ဢုပ်ႇၵၼ်လူး တႃႇမႃးၸွႆႈသႅင်ၶဵဝ်လႄႈ လႆႈဢဝ်မၢၵ်ႇၵၢင်ႇၵွၼ် ၸွမ်ႇထွင်းမႃးႁိုဝ်လႃႇ။ ၶႃႈၵေႃႈ ၵႂႃႇယူႇတီႈလပ်ႉလပ်ႉၼၼ်ႉသေ ယိူင်းၵႂႃႇတီႈၵၢင်လင်ဢၢႆႈဢွင်ႇၼၼ်ႉယဝ်ႉ ယိုတ်ႈသၢႆမၼ်းႁႅင်းႁႅင်း ၼင်ႇဢၼ်ႁႅင်းၶႃႈမီး သႂ်ႇလေႃးပေႃးတၢင်းၸင်းဢၼ်မီးတီႈၼိူဝ်မၼ်းၼၼ်ႉႁေ ပေႃးဢမ်ႇတိူဝ်ႉ ဝႃႈႁိုဝ်ဝႃႈလႃႈ ၶႃႈၵေႃႈလႆႈလဵတ်းၵႂႃႇယဝ်ႉ။
တွၼ်ႈသၢဝ်းဢဵတ်းသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢဝ်းသွင်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
