တွၼ်ႈသၢမ်
ယၢမ်းၵၢင်ၶမ်ႈလပ်းသိင်ႇၸွမ်ႉႁွမ်ႉ တီႈႁိူၼ်းဢွၼ်ႇဢၼ်ဢမ်ႇပေႃးၵႂၢင်ႈယႂ်ႇၼၼ်ႉ မီးသဵင်ၵူၼ်းထဵင်မေႃးႁိုတ်းထႃႉလႃႇၵၼ်၊ သဵင်ပေႃႉၶူဝ်းႁိူၼ်းၶူဝ်းယေး လင်ထၢၼ်ႈပူၼ်ႉဝၢၼ်ႈပူၼ်ႉမိူင်း၊ ႁိူၼ်းၵေႃႈပေႃးမၢၵ်ႇပေႃးမိူဝ်လူင်ၵႂႃႇမူတ်း၊ မိူဝ်ႈဢူႈမႄႈၽိတ်းၵၼ်ပေႃႉႁႅမ်ၵၼ် လုၵ်ႈဢွၼ်ႇဢၼ်လႆႈႁၼ်ၸိူင်ႉၼၼ်ၵေႃႈ ပဵၼ်ဢၼ်တိုၼ်ႇၵူဝ်မႃးတႄႉတႄႉယူႇ။ သႅင်ႁၵ်ႉ ဢၼ်ႁၼ်ဢူႈမႄႈပဵၼ်ၸိူင်ႉၼၼ်ၵေႃႈ ပိၵ်ႉၽၵ်းတူႁွင်ႈၼွၼ်းမၼ်းသေ ၼင်ႈငွမ်ဢိုတ်းႁူမၼ်းဝႆႉယဝ်ႉ တင်းၵူဝ်တင်းသၼ်ႇ ၼမ်ႉတႃၵေႃႈ ပေႃးယွႆႉလူင်းယမ်းၸွမ်းၵႅမ်ႈမၼ်းၼၢင်းမႃးယူႇ။
လိုၵ်းမႃးတၢၼ်ႇတၢၼ်ႇသဵင်ၵေႃႈယဵၼ်သေ မိူၼ်မႄႈၶဝ်ၼၼ်ႉၵေႃႈ တေပဵၼ်ၵေႃႉဢွၵ်ႇႁိူၼ်းၵႂႃႇယဝ်ႉ။ မၼ်းၼၼ်ႉတႄႉ ႁိုဝ်ႁတ်းၵႂႃႇတၢင်းလႂ်သေဢိတ်း တင်းၶိုၼ်းၵေႃႈ ၼွၼ်းပေႃးဢမ်ႇလပ်း ပေႃးငိၼ်းသဵင်တွႆႇႁိူၼ်းႁိုဝ် သဵင်ဢူႈၶဝ်မႃးၼႆ သမ်ႉပေႃးၽႅတ်းတိုၼ်ႇမႃးၵမ်းလဵဝ်။
ၵေႃႉပဵၼ်မႄႈၶဝ်ၼၼ်ႉတႄႉ ႁွပ်ႇၶူဝ်းႁွပ်ႇလဵင်းသေ ၵႂႃႇႁႃၼွၼ်းႁဵတ်းၶႅၵ်ႇပိူၼ်ႈယဝ်ႉ၊ ႁွင်ႉႁႆႈၶႆႈၼႄပိူၼ်ႈ လွင်ႈဢၼ်ၽူဝ်မၼ်း ႁဵတ်းတေႃႇမၼ်းၸိူဝ်းၼၼ်ႉယူႇ။ ဢမ်ႇဝႃႈၵႂႃႇတၢင်းလႂ်ၵေႃႈ လၢတ်ႈထိုင်ၶိူဝ်းၽူဝ်မၼ်းယူႇတိၵ်းတိၵ်း ပေႃးဝႃႈၶႃၽူဝ်မေးၼၼ်ႉ ၽိတ်းၵၼ်ၼႆတႄႉ ပိူၼ်ႈသမ်ႉပေႃးၶႂ်ႈႁူႉတင်းဝၢၼ်ႈတင်းဝဵင်းယဝ်ႉ။
ဢူႈသႅင်ႁၵ်ႉ ၵေႃႉပဵၼ်လုင်းလႅင်ၼၼ်ႉၵေႃႈ ၵွပ်ႈပဵၼ်ၵူၼ်းၶီႈလဝ်ႈလႄႈ ပေႃးၵိၼ်လဝ်ႈမႃးသမ်ႉ ၵႆႉၽိတ်းလုၵ်ႈၽိတ်းမေး ပေႃႉၶူဝ်းႁိူၼ်းၶူဝ်းယေးယူႇတႃႇသေႇ။ ပေႃးလူမ်းမဝ်းမၼ်းပေႇမႃးသမ်ႉ မႃးထၢမ်ႁႃလုၵ်ႈႁႃမေးမၼ်းယူႇသေႇသေႇ မၢင်ပွၵ်ႈၵေႃႈ ၼင်ႈၶုၵ်းၶူၼ်ႉၶိုၼ်းသေႁႆႈတေႃႇပိူၼ်ႈ လၢတ်ႈဝႃႈတေဢမ်ႇၵိၼ်လဝ်ႈယဝ်ႉၼႆယူႇ။ မိူဝ်ႈႁိုင်ႁိုင်မႃး လႅပ်ႈတေၸႂ်ထိုင်ၵၼ်ယဝ်ႉလႄႈ ဢွၼ်ႈဝွၼ်းၵၼ်မႃးသေ ၶိုၼ်းမႃးယူႇၸွမ်းၵၼ်ၶိုၼ်းယဝ်ႉ။ ယူႇၸွမ်းၵၼ်လႅပ်ႈလီတေႃႇၵၼ်ယဝ်ႉ သမ်ႉၶိုၼ်းၵိၼ်လဝ်ႈၶိုၼ်းသေ ၽိတ်းမေးပေႃႉၶူဝ်းႁိူၼ်းၶူဝ်းယေးၶိုၼ်းယူႇ။
သႅင်ႁၵ်ႉၼၼ်ႉၵေႃႈ မိူဝ်ႈမီးပၼ်ႁႃၼႃႈႁိူၼ်းၸိူင်ႉၼႆ ၵႂႃႇႁူင်းႁဵၼ်းၵေႃႈ ႁိုဝ်တေမီးသမ်ႇမထိ ၶႂ်ႈႁဵၼ်းလိၵ်ႈႁဵၼ်းလၢႆးသင်ယဝ်ႉလႃႇ။ ၸႂ်ၵေႃႈဢမ်ႇသိူဝ်း ႁဵၼ်းလိၵ်ႈၵေႃႈဢမ်ႇၵျေႃႇဢမ်ႇမူၼ်ႈ လိူဝ်သေၼၼ်ႉ လွင်ႈဢၼ်ပေႃႈမႄႈၽိတ်းၵၼ်ၼၼ်ႉၼႆၵေႃႈ ပေႃးပိူၼ်ႈႁၼ်မၼ်း မိူဝ်ႈလႂ်ၵေႃႈ ၵႂၢမ်းတၢင်ႇမဵဝ်းပေႃးဢမ်ႇထၢမ် ၵူၺ်းထၢမ်လွင်ႈဢူႈမႄႈၶဝ်ၼၼ်ႉၵူၺ်း။
“ဢူႈမႄႈသူၽိတ်းၵၼ်ထႅင်ႈယဝ်ႉၵႂႃႈ ႁၼ်မိူဝ်းတၢင်းႁိူၼ်းႁဝ်းပုၼ်ႉ လၢတ်ႈၼႄပိူၼ်ႈသမ်ႉပေႃးႁူႉတၢင်းဝၢၼ်ႈတၢင်းဝဵင်းယဝ်ႉ”
“ဢမ်ႇႁူႉမႄႈသူတေၵႂႃႇပႅတ်ႈဢူႈသူႁိုင်ႁေၵႃႈႁိုဝ်ၵူၺ်း”
“ဢူႈသူၼၼ်ႉၵေႃႈ လိူဝ်ၸႂ်ၼႃႇၵဝ်ႇ..ၵဝ်ဝႃႈ ပေႃးၵိၼ်လဝ်ႈမႃးၵေႃႈ ၽိတ်းမေးဝႃႇ ပေႃႉၶူဝ်းႁိူၼ်းၶူဝ်းယေးဝႃႇ ပေႃးၵဝ်ပဵၼ်မႄႈသူတႄႉ..ၵဝ်မႃႇယူႇယဝ်ႉၵဝ်”
“ႁဵတ်းႁင်မႂ်းဢမ်ႇပၢႆႈၵႂႃႇၸွမ်းမႄႈသူႁေယဝ်ႉလႃႇ”
ပိူၼ်ႈလၢတ်ႈႁင်မႃးၵေႃႈ မၼ်းသမ်ႉပေႃးဢမ်ႇၸၢင်ႈတၵ်းသဵင်သင်လႆႈၼၼ်ႉယဝ်ႉ။ သမ်ႉပေႃးဢမ်ႇႁတ်းတေႃႇၼႃႈပိူၼ်ႈလႆႈလူးၵွၼ်ႇ။
မိူဝ်ႈၼႆႉၶႃႈၵေႃႈ တင်ႈၸႂ်မႃးႁူင်းႁဵၼ်းတူၵ်းလိုၼ်းဢိတ်ႉၼိုင်ႈ ၵွပ်ႈဝႃႈၶၢၼ်ႉၶဝ်ႈထႅဝ်၊ ၵူၺ်းၵႃႈသမ်ႉမႃးၺႃးၶူးၶဝ် ပႂ်ႉထတ်းယူႇတၢင်းၶဝ်ႈႁူင်းႁဵၼ်း ၼၼ်ႉယဝ်ႉ။ မိူၼ်ဝႃႈၵူၼ်းတူၵ်းလိုၼ်းႁူင်းႁဵၼ်းၵေႃႈ ဢမ်ႇလႆႈမီးၶႃႈၵူၺ်း မီးၵူၼ်းလၢႆလၢႆၵေႃႉယူႇ ၵူၼ်းၼႂ်းႁွင်ႈႁဝ်းၼၼ်ႉၵူၺ်း မီးပဵၼ်သီႇၵေႃႉယဝ်ႉ မီးၶႃႈ၊ ၸိုၼ်ႈသႂ်၊ ဢၢႆႈယီႈလႄႈဢၢႆႈဝိ ၸိူဝ်းဢၼ်ႁဝ်းၼင်ႈတၢင်းလင်ၼၼ်ႉယဝ်ႉဝႃႈ။ ၶူးဢၼ်ပႂ်ႉထတ်းႁဝ်းၼၼ်ႉၵေႃႈ လၢတ်ႈႁႂ်ႈၶူးၵုမ်းၸၼ်ႉ ပၼ်တၢမ်ႇႁဝ်းၼႆယူႇ။
ပေႃးလၢတ်ႈထိုင်ၶူးၵုမ်းၸၼ်ႉၵေႃႈ ၼင်ႇႁၢင်ႈၶႃႈသမ်ႉပေႃး ၶႂ်ႈလႅၼ်ႈၵႂႃႇၼႂ်းႁွင်ႈၵမ်းလဵဝ်ယဝ်ႉ။ ပဵၼ်သင်ႁိမ်းႁိူၼ်းၶႃႈၼၼ်ႉ တေလႆႈမီးၶူးလႃႇ၊ ယဝ်ႉၵေႃႈ သမ်ႉမိုတ်ႈၵၼ်တင်းၼၢႆးႁဝ်းႁေ ပေႃးၼၢႆးႁဝ်းႁူႉ ၶမ်ႈၼႆႉၶႃႈဢမ်ႇၼွၼ်းလႆႈယဝ်ႉ တေပွင်ႉတင်းၶိုၼ်းၼၼ်ႉယဝ်ႉဝႃႈ။
ယၢမ်းၼၼ်ႉ ၶႃႈႁၼ်ႁူဝ်ၼႃႈႁွင်ႈမႃးတၢင်းၼၼ်ႉဢဝ်လီလီလႄႈ ၶႃႈၵေႃႈ ႁဵတ်းမိူၼ်ဢမ်ႇသူၼ်သင်သေ ၼႅတ်ႈလႅၼ်ႈလူင်ၵႂႃႇၸူးမၼ်းယဝ်ႉ။
“ႁူဝ်ၼႃႈ!! ႁဝ်းတေၺႃးတၢမ်ႇဢမ်ႇလႆႈၼႃ ႁူဝ်ၼႃႈၵေႃႉလၢတ်ႈ ႁႂ်ႈၶႃႈမိူဝ်းဢဝ်ပပ်ႉၶိုၼ်းလူး..ဝႃႈတေလၢတ်ႈပၼ်တီႈၶူးၼႆ”
ၼူၼ်းမူဝ်ဢၼ်ဢမ်ႇႁူႉသင်ၼၼ်ႉၵေႃႈ မိူၼ်တေၵႂင်ၵႂင်ၵႃးၵႃးဝႆႉယူႇ ၶႃႈၸင်ႇၵႂႃႇၵွတ်ႇဢဝ်ၶႅၼ်မၼ်းၼၼ်ႉသေ သွပ်ႉသႅပ်ႉလၢတ်ႈၸူးၵႂႃႇ။
“ၸွႆႈဢိတ်ႉၼိုင်ႈလႄႈ..”
“ပဵၼ်သင်ႁဝ်းတေလႆႈၸွႆႈသူလႃႇ သူမႃးတူၵ်းလိုၼ်းၵေႃႈ သူလူဝ်ႇဢဝ်ပုၼ်ႈၽွၼ်းၵူၺ်းဢိူဝ်ႈ”
“တေႁႂ်ႈႁဝ်းလၢတ်ႈၼႄၶူးၼႄႇ ဝႃႈသူၼၼ်ႉလၵ်ႉတႅမ်ႈလိၵ်ႈပၼ်ႁဝ်းသေသူင်ႇၶူးၼႆ သူၵေႃႈဢမ်ႇၸႂ်ႈၵူၼ်းလီႁေၵႃႈႁိုဝ်ၼင်ႇၵဝ်ႇ”
ဢဝ်မၼ်းသမ်ႉပေႃးဢမ်ႇထဵင်သင်ၶိုၼ်းလႆႈၼၼ်ႉယဝ်ႉ။
“ၵေႃႈလႆႈ ပွၵ်ႈၼႆႉပွၵ်ႈလဵဝ်ၵူၺ်းၼႃႈ!!”
မၼ်းၵေႃႈ ယုမ်ႉယုမ်ႉယၢႆႈယၢႆႈတေႃႇၶူးၶဝ်ၸိူဝ်းၼၼ်ႉသေ
“ၶူးၶႃႈ..ၶႃႈမီးၵၢၼ်လူဝ်ႇၵႂႃႇႁဵတ်းထႅင်ႈဢေႃႈ”
“ၵႂႃႇလႄႈ…”
လၢတ်ႈဢဝ်ၶႃႈပေႃးၸႂ်လမ်မႃးယဝ်ႉ ၵူၺ်းၵႃႈဢမ်ႇထၢင်ႇဝႃႈ မၼ်းတေႁွင်ႉၶႃႈၵႂႃႇၸွမ်းမၼ်း။
“ဢေးယိင်း! ပဵၼ်သင်လႄႈဢမ်ႇမႃးၸွမ်းလႃႇ ၶူးလူဝ်ႇပပ်ႉၼႃႇယဝ်ႉ”
ဢဝ်ၸႂ်ပေႃးၵျေႃႇလူင်မႃးၶိုၼ်းၵမ်းလဵဝ်ယဝ်ႉ ၶႃႈၵေႃႈၼႅတ်ႈလႅၼ်ႈၵႂႃႇၸွမ်း ၼူၼ်းမူဝ်ၵမ်းလဵဝ်သေ မိူဝ်ႈဢၢင်ႈတေၶဝ်ႈႁွင်ႈၵႂႃႇၼၼ်ႉ
“သူတေၵႂႃႇလႂ်လႃႇ”
“ၶဝ်ႈႁွင်ႈႁဵၼ်းၼၼ်ႉၼႃႇ”
“သူတမ်ႉဢမ်ႇလႆႈၸႂ်ႁဵၼ်းဢမ်ႇၸႂ်ႈႁႃႉ ၸွႆႈႁဝ်းၽွင်ႈလႄႈ”
“ႁဝ်းမႃးႁူင်းႁဵၼ်းၵေႃႈ တေလႆႈယူႇၼႂ်းႁွင်ႈႁဵၼ်းဢမ်ႇၸႂ်ႈႁႃႉ ပဵၼ်သင်လႄႈႁဝ်းတေလႆႈၸွႆႈသူလႃႇ”
“တေႁႂ်ႈႁဝ်းႁွင်ႉလၢတ်ႈၶူးၶဝ်ၶိုၼ်းၼႄႇ..”
“တူၵ်းလိုၼ်းယဝ်ႉၼႃႈ ၼွင်ႉသၢဝ်ဢူၺ်..”
“ၶူးႁူႉယူႇယဝ်ႉဝႃႈ ၼၼ်ႉပဵၼ်တူဝ်လိၵ်ႈႁဝ်း.. ပေႃးသူၶႂ်ႈၺႃးတၢမ်ႇၵေႃႈ လႆႈယူႇၵူၺ်း”
ပေႃးလၢတ်ႈမႃးၸိူင်ႉၼၼ်ၵေႃႈ ၶႃႈတေႁဵတ်းႁိုဝ်ယဝ်ႉလႃႇ သမ်ႉပေႃးဢဝ်တူဝ်လွတ်ႈမႃးလႆႈယဝ်ႉလူး။
“ႁႂ်ႈႁဝ်းၸွႆႈသင်လႃႇ”
“ၸွမ်းႁႃသႅင်ႁၵ်ႉၸွႆႈႁဝ်းၽွင်ႈ မိူဝ်ႈႁဝ်းမႃးႁွတ်ႈၼႂ်းႁွင်ႈႁဵၼ်းၼၼ်ႉၵေႃႈ ႁၼ်ထူင်ၶဝ်ယူႇ ၵူၺ်းၵႃႈဢမ်ႇလႆႈႁၼ်ၶဝ်သေၵမ်းၼၼ်ႉယဝ်ႉ”
“တေပၢႆႈႁူင်းႁဵၼ်း ပဵၼ်သင်လႄႈဢမ်ႇဢဝ်ထူင်ၵႂႃႇပႃးလႃႇ သူၵေႃႈ ပဵၼ်ႁူဝ်ၼႃႈႁွင်ႈၵူၺ်း ၸမ်ပဵၼ်တေလႆႈၸွမ်းႁႃၶဝ်ယူႇႁႃႉ”
“မၼ်းဢမ်ႇၵဵဝ်ႇတင်းႁူဝ်ၼႃႈႁွင်ႈလေႃႇ ႁဝ်းမႆႈၸႂ်ၶဝ် ၸွမ်းလူၺ်ႈပဵၼ်ဢူၺ်းၵေႃႉၵၼ်ၼၼ်ႉၼႃႇ”
“ႁဵတ်းမိူၼ်ပဵၼ်ၵူၼ်းလီတေႉယဝ်ႉ”
ႁႃးၵေႃႈ လႆႈၽႄၵၼ်ၵႂႃႇၸွမ်းႁႃယူႇ ယၢမ်းၼၼ်ႉၶႃႈၵေႃႈ မုင်ႈႁၼ်သႅင်ႁၵ်ႉ ၼင်ႈႁႆႈယူႇႁင်းၵူၺ်းမၼ်း တီႈၼႂ်းသူၼ်လင်ႁူင်းႁဵၼ်းၼၼ်ႉယဝ်ႉ။
“ပဵၼ်သင်လႄႈတေလႆႈမႃးၼင်ႈႁႆႈယူႇႁဵတ်းၼႆလႃႇ!..ပိူၼ်ႈၶိုၼ်ႈႁူင်းႁဵၼ်းယဝ်ႉ! ဢမ်ႇႁူႉႁႃႉၶၢဝ်းယၢမ်းၶိုၼ်ႈႁူင်းႁဵၼ်းၼႆ”
သႅင်ႁၵ်ႉၼၼ်ႉၵေႃႈ ၸဵတ်ႉၼမ်ႉတႃမၼ်းသေ တူၺ်းၼႃႈၶႃႈယဝ်ႉ။
“သူမႃးယူႇတီႈၼႆႈႁဵတ်းသင်လႃႇ!..”
“ထၢမ်လႆႈ!! တူဝ်ၸဝ်ႈၵဝ်ႇသမ်ႉမႃးႁဵတ်းသင်လႃႇ ႁဵတ်းႁႂ်ႈႁဝ်းလႆႈမႃးၸွမ်းႁႃသူတီႈၼႆႈၸိူင်ႉၼႆ!”
ၼူၼ်းမူဝ်ၼၼ်ႉၵေႃႈ လႅပ်ႈတေငိၼ်းသဵင်ႁႃးဢုပ်ႇၵၼ်လႄႈ ၼႅတ်ႈမႃးသေယဝ်ႉ
“သႅင်ႁၵ်ႉ..မႃးမီးယူႇတီႈၼႆႈႁႃႉ ပိူၼ်ႈၶိုၼ်ႈႁူင်းႁဵၼ်းယဝ်ႉၼႃ..မႃးလႄႈႁဝ်းမိူဝ်း”
“ႁဝ်း..ႁဝ်း..ႁဝ်းဢၢႆပိူၼ်ႈတေႉယဝ်ႉ ႁဝ်းဢမ်ႇႁတ်းတေႃႇၼႃႈပိူၼ်ႈလႆႈယဝ်ႉၼႃ ႁဝ်းဢမ်ႇထုၵ်ႇလီမႃးႁူင်းႁဵၼ်းၸဵမ်မိူဝ်ႈတေႇမၼ်းယဝ်ႉ”
“လၢတ်ႈၸိူင်ႉၼႆလႆႈၸိူင်ႉႁိုဝ် သူၵျိူၵ်ႈႁူင်းႁဵၼ်းပေႃးတၢၼ်ႇၼႆႉ ပဵၼ်သင်လႄႈလၢတ်ႈၸိူင်ႉၼႆလႃႇ” ၼူၼ်းမူဝ်လၢတ်ႈ။
“လႃႈၼႃႇယဝ်ႉ ႁူဝ်ၼႃႈမိူဝ်းလႄႈ ႁူဝ်ၼႃႈတူၵ်းလိုၼ်းၼႆတေဢမ်ႇပေႃးလီ ႁဝ်းတေလၢတ်ႈႁႂ်ႈၶဝ်မိူဝ်းၶိုၼ်းၵူၺ်း”
ၼူၼ်းမူဝ်ၼၼ်ႉၵေႃႈ မိူၼ်တေတူၵ်းလိုၼ်းၼႃႇယဝ်ႉတေႉၼင်ႇဝႃႈ ၼႅတ်ႈမိူဝ်းၵႂႃႇဢွၼ်တၢင်းသေ
“ႁွင်ႉၶဝ်မႃးႁႂ်ႈလႆႈၼႃႈ ပေႃးဢမ်ႇၼၼ် ႁဝ်းတေလၢတ်ႈၼႄၶူးၼၼ်ႉယဝ်ႉ”
“မိူဝ်းလႃႈ! ၶၢၼ်ႉငိၼ်းၼႃႇယဝ်ႉ မႃးႁူင်းႁဵၼ်းၵေႃႈ ယင်းတိုၵ်ႉမီးၵူၼ်းပွင်ႉႁဝ်းယူႇ”
ဝၢႆးသေၼူၼ်းမူဝ်ၵႂႃႇယဝ်ႉ ၵိုတ်းႁႃးသွင်ၵေႃႉသႅင်ႁၵ်ႉၵူၺ်းၼၼ်ႉ ၶႃႈၵေႃႈ လႆႈလၢတ်ႈၸူးမၼ်းၵႂႃႇ။
“မိူၼ်ဝႃႈႁဝ်းတေၸပ်းၸႂ်တီႈၼႆႈယဝ်ႉ ၵတ်းယဵၼ်တဵတ်ႇယဵၼ်လီ တၢင်ႇပွၵ်ႈ ပေႃးၶူးလိုပ်ႈဢွၵ်ႇႁွင်ႈၼႆ မႃးၼွၼ်းလဵၼ်ႈတီႈၼႆႈၵေႃႈလီမိူၼ်ၵၼ် ယိၼ်းၸူမ်းယဝ်ႉၼႃႈ ႁႂ်ႈႁဝ်းမႃးထူပ်းတီႈလီလီၸိူင်ႉၼႆ”
“သူတေဢမ်ႇမိူဝ်းယဝ်ႉႁႃႉ!..”
“ဢမ်ႇမိူဝ်းယဝ်ႉ! ပဵၼ်သင်လႄႈႁဝ်းတေလႆႈမိူဝ်းလႃႇ ႁဝ်းဢမ်ႇသူၼ်ၸႂ်ၵၢၼ်ႁဵၼ်းယူႇယဝ်ႉလူး မိူဝ်းလႄႈသူၶႂ်ႈမိူဝ်းၵေႃႈ”
“ပဵၼ်သင်သူဢမ်ႇသူၼ်ၸႂ်ၵၢၼ်ႁဵၼ်းလႃႇ”
“သူတေၶႂ်ႈႁူႉႁဵတ်းသင်..ၶႂ်ႈမိူဝ်းၵေႃႈမိူဝ်းလႄႈ ႁဝ်းဢမ်ႇဝႃႈသင်လေႃႇ တီႈၼႆႈႁဝ်းတေပႂ်ႉတၢင်ၵူၺ်း”
“ႁဝ်းတေႁတ်းတေႃႇၼႃႈပိူၼ်ႈလႆႈၸိူင်ႉႁိုဝ်!”
“သူၶႂ်ႈႁဵၼ်းၵေႃႈမိူဝ်းႁဵၼ်းလႄႈ တေၵႂႃႇသူၼ်ၸႂ်ပိူၼ်ႈႁဵတ်းသင်”
“မၼ်းဢမ်ႇငၢႆႈငၢႆႈလေႃႇ!..ႁဝ်းတေႁဵတ်းလႆႈၸိူင်ႉႁိုဝ် ႁဝ်းလႄႈတင်းသူမၼ်းဢမ်ႇမိူၼ်ၵၼ်လူး”
“သူတေယူႇတီႈၼႆႈႁဵတ်းသင် တေၼင်ႈႁႆႈသေ..ပၼ်ႁဝ်းထွမ်ႇႁႃႉ ဢမ်ႇဢၢႆႁဝ်းၼႄႇ”
သဵင်ဢူၼ်ႈဢူၼ်ႈမိူၼ်ၶႂ်ႈလေႃးပႃးသဵင်ႁႆႈၼၼ်ႉၵေႃႈ “ႁဝ်းမိူဝ်းယဝ်ႉ..” ၵွင်လင်မိူဝ်းၵႂႃႇႁင်းမၼ်းယဝ်ႉ။
တီႈဢၼ်ၶႃႈယူႇၼႆႉ ပဵၼ်ၼႂ်းသူၼ်လင်ႁူင်းႁဵၼ်း ၵႆၵၼ်တင်းႁူင်းႁဵၼ်းယူႇတၢၼ်ႇတၢၼ်ႇ မီးပႃႇမႆႉသုမ်ႇႁူမ်ႇငမ်းၵတ်းယဵၼ်လီ ပေႃးမႃးၼွၼ်းဝၼ်းတႄႉၵတ်းလီတေႉတေႉ ၼၼ်ႉယဝ်ႉ။ တီႈၼႆႈ ဢမ်ႇၸႂ်ႈဝႃႈပဵၼ်ပွၵ်ႈဢွၼ်တၢင်းသုတ်းဢၼ်ၶႃႈမႃးလေႃႇ မိူဝ်ႈဢွၼ်တၢင်း ၶႃႈၵေႃႈယၢမ်ႈမႃးတီႈၼႆႈယူႇတႃႇသေႇ ဝူၼ်ႉထိုင်ၶိုၼ်းယဝ်ႉၵေႃႈ ၼင်ႇႁၢင်ႈၼမ်ႉတႃသမ်ႉပေႃးလႆဢွၵ်ႇမႃးယဝ်ႉ။
တွၼ်ႈသၢမ်သုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသီႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
