တွၼ်ႈသိပ်းႁူၵ်း
လွင်ႈဢၼ်ၶူးၵူႈၵေႃႉ တေတွင်းလုၵ်ႈႁဵၼ်းၵူႈၵေႃႉ၊ ႁူႉလွင်ႈလုၵ်ႈႁဵၼ်းၵူႈၵေႃႉၼၼ်ႉ ဢမ်ႇၸႂ်ႈငၢႆႈငၢႆႈ၊ တေသႂ်ႇၸႂ်ႁႂ်ႈႁူႉၸွမ်းၵူႈၸွၵ်ႉၵူႈၸဵင်ႇၼၼ်ႉၵေႃႈ ပဵၼ်လွင်ႈယၢပ်ႇယူႇ။ မၢင်လွင်ႈမၢင်ဢၼ် ၵၢၼ်ႁပ်ႉႁူႉၶေႃႈမုၼ်းလႄႈ လႅင်ႇၶေႃႈမုၼ်းၼၼ်ႉ မၼ်းၵေႃႈဢမ်ႇၸႂ်ႈဝႃႈတေထုၵ်ႇမႅၼ်ႈၵူႈဢၼ်ၵူႈလွင်ႈ။ ႁူႉယူႇဝႃႈ ၵူၼ်းၵူႈၵေႃႉၼၼ်ႉ တိုၼ်းမီးၸႂ်ၸွမ်းၽၢႆႇဝႆႉယူႇ ၽႂ်ၵေႃႈတေလၢတ်ႈထိုင် လွင်ႈဢၼ်ႁပ်ႉႁူႉႁၼ်လႆႈလႄႈ တေပဵၼ်ၽွၼ်းလီတႃႇၽၢႆႇမၼ်းၼၼ်ႉၵူၺ်း။
ၶေႃႈၵႂၢမ်းၵူၼ်းႁဝ်းၼၼ်ႉ လီၵူဝ်မိူၼ်ၼင်ႇၶူမ်းလႅဝ်းယဝ်ႉ ပေႃးဢမ်ႇမေႃလၢတ်ႈၵေႃႈ ၸၢင်ႈမၢတ်ႇတိူဝ်ႉၸူးႁဝ်းၶိုၼ်းယူႇ။ ၶႃႈၵေႃႈ ဝႆႉၸႂ်ယဵၼ်ယဵၼ်သေ ထူၺ်ႈၸႂ်လိုၵ်ႉလိုၵ်ႉယဝ်ႉ ၶဝ်ႈၵႂႃႇတီႈၼႂ်းႁွင်ႈၶူးလူင်ၼၼ်ႉလႄႈ လႆႈႁၼ် ၶူးၸၢမ်ႁွမ် ၼင်ႈဢိုတ်ႇႁႆႈၸဵတ်ႉၼမ်ႉတႃယူႇတေႃႇၼႃႈၶူးလူင်ၼၼ်ႉယဝ်ႉ။
“ငိၼ်းဝႃႈ..မႂ်းဝႃႈႁင်းၶူးၶဝ်ၼႆႁႃႉ? ၶူးၶဝ်ဝႃႈ…မႂ်းလၢတ်ႈဝႃႈ ဢၼ်ၶူးသွၼ်ၼၼ်ႉမၼ်းဢမ်ႇလီလႄႈ ၼွၼ်းႁေထွမ်ႇၵေႃႈလႆႈၸိူင်ႉၼၼ်ၼႆ..ဢမ်ႇၸႂ်ႈႁိုဝ်”
ၶႃႈတေလႆႈႁဵတ်းႁိုဝ်လႃႇ ႁၼ်ယူႇဝႃႈၶူးၸၢမ်ႁွမ်ၼၼ်ႉႁဵတ်းၵႅင်ႈဢဝ်ၸႂ်ၶူးလူင် ဢဝ်လွင်ႈဢူၼ်ႈဢွၼ်ႇမၼ်းၼႄႁႂ်ႈပိူၼ်ႈဢီးလူၼႆ၊ ႁၼ်ယဝ်ႉၵေႃႈ ၶႂ်ႈတိုပ်ႈသႂ်ႇပၼ်ၵူၺ်းယဝ်ႉဝႃႈ၊ ႁၢင်ႈမေႃၼႃႇ ၶႃႈတမ်ႉပႆႇလၢတ်ႈသင် တူၺ်းၼႃႈမၼ်းၵူၺ်း သဵင်ႁႆႈမၼ်းပေႃးဢွၵ်ႇယဝ်ႉ။ ဢမ်ႇႁူႉဝႃႈဢဝ်ၵူၼ်းၸိူင်ႉၼႆ မႃးႁဵတ်းၶူးႁဵတ်းသင် မၼ်းႁၢင်ႈလီၼႆႁႃႉ ႁၢင်ႈလီၵေႃႈ ပေႃးတၢၼ်ႇတေပဵၼ်ၶူးဢၼ်သွၼ်လုၵ်ႈႁဵၼ်းလႆႈလီယဝ်ႉ။ မဵဝ်းၸႂ်ႉသဵၼ်ႈၸႂ်ႉသၢႆလၢႆလၢႆၵူၺ်းလူင် ၵူၼ်းၸိူင်ႉၼႆ ပဵၼ်ၵူၼ်းဢၼ်ၶႃႈဢမ်ႇလႆႈၸႂ်လိူဝ်ပိူၼ်ႈ ၼၼ်ႉယဝ်ႉ။
ၶႃႈဝူၼ်ႉၽိတ်းယဝ်ႉ ဢၼ်ၶႃႈပၼ်ၵႂၢမ်းမၼ်ႈၼၢႆးႁဝ်းၸိူင်ႉၼၼ် ၶႃႈတေယဵၼ်ႉဢမ်ႇလႆႈယဝ်ႉဝႃႈ။ ပဵၼ်သင်လႄႈတေလႆႈမႃးယူႇၼႂ်းငဝ်းလၢႆးၸိူင်ႉၼႆလႃႇ။ မိူဝ်ႈၶႃႈတိုၵ်ႉဝူၼ်ႉယူႇၼၼ်ႉၵေႃႈ ၶူးလူင်ၸင်ႇထၢမ်ၸူးၶိုၼ်းထႅင်ႈ။
“မႂ်းလႆႈလၢတ်ႈယူႇႁႃႉ?”
ၶဝ်ၸႂ်ႉလၢႆးဢူၼ်ႈဢွၼ်ႇႁေၶဝ်ႈႁႃ၊ ၸႂ်ႉၶေႃႈၵႂၢမ်းဝၢၼ်ႁူသေၶဝ်ႈႁႃ တူၺ်းမိူၼ်ၶူးၵေႃႈ တေယုမ်ႇမၼ်းတေႉၼင်ႇၵဝ်ႇ၊ သင်ဝႃႈၶႃႈႁဵတ်းၸိူင်ႉၼၼ်ၼႆ ၸွင်ႇတေမိူၼ်ၼၼ်ႁိုဝ် ၸၢမ်းတူၺ်းၵႂႃႈ။ တူပ်းမႃးၵေႃႈတူပ်းၶိုၼ်းၵူၺ်းလေႃႇ..ယၢပ်ႇႁင်၊ ၶႃႈၵေႃႈ ၼင်ႈလူမ်ႉလူင်းၼိူဝ်ပိုၼ်ႉၼၼ်ႉသေ
“ၶႃႈဢမ်ႇလႆႈဝႃႈၸိူင်ႉၼၼ်ၶႃႈၶူး ၶႃႈ..လၢတ်ႈဝႃႈ ၶူးသွၼ်လိၵ်ႈ မၼ်းလီထွမ်ႇၼႃႇ ထွမ်ႇယဝ်ႉၵေႃႈ ပဵၼ်ဢၼ်ၸပ်းၸႂ်… ထိုင်တီႈဢဝ်ၶႃႈပေႃးမိူဝ်းၼွၼ်းၾၼ်လူးၵွၼ်ႇ.. လၢတ်ႈၸိူင်ႉၼႆမၼ်းၽိတ်းယူႇၶႃႈႁႃႉ”
ၶႃႈၵေႃႈလုၵ်ႉၸုၵ်းၶိုၼ်ႈမႃးသေယဝ်ႉ ႁဵတ်းၵႅင်ႈၸဵတ်ႉၼမ်ႉတႃ မိူၼ်ၼင်ႇႁႆႈယဝ်ႉလႄႈ
“ၶူးၸၢမ်ႁွမ်ႁဝ်း..တင်းႁၢင်ႈလီ၊ ဢူၼ်ႈဢွၼ်ႇမေႃလၢတ်ႈမေႃဢၢၼ်ႇပေႃးတၢၼ်ႇၼၼ်ႉ ပေႃးၶူးလႆႈႁၼ်ၼႆ ၶူးတေၼွၼ်းလပ်းလႆႈယူႇၶႃႈႁႃႉ၊ မိူဝ်ႈၶူးဢၢၼ်ႇလိၵ်ႈပၼ်ႁဝ်းထွမ်ႇၼၼ်ႉ လီတူၺ်းတေႉတေႉၶႃႈယဝ်ႉ ပေႃးၶူးဢမ်ႇယုမ်ႇ ၵႂႃႇတူၺ်းၸွမ်းၵေႃႈလႆႈယူႇၶႃႈလူး ၶူးတေလႆႈႁၼ်ဝႃႈ ၶူး…ၸၢမ်ႁွမ် ႁဝ်းၼၼ်ႉမေႃသွၼ်ႁဝ်းၵႃႈႁိုဝ်ၼႆ”
“ဢမ်ႇၸႂ်ႈ! မၼ်းဢမ်ႇလႆႈလၢတ်ႈၸိူင်ႉၼၼ်တီႈၶႃႈၼႃၶူး မၼ်းလႅၼ်ဢေႃႈ”
ၶႃႈၵေႃႈ ႁဵတ်းၼင်ႇဢမ်ႇႁူႉဢမ်ႇႁၼ်သေ “ၶႃႈတေလႅၼ်ႁဵတ်းသင်ၶႃႈလႃႇ ဢၼ်ၶႃႈလၢတ်ႈမႃးၼႆႉ ဢမ်ႇၸႂ်ႈလွင်ႈတေႉၶႃႈႁႃႉ၊ ဢမ်ႇၼၼ်ၵေႃႈ..ၶူးဢမ်ႇၸႂ်ႈၵူၼ်းလီၸိူင်ႉၼင်ႇၶႃႈလၢတ်ႈၼႆႉ ၼႂ်းသၢႆတႃၶႃႈ ႁၼ်ၶူးပဵၼ်ၵူၼ်းလီတႄႉတႄႉဢေႃႈ ပဵၼ်သင်လႄႈၶူးမႃးလၢတ်ႈၼိူဝ်ၶႃႈၸိူင်ႉၼႆ”
ၶႃႈၵေႃႈႁဵတ်းၵႅင်ႈႁႆႈဢွၵ်ႇသဵင်လင်မႃး တေႃႇၼႃႈၶူးလူင်ၼၼ်ႉယူႇ။
“ၵိုတ်းလႆႈယဝ်ႉတင်းသွင်ၵေႃႉ! ဢၼ်ယဝ်ႉၵေႃႈႁႂ်ႈယဝ်ႉၵႂႃႇႁေလႄႈ”
ၶႃႈတႄႉလၵ်ႉယုမ်ႉယူႇၵူၺ်းလေႃႇ။ ၵူၺ်းၵႃႈ ၶူးၸၢမ်ႁွမ်ၼၼ်ႉတႄႉ ဢမ်ႇပေႃးၸႂ်ၵႃႈႁိုဝ်လႄႈ
“ၶူးႁဵတ်းၸိူင်ႉၼႆဢမ်ႇလႆႈၶႃႈၼႃ ၶူးလူဝ်ႇသင်ႇသွၼ်မၼ်းၶႃႈဢေႃႈ! မၼ်းပဵၼ်လုၵ်ႈႁဵၼ်းသေယဝ်ႉ ဢမ်ႇၼပ်ႉယမ်ၶူးသွၼ်ၸိူင်ႉၼႆ ထုၵ်ႇလီႁဵတ်းႁႂ်ႈမၼ်းထုၵ်ႇမႅၼ်ႈဢမ်ႇၸႂ်ႈႁႃႉ”
ၵူၼ်းဢၼ်လႆႈၸႂ်ႁဵတ်းလွင်ႈဢမ်ႇၸွမ်းတြႃးတေႃႇပိူၼ်ႈၼၼ်ႉ တေလိူတ်ႇမႆႈႁႅင်းလိူဝ် မိူဝ်ႈၶဝ်ဢမ်ႇလႆႈႁပ်ႉလွင်ႈၸွမ်းတြႃး ၼၼ်ႉယဝ်ႉ။ မၼ်းတေဢမ်ႇယဝ်ႉတီႈၼႆႈၵူၺ်း ၶဝ်ဢမ်ႇၸႂ်ႈၵူၼ်းဢူၼ်ႈဢွၼ်ႇႁေၵႃႈႁိုဝ်လေႃႇ၊ ပေႃးပဵၼ်ၵူၼ်းဢူၼ်ႈဢွၼ်ႇ တေဢမ်ႇယူႇလႆႈၼႂ်းတူင်ႇဝူင်း ၵူၼ်းႁၼ်သုၼ်ႇတူဝ်ၸိူင်ႉၼၼ်လႆႈ၊ ၶဝ်ၵေႃႈ ၸႂ်ႉလွင်ႈဢူၼ်ႈဢွၼ်ႇ ပဵၼ်ၶိူင်ႈမိုဝ်းၶဝ် တႃႇယူႇလွတ်ႈလႆႈၼၼ်ႉယဝ်ႉ။
သမ်ႉဝႃႈလႆႈၵူမ်ႈၵွမ်းတေႃႇၼႃႈၵူၼ်းၸိူင်ႉၼၼ်ၵေႃႈ ဢမ်ႇၸႂ်ႈၵၢၼ်ဢွမ်ႈၼွမ်း၊ သမ်ႉဝႃႈႁူဝ်ၶႃႈၵူမ်ႈလူင်းလိၼ်ၵေႃႈ ၶႃႈတႄႉဝူၼ်ႉဝႃႈ ဢမ်ႇပိူင်ႇသင်ၵၼ်တင်း ငူပ်ႉၼႃႈၼွၼ်းၼၼ်ႉၼင်ႇၵဝ်ႇ၊ ယွၼ်ႉၸႂ်ၶႃႈ ဢမ်ႇလႆႈမီးလွင်ႈၼပ်ႉယမ်ၶဝ်လူး ပဵၼ်သင်လႄႈတေလႆႈပဵၼ်ၵၢၼ်ၵူမ်ႈၵွမ်းလႃႇ။ ၶႃႈၵေႃႈႁဵတ်းၵႂႃႇ တွၼ်ႈတႃႇဢဝ်တူဝ်လွတ်ႈၵူၺ်း၊ မိူဝ်ႈႁၼ်လႆႈလွင်ႈလႆႈတၢင်းမၼ်းမႃးၸိူင်ႉၼႆ ၶႃႈဝႃႈလွၵ်းလၢႆးၼႆႉၵေႃႈ ဢမ်ႇႁၢင်ႈႁၢႆႉၵႃႈႁိုဝ်ၼင်ႇၵဝ်ႇ။
ႁဵတ်းႁႂ်ႈၶႃႈႁၢၼ်ႉၸႂ်ယူႇၵူၺ်း ဢၼ်ဢမ်ႇလႆႈၸႂ်ႉတေႃးသဢၼ်ၶႃႈၵႆႉၸႂ်ႉတႃႇသေႇ ယွၼ်ႉၶေႃႈႁတ်ႉမၼ်ႈဢၼ်ဝႃႈ ဢၢၼ်းၶတ်းၸႂ်ႁဵၼ်းၼႆၼၼ်ႉ ၸွႆႈၶႃႈႁႂ်ႈမီးပၢႆးဝူၼ်ႉလီလီမႃးလႄႈ ငိူင်ႉဝႄႈလႆႈဢၼ်ၶႃႈဢမ်ႇထုၵ်ႇလီႁဵတ်းၼၼ်ႉမႃးယဝ်ႉ။
ၵူႈပွၵ်ႈ ပေႃးဝႃႈၶႃႈဢွၵ်ႇႁွင်ႈႁဵၼ်း ၽွင်းၶိုၼ်ႈႁဵၼ်းၼႆ ၶႃႈတေႁၢႆတင်းဝၼ်းယဝ်ႉ၊ ၵူၺ်းၵႃႈ မိူဝ်ႈဢၼ်ၵူၼ်းၼႂ်းႁွင်ႈႁဝ်း ႁၼ်ၶႃႈၶဝ်ႈႁွင်ႈမႃးၼႆၵေႃႈ ဢွၼ်ၵၼ်တူၺ်းၸွမ်းၶႃႈယူႇ။ ၶၢဝ်းၼၼ်ႉသမ်ႉ ပဵၼ်ၶိင်ႇသွၼ်လိၵ်ႈ ၶူးၵွင်ၶမ်းယဝ်ႉ မႅၼ်ႈၽွင်းဢၼ် မၼ်းယင်းတိုၵ်ႉထၢမ်လိၵ်ႈ လုၵ်ႈႁဵၼ်းၵမ်းၵေႃႉၵမ်းၵေႃႉယူႇလႄႈ ၸင်ႇယၵ်ႉတူၺ်းၶႃႈသေ ထၢမ်ၸူး
“ၶဝ်ႈမႃးႁဵတ်းသင်လႃႇ!”
မၼ်းလၢၵ်ႇလၢႆးၼႃႇႁႃႉ ၵူၼ်းၸိူင်ႉၼင်ႇၶႃႈၶႂ်ႈႁဵၼ်းၼႆ ပဵၼ်သင်လႄႈတေလႆႈထၢမ်ၶေႃႈထၢမ်ၸိူင်ႉၼႆမႃးလႃႇ။ ထၢင်ႇလဵၵ်ႉၵၼ်ၼႃႇပူၼ်ႉတီႈယဝ်ႉ။
“မႃးႁူင်းႁဵၼ်းၵေႃႈ တေလႆႈယူႇၼႂ်းႁွင်ႈႁဵၼ်းၵူၺ်းဢေႃႈ”
လၢတ်ႈဢဝ်ၶူးသမ်ႉပေႃးၶူဝ်ၵိူဝ်ႉဢွၵ်ႇမႃးယဝ်ႉ။
“ဢမ်ႇထၢင်ႇဝႃႈတေလႆႈငိၼ်းၶေႃႈၵႂၢမ်းၸိူင်ႉၼႆ..တီႈသႅင်ၶမ်း ပေႃးၼၼ်လႆႈယူႇႁႃႉ..လိၵ်ႈ”
“ဢေႃႈ! ႁႂ်ႈၶႃႈလၢတ်ႈမိူဝ်ႈလဵဝ်ၵေႃႈလႆႈယဝ်ႉ” ၶႃႈလၢတ်ႈၸူးမၼ်းၼင်ႇမၼ်ႈၸႂ်ယူႇ။
ၶူးၵေႃႈ ပၼ်တိုဝ်ႉတၢင်း ႁႂ်ႈၶႃႈလၢတ်ႈတေႃႇၼႃႈမၼ်းလႄႈ ပႃႈၼႃႈပိူၼ်ႈၼၼ်ႉယဝ်ႉ၊ ၶႃႈၵေႃႈၸွမ်းၼင်ႇဢၼ်တွင်းၼၼ်ႉ လၢတ်ႈၵႂႃႇတင်းသဵင်ႈတင်းမူတ်းယူႇ။ လၢတ်ႈသုတ်းယဝ်ႉၵေႃႈ ၶူးၸင်ႇႁႂ်ႈၵႂႃႇၼင်ႈတီႈၼင်ႈၶိုၼ်း၊ မိူဝ်ႈၶူးယင်းတိုၵ်ႉ ဢၢင်ႈဢၢၼ်ႇပပ်ႉ ပၼ်ႁဝ်းတႅမ်ႈၸွမ်းယူႇၼၼ်ႉ ၶႃႈၵေႃႈ ယဵၼ်ႉၸႂ်ဢမ်ႇလႆႈႁေ ထၢမ်ၵႂႃႇၶိုၼ်းယူႇ။
“ၶူး! ပဵၼ်သင်လႄႈ..ၶူးတေလႆႈဢၢၼ်ႇႁႂ်ႈႁဝ်းတႅမ်ႈၸွမ်းၸိူင်ႉၼႆႁေ ႁႂ်ႈႁဝ်းဢဝ်ဢလွတ်ႈမၼ်းၶႃႈ”
“သူၵေႃႈတေတွင်းၼၼ်ႉၼႃႇ ပေႃးဢၢၼ်ႇၵႂႃႇလၢႆလၢႆႁေ ဢမ်ႇတွင်းသမ်ႉတေသွၼ်ပၼ်သူပွင်ႇလွင်ႈသင်”
“ပဵၼ်သင်လႄႈႁဝ်းတေလႆႈတွင်းလႃႇ!”
“ပေႃးသူၵေႃႉယႂ်ႇမႃးသူတေႁူႉၵူၺ်း”
ပဵၼ်သင်လႄႈၵူၼ်းလူင်ၵမ်ႈၼမ်ၼႆႉ ၶဝ်ၵႆႉလၢတ်ႈၸိူင်ႉၼႆတႃႇသေႇယဝ်ႉ ဢမ်ႇၵေႃႉယႂ်ႇၵေႃႈ ႁူႉဢမ်ႇလႆႈႁႃႉ ပေႃးႁူႉယဝ်ႉမၼ်းတေပဵၼ်သင်မႃးလႃႇ။ ၵူၺ်းၵႃႈ မၼ်းၵေႃႈႁဵတ်းႁႂ်ႈၶႃႈၵိုတ်းလိုဝ်ႈ လွင်ႈၶႂ်ႈႁူႉၶႂ်ႈႁၼ်ၼၼ်ႉဢမ်ႇလႆႈ။
“ၶူးၶႃႈလူး ၸွင်ႇတွင်းလႆႈယူႇၶႃႈ”
ဢူဝ်ႉ! ၶႃႈႁဵတ်းပၢင်တိုၵ်းထႅင်ႈယဝ်ႉၸွင်ႇၸႂ်ႈ! လၢတ်ႈၵႂႃႇလူၺ်ႈဢမ်ႇလႆႈတင်ႈၸႂ် သူပ်းၶႃႈၼၼ်ႉ မိူၼ်ၼင်ႇမၢၵ်ႇတႅၵ်ႇ မိူဝ်ႈမၼ်းတႅၵ်ႇၵႂႃႇယဝ်ႉ ၵူႈလွင်ႈဢၼ်ယူႇႁိမ်းမၼ်းၼၼ်ႉၵေႃႈ ႁူႉတေလႅဝ်မူတ်းယူႇဢမ်ႇၸႂ်ႈႁိုဝ်။
“ၶူးတေဢၢၼ်ႇယဝ်ႉၼႃႈ ႁၢင်ႈႁႅၼ်းတႅမ်ႈလႄႈ”
ယင်းလီ ဢၼ်ၶူးဢမ်ႇလႆႈၸႂ်လမ် သင်ၼၼ်တႄႉ တေပဵၼ်ၽိုၼ်းပဵၼ်ၾႆးထႅင်ႈယဝ်ႉ တႃႇၵူၼ်းဢၼ်ၶတ်းၸႂ်ႁဵၼ်းၶဝ်၊ သင်ၶူးဢွၵ်ႇထႅင်ႈၵေႃႉၼိုင်ႈၵေႃႈ တေပဵၼ်ၵေႃႉမၢႆသၢမ်ယဝ်ႉ ဢၼ်ၶႃႈလိုပ်ႈၶူးဢွၵ်ႇႁွင်ႈ၊ ၵူၺ်းၵႃႈ ၶႃႈၵေႃႈၶႂ်ႈႁူႉၶေႃႈတွပ်ႇဢၼ်ၶႃႈထၢမ်ၼၼ်ႉမိူၼ်ၵၼ်ယူႇ။
လၢတ်ႈလႆႈဝႃႈ သွင်ဝၼ်းယဝ်ႉ ဢၼ်ၶႃႈၶိုၼ်ႈႁဵၼ်းၸွမ်းပိူၼ်ႈၵူႈၶိင်ႇ မၢင်ၶိင်ႇၵေႃႈ ဝူၼ်ႉၶႂ်ႈပၢႆႈတေႉတေႉၼၼ်ႉယဝ်ႉ၊ လိၵ်ႈၵေႃႈဢမ်ႇလႆႈႁေ ၶူးႁမ်ႉၵႆႉထၢမ်ထႅင်ႈ၊ မၢင်ပွၵ်ႈၵေႃႈၶႂ်ႈၼွၼ်းဝႃႈၶႂ်ႈၼွၼ်းယဝ်ႉ ပေႃးၼွၼ်းသမ်ႉတေႁဵၼ်းဢမ်ႇႁူႉႁူဝ်ႁူႉႁၢင်၊ ၵူၺ်းၵႃႈ မၢင်ၵမ်းၵေႃႈ ၶႃႈလၵ်ႉသွပ်ႉၵႂႃႇယူႇ။ ပေႃးပိူၼ်ႈသွၼ်ဢမ်ႇပွင်ႇၸႂ်ၼႆၵေႃႈ လႆႈၶိုၼ်းထၢမ်ၶိုၼ်းၼူၼ်းမူဝ်သေ မၼ်းၵေႃႈ ၶတ်းၸႂ်သပ်းလႅင်းပၼ် ႁႂ်ႈပေႃးပွင်ႇၸႂ်မႃးယဝ်ႉ ၶတ်းၸႂ်ႁဵၼ်းဢၼ်ဝႃႈၼၼ်ႉ ႁိူဝ်ႉတေႉတေႉယဝ်ႉ။
ပေႃးဝႃႈၶႃႈပွင်ႉၼႆၵေႃႈ ၼူၼ်းမူဝ်ၼၼ်ႉတႄႉ ၼႅတ်ႈလၢတ်ႈၵမ်းလဵဝ်ယဝ်ႉဝႃႈ
“မၼ်းဢမ်ႇယၢပ်ႇလေႃႇၼႃႈ ပေႃးသူပွင်ႇၸႂ်သေႁဵတ်းၵႂႃႇတိၵ်းတိၵ်းၵေႃႈ မၼ်းၵေႃႈတေငၢႆႈမႃးၵူၺ်း”
တွၼ်ႈတႃႇၵူၼ်းဢၼ်ၶႅၼ်ႇယဝ်ႉၼၼ်ႉ တေမီးလိၵ်ႈဢၼ်လႂ်ယၢပ်ႇတွၼ်ႈတႃႇၶဝ်ၽွင်ႈလႃႇ ႁူႉလၢတ်ႈၸိူင်ႉၼၼ်လႆႈယူႇၵူၺ်းလေႃႇ။
ၶႃႈၵုမ်ႇထၢမ်ၼူၼ်းမူဝ်ၵူၺ်း ပိူၼ်ႈလူင်းႁူင်းႁဵၼ်းၸဵမ်မိူဝ်ႈၵႆႈယဝ်ႉ ႁႃးယင်းဢမ်ႇတၼ်းႁူႉလူးၵွၼ်ႇ၊ ၼႂ်းႁွင်ႈၼၼ်ႉၵေႃႈ ၼင်ႇဝႃႈၵိုတ်းႁႃးၵူၺ်း၊ ၶဝ်ႈၵေႃႈ ဢမ်ႇၶဝ်ႈထႅဝ်ၸွမ်းပိူၼ်ႈ တူၺ်းဢွမ်မူင်းၼႂ်းႁွင်ႈ သမ်ႉပေႃးမီးၸမ် 5 မူင်းယဝ်ႉၼႃႇ။
“ၼႃႇရီႇႁွင်ႈႁဝ်းတၢႆယဝ်ႉႁႃႉၼႆႉ..” ၶႃႈထၢမ်ၼူၼ်းမူဝ်။
ၼူၼ်းမူဝ်တူၺ်းၼႃႇရီႇတီႈၶေႃႈမိုဝ်းမၼ်းၼၼ်ႉသေ “ဢမ်ႇၼႃ ၸမ်ႁႃႈမူင်းယဝ်ႉ!” မိူၼ်မၼ်းတေတူၵ်းၸႂ်လူင်မႃးလႄႈ “ႁိူဝ်ႇဢိူဝ်ႈ! ႁဝ်းဢမ်ႇတၼ်းလႆႈၶဝ်ႈထႅဝ်ၸွမ်းပိူၼ်ႈယဝ်ႉ..ဢမ်ႇၸႂ်ႈႁိုဝ်လႃႇၼႆႉ”
ၶႃႈတႄႉၵေႃႈ ဢမ်ႇပေႃးၵႃႈႁိုဝ် ယွၼ်ႉပဵၼ်ၵူၼ်းဢမ်ႇပေႃးၸွမ်းပိူင်ယူႇယဝ်ႉ၊
“ၸႂ်ႈဢိူဝ်ႈ..”
“ပဵၼ်သင်လႄႈသူတေလႆႈမႃးထၢမ်ႁဝ်း မိူဝ်ႈပိူၼ်ႈၸမ်လူင်းႁူင်းႁဵၼ်းၸိူင်ႉၼႆလႃႇ”
ထူၺ်ႈၸႂ်လူင်ၸူးၶႃႈ ၼင်ႇဢမ်ႇႁၢၼ်ႉၸႂ်သေၵႃႈႁိုဝ်ၼၼ်ႉယဝ်ႉ၊ ပွင်ႇၸႂ်ယူႇၵူၺ်း ၵူၼ်းႁဵတ်းၸွမ်းပိူင်ႁူင်းႁဵၼ်းၶဝ် မိူဝ်ႈလႂ်ႁဵတ်းၽိတ်းပိူင်မႃးၵေႃႈ ၸႂ်တိုၼ်းတေဢမ်ႇလီၵမ်းလဵဝ်ယဝ်ႉ။
“ဝၼ်းလဵဝ်ၵူၺ်း ဢမ်ႇၶဝ်ႈၵေႃႈဢမ်ႇပဵၼ်ႁင်လေႃႇ တိူင်းမၼ်းႁေလႃႈ”
“ပဵၼ်သင်လႄႈတေလႆႈတင်ႈၸႂ်ထိုင်တၢၼ်ႇၼၼ်ႉလႃႇ သမ်ႉပေႃးဢဝ်ႁဝ်းလိုမ်းတူၺ်းၶိင်ႇတူၺ်းၶၢဝ်းမၼ်းၸွမ်းယဝ်ႉ”
“ႁဝ်းယွမ်းၼွမ်းယူႇၼႃႈ ႁဵတ်းႁႂ်ႈသူဢမ်ႇလႆႈၶဝ်ႈထႅဝ်ၸွမ်းပိူၼ်ႈၸိူင်ႉၼၼ်”
“တိူင်းမၼ်းႁေလႄႈ ႁၼ်သူတင်ႈၸႂ်ႁဵၼ်းၵေႃႈလီမိူၼ်ၵၼ် ႁဝ်းယိၼ်းၸူမ်းတေႉယဝ်ႉ ဢၼ်သူမႃးထၢမ်ႁဝ်းၸိူင်ႉၼႆ မၼ်းယင်းၸွႆႈႁဵတ်းႁႂ်ႈႁဝ်း ၽိူမ်ႉၼမ်ႉၵတ်ႉမႃးထႅင်ႈလူးၵွၼ်ႇ”
“ၸိူင်ႉၼၼ်ႁႃႉ! ပေႃးၼၼ်ၵေႃႈ သူၸွႆႈသွၼ်ႁဝ်းၼမ်ၼမ်လႄႈၼႃႈ”
“ၶႂ်ႈဝႃႈ သူယွမ်းႁပ်ႉႁဝ်းပဵၼ်ဢူၺ်းၵေႃႉယဝ်ႉၸွင်ႇၸႂ်ႈ လဵၼ်ႈၵေႃႉၵၼ်၊ ႁဵတ်းၵၢၼ်ႁူမ်ႈၵၼ်၊ ၽွၼ်ႉလိၵ်ႈႁူမ်ႈၵၼ် ႁဝ်းႁူႉယူႇၼႃႈ ဝႃႈသူယွမ်းႁပ်ႉႁဝ်းယဝ်ႉ”
မိူဝ်ႈလၢတ်ႈထိုင်လွင်ႈဝႃႈဢူၺ်းၵေႃႉၼႆၵေႃႈ ႁဵတ်းႁႂ်ႈၶႃႈသမ်ႉ ပေႃးလိုမ်းတူဝ်ၵႂႃႇယဝ်ႉဝႃႈ ၶႃႈၼၼ်ႉ ဢမ်ႇထုၵ်ႇလီမီး ဢူၺ်းၵေႃႉထႅင်ႈယဝ်ႉ။
“ဢမ်ႇၼႃ..”
ၶႃႈၵေႃႈဢမ်ႇႁူႉဝႃႈတေလၢတ်ႈသင်လႆႈထႅင်ႈယဝ်ႉ ဢဝ်တင်းထူင်ၶႃႈသေ ဢွၵ်ႇမႃးပႅတ်ႈမၼ်းလူၺ်ႈဢမ်ႇသူင်ႇဢမ်ႇသင်ႇသေဢိတ်း။ မၼ်းၵေႃႈ လမ်းၸွမ်းၶႃႈသေ
“ပႂ်ႉႁဝ်းၽွင်ႈလႄႈ.. ႁဝ်းဢမ်ႇယုမ်ႇလေႃႇၼႃႈ ဝႃႈသူဢမ်ႇလႆႈဝူၼ်ႉၼိူဝ်ႁဝ်းပဵၼ်ဢူၺ်းၵေႃႉ၊ သမ်ႉဝႃႈသူဢမ်ႇဝူၼ်ႉၵေႃႈ သူပဵၼ်ဢူၺ်းၵေႃႉၵၼ်တင်းႁဝ်းယဝ်ႉ ဢမ်ႇဝႃႈတေလၢတ်ႈၸိူင်ႉႁိုဝ် ႁဝ်းတိုၼ်းတေယုမ်ႇၸိူင်ႉၼၼ်”
ယိုင်ႈလၢတ်ႈယိုင်ႈႁဵတ်းႁႂ်ႈၶႃႈဢမ်ႇႁတ်းႁူပ်ႉၼႃႈမၼ်းယဝ်ႉ။ မၼ်းၵေႃႈ မီးလွင်ႈတၢင်း ဢၼ်ႁဵတ်းႁႂ်ႈၶႃႈလႆႈႁဵတ်းၸိူင်ႉၼႆ၊ ဢမ်ႇၸႂ်ႈဝႃႈၶႃႈ ဢမ်ႇၶႂ်ႈမီးဢူၺ်းၵေႃႉ ၵူၺ်းၵႃႈ ၶႃႈဢမ်ႇထုၵ်ႇလီမီးဢူၺ်းၵေႃႉထႅင်ႈယဝ်ႉ မိူဝ်ႈမီးမႃးၼၼ်ႉမၼ်းႁဵတ်းႁႂ်ႈၶႃႈၵူဝ်ဢေႃႈ။
ယၢမ်းၵၢင်ၼႂ်ၾႃႉၸိုၼ်ႈပၢင်ႇမိူင်းၵေႃႈသႂ် ၶႃႈၵေႃႈပၼ်ႇလူတ်ႉထိပ်ႇၵႂႃႇႁူင်းႁဵၼ်းလွႆးလွႆး မိူဝ်ႈၶဝ်ႈၵႂႃႇၼႂ်းဝၢင်းႁူင်းႁဵၼ်းၼၼ်ႉ ၽႂ်ၽႂ်ၵေႃႈ ဢွၼ်ယၵ်ႉတူၺ်းၶႃႈ လူၺ်ႈသၢႆတႃဢၼ်ပႅၵ်ႇပိူင်ႈတေႉၼၼ်ႉယဝ်ႉ ဢမ်ႇႁူႉဝႃႈပဵၼ်သင် ၶႃႈၶတ်းၸႂ်ႁဵၼ်းမၼ်းပႅၵ်ႇပိူင်ႈယူႇႁႃႉ မၼ်းၵေႃႈဢမ်ႇၸႂ်ႈဝၼ်းဢွၼ်တၢင်းသုတ်းယဝ်ႉလူး။
မိူဝ်ႈဢၼ်ၶႃႈၶဝ်ႈၵႂႃႇၼႂ်းႁွင်ႈၼၼ်ႉၵေႃႈ ႁၼ်ၸုမ်းၽူႈယိင်းၶဝ်ၸိူဝ်းၼၼ်ႉ ဢွၼ်ၵၼ်ယၵ်ႉတူၺ်းၶႃႈႁေ မူႇၵုမ်ၵၼ်ယဝ်ႉဢုပ်ႇယူႇ ၶႃႈဢၼ်ဢမ်ႇႁူႉလွင်ႈသင်ၼၼ်ႉၵေႃႈ ၵႂႃႇၸူးၶဝ်ယဝ်ႉ။
“ဢုပ်ႇၵၼ်လွင်ႈသင်လႃႇ!”
“ႁူႉယူႇတီႈၸႂ် ပဵၼ်သင်လႄႈတေလႆႈမႃးထၢမ်လႃႇ!”
“ႁူႉႁင် ပေႃးထၢၼ်ႈဝႃႈႁူႉႁမ်ႉတေမႃးထၢမ်ႁဵတ်းသင်လႃႇ”
“သူလႄႈတင်းၶူးၽိဝ်ၾႃႉ ပဵၼ်ၸူႉၵၼ်ၼႆဢမ်ႇၸႂ်ႈႁႃႉ ၼႃႈလိူမ်ႈဢမ်ႇၵႃးၼႃႈၼႃပႃးထႅင်ႈၵွၼ်ႇ” သႅင်လိူၼ် ဢၼ်ဢမ်ႇႁၢၼ်ႉၸႂ်ၵႃႈႁိုဝ်ၼၼ်ႉၵေႃႈ လၢတ်ႈဢွၵ်ႇမႃးယူႇ။
တွၼ်ႈသိပ်းႁူၵ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းၸဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
