တွၼ်ႈသိပ်းၵဝ်ႈ
ဢူႈမႄႈၼၼ်ႉ ဢမ်ႇဝႃႈလုၵ်ႈတေၵေႃႉယႂ်ႇတၢၼ်ႇႁိုဝ်ၵေႃႈယဝ်ႉ ၼႂ်းသၢႆတႃၶဝ် ယင်းတိုၵ်ႉႁၼ်ဝႃႈလုၵ်ႈၵေႃႉလဵၵ်ႉယူႇလႄႈ ႁဵတ်းသင်ဢမ်ႇလႆႈႁင်းၵူၺ်း၊ ပေႃးဢမ်ႇမီးဢူႈမႄႈ ၶဝ်တေယူႇၸိူင်ႉႁိုဝ်ၵိၼ်ၸိူင်ႉႁိုဝ် ၸွမ်းမႆႈၸႂ်ယူႇတႃႇသေႇ၊ မိူဝ်ႈဢမ်ႇလႆႈယူႇႁိမ်းၸမ်လုၵ်ႈၼႆၵေႃႈ မႆႈၸႂ်ၵူဝ်ၶဝ်တေပဵၼ်ၸိူင်ႉၼၼ် ၵူဝ်ၶဝ်တေပဵၼ်ၸိူင်ႉၼႆ၊ သမ်ႉဝႃႈတူဝ်ယူႇၵႆၵေႃႈ ၸႂ်တိတ်းၸႂ်ႁွႆႈယူႇတႃႇသေႇယဝ်ႉ။ မိူဝ်ႈႁူႉဝႃႈၶဝ်ပဵၼ်သင်ဢိတ်ႉဢွၼ်ႇၼိုင်ႈၵူၺ်းၵေႃႈ ပဵၼ်ဢၼ်မႆႈႁူမႆႈၸႂ်လူင်ၵႂႃႇမူတ်းယူႇ၊ ပေႃးႁၼ်ပိူၼ်ႈပဵၼ်ၼႆၵေႃႈ ဢွၼ်တၢင်းသုတ်းၼႆႉ ဝူၼ်ႉထိုင်လုၵ်ႈၸဝ်ႈၵဝ်ႇၼၼ်ႉမႃးၵမ်းလဵဝ်ယဝ်ႉ။
ယွၼ်ႉၼၼ်လႄႈ ၵေႃႉပဵၼ်ဢူႈပဵၼ်မႄႈၵေႃႈ မႆႈၸႂ်ၸွမ်းလုၵ်ႈသေ လႆႈဢွၼ်ၵၼ်မႃးတီႈႁူင်းႁဵၼ်း၊ တွၼ်ႈတႃႇလွင်ႈထုၵ်ႇမႅၼ်ႈ တွၼ်ႈတႃႇလုၵ်ႈလုၵ်ႈ ဢၼ်ထုၵ်ႇလီလႆႈႁပ်ႉ ႁႂ်ႈမၼ်းပေႃးၽဵင်ႇပဵင်းလႄႈ လႆႈဢွၼ်ၵၼ်ၽိတ်းမေႃးၵၼ်တီႈၼႂ်းႁွင်ႈပၢင်ၵုမ်ၼၼ်ႉ သမ်ႉပေႃးပၼ်းလူင်ၵႂႃႇမူတ်း၊ ႁႃၶေႃႈဢုပ်ႇဢူဝ်းၵၼ်ၵေႃႈဢမ်ႇလႆႈယဝ်ႉလႄႈ ယိုင်ႈလၢတ်ႈယိုင်ႈလႆႈတၢင်းလိူတ်ႇမႆႈၵူၺ်း၊ တင်းဢူႈမႄႈလုၵ်ႈႁဵၼ်း တင်းၶူးၵေႃႈ လႆႈၵိုတ်းလိုဝ်ႈၵၢၼ်ဢုပ်ႇဢူဝ်းၵၼ်သေ ဢွၼ်ၵၼ်ပွၵ်ႈမိူဝ်းႁင်းၽႂ်ႁင်းမၼ်း ယူႇယဝ်ႉ။
မိူၼ်ဝႃႈပၢင်တိုၵ်းဢူႈမႄႈလုၵ်ႈႁဵၼ်းလႄႈၶူးၼၼ်ႉ လႆႈတႄႇၵိူတ်ႇပဵၼ်မႃးယဝ်ႉ။ ၶူးလူင်ၼၼ်ႉၵေႃႈ ၼင်ႇဝႃႈၶႂ်ႈႁႂ်ႈၶူးယွတ်ႈယွမ်းၼွမ်းၸူး ဢူႈမႄႈလုၵ်ႈႁဵၼ်းၸိူဝ်းၼၼ်ႉသေ ယွမ်းၼွမ်းလွင်ႈဢၼ်မၼ်းလႆႈႁဵတ်းၵႂႃႇၼႆယူႇ၊ ၵူၺ်းၵႃႈ ၵႅမ်ၶူးလူင် ၶူးၼုမ်ႇလႅင်းၼၼ်ႉၵေႃႈ ႁၼ်လီၵမ်ႉထႅမ်ၸွမ်း လွင်ႈႁဵတ်းသၢင်ႈၶူးယွတ်ႈၼၼ်ႉ မၼ်းထုၵ်ႇမႅၼ်ႈယဝ်ႉ ၼႆလႄႈ တင်းၽူႈၵွၼ်းလႄႈၵႅမ်ၽူႈၵွၼ်းသွင်ၵေႃႉၵေႃႈ မီးလွင်ႈဢမ်ႇထုၵ်ႇမႅၼ်ႈၵၼ်မႃးယူႇ။
ဝၼ်းမိူဝ်ႈၼႆႉၵေႃႈ ပဵၼ်ဝၼ်းဢၼ်ၾူၼ်တူၵ်းယွႆးႁႅင်းတေႉၼၼ်ႉယဝ်ႉ ထိုင်ၶၢဝ်းပိူၼ်ႈလူင်းႁူင်းႁဵၼ်းယဝ်ႉၵေႃႈ ၾူၼ်ယင်းဢမ်ႇပႆႇႁိူတ်ႇ၊ သမ်ႉဝႃႈလူင်းႁူင်းႁဵၼ်းယဝ်ႉသေတႃႉ ႁႃးလႄႈတင်းၼူၼ်းမူဝ်ၼၼ်ႉတႄႉ ယင်းတိုၵ်ႉႁဵတ်းလိၵ်ႈၸွမ်းၵၼ်ယူႇ ႁဵတ်းယဝ်ႉယဝ်ႉၵေႃႈ ဢွၼ်ၵၼ်ပွၵ်ႈမိူဝ်းၵႂႃႇယဝ်ႉ။ ၵွပ်ႈၾူၼ်မႃးလႄႈ ၶႃႈၵေႃႈဢမ်ႇလႆႈဢဝ် လူတ်ႉထိပ်ႇၶႃႈမႃး ပႆမႃးဢဝ်ၵူၺ်း။
မိူဝ်ႈဢၼ်တိုၵ်ႉမိူဝ်းၸွမ်းတၢင်းၼၼ်ႉ ယူႇယူႇၸွင်ႈၶႃႈသမ်ႉၵိုင်ႉၵၢင်ႉၵွႆၵႂႃႇ၊ ၽွင်းၼၼ်ႉ တင်းၾူၼ်တင်းလူမ်းၵေႃႈ ထိပ်ႇထူဝ်းၽတ်ႉမႃးၸွမ်းၵၼ်ႁႅင်းဝႃႈႁႅင်းယဝ်ႉ၊ ဢဝ်ၸွင်ႈၶႃႈသမ်ႉပေႃးပိဝ်လုတ်ႈမိုဝ်း ႁူင်ႈယူႇၼႂ်းၵၢင်တၢင်းၼၼ်ႉယူႇ။ မိူဝ်ႈၼၼ်ႉ ၾႃႉၵေႃႈမႅပ်ႈမႃး၊ မိူင်းၵေႃႈလမ်မႃးသေ သဵင်ၾႃႉလင်ယွၼ်ႈ တူဝ်ႈလင်မေႃးတဵမ်ႁူ ႁဵတ်းႁႂ်ႈၶႃႈတူၵ်းၸႂ် ႁွင်ႉသႅၼ်ႇၸီးပၼ်း ၼႅတ်ႈဢိုတ်းႁူယဝ်ႉ လပ်းတႃၼင်ႈလူင်းလူင်ၵႂႃႇၼႂ်းၵၢင်တၢင်းၼၼ်ႉၵမ်းလဵဝ်။
မိူဝ်ႈၶႃႈမိုၼ်းတႃမႃးၶိုၼ်းၼၼ်ႉ ဢမ်ႇတၼ်းႁူႉဝႃႈၶႃႈမီးယူႇတီႈလႂ် မၼ်းတင်းဢုၼ်ႇလႄႈလီယူႇတေႉယဝ်ႉ။ ယၢမ်းၼၼ်ႉ မိုဝ်းသွင်ၶွၼ်ၵူၼ်းၵေႃႉၼိုင်ႈ ယိပ်းမိုဝ်းဢၼ်ၶႃႈဢိုတ်းႁူဝႆႉၼၼ်ႉ ဢဝ်ဢွၵ်ႇၽၢတ်ႇႁူလွႆးလွႆးယဝ်ႉ လၢတ်ႈၸူး၊ ၶႃႈၵေႃႈ လႆႈငိၼ်းသဵင်ဢၼ်ၶဝ်လၢတ်ႈမေႃးမႃးၼႂ်းႁူဝႃႈ−
“ဢမ်ႇပဵၼ်သင်ယဝ်ႉၼႃ ၶူးမီးယူႇႁိမ်းသူယဝ်ႉ!”
မိူဝ်ႈငိၼ်းသဵင်ၵေႃႈ ၸင်ႇတေႁူႉဝႃႈပဵၼ်ၶူးၽိဝ်ၾႃႉ လိူဝ်ၼၼ်ႉသမ်ႉ ၶႃႈမီးယူႇၼႂ်းဢွင်ႈၵွတ်ႇၶဝ်ဝႆႉယူႇယဝ်ႉ။ ဢမ်ႇတၼ်းႁူႉဝႃႈၶဝ်တၼ်းမႃးမိူဝ်ႈလႂ် ၵူၺ်းၵႃႈ မိူဝ်ႈပဵၼ်ၸိူင်ႉၼၼ် မိူၼ်ႁဵတ်းႁႂ်ႈၶႃႈလႆႈသတိမႃးၶိုၼ်းယူႇဢိတ်ႉၼိုင်ႈ၊ ၶဝ်ၵေႃႈၸွႆႈဢဝ်ၶႃႈလုၵ်ႉမႃးသေယဝ်ႉ ထၢမ်ၸူးၶႃႈၼင်ႇဢူၼ်ႈဢွၼ်ႇဝႃႈ
“ၸွင်ႇပဵၼ်သင်ႁိုဝ်..ၾူၼ်မႃးၸိူင်ႉၼႆ သူဢမ်ႇထုၵ်ႇလီၵႂႃႇလႂ်မႃးလႂ်ၵေႃႉလဵဝ်ၼႃ”
ၶူးၼၼ်ႉၵေႃႈ ထွတ်ႇဢဝ်သိူဝ်ႈသွၼ်ႉမၼ်းသေ သိုပ်ႇလၢတ်ႈထႅင်ႈ “ယမ်းမူတ်းယဝ်ႉၼႃႈ”
ၶႃႈၸင်ႇတေၾၢင်ႉမႅၼ်ႈဝႃႈ သိူဝ်ႈၶူဝ်းၶႃႈၼၼ်ႉယမ်းမူတ်းယဝ်ႉ။ ၶူးၵေႃႈဢဝ်သိူဝ်ႈမၼ်းၼၼ်ႉႁူမ်ႇပၼ်ၶႃႈၵႂႃႇသေ
“ၸွင်ႇတေပႆမိူဝ်းလႆႈႁိုဝ်”
ၶႃႈၵေႃႈဢမ်ႇပႆႇၸၢင်ႈတွပ်ႇပၼ်လႆႈၵမ်းလဵဝ် သဵင်ၾႃႉလင်ဢၼ်ၶႃႈတူၵ်းၸႂ်မိူဝ်ႈၵႆႈၼၼ်ႉ သဵင်ယွၼ်ႈမၼ်းယင်းပႆႇႁၢႆ၊ မိူဝ်ႈၾႃႉမႅပ်ႈမႃးထႅင်ႈၵေႃႈ ယိုင်ႈႁဵတ်းႁႂ်ႈၶႃႈ ဢမ်ႇႁတ်းယၢင်ႈၵႂႃႇတၢင်းၼႃႈထႅင်ႈယဝ်ႉ။ ၶႃႈၵူဝ်တေႉယဝ်ႉ ၶႃႈၵူဝ်ထိုင်တီႈၶႃႈထူၺ်ႈၸႂ်ပေႃးဢမ်ႇၶိုတ်းၵၼ်လႆႈ ႁဵတ်းႁႂ်ႈၶႃႈဢမ်ႇႁတ်းမိုၼ်းတႃတူၺ်းတၢင်းၼႃႈၼၼ်ႉသေဢိတ်း မိူင်းၵေႃႈသမ်ႉပေႃးလပ်းသိင်ႇလူင်ၵႂႃႇၵမ်းလဵဝ်ယူႇ။
မိူဝ်ႈဢၼ်ၶႃႈႁူႉတူဝ်မႃးၶိုၼ်းၼၼ်ႉ ၶႃႈသမ်ႉပေႃးမီးယူႇၼႂ်းၽႃႈႁူမ်ႇဢုၼ်ႇဢုၼ်ႇၼၼ်ႉယဝ်ႉ။ လႆႈႁၼ်ၼၢႆးႁဝ်းမီးယူႇႁိမ်းၶႃႈသေ
“ပဵၼ်ၸိူင်ႉႁိုဝ်မႃးလႃႇယိင်း!”
“ၶႃႈတၼ်းႁဵတ်းႁိုဝ်မႃးမီးယူႇတီႈၼႆႈယဝ်ႉလႃႇၼၢႆး”
“ၶူးသူၸေးမႃးၼၼ်ႉၼႃႇ”
မိူၼ်ဝႃႈၶႃႈတေထုၵ်ႇၼီႈၶူးသွင်ပွၵ်ႈယဝ်ႉ။ ဢၢႆႈၸၢႆးၼၼ်ႉၵေႃႈ ႁႅၼ်းဢဝ်ၶဝ်ႈမႃးပၼ်ၶႃႈသေယဝ်ႉ
“လိုဝ်ႈႁိူဝ်ႉမႂ်းၼမ်ၼမ်လႄႈ မိူဝ်ႈၽုၵ်ႈပိူၼ်ႈဢိုတ်းႁူင်းႁဵၼ်း..မိူဝ်ႈႁိုဝ်းၵေႃႈၶဝ်ႈဝႃႇယဝ်ႉ”
“ဢိူဝ်ႈ! ႁူႉယူႇဝႃႈၾူၼ်မႃးႁဵတ်းႁင်မႂ်းဢမ်ႇပႂ်ႉၼွင်ႉမႂ်းလႃႇ!”
ၼၢႆးႁဝ်းၼၼ်ႉၵေႃႈ မိူဝ်ႈႁၼ်ဢၢႆႈၸၢႆးၼၼ်ႉ ၼႅတ်ႈပွင်ႉၵမ်းလဵဝ်ယူႇ။ တႄႇၸဵမ်မိူဝ်ႈႁၼ်ၽၢင်ႁၢင်ႈ ဢၼ်ၶႃႈႁွတ်ႈႁိူၼ်းမႃးၼၼ်ႉ ထၢင်ႇတႄႉ ဢၢႆႈၸၢႆးတေၺႃးၵႂၢမ်းပွင်ႉၼၢႆးႁဝ်း ပေႃးဢမ်ႇယဝ်ႉလႆႈႁေပွၵ်ႈၼၼ်ႉယဝ်ႉဝႃႈ။ မိူဝ်ႈလႂ်ၼၢႆးႁဝ်းလႆႈပွင်ႉၼႆ ၵႃႈဢမ်ႇပႆႇပူၼ်ႉဝၼ်း ပေႃးႁၼ်ၼႃႈမိူဝ်ႈလႂ်ၵေႃႈ တေပွင်ႉယူႇတိၵ်းတိၵ်းၼၼ်ႉယဝ်ႉ။
“ၼၢႆး…ၼႂ်းဝႃႇပီႊၼႆႉတေၼွၼ်းၵျွင်းယူႇႁႃႉ!..” ဢၢႆႈၸၢႆးၼၼ်ႉၵေႃႈ ၼႅတ်ႈလၢႆႈၵႂၢမ်းမၼ်းၵႂႃႇယဝ်ႉ။
“ပေႃးဢေးယိင်းပဵၼ်ၼႆ တေႁဵတ်းႁိုဝ်ႁႂ်ႈၵဝ်ၼွၼ်းလႆႈလႃႇ ၼွၼ်းၵေႃႈ..ဢမ်ႇလိုမ်းၸႂ်လႆႈၸိူင်ႉၼႆ”
“ၶႃႈဢမ်ႇပဵၼ်ႁင်ယဝ်ႉဝႃႈၼၢႆး ဢၢႆႈၸၢႆးႁဝ်းၵေႃႈမီးယူႇလူး ႁိုင်ႁိုင်ၼိုင်ႈၶိုၼ်းၵူၺ်း ၶႃႈယူႇလႆႈယူႇ”
“တူၺ်းဢၢႆႈၸၢႆးမႂ်းၼၼ်ႉ..ၸႂ်ယႂ်ႇလႆႈယူႇၵႂႃႈ!”
“ၸႂ်ယႂ်ႇလႆႈယူႇၵူၺ်း ပေႃးၼၢႆးႁဝ်းၶႂ်ႈၼွၼ်းၵေႃႈၵႂႃႇၼွၼ်းလႄႈ ၼိုင်ႈပီႊမီးၼိုင်ႈဝႃႇၵူၺ်း ႁႃးပီႈၼွင်ႉတူၺ်းထိုင်ၵၼ်လႆႈယူႇ”
“ပေႃးၼၼ် ၶိူဝ်ပီႈၼွင်ႉ ဢမ်ႇလႆႈၵႂႃႇႁူင်းႁဵၼ်းၵေႃႈ ၵႂႃႇၸွႆႈပိူၼ်ႈတီႈဝတ်ႉလႄႈၼႃႈ ဢွၵ်ႇဝႃႇၼႆႉ”
ပေႃးလၢတ်ႈသိုဝ်ႈသိုဝ်ႈ ၶႃႈၼၼ်ႉ ဢမ်ႇပေႃးၵႆႉၵႂႃႇဝတ်ႉၵႂႃႇဝႃးၵႃႈႁိုဝ်၊ ဢမ်ႇပေႃးမေႃၶဝ်ႈဢွၵ်ႇၵႄႈၵၢင်ပိူၼ်ႈလႄႈ ယိုင်ႈဢမ်ႇမီးၵေႃႉ ယိုင်ႈဢမ်ႇၶႂ်ႈၵႂႃႇသေဢိတ်း ၼၼ်ႉယဝ်ႉ။ တေႁဵတ်းႁိုဝ်လႃႇ တႃႇႁႂ်ႈၼၢႆးႁဝ်းၵတ်းယဵၼ်ၸႂ် တမ်းၸႂ်လႆႈၼႆၵေႃႈ ဢိူဝ်ႈဢေႃႈၵႂႃႇၸွမ်းႁဵတ်းၼၼ်ၵူၺ်းယဝ်ႉ။
ပေႃးဝႃႈတေၶဝ်ႈဝႃႇယဝ်ႉၼႆၵေႃႈ ၼင်ႇႁၢင်ႈၾူၼ်ၼၼ်ႉတူၵ်းယူႇတိၵ်းတိၵ်း ပေႃးဢမ်ႇထၢတ်ႇဢမ်ႇဝၢႆးလႆႈ။ ၵၢင်ၼႂ်ၸဝ်ႉၵေႃႈႁိူတ်ႇၵႂႃႇၵမ်ႉၼိုင်ႈယူႇ ၸွမ်ၶိူဝ်းၶႃသႅင်ၶိူဝ်းၼၼ်ႉၵေႃႈ ၼႅတ်ႈမႃးတီႈႁိူၼ်းၸဵမ်ၸဝ်ႉသေ မႃးၸူဝ်းၵၼ်တင်းဢၢႆႈၸၢႆးႁဝ်း တႃႇၵႂႃႇၸွႆႈပိူၼ်ႈတီႈဝတ်ႉၼႆယူႇ ၶႃႈၵေႃႈလႆႈၵႂႃႇၸွမ်းၶဝ်ယဝ်ႉ။
“သၢႆႁိူဝ်ႈဢမ်ႇမႃးၸွမ်းႁႃႉ!” ၶႃႈထၢမ်ၸူးၶဝ်။
“မၼ်းတေၵႂႃႇၵၢတ်ႇၵွၼ်ႇဝႃႇ ၵမ်ႉၵေႃႈတေၵႂႃႇၸွမ်းယူႇၵူၺ်း” ၸွမ်ၶိူဝ်းလၢတ်ႈ။
“လႅင်းမိူင်းၶႃၸၢႆးသိူဝ်တႄႉဢမ်ႇမႃးယဝ်ႉၼေႃႈ!”
“ၵႂႃႇၸဵမ်ၸဝ်ႉယဝ်ႉဝႃႈၶႃၼၼ်ႉတႄႉ!”
မိူဝ်ႈဢၼ်တင်းပႆတင်းဢုပ်ႇၵၼ်လူင်ၵႂႃႇၼၼ်ႉ ၶႃႈၵေႃႈသမ်ႉဢမ်ႇတၼ်းတူၺ်းတၢင်းလႄႈ ယူႇယူႇ ၸွမ်ၶိူဝ်းၵေႃႈ ၸၼ်ဢဝ်ၶႅၼ်ၶႃႈၼၼ်ႉၵႂႃႇတင်းမၼ်းသေ ဢဝ်တူဝ်ႁႃးပေႃးတေၸပ်းၵၼ်ယဝ်ႉ။
“ပႆတၢင်းတူၺ်းတၢင်းၽွင်ႈလႄႈ!”
ၶႃႈၸင်ႇတေၾၢင်ႉမႅၼ်ႈဝႃႈ တၢင်းၼႃႈၶႃႈၼၼ်ႉ မီးၼမ်ႉဢွၵ်းလွၵ်းယူႇ။ မၢင်ပွၵ်ႈမႃးၵေႃႈ ထၢင်ႇပိူင်ႈယူႇဝႃႈ ၶဝ်တၼ်းပဵၼ်ၵူၼ်းသႂ်ႇၸႂ် လွင်ႈၸိူင်ႉၼႆၸဵမ်မိူဝ်ႈလႂ်လႃႇ ပေႃးပဵၼ်ဢၢႆႈၸၢႆးၸွင်ႇတေႁဵတ်းမိူၼ်ၼႆၼေႃ။
မိူဝ်ႈၵႂႃႇႁွတ်ႈထိုင်တီႈဝတ်ႉၼၼ်ႉၵေႃႈ လႆႈႁၼ်ပိူၼ်ႈဢွၼ်ၵၼ်တူင်ႉၼိုင် ၸွႆႈသၢင်ႈယူႇ ဢမ်ႇဝႃႈၼႂ်းသိုင်ႇမိုဝ်ႉႁိုဝ် ၼႂ်းဝတ်ႉၸိူဝ်းၼၼ်ႉ။ မိူဝ်ႈဢၼ်တေဢၢင်ႈၵႂႃႇတူၺ်းပိူၼ်ႈၼႂ်းသိုင်ႇမိုဝ်ႉၼၼ်ႉၵေႃႈ လိူၵ်ႈလိူၵ်ႈ သႅင်ၶိူဝ်းသမ်ႉ ႁွင်ႉၸူးၶႃႈသေ
“ၼႂ်းဝတ်ႉၼၼ်ႉ ဢမ်ႇၸႂ်ႈဢူၺ်းၵေႃႉမႂ်းတီႈႁူင်းႁဵၼ်းၼၼ်ႉႁႃႉဢေးယိင်း!”
ဝၢႆႇတူၺ်းယဝ်ႉ လႆႈႁၼ်ၼူၼ်းမူဝ် လႄႈ သႂ်လႅင်းၶႃ လိူမ်ႈလႆႇပတ်းၽဵဝ်ႈယူႇၼႂ်းဝတ်ႉၼၼ်ႉယဝ်ႉ၊ တၢင်းသိုင်ႇမိုဝ်ႉၼၼ်ႉသမ်ႉ မီးသႅင်ႁၵ်ႉလႄႈၶမ်းၽွင်ၶႃ ပွၵ်ႇၽၵ်းမီႇယူႇလႄႈ မိူၼ်ၶႃတေႁၼ်ၶႃႈဢွၼ်တၢင်းသေ ႁွင်ႉႁႃၶႃႈမႃးယဝ်ႉ။
“ဢေးယိင်း! မႃးတၢင်းၼႆႉလႄႈ!”
ဢၢႆႈၸၢႆးႁဝ်းၶဝ်ၵေႃႈ ၵႂႃႇၸူးတီႈသႅင်ႁၵ်ႉၶဝ်သေ ဢွၼ်ၸွႆႈၵၼ်ၵႂႃႇယူႇ။ သမ်ႉဝႃႈၶႃႈၼၼ်ႉ တေႁဵတ်းၶဝ်ႈႁဵတ်းၽၵ်းဢမ်ႇမေႃၵေႃႈ ပွၵ်ႇၽၵ်းမီႇတႄႉၶႃႈၵေႃႈမေႃပွၵ်ႇယူႇၵူၺ်း၊ ႁဵတ်းသင်လႆႈၵေႃႈႁဵတ်းၵႂႃႇၼၼ်ႉၼႃႇ ဢၼ်ၶႃႈဝူၼ်ႉလႆႈတႄႉ မီးမွၵ်ႈၼႆႉၵူၺ်း တေမႃးလၢႆလၢႆၵေႃႈသမ်ႉဢမ်ႇၸႂ်ႈလၢႆးမၼ်းၼင်ႇၵဝ်ႇ။ ၵူၺ်းၵႃႈ ဢမ်ႇႁူႉဝႃႈ မိတ်ႈတီႈဝတ်ႉၼၼ်ႉမၼ်းၽၢႆႁႃႉ ဢမ်ႇၼၼ်ၵေႃႈၶႃႈဢမ်ႇမေႃပွၵ်ႇႁိုဝ် တိုၵ်ႉႁႃပွၵ်ႇလႆႈသွင်ႁူဝ်ၵူၺ်း မိုဝ်းၶႃႈၵေႃႈဢွၵ်ႇလိူတ်ႈမႃးယဝ်ႉယိုင်၊ ၸွမ်ၶိူဝ်း ဢၼ်ၼင်ႈႁိမ်းၶႃႈၼၼ်ႉၵေႃႈ မိူဝ်ႈမၼ်းႁၼ်ၸိူင်ႉၼၼ် ၼႅတ်ႈဢဝ်မိတ်ႈဢၼ်မၼ်းယိပ်းၼၼ်ႉ ထိူဝ်ဢဝ်တိၼ်သိူဝ်ႈမၼ်း မႃးပူၵ်ႉပၼ်မိုဝ်းၶႃႈၼၼ်ႉၵမ်းလဵဝ်ယူႇ။ မၼ်းႁဵတ်းပၼ်ၸိူင်ႉၼၼ်ၵေႃႈလီယူႇၵူၺ်း မိူၼ်ၶႃႈဝူၼ်ႉဝႃႈမၼ်းလၢၵ်ႇလၢႆးမိူၼ်ႁိုဝ်ဝႆႉၵေႃႈဢမ်ႇႁူႉယဝ်ႉ။
သႅင်ၶိူဝ်းၼၼ်ႉၵေႃႈ တူၺ်းၶႃႈသေယဝ်ႉ “ၵႂႃႇႁဵတ်းတၢင်ႇမဵဝ်းလႃႈဢေးယိင်း ယႃႇပေယိပ်းယဝ်ႉမိတ်ႈၼႆႉ”
ၶႃႈၵေႃႈၶဝ်ႈၵႂႃႇၼႂ်းသိုင်ႇမိုဝ်ႉ လႆႈႁၼ်ပႃႈၶဝ်ၸိူဝ်းၼၼ်ႉ ၶူဝ်ႈၼင်ပွင်းၵၼ်ယူႇလႄႈ ၶဝ်ၵေႃႈႁၼ်ၶႃႈသေ ႁႂ်ႈၶႃႈၶူဝ်ႈၼင်ပွင်းၸွႆႈၶဝ်သေ ဢဝ်ၵၢၵ်ႇမၼ်းမႃးပၼ်ၶႃႈ ႁႂ်ႈၶႃႈၶူၼ်းယူႇယဝ်ႉ။ တေဢမ်ႇဢဝ်ၵေႃႈ ပိူၼ်ႈပေႃးမႃးယိုၼ်ႈထိုင်မိုဝ်းယဝ်ႉ တေထဵင်ၶိုၼ်းၵေႃႈ သမ်ႉဝႃႈမႃးၸွႆႈပိူၼ်ႈယူႇ၊ ၶႃႈၵေႃႈယိပ်းဢဝ်သေ ၵူၺ်းၵႃႈဢမ်ႇႁူႉဝႃႈတေလႆႈႁဵတ်းၸိူင်ႉႁိုဝ် ႁၼ်ပိူၼ်ႈၶူၼ်းၵေႃႈ ၶူၼ်းယိူင်ႈသေ ၶူၼ်းၵႂႃႇၶူၼ်းမႃးမၼ်းမႆႈၼႃႇလႄႈ ဢမ်ႇၶၢမ်ႇလႆႈယဝ်ႉ ၶႃႈၵေႃႈသမ်ႉဢဝ်ဢၼ်ၶူၼ်းမၼ်းလုတ်ႈတူၵ်းမိုဝ်းၵႂႃႇယူႇ။ ပႃႈၶဝ်ၼၼ်ႉ သမ်ႉပေႃးလႆႈ ဢဝ်ဢၼ်မႂ်ႇမႃးပၼ်ထႅင်ႈယဝ်ႉ၊ မိူၼ်မၼ်းတေပွင်းလီၼႃႇယဝ်ႉလႄႈ ၶႃႈၵေႃႈတၵ်းဢွၵ်ႇၵႂႃႇ ၸွမ်းၼင်ႇဢၼ်ႁၼ်ပိူၼ်ႈႁဵတ်းဝႆႉၼၼ်ႉယဝ်ႉ။
မိူၼ်ၶႃႈတေႁဵတ်းထိူင်းၼႃႇလႄႈ ဢမ်ႇပေႃးၶိုတ်းၸႂ်သေ ပႃႈၼၼ်ႉၶဝ်ၵေႃႈ ႁႂ်ႈၶႃႈႁဵတ်းၵူၼ်းသႂ်ႇမၼ်းၼႆယူႇ။ ၶႃႈၵေႃႈတင်းၵူဝ်ၼမ်ႉမၼ်းမႆႈႁေ ယူႇၵႆၵႆယဝ်ႉပွႆႇသႂ်ႇ ယိုင်ႈယူႇၵႆႁေပွႆႇ ယိုင်ႈၼမ်ႉမၼ်းၶႅၼ်းၽူင်ႉဢွၵ်ႇမေႃႈမႃးယဝ်ႉ။ ၶႃႈဢမ်ႇတၼ်းႁူႉဝႃႈ ၼမ်ႉမၼ်းၼၼ်ႉၽူင်ႉသႂ်ႇၶႃႈမိူဝ်ႈလႂ်၊ ၵူၺ်းၵႃႈ ဝၢႆးသေပွႆႇယဝ်ႉၵေႃႈ ၶႅၼ်ၶႃႈၼၼ်ႉ ၼင်ႇႁၢင်ႈပေႃးသႅပ်ႇမႆႈလိူတ်ႇလူင်မႃးၵမ်းလဵဝ်၊ ပႃႈဢၼ်ပဵၼ်ၵူၼ်းၶူၼ်းၼၼ်ႉၵေႃႈ မိူၼ်တေႁူႉဝႃႈၶႃႈဢမ်ႇမေႃဝႆႉလႄႈ တေႁၼ်ၼမ်ႉမၼ်းလူၵ်ႈသႂ်ႇၶႃႈၽွင်ႈႁေ။
“ၼမ်ႉမၼ်းလူၵ်ႈယဝ်ႉၼႃႈယိင်း ဝႆႉႁေလႄႈပႃႈတေႁဵတ်းၵူၺ်း”
တွၼ်ႈသိပ်းၵဝ်ႈသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢဝ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
