တွၼ်ႈသီႇ
ၽွင်းတိုၵ်ႉၼွၼ်းဝၢၼ်ယူႇၼၼ်ႉ ၸင်ႇသမ်ႉလႆႈငိၼ်းသဵင်ၼူၼ်းမူဝ် ႁွင်ႉၸူး
“သူ! လုၵ်ႉလႆႈယဝ်ႉ..ၶူးပိူင်းၾႃႉႁႂ်ႈမႃးႁွင်ႉ!”
“ယႃႇမႃးလႅၼ်ၵၼ်ယူႇယဝ်ႉ!..မိူဝ်ႈၼႆႉဢမ်ႇမီးၶိင်ႇၶူး”
မၼ်းၵေႃႈမႃးၼင်ႈႁိမ်းၶႃႈသေယဝ်ႉ
“လိုပ်ႈသႅင်ႁၵ်ႉမိူဝ်းႁေ တူဝ်ၸဝ်ႈၵဝ်ႇသမ်ႉၵေႃႉယူႇၼႆဢိူဝ်ႈၼေႃႈ”
“ပိူၼ်ႈဢမ်ႇၶိုၼ်ႈႁူင်းႁဵၼ်းႁႃႉ ပဵၼ်သင်လႄႈၶၢဝ်းၼႆႉမႃးမီးယူႇတီႈၼႆႈလႃႇ”
“ပိူၼ်ႈလိုဝ်ႈၵိၼ်ၶဝ်ႈဝၼ်းယဝ်ႉ! တူၺ်းဢွမ်မွင်းၽွင်ႈလႄႈ..ယူႇလႆႈၸိူင်ႉႁိုဝ်လႃႇ ၼွၼ်းတင်းဝၼ်းတင်းဝၼ်းၸိူင်ႉၼႆ”
“ဢမ်ႇဝႃႈႁဝ်းတေႁဵတ်းသင်ၵေႃႈ..ပဵၼ်လွင်ႈႁဝ်းၵူၺ်း သူတၼ်းၼႃႇႁႃႉ တေလႆႈမႃးသုၵ်ႉယုင်ႈၵၼ်ၸိူင်ႉၼႆ”
“ႁဝ်းတၼ်းတေႉယဝ်ႉဝႃႈ..” ယုမ်ႉၸူးၶႃႈၼင်ႇဢူၼ်ႈဢွၼ်ႇယူႇ။
ပေႃးၶႃႈလၢတ်ႈၸိူင်ႉၼႆ တၢင်ႇၵေႃႉတႄႉ တေၸႂ်လမ်ႁေပၢႆႈယဝ်ႉ ၵူၺ်းၵႃႈၶဝ်သမ်ႉယုမ်ႉၸူးၶႃႈ ၼင်ႇဢမ်ႇလႆႈသူၼ်ၸႂ် ၶေႃႈၵႂၢမ်းၶႃႈၼၼ်ႉသေဢိတ်း၊ ႁဵတ်းႁႂ်ႈၶႃႈဢမ်ႇၶႂ်ႈယူႇၸွမ်းၶဝ်ယဝ်ႉ။
ၼူၼ်းမူဝ်ၼၼ်ႉၵေႃႈဢဝ်ၵွၵ်းၶဝ်ႈဝၼ်းမၼ်း မႃးတမ်းႁိမ်းၶႃႈယဝ်ႉ ၽုၺ်ႇဢွၵ်ႇမႃးၵမ်းၸၼ်ႉၸၼ်ႉသေ ဢဝ်ၶဝ်ႈမၼ်းၶိုင်ႈၼိုင်ႈၼၼ်ႉ ၽႄသႂ်ႇၼႂ်းၽႃႁူမ်ႇၵွၵ်းသွႆးၼၼ်ႉယူႇ။
“ၵိၼ်ၶဝ်ႈၸွမ်းၵၼ်လႄႈ..”
“ၵိၼ်ႁင်းၵူၺ်းသူလႃႈ!..”
ၶႃႈၵေႃႈလုၵ်ႉၵႂႃႇပႅတ်ႈမၼ်းႁေယဝ်ႉ မႃးယူႇၼႂ်းႁွင်ႈၶိုၼ်းယူႇ။ မိူဝ်ႈၶဝ်ႈႁွင်ႈမႃးၼၼ်ႉ ႁၼ်သႅင်ႁၵ်ႉၼင်ႈၵိၼ်ၶဝ်ႈယူႇႁင်းၵူၺ်းမၼ်းလႄႈ ၶႃႈၵေႃႈၵႂႃႇၸူးမၼ်းသေ
“ႁူဝ်ၼႃႈပႂ်ႉဝႆႉယူႇ..တီႈမိူဝ်ႈၵႆႈၼၼ်ႉၼေႈ”
မိူၼ်မၼ်းတေပွင်ႇၸႂ်ယူႇ သိမ်းၵွၵ်းၶဝ်ႈမၼ်းသေ ဢွၵ်ႇႁွင်ႈၵႂႃႇတေႉၼင်ႇၵဝ်ႇ။
ယွၼ်ႉပဵၼ်ၶၢဝ်းၵိၼ်ၶဝ်ႈဝၼ်းလႄႈ သႅင်ဢွင်ႇၼၼ်ႉၵေႃႈ မိူၼ်တေပႃးၽၵ်းဝၢၼ်ဝႆႉသေယဝ်ႉ ႁွင်ႉပိူၼ်ႈမႃးၵိၼ်ၶဝ်ႈၵုမ်းမၼ်းယူႇ ၵူၼ်းၸိူဝ်းဢၼ်ယူႇၼႂ်းႁွင်ႈၼၼ်ႉၵေႃႈ ဢွၼ်ၵၼ်ၵႂႃႇၵိၼ်ၵုမ်းမၼ်းယဝ်ႉ။ ၵူၺ်းၵႃႈ မီးၵူၼ်းၵေႃႉၼိုင်ႈ ပႃးၽၵ်း ပဵၼ်မဵဝ်းဢၼ်မၼ်းဢမ်ႇမၵ်ႉၼၼ်ႉသေ လၢတ်ႈၸူးၵႂႃႇ မိူၼ်ၶႂ်ႈလိုပ်ႈပႃး ၼၼ်ႉယဝ်ႉ။
“ၶမ်းၽွင် မိူၼ်ဝႃႈၽိူၼ်ႁဝ်းမၼ်းတဵမ်ယဝ်ႉၼႃႈ”
ၶမ်းၽွင်ၼၼ်ႉၵေႃႈ ဢမ်ႇၸၢင်ႈႁဵတ်းႁိုဝ် ၵႂႃႇၼင်ႈၵိၼ်ယူႇႁင်းၵူၺ်းမၼ်းၵူၺ်း။
မိူဝ်ႈႁၼ်ပိူၼ်ႈၵိၼ်ၶဝ်ႈၸိူင်ႉၼၼ် ၶႃႈၵေႃႈၼင်ႇႁၢင်ႈတွင်ႉမႆႈၶဝ်ႈမိူၼ်ၶဝ်မႃးယဝ်ႉ။ ၵူၺ်းၵႃႈ မိူဝ်ႈၼႆႉဢမ်ႇလႆႈဢဝ်ၶဝ်ႈမႃး ယွၼ်ႉပိူဝ်ႈၶႃႈလုၵ်ႉလႃႈ တၼ်းလႆႈဢဝ်ထူင်သေ ၼႅတ်ႈလႅၼ်ႈမႃးၵူၺ်း။ ဢမ်ႇၺႃးတၢမ်ႇၵေႃႈ ၵၢမ်ႇလီၼႃႇယဝ်ႉ။ သမ်ႉဝႃႈလႆႈၵႃႈၶဝ်ႈမုၼ်းမႃးယူႇသေတႃႉ ၶႃႈဢမ်ႇၶႂ်ႈၸၢႆႇမၼ်း ၶႃႈလူဝ်ႇႁွမ်ဝႆႉ တႃႇသိုဝ်ႉၾူင်း ၵပ်းသိုပ်ႇၸူးမႄႈႁဝ်း။
ဝၢႆးသေပေႃႈၶႃႈလူႉသဵင်ႈၵႂႃႇယဝ်ႉ မႄႈၶႃႈၵေႃႈ ၵႂႃႇႁႃငိုၼ်း တီႈၼွၵ်ႈမိူင်း ၸဵမ်မိူဝ်ႈၵႂႃႇၵေႃႈ ဢမ်ႇၶိုၼ်းပွၵ်ႈမႃး တေႃႇထိုင်ယၢမ်းလဵဝ်၊ ပေႃးသူင်ႇငိုၼ်းမႃးၵူၺ်း မၼ်းတေသိုပ်ႇၾူင်းမႃး ပေႃးဢမ်ႇၼၢႆးႁဝ်းၵေႃႈ ဢၢႆႈၸၢႆးႁဝ်းၵူၺ်းလႆႈၵႂႃႇႁပ်ႉႁေ လႆႈလၢတ်ႈတေႃႇ ၶႃႈတႄႉဢမ်ႇတွၼ်ႉလႆႈလၢတ်ႈတေႃႇႁေပွၵ်ႈ ဢမ်ႇလႆႈႁၼ်ၶဝ်မီးၵႂႃႇႁူၵ်းပီႊၸမ်ၸမ်ယဝ်ႉ ၶႃႈၸႂ်ထိုင်ၶဝ်တေႉယဝ်ႉ။
ယၢမ်းၼၼ်ႉ ဢၢႆႈၸၢႆးႁဝ်းၵေႃႈ ၶဝ်ႈမႃးၼႂ်းႁွင်ႈသေယဝ်ႉ ၽူႈယိင်းၼႂ်းႁွင်ႈၼၼ်ႉၵေႃႈ ဢွၼ်ၵၼ်ယၵ်ႉတူၺ်းၸွမ်းမၼ်းယူႇ၊ လိူဝ်သေမၼ်းၼၼ်ႉသမ်ႉ မီးၸွမ်ၶိူဝ်းၶဝ်ႈမႃးၸွမ်းလႄႈ ၶဝ်ၸိူဝ်းၼၼ်ႉၵေႃႈ ဢွၼ်ၵၼ်ဝိၼ်ႇဝၢႆႇတူၺ်းၸွမ်း ၶေႃးပေႃးၶႂ်ႈလိမ်ႇယဝ်ႉ။ ၵတ်းၵႃႈမႃးသွင်ၵေႃႉၵူၺ်းလႃႈ သင်မႃးတင်းမူတ်းတႄႉ ယူဝ်ၵႃႉၶဝ်သမ်ႉပေႃးယွႆႉယဝ်ႉလူးၵွၼ်ႇ။
ဢၢႆႈၸၢႆးႁဝ်းၼၼ်ႉၵေႃႈ ဢဝ်ၵွၵ်းၶဝ်ႈဢၼ်မၼ်းယိပ်းမႃးၼၼ်ႉ တမ်းပၼ်ၼိူဝ်ၽိူၼ်ၶႃႈသေ ဢွၵ်ႇၵႂႃႇပႅတ်ႈယူႇ။ ယၢမ်းၼၼ်ႉ ၸွမ်ၶိူဝ်းၵေႃႈ ၸုၵ်းတေႃႇၼႃႈၶႃႈသေ
“တူၺ်း..လႅပ်ႈတွင်ႉမႆႈၶဝ်ႈတေႉယဝ်ႉ!..ၼႂ်ၼႆႉၵေႃႈဢမ်ႇတၼ်းလႆႈၵိၼ်ၶဝ်ႈၵွၼ်ႇယူဝ်ႉ..”
“လၢတ်ႈယဝ်ႉယဝ်ႉၵေႃႈဢွၵ်ႇၵႂႃႇလႄႈ!..”
မၼ်းၼၼ်ႉၵေႃႈ ဢဝ်ၶဝ်ႈမုၼ်းဢၼ်သိူင်ႇဝႆႉတၢင်းလင်ၼၼ်ႉပၼ်ၶႃႈသေယဝ်ႉ။
“ၽၢၵ်ႇဢဝ်ပၼ်ၶဝ်ၽွင်ႈလႄႈၼႃႈ”
ႁႂ်ႈၶႃႈတူၺ်းၼႂ်းၸေႈၼၼ်ႉယူႇ ၼႂ်းၼၼ်ႉတႄႉ တေပဵၼ်လိၵ်ႈၶဵဝ်ယဝ်ႉ။ သႂ်ႇဝႆႉတၢင်းၼွၵ်ႈမၼ်းဝႃႈ ၶမ်းလိူၼ်သႂ်ၼႆယူႇ။ ၶႃႈၵေႃႈယိပ်းဢဝ်ၶဝ်ႈမုၼ်းၼၼ်ႉမႃးသေ
“ၶဝ်ႈမုၼ်းတႃႇၶႃႈလူးမီးလႂ်လႃႇ..”
“ဢမ်ႇမီး..မီးဢၼ်လဵဝ်ၵူၺ်း..”
“ၸိူင်ႉၼၼ်ႁႃႉ” မိူဝ်ႈပဵၼ်ၸိူင်ႉၼၼ် ၶႃႈၵေႃႈသိၵ်ႇယႃႉထူင်ၶဝ်ႈမုၼ်း တေႃႇၼႃႈမၼ်းၵမ်းလဵဝ်သေ ဢဝ်မၼ်းသမ်ႉပေႃးၵမ်သူပ်းၵမ်ပၢၵ်ႇသႂ်ႇၶႃႈ မိူၼ်မီးၸႂ်ၶႂ်ႈလႃႇၶႃႈၵေႃႈလူဝ်လူဝ်ၼၼ်ႉယဝ်ႉ။ ၶႃႈၵေႃႈဢမ်ႇသူၼ် ၵိၼ်ၶဝ်ႈမုၼ်းၼၼ်ႉ တေႃႇၼႃႈမၼ်းၼင်ႇႁၢင်ႈဝၢၼ်ႁၢင်ႈမၼ်းယူႇ။ မၼ်းၵေႃႈဢွၵ်ႇၵႂႃႇပႅတ်ႈႁေယဝ်ႉ။
ဝၢႆးသေၶႃဢွၵ်ႇၵႂႃႇယဝ်ႉ ၵူၼ်းၼႂ်းႁွင်ႈၼၼ်ႉၵေႃႈ ယင်းတိုၵ်ႉဢွၼ်ၵၼ်မိူၼ်ႇမိုင်တူၺ်းၶႃႈယူႇ ၵူၺ်းၵႃႈၶႃႈၵေႃႈဢမ်ႇသူၼ်ၸႂ်သင်ၸွမ်းၶဝ်။
ၼႂ်းပၵ်းပိူင်ႁူင်းႁဵၼ်းတင်းမူတ်းၼႆႉ ဢၼ်ၶႃႈတိုဝ်းၵမ်လႆႈလီလိူဝ်ပိူၼ်ႈၼၼ်ႉ တေပဵၼ်ၶေႃႈဢၼ်ဝႃႈႁၢမ်ႈဝႆႉၸူႉၼႆၼၼ်ႉယဝ်ႉ။ ၶေႃႈၼႆႉ ၶႃႈယုမ်ႇလႆႈဝႃႈ တိုၼ်းတေဢမ်ႇႁႂ်ႈမၼ်းလူႉ ၶႃႈယုမ်ႇၸႂ်ဝႃႈ ဢမ်ႇမီးၽႂ်လႆႈၸႂ်ၵူၼ်းပႅတ်ႈလၢႆၸိူင်ႉၼင်ႇၶႃႈ၊ ယဝ်ႉၵေႃႈ ၶႃႈဢမ်ႇလႆႈသူၼ်ၸႂ်ၽႂ်ယူႇယဝ်ႉ။
ပေႃးတေႁႂ်ႈလၢတ်ႈၵၼ်ၵေႃႈ ၼႂ်းပၵ်းပိူင်တင်းမူတ်းၼႆႉ လုၵ်ႈႁဵၼ်းၵမ်ႈၼမ် တေဢွၼ်ၵၼ်ၽိတ်းၶေႃႈၼႆႉလိူဝ်ပိူၼ်ႈယဝ်ႉ။ ၵူၺ်းၵႃႈ ၶႃႈတေဢမ်ႇပၼ်ႁႂ်ႈမၼ်းၽိတ်း သမ်ႉဝႃႈၶႃႈတေၽိတ်းၵူႈၶေႃႈၵေႃႈ ၶေႃႈၼႆႉၶႃႈတိုၼ်းတေဢမ်ႇဢၢၼ်းၽိတ်း ၼၼ်ႉယဝ်ႉ။ ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း ဢၼ်ၶႃႈလႆႈယိပ်းလိၵ်ႈၶဵဝ် ဢၼ်ၸွမ်ၶိူဝ်းၽၢၵ်ႇပၼ်ပိူၼ်ႈ ႁၼ်ယဝ်ႉၵေႃႈ သမ်ႉပေႃးၶႂ်ႈဢဝ်ဝိုတ်ႉပႅတ်ႈၵမ်းလဵဝ်ယဝ်ႉ ၸၢင်ႈႁဵတ်းႁိုဝ် ၵိၼ်ၶဝ်ႈမုၼ်းၶဝ်ပႅတ်ႈယဝ်ႉလူး ၵႃႈတေလႆႈၸွႆႈၶဝ်ယူႇၵူၺ်း။
ၵူၺ်းၵႃႈမိူဝ်ႈၼႆႉသမ်ႉ ၶမ်းလိူၼ်သႂ်ဢမ်ႇမႃးႁူင်းႁဵၼ်း ယုမ်ႇဝႃႈလိၵ်ႈၼၼ်ႉ မီးယူႇၼႂ်းမိုဝ်းၶႃႈၼၼ်ႉယဝ်ႉ။ ပေႃးၶူးၶဝ်ႁၼ်တႄႉ ၶႃႈတေၸၢင်ႈၵၢမ်ႇႁၢႆႉၸွမ်းဢမ်ႇႁၢင်ႉ၊ မိူဝ်ႈတိုၵ်ႉမီးတီႈၶႃႈယူႇၼၼ်ႉ ၼင်ႇႁၢင်ႈၸႂ်ၵေႃႈ ပေႉမႃးဢမ်ႇလီလူင်လၢင်ဝႆႉယဝ်ႉ။
ၽွင်းၸမ်လူင်းႁူင်းႁဵၼ်းၼၼ်ႉ ၶူးလူင်လႄႈၶူးလၢႆလၢႆၵေႃႉ ဢွၼ်ၵၼ်ၶဝ်ႈႁွင်ႈႁဵၼ်းမႃးသေ ၸွမ်းသွၵ်ႈထူင်လုၵ်ႈႁဵၼ်းၵူႈၵေႃႉယူႇယဝ်ႉ ၶူးၶဝ်ၵေႃႈ တႄႇသွၵ်ႈမႃးၽိူၼ်တၢင်းၼႃႈၼၼ်ႉဢွၼ်တၢင်းယဝ်ႉ။ ၶႃႈဢၼ်ႁၼ်ၸိူင်ႉၼၼ်ၵေႃႈ တူၺ်းလိၵ်ႈၼၼ်ႉသေ မိုင်ၸိူဝ်ႈလူင်ၵႂႃႇယူႇၵူၺ်း။ မိူဝ်ႈၶူးၶဝ်ၵူတ်ႇထတ်းလူင်းမႃးၸမ်တိၵ်းတိၵ်းၼၼ်ႉ ၶႃႈၵေႃႈဢမ်ႇၸၢင်ႈႁဵတ်းႁိုဝ် ၵမ်ၵမ်သေယဵတ်ႈသႂ်ႇသူပ်းၵႂႃႇယူႇယဝ်ႉ။ ၵတ်းၵႃႈမၼ်းဢမ်ႇၽိုၼ်ယႂ်ႇလႃႈ ၶူးၶဝ်ၵေႃႈ ၸႅတ်ႈတူၺ်းယဝ်ႉ ဢမ်ႇႁၼ်ႁင်လႄႈ ဢွၼ်ၵၼ်ဢွၵ်ႇၵႂႃႇယူႇ။ ၶႃႈၸင်ႇၶိုၼ်းၶၢႆးဢွၵ်ႇမႃးသေယဝ်ႉ ၽိုၼ်ၸေႈၼၼ်ႉၵေႃႈသမ်ႉပေႃးဢမ်ႇလီတူၺ်းသေဢိတ်း ၵႃႈလႆႈပႅတ်ႈၵႂႃႇႁေၵူၺ်းယဝ်ႉ။
မိူၼ်ဝႃႈလုၵ်ႈႁဵၼ်းၼႂ်းႁွင်ႈႁဝ်းၼၼ်ႉ ၶူးတေၺွပ်းလႆႈယူႇလၢႆၵေႃႉမိူၼ်ၵၼ်။ ထိုင်ၶၢဝ်းၶဝ်ႈထႅဝ်လူင်းႁူင်းႁဵၼ်းယဝ်ႉၼႆၵေႃႈ ၶူးၵေႃႈ ႁွင်ႉဢဝ်ၵူၼ်းၸိူဝ်းဢၼ်ထူပ်းႁၼ်လိၵ်ႈၶဵဝ်လႄႈ ၾႆးၶိတ်ႇလႅၼ်းယႃႈ၊ ဢၼ်ပႃးၶိူင်ႈမိုဝ်းဢၼ်တေႁဵတ်းႁၢႆႉၵၼ်ၸိူဝ်းၼႆႉ ဢွၵ်ႇပႂ်ႉဝႆႉ ယူႇယဝ်ႉ။
လုၵ်ႈႁဵၼ်းဢၼ်ၶူးႁွင်ႉဝႆႉၸိူဝ်းၼၼ်ႉၵေႃႈ ၶူးၶဝ်ၸင်ႇလႆႈပၼ်တၢမ်ႇၵႂႃႇယူႇ။ မိူဝ်ႈဢၼ်တေပၼ်တၢမ်ႇလုၵ်ႈႁဵၼ်းၼၼ်ႉသမ်ႉ ၶူးလူင်လႄႈတင်းၵႅမ်မၼ်း ၶူးၼုမ်ႇလႅင်းၼၼ်ႉ မိူၼ်ၵႂၢမ်းဢမ်ႇၶဝ်ႈၵၼ်မႃးယဝ်ႉ။
“ၶူးႁဝ်းတေႁႅမ်လုၵ်ႈဢွၼ်ႇၸိူင်ႉၼႆ ဢမ်ႇလီၶႃႈယူဝ်ႉ” ၶူးၼုမ်ႇလႅင်းလၢတ်ႈ
“လုၵ်ႈႁဵၼ်းၸိူဝ်းၼႆႉ..ၸင်ႇႁႃၶိုၼ်ႈႁူင်းႁဵၼ်းၵူၺ်း ပေႃးဢွၼ်ၵၼ်ၽိတ်းပၵ်းပိူင်ထိုင်တၢၼ်ႇၼႆႉယဝ်ႉ ပေႃးဢမ်ႇႁႅမ်တႄႉဢမ်ႇလႆႈယဝ်ႉ မိူဝ်းၼႃႈမႃးတေမီးၼမ်တၢၼ်ႇႁိုဝ်” ၶူးလူင်လၢတ်ႈ
“မၼ်းၵေႃႈဢမ်ႇလႆႈပဵၼ်လွင်ႈဢၼ်ႁၢႆႉႁႅင်းသင် ပေႃးတေႁႅမ်လုၵ်ႈႁဵၼ်းၼႆၵေႃႈ ၶဝ်တေၸဵပ်းလၢႆလၢႆၵူၺ်း”
“ပေႃးဢမ်ႇႁႅမ်ၶဝ် တေႁဵတ်းႁိုဝ်လၢပ်ႇလႃႇ မၼ်းလူဝ်ႇႁဵတ်းတူဝ်ယၢင်ႇပၼ်ႁႂ်ႈၶဝ်ႁၼ်ဢိူဝ်ႈ ၶဝ်ၸင်ႇဢမ်ႇႁတ်းႁဵတ်းထႅင်ႈ”
“ႁႃလွၵ်းလၢႆး ဢၼ်လီလိူဝ်သေႁႅမ်ဢဝ်ဢမ်ႇလီၶႃႈႁႃႉ ႁႂ်ႈၶဝ်ႁဵတ်းၵၢၼ်ဢဝ်ၵေႃႈလႆႈၶႃႈလူး”
“ႁႅမ်ဢဝ်ၼၼ်ႉယဝ်ႉ လီလိူဝ်ပိူၼ်ႈ! ႁႂ်ႈၶဝ်ႁဵတ်းၵၢၼ်ၶဝ်တေႁဵတ်းႁိုဝ်လၢပ်ႇလႆႈလႃႇ”
“ႁႅမ်ၵေႃႈလႆႈတင်းၸဵပ်းၵူၺ်း ပေႃးမဵဝ်းၶႂ်ႈႁဵတ်းၵေႃႈတိုၼ်းႁဵတ်းထႅင်ႈယူႇယဝ်ႉ”
“တူပ်းႁႂ်ႈလၢပ်ႇတၢပ်ႇႁႂ်ႈၵူဝ်ၼႆဢမ်ႇယၢမ်ႈငိၼ်းႁႃႉ!”
“ၸႂ်ႈတႄႉၸႂ်ႈယူႇ လုၵ်ႈဢွၼ်ႇၶဝ်တေဢမ်ႇဝူၼ်ႉၸိူင်ႉၼၼ်ၵေႃႈပဵၼ်လႆႈ ”
“ၶဝ်ၵေႃႈထုၵ်ႇလီႁူႉယူႇဢမ်ႇၸႂ်ႈႁႃႉ ပေႃးၽိတ်းပၵ်းပိူင်ၼႆ တေလႆႈမီးတၢမ်ႇ၊ ၸႂ်ႉႁႂ်ႈၶဝ်ႁဵတ်းၵေႃႈဢမ်ႇၸႂ်ႈ မိူဝ်ႈလႂ်ႁဵတ်းၽိတ်းၵေႃႈ..ထုၵ်ႇလီၺႃးတၢမ်ႇၼၼ်ႉယဝ်ႉ”
“ၸႂ်ႈတႄႉၸႂ်ႈယူႇ တၢမ်ႇဢၼ်ဝႃႈၼၼ်ႉၵေႃႈ ထုၵ်ႇလီလိူၵ်ႈပၼ်မိူၼ်ၵၼ်ၶႃႈဢေႃႈ ဢမ်ႇၸႂ်ႈဝႃႈႁႅမ်ၵၼ်တိၵ်းတိၵ်းၵူၺ်း ဝၢႆးမႃးတေၸၢင်ႈမီးပၼ်ႁႃၸွမ်းမႃးထႅင်ႈၵေႃႈပဵၼ်လႆႈဢေႃႈ”
“ႁႃးပဵၼ်ၶူးလူင် ႁႃးတေၵေႃႉတႅပ်းတတ်းၵူၺ်းထုၵ်ႇလီႁဵတ်းႁင်ၵေႃႈ”
ပေႃးဢဝ်ဢႃႇၼႃႇမႃးတႅပ်းတတ်းၸိူင်ႉၼႆၵေႃႈ ၶူးၼုမ်ႇလႅင်းၼၼ်ႉ ႁိုဝ်တေႁတ်းလၢတ်ႈသင်ၸွမ်းလႆႈယဝ်ႉ ၵႃႈတေလႆႈပွႆႇႁႂ်ႈၶဝ်ႁဵတ်းၵႂႃႇၼၼ်ႉၵူၺ်းယူႇ။
ဝၢႆးၼၼ်ႉ ၶူးၶဝ်ၵေႃႈ ႁွင်ႉလုၵ်ႈႁဵၼ်းၸိူဝ်းၼၼ်ႉ ၶဝ်ႈၸႅၼ်ႇၵၼ်ယူႇၼႃႈထႅဝ်သေ ႁႅမ်တေႃႇၼႃႈလုၵ်ႈႁဵၼ်းတင်းၼမ်ယဝ်ႉ။ လုၵ်ႈႁဵၼ်းဢၼ်ၸုၵ်းတူၺ်းၸိူဝ်းၼၼ်ႉၵေႃႈ မိူၼ်တေၶႂ်ႈၵူဝ်မႃးသေ ဢမ်ႇပေႃးၶႂ်ႈႁတ်းတူၺ်းၵၼ်မႃးယဝ်ႉ။ မၢင်ၵေႃႉ ၸိူဝ်းပဵၼ်ၽူႈယိင်းၼၼ်ႉၵေႃႈ သမ်ႉပေႃးႁွင်ႉႁႆႈဢွၵ်ႇမႃးယူႇ။ မိူၼ်လုၵ်ႈႁဵၼ်းၵေႃႈ ၶႂ်ႈၼမ်ဝႆႉလႄႈ ၶူးၵေႃႈႁႅမ်ၵေႃႉၼိုင်ႈယဝ်ႉၵေႃႉၼိုင်ႈ တူၺ်းလႅပ်ႈတေႁိူဝ်ႉယူႇမိူၼ်ၵၼ်။
မိူဝ်ႈၼႆႉၵေႃႈ ယွၼ်ႉၶူးၵုမ်ႇပၼ်တၢမ်ႇလုၵ်ႈႁဵၼ်းၵူၺ်းလႄႈ ၶႃႈၵေႃႈလႆႈပွၵ်ႈမႃးႁိူၼ်းၶမ်ႈဢိတ်းၼိုင်ႈယူႇ။ ႁၼ်ၸိူင်ႉၼၼ်ယဝ်ႉ ၸႂ်ၵေႃႈဢမ်ႇပေႃးလီၵႃႈႁိုဝ် ၶႃႈၵေႃႈလႆႈၵႂႃႇလဵၼ်ႈမၢၵ်ႇၼင်ၸွမ်းဢၢႆႈၸၢႆးႁဝ်းၶဝ်ယဝ်ႉ ၸွမ်ၶိူဝ်းဢၼ်ႁၼ်ၶႃႈၼၼ်ႉၵေႃႈ။
“လႆႈပၼ်ၶဝ်ယူႇၸွင်ႇၸႂ်ႈ!”
“မိူဝ်ႈၼႆႉၶဝ်ဢမ်ႇမႃးႁူင်းႁဵၼ်း..ပေႃးလႆႈပၼ် ပီႈတေလွတ်ႈႁေ မႃးလဵၼ်ႈမၢၵ်ႇၼင်ၸိူင်ႉၼႆလႆႈယူႇႁႃႉ တေထုၵ်ႇၶူးလူင်ႁွင်ႉဢွၵ်ႇထႅဝ်ႁႅမ်ၵူၼ်ႈယူႇယဝ်ႉ” ၶႃႈၵေႃႈတင်းလၢတ်ႈ တင်းပိတ်ႉမၵ်ႇၼင်သႂ်ႇပၼ်ၶႃမၼ်းၼၼ်ႉႁႅင်းႁႅင်း ၼင်ႇဢၼ်လူမ်းၸႂ်လမ်မီးၼၼ်ႉယဝ်ႉ။
“ဢႃး!ယႃး..ၸဵပ်း” ဢဝ်မၼ်းသမ်ႉပေႃးလႆႈယုၵ်ႉၶႃမၼ်းၶိုၼ်ႈၵႂႃႇၵမ်းလဵဝ်ယဝ်ႉ။
“ပဵၼ်သင်လႄႈပိတ်ႉသႂ်ႇၶႃမၼ်းၸိူင်ႉၼၼ်” သၢႆႁိူဝ်ႈလၢတ်ႈ။
“ၶႃႈၸဵပ်းၸႂ်! မၼ်းႁဵတ်းႁႂ်ႈၶႃႈလီၸႂ်လမ်တေႉယဝ်ႉ”
ဝူၼ်ႉႁၼ်ၸေႈၼၼ်ႉၵေႃႈ တွင်ႉသမ်ႉပေႃးၽိုၼ်ႉလူင်မႃးၵမ်းလဵဝ်ယဝ်ႉ။
“မၼ်းၵႂႃႇႁဵတ်းႁင်..ႁႂ်ႈမႂ်းပေႃးၸဵပ်းၸႂ်တၢၼ်ႇၼၼ်ႉလႃႇ!..” သႅင်ၶိူဝ်းထၢမ်ၸွမ်း။
“မၼ်းဢဝ်လိၵ်ႈၶဵဝ်မၼ်းမႃးပၼ်ၶႃႈ ႁႂ်ႈၶႃႈပၼ်သၢဝ်မၼ်းၼႆဝႃႇ ၵူၼ်းပေႃးၵေႃႉယႂ်ႇယဝ်ႉ ဢမ်ႇမေႃပၼ်ႁင်းၵူၺ်းၵေႃႈဢမ်ႇၸႂ်ႈ ပီႈၵေႃႈႁူႉယူႇမိူဝ်ႈၼႆႉပိူၼ်ႈႁဵတ်းႁင်ၼႆ..”
“မိူဝ်ႈၼႆႉၶူးၶဝ်ၵူတ်ႇၸႅတ်ႈလိၵ်ႈၶဵဝ်တေႉလူး သမ်ႉႁဵတ်းႁိုဝ်ႁေယဝ်ႉလႃႇ” ဢၢႆႈၸၢႆးႁဝ်းထၢမ်ၸူး။
“ၵူၼ်းဢၼ်လွတ်ႈမၼ်းၵေႃႈမီးတင်းၼမ် မိူဝ်ႈလႂ်မိူဝ်ႈၶူးၶဝ်ၵေႃႈ..ဢမ်ႇၺွပ်းလႆႈယူႇယဝ်ႉ ပေႃးယဝ်ႉၵေႃႈဢဝ်ပၼ်ၶဝ်ႁေလႄႈၼႃႈ” ၸွမ်ၶိူဝ်းသိုပ်ႇလၢတ်ႈ။
“လွတ်ႈမႃးလႆႈယဝ်ႉ ယင်းတိုၵ်ႉႁတ်းလၢတ်ႈၸိူင်ႉၼႆယူႇႁႃႉ ပေႃးၶႃႈဢမ်ႇဢဝ်သႂ်ႇၼႂ်းသူပ်း ယူဝ်တေဢမ်ႇလွတ်ႈလူးၵွၼ်ႇ”
ၸွမ်ၶိူဝ်းဢၼ်လႆႈငိၼ်းၸိူင်ႉၼၼ်ၵေႃႈ ပဵၼ်ဢၼ်တူၵ်းၸႂ်တေႉတေႉယူႇယဝ်ႉ။
“ႁႃ! ႁဵတ်းၸိူင်ႉၼႆတီႈၵၼ်လႆႈၸိူင်ႉႁိုဝ် ၵဝ်ၵၼ်ႉတင်ႈၸႂ်တင်ႈၶေႃးႁေ တႅမ်ႈပၼ်ၶႅမ်ႉၶႅမ်ႉၵမ်းလဵဝ် ၵိၼ်ၶဝ်ႈမုၼ်းၵၼ်ယင်းဝႃႈႁေၵွၼ်ႇ ၼႆႉၵိၼ်ပႃးလိၵ်ႈၵၼ်ႁေလူင် ၸႂ်ႁၢႆႉၼႃႇယဝ်ႉ ႁဵတ်းၸိူင်ႉၼႆတေႃႇၵၼ်ယဝ်ႉ ယင်းမီးၼႃႈမႃးပိတ်ႉမၢၵ်ႇၼင်သႂ်ႇၵၼ်ထႅင်ႈလူးၵွၼ်ႇ..” ထိပ်ႇမၢၵ်ႇၼင်မၼ်းၼၼ်ႉမႃးတၢင်းၶႃႈသေ မိူၼ်တေၶႂ်ႈၸႂ်လမ်မႃးယဝ်ႉလႄႈ
“ဢမ်ႇလဵၼ်ႈယဝ်ႉ!!”
ပႆဢွၵ်ႇၵႂႃႇပႅတ်ႈ ၼင်ႇဢမ်ႇသူၼ်ၸႂ်ၽႂ်ၼၼ်ႉယဝ်ႉ။ ၶဝ်ၸိူဝ်းၼၼ်ႉၵေႃႈဢွၼ်ၵၼ် ဢွၼ်ႈဝွၼ်းႁႂ်ႈမၼ်းမႃးလဵၼ်ႈၶိုၼ်းယဝ်ႉ မၼ်းၵေႃႈတူၺ်းၼႃႈၶႃႈ ဢမ်ႇသူၼ်ၸႂ်ယဝ်ႉ ဢွၵ်ႇၵႂႃႇပႅတ်ႈယူႇ။
တွၼ်ႈသီႇသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈႁႃႈၶႃႈ။
တႃႇတွင်း။ ။ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
