တွၼ်ႈသိပ်းပႅတ်ႇ
ၶူးသွၼ်ၼႆၼၼ်ႉ ႁၢပ်ႇဝႆႉပုၼ်ႈၽွၼ်းဢၼ်ၼၵ်းၼႃတေႉတေႉ၊ ဢမ်ႇပၢႆႈပိူင်ႈသင်ၵၼ်တင်း ၵေႃႉပဵၼ်ဢူႈပဵၼ်မႄႈၵႃႈႁိုဝ်၊ လိူဝ်သေလႆႈႁပ်ႉပုၼ်ႈၽွၼ်း လွင်ႈၵၢၼ်ႁဵၼ်းၵၢၼ်သွၼ်လုၵ်ႈႁဵၼ်းယဝ်ႉ၊ ယင်းတေလႆႈႁပ်ႉႁူႉ လွင်ႈပဵၼ်လွင်ႈယူႇလုၵ်ႈႁဵၼ်းထႅင်ႈ၊ တွၼ်ႈတႃႇလုၵ်ႈႁဵၼ်းပေႃးတေၶိုပ်ႈၼႃႈၶိုၼ်ႈယႂ်ႇၼၼ်ႉ ၶူးၵေႃႈတေလႆႈပူၵ်းပွင် ၽိူမ်ႉပၼ်ၼမ်ႉၵတ်ႉလုၵ်ႈႁဵၼ်းတႃႇသေႇ။ ပေႃးမႃးတီႈႁူင်းႁဵၼ်းၼႆ ၶူးသွၼ်ၼၼ်ႉၵေႃႈ ပဵၼ်ၽူႈၵုမ်းထိင်းလုၵ်ႈႁဵၼ်းတၢင်ဢူႈမႄႈၵႂႃႇယဝ်ႉ။
တီႈၼႂ်းပၢင်ႇႁူင်းႁဵၼ်းဢၼ်မီးထုင်ႉယိူဝ်ႈၵႂၢင်ႈၵႂၢင်ႈၼၼ်ႉ မီးၵူၼ်းလွမ်ႉႁွပ်ႈတဵမ်ဝႆႉ ပဵၼ်သီႇၸဵင်ႇသေ မီးတင်းလၵ်းၵူဝ်းမၢၵ်ႇၼင်တမ်းဝႆႉသွင်ၽၢႆႇ၊ မီးၵူၼ်းလဵၼ်ႈမၢၵ်ႇၼင်လႅၼ်ႈၵႂႃႇလႅၼ်ႈမႃးယူႇၼႂ်းၼၼ်ႉယဝ်ႉ။ တီႈတေႉၶႃႈဢမ်ႇၶႂ်ႈမႃးသေဢိတ်း ၵူၺ်းၵႃႈ လိူၼ်သႂ်လႄႈသႅင်ႁၵ်ႉၵေႃႈ ၸၼ်ၶႅၼ်ၶႃႈသေယဝ်ႉ လၢၵ်ႈတိုတ်ႉပၼ်သမ်ႉပေႃးၶႂ်ႈလုတ်ႈယဝ်ႉၼႃႇ မၼ်းၸဵပ်းၼႃႇႁေ ၶႃႈဢမ်ႇၶၢမ်ႇလႆႈလႄႈ လႆႈမႃးၸွမ်းၼၼ်ႉယဝ်ႉ။
မိူဝ်ႈဢၼ်ႁဝ်းႁွတ်ႈမႃးတီႈပၢင်ႇၼၼ်ႉၵေႃႈ မႅၼ်ႈၽွင်းဢၼ်ၸုမ်းၵူၼ်းလဝ်း ၼႂ်းႁူင်းႁဵၼ်းႁဝ်း လုၵ်ႈႁဵၼ်းၸၼ်ႉသိပ်းၼၼ်ႉ တေၶႄႉၶဵင်ႇၵၼ်တင်း ၸုမ်းလုၵ်ႈႁဵၼ်းၸၼ်ႉၵဝ်ႈယဝ်ႉ။ ၽူႈယိင်းဢၼ်ယူႇၼွၵ်ႈၵႂၢင်းမၢၵ်ႇၼင်ၼၼ်ႉ မွင်းႁၼ်ၸုမ်းၶဝ်ဢၼ်သႂ်ႇသိူဝ်ႈၶူဝ်းလဵၼ်ႈႁႅင်းသေ ၶဝ်ႈၵႂႃႇၼႂ်းပၢင်ႇၼၼ်ႉၵူၺ်း သဵင်သႅၼ်ႇႁွင်ႉၶဝ်ပေႃးၸီးလႅမ်လူင်ၵႂႃႇသဵင်ႈ လၢတ်ႈၵႂၢမ်းပေႃးဢမ်ႇႁူႉၶေႃႈမၼ်း ၼၼ်ႉယဝ်ႉ။
“ႁဝ်းမႃးမႅၼ်ႈၶၢဝ်းယၢမ်းလီတေႉၼၼ်ႉယဝ်ႉ” သႂ်လႅင်းလၢတ်ႈ ပႃးတင်းသၢႆတႃဢၼ်လီသူၼ်ၸႂ်ၼၼ်ႉယူႇ။
ႁဝ်းၵေႃႈဢွၼ်ၵၼ်ၵႂႃႇၸုၵ်း တီႈႁိမ်းၵူၼ်းႁွင်ႈႁဝ်း ယူႇတုမ်ၵၼ်ၼၼ်ႉသေ တူၺ်းယဝ်ႉ မိူၼ်ဝႃႈၽူႈယိင်းဢၼ်ႁွင်ႉသႅၼ်ႇလင်လိူဝ်ပိူၼ်ႈယူႇၼၼ်ႉ တေပဵၼ်ၽူႈယိင်းၼႂ်းႁွင်ႈႁဝ်းယဝ်ႉ၊ လိူဝ်ၼၼ်ႉၵေႃႈ ၽူႈယိင်း ၸၼ်ႉပႅတ်ႇ ႁွင်ႈ A ၼင်ႇဝႃႈၶေႉၵၼ်ႁွင်ႉယူႇ ႁွင်ႉပၼ်သဵင်ၶဝ်သမ်ႉပေႃးႁၢပ်ႇ၊ ယူႇႁိမ်းၶဝ် ႁူသမ်ႉပေႃးၶႂ်ႈၼူၵ်ႇယဝ်ႉဝႃႈ။
ၶႃႈဢၼ်ယူႇဢမ်ႇၸမ်ဢမ်ႇၵႆၼၼ်ႉၵေႃႈ လိူၵ်ႈလိူၵ်ႈသမ်ႉ လႆႈငိၼ်းၼုမ်ႇႁွမ်ၶဝ်ဢုပ်ႇၵၼ် လွင်ႈၸုမ်းမၢဝ်ႇလဝ်းၼႂ်းႁူင်းႁဵၼ်းႁဝ်းၼၼ်ႉယူႇ။
“မိူဝ်ႈလႂ်ႁၼ်ၸုမ်းၶဝ်ယူႇၸွမ်းၵၼ်ၸိူင်ႉၼႆ ႁဝ်းတေတၢႆယဝ်ႉဝႃႈသႅင်လိုၼ်း”
“ယႃႇလၢတ်ႈၸိူင်ႉၼၼ်လႄႈ ႁဝ်းလူဝ်ႇပၼ်ႁႅင်းၶဝ်ၼမ်ၼမ်ဢိူဝ်ႈ”
ၶိုၼ်းသိုပ်ႇႁွင်ႉပၼ်ႁႅင်းၵႂႃႇထႅင်ႈ ပေႃးဝႃႈသိုဝ်ႈသိုဝ်ႈ ၶဝ်ၸိူဝ်းၼႆႉ ဢမ်ႇလႆႈမႃးတူၺ်းပိူၼ်ႈလဵၼ်ႈမၢၵ်ႇၼင် မႃးတူၺ်းၵူၼ်းလဵၼ်ႈမၢၵ်ႇၼင်ၵူၺ်းလူင်။
ပေႃးမႃးတူၺ်းမၢၵ်ႇၼင် တေလႆႈႁွင်ႉသဵင်ၼႆလႄႈ ၼင်ႇဝႃႈၼူၼ်းမူဝ်ၼၼ်ႉ တေသႂ်ႇၸႂ်လီတေႉယဝ်ႉ၊ ဢဝ်တဝ်ႈၼမ်ႉမႃးပၼ်ႁဝ်း သႂ်လႅင်း၊ သႅင်ႁၵ်ႉ၊ ၶမ်းၽွင် ၵေႃႉတဝ်ႈတဝ်ႈယူႇ။ လိူဝ်ၼၼ်ႉ လႅတ်ႇမႆႈၼႆၵေႃႈ မၼ်းၵေႃႈ ဢဝ်ၸွင်ႈဢွၵ်ႇမႃးၵင်ႈႁိမ်းၶႃႈၼၼ်ႉသေ
“မိူၼ်သူတေသူၼ်ၸႂ်တေႉယဝ်ႉ သင်သူဢမ်ႇမႃးတူၺ်း သူတေတိူဝ်ႉၸႂ် တေႉဢိူဝ်ႈ.. ပေႃးပဵၼ်ၸိူင်ႉၼႆ”
“ဢမ်ႇၸႂ်ႈဝႃႈသူၵေႃႈ မႃးတူၺ်းၵူၼ်းလဵၼ်ႈမၢၵ်ႇၼင်ၵူၺ်းႁိုဝ် ပေႃးၸုမ်းၼႆႉယဝ်ႉ သူၵေႃႈဢမ်ႇၶႂ်ႈတူၺ်းယဝ်ႉ”
မၼ်းၵေႃႈဢမ်ႇလႆႈသႂ်ၸႂ်ၵႂၢမ်းၶႃႈသေယဝ်ႉ ၸုၵ်းတူၺ်းပိူၼ်ႈလဵၼ်ႈ ၼင်ႇတင်ႈၸႂ်တေႉတေႉၼၼ်ႉယဝ်ႉ။ ၵူၺ်းသၢႆတႃမၼ်းၼၼ်ႉတႄႉ ပၵ်းယူႇတီႈၵူၼ်းပႂ်ႉၵူဝ်းၼၼ်ႉၵူၺ်း ယင်းဢမ်ႇလႆႈတူၺ်းၵႂႃႇထႅင်ႈတၢင်းလႂ်လႃႈ ၵွပ်ႈဝႃႈ သႅင်ၶိူဝ်းၼၼ်ႉ ပဵၼ်ၵူၼ်းပႂ်ႉၵူဝ်းၼၼ်ႉၼႃႇ။
ၶႃႈၵေႃႈ မိူဝ်ႈတိုၵ်ႉၵိၼ်ၼမ်ႉသေ ဢၢင်ႈဢိုတ်းၽႃမၼ်းယူႇၼၼ်ႉ ယူႇယူႇ ၸွမ်ၶိူဝ်းတၼ်းမႃးမိူဝ်ႈလႂ်ၵေႃႈဢမ်ႇႁူႉ မႃးလၢၵ်ႈဢဝ်ၵႂႃႇတူၼ်ဝႃႇ၊ ၶႃႈတိုၵ်ႉၵိၼ်ယွမ်းဢဝ်သွင်ၼိဝ်ႉၼႆႉၵူၺ်း မၼ်းၵိၼ်သမ်ႉပေႃးမူတ်းတဝ်ႈသေ ဢဝ်တဝ်ႈပဝ်ႇမၼ်းပၼ်ၶႃႈၶိုၼ်းယဝ်ႉ၊ ၶႃႈဢၢင်ႈတေလႃႇၶိုၼ်းယူႇ ၵူၺ်းမၼ်းသမ်ႉပေႃးၵႂႃႇမီးတီႈဢၼ် ၸုမ်းၶဝ်ယူႇၼၼ်ႉယဝ်ႉယိုင်။
ပဵၼ်သင်လႄႈမၼ်းတေလႆႈမႃးႁဵတ်းၸိူင်ႉၼႆလႃႇ ႁဵတ်းႁႂ်ႈၶႃႈၸႂ်လမ်တေႉၼၼ်ႉယဝ်ႉ။ မိူၼ်ၶႃႈတေဢမ်ႇတၼ်းသူၼ်ၸႂ် ၵူၼ်းႁိမ်းၶၢင်ႈၶႃႈၼၼ်ႉႁေၵႃႈႁိုဝ်၊ ၵူၺ်းၵႃႈဢမ်ႇသူၼ်ၸႂ်ဢမ်ႇလႆႈယဝ်ႉလႄႈ ၼင်ႇဝႃႈသၢႆတႃၽူႈယိင်းၸိူဝ်းၼၼ်ႉ ဢွၼ်ယၵ်ႉတူၺ်းၸူးတီႈၶႃႈမႃးယဝ်ႉ၊ ဢဝ်ၶႃႈသမ်ႉပေႃးၶႂ်ႈပၢႆႈပႅတ်ႈယူႇ ၵူၺ်းၵႃႈ ယိုင်ႈပၢႆႈယိုင်ႈလီထၢင်ႇပိူင်ႈထႅင်ႈသေ ၶႃႈၵေႃႈႁဵတ်းၵႅင်ႈယူႇၵႂႃႇ ၼင်ႇဢမ်ႇမီးလွင်ႈသင်ပဵၼ်မႃးၼၼ်ႉလႄႈ တင်ႈၸႂ်တူၺ်းမၢၵ်ႇၼင်ၵႂႃႇယဝ်ႉ။ ၽွင်းၼၼ်ႉသမ်ႉမႅၼ်ႈမိူဝ်ႈ မၢၵ်ႇၼင်ၸုမ်းၸၼ်ႉၵဝ်ႈၶဝ်ၼၼ်ႉၵေႃႈ ၶဝ်ႈၸမ်ၵူဝ်းၸုမ်းၸၼ်ႉသိပ်းၶဝ်ၼႃႇယဝ်ႉသေ ၶႃႈႁဵတ်းဢမ်ႇသူၼ်ၸႂ်သင်ယဝ်ႉၵေႃႈ ၼႅတ်ႈသႅၼ်ႇႁွင်ႉၵႂႃႇ၊ ဢမ်ႇႁိုင်ၵေႃႈ မၢၵ်ႇၼင်ၼၼ်ႉ ပီႈဢၢႆႈၵေႃႉၼိုင်ႈ ပိတ်ႉပၼ်ႁႅင်းႁႅင်း ဢဝ်သႅင်ၶိူဝ်းႁပ်ႉဢမ်ႇလႆႈ ထိုင်တီႈသမ်ႉပေႃးလူမ်ႉလူင်းၵႂႃႇလႄႈ မၢၵ်ႇၼင်ၼၼ်ႉၵေႃႈ ၶဝ်ႈၵူဝ်းၵႂႃႇယူႇယဝ်ႉ။ ၵျေႃႇၸႂ်တေႉယဝ်ႉ သၢႆႈတႅၼ်းၶိုၼ်းဢၼ်ၸွမ်ၶိူဝ်းမႃးၵိၼ်ၼမ်ႉၶႃႈၼၼ်ႉ။
“သူပၼ်ႁႅင်းၸုမ်းလႂ်လႃႇ ဢမ်ႇၸႂ်ႈဝႃႈပၼ်ႁႅင်းပီႈဢၢႆႈသူယူႇႁႃႉ” သႂ်လႅင်းထၢမ်ၼင်ႇထၢင်ႇပိူင်ႈ။
“မၼ်းပဵၼ်ၵဵမ်းဢိူဝ်ႈ ၽၢႆႇလႂ်ၶႅၼ်ႇႁဝ်းပၼ်ႁႅင်းၽၢႆႇၼၼ်ႉယဝ်ႉ သမ်ႉဝႃႈမၼ်းတေလဝ်းတၢၼ်ႇႁိုဝ်ၵေႃႈ ႁဝ်းဢမ်ႇပၼ်ႁႅင်းၽၢႆႇဢၼ်သုမ်းလေႃႇ”
မိူဝ်ႈတႄႇတႄႉၵေႃႈ ပၼ်ႁႅင်းၶဝ်ယူႇၵူၺ်း ယွၼ်ႉၸွမ်ၶိူဝ်းမႃးၵိၼ်ၼမ်ႉၶႃႈလႄႈ ႁဵတ်းႁႂ်ႈၶႃႈဢမ်ႇပေႃးၸႂ်သေ ၶႃႈဢမ်ႇၶႂ်ႈပၼ်ႁႅင်းၼၼ်ႉယဝ်ႉ။
“ၸႂ်ႈၵႂႃႈ! ပဵၼ်သင်လႄႈသူတေလႆႈႁူႉၸၵ်းၵူၼ်းၸိူင်ႉၼင်ႇၶဝ်ၼၼ်ႉလႃႇ ၵၢမ်ႇလီတေႉယဝ်ႉ” သႅင်ႁၵ်ႉထၢမ်ၸူးၶႃႈ ၼင်ႇဢၢႆဢၢႆဝႆႉယူႇ။
“သူယႃႇပေၶႂ်ႈႁူႉယဝ်ႉလႃႈၼႃႈ ယိုင်ႈႁူႉၸၵ်းယိုင်ႈႁူဝ်ၶႆႈၵူၺ်း ၵူၼ်းၸိူင်ႉၼင်ႇၶဝ်ၸိူဝ်းၼၼ်ႉ”
ဝၢႆးသေၸုမ်းၸၼ်ႉၵဝ်ႈၶဝ် ဢဝ်ဝႆႉၼိုင်ႈၵူဝ်းယဝ်ႉၼၼ်ႉ ၸုမ်းၵူၼ်းလဝ်းၶဝ်ၵေႃႈ ၵူဝ်ၼႃႈတႃတေလူႉလႄႈ ဢွၼ်ၵၼ်ၶတ်းၸႂ်ၶဝ်ႈႁိမ်တေႉတေႉဝႃႈဝႃႈယူႇယဝ်ႉ။ ၽွင်းၼၼ်ႉ တင်းသွင်ၽၢႆႇႁိမ်ၵၼ် ပဵၼ်ဢၼ်လီတူၺ်းတေႉတေႉ။ ၽႂ်ၵေႃႈ ဢမ်ႇႁူႉလႆႈဝႃႈ ၽႂ်တေပေႉၽႂ်ၼၼ်ႉယဝ်ႉ ၵူၼ်းပၼ်ႁႅင်းမၼ်းၵေႃႈ ၼင်ႇဝႃႈႁွင်ႉသႅၼ်ႇပဵၼ်တေႉပဵၼ်ဝႃႈယူႇ။ မွင်းၶဝ်ႈၸမ်ၵူဝ်းၵူၺ်း တင်းတူၺ်းတင်းၸႂ်ၶိုၼ်ႈမႃးၸွမ်းယဝ်ႉ ဢမ်ႇႁူႉဝႃႈၶႃႈတၼ်းႁွင်ႉသႅၼ်ႇၸွမ်းပိူၼ်ႈမိူဝ်ႈလႂ် ၼင်ႇဝႃႈ သဵင်ၶႃႈၼၼ်ႉၵေႃႈ ႁၢပ်ႇမႃးမိူၼ်ၵၼ်။
မိူဝ်ႈတိုၵ်ႉၶႄႉၶဵင်ႇၵၼ်ၼင်ႇလီတူၺ်းၼၼ်ႉ ၶၢဝ်းယၢမ်းၵေႃႈမူတ်းပႅတ်ႈႁေ တွၼ်ႈတႃႇတင်းသွင်ၽၢႆႇၼၼ်ႉၵေႃႈ ပဵၼ်ဢၼ်ယဝ်ႉတူဝ်ႈၵႂႃႇယဝ်ႉ ပွၵ်ႈၼႆႉၵေႃႈ ၸၼ်ႉၵဝ်ႈၶဝ်ပေႉဝႆႉယူႇ။ သမ်ႉဝႃႈၸုမ်းၵူၼ်းလဝ်းၶဝ်ၼၼ်ႉတေသုမ်းသေတႃႉ ၸႃႉၸိူဝ်းဢၼ်ပဵၼ်ၽူႈယိင်းၶဝ်ၼၼ်ႉၵေႃႈ ယင်းတိုၵ်ႉၸွမ်းႁွင်ႉသေႃႇပၼ်ႁႅင်းၶဝ်လႆႈယူႇ။ တႃႉသေဝႃႈၵူၼ်းလဝ်း ႁဵတ်းႁင်ၵေႃႈပိူၼ်ႈယွင်ႈတေႉၼေႃ၊ တေႃႈၼင်ႇသုမ်းယဝ်ႉ ပိူၼ်ႈယင်းၸွမ်းပၼ်ႁႅင်းယူႇ။ သမ်ႉဝႃႈၸုမ်းၸၼ်ႉၵဝ်ႈၶဝ်ၼၼ်ႉ တေပေႉသေတႃႉ ယင်းဢမ်ႇပေႃးမီးၵူၼ်းၸူမ်းၸွမ်းတၢၼ်ႇ ၵူၼ်းပၼ်ႁႅင်းၸုမ်းၵူၼ်းလဝ်းၶဝ်ၼၼ်ႉလႃႈ။ ဝၢႆးသေၸုမ်းၼႆႉလဵၼ်ႈယဝ်ႉၼႆၵေႃႈ ၵူၼ်းသမ်ႉပေႃးႁၢင်ႇၵႂႃႇမူတ်း၊ ၵူၺ်းၵိုတ်းၵူၼ်းလဵၼ်ႈမၼ်းလႄႈ ၵူၼ်းသူၼ်ၸႂ်မၼ်းဢိတ်းဢွတ်းၵူၺ်း။ တေဝႃႈၶႃႈၵေႃႈ ၶဝ်ႈပႃးၼႂ်းၵူၼ်းသူၼ်ၸႂ်ဝႆႉယူႇ မိူၼ်ၵၼ် လႆႈတင်ႈၸႂ်ၵိုတ်းပႂ်ႉတူၺ်းယူႇ။ ၵမ်းၼႆႉၵေႃႈ ပဵၼ်ၸၼ်ႉ ပႅတ်ႇႁွင်ႈ B လႄႈ ႁွင်ႈA ၶႄႉၶဵင်ႇၵၼ်ယဝ်ႉ။ သမ်ႉဝႃႈပဵၼ်ၵူၼ်းၸၼ်ႉလဵဝ်ၵၼ်လဵၼ်ႈသေတႃႉ ယင်းဢမ်ႇမီးၵူၼ်းမႃးပၼ်ႁႅင်းမိူၼ် ဢၼ်ပၼ်ႁႅင်းၸုမ်းၵူၼ်းလဝ်းမိူဝ်ႈၵႆႈၼၼ်ႉလႃႈ ၵူၼ်းႁွင်ႈႁဝ်း ဢၼ်ပၼ်ႁႅင်းၵၼ်ယူႇၵေႃႈ မီးၸႃႉႁဝ်းႁႃႈၵေႃႉလႄႈ ထႅင်ႈသွင်သၢမ်ၵေႃႉၼၼ်ႉၵူၺ်း လိူဝ်ၼၼ်ႉတႄႉ မိူဝ်းမူတ်းယဝ်ႉ။
တေဝႃႈႁိုဝ်ၵေႃႈ ၽူႈၸၢႆးၼႂ်းႁွင်ႈႁဝ်းၼၼ်ႉ မိူၼ်ပိူၼ်ႈတဵၵ်းႁႂ်ႈမႃးလဵၼ်ႈၵူၺ်းယူႇ၊ လဵၼ်ႈၵေႃႈသမ်ႉပေႃးဢမ်ႇၶဝ်ႈတိၼ်ၵၼ်သေဢိတ်း ဢၼ်လွင်ႈယႂ်ႇၼႆႉ ဢၢႆႈဢွင်ႇၼၼ်ႉယဝ်ႉ ၼင်ႇဝႃႈၼႂ်းပၢင်ႇၼၼ်ႉ မီးမၼ်းၵူၺ်းဢၼ်မေႃလဵၼ်ႈ။ မိူဝ်ႈဢၼ်တိုၵ်ႉဢွၼ်ၵၼ်ပိတ်ႉလဵၼ်ႈၵၼ်ယူႇလီလီၼၼ်ႉ ဢမ်ႇသၢင်ႇထုၵ်ႇသေ ဢၢႆႈဢွင်ႇၼၼ်ႉၵေႃႈ သမ်ႉၶတ်းၶႃၵူၼ်းၼႂ်းႁွင်ႈ A ၼၼ်ႉလူမ်ႉလႄႈ မိူၼ်ဝႃႈတေလူမ်ႉႁႅင်း ထိုင်တီႈပေႃးလႆႈၽႃၽိူဝ်း လုၵ်ႉဢွၵ်ႇပၢင်ႇၵႂႃႇ ၼၼ်ႉယဝ်ႉ။ မိူဝ်ႈမီးလွင်ႈၸိူင်ႉၼၼ်မႃးၼႆၵေႃႈ ၼင်ႇဝႃႈၼႂ်းပၢင်ၼၼ်ႉ ဢမ်ႇပေႃးၶႂ်ႈလီၵၼ်မႃးသေ ၽၢႆႇတၢင်းႁွင်ႈ A ၼၼ်ႉၵေႃႈ ပဵၼ်ဢၼ်ဢမ်ႇႁၢၼ်ႉၸႂ်မႃး ဝႃႈၵူၼ်းႁွင်ႈ B ၼၼ်ႉ တင်ႈၸႂ်ႁဵတ်းၼႆသေ မီးလွင်ႈၽိတ်းမေႃးၵၼ်မႃးယူႇယဝ်ႉ။
ယိုင်ႈတူၺ်းယိုင်ႈၶႂ်ႈလီတူၺ်းမႃးယဝ်ႉ ၵူၼ်းပဵၼ်လုင်းပဵၼ်လုင်းပေႃႉထုပ်ႇတွႆႇၵၼ် မိူဝ်ႈဢၼ်ၶႃႈတင်ႈၸႂ်ႁေတူၺ်းယူႇၼၼ်ႉ ၼူၼ်းမူဝ်ၵေႃႈ လၢၵ်ႈဢဝ်ၶႃႈ ႁွင်ႉမိူဝ်းၼႂ်းႁွင်ႈႁဵၼ်းၵမ်းလဵဝ်ယူႇ။ ၶႃႈၵေႃႈ မိူဝ်ႈဢၼ်မီးၸႂ်ၶႂ်ႈတူၺ်းယူႇၼၼ်ႉ
“တေၸဵဝ်းမိူဝ်းႁဵတ်းသင်လႃႇတိုၵ်ႉလီတူၺ်းယူႇ”
“ၵမ်ႉပိူၼ်ႈတေဢဝ်ပႃးႁဝ်းယဝ်ႉ လီတူၺ်းၼႃႇၵေႃႈဢမ်ႇၸႂ်ႈ ၵူၼ်းၽိတ်းၵၼ်ၼၼ်ႉ” ၼူၼ်းမူဝ်လၢတ်ႈ။
“ပႂ်ႉတူၺ်းၵွၼ်ႇလႄႈၽႂ်တေပေႉ”
“ယႃႇသူၼ်ၸႂ်ယဝ်ႉ ၵမ်ႉၶူးၵေႃႈတေမႃးယဝ်ႉဝႃႈ ပေႃးဢမ်ႇၼႅတ်ႈပၢႆႈတႄႉ ၵမ်ႉၶူးတေဝႃႈႁဝ်းၵေႃႈပႃးၸွမ်းယဝ်ႉ” သႂ်လႅင်းလၢတ်ႈ။
ၵူၼ်းၸိူင်ႉၼင်ႇၶဝ်ၼႆႉ ၵိုင်ႇတၢင်းဢမ်ႇႁဵတ်းၽိတ်းပၵ်းပိူင်ယူႇၵူၺ်း ပေႃးႁူႉဝႃႈမၼ်းၽိတ်း ၶဝ်ၵေႃႈပေႃးႁႃလၢႆးပၢႆႈမၼ်းလႆႈ ယူႇယဝ်ႉ။ ၵူၺ်းၵႃႈ မိူၼ်ဝႃႈ ၶႃႈၼၼ်ႉသမ်ႉ ယိုင်ႈႁူႉဝႃႈမၼ်းၽိတ်း ယိုင်ႈသူၼ်ၸႂ်မၼ်း၊ ၼႆဝႃႈပိူၼ်ႈၽိတ်းၵၼ်တီႈလႂ် တီႈၼၼ်ႉပႃးၶႃႈယူႇတႃႇသေႇ။ ပွၵ်ႈၼႆႉတႄႉ လႅပ်ႈတေလွတ်ႈယူႇၵူၺ်း ယွၼ်ႉၶဝ်ၸိူဝ်းၼႆႉ ဢွၼ်ၶႃႈပၢႆႈလႆႈယဝ်ႉ။
ထိုင်ၶၢဝ်းလူင်းႁူင်းႁဵၼ်းယဝ်ႉ မိူဝ်ႈဢၼ်ဢွၼ်ၵၼ်တၵ်ႉယမ်တုင်းယဝ်ႉသေ ၶူးယွတ်ႈ ဢၼ်ပဵၼ်ၶူးၵုမ်းၽၢႆႇလဵၼ်ႈႁႅင်းၼၼ်ႉၵေႃႈ ယူႇပႃႈၼႃႈလုၵ်ႈႁဵၼ်းၼၼ်ႉသေယဝ်ႉ မႃးလၢတ်ႈထိုင် လွင်ႈငဝ်းလၢႆး ဢၼ်လုၵ်ႈႁဵၼ်းၽိတ်းၵၼ်ၼၼ်ႉလႄႈ ႁွင်ႉၵူၼ်းဢၼ်ၽိတ်းၵၼ်ၼၼ်ႉ ဢွၵ်ႇမႃးတၢင်းၼႃႈထႅဝ်သေယဝ်ႉ။ ႁၢင်ႈၽၢင်ၶဝ်ၸိူဝ်းၼၼ်ႉၵေႃႈ တူၺ်းပေႃးဢမ်ႇလႆႈသေဢိတ်း၊ ၵမ်ႈၽွင်ႈၵေႃႈ တႃၵမ်ႇ၊ ၵမ်ႈၽွင်ႈၵေႃႈ သူပ်းလိူတ်ႈ၊ ၶူႈၼင်လိူတ်ႈ ဢၼ်ႁၢႆႉႁႅင်းၼႃႇၼႆႉ ႁူဝ်သမ်ႉပေႃးလိူတ်ႈၼၼ်ႉယဝ်ႉ ၼင်ႇဝႃႈ ဢၢႆႈဢွင်ႇၼၼ်ႉၵေႃႈ တႃၵႂ်ႈဝႆႉယူႇ။ ၸွမ်းလူၺ်ႈၽိတ်းၼင်ႇၵၼ်ၼႆလႄႈ ၶူးယွတ်ႈၵေႃႈ ၼင်ႇဢၼ်ပုၼ်ႈၽွၼ်းမၼ်းမီးၼၼ်ႉ လႆႈပႃးတင်းၶွၼ်ႉႁေ ႁႅမ်ၶဝ်တေႃႇၼႃႈလုၵ်ႈႁဵၼ်းတင်းၼမ်ၼၼ်ႉ ၵေႃႉသွင်ၶွၼ်ႉ ႁႅင်းႁႅင်းယူႇယဝ်ႉ။
တေဝႃႈႁိုဝ်လႃႇ ၶူးယွတ်ႈပဵၼ်ၶူးၽၢႆႇလဵၼ်ႈႁႅင်း ၵဵဝ်ႇလူၺ်ႈၵၢၼ်ၽိုၵ်းသွၼ်လုၵ်ႈႁဵၼ်းၸိူဝ်းၼႆႉ ယဝ်ႉတီႈမၼ်းမူတ်း လႄႈ သမ်ႉပဵၼ်ၵူၼ်းဢၼ်မီးမႃႇမီးႁႅင်းဝႆႉ၊ မိူဝ်ႈလုၵ်ႈႁဵၼ်းၵေႃႉလႂ်ၺႃးၶွၼ်ႉမၼ်းၼႆ ပေႃးဢမ်ႇပႆလႆႈပဵၼ်သွင်သၢမ်ဝၼ်းၵေႃႈမီး။ ႁႅမ်ယူဝ်းယူဝ်းၵူၺ်းဢမ်ႇၸႂ်ႈ လႆႈဢူပ်ႇပူပ်ႇသေပၼ်မၼ်းႁႅမ်ၼၼ်ႉယဝ်ႉ ၵမ်ႈၽွင်ႈၵေႃႈ သမ်ႉပေႃးဢမ်ႇႁတ်းတူၺ်းယူႇ ၵူၺ်းၵႃႈ ၶႃႈတႄႉႁၼ်ၸိူင်ႉၼၼ်ၶႂ်ႈယၢမ်ႈၵႂႃႇယဝ်ႉ။ လၢတ်ႈလႆႈဝႃႈ ပဵၼ်ၶူးဢၼ်လုၵ်ႈႁဵၼ်းၶဝ် တင်းၵူဝ် လႄႈ တင်းၸင်းၵေႃႉၼိုင်ႈ လိူဝ်သေၼၼ်ႉ ၶူးယႂ်ႇၵေႃႈ ဢမ်ႇပေႃးၶႂ်ႈသုၵ်ႉယုင်ႈၸွမ်းမၼ်းၵႃႈႁိုဝ်။
ထိုင်မႃးထႅင်ႈဝၼ်းၼိုင်ႈ ယၢမ်းၵၢင်ၼႂ် ၾူၼ်တူၵ်းယွႆးယွႆး မိူဝ်ႈၶႃႈမႃးႁွတ်ႈထိုင်တီႈႁူင်းႁဵၼ်းၼၼ်ႉ လႆႈႁၼ်ၵႃးလၢႆလၢႆလမ်း ၸွတ်ႇတမ်းၸႅၼ်ႇၵၼ် ၶပ်ႉယႆယူႇၼႂ်းပၢင်ႇႁူင်းႁဵၼ်းၼၼ်ႉယဝ်ႉ။ မိူၼ်တေပဵၼ်ၵူၼ်းမီးငိုၼ်းၶဝ်ယဝ်ႉ ၸင်ႇတေသိုဝ်ႉၶီႇၵၼ်လႆႈ လၢမ်းတူၺ်းတႄႉ လႅပ်ႈတေပဵၼ်လွင်ႈမိူဝ်ႈဝႃးၼၼ်ႉၵႂႃႈထၢင်ႇ။ မိူဝ်ႈၶႃႈတိုၵ်ႉႁႃမိူၼ်ႇမိုင်ဝူၼ်ႉတူၺ်းၸွမ်း ၵႃးၸိူဝ်းၼၼ်ႉယူႇၼၼ်ႉ ၼူၼ်းမူဝ်ၵေႃႈ မိူၼ်တေႁၼ်ၶႃႈႁေ ႁွင်ႉၶႃႈၵႂႃႇႁွင်ႈလိုဝ်ႈၶူးၸွမ်းမၼ်းယူႇ။ ႁိမ်းႁွင်ႈလိုဝ်ႈၶူးၼၼ်ႉသမ်ႉ မီးႁွင်ႈပၢင်ၵုမ်လႄႈ ႁွင်ႈၼၼ်ႉၵေႃႈ ၽၵ်းတူဢမ်ႇလႆႈဢိုတ်းဝႆႉ၊ လႆႈႁၼ်တၢင်းၼႂ်းႁွင်ႈၼၼ်ႉသေယဝ်ႉ ၼင်ႇဝႃႈ မီးလုၵ်ႈႁဵၼ်းဢၼ်ၽိတ်းၵၼ်မိူဝ်ႈဝႃးၼၼ်ႉလႄႈ ဢူႈမႄႈလုၵ်ႈႁဵၼ်းၸိူဝ်းၼၼ်ႉယဝ်ႉ တင်းၶူးယူႇလၢႆလၢႆၵေႃႉ။
ၶႃႈၵေႃႈမိူၼ်ၶႂ်ႈသူၼ်ၸႂ်မႃးယဝ်ႉ လႆႈၵိုတ်းၶျွင်းထွမ်ႇတူၺ်းၶဝ်ဢုပ်ႇၵၼ်ၵႂႃႇ၊ ႁူႉယူႇဝႃႈလုၵ်ႈႁဵၼ်းၽိတ်းတင်းသွင်ၽၢႆႇလႄႈ ဢူႈမႄႈၽၢႆႇလႂ်ၽၢႆႇၼိုင်ႈၵေႃႈ သမ်ႉဢမ်ႇယွမ်းသေ ဢၢၼ်းဢဝ်တၢင်းၽိတ်းၵၼ် ထဵင်ၵၼ်ၵႂႃႇၵႂႃႇမႃးမႃးယဝ်ႉ။ လိူဝ်သေၼၼ်ႉဢမ်ႇၵႃး သမ်ႉပၢႆဢဝ်ၶူးယွတ်ႈမႃးၵဵဝ်ႇၶွင်ႈၸွမ်း ယွၼ်ႉႁႅမ်လုၵ်ႈႁဵၼ်းဢမ်ႇၽဵင်ႇပဵင်းၼႆထႅင်ႈ။ ဢူႈမႄႈဢၼ်မႃးၽိတ်းၵၼ်ယူႇၸိူဝ်းၼႆႉၵေႃႈ ပဵၼ်ဢၼ်ၸွႆႈထႅမ်ႁူင်းႁဵၼ်းႁဝ်းမႃးယူႇတႃႇသေႇလႄႈ မိူဝ်ႈဢၼ်ထုၵ်ႇၶူးပေႃႉႁႅမ်လုၵ်ႈၶဝ်ၼၼ်ႉ ပဵၼ်ဢၼ်ဢမ်ႇႁၢၼ်ႉၸႂ်သေ ဢၢၼ်းဢဝ်တၢင်းၽိတ်းၶူးလႄႈႁူင်းႁဵၼ်းလင်ၼႆႉ ဢၼ်ဢမ်ႇတူၺ်းထိုင်လုၵ်ႈႁဵၼ်းလီလီၼႆယဝ်ႉ။ ၶူးလူင်ဢၼ်ႁၼ်ပဵၼ်ၸိူင်ႉၼၼ်ၵေႃႈ ၼႅတ်ႈၵူမ်ႈၵွမ်းၼွမ်းၸူးၵမ်းလဵဝ်ယူႇ။
ၼူၼ်းမူဝ်ဢၼ်ႁၼ်ၶႃႈၸုၵ်းၸိူဝ်ႈယူႇႁဵတ်းၼၼ်ၼၼ်ႉၵေႃႈ ၼႅတ်ႈလၢၵ်ႈၶႃႈဢွၵ်ႇႁၢင်ႇႁွင်ႈၼၼ်ႉၵႂႃႇသေယဝ်ႉ။
“တေၵႂႃႇၸုၵ်းတူၺ်းပိူၼ်ႈၸိူင်ႉၼၼ်ႁဵတ်းသင်လႃႇ ဢမ်ႇမီးလွင်ႈယဵၼ်ႇငႄႈႁေယဝ်ႉဢိူဝ်ႈ ”
“သူပေႉၸဵဝ်းမႃးႁွင်ႉႁဝ်းလႃႇ တိုၵ်ႉလီတူၺ်းယူႇ”
မိူဝ်ႈႁၼ်ဢူႈမႄႈပိူၼ်ႈ ၵႅတ်ႇၶႄပၼ်လုၵ်ႈၶဝ်ၸိူင်ႉၼၼ် မၢင်ပွၵ်ႈၵေႃႈ ၶႃႈၶႂ်ႈမီးဢူႈမႄႈၸိူင်ႉၼၼ်တေႉယဝ်ႉ။ မၼ်းတေပဵၼ်လႆႈၸိူင်ႉႁိုဝ် ၸၢတ်ႈပၢၼ်ၵူၼ်းၵေႃႉၼိုင်ႈလႄႈၵေႃႉၼိုင်ႈ မၼ်းပိူင်ႈၵၼ်ဝႆႉလူး မၢင်ပွၵ်ႈၶႃႈၵေႃႈဝူၼ်ႉယူႇဝႃႈ သင်ဢူႈႁဝ်းၼၼ်ႉ ဢမ်ႇလူႉသဵင်ႈပႅတ်ႈ ၸွင်ႇမႄႈႁဝ်းတေၽၢတ်ႇယၢၼ်ႁဝ်းၵႂႃႇၸိူင်ႉၼႆၼေႃ၊ သင်ဢူႈႁဝ်းဢမ်ႇၵိၼ်လဝ်ႈ လုတ်ႇလႅၼ်းယႃႈၼႃႇ ၸွင်ႇတေလႅပ်ႈမီးဢႃႇယုယိုၼ်းယၢဝ်းလႆႈထိုင်မိူဝ်ႈလဵဝ်ႁိုဝ်။
ဝၼ်းမိူဝ်ႈၼႆႉၵေႃႈ ပဵၼ်ဝၼ်းဢၼ်ဢူႈႁဝ်း တၢႆၽၢတ်ႇပႅတ်ႈႁဝ်းပီႈၼွင်ႉၵႂႃႇ ၼၼ်ႉယဝ်ႉ။ ၶႃႈၵေႃႈ ၸႂ်ထိုင်လႄႈလႆႈဝူၼ်ႉထိုင်ၵူၺ်း ဢမ်ႇမီးသင် ဢၼ်ၽၢတ်ႇယၢၼ်ႁဝ်းၵႂႃႇယဝ်ႉ တေႁူၼ်မႃးၸူးႁဝ်းၶိုၼ်းငၢႆႈငၢႆႈ တေႃႈၼင်ႇမႄႈ ဢၼ်မီးသၢႆၸႂ်ယူႇ ယင်းလိုမ်းႁဝ်းပီႈၼွင်ႉလႆႈ ၸူဝ်ႈၸၢတ်ႈပၢၼ်ၶႃႈ ဢၼ်ၵူဝ်လိူဝ်သေပိူၼ်ႈၵေႃႈ တေပဵၼ်လွင်ႈၽၢတ်ႇယၢၼ် ၼၼ်ႉယဝ်ႉ။
ယၢမ်ႈမီးၵူၼ်းလၢတ်ႈဝႆႉဝႃႈ ၵူၼ်းႁဝ်းဢၼ်ႁူပ်ႉထူပ်းၵၼ်ၼၼ်ႉ တွၼ်ႈတႃႇလွင်ႈၽၢတ်ႇယၢၼ် မိူၼ်မၼ်းတေၸႂ်ႈယူႇ။ ယွၼ်ႉၼၼ် ၶႃႈလိူၵ်ႈတေဢမ်ႇၶႂ်ႈႁူႉၸၵ်းၽႂ်ထႅင်ႈလႄႈ တေဢမ်ႇလႆႈၽၢတ်ႇယၢၼ်တင်းၽႂ်ထႅင်ႈ ၵၢၼ်ႁူပ်ႉထူပ်းၵၼ်ပဵၼ်လွင်ႈလီ ၵူၺ်းၵႃႈ မိူဝ်ႈၽၢတ်ႇယၢၼ်ၵၼ်ၵႂႃႇယဝ်ႉၼၼ်ႉ မၼ်းၽၢၵ်ႇၽင်ဝႆႉ ႁွႆးၸဵပ်းလႄႈ လွင်ႈၸႂ်ထိုင် တႃႇၵူၼ်းၵေႃႉၵိုတ်းၼၼ်ႉယူႇလႄႈ ဢမ်ႇဝႃႈၽႂ်တေၽၢတ်ႇၵႂႃႇၵေႃႈ ၶႃႈဢမ်ႇယၢမ်ႈႁေပွၵ်ႈ မၼ်းမိူၼ်ပဵၼ်လွင်ႈမႂ်ႇမႂ်ႇ တွၼ်ႈတႃႇၶႃႈယူႇတႃႇသေႇ ၼၼ်ႉယဝ်ႉ။
တွၼ်ႈသိပ်းပႅတ်ႇသုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသိပ်းၵဝ်ႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
