တွၼ်ႈသိပ်းသၢမ်
ဢူႈမႄႈဢၼ်ၵုမ်ႇမိုင်ႉႁဵတ်းၵၢၼ်ယူႇလႄႈ ဢမ်ႇမီးၶၢဝ်းယၢမ်းယူႇၸွမ်းလုၵ်ႈ၊ ယွၼ်ႉပဵၼ်ၵူၼ်းႁႃလဵင်ႉလူႁႂ်ႈယႂ်ႇမႃးၼၼ်ႉ လၢတ်ႈလႆႈယူႇႁႃႉဝႃႈ ႁူႉၸၵ်းလုၵ်ႈ လီလိူဝ်သေပိူၼ်ႈ၊ ႁူႉယူႇႁႃႉဝႃႈ လုၵ်ႈၶႂ်ႈႁဵတ်းသင်၊ ၶႂ်ႈပဵၼ်သင်၊ ယွၼ်ႉသင်လႄႈ လုၵ်ႈပဵၼ်ၵူၼ်းၸိူင်ႉၼၼ်၊ ယွၼ်ႉသင်လႄႈလုၵ်ႈဢမ်ႇလၢတ်ႈသင်၊ ၵွပ်ႈသင် လုၵ်ႈဢမ်ႇထွမ်ႇၵႂၢမ်းဢူႈမႄႈလႃႇ၊ ယဝ်ႉဢူႈမႄႈလူး ၸွင်ႇယၢမ်ႈႁပ်ႉထွမ်ႇသဵင်ၵၢင်ၸႂ် လုၵ်ႈၽွင်ႈယူႇႁိုဝ်။
ၶိုၼ်ႈႁူင်းႁဵၼ်းမႃးပေႃးလႆႈသွင်ဝူင်ႈယဝ်ႉ မိူဝ်ႈၼႆႉၵေႃႈ ပဵၼ်ဝၼ်းလိုဝ်ႈလႄႈ ၶႃႈၵေႃႈ ဢမ်ႇႁူႉဝႃႈတေႁဵတ်းသင်၊ ၼၢႆးႁွင်ႉၵႂႃႇသူၼ်ၵေႃႈ လႆႈၵႂႃႇၸွမ်း၊ ႁိူၼ်းႁဝ်းၼၼ်ႉ သမ်ႉဝႃႈမီးသၢမ်ၵေႃႉၵူၺ်းသေတႃႉ၊ ႁဝ်းၵေႃႈႁဵတ်းသူၼ်ႁဵတ်းၼႃးၵိၼ်ႁင်းၵူၺ်း မိူၼ်ႁိူၼ်းပိူၼ်ႈယူႇၼင်ႇၵဝ်ႇ။ မၢင်ပွၵ်ႈပေႃးမီးငိုၼ်းၵေႃႈၸၢင်ႈပိူၼ်ႈႁေ၊ ပေႃးဝၼ်းလိုဝ်ႈၵေႃႈ ဢၢႆႈၸၢႆးႁဝ်းလႄႈၼၢႆးႁဝ်း တေဢွၼ်ၵၼ်ၵႂႃႇႁဵတ်းယဝ်ႉ။ ၶႃႈတႄႉ ပေႃးၵႆႉၵေႃႈၵႂႃႇ ပေႃးၶၢၼ်ႉၵေႃႈဢမ်ႇၵႂႃႇ ပေႃးၽူၼ်တူၵ်းတႄႉယုမ်ႇလႃႈ ၶႃႈတိုၼ်းဢမ်ႇၵႂႃႇ။
ၵၢင်ဝၼ်းၸမ်ႁူင်ႈယဝ်ႉၼႆၵေႃႈ ႁဝ်းဢွၼ်ၵၼ်ၵဵပ်းၽၵ်းသေ ပွၵ်ႈမႃးႁိူၼ်းၶိုၼ်း၊ မွင်းထိုင်ႁိူၼ်းၵူၺ်း ၵူၼ်းတီႈၼႂ်းဝၢၼ်ႈၼၼ်ႉ မႃးလၢတ်ႈၼႄဝႃႈ မိူဝ်ႈၼႆႉ မႄႈႁဝ်းလႆႈသိုပ်ႇၾူင်းမႃးၼႆယူႇ။ မိူဝ်ႈႁူႉၸိူင်ႉၼၼ် ဢၢႆႈၸၢႆးၵေႃႈ ၼႅတ်ႈၵႂႃႇတီႈႁိူၼ်းဢၼ်မႄႈသိုပ်ႇၾူင်းမႃးၼၼ်ႉၵမ်းလဵဝ်၊ ၶႃႈၵေႃႈ ပွၵ်ႈၼႆႉ ၼႅတ်ႈလမ်းၵႂႃႇၸွမ်းမၼ်းယဝ်ႉ။ မိူဝ်ႈႁွတ်ႈၵႂႃႇတီႈႁိူၼ်းၼၼ်ႉၵေႃႈ ဢၢႆႈၸၢႆးၼၼ်ႉတႄႉ ၼႅတ်ႈၶိုၼ်းသိုပ်ႇၾူင်းၵႂႃႇယူႇ။ ၵူၺ်းၵႃႈ မႄႈၵေႃႈဢမ်ႇလႆႈႁပ်ႉၾူင်း၊ သမ်ႉဝႃႈသိုပ်ႇၵႂႃႇပဵၼ်လၢႆၵမ်းၵေႃႈ ဢမ်ႇႁပ်ႉ ၸဝ်ႈႁိူၼ်းၼၼ်ႉၸင်ႇ ဢဝ်ငိုၼ်းမႃးပၼ်တီႈႁႃးသေ။
“ၼႆႉ..ပဵၼ်ငိုၼ်းၵမ်းလိုၼ်းသုတ်း ဢၼ်မၼ်းတေသူင်ႇမႃးၼႆဝႃႇ မၼ်းၽၢၵ်ႇႁႂ်ႈလၢတ်ႈပၼ်တီႈသူပီႈၼွင်ႉ”
ၶႃႈၵၼ်ႉလႅၼ်ႈမႃးၸွမ်း ယူဝ်ဝႃႈတေလႆႈလၢတ်ႈတေႃႇမႄႈ ၵူၺ်းၵႃႈ ဢမ်ႇထၢင်ႇဝႃႈတေလႆႈမႃးငိၼ်းၸိူင်ႉၼႆ၊ ပေႃးဝႃႈၼႆႉပဵၼ်ၵမ်းလိုၼ်းသုတ်းၵေႃႈ ပဵၼ်ပွၵ်ႈလိုၼ်းသုတ်း ဢၼ်မႄႈတေသိုပ်ႇၾူင်းမႃးဢမ်ႇၸႂ်ႈႁႃႉ။ မၼ်းႁဵတ်းႁႂ်ႈၶႃႈ တိူဝ်ႉၸႂ်တေႉယဝ်ႉ၊ ပဵၼ်သင်လႄႈမႄႈတေလႆႈႁဵတ်းၸိူင်ႉၼၼ်လႃႇ၊ ဢမ်ႇၸႂ်ထိုင် ဢမ်ႇၶုၵ်းၸႂ်လႆႈႁဝ်းၽွင်ႈႁႃႉ၊ မိူဝ်ႈၼႆႉ ပေႃးဝႃႈၶႃႈလႆႈလၢတ်ႈတေႃႇမႄႈၼႆ ၶႃႈၶႂ်ႈႁႂ်ႈမႄႈႁူႉဝႃႈ လုၵ်ႈယိင်းၵေႃႉၼႆႉ ၸႂ်ထိုင်မႄႈတေႉတေႉဢေႃႈ။
ဢၢႆႈၸၢႆးၵေႃႈ ပၼ်ႇလူတ်ႉထိပ်ႇမၼ်းပွၵ်ႈမိူဝ်းၵႂႃႇယူႇ ၶႃႈၵေႃႈပၼ်ႇၵႂႃႇလွႆးလွႆးတၢင်းလင်မၼ်းၼၼ်ႉယဝ်ႉ။ မိူၼ်ဝႃႈ ယိုင်ႈယူႇယိုင်ႈလပ်းသိင်ႇမႃးတိၵ်းတိၵ်းလႄႈ ဢမ်ႇႁူႉထိုင်တီႈလႂ်ယဝ်ႉ၊ ယၢမ်းၼၼ်ႉမီးမႃႁဝ်ႇၸူးၶႃႈႁႅင်းႁႅင်းသေ ဢဝ်ၶႃႈတူၵ်းၸႂ် ထိုင်တီႈပေႃးႁွင်ႉႁႆႈဢွၵ်ႇမႃးယူႇ။ ၶႃႈၼၼ်ႉၵေႃႈ ႁွင်ႉႁႆႈလူင်မိူဝ်းတေႃႇပေႃးထိုင်ႁိူၼ်းယဝ်ႉ။ ၼၢႆးႁဝ်းဢၼ်ႁၼ်ၶႃႈႁႆႈယူႇႁဵတ်းၼၼ်ၵေႃႈ
“မႂ်းႁႆႈႁဵတ်းသင်လႃႇ”
“မႃႁဝ်ႇမၼ်းႁေ ႁႆႈမႃးၸွမ်းတၢင်းၸဵမ်မိူဝ်ႈၵႆႈပုၼ်ႉၼေႈ” ဢၢႆႈၸၢႆးႁဝ်းလၢတ်ႈ။
“ပဵၼ်သၢဝ်ပဵၼ်ၼၢင်းႁႆႈလူင်မႃးၸွမ်းတၢင်း ဢမ်ႇလီဢၢႆပိူၼ်ႈၽွင်ႈႁႃႉ”
ၶႃႈၵေႃႈတဵတ်ႇၵႂႃႇသေၵႅပ်ႉၼိုင်ႈ ၶဝ်ႈမိူဝ်းၼွၼ်းၶူတ်းၽႃႈယဝ်ႉ ဢိုတ်ႇႁႆႈယူႇၼႂ်းၽႃႈၼၼ်ႉထႅင်ႈ။ ၽွင်းၼၼ်ႉ လႆႈငိၼ်းသဵင်ၼၢႆးႁဝ်း ႁွင်ႉထၢမ်ဢုပ်ႇၸူးတီႈဢၢႆႈၸၢႆးၵႂႃႇ
“မႄႈသူဝႃႈႁိုဝ်မႃးလႃႇ”
“သိုပ်ႇၵႂႃႇယဝ်ႉဢမ်ႇႁပ်ႉၾူင်း ၵူၺ်းၵႃႈ ၽၢၵ်ႇလၢတ်ႈဝႆႉဝႃႈ တေသူင်ႇငိုၼ်းမႃးပွၵ်ႈၼႆႉပဵၼ်ပွၵ်ႈလိုၼ်းသုတ်းၵူၺ်းယဝ်ႉ”
“ပဵၼ်သင်ၵေႃႈမၼ်းဢမ်ႇလၢတ်ႈသင်ဝႆႉႁႃႉ လၢတ်ႈမႃးၸိူင်ႉၼၼ် မၼ်းဢမ်ႇယူႇလီႁႃႉတေႃႈ”
“မိူဝ်ႈပူၼ်ႉမၼ်းသိုပ်ႇမႃးတႄႉ လၢတ်ႈမိူၼ်မၼ်းတေတႄႇၼႃႈႁိူၼ်းမႂ်ႇထႅင်ႈၼၼ်ႉယဝ်ႉ”
“ပေႃးၼၼ်ၵေႃႈ မၼ်းလႅပ်ႈတေတႄႇၼႃႈႁိူၼ်းႁေ ၽူဝ်မၼ်းတေဝႃႈၵႂႃႈထၢင်ႇ”
“ၵေႃႈယဝ်ႉၶႃႈလႄႈ ႁဝ်းၵေႃႈယူႇၸွမ်းၵၼ်မႃး ဢမ်ႇမီးမႄႈပဵၼ်လၢႆပီႊယဝ်ႉလူး”
“ဢိူဝ်ႈ…ၸႂ်ႈၵေႃႈၸႂ်ႈယူႇလႂ် မၼ်းၵေႃႈႁဵတ်းပၼ်သူပီႈၼွင်ႉမႃး ပဵၼ်လၢႆပီႊယဝ်ႉမိူၼ်ၵၼ်၊ ယူႇၵေႃႉလဵဝ် တေငဝ်ယူႇၼင်ႇၵဝ်ႇၵႂႃႈ ၵေႃႈယဝ်ႉလႄႈ သူပီႈၼွင်ႉယင်းမီးၼၢႆးထဝ်ႈၵေႃႉၼႆႉယူႇလူး၊ ၸၢင်ႈမႆႈၸႂ်သင် သွၼ်ႇႁႂ်ႈသူပီႈၼွင်ႉ ၶတ်းၸႂ်ႁဵၼ်းသေ ပဵၼ်ၵူၼ်းလီ ၵူၺ်းၵေႃႈပေႃးယဝ်ႉ”
ယိုင်ႈၼၢႆးႁဝ်းလၢတ်ႈ ၶႃႈယိုင်ႈၶႅၼ်းၶႂ်ႈႁႆႈမႃးထႅင်ႈယဝ်ႉ။ ၶႃႈၵေႃႈ လႅၼ်ႈဢွၵ်ႇၵႂႃႇၵွတ်ႇၼၢႆးႁဝ်းၵမ်းလဵဝ်။
“ၶႃႈၵေႃႈတေၶတ်းၸႂ်ႁဵၼ်းၶႃႈၼၢႆး”
“လီဢိူဝ်ႈ မေႃႁူႉၸိူင်ႉၼႆၵေႃႈလီယဝ်ႉ သင်ဢမ်ႇသင်ၵေႃႈ ဢမ်ႇလႆႈလၢတ်ႈတႂ်ႈမိူဝ်းၼိူဝ်ၵူၺ်းၵေႃႈ လီၼႃႇယဝ်ႉ”
“ယႃႇဝႃႈၼၼ်ၶႃႈလႄႈ ၵမ်ႉတေလႅၵ်ႈလၢႆႈၸႂ်ယဝ်ႉ”
“ဢိူဝ်ႈဢိူဝ်ႈ.. ဢမ်ႇလၢတ်ႈယဝ်ႉ လၢၼ်ၵဝ်ၵၼ်ႉမီးယိူင်းဢၢၼ်းၶတ်းၸႂ်ႁဵၼ်းလူး”
ၵၢင်ၼႂ်ၸဵမ်ၸဝ်ႉ ၼၢႆးႁဝ်းလႄႈဢၢႆႈၸၢႆး ၶႃၵေႃႈ လုၵ်ႉၵႂႃႇၵၢတ်ႇၵၼ်ၸဵမ်ၸဝ်ႉသေ တီႈႁိူၼ်းၼၼ်ႉၵိုတ်းၶႃႈၵေႃႉလဵဝ်ၵူၺ်း၊ ၶႃႈတိုၼ်ႇမႃးယဝ်ႉၵေႃႈ လႅတ်ႇပေႃးဢွၵ်ႇယဝ်ႉယိုင်၊ ၾူၼ်ၵေႃႈဢမ်ႇတူၵ်း ၾႃႉၵေႃႈပၢင်ႇသႂ်ႁၢင်ႈလီ သီၶဵဝ်တူၼ်ႈမႆႉလႄႈသၼ်လွႆသွမ်ႇသွမ်ႇၼၼ်ႉၵေႃႈ ၸိုၼ်ႈၵတ်းယဵၼ်ၸႂ်။ မိူဝ်ႈဢၼ်ၶႃႈ လုၵ်ႉဢွၵ်ႇမႃးၼဵင်ႇၵူၼ်ႉၼဵင်ႇၶိုၼ်ႈ ယိုတ်ႈသဵၼ်ႈယိုတ်ႈသၢႆ ယူႇၼွၵ်ႈႁိူၼ်းၼၼ်ႉ လႆႈငိၼ်းသဵင်ၵူၼ်းဢုပ်ႇၵၼ်ယူႇလႄႈ ၵူၺ်းသမ်ႉႁၼ်ၶူးၽိဝ်ၾႃႉၵူၺ်းသေ တူၺ်းၵႂႃႇတူၺ်းမႃးသမ်ႉ ပဵၼ်မၼ်းဢုပ်ႇၾူင်းၵူၺ်း။
ၶႃႈၵေႃႈၼင်ႈႁေထွမ်ႇမၼ်းဢုပ်ႇယူႇ မိူၼ်တေဢုပ်ႇၸူးပေႃႈမႄႈမၼ်းၼၼ်ႉယဝ်ႉ။ ဝၢႆးသေမၼ်းဢုပ်ႇယဝ်ႉၵေႃႈ မိူၼ်တေႁၼ်ၶႃႈလႄႈ
“တၼ်းမႃးမီးယူႇတီႈၼႆႈၸဵမ်လႂ်လႃႇ!”
“ႁိုင်ယဝ်ႉၶႃႈ! ၾူင်းၶူး..ၵပ်းသိုပ်ႇၼွၵ်ႈမိူင်းလႆႈယူႇႁႃႉ!”
“ဢိုမ်ႈ! လႆႈဢိူဝ်ႈ! တေၵပ်းၵႂႃႇၸူးၽႂ်လႃႇ!”
“မႄႈၶႃႈဢေႃႈ!..”
“လႆႈယူႇၵူၺ်း..ဢဝ်မၢႆၾူင်းမၼ်းမႃးလႄႈ တေသိုပ်ႇပၼ်”
ၶႃႈၵေႃႈ မိူဝ်းဢဝ်ဢွမ်ငိုၼ်းဢၼ်ၶႃႈႁွမ်ဝႆႉၼၼ်ႉဢွၵ်ႇမႃးယႃႉယူႇ။ ယွၼ်ႉမၢႆၾူင်းမႄႈၶႃႈၼၼ်ႉ သႂ်ႇဝႆႉလေႃးၵၼ်လႄႈ ပေႃးဝႃႈၶႃႈလႆႈၾူင်းယဝ်ႉ ၶႃႈတေသိုပ်ႇၸူးမႄႈၵမ်းလဵဝ်ၼႆၼၼ်ႉၼႃႇ၊ ၶႃႈလႆႈယႃႉသေ ဢဝ်မၢႆၾူင်းၼၼ်ႉပၼ်ၶူးၵႂႃႇယူႇ။
ၶူးၵေႃႈ ၵပ်းသိုပ်ႇပၼ်ၶႃႈၵႂႃႇယဝ်ႉ ဢမ်ႇႁိုင်ၵေႃႈ မီးၵူၼ်းႁပ်ႉၾူင်းသေ
“ႁႃလူဝ်! ၼႆႉပဵၼ်ၽႂ်ၶႃႈ!” ႁူႉလႆႈၵမ်းလဵဝ်ဝႃႈပဵၼ်သဵင်မႄႈ၊ မိူဝ်ႈလႆႈငိၼ်းသဵင်မႄႈယဝ်ႉၵေႃႈ ၶႃႈလၢတ်ႈၵႂၢမ်းသမ်ႉပေႃးဢမ်ႇဢွၵ်ႇလႄႈ ယဵၼ်လူင်ၵႂႃႇယူႇ ယၢမ်းၼၼ်ႉ လႆႈငိၼ်းသဵင်လုၵ်ႈဢွၼ်ႇႁွင်ႉႁႆႈ ဢိၵ်ႇတင်း သဵင်ၽူႈၸၢႆးႁွင်ႉမေႃးၼႂ်းၾူင်းၼၼ်ႉဝႃႈ “ဢေးလုၵ်ႈႁဝ်းႁႆႈထႅင်ႈယဝ်ႉ သူမႃးတူၺ်းလူး”
“ဢိူဝ်ႈဢိူဝ်ႈ…” တင်းဢၼ်ၶႃႈႁွင်ႉဝႃႈ “မႄႈ!” လႄႈမိူဝ်ႈဝၢင်းၾူင်းပႅတ်ႈၼၼ်ႉၵေႃႈ ပဵၼ်မိူဝ်ႈလဵဝ်ၵၼ်ယူႇယဝ်ႉ။
ၶႃႈၵေႃႈ ဢဝ်ၾူင်းၼၼ်ႉပၼ်တီႈၶူးသေယဝ်ႉ ဢဝ်ငိုၼ်းဢၼ်ၶႃႈႁွမ်ဝႆႉတင်းမူတ်းၼၼ်ႉ ပၼ်ၶူးၵႂႃႇယူႇ။
“ငိုၼ်းၼႆႉ ၶႃႈဝူၼ်ႉဝႃႈတေသိုဝ်ႉၾူင်း ၵပ်းသိုပ်ႇႁႃမႄႈႁဝ်း ၵူၺ်းမၼ်းဢမ်ႇပေႃးသိုဝ်ႉလႄႈ မိူဝ်ႈၶႃႈလႆႈလၢတ်ႈတေႃႇယဝ်ႉ မိူၼ်ဝႃႈ..ၶႃႈတေဢမ်ႇလူဝ်ႇၸႂ်ႉမၼ်းယဝ်ႉ ဢဝ်ပဵၼ်ၵႃႈငိုၼ်းၾူင်းသေၶႃႈၼႃႈ”
“ၶူးဢမ်ႇဢဝ်ၼႃ ယဝ်ႉၵေႃႈမၼ်းဢမ်ႇလႆႈၵႃႈထိုင်တၢၼ်ႇၼႆႉ”
“ႁၼ်ဝႃႈပေႃးၵပ်းသိုပ်ႇၼွၵ်ႈမိူင်းၼႆ သဵင်ႈငိုၼ်းၼမ်ၼႃႇဢမ်ႇၸႂ်ႈၶႃႈႁႃႉ”
“ၸႂ်ႈယူႇ.. ၼွင်ႉသိုပ်ႇဢဝ်ၵႅပ်ႉၼိုင်ႈၵူၺ်း ငိုၼ်းယင်းဢမ်ႇတၼ်းယွမ်းသင်လူးၵွၼ်ႇ”
ၶူးၵေႃႈဢဝ်ငိုၼ်းၶႃႈၼၼ်ႉ ဝႆႉပၼ်ၼႂ်းဢွင်ႈမိုဝ်းၶႃႈၼၼ်ႉသေ
“ဢဝ်ၵႂႃႇသိုဝ်ႉၵိၼ်တၢင်းၵိၼ်ဢၼ်ၶႂ်ႈၵိၼ်လႄႈ”
“ၸိူင်ႉႁိုဝ်ၵေႃႈမၼ်းၵေႃႈတိုၼ်းသဵင်ႈၼမ်ယူႇယဝ်ႉဢမ်ႇၸႂ်ႈၶႃႈႁႃႉ”
ၶူးၵေႃႈ ထူၺ်ႈၸႂ်လူင်သေယဝ်ႉ “မၼ်းၵေႃႈ..ၶႂ်ႈတၢၼ်ႇမွၵ်ႈၵႃႈထူဝ်ႇၽူးၼၼ်ႉၵႂႃႈ ဝႆႉဝႃႈၶူးတႅၼ်းၶိုၼ်း ဢၼ်ဢဝ်ထူဝ်ႇၽူးသူႁေႈမိူဝ်ႈဝၼ်းပူၼ်ႉၼၼ်ႉႁေလႄႈၼႃႈ”
“တၢၼ်ႇၼၼ်ႉၵူၺ်းတေႉၶႃႈႁႃႉ!”
“မႅၼ်ႈယဝ်ႉ တၢၼ်ႇၼၼ်ႉၵူၺ်း”
ၶူးၵေႃႈၶဝ်ႈႁိူၼ်းမိူဝ်းၵႂႃႇပႅတ်ႈယူႇယဝ်ႉ။
ပေႃးဝႃႈဝၼ်းလိုဝ်ႈသုတ်းယဝ်ႉ ဝၼ်းၶိုၼ်ႈႁူင်းႁဵၼ်းၵေႃႈထိုင်မႃးၶိုၼ်းယူႇ။ တႄႇဢဝ်ဝၼ်းမိူဝ်ႈၼႆႉၵႂႃႇ ၶႃႈဝူၼ်ႉဝႃႈတေၶတ်းၸႂ်ႁဵၼ်းယဝ်ႉ၊ ယွၼ်ႉပိူဝ်ႈ ႁၼ်ထိုင်ၼၢႆးႁဝ်း ဢၼ်ႁဵတ်းၵၢၼ်လဵင်ႉလူႁဝ်း ပၼ်ႁႂ်ႈႁဝ်းလႆႈၶိုၼ်ႈႁူင်းႁဵၼ်း ၼၼ်ႉၵူၺ်းၼင်ႇၵဝ်ႇ၊ ပေႃးဢမ်ႇၶတ်းၸႂ်ႁဵၼ်းၵေႃႈ ၵႂႃႇႁူင်းႁဵၼ်းတေသုမ်း ၶၢဝ်းယၢမ်း သုမ်းႁႅင်းလၢႆလၢႆၵူၺ်း ဢမ်ႇၸႂ်ႈႁိုဝ်လႃႇ၊ ယွၼ်ႉၼၼ် ဝၼ်းမိူဝ်ႈၼႆႉၵေႃႈ တေပဵၼ်ဝၼ်းဢွၼ်တၢင်းသုတ်း ဢၼ်ၶႃႈလုၵ်ႉၸဝ်ႉ လူၺ်ႈၼၢႆးႁဝ်းဢမ်ႇလႆႈႁွင်ႉၼၼ်ႉယဝ်ႉ။ ၶႃႈၵေႃႈ ၵႂႃႇႁူင်းႁဵၼ်းလူၺ်ႈဢမ်ႇတူၵ်းလိုၼ်းၶၢဝ်းယၢမ်းလႄႈ လႆႈဝႃႈၵႂႃႇၸဝ်ႉလိူဝ်သေၵူႈဝၼ်းဝၼ်းယူႇ။
မိူဝ်ႈဢၼ်ၶႃႈၵႂႃႇႁူင်းႁဵၼ်းၸဝ်ႉ သႂ်ႇၶူဝ်းႁူင်းႁဵၼ်းမိူၼ်ပိူၼ်ႈၼႆၵေႃႈ၊ ၼင်ႇဝႃႈသၢႆတႃၵူၼ်းတၢင်းလႂ်တၢင်းလီဢမ်ႇႁူႉယဝ်ႉ တူၺ်းမႃးတီႈၶႃႈ။ ၶႃႈပဵၼ်လုၵ်ႈႁဵၼ်းမိူၼ်ပိူၼ်ႈၽွင်ႈဢမ်ႇလႆႈႁႃႉ၊ ပဵၼ်ၵူၼ်းပဵၼ်ႁၢင်ႈမိူၼ်ပိူၼ်ႈၽွင်ႈ မၼ်းလၢၵ်ႇလၢႆးတီႈလႂ်လႃႇ၊ ပဵၼ်သင်လႄႈတေလႆႈဢဝ်သၢႆတႃတူၺ်းၵၼ်ပေႃးတၢၼ်ႇၼၼ်ႉ။
တေဝႃႈႁိုဝ်ၵေႃႈ ယူႇၸိူင်ႉၼႆမၼ်းၵေႃႈယူႇယၢပ်ႇမိူၼ်ၵၼ်ၼၼ်ႉယဝ်ႉ။ ဢမ်ႇဝႃႈၸိူင်ႉႁိုဝ် ၶႃႈၵေႃႈ..တိုၼ်းပဵၼ်ၵူၼ်း ဢမ်ႇသူၼ်ၸႂ်သၢႆတႃပိူၼ်ႈယဝ်ႉၼင်ႇၵဝ်ႇ၊ ၶႂ်ႈတူၺ်းၵေႃႈပၼ်ၶဝ်တူၺ်းသေ ဢၼ်ၶႃႈလူဝ်ႇႁဵတ်းၵေႃႈႁဵတ်းၵႂႃႇ ၼႆႉၵူၺ်းဢၼ်ၶႃႈဝူၼ်ႉလႆႈယၢမ်းလဵဝ်။
ဝၼ်းမိူဝ်ႈၼႆႉ ၶိင်ႇဢွၼ်တၢင်းသုတ်း ၶူးၸၢမ်ႁွမ် ၶူးသွၼ်ပိုၼ်း ၶဝ်ႈႁွင်ႈမႃး ဢၼ်လႆႈႁၼ်ၶႃႈၼၼ်ႉ လႅပ်ႈလၢၵ်ႇလၢႆးတွၼ်ႈတႃႇမၼ်းဝႆႉလႄႈ တူၺ်းၵမ်ႉၼိုင်ႈယဝ်ႉၵမ်းၼိုင်ႈယူႇ။
“ၼၼ်ႉ… ၸႂ်ႈသႅင်ၶမ်းယူႇႁႃႉ!”
“ၸႂ်ႈဢေႃႈ! ”
ၵွပ်ႈဝႃႈ ပေႃးၶိင်ႇသွၼ်ပိုၼ်းၼႆ မၼ်းႁဵတ်းႁႂ်ႈၶႃႈၶႂ်ႈၼွၼ်းယူႇတႃႇသေႇၼၼ်ႉယဝ်ႉ။ ပေႃးလပ်းသမ်ႉ တေဢဝ်ၶွၼ်ႉမႃးတွႆႇၽိူၼ်တိၵ်းတိၵ်း ယႃႉၸေးၸိမ်ႇၶႂ်ႈၼွၼ်းၼႃႇလႄႈ ၶႃႈဢမ်ႇတွၼ်ႉၶဝ်ႈၶိင်ႇမၼ်းႁေပွၵ်ႈ။ ၼႆႉတႄႉဝႆႉဝႃႈ ပဵၼ်ပုၼ်ႈၽွၼ်းဢၼ်ၶႃႈထုၵ်ႇလီလႆႈႁဵတ်းၼႆလႄႈ သမ်ႉဝႃႈၶႂ်ႈၼွၼ်းတၢၼ်ႇႁိုဝ်ၼႆၵေႃႈ ၶႃႈတေယဵၼ်ႉဢဝ်ၵႂႃႈ။ ၶႃႈတိုၼ်းႁဵတ်းလႆႈယူႇယဝ်ႉ၊ ၶႃႈပဵၼ်ဢေးယိင်းဢိူဝ်ႈ ဢမ်ႇမီးသင်ဢၼ်ၶႃႈႁဵတ်းဢမ်ႇလႆႈ ပေႃးဝႃႈႁဵတ်းလႆႈ မၼ်းၵေႃႈတိုၼ်းႁဵတ်းလႆႈ ၼၼ်ႉယဝ်ႉ။
သမ်ႉဝႃႈၶႂ်ႈႁၢဝ်ႁိူမ်ႉၼႆၵေႃႈ ၶတ်းၸႂ်ၵၼ်ႈဝႆႉ ၼမ်ႉတႃသမ်ႉပေႃးဢွၵ်ႇ၊ ၵူၺ်းၵႃႈ ယဵၼ်ႉဢမ်ႇလႆႈလႄႈ ႁၢဝ်ပၼ်သူပ်းၵႂၢင်ႈဝႃႈၵႂၢင်ႈ သဵင်သမ်ႉပေႃးလႆႈငိၼ်းထိုင်ၶူးယဝ်ႉ၊ ၶူးၵေႃႈဝၢႆႇတူၺ်းသေ ၶႃႈၵေႃႈ ၸၢင်ႈႁဵတ်းႁိုဝ် ၵႃႈလႆႈဢႃႈသူပ်းၶၢင်ႉဝႆႉယူႇႁဵတ်းၼၼ်။
“ႁၢဝ်ႁိူမ်ႉယူႇႁႃႉ!”
ႁိူမ်ႉ…..ၶႃႈၵေႃႈလုၵ်ႉယိုတ်ႈသဵၼ်ႈယိုတ်ႈသၢႆ ၼင်ႇဢၼ်ၶႃႈၵႆႉႁဵတ်းတႃႇသေႇၼၼ်ႉလႄႈ ထိုင်တီႈပေႃးလိုမ်းၵႂႃႇယဝ်ႉဝႃႈ ပုၼ်ႈၽွၼ်းလုၵ်ႈႁဵၼ်းဢၼ်ၶႃႈထုၵ်ႇလီႁဵတ်းၼၼ်ႉ ပဵၼ်ၸိူင်ႉႁိုဝ်ဝႆႉ။
“လုၵ်ႉႁဵတ်းသင်လႃႇ!..တေဢွၵ်ႇၵႂႃႇၼွၼ်းတၢင်းၼွၵ်ႈႁႃႉ ၵႂႃႇလႆႈယူႇၼႃ”
ၶႃႈၸင်ႇတေႁူႉတူဝ်မႃးၶိုၼ်းယဝ်ႉ“ဢမ်ႇၶႃႈ!” မႄးၼင်ႈၶိုၼ်းသေ မွင်းၼင်ႈတီႈယူႇၵူၺ်း ဢမ်ႇႁူႉဝႃႈတႃၼွၼ်းလူင်ၼၼ်ႉ လုၵ်ႉမႃးတၢင်းလႂ် ၶႃႈယဵၼ်ႉၸႂ်ဢမ်ႇလႆႈယဝ်ႉ ပဵၼ်သင်လႄႈပဵၼ်လုၵ်ႈႁဵၼ်းယူဝ်းယူဝ်းၼၼ်ႉ မၼ်းပေႉမႃးယၢပ်ႇလႃႇ။ ငူပ်ႉၼႃႈၸူးၽိူၼ်ၼင်ႇဢမ်ႇႁူႉဝႃႈတေႁဵတ်းႁိုဝ်ယဝ်ႉလႄႈ ၽွင်းၼၼ်ႉ ၶႃႈၵေႃႈလုၵ်ႉၸုၵ်း ႁွင်ႉၶူးသေယဝ်ႉ
“ၶူးၶႃႈ!..ၵွပ်ႈဝႃႈ ၶႃႈ..ၶႃႈမီးလွင်ႈၶႂ်ႈလၢတ်ႈဢိတ်ႉၼိုင်ႈ”
“မီးလွင်ႈသင်လႃႇ လၢတ်ႈမႃးလႄႈ”
“ၶႃႈ..ဢိူဝ်ႈ..ၶႃႈတေလၢတ်ႈယဝ်ႉ ဢွၼ်တၢင်းၶႃႈတေလၢတ်ႈ ၸွႆႈဝၢင်းၶႂၢင်ႉပၼ်ၶႃႈဢိတ်းၼိုင်ႈၶႃႈၼႃ”
“ဢိူဝ်ႈ!! လၢတ်ႈမႃးလႄႈ ၶမ်ဢိုတ်းၶမ်ဢၢတ်းယူႇႁဵတ်းသင် ၶႂ်ႈလၢတ်ႈသင်ၵေႃႈလၢတ်ႈမႃးလႄႈ”
“ၵွပ်ႈဝႃႈ ဢိူဝ်… ၶူးသွၼ်လိၵ်ႈႁဝ်းၼၼ်ႉ..ၶႂ်ႈၼွၼ်းတေႉၶႃႈယဝ်ႉ ၶႃႈယဵၼ်ႉၸႂ်ဢမ်ႇလႆႈထိုင်တီႈ…ၶႃႈပေႃးတေၼွၼ်းလပ်းယဝ်ႉဢေႃႈ၊ ၶူးသွၼ်လိၵ်ႈ..ၶူးဢမ်ႇတူၺ်းလုၵ်ႈႁဵၼ်းၽွင်ႈၶႃႈႁႃႉ ဝႃႈၶဝ်ၶႂ်ႈၼွၼ်းၵၼ်ၵႃႈႁိုဝ်ၼႆ သင်ဢမ်ႇသင်ၵေႃႈ လၢႆႈလွၵ်းလၢႆးသွၼ်မၼ်းၽွင်ႈၶႃႈလႄႈ မႃးဢၢၼ်ႇပပ်ႉႁႂ်ႈႁဝ်းထွမ်ႇၸိူင်ႉၼႆ ႁဝ်းမိူဝ်းဢၢၼ်ႇႁင်းၵူၺ်း တီႈႁိူၼ်းၵေႃႈလႆႈယူႇၶႃႈလူး၊ ၼွၼ်းႁေဢၢၼ်ႇၵေႃႈယင်းလႆႈလူးၵွၼ်ႇ ပပ်ႉၸိူဝ်းၼႆႉ ပဵၼ်သင်လႄႈ တေလႆႈမႃးၼင်ႈႁေထွမ်ႇၶူးဢၢၼ်ႇၼေၸိူင်ႉၼႆၶႃႈလႃႇ”
ၶူးဢၼ်ယိပ်းပပ်ႉဢၢၼ်ႇယူႇၼၼ်ႉၵေႃႈ သမ်ႉပေႃးဢဝ်ပပ်ႉမၼ်းႁူင်ႈတူၵ်းၵႂႃႇယူႇ၊ လုၵ်ႈႁဵၼ်းဢၼ်ယူႇၼႂ်းႁွင်ႈၼၼ်ႉၵေႃႈ ဢွၼ်ၵၼ်ယၵ်ႉတူၺ်းတီႈၶႃႈမူတ်း။ မိူၼ်ၶႃႈတေလၢတ်ႈဢွၵ်ႇၵႂႃႇ လူၺ်ႈဢမ်ႇတၼ်းႁူႉတူဝ်ၼၼ်ႉယဝ်ႉ၊ ၶႃႈဝူၼ်ႉဝႃႈမိူဝ်ႈၵႆႈၶႃႈၼွၼ်းလပ်းႁေ ၼွၼ်းၾၼ်လၢတ်ႈၼႆဢမ်ႇၸႂ်ႈ၊ ပဵၼ်လွင်ႈတေႉလူင်ဢႃႈ ၵႂႃႇယႂ်ႇမူတ်းယဝ်ႉဢေးယိင်း တၢင်းၶတ်းၸႂ်မႂ်း ၶိင်ႇဢွၼ်တၢင်းသုတ်းၵူၺ်းၵေႃႈ သုတ်းသဵင်ႈယဝ်ႉ ၽၢင်ႁၢင်ႈလုၵ်ႈႁဵၼ်းမႂ်း။
တွၼ်ႈသိပ်းသၢမ်သုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းသီႇၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
