တွၼ်ႈသိပ်းသီႇ
ၸိုဝ်ႈသဵင်ၼႃႈတႃ ၽႂ်ၽႂ်ၵေႃႈႁူႉၶႂ်ႈႁႂ်ႈမၼ်းလီလႄႈၶႂ်ႈႁႂ်ႈၶႅမ်ႉယူႇတႃႇသေႇ၊ ဢမ်ႇဝႃႈမၼ်းတေႁၢင်ႈႁၢႆႉႁေၵႃႈႁိုဝ်ၵေႃႈ ပေႃးဝႃႈမၼ်းမွတ်ႇႁၢႆၵႂႃႇလႆႈၵႃႈႁိုဝ် လီၵႃႈၼၼ်ႉယဝ်ႉ။ ဢမ်ႇဝႃႈ ပဵၼ်တီႈၵူၼ်းႁိုဝ် တီႈလႂ်ၵေႃႈ ႁူႉတိုၼ်းမီးလွင်ႈလီလႄႈ လွင်ႈဢမ်ႇလီပႃးမႃးၸွမ်းၵၼ်၊ ပၼ်ႁႂ်ႈပဵၼ်ပၼ်ႁႃ တွၼ်ႈတႃႇၵူၼ်းႁဝ်းပေႃးတေၵႄႈၶႆၵႂႃႇလႆႈ ၼၼ်ႉယဝ်ႉ။
ၵမ်ႈၼမ် ၵူၼ်းမီးငိုၼ်းၶဝ် တေၵႄႈၶႆပၼ်ႁႃလႆႈဝႆး လိူဝ်သေၵူၼ်းဢမ်ႇမီးသင်၊ ယွၼ်ႉၶဝ်ဝူၼ်ႉဝႃႈ မီးငိုၼ်းၵူၺ်းၵေႃႈ သိုဝ်ႉလႆႈၵူႈလွင်ႈ ၼႆယူႇ။ ၵူၼ်းဢမ်ႇမီးသင်ၼၼ်ႉၵေႃႈ တေတၢင်ႇတၢင်းၽိတ်းတူဝ်ၸဝ်ႈၵဝ်ႇ ယွၼ်ႉဢမ်ႇမီးသင်လႄႈ ႁဵတ်းသင်ၵေႃႈဢမ်ႇလႆႈ ထၢင်ႇလဵၵ်ႉတူဝ်ၸဝ်ႈၵဝ်ႇ ထိုင်တီႈလွင်ႈဢၼ်လၢတ်ႈယူႇသေႇသေႇၼၼ်ႉ ပေႃးပဵၼ်တေႉၵႂႃႇယဝ်ႉ။
သမ်ႉဝႃႈဢမ်ႇမီးသင်ၵေႃႈယဝ်ႉ ပေႃးဝႃႈမီးပၢႆးဝူၼ်ႉၸႂ်ႁတ်းတႃႉ တေႃႇပၼ်ႁႃဢၼ်ၶႂၢင်ယူႇပႃႈၼႃႈၼၼ်ႉၵေႃႈ ႁူႉၵႃႈတေသိုပ်ႇယၢင်ႈၶၢမ်ႈပူၼ်ႉမၼ်းၵႂႃႇလႆႈဢမ်ႇၸႂ်ႈႁိုဝ်၊ မီးၵူၼ်းယၢမ်ႈလၢတ်ႈဝႃႈ ဢမ်ႇဝႃႈႁဝ်းတေဝူၼ်ႉၸိူင်ႉႁိုဝ် ယုမ်ႇယမ်ၸိူင်ႉႁိုဝ်ၵေႃႈ ၸဝ်ႈၵဝ်ႇၼၼ်ႉ ပဵၼ်ၵူၼ်းထုၵ်ႇမႅၼ်ႈယူႇတႃႇသေႇယဝ်ႉ။
ႁူင်းႁဵၼ်းလင်ဢၼ်ၶႃႈယူႇၼႆႉ လႆႈဝႃႈပဵၼ်ႁူင်းႁဵၼ်းဢၼ်မီးၸိုဝ်ႈသဵင်လႄႈ ၸၼ်ႉထၢၼ်ႈဢၼ်လီလင်ၼိုင်ႈယဝ်ႉ။ ၵူၺ်းၵႃႈ ဢမ်ႇမီးၽႂ်ႁူႉဝႃႈ ၼႂ်းႁူင်းႁဵၼ်းလင်ၼႆႉ မၼ်းပဵၼ်ၸိူင်ႉႁိုဝ်၊ မၼ်းဢမ်ႇလႆႈလီ မိူၼ်ၼင်ႇဢၼ်ပိူၼ်ႈႁၼ်ၵၼ် လႄႈ ႁူႉၵၼ်ၼၼ်ႉသေဢိတ်း၊ ၵၢၼ်ႁဵၼ်းၵၢၼ်သွၼ်ၵေႃႈ ဢမ်ႇပၢႆႈပိူင်ႈသင်ၵၼ်တင်း ႁူင်းႁဵၼ်းပိူၼ်ႈၵူၺ်း၊ ဢၼ်ၼႃႇႁေၼၼ်ႉသမ်ႉ မေႃသွၼ် ၶူးလူင် ပဵၼ်ၵူၼ်းဢၼ် ႁၼ်ထိုင်ငိုၼ်းၵမ်ႈၼမ်ၼၼ်ႉယဝ်ႉ၊ ဢမ်ႇမီးလွင်ႈသိုဝ်ႈယူဝ်း၊ ႁၼ်သုၼ်ႇတူဝ် ဢမ်ႇႁၼ်သူၼ်ၸႂ်လုၵ်ႈႁဵၼ်းႁေၵႃႈႁိုဝ်၊ ၵူၺ်းသူၼ်ၸႂ်ဢူႈမႄႈလုၵ်ႈႁဵၼ်း ဢၼ်လူဝ်ႇပၼ်ငိုၼ်းတႃႇၶဝ်ၼၼ်ႉၵူၺ်း။
ၶႃႈၵေႃႈ ပဵၼ်လုၵ်ႈႁဵၼ်း ဢၼ်မီးၽူႈၶဵၼ်ပဵၼ်ၶူးၸိူဝ်းၼၼ်ႉဢမ်ႇၵႃး ပႃးတင်းလုၵ်ႈႁဵၼ်း ဢၼ်မီးဢႃႇၼႃႇၸိူဝ်းၼႆႉယူႇ။ တႃႇၶႃႈတေယူႇလွတ်ႈၵႂႃႇလႆႈၼႂ်းႁူင်းႁဵၼ်းသေ ၶတ်းၸႂ်ႁဵၼ်းလိၵ်ႈၼႆၼၼ်ႉ တေယၢပ်ႇတၢၼ်ႇႁိုဝ်ၼႆတႄႉ ဢမ်ႇၶႆႈဝူၼ်ႉယဝ်ႉ။ ဝၢႆးသေၶႃႈလၢတ်ႈၶူးၸၢမ်ႁွမ်ၸိူင်ႉၼၼ်ၵေႃႈ ဢဝ်ၶူးသမ်ႉပေႃးႁွင်ႉႁႆႈဢွၵ်ႇႁွင်ႈၵႂႃႇယူႇ။ ဢမ်ႇႁိုင်ဢမ်ႇၼၢၼ်း ၼႃႈတီႈပုၼ်ႈၽွၼ်းလုၵ်ႈႁဵၼ်း ဢၼ်တေလႆႈၺႃးတၢမ်ႇၵေႃႈ တေမီးၵူၼ်းမႃးႁွင်ႉၵႂႃႇထၢမ် ယူႇယဝ်ႉ။
ထိုင်မႃးၶိင်ႇဢိင်းၵလဵတ်ႈၼႆၵေႃႈ မီးၶူးပိုၼ်မႃးသွၼ်ယူႇ ၶႃႈၵေႃႈၼင်ႈႁဵၼ်းၸွမ်းပိူၼ်ႈၵႂႃႇလီလီယဝ်ႉ။ ဝၼ်းမိူဝ်ႈၼႆႉ ၶူးပိုၼ် လႆႈႁၼ်ၶႃႈမႃးၶဝ်ႈႁဵၼ်းၸွမ်းၼႆၵေႃႈ ယုမ်ႉယုမ်ႉယၢႆႈယၢႆႈတူင်ႉတၵ်ႉၶႃႈၵႂႃႇလီလီႁေ သွၼ်ႁႂ်ႈဢၢၼ်ႇၸွမ်းယဝ်ႉၵေႃႈ ႁဝ်းၵေႃႈဢၢၼ်ႇၵႂႃႇၸွမ်း ဢၼ်မၼ်းသွၼ်ၼၼ်ႉယဝ်ႉ ဢမ်ႇႁိုင်ဢမ်ႇၼၢၼ်းၵေႃႈ ၶိင်ႇမၼ်းသုတ်းၵႂႃႇယဝ်ႉ ဢွၵ်ႇႁွင်ႈၵႂႃႇသေ သင်ႇႁႂ်ႈဢဝ်ဢလွတ်ႈမၼ်းမႃးႁႂ်ႈလႆႈ ဢၼ်မၼ်းသွၼ်ဝၼ်းမိူဝ်ႈၼႆႉၼၼ်ႉ ၼႆယဝ်ႉ။ ႁႂ်ႈဢဝ်ဢလွတ်ႈမၼ်းၼႆ မိူဝ်ႈငိၼ်းၸိူင်ႉၼႆၵေႃႈ မိူၼ်ပဵၼ်ပၼ်ႁႃဢၼ်ၼၵ်းၼႃ ယႂ်ႇလူင်တႄႉတႄႉၼၼ်ႉယဝ်ႉ။ မိူဝ်ႈၶူးသွၼ်ၼၼ်ႉ ၶႃႈၵေႃႈဢၢၼ်ႇၸွမ်းတူၺ်းၸွမ်းယူႇၵူၺ်း ၵူၺ်းၵႃႈ ၶႃႈၵေႃႈသမ်ႉဢမ်ႇတွင်း ၽႂ်တေႁဵတ်းႁိုဝ်တွင်းလႆႈ သွၼ်ၼမ်ဝႃႈၼမ် မီးပဵၼ်လၢႆတူဝ်ၵမ်းလဵဝ်။
ဢမ်ႇႁိုင်ဢမ်ႇၼၢၼ်း လိုဝ်ႈၵႅပ်ႉၼိုင်ႈၵေႃႈ ထိုင်ၶိင်ႇပၢႆးၼပ်ႉယူႇ မိူဝ်ႈၼႆႉၵေႃႈ ၶူးပိူင်းၾႃႉၵေႃႉၶဝ်ႈယဝ်ႉ၊ ပဵၼ်ၶူးဢၼ်ႁၼ်ၶႃႈယူႇၵူႈၶိင်ႇယဝ်ႉ ဢမ်ႇပႅၵ်ႇပိူင်ႈသင် ဢၼ်ၶႃႈတေမီးၼႂ်းႁွင်ႈ၊ ၵူၺ်းၵႃႈ မိူၼ်တေလၢၵ်ႇလၢႆးယူႇ ယွၼ်ႉပိူဝ်ႈ ဝၼ်းမိူဝ်ႈၼႆႉ ၶႃႈၵေႃႈမၢႆၸွမ်း တွၵ်ႈၸွမ်း လႄႈ ထၢမ်ၸွမ်းၼၼ်ႉယဝ်ႉ။ ၶိင်ႇပၢႆးၼပ်ႉၼႆႉ ၶူးတေသွၼ်ၼႄယဝ်ႉ ပၼ်ၶေႃႈထၢမ်ႁႂ်ႈႁဝ်းႁဵတ်းယူႇ ပေႃးႁဵတ်းဢမ်ႇပွင်ႇၸႂ်ၵေႃႈ ၸင်ႇၵွႆႈထၢမ်ၶူးယဝ်ႉ ပဵၼ်ၶိင်ႇဢၼ်တဵတ်ႇယဵၼ်လႄႈ လႆႈဝူၼ်ႉၼမ်လိူဝ်သေပိူၼ်ႈ။ လိူဝ်သေႁႂ်ႈၼပ်ႉသွၼ်ႇၼႂ်းႁွင်ႈယဝ်ႉ သမ်ႉပၢႆႁႂ်ႈဢဝ်မိူဝ်းၼပ်ႉသွၼ်ႇ ပႃးတီႈႁိူၼ်းထႅင်ႈႁေ၊ ဢမ်ႇဝႃႈမၼ်းၼမ်ၼႃႇပူၼ်ႉတီႈယဝ်ႉႁႃႉ ဢိင်းၵလဵတ်ႈၵေႃႈဝႃႈဢၢၼ်ႇႁႂ်ႈလႆႈ၊ ပၢႆးၼပ်ႉၵေႃႈသမ်ႉဝႃႈႁဵတ်းႁႂ်ႈယဝ်ႉ၊ တေမီးၶိင်ႇသင်ထႅင်ႈဢၼ်ပႆႇလႆႈႁဵၼ်း တေပၼ်ႁင်ထႅင်ႈ ၶႃႈသမ်ႉပေႃးႁိူဝ်ႉဝႆႉထႃႈယူႇယဝ်ႉ။
ဝၢႆးသေၼၼ်ႉသမ်ႉ ၸင်ႇမီးၶိင်ႇပၢႆးသၢႆႈ မီးၶူးၵွင်ၶမ်း ၵေႃႉပဵၼ်ၶူးသွၼ်ယူႇ၊ ၶူးၼႆႉသမ်ႉ ၶဝ်ႈႁွင်ႈမႃးယဝ်ႉ ႁဝ်းၵေႃႈလူဝ်ႇပိုတ်ႇပပ်ႉသေ ယိပ်းၵမ်ဝႆႉလႄႈ မၼ်းၵေႃႈတေဢဝ်ပပ်ႉမၼ်းၼၼ်ႉ မႃးဢၢၼ်ႇသေႁႂ်ႈႁဝ်းတႅမ်ႈၸွမ်းယဝ်ႉ ပေႃးဢၢၼ်ႇယဝ်ႉၵေႃႈ ဢၼ်မၼ်းသွၼ်မိူဝ်ႈၼႆႉၼၼ်ႉ ႁႂ်ႈႁဝ်းတွင်းတင်းမူတ်း ၼႆယူႇ။
ၶႃႈဝႃႈပဵၼ်လုၵ်ႈႁဵၼ်းဢၼ်ၶတ်းၸႂ်ၼႆႉ လႅပ်ႈတေတၢႆပႅတ်ႈဢွၼ်တၢင်းယဝ်ႉ။ ႁူၼ်ၵႂၢမ်းၶိုၼ်းဢမ်ႇလီႁိုဝ်။ မိူဝ်ႈၶႃႈတေၶတ်းၸႂ်ႁဵၼ်း ၵၢၼ်ႁဵၼ်းမၼ်းၵေႃႈဢမ်ႇၸႂ်ႈဝႃႈ ႁဵၼ်းၵေႃႉလဵဝ်ယဝ်ႉတေလႆႈလီလူး၊ ၵၢၼ်လႅၵ်ႈလၢႆႈပိၼ်ႇပၢႆႇၵၼ်ၵေႃႈ မီးၽွၼ်းလီမိူၼ်ၵၼ်ယဝ်ႉ၊ ယွၼ်ႉၼၼ် ထိုင်ၶိင်ႇၶၢဝ်းၵိၼ်ၶဝ်ႈဝၼ်းယဝ်ႉ ၶႃႈၵေႃႈ ဢဝ်တင်းၵွၵ်းၶဝ်ႈၼၼ်ႉသေ ၵႂႃႇၸူးမူႇၶဝ်ႈၼူၼ်းမူဝ်ၶဝ် ဢၼ်မီးတင်း သႅင်ႁၵ်ႉ၊ ၶမ်းၽွင်၊ သႂ်လႅင်း ၼၼ်ႉယူႇယဝ်ႉ။ ၶဝ်ၵေႃႈ မွင်းႁၼ်ၶႃႈမႃးၸူးၶဝ်ၵူၺ်း သမ်ႉပေႃးသုတ်ႉတီႈၼင်ႈပၼ်ၶႃႈသေ
“မႃးၼင်ႈၵိၼ်ၸွမ်းၵၼ်လႄႈ”
ၶႃႈၵေႃႈၼင်ႈၵႂႃႇၸွမ်းၶဝ်ယဝ်ႉ မိူၼ်ဝႃႈ ၶဝ်ၼၼ်ႉၵေႃႈ သႂ်ႇၸႂ်ၶႃႈယူႇမိူၼ်ၵၼ်။ တၵ်းၽၵ်းဢၼ်ၶဝ်ပႃးမႃးၼၼ်ႉ ႁႂ်ႈၶႃႈၵိၼ်တူၺ်းယဝ်ႉ။ မိူဝ်ႈၶႃႈၵိၼ်ၵႂႃႇၼၼ်ႉ ၵေႃႉပဵၼ်သႂ်လႅင်း ၼၼ်ႉၵေႃႈ တူၺ်းၸွမ်းၶႃႈသေယဝ်ႉ
“ပဵၼ်ႁိုဝ်လႃႇ မိူၼ်ႁိုဝ် ၸွင်ႇမၼ်းဝၢၼ်” ယၵ်ႉတူၺ်းၶႃႈၼင်ႇၶႂ်ႈႁူႉတေႉႁူႉဝႃႈယူႇ။
ၶႃႈဢၼ်လႆႈၵိၼ်တူၺ်းၵႂႃႇၼၼ်ႉၵေႃႈ “ဝၢၼ်တေႉဢိူဝ်ႈ မႄႈသူမေႃႁဵတ်းၽၵ်းတေႉယဝ်ႉ”
“သႂ်လႅင်းၼၼ်ႉ ၶဝ်ႁဵတ်းၽၵ်းဝၢၼ်တေႉဢိူဝ်ႈ ဢမ်ႇၸႂ်ႈမႄႈၶဝ်ႁဵတ်းလေႃႇ” ၶမ်းၽွင်လၢတ်ႈ။
“တေႉႁႃႉ သူႁဵတ်းတေႉႁႃႉၼႆႉ ဢမ်ႇၶႂ်ႈယုမ်ႇသေဢိတ်း”
“ပဵၼ်သင်လႃႇ တူၺ်းမိူၼ်ဝႃႈမၼ်းပႅၵ်ႇပိူင်ႈတေႉၼၼ်ႉယဝ်ႉ” ၼူၼ်းမူဝ်လၢတ်ႈ။
“ပႅၵ်ႇယူႇယဝ်ႉလေႃႇ ႁဝ်းဢမ်ႇတွၼ်ႉယၢမ်ႈႁဵတ်းၶဝ်ႈၽၵ်းသေပွၵ်ႈ ဢမ်ႇတွၼ်ႉႁုင်မိုဝ်ႉ၊ ႁဵတ်းၽၵ်းလူးၵွၼ်ႇ”
“ပေႃးၼၼ်ၵေႃႈတေပႅၵ်ႇပိူင်ႈတႃႇမၼ်းယူႇၵူၺ်း” သႂ်လႅင်းလၢတ်ႈ။
ၶဝ်ၵေႃႈယၵ်ႉတူၺ်းၼႃႈၵၼ်ႁေၶူဝ်ယူႇ မိူၼ်ဝႃႈၶႃႈတေပဵၼ်ၵူၼ်းဢၼ်လၢၵ်ႇလၢႆး တွၼ်ႈတႃႇၶဝ်ၼၼ်ႉယဝ်ႉ။
“သူႁဵတ်းႁင်းၵူၺ်းၵၼ်ၵူႈၵေႃႉႁႃႉၼႆႉ”
ၶဝ်ၵေႃႈငွၵ်းႁူဝ်ၼႄၶႃႈ ၼင်ႇဝႃႈ ၸႂ်ႈယဝ်ႉ ၼႆယူႇ။ ၼႂ်းၶဝ်ၼၼ်ႉ မိူၼ်ဝႃႈမီးၶႃႈၵေႃႉလဵဝ်ၵူၺ်းဢၼ်ဢမ်ႇမေႃႁဵတ်းသင် ။
မိူဝ်ႈၼႆႉၵေႃႈ ၶွပ်ႈၶိုၼ်းဝၼ်းဢၼ်ထူၺ်ႈယိူဝ်ႈၼိုင်ႈဝူင်ႈၼၼ်ႉဢဝ်လီလီယဝ်ႉ ယွၼ်ႉဢမ်ႇလႆႈႁဵတ်းမႃးလၢႆဝၼ်းလႄႈ ၶႃႈသမ်ႉပေႃးလိုမ်းယဝ်ႉ ပေႃးဢၢႆႈဝိဢမ်ႇမႃးတၵ်ႉၶႃႈတႄႉ ၶႃႈဢၢၼ်းမိူဝ်းႁိူၼ်းယဝ်ႉလူးၵွၼ်ႇ။
ပိူၼ်ႈလူင်းႁူင်းႁဵၼ်းသေ ဢွၼ်ၵၼ်ပွၵ်ႈမိူဝ်း ႁင်းၽႂ်ႁင်းမၼ်းယဝ်ႉ ႁႃးဢၢႆႈဝိတႄႉ ပႃးတင်းသဵမ်လႄႈထူင်ႁေ ၵႂႃႇတၢင်းၶၢင်ႈႁူင်းႁဵၼ်းၼၼ်ႉယဝ်ႉ ဢမ်ႇလႆႈမႃးႁၼ်ႁိုင်ဝႆႉလႄႈ ဢၼ်တိုၵ်ႉႁႃထူၺ်ႈယဝ်ႉမိူဝ်ႈဝူင်ႈပူၼ်ႉၵေႃႈ သမ်ႉပေႃးဢွၵ်ႇယၢဝ်းမႃးၶိုၼ်းယူႇ။
“တၢႆႁေလႃႈ! တေယဝ်ႉလႆႈယူႇႁႃႉမိူဝ်ႈၼႆႉ!”
ၶႃႈသမ်ႉပေႃးၶႂ်ႈသဵင်ႈၸႂ်လူင်ၵႂႃႇမူတ်း ၽွင်းၼၼ်ႉၵေႃႈ မိူၼ်ဝႃႈလုၵ်ႈႁဵၼ်းၶဝ် သမ်ႉပေႃးတေမိူဝ်းၵၼ်မူတ်းယဝ်ႉ။ ၵူၺ်းၵႃႈ လိူၵ်ႈလိူၵ်ႈသမ်ႉမုင်ႈႁၼ် ဢၢႆႈၸၢႆးႁဝ်းၶဝ် ယင်းတိုၵ်ႉတေဢွၵ်ႇႁူင်းႁဵၼ်းမိူဝ်းၼၼ်ႉ ၶႃႈၵေႃႈ ၼႅတ်ႈလႅၼ်ႈၵႂႃႇၸူးၶဝ်သေယဝ်ႉ။
“ၸိုင်ဝႃႈလူဝ်ႇထူၺ်ႈယိူဝ်ႈဢမ်ႇၸႂ်ႈႁႃႉ! ပဵၼ်သင်လႄႈပႆႇၵႂႃႇလႃႇ ၵမ်ႉတေၼၢၼ်းလႆႈမိူဝ်းယဝ်ႉ” ၼုမ်ႇႁိူင်း ဢၢႆႈၸၢႆးႁဝ်းလၢတ်ႈ။
ၶႃႈၵေႃႈ ၵႂႃႇၸုၵ်းႁိမ်းသႅင်ၶိူဝ်းသေယဝ်ႉ “ဝၼ်းၼၼ်ႉ ပီႈၵေႃႈႁူမ်ႈႁူႉႁူမ်ႈႁၼ်ပႃး ပီႈၵေႃႈၽိတ်းမိူၼ်ၵၼ်ယဝ်ႉ”
“သႅင်ၶိူဝ်းၵႂႃႇႁၢမ်ႈ မၼ်းသမ်ႉၽိတ်းတီႈလႂ်” ၸွမ်ၶိူဝ်းလၢတ်ႈ။
“ၶႂ်ႈဝႃႈပီႈၵေႃႈႁၼ်ၸွမ်းယူႇလူး ပီႈၵေႃႈၽိတ်းမိူၼ်ၵၼ်ယဝ်ႉ”
“ႁဝ်းၽိတ်း! ယွၼ်ႉသင်လႄႈတေၽိတ်းလႃႇ”
“ယဝ်ႉၶႃႈသမ်ႉၽိတ်းတီႈလႂ်!”
ဢဝ်ၶဝ်သမ်ႉပေႃးယဵၼ်လူင်ၵႂႃႇမူတ်းယူႇ၊ တေဝႃႈႁိုဝ်ၵေႃႈ ၶႃႈၵေႃႈဢမ်ႇလႆႈၽိတ်းသင်လူး၊ ၵူၺ်းထုၵ်ႇၼႄးဝႃႈၽိတ်း မၼ်းသၢင်ႇထုၵ်ႇတီႈလႂ်၊ လိူဝ်သေၼၼ်ႉ ဢၼ်ပဵၼ်ပီႈဢၢႆႈၶႃႈၼၼ်ႉၵေႃႈ ဢမ်ႇလႆႈၸွႆႈထႅမ်ၶႃႈသေဢမ်ႇၵႃး ဢမ်ႇသူၼ်ၸႂ်လွင်ႈဢၼ်ၶႃႈႁဵတ်းၼၼ်ႉထႅင်ႈလူးၵွၼ်ႇ မၼ်းၵေႃႈဢမ်ႇထုၵ်ႇမႅၼ်ႈမိူၼ်ၵၼ် ၼၼ်ႉယဝ်ႉ။
“ႁဝ်းၽိတ်းမိူၼ်ၵၼ်မူတ်းယဝ်ႉ ၵႂႃႇလႄႈႁဝ်းၵႂႃႇပေႃးၼၼ်”
သၢႆႁိူဝ်ႈၽူႈၵူၼ်းလီႁဝ်း လီဢမ်ႇမီးၽႂ်တႅၵ်ႈလႆႈၼၼ်ႉယဝ်ႉ။ ၶဝ်ၵေႃႈ ၵႃႈလႆႈဝၢင်းထူင်ၶဝ်ႁေ မႃးမၢႆယိူဝ်ႈၸွႆႈယူႇ။ ၵူၺ်းၵႃႈ လွင်ႈဢမ်ႇထၢင်ႇဢမ်ႇထိူမ်ၼၼ်ႉၵေႃႈ သမ်ႉလႆႈႁၼ် ၼူၼ်းမူဝ်၊ သႅင်ႁၵ်ႉ၊ ၶမ်းၽွင် လႄႈ သႂ်လႅင်းၶဝ်ၵေႃႈ ဢွၼ်ဢဝ်သဵမ်သေ မႃးၸွႆႈႁဝ်းၵႂႃႇယူႇ။ ဢမ်ႇထၢင်ႇဝႃႈတေမႃးၺႃး ၸုမ်းမၢဝ်ႇလဝ်းၼႂ်းႁူင်းႁဵၼ်းႁဝ်းသေ မိူၼ်တေတူၵ်းၸႂ်ယူႇမိူၼ်ၵၼ်ၼၼ်ႉယဝ်ႉ။
“သူမႃးႁဵတ်းသင်လႃႇ!” ၶႃႈၵေႃႈဢမ်ႇႁူႉဝႃႈၶဝ်တေမႃးလႄႈထၢမ်။
“ႁဝ်းဝႃႈတေမႃးၸွႆႈသူၼႆၵႂႃႈ”
“ယိၼ်းၸူမ်းယဝ်ႉၼႃႈ ၽူႈၵူၼ်းလီႁဝ်းၶဝ် ယိၼ်းလီႁပ်ႉတွၼ်ႈယူႇ”
ၶဝ်ၵေႃႈဢွၼ်ၵၼ်မၢႆယိူဝ်ႈယူႇႁင်းၽႂ်ႁင်းမၼ်းသေ ဢုပ်ႇၵၼ်ၵႂႃႇ။ မိူဝ်ႈတႄႇတႄႉ ၸုမ်းၽူႈယိင်းၶဝ်မၢႆၽၢႆႇၼိုင်ႈ ၽူႈၸၢႆးၶဝ်မၢႆထႅင်ႈၽၢႆႇၼိုင်ႈယဝ်ႉ၊ မၢႆၵႂႃႇမၢႆမႃး မိူၼ်ဝႃႈတၼ်းယူႇပဵၼ်ၵူႈၵၼ်ၸဵမ်မိူဝ်ႈလႂ်ၵေႃႈဢမ်ႇႁူႉ သႂ်လႅင်းလႄႈသၢႆႁိူဝ်ႈၼၼ်ႉၵေႃႈမၢႆယူႇႁိမ်းၵၼ်သေ ဢုပ်ႇၵၼ်ၼင်ႇမူၼ်ႈၸႂ်ယူႇ၊ လႅင်းမိူင်းလႄႈ သႅင်ႁၵ်ႉၼၼ်ႉၵေႃႈ ဢုပ်ႇၵၼ်ၼင်ႇႁၢင်ႈၵႂၢမ်းၶႂ်ႈၶဝ်ႈၵၼ်ဝႆႉယူႇ။ ၸၢႆးသိူဝ်လႄႈ ၶမ်းၽွင်ၼၼ်ႉသမ်ႉ မၢႆယူႇႁိမ်းၵၼ်ၵႂႃႇ မိူၼ်ၸၢႆးသိူဝ် တေပဵၼ်ၽၢႆႇထၢမ်ၵူၺ်းလႄႈ ၶမ်းၽွင်ၵေႃႈ ဢေႃႈၸွမ်းၵႂႃႇၵူၺ်း၊ တူၺ်းတင်းဢၢႆႈၸၢႆးႁဝ်းလႄႈတင်းဢၢႆႈဝိၼၼ်ႉၵေႃႈ ဢုပ်ႇၵၼ်လွင်ႈသင်လွင်ႈသိင်ဢမ်ႇႁူႉ သဵင်ၶူဝ်ၶႃသမ်ႉပေႃးပၼ်းလူင်ဝႆႉယဝ်ႉ။
ၽၢႆႇတင်းၼူၼ်းမူဝ်လႄႈသႅင်ၶိူဝ်းၼၼ်ႉၵေႃႈ ၵႂၢမ်းၵူႈၶေႃႈ ဢၼ်လၢတ်ႈဢွၵ်ႇသူပ်းၸူးၵၼ်ၼၼ်ႉ ၼင်ႈႁၢင်ႈၶႂ်ႈလၢတ်ႈဢမ်ႇၶႂ်ႈလၢတ်ႈသေ မိူၼ်တေမီးလွင်ႈယၢပ်ႇၸႂ် တႃႇလၢတ်ႈၸူးၵၼ်ယူႇႁင်းၽႂ်ႁင်းမၼ်းယဝ်ႉ။ ၶႃႈႁႃႉ ပဵၼ်သင်လႄႈတေလႆႈမီးၵူႈမိူၼ်ပိူၼ်ႈလႃႇ ဢမ်ႇၸမ်ပဵၼ်လူး ၶႃႈလႆႈၸႂ်ႁဵတ်းၵေႃႉလဵဝ်လီလိူဝ်ယဝ်ႉ။ ၵူၺ်းၵႃႈ ပဵၼ်သင်လႄႈ ၸွမ်ၶိူဝ်းၵူၼ်းၸႂ်ၼမ်ၼၼ်ႉသမ်ႉ ဢမ်ႇမီးၵူႈမိူၼ်ပိူၼ်ႈသေယဝ်ႉ မႃးမၢႆယိူဝ်ႈယူႇႁိမ်းၶႃႈၼၼ်ႉလႃႇ။
“ပဵၼ်သင်တေမႃးမၢႆယူႇႁိမ်းၶႃႈၼႆႉလႃႇ! ၵႂႃႇမၢႆတၢင်ႇတၢင်းလႄႈ”
“ပိူၼ်ႈယူႇၵၼ်ပဵၼ်ၵူႈပဵၼ်ၵူႈဢမ်ႇႁၼ်ႁႃႉ! တူၺ်းလႄႈ ၵူႈပုၼ်ႉၵူႈၼၼ်ႉ”
“ၵႂႃႇမၢႆတင်းဢၢႆႈၸၢႆးႁဝ်းၼၼ်ႉလႄႈ သၢမ်ၵေႃႉၵေႃႈလႆႈယူႇလူး”
“ပေႃးတၢၼ်ႇဝႃႈႁဵတ်းၵေႃႉလဵဝ်မၼ်းတေလီလိူဝ်ယဝ်ႉ ၵၼ်ႉမႃးၸွႆႈဢိူဝ်ႈၼႆႉ ပေႃးႁဵတ်းႁူမ်ႈၵၼ် ၵၢၼ်တေၸဵဝ်းယဝ်ႉၼႆဢမ်ႇႁူႉႁႃႉ ႁၼ်ႁိုဝ် ၵမ်ႉၵူၺ်းပေႃးတေယဝ်ႉယဝ်ႉ”
မၼ်းၵေႃႈၸႂ်ႈယူႇ ၼင်ႇဝႃႈဢမ်ႇတၼ်းႁူႉသင် ႁဵတ်းၵႂႃႇႁဵတ်းမႃး ၵမ်ႉၵူၺ်းၵေႃႈ သမ်ႉပေႃးလိူမ်ႈလႆႇၵဵင်ႈလီယူႇယဝ်ႉ။ ဢွၼ်ၵၼ်ႁဵတ်းၸွမ်းၵၼ် ၽဵဝ်ႈသိမ်းၸွမ်းၵၼ်သေ ပွၵ်ႈမိူဝ်းႁိူၼ်းၵႂႃႇၸွမ်းၵၼ်ယူႇယဝ်ႉ။ ဝၼ်းမိူဝ်ႈၼႆႉ ၶၢဝ်းယၢမ်းၼႆႉ ပဵၼ်ၶၢဝ်းယၢမ်းဢၼ်ၶႃႈမီးတၢင်းသိူဝ်းလိူဝ်ပိူၼ်ႈ တႄႇၸဵမ်မိူဝ်ႈ ၶႃႈမႃးၶိုၼ်းႁူင်းႁဵၼ်းလင်ၼႆႉၼၼ်ႉယဝ်ႉ။ ၶႃႈမီးဢူၺ်းၵေႃႉ ဢၼ်ၸွႆႈထႅမ်ၵၼ်ယူႇ လႄႈ မီးပီႈဢၢႆႈ ဢၼ်မႆႈၸႂ်ၶႃႈယူႇ ၶႃႈၵေႃႈယင်းမီးၵူၼ်းဢၼ် ႁၵ်ႉၶႃႈယူႇ ႁဵတ်းႁႂ်ႈၶႃႈ ၶႂ်ႈမီးၸၢတ်ႈပၢၼ်ဢၼ်လီလႄႈ ၶႂ်ႈၸႂ်ႉၸၢတ်ႈပၢၼ်ၶႃႈႁႂ်ႈလီမႃး ၼၼ်ႉယဝ်ႉ။
တွၼ်ႈသိပ်းသီႇသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းႁႃႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ပိူင်ပဵၼ်၊ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
