တွၼ်ႈသွင်
လုၵ်ႈႁဵၼ်းတေလႆႈၵႂႃႇႁူင်းႁဵၼ်း ႁဵၼ်းလိၵ်ႈသွၼ်ပၺ်ႇၺႃႇ ႁႃတၢင်းႁူႉတၢင်းမေႃ ပဵၼ်ပုၼ်ႈၽွၼ်းလုၵ်ႈႁဵၼ်းဢၼ်တေလႆႈႁဵတ်းယဝ်ႉၼႆ ၶူးလႄႈ ပေႃႈမႄႈၽူႈယႂ်ႇၵူၼ်းလူင်ၶဝ် ဢွၼ်ၵၼ်လၢတ်ႈယူႇတႃႇသေႇ။ ပၢႆးပၺ်ႇၺႃႇၼၼ်ႉ ပဵၼ်ငဝ်ႈၶၢမ်ႇပိုၼ်ႉ တႃႇပူၵ်းပွင်ဝၢၼ်ႈမိူင်း ပူၵ်းပွင်လုၵ်ႈဢွၼ်ႇႁႂ်ႈမီးၼမ်ႉၵတ်ႉ ႁႂ်ႈမေႃပွင်သၢင်ႈဝၢၼ်ႈမိူင်း ႁႂ်ႈၶိုၼ်ႈယႂ်ႇ။ ၵူၺ်းၵႃႈ ပၢႆးပၺ်ႇၺႃႇဢၼ်ၺၢမ်ႉလႄႈ ဢမ်ႇမီးၵၢၼ်ပွင်သၢင်ႈၼမ်ႉၵတ်ႉၵူၼ်းလႆႈၼၼ်ႉၵေႃႈ တေဢွၼ်ၵူၼ်းတူၵ်းတႅမ်ႇသေ ဢမ်ႇၶိုၼ်ႈယႂ်ႇလႆႈမိူၼ်ၵၼ် ယဝ်ႉ။
မိူဝ်ႈၼႆႉၶႃႈမႃးႁူင်းႁဵၼ်း လုၵ်ႈႁဵၼ်းမၢင်ၵေႃႉၵေႃႈ ပႆမႃးဢဝ်ယဝ်ႉ၊ မၢင်ၵေႃႉၵေႃႈ ၶီႇလူတ်ႉထိပ်ႇမႃး၊ မၢင်ၵေႃႉၵေႃႈ ၶီႇလူတ်ႉၶိူင်ႈမႃး၊ မၢင်ၵေႃႉၵေႃႈ ပေႃႈမႄႈၶီႇၵႃးမႃးသူင်ႇယူႇ။ ၽွင်းတိုၵ်ႉမႃးၸွမ်းတၢင်းယူႇၼၼ်ႉၵေႃႈ မိူၼ်တေလႆႈႁၼ် ဢူၺ်းၵေႃႉႁူမ်ႈႁဵၼ်းၵၼ်တင်းၶႃႈ ဢၼ်မီးပေႃႈမႄႈမႃးသူင်ႇၼၼ်ႉ မီးယူႇလၢႆလၢႆၵေႃႉ ၵႃးၵေႃႈၵႃႈၶၼ်ယႂ်ႇလူင်လၢႆလၢႆ၊ လိူဝ်သေၼၼ်ႉသမ်ႉ ၵူၼ်းၼႂ်းႁွင်ႈႁဝ်းၵူၺ်းၼင်ႇၵဝ်ႇ ၶီႇတင်းလူတ်ႉၶိူင်ႈလူင်သေ သႂ်ႇသဵင်လင်လင် ၶပ်းၶဝ်ႈမႃးထိုင်ၼႂ်းႁူင်းႁဵၼ်းယူႇ ၼၼ်ႉတႄႉပဵၼ် “ၸၢႆးဢွင်ႇ” ဢၼ်ၼင်ႈႁိမ်းၵၼ်တၢင်းၶႃႈၼၼ်ႉယဝ်ႉ။ ၼႃႈတႃလႄႈ လွင်ႈႁဵတ်းသၢင်ႈမၼ်းၼၼ်ႉ မၼ်းဢမ်ႇလီမၢႆတွင်းၵူၺ်းၵႃႈၸပ်းတႃဝႆႉယူႇ။
ပေႃးၶႃႈမႃးႁူင်းႁဵၼ်းၼႆ ၶႃႈၼၼ်ႉဢမ်ႇတွၼ်ႉမႃးၸွမ်းဢၢႆႈၸၢႆးၶဝ်ႁေပွၵ်ႈ မႃးႁင်းၵူၺ်းတႃႇသေႇယဝ်ႉ ၵူၺ်းၵႃႈ မိူဝ်ႈၼႆႉသမ်ႉ ၶႃႈမႃးဢွၼ်တၢင်းၶဝ်လႄႈ ၶဝ်လမ်းၶိုတ်းၶႃႈသေ တူင်ႉတၵ်ႉၶႃႈယဝ်ႉပူၼ်ႉၵႂႃႇ။ မိူၼ်ဝႃႈ ၽူႈယိင်းဢၼ်ယူႇ ၼႂ်းႁူင်းႁဵၼ်းတင်းမူတ်းၼၼ်ႉၵေႃႈ ဢွၼ်ယၵ်ႉၸူးၶႃႈၵမ်းလဵဝ်ယူႇ၊ ႁၼ်ယဝ်ႉၵေႃႈ ၶူၼ်တုမ်ႇၼိူဝ်ႉသမ်ႉပေႃးၵီႈယဝ်ႉ ၶႃႈၼၼ်ႉၵေႃႈ ၼႅတ်ႈလႅၼ်ႈၵႂႃႇပႅတ်ႈၵမ်းလဵဝ်ယူႇ။
ၶိင်ႇၶူးပိူင်းၾႃႉၶဝ်ႈမႃးသွၼ်လိၵ်ႈ ဢၼ်ပဵၼ်ၽႃႇသႃႇပၢႆးၼပ်ႉၼၼ်ႉ လႆႈပၼ် ၶေႃႈထၢမ်သေ ႁႂ်ႈလုၵ်ႈႁဵၼ်းဢွၼ်ၵၼ်ၼပ်ႉသွၼ်ႇလႄႈ ပေႃးႁဵတ်းယဝ်ႉၼႆၵေႃႈ ႁႂ်ႈႁူဝ်ၼႃႈႁွင်ႈ ဢဝ်ပပ်ႉၵႂႃႇပၼ် ဝၢႆးၵိၼ်ၶဝ်ႈယဝ်ႉၼႆယူႇ။ ဢွၼ်တၢင်းတေဢွၵ်ႇႁွင်ႈၵႂႃႇၼၼ်ႉသမ်ႉ မိူၼ်ယၵ်ႉတူၺ်းတင်းၶႃႈယူႇၼၼ်ႉသေ သင်ႇလၢတ်ႈထႅင်ႈ−
“သင်ၼႂ်းပပ်ႉၽႂ်..ဢမ်ႇမီးလိၵ်ႈႁေတူဝ် ႁူဝ်ၼႃႈႁွင်ႈတေလႆႈဢဝ်ပုၼ်ႈၽွၼ်း” ၼႆယူႇ။
မိူၼ်ဝႃႈႁူဝ်ၼႃႈႁွင်ႈၼၼ်ႉၵေႃႈ ၶတ်းၸႂ်ထတ်းတူၺ်းပပ်ႉလုၵ်ႈႁဵၼ်း ဢၼ်မႃး ထၢပ်ႈၼၼ်ႉၵူႈၵေႃႉယဝ်ႉ။ ၵူၺ်းၵႃႈ ထိုင်ၶၢဝ်းလူင်းၵိၼ်ၶဝ်ႈယဝ်ႉ ပႆႇမီးၵူၼ်း သူင်ႇပပ်ႉမူတ်းလႄႈ ႁူဝ်ၼႃႈႁွင်ႈၼၼ်ႉၵေႃႈ မႃးတီႈၽိူၼ်ၶႃႈ ဢၼ်တိုၵ်ႉၼွၼ်း ငူပ်ႉၼႃႈ ယူႇၼိူဝ်ၽိူၼ်ၼၼ်ႉသေ
“သူ..ၶူးႁႂ်ႈဢဝ်ပပ်ႉၵႂႃႇထၢပ်ႈ ႁဵတ်းယဝ်ႉယဝ်ႉႁႃႉ ၵိုတ်းသူၵေႃႉလဵဝ်ၵူၺ်းယဝ်ႉၼႃ”
ၶႃႈၵေႃႈ ဢဝ်ပပ်ႉဢၼ်တမ်းၽေႇၼိူဝ်ၽိူၼ်ၼၼ်ႉ ယိုၼ်ႈပၼ်မၼ်းၵႂႃႇ ပပ်ႉၼိုင်ႈသေ မၼ်းၵေႃႈလႆႈပိုတ်ႇတူၺ်းၵႂႃႇ ႁၼ်ပဵၼ်ပပ်ႉပဝ်ႇၵူၺ်းလႄႈ
“ပဵၼ်သင်လႄႈဢမ်ႇတႅမ်ႈသင်လႃႇ..”
“ပဵၼ်လွင်ႈႁဝ်းၵူၺ်း သူလူဝ်ႇၵႂႃႇသူင်ႇၵေႃႈ ဢဝ်ၵႂႃႇလႄႈ”
ၶႃႈၵေႃႈဢွၵ်ႇႁွင်ႈၵႂႃႇပႅတ်ႈမၼ်းယူႇယဝ်ႉ။ မၼ်းၼၼ်ႉၵေႃႈ ယိပ်းတင်းပပ်ႉသေ လမ်းၸွမ်းၶႃႈယူႇ
“ပေႃးပပ်ႉသူဢမ်ႇမီးသင် ႁဝ်းသမ်ႉတေႁဵတ်းႁိုဝ်ၵႂႃႇသူင်ႇၶူးလႃႇ.. သူဢမ်ႇလႆႈငိၼ်းႁႃႉ..ၶူးလၢတ်ႈမိူဝ်ႈၵႆႈၼၼ်ႉ”
“ဢမ်ႇၼႃ..ႁဝ်းဢမ်ႇလႆႈထွမ်ႇ ႁဝ်းၵႂႃႇၵွၼ်ႇၼႃႈ!”
မိူၼ်ဝႃႈမၼ်းၼၼ်ႉၵေႃႈ တေသဵင်ႈၸႂ်ၸွမ်းၶႃႈမိူၼ်ၵၼ်။ ႁူၼ်ပွၵ်ႈၵႂႃႇၶိုၼ်းသေယဝ်ႉ ဢမ်ႇႁိုင်ၵေႃႈ လႆႈႁၼ်မၼ်းၵႂႃႇသူင်ႇပပ်ႉယူႇ။
ၽွင်းၶၢဝ်းလိုဝ်ႈၵၢင်ဝၼ်း လုၵ်ႈႁဵၼ်းၶဝ်ၵေႃႈ ဢွၼ်ၵၼ်ဢဝ်တင်းၵွၵ်းၶဝ်ႈဝၼ်းသေ ၼင်ႈဝႅင်းၵိၼ်ၶဝ်ႈၵုမ်းၵၼ်ၵႂႃႇ ၽၵ်းၵဝ်ၽၵ်းမႂ်းႁူမ်ႈတမ်းလေႃးၵၼ် ဢုပ်ႇမူၼ်ႈၵိၼ်ႁူမ်ႈၵၼ် ပႃးတင်းသဵင်ၶူဝ်ၵျေႃႇသိူဝ်းၸႂ်ယူႇ။ ၵမ်ႈၽွင်ႈၵေႃႈ ၼင်ႈပဵၼ်ၵူႈ ၵိၼ်ႁူမ်ႈပွင်းၵၼ် ၼင်ႇႁၢင်ႈဝၢၼ်ႁၢင်ႈမၼ်းယူႇႁင်းၶဝ်။ ၵမ်ႈၽွင်ႈသမ်ႉ မီးမၢဝ်ႇမၢဝ်ႇတၢင်ႇၸၼ်ႉၼၼ်ႉ ဢဝ်ႁေႃႇၶဝ်ႈဝၼ်းမႃးပၼ်ၸိူဝ်းၼႆႉယူႇ။ ၵဝ်ၶႃႈၼၼ်ႉတႄႉ ၼင်ႈၵိၼ်ယူႇႁင်းၵူၺ်း..ၵူၺ်း။
မိူဝ်ႈၶႃႈယင်းတိုၵ်ႉၼင်ႈၵိၼ်ၶဝ်ႈယူႇၼၼ်ႉ လႆႈႁၼ်ၸၢႆးသႅင်ၶဵဝ် ဢဝ်တင်းၵွၵ်းၶဝ်ႈလူင်လူင်မၼ်းၼၼ်ႉ ႁၢင်ႈႁႅၼ်းဝႆႉၼိူဝ်ၽိူၼ်ၼၼ်ႉသေ တူဝ်မၼ်းတႄႉ ဢမ်ႇႁတ်းတိူဝ်ႉသေဢိတ်းယဝ်ႉ ယူႇဢမ်ႇႁိုင် ၸၢႆးဢွင်ႇၼၼ်ႉၵေႃႈ မႃးၼင်ႈႁိမ်းမၼ်းသေယဝ်ႉ ၼင်ႈၵိၼ်လီၵိၼ်ဝၢၼ်တေႃႇၼႃႈမၼ်းၼၼ်ႉယူႇ၊ မၼ်းၼၼ်ႉတႄႉ ၼင်ႈသေဢိုၼ်ၼမ်ႉလၢႆးၵႂႃႇၵူၺ်း။ ဝၢႆးသေၸၢႆးဢွင်ႇၵိၼ်ယဝ်ႉၵေႃႈ မၼ်းၸင်ႇတေၵဵပ်းၵိၼ် ဢၼ်ၸၢႆးဢွင်ႇၵိၼ်ယဝ်ႉၼၼ်ႉလႄႈ သိမ်းၵႅင်ႉၶဝ်ႈမၼ်းၵႂႃႇယူႇ။ ၸၢႆးဢွင်ႇၼၼ်ႉတႄႉ ၵိၼ်တွင်ႉဢိမ်ႇတွင်ႉတဵမ်ယဝ်ႉသေ ဢွၵ်ႇၵႂႃႇႁႃလဵၼ်ႈၸွမ်းဢူၺ်းၵေႃႉမၼ်းႁဵတ်းၼၼ်ယူႇ။
ၶိင်ႇသွၼ်လိၵ်ႈဝၢႆးဝၼ်းၼႆၵေႃႈ ပဵၼ်ၶၢဝ်းယၢမ်း ဢၼ်ထုၵ်ႇၸႂ်ၶႃႈလိူဝ်ပိူၼ်ႈၼၼ်ႉယဝ်ႉ တွင်ႉတဵမ်ယဝ်ႉၵေႃႈ လူဝ်ႇၼွၼ်းၵူၺ်းယဝ်ႉလေႃႇ၊ သမ်ႉပၢႆၺႃးၶိင်ႇသွၼ်လိၵ်ႈ “ၶူးၸၢႆးၶမ်း” ၶူးသွၼ်ပၢႆးၼႃႈလိၼ်ၼၼ်ႉထႅင်ႈႁေ ၶူးၶဝ်ပဵၼ်ဢၼ်လီႁၵ်ႉတေႉယဝ်ႉ။ ပဵၼ်ၵူၼ်းဢူၼ်ႈဢွၼ်ႇယဵၼ်ႇငႄႈ လၢတ်ႈၵႂၢမ်းၵေႃႈဝၢၼ်ႁူ ဢမ်ႇမေႃးႁိုတ်းပွင်ႉလႃႇလုၵ်ႈႁဵၼ်း သမ်ႉဝႃႈလႃႇၵေႃႈ ၵႂၢမ်းလႃႇမၼ်းၼၼ်ႉ ပေႃးဢမ်ႇထွမ်ႇလီလီ ယင်းဢမ်ႇမိူၼ်ၵႂၢမ်းလႃႇလူးၵွၼ်ႇလႃႈ၊ ပေႃးဝႃႈလႆႈၼွၼ်းၶိင်ႇၶူးၶမ်းၼႆတႄႉ ပဵၼ်ၶၢဝ်းယၢမ်းဢၼ်ၶိုၵ်ႉၶႅမ်ႉတႄႉတႄႉယဝ်ႉ သဵင်ၶူးၼၼ်ႉ မၼ်းယိုင်ႈၶႅၼ်းဢိုၼ်း ႁႂ်ႈၶႃႈလပ်းငၢႆႈမႃးယူႇ။
မိူဝ်ႈဢၼ်ၶႃႈတိုၵ်ႉငူပ်ႉၼႃႈဝၢင်းၼိူဝ်ၽိူၼ် ၶူးတႄႇပိုတ်ႇပပ်ႉသွၼ်လိၵ်ႈမႃး သဵင်ဢၼ်ဢမ်ႇၶႂ်ႈငိၼ်းၼၼ်ႉသမ်ႉ မေႃးၶဝ်ႈမႃးၸမ်ႁူၶႃႈဝႆႉသေ
“မႃးႁူင်းႁဵၼ်းၼႆႉ တႃႇမႃးၼွၼ်းၵူၺ်းႁႃႉ..လုၵ်ႉလႄႈ!!”
ၼၼ်ႉတႄႉပဵၼ်ၽူႈၵွၼ်းႁူင်းႁဵၼ်း ၶူးၸၢႆးလူင်ယဝ်ႉ တင်းတူဝ်တင်းသဵင်လူင်မၼ်းၼၼ်ႉ လၢတ်ႈဢဝ်ၶႃႈပေႃးဢမ်ႇႁတ်းတူင်ႉယဝ်ႉ။
“ပဵၼ်ၶူးသွၼ်ၸိူင်ႉႁိုဝ်လႃႇ! ပၼ်ႁႂ်ႈလုၵ်ႈႁဵၼ်းၼွၼ်းယူႇၸိူင်ႉၼႆ”
ၶူးၶမ်းၼၼ်ႉၵေႃႈ ၼႅတ်ႈၶဝ်ႈမႃးလၢတ်ႈတၢင်ၵႂႃႇ
“ယွမ်းၼွမ်းယူႇၶႃႈၶူး..ၵွပ်ႈဝႃႈယိင်းၶဝ်ဢမ်ႇပေႃးယူႇလီၶႃႈဢေႃႈ”
“ႁိုဝ်ႉ!..ဢွၵ်ႇၵႂႃႇလႄႈ ပေႃးဢမ်ႇၶႂ်ႈႁဵၼ်းၵေႃႈ လုၵ်ႈဢွၼ်ႇၸိူဝ်းၼႆႉ ဝႆႉမဝ်မၢင်ဢမ်ႇလႆႈ” တင်းၼႃႈတင်းတႃမၼ်းၼၼ်ႉ ယၵ်ႉတူၺ်းၶႃႈ ႁူဝ်တေႃႇတိၼ် ယူႇ။ သိုပ်ႇလၢတ်ႈထႅင်ႈ−
“လုၵ်ႈဢွၼ်ႇႁဵတ်းၵႅင်ႈဢမ်ႇႁဵတ်းၵႅင်ႈၶူးဢမ်ႇႁူႉႁႃႉ ဢဝ်ၶၢပ်ႈၶဝ်တိၵ်းတိၵ်း တေသင်ႇသွၼ်ၶဝ်လႆႈၸိူင်ႉႁိုဝ်”
ၶူးၸၢႆးၶမ်းၼၼ်ႉၵေႃႈ ဢမ်ႇၸၢင်ႈထဵင်သင်ယဝ်ႉ။ ၶႃႈၵေႃႈ ၸၢင်ႈတေႁဵတ်းႁိုဝ် ၵႃႈလႆႈဢွၵ်ႇၵႂႃႇတၢင်းၼွၵ်ႈၵူၺ်း။ လိူဝ်သေၶႃႈယဝ်ႉ ၸိုၼ်ႈသႂ် ဢၼ်ၼင်ႈတၢင်းၼႃႈၶႃႈၼၼ်ႉၵေႃႈ ဢွၵ်ႇမႃးၸွမ်းယူႇယဝ်ႉ။
မိူဝ်ႈၶႃႈႁၼ်မၼ်းမႃးၸွမ်းၼၼ်ႉၵေႃႈ လႆႈထၢမ်ၸူးမၼ်းၵႂႃႇသေ
“ဢွၵ်ႇမႃးၸွမ်းႁဵတ်းသင်လႃႇ!!”
“လွင်ႈႁဝ်းၵူၺ်း! တေမႃးသူၼ်ၸႂ်ႁဵတ်းသင်” ၼႃႈတႃမၼ်းၼၼ်ႉၵေႃႈ ၶတ်းတီႇတီႇလူင်ႁေ မၢင်ၵမ်းၵေႃႈ ၶႂ်ႈတွႆႇပၼ်မၼ်းႁေယဝ်ႉဝႃႈ ပေႃးမၼ်းဢမ်ႇႁၢႆႉတႄႉ တူၺ်းယဝ်ႉလႅပ်ႈတေၶႅၼ်ႇၽၢႆႇထုပ်ႉတွႆႇပိူၼ်ႈယူႇ။ ပေႃးမၼ်းၸႂ်လမ်ၼႆ ႁၼ်ၵမ်တႃမိုဝ်းယူႇတႃႇသေႇ ။
ၶႃႈႁၼ်မၼ်းၵႂႃႇတင်းၸဵင်ႇႁူဝ်ႉႁူင်းႁဵၼ်းၼၼ်ႉယဝ်ႉ ၼႅတ်ႈလမ်းၸွမ်းယူႇ။
“တေၵႂႃႇတၢင်းလႂ်လႃႇ!!”
“ပေႃးဢမ်ႇၶႂ်ႈတၢႆၵေႃႈ ဢမ်ႇထုၵ်ႇလီထၢမ်”
လၢတ်ႈဢဝ်ၶႃႈပေႃးမိူၼ်ႇမိုင်လူင်ၵႂႃႇယူႇ၊ မၼ်းၼၼ်ႉတႄႉ ၵျွၵ်းၶၢမ်ႈႁူဝ်ႉ ဝႅၼ်ဢွၵ်ႇႁူင်းႁဵၼ်းၵႂႃႇယဝ်ႉ။
ၶႃႈၵေႃႈ ဝၢႆႇသၢႆႉဝၢႆႇၶႂႃဢမ်ႇႁၼ်ၽႂ်လႄႈ ဢမ်ႇၸၢင်ႈႁဵတ်းသင်ၼၼ်ႉၵေႃႈ ဢၢၼ်းတေဝႅၼ်ႁူဝ်ႉဢွၵ်ႇၵႂႃႇၸွမ်းၶဝ်ယူႇ မိူဝ်ႈလႂ်မိူဝ်ႈပိူၼ်ႈလိုပ်ႈဢွၵ်ႇႁွင်ႈ ယူႇယဝ်ႉ။
“တေၵႂႃႇလႂ်လႃႇ!” သဵင်ဢၼ်ယၢမ်ႈငိၼ်း ၵိုတ်းၶႃႈဝႆႉယူႇတီႈတိၼ်ႁူဝ်ႉၼၼ်ႉယဝ်ႉ။
“ထၢမ်ၽႂ်ၶႃႈ..ၶႃႈႁႃႉ..”
ၶူးပိူင်းၾႃႉၼၼ်ႉၵေႃႈ ဝၢႆႇသၢႆႉဝၢႆႇၶႂႃသေ
“ဢိုမ်ႈ! တေႁႂ်ႈၶူးထၢမ်ၽႂ်လႃႇ တေလၵ်ႉဢွၵ်ႇႁူင်းႁဵၼ်းၸွင်ႇၸႂ်ႈ”
ပေႃးႁႂ်ႈၶႃႈလၢတ်ႈဝႃႈၸႂ်ႈ ၶူးၵေႃႈတေမိူဝ်းလၢတ်ႈၼၢႆးႁဝ်း၊ ၶႃႈၵေႃႈ တေဢမ်ႇလႆႈ ၵႃႈၶဝ်ႈမုၼ်းယဝ်ႉ။ ယွၼ်ႉပိူဝ်ႈႁိူၼ်းႁဝ်း လႄႈတင်းႁိူၼ်းၶူးၼၼ်ႉ ယူႇၸပ်းၵၼ် ၶႃႈပဵၼ်ၸိူင်ႉႁိုဝ် ႁဵတ်းသင်တီႈႁူင်းႁဵၼ်းၼႆ လႅၼ်ဢမ်ႇလႆႈသေဢိတ်းၼၼ်ႉယဝ်ႉ ယွၼ်ႉႁူတႃၼၢႆးႁဝ်းၼၼ်ႉ ၼမ်လိူဝ်သေဢၼ်ၶႃႈယူႇႁိူၼ်းလူးၵွၼ်ႇ။
“ဢမ်ႇၶႃႈ..ၶႃႈႁၼ်ဝႃႈ ၸွမ်းၸိူဝ်းၼႆႉမၼ်းၵတ်းလီၼႆၵူၺ်း..”
“ပဵၼ်သင်လႄႈမႃးယူႇၸွမ်းၸိူဝ်းၼႆႉလႃႇ ၶၢဝ်းၶိုၼ်ႈႁူင်းႁဵၼ်းၵေႃႈလူဝ်ႇယူႇၼႂ်းႁွင်ႈႁဵၼ်းဢမ်ႇၸႂ်ႈႁႃႉ”
“ၶူးဢမ်ႇပၼ်ယူႇၼႂ်းႁွင်ႈ ၶႃႈၵေႃႈဢမ်ႇမီးတီႈၵႂႃႇၼၼ်ႉၼႃႇ”
“ၺႃးၶူးလႂ်လိုပ်ႈဢွၵ်ႇႁွင်ႈထႅင်ႈယဝ်ႉလႃႇ!..”
“ၶူးလူင်..”
“ပဵၼ်လုၵ်ႈႁဵၼ်းၵေႃႈ လူဝ်ႇတင်ႈၸႂ်ႁဵၼ်းလေႃႇ ပေႃးဢမ်ႇၶႂ်ႈႁဵၼ်းသမ်ႉ.. တေမႃးႁူင်းႁဵၼ်းႁဵတ်းသင်”
“ၵေႃႈၼၼ်ႉယဝ်ႉ..ၶႃႈတေမႃးႁူင်းႁဵၼ်းႁဵတ်းသင်”
“လုၵ်ႈဢွၼ်ႇၵေႃႉၼႆႉ..ထဵင်ၵႂၢမ်းပိူၼ်ႈပေႃးဢမ်ႇတူၵ်းၶေႃႈတေႉလူင် ပေႃးၶႅၼ်ၵေႃႈ..ဢမ်ႇၵႂႃႇႁႃၶေႃႈတွပ်ႇႁင်းၵူၺ်းလႃႇ ဢွၵ်ႇၵႂႃႇႁႃၶေႃႈတွပ်ႇတၢင်းၼွၵ်ႈၼၼ်ႉဢမ်ႇလီႁိုဝ်”
“ၶႃႈၵေႃႈဢမ်ႇလႆႈၵႃႈၶဝ်ႈမုၼ်းႁေယဝ်ႉၵူၺ်းလေႃႇ…”
“ဝူၼ်ႉလႆႈတၢၼ်ႇၵႃႈၶဝ်ႈမုၼ်းၵူၺ်း..ပိူၼ်ႈသွၼ်ႁဵၼ်းလိၵ်ႈ ယင်းဢမ်ႇၶႂ်ႈႁဵၼ်းႁေၵွၼ်ႇ… ၶဝ်ႈမိူဝ်းၼႂ်းႁွင်ႈၶိုၼ်းလႄႈ”
“ၶူးပေႃးလိုပ်ႈၶႃႈဢွၵ်ႇႁွင်ႈယဝ်ႉ တေၶဝ်ႈမိူဝ်းႁဵတ်းသင်…၊ ၵႂႃႇႁႃၶေႃႈတွပ်ႇမႃးပၼ်ၶူးဢမ်ႇလီႁိုဝ်”
“ပေႃးၶႂ်ႈလႆႈၵႃႈၶဝ်ႈမုၼ်းၵေႃႈ ႁႃလၢႆးၶဝ်ႈႁဵၼ်းၶိုၼ်းမိူၼ်ၵဝ်ႇလႄႈ…”
ၶႃႈၵေႃႈႁိုဝ်တေၸၢင်ႈထဵင်လႆႈ လဵၼ်ႈယူႇၸွမ်းၸိူဝ်းၼၼ်ႉၵူၺ်း ယူႇယဝ်ႉ။
ထိုင်ၶၢဝ်းလူင်းႁူင်းႁဵၼ်းယဝ်ႉ မိူဝ်ႈဢၼ်ၶႃႈယင်းတိုၵ်ႉထူဝ်းလူတ်ႉထိပ်ႇၶႃႈ မိူဝ်းၵႂႃႇလွႆးလွႆးၼၼ်ႉ ၸင်ႇသမ်ႉမီးသဵင်ႁွင်ႉၸူးၶႃႈ။
“သႅင်ၶမ်း!! သႅင်ၶမ်း ပႂ်ႉၵမ်ႉၼိုင်ႈလႄႈ”
သဵင်ၼၼ်ႉတႄႉပဵၼ်သဵင်ၼူၼ်းမူဝ်ယဝ်ႉ ယွၼ်ႉဢမ်ႇပေႃးမီးၽႂ်ၵႆႉႁွင်ႉၸိုဝ်ႈၶႃႈၸိူင်ႉၼၼ်လႄႈ ၸိုဝ်ႈၼၼ်ႉဢမ်ႇပေႃးမိုတ်ႈႁူၵႃႈႁိုဝ်။
ၽွင်းဢၼ်ၼူၼ်းမူဝ်ႁွင်ႉၸူးၶႃႈယူႇၼၼ်ႉ ၸင်ႇသမ်ႉမီးသဵင်ဢၼ်ယၢမ်ႈငိၼ်းႁွင်ႉမႃး။
“ဢေးယိင်း!!”
ၶႃႈၸင်ႇတေဝၢႆႇတူၺ်း ၼၼ်ႉတႄႉလႆႈႁၼ် ၸုမ်းပီႈဢၢႆႈၶႃႈ ၸုၵ်းယူႇႁိမ်းၼူၼ်းမူဝ် ၼၼ်ႉယဝ်ႉ။
“မီးလွင်ႈသင်လႃႇ..” ၶႃႈၵေႃႈပႆမႃးၸူးၶဝ်ယူႇ။
“ဢူၺ်းၵေႃႉမႂ်းႁွင်ႉ ဢမ်ႇလႆႈငိၼ်းႁႃႉ!”
“ႁႃ! ႁွင်ႉၶႃႈမိူဝ်ႈလႂ် ၶႃႈဢမ်ႇလႆႈငိၼ်း”
ၼူၼ်းမူဝ်ဢၼ်ယူႇၼႂ်းၵႄႈၶဝ်ၼၼ်ႉတႄႉ မိူၼ်ႇမိုင်လူင်ၵႂႃႇၵူၺ်းယူႇ ယွၼ်ႉပိူဝ်ႈၼုမ်ႇလဝ်းၼႂ်းႁူင်းႁဵၼ်းႁဝ်း ဢွမ်ႇလွမ်ႉမၼ်းဝႆႉၼၼ်ႉယဝ်ႉ။ ယၢမ်းၼၼ်ႉ ၸွမ်ၶိူဝ်းၵေႃႈ လၢတ်ႈၸူးတီႈ ၼူၼ်းမူဝ်ၵႂႃႇ
“သူႁဵၼ်းႁွင်ႈလဵဝ်ၵၼ်ၸွင်ႇၸႂ်ႈ သူယႃႇႁွင်ႉၶဝ်ဝႃႈသႅင်ၶမ်းၼႃႈ ႁွင်ႉၶဝ်ဝႃႈ ဢေးယိင်းၼႆၵေႃႈလႆႈယဝ်ႉ”
“ၸိုဝ်ႈမၼ်းႁွင်ႉသႅင်ၶမ်း! မၼ်းယင်းဢမ်ႇတွင်းၵွၼ်ႇယဝ်ႉၼၼ်ႉ” သႅင်ၶိူဝ်းသိုပ်ႇလၢတ်ႈၸူး။
ၸုမ်းၶဝ်ၵေႃႈပူၼ်ႉၵႂႃႇပႅတ်ႈ ၶႃႈလႄႈတင်းၼူၼ်းမူဝ်ယဝ်ႉ။ ၼူၼ်းမူဝ်ဢၼ်လႆႈႁၼ်ၶဝ်ၼၼ်ႉၵေႃႈ ယင်းတိုၵ်ႉမိူၼ်ႇမိုင် တူၺ်းၸွမ်းလင်ၶဝ်လူင်ၵႂႃႇယူႇ ၶႃႈတႄႉၵေႃႈ ဢမ်ႇလႆႈသူၼ်ၸႂ်သင်သေ လၢတ်ႈၸူးတီႈမၼ်းၵႂႃႇ
“သူႁွင်ႉႁဝ်းမီးလွင်ႈသင်လႃႇ!!..”
မၼ်းၸင်ႇတေလႆႈသတိမႃးယဝ်ႉ “ဢေႃႈ..ႁဝ်းဢဝ်ပပ်ႉဢၼ်သူသူင်ႇမိူဝ်ႈၵၢင်ဝၼ်းၼၼ်ႉမႃးပၼ်”
မၼ်းယိုၼ်ႈပၼ်ယဝ်ႉၵေႃႈ ၶႃႈၼႅတ်ႈၸၵ်ႉသႂ်ႇထူင်ၶႃႈၵႂႃႇၵမ်းလဵဝ်ယဝ်ႉ ၵႂႃႇပႅတ်ႈမၼ်းသေ မၼ်းၵေႃႈတိုၵ်ႉလမ်းၸွမ်းၶႃႈမႃးယူႇလႄႈ ထၢမ်ၸူးၶႃႈၵႂႃႇ−
“သူ..ႁူႉၸၵ်းၶဝ်ႁေႁႃႉ တူၺ်းမိူၼ်လႅပ်ႈမိုတ်ႈၵၼ်တေႉယဝ်ႉ”
“ပဵၼ်သင်လႄႈႁဝ်းတေလႆႈႁူႉၸၵ်းၶဝ်ၸိူဝ်းၼၼ်ႉလႃႇ ႁဝ်းဢမ်ႇႁူႉၸၵ်းၶဝ်ၼႃ”
ၶႃႈၵေႃႈၵႂႃႇၼႅတ်ႈပႅတ်ႈမၼ်းၵႂႃႇယူႇ။
—————————–
ၼူၼ်းမူဝ်ၵေႃႈ ပိၵ်ႉပပ်ႉဢၼ်တိုၵ်ႉလူယူႇၼၼ်ႉဝႆႉၵႅပ်ႉၼိုင်ႈသေ တူၺ်းၼႃႈသႅင်ၶမ်းယဝ်ႉ။
“ပေႃးမႃးဝူၼ်ႉတူၺ်းၶိုၼ်းယဝ်ႉ မိူဝ်ႈၼၼ်ႉသူၸႂ်လမ်ၸႂ်ႁၢႆႉတေႃႇႁဝ်းၵႃႈပဵၼ် တေႇၼႃႈႁိူၼ်းပႅတ်ႈသူၵေႃႈ လႅပ်ႈတေတွပ်ႇတႅၼ်းၶိုၼ်း ဢၼ်သူႁဵတ်းၼိူဝ်ႁဝ်းဝႆႉၼၼ်ႉယူႇ”
“လႆႈၸိူင်ႉႁိုဝ်! မိူဝ်ႈၼၼ်ႉ..ႁဝ်းပႆႇႁူႉၸၵ်းၵၼ်လူး မိူဝ်ႈလဵဝ်ႁဝ်းႁူႉၸၵ်းၵၼ်ယဝ်ႉ ႁဵတ်းၸိူင်ႉၼၼ်တေႃႇၵၼ်ႁိုဝ်လႆႈၼႄႇ”
သႅင်ၶမ်းၼၼ်ႉၵေႃႈ လၢႆႈၶေႃႈၵႂၢမ်းမၼ်းပႅတ်ႈသေယဝ်ႉ ယၵ်ႉတူၺ်းၼႃႈ ၼူၼ်းမူဝ်သေ
“မိူဝ်ႈလႆႈႁၼ်ၶဝ်မႃးမူႇသူၸိူင်ႉၼၼ် ပဵၼ်ၸိူင်ႉႁိုဝ်ဝႆႉလႃႇ”
“ႁဝ်းၵေႃႈတူၵ်းၸႂ်ယူႇၵူၺ်းလေႃႇ..ယူႇယူႇၼုမ်ႇလဝ်းၼႂ်းႁူင်းႁဵၼ်းႁဝ်း မႃးလွမ်ႉႁဝ်းဝႆႉ..ၽွင်းၼၼ်ႉဢဝ်ႁဝ်းပေႃးၵႂင်ၵႂႃႇမူတ်းယဝ်ႉ”
“ႁဝ်းၵေႃႈဢမ်ႇထၢင်ႇဝႃႈ..သူတေယွင်ႇၽူႈၸၢႆး ၸိူင်ႉၼင်ႇၽူႈယိင်းတၢင်ႇၵေႃႉၶဝ်ၸိူဝ်းၼၼ်ႉၼႃ မိူၼ်သူတေဢမ်ႇသူၼ်ၸႂ်ၽူႈၸၢႆးလူးၵွၼ်ႇ မိူဝ်ႈငိၼ်းသူထၢမ်ၸိူင်ႉၼၼ် ႁဝ်းၵေႃႈတူၵ်းၸႂ်ယူႇဢိတ်ႉၼိုင်ႈ”
“သူလၢတ်ႈမႃးၵေႃႈၸႂ်ႈယူႇ..ႁဝ်းၵေႃႈမီးႁူဝ်ၸႂ်မေႃႁၵ်ႉယူႇၵူၺ်းလေႃႇ လိူဝ်သေဝႃႈဢမ်ႇႁတ်းၼႄဢွၵ်ႇမႃးၼၼ်ႉၵူၺ်း”
“သူလႆႈၸႂ်ၶဝ်မိူဝ်ႈၼၼ်ႉ ၸွင်ႇၸႂ်ႈႁိုဝ်”
ၼူၼ်းမူဝ်ဢမ်ႇလႆႈတွပ်ႇ ၵူၺ်းလၢႆႈၶေႃႈၵႂၢမ်းသေထၢမ်ၸူးၶိုၼ်း
“ယဝ်ႉသူလူး မိူဝ်ႈလႂ်တေလိုမ်းၶဝ်သေ တေႇၼႃႈႁိူၼ်းမိူၼ်ပိူၼ်ႈၽွင်ႈလႃႇ”
“လိုၵ်းယဝ်ႉ ၼွၼ်းလႆႈယဝ်ႉႁဝ်းဝႃႈ မိူဝ်ႈၽုၵ်ႈၵေႃႈ သူလူဝ်ႇၵႂႃႇလိူၵ်ႈၶူဝ်း ဢမ်ႇၸႂ်ႈႁိုဝ်”
“ယႃႇမႃးလၢႆႈၶေႃႈၵႂၢမ်းယူႇယဝ်ႉ..ၶဝ်ၵေႃႉၼၼ်ႉပဵၼ်ၽႂ်လႃႇ ဢမ်ႇႁၼ်ယွမ်းလၢတ်ႈၼႄၵၼ်သေပွၵ်ႈ..မီးၼႂ်းပပ်ႉၼႆႉယူႇႁႃႉ”
သႅင်ၶမ်းၼၼ်ႉၵေႃႈဢမ်ႇလႆႈတွပ်ႇၸူးၶိုၼ်းသင်
“မီးတေႉတေႉၼၼ်ႉယဝ်ႉ ႁဝ်းတေလူႁႂ်ႈမၼ်းပေႃးသုတ်းလူႉ..”
တွၼ်ႈသွင်သုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသၢမ်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဢမ်ႇၸႂ်ႈလွင်ႈတေႉ။
