တွၼ်ႈသိပ်းသွင်
မိူဝ်ႈလုၵ်ႈႁဵၼ်းမႃးႁူင်းႁဵၼ်းၵေႃႈ မီးၶူးသွၼ်သင်ႇသွၼ်ႁႂ်ႈႁူႉၵႂၢမ်း၊ ႁူႉမေႃပၺ်ႇၺႃႇ၊ လူင်ႉလႅၼ်ႇလႅတ်းၽၢႆ လၢႆလၢႆၽႃႇသႃႇ၊ တႃႇႁႂ်ႈပဵၼ်ၵူၼ်းၵတ်ႉၵူၼ်းၶႅၼ်ႇ၊ ၸွမ်းၼင်ႇပုၼ်ႈၽွၼ်းၶူးမီး၊ ၼမ်ႉၵတ်ႉဢၼ်ၶူးႁဵတ်းလႆႈၼၼ်ႉ ၶူးၶဝ်ၵေႃႈၶတ်းၸႂ်ၵၼ်တဵမ်တီႈ ယူႇယဝ်ႉ။
ၵူၺ်းၵႃႈ လုၵ်ႈႁဵၼ်းၵူႈၵေႃႉ ၼမ်ႉၵတ်ႉၵေႃႉၼိုင်ႈလႄႈၵေႃႉၼိုင်ႈၼၼ်ႉ တေပိူင်ႈၵၼ်ဝႆႉယဝ်ႉ၊ ဢမ်ႇဝႃႈၶူးတေသွၼ်ပၼ်မိူၼ်ၵၼ်ၵူႈၵေႃႉၵေႃႈယဝ်ႉ၊ လုၵ်ႈႁဵၼ်းဢၼ်ႁပ်ႉလႆႈထိုင်ၽႃႇသႃႇ ဢၼ်ၶူးသွၼ်ႁႂ်ႈပေႃးမိူၼ်ၵၼ်မူတ်းၼၼ်ႉ တိုၼ်းဢမ်ႇပဵၼ်လႆႈ။ ၽႃႇသႃႇလၢႆလၢႆၽႃႇသႃႇ ဢၼ်ႁူင်းႁဵၼ်းမီးဝႆႉပၼ် ႁႂ်ႈၵူၼ်းၵူႈၵေႃႉ ပေႃးလႆႈၵူႈၽႃႇသႃႇမိူၼ်ၵၼ်မူတ်းၼၼ်ႉ မီးၵမ်ႈၵႄႇၵူၺ်း။ မၢင်ၵေႃႉၵေႃႈ တေလိူၵ်ႈသူၼ်ၸႂ်ဢၼ်လႂ်ဢၼ်ၼိုင်ႈ လႄႈ ႁဵတ်းလႆႈလီဢၼ်ၸဝ်ႈၵဝ်ႇသူၼ်ၸႂ် ၵူၺ်းၵႃႈ ဢမ်ႇႁဵတ်းလႆႈဢၼ်ၸဝ်ႈၵဝ်ႇဢမ်ႇ သူၼ်ၸႂ်ၵေႃႈမီး ယူႇယဝ်ႉ။
ၵွပ်ႈဝႃႈ………..
မိူဝ်ႈၼႆႉၽူၼ်တူၵ်းလႄႈ ၶႃႈၵေႃႈဢမ်ႇၸၢင်ႈပၢႆႈႁူင်းႁဵၼ်း ၵႂႃႇလဵၼ်ႈၼႂ်းသူၼ်ယဝ်ႉ၊ တေႃႈၼင်ႇဢွၵ်ႇႁွင်ႈႁဵၼ်းၵႂႃႇၵူၺ်းယင်းၶၢၼ်ႉ၊ ၽွင်းၼၼ်ႉ ၶိင်ႇဢိင်းၵလဵတ်ႈ ပဵၼ်ပွၵ်ႈဢွၼ်တၢင်းသုတ်းဢၼ်ၶႃႈၶဝ်ႈႁဵၼ်းလႄႈ ၶူးမၼ်းသွၼ်သင်ၼႆၵေႃႈ ၶႃႈၵေႃႈဢမ်ႇပွင်ႇၸႂ်၊ ပဵၼ်ၽႃႇသႃႇဢၼ်ၶႃႈ ဢမ်ႇလႆႈသူၼ်ၸႂ်ႁေပိူၼ်ႈသေဢမ်ႇၵႃး ဢမ်ႇလႆႈၸႂ်ၶူးသွၼ်မၼ်း ၶူးပိုၼ်ၼၼ်ႉပႃးယဝ်ႉ။ ယွၼ်ႉပိူဝ်ႈပႃးၶွၼ်ႉယူႇသေႇသေႇ ၼႃႈၵေႃႈဢမ်ႇယုမ်ႉဢမ်ႇၵီႈတေႃႇပိူၼ်ႈႁေပွၵ်ႈ။
ၽွင်းၼၼ်ႉ ၶူးပိုၼ်ၵေႃႈ ထၢမ်တီႈလုၵ်ႈႁဵၼ်းၵမ်းၵေႃႉၵမ်းၵေႃႉယူႇ၊ ထိုင်မႃးၵမ်းၶႃႈ မၼ်းထၢမ်သင်မႃး ၶႃႈၵေႃႈဢမ်ႇပွင်ႇၸႂ် ၶႃႈၵေႃႈဢမ်ႇလႆႈလၢတ်ႈသင် မၼ်းၵေႃႈႁႂ်ႈၶႃႈၸုၵ်းဝႆႉသေ သိုပ်ႇထၢမ်ထႅင်ႈတၢင်ႇၵေႃႉယဝ်ႉ။ မိူၼ်ဝႃႈၼႂ်းႁွင်ႈၼၼ်ႉၵေႃႈ မီးၵူၼ်းယူႇလၢႆၵေႃႉၼင်ႇၵဝ်ႇ ဢၼ်လႆႈၸုၵ်း လႅပ်ႈတေပဵၼ်ၵူၼ်းဢၼ်ဢမ်ႇလႆႈလိၵ်ႈၼၼ်ႉၵႂႃႈ။ ဝၢႆးသေမၼ်းထၢမ်ၵူႈၵေႃႉယဝ်ႉ ၸင်ႇႁႂ်ႈၵူၼ်းဢၼ်ၸုၵ်းၸိူဝ်းၼၼ်ႉ ၵႂႃႇၸုၵ်းတၢင်းၼႃႈ ပႅၼ်ႈပုၼ်းၼၼ်ႉသေ ႁႂ်ႈၶဝ်ႈထႅဝ် လႅင်ႈမိုဝ်းပၼ်မၼ်းႁႅမ်ယူႇ။
မိူဝ်ႈၶႃႈႁၼ်ၸိူင်ႉၼၼ် ႁဵတ်းႁႂ်ႈၸႂ်ၶႃႈၼၼ်ႉဢမ်ႇပေႃးလီမႃးႁေၵႃႈႁိုဝ်ယဝ်ႉ၊ ပဵၼ်သင်လႄႈ ၶႃႈတေလႆႈႁႂ်ႈၵူၼ်းၵေႃႉၼၼ်ႉမႃးႁႅမ်ၶႃႈလႃႇ၊ ၶႃႈဢမ်ႇႁူႉလွင်ႈသင်လူး ႁဵတ်းၸိူင်ႉၼႆတေႃႇၶႃႈဢမ်ႇလႆႈလေႃႇ ၶႃႈၵေႃႈ..လူဝ်ႇလႆႈၵႅတ်ႇၶႄတူဝ်ၶႃႈယူႇယဝ်ႉဢမ်ႇၸႂ်ႈႁိုဝ်။ မိူဝ်ႈထိုင်ၵမ်းၶႃႈ ၵမ်းလိုၼ်းသုတ်းၼၼ်ႉ
“ၶႃႈဢမ်ႇလႆႈႁဵၼ်းၶႃႈ ၶူးသွၼ်သင်ၶႃႈၵေႃႈဢမ်ႇႁူႉ”
“ဢမ်ႇႁူႉပဵၼ်သင်လႄႈဢမ်ႇထၢမ်ဢူၺ်းၵေႃႉလႃႇ! လႅင်ႈမိုဝ်းလႄႈ ပေႃးဢမ်ႇႁႅမ် တေပဵၼ်တူဝ်ယၢင်ႇဢၼ်ႁဵတ်းႁႂ်ႈပိူၼ်ႈယိူင်ႈလႆႈၼၼ်ႉယဝ်ႈ”
“မိုဝ်းၼႆႉတႃႇတႅမ်ႈလိၵ်ႈဢေႃႈ ပေႃးမၼ်းၸဵပ်းမႃးယဝ်ႉ တေႁဵတ်းႁိုဝ်တႅမ်ႈလႆႈယဝ်ႉၶႃႈလႃႇ ၶႃႈယွၼ်းဢဝ်တၢင်းလင်ဢဝ်ၶႃႈ”
“ၸိူင်ႉၼၼ်ႁႃႉ မၼ်းတေၸဵပ်းလိူဝ်သေတီႈမိုဝ်းၵွၼ်ႇဢိူဝ်ႈတေလၢတ်ႈဝႆႉႁေ”
“ၶူးမီးႁႅင်းၵႃႈႁိုဝ်ၵေႃႈႁႅမ်ၶႃႈလႄႈ ပေႃးတေႁဵတ်းႁႂ်ႈၶူးၵတ်းယဵၼ်ၸႂ်”
ၶူးဢၼ်ငႃဢၢင်ႈႁႅမ်ၶႃႈယူႇၼၼ်ႉ ၶုၼ်ႇၵိုတ်းၶွၼ်ႉမၼ်းၵႂႃႇသေ
“မႂ်းၶႂ်ႈဝႃႈၸိူင်ႉႁိုဝ် ႁၼ်ဝႃႈၵဝ်ႁႅမ်ၼႆႉတွၼ်ႈတႃႇ လွင်ႈၵတ်းယဵၼ်ၸႂ်ၸိူင်ႉၼၼ်ႁႃႉ ဢၼ်သူဢမ်ႇၶတ်းၸႂ်၊ ဢမ်ႇလႆႈလိၵ်ႈၼၼ်ႉလူး တေဝႃႈႁိုဝ်လႃႇ။ ၵွပ်ႈၶႂ်ႈႁႂ်ႈသူမေႃ၊ ၶႂ်ႈႁႂ်ႈသူႁူႉ၊ ၶႂ်ႈႁႂ်ႈသူၶႅၼ်ႇ လႄႈ ႁႂ်ႈသူလူဢၢၼ်ႇလိၵ်ႈၼၼ်ႉၵူၺ်း၊ ပေႃးဢမ်ႇၶႂ်ႈၺႃးၶွၼ်ႉၵေႃႈ ၶတ်းၸႂ်လိၵ်ႈလႄႈ၊ ႁဵၼ်းလိၵ်ႈလႄႈ ပေႃးသူလႆႈလိၵ်ႈၽႂ်တေၶႂ်ႈႁႅမ်သူလႃႇ ဢမ်ႇၸႂ်ႈဝႃႈႁႅမ်သူယဝ်ႉ တေႁႂ်ႈၵဝ်ၵတ်းယဵၼ်ၸႂ်မႃး ၵူၺ်းႁႂ်ႈသူပေႃးမေႃၶတ်းၸႂ်မႃးၼၼ်ႉယဝ်ႉ လၢတ်ႈယဝ်ႉဢမ်ႇၸႂ်ႈႁႃႉ ပေႃးဢမ်ႇလႆႈလိၵ်ႈၶူးတေႁႅမ် ပေႃးလႆႈၸွင်ႇၶူးႁႅမ်သူႁိုဝ်”
“ဢမ်ႇႁႅမ်ၶႃႈ!” လုၵ်ႈႁဵၼ်းၼႂ်းႁွင်ႈ ၼင်ႈၼိမ်ယဵၼ်ႁေတွပ်ႇၸူးၶိုၼ်း။
“မိူဝ်ႈၼႆႉၵေႃႈ ပေႃးၵႃႈၼႆႉၵူၺ်းယဝ်ႉလႄႈ” သိမ်းၶူဝ်းမၼ်းသေ ဢွၵ်ႇႁွင်ႈႁဵၼ်းၵႂႃႇ မိူၼ်ဢမ်ႇပေႃးႁၢၼ်ႉၸႂ်ႁေၵႃႈႁိုဝ် ၼၼ်ႉယဝ်ႉ။
ၵူၼ်းၼႂ်းႁွင်ႈၼၼ်ႉၵေႃႈ ဢွၼ်ၵၼ်ယၵ်ႉတူၺ်းၶႃႈ လူၺ်ႈသၢႆတႃဢၼ်ဢမ်ႇပေႃးလီႁေၵႃႈႁိုဝ်ၼၼ်ႉယူႇ။ သႅင်ဢွင်ႇၼၼ်ႉတႄႉ သၢႆတႃၸၢႆႉတူၺ်းၶႃႈသေ ပွင်ႉလႃႇယူႇ။
“ဢမ်ႇၶႂ်ႈႁဵၼ်းၵေႃႈတေမႃးႁဵၼ်းႁဵတ်းသင် ဢဝ်ႁဝ်းဢမ်ႇလႆႈႁဵၼ်းၵၼ်မူတ်းၸိူင်ႉၼႆ ယွၼ်ႉတူဝ်ၸဝ်ႈၵဝ်ႇႁေ ဢမ်ႇထုၵ်ႇလီႁဵတ်းႁႂ်ႈပိူၼ်ႈလိူတ်ႇမႆႈၸွမ်းသေဢိတ်း ႁဵတ်းႁႂ်ႈၶူးၸႂ်လမ်ယဝ်ႉၼႃႇ”
“တေၵႂႃႇသူၼ်ၸႂ်မၼ်းႁဵတ်းသင်လႃႇ မၼ်းၵေႃႈပဵၼ်ၵူၼ်းၸိူင်ႉၼႆယူႇယဝ်ႉ” ၼုမ်ႇႁွမ် လၢတ်ႈၸူး။
“ၸႂ်ယဵၼ်ယဵၼ်ဢိတ်ႉၼိုင်ႈလႄႈ သႅင်ဢွင်ႇ” သႅင်လိုၼ်းလၢတ်ႈၼႄ။
“တေၸႂ်ယဵၼ်လႆႈၸိူင်ႉႁိုဝ်လႃႇ ထိုင်ၶိင်ႇၶၢဝ်းႁဵၼ်းၵေႃႈလူဝ်ႇႁဵၼ်းဢမ်ႇၸႂ်ႈႁႃႉ၊ ႁဝ်းသမ်ႉ တေမႃးၼင်ႈပႂ်ႉပၼ်ႁႂ်ႈၶၢဝ်းယၢမ်း ပႅတ်ႈလၢႆလၢႆၵႂႃႇၸိူင်ႉၼႆၵႂႃႈ”
လုၵ်ႉမႃးၸူးၶႃႈသေ “မႂ်းႁဵတ်းႁႂ်ႈႁဝ်းဢမ်ႇလႆႈႁဵၼ်းၸိူင်ႉၼႆ မႂ်းတေႁဵတ်းႁိုဝ်ဢဝ်ပုၼ်ႈၽွၼ်းလႃႇ”
“သႅင်ဢွင်ႇ ပေႃးလႆႈယဝ်ႉၼႃႈ!” ၼူၼ်းမူဝ်လၢတ်ႈ။
“ၸႂ်ႈဢိူဝ်ႈ! မႂ်းမၼ်းၵေႃႈပဵၼ်ၵူၼ်းၶႅၼ်ႇယူႇယဝ်ႉဢမ်ႇၸႂ်ႈႁိုဝ်လႃႇ တေမႃးႁူႉလွင်ႈသင် ၵူၼ်းလႆႈထီႉၼိုင်ႈယူႇသေႇသေႇၸိူင်ႉၼၼ်”
“ၼႆႉမၼ်းပဵၼ်ၼႂ်းႁွင်ႈႁဵၼ်းဢိူဝ်ႈ! မေႃဢၢႆပိူၼ်ႈၽွင်ႈလႄႈ” ၼူၼ်းမူဝ်လၢတ်ႈၸူးၼင်ႇၸႂ်ယဵၼ်။
ၼုမ်ႇႁွမ်လႄႈ သႅင်လိုၼ်းၼၼ်ႉၵေႃႈ မႃးလၢၵ်ႈဢဝ်တူဝ်မၼ်းၵႂႃႇၼင်ႈတီႈၼင်ႈၼၼ်ႉယူႇ။ မိူၼ်သႅင်ဢွင်ႇၼၼ်ႉၵေႃႈ ဢမ်ႇပေႃးၸႂ်မႃးတေႉတေႉသေ ၼင်ႈသိၵ်ႇၸေႈမၼ်း ႁဵတ်းၶိတ်ႈႁဵတ်းပၢႆႇပိူၼ်ႈၵႂႃႇယူႇယဝ်ႉ။ ႁၼ်ဝႃႈတေပဵၼ်လုၵ်ႈဢၼ် ပေႃႈမႄႈၸွမ်းၸႂ်ယူႇဢမ်ႇႁၢင်ႉယဝ်ႉ။
ဝူၼ်ႉဝႃႈလၢတ်ႈႁႂ်ႈၶူးႁႅမ်ႁႅင်းႁႅင်း ပေႃးၸဵပ်းယဝ်ႉတေလႆႈၶေႃႈဢၢင်ႈဢမ်ႇၸၢင်ႈမႃးႁူင်းႁဵၼ်းၼႆ။ ၶႃႈယင်းဢမ်ႇတၼ်းဝူၼ်ႉမႅၼ်ႈဝႃႈ ဢၼ်ၶႃႈလၢတ်ႈၼၼ်ႉ မၼ်းတေႁဵတ်းႁႂ်ႈၶူးၸႂ်ဢမ်ႇလီၸိူင်ႉၼၼ်၊ ၶႃႈၵေႃႈပဵၼ်ၵူၼ်းၸိူင်ႉၼႆယူႇယဝ်ႉ ပဵၼ်သင်လႄႈၶူးတေလႆႈမႃးသူၼ်ၸႂ်ၵူၼ်းၸိူင်ႉၼင်ႇၶႃႈလႃႇ။ ပဵၼ်ယွၼ်ႉၶႃႈဢမ်ႇမေႃလၢတ်ႈၵႂၢမ်းလႄႈ ႁဵတ်းႁႂ်ႈမၼ်းလႆႈပဵၼ်ၸိူင်ႉၼႆမႃးယဝ်ႉ။ ၶူးသမ်ႉ ၸမ်ပဵၼ်တေလႆႈဢွၵ်ႇႁွင်ႈႁဵၼ်းၵႂႃႇယူႇႁႃႉ၊ ပဵၼ်သင်လႄႈယွၼ်ႉၶႃႈၵေႃႉလဵဝ်ၵူၺ်းသေ ႁႂ်ႈၵူၼ်းတင်းႁွင်ႈဢမ်ႇလႆႈႁဵၼ်းလႃႇ၊ လိုပ်ႈၶႃႈဢွၵ်ႇႁွင်ႈၵႂႃႇၵူၺ်းၵေႃႈလႆႈယဝ်ႉဢမ်ႇၸႂ်ႈႁိုဝ်။
သႅင်ဢွင်ႇၼၼ်ႉၵေႃႈ သမ်ႉဝႃႈၵႂႃႇၼင်ႈတီႈၼင်ႈမၼ်းယူႇၵေႃႈ ယင်းဢမ်ႇယဵၼ်လႆႈ ပွင်ႉယူႇဢုမ်းဢုမ်းႁင်းမၼ်း၊ ၶႃႈၵေႃႈ ၵႂႃႇတူပ်းသႂ်ႇၼိူဝ်ၽိူၼ်မၼ်းၼၼ်ႉႁႅင်းႁႅင်းသေ
“မႂ်းၶႂ်ႈႁဵၼ်းၼႃႇၸွင်ႇၸႂ်ႈ! ၵဝ်တေၵႂႃႇႁွင်ႉၶူးမႃးပၼ်မႂ်းလႂ်”
“ၶူးဢွၵ်ႇၵႂႃႇယဝ်ႉ မႂ်းတေႁဵတ်းႁိုဝ်ႁႂ်ႈၶူးမႃးၶိုၼ်းလႃႇ”
“ပေႃးဝႃႈၵူၼ်းၶႂ်ႈႁဵၼ်းတေႉတေႉ ဢမ်ႇမီးၶူးၵေႃႈႁဵၼ်းလႆႈယဝ်ႉ ဢဝ်ၶူးမႃးပဵၼ်ၶေႃႈဢၢင်ႈၶႂ်ႈႁဵၼ်းၵူၺ်းတႄႉဢမ်ႇဝႃႈ” လၢတ်ႈၵႂႃႇလူၺ်ႈဢမ်ႇသူၼ်ၸႂ်မၼ်းသေ ဢွၵ်ႇႁွင်ႈၵႂႃႇၼၼ်ႉယဝ်ႉ။
ၶႃႈၵေႃႈလႆႈၵႂႃႇၸွမ်းၶႆႈထိုင်တီႈ ႁွင်ႈလိုဝ်ႈၶူးၼၼ်ႉယူႇ၊ ၵူၺ်းသမ်ႉဢမ်ႇႁၼ်လႄႈ ၸင်ႇလႆႈၵႂႃႇၸွမ်းၶႆႈႁိမ်းႁွမ်းႁူင်းႁဵၼ်းၸိူဝ်းၼၼ်ႉယဝ်ႉ။ ၶႃႈၵေႃႈဢမ်ႇႁူႉတေၸွမ်းႁႃတီႈလႂ်ယဝ်ႉ မိူဝ်ႈပၼ်ႇလဵပ်ႈၵႂႃႇတၢင်းလင်ႁူင်းႁဵၼ်းၼၼ်ႉ ငိၼ်းသဵင်ၵူၼ်းလႄႈ မူၼ်ႉၶဝ်ႈၵႂႃႇၼႂ်းပႃႇမႆႉ ဢၼ်မီးသႃလႃးဢွၼ်ႇၼၼ်ႉသေ လႆႈႁၼ်ၶူးပိုၼ်ၼၼ်ႉ ၼင်ႈၵဝ်းၵၼ်တင်း ၶူးမူဝ်ႁွမ်ယူႇ။ ႁၢင်ႈဢၼ်ၶႃႈႁၼ်ၼၼ်ႉ ဢမ်ႇၶႂ်ႈလၢတ်ႈယဝ်ႉ၊ ၼႅတ်ႈၵွင်လင်ပႅတ်ႈၵမ်းလဵဝ်သေ ဢၢၼ်းႁူၼ်လင်ၶိုၼ်း ၵူၺ်းသမ်ႉၼမ်ႉၼၵ်းတိၼ်မၼ်းဢမ်ႇမဝ်လႄႈ ယဵပ်ႇသႂ်ႇၺႃးၵိင်ႇမႆႉ ဢၼ်ႁူင်ႈတူၵ်းၸွမ်းတၢင်းၸိူဝ်းၼၼ်ႉယဝ်ႉ။ မိူၼ်ၶႃလႆႈငိၼ်းယဝ်ႉ လႆႈႁၼ်ၶႃႈပႃးသေ
“သႅင်ၶမ်း!! ”
ၶႃႈၵေႃႈဝၢႆႇၵႂႃႇၸူးၶႃ ၼင်ႇဝႃႈဢမ်ႇႁူႉဢမ်ႇႁၼ်သင်ၼၼ်ႉယဝ်ႉ။
“ၶႃႈႁႃၶူးတၢင်းႁိုင် တီႈတေႉၵေႃႈမႃးမီးယူႇတီႈၼႆႈၶႃႈလူး”
ပႆၶဝ်ႈၵႂႃႇၸူးၶႃတီႈၼႂ်းသႃလႃးၼၼ်ႉယူႇ။ ၶူးမူဝ်ႁွမ်ၼၼ်ႉတႄႉၵေႃႈ ဢမ်ႇပေႃးႁတ်းတေႃႇၼႃႈၶႃႈၵႃႈႁိုဝ်လႄႈ ၼႅတ်ႈလႅၼ်ႈၵႂႃႇပႅတ်ႈဝႆးဝႆးယဝ်ႉ။
“တေၸွမ်းႁႃႁဵတ်းသင် ဢမ်ႇလႆႈၸႂ်ႁဵၼ်းလိၵ်ႈဢမ်ႇၸႂ်ႈႁႃႉ”
“တွၼ်ႈတႃႇၶႃႈတႄႉႁၼ်ဝႃႈမၼ်းပဵၼ်ၸိူင်ႉၼၼ်ယူႇ ၵူၺ်းၵႃႈ ၶူးဝူၼ်ႉၸိူင်ႉၼၼ်တေႉတေႉၶႃႈႁႃႉ၊ ၶႃႈႁၼ်ဝႃႈၵူၼ်းၸိူင်ႉၼင်ႇၶူးၼႆႉ တေဢမ်ႇလႅပ်ႈႁၼ်ၽွၼ်းလီၵူၼ်းၵေႃႉလဵဝ်သေ ႁႂ်ႈလုၵ်ႈႁဵၼ်းတင်းၼမ် ႁၢမ်းသုၼ်ႇလႆႈၸွမ်းၼင်ႇၵဝ်ႇၼႆလႄႈ ၶႃႈၵေႃႈလႆႈမႃးၸွမ်းႁႃၶူးၼၼ်ႉၼႃႇ၊ ယွၼ်ႉပိူဝ်ႈၶိင်ႇၶူးဢၼ်တေလႆႈသွၼ်လုၵ်ႈႁဵၼ်းၼၼ်ႉ ယင်းၵိုတ်းပဵၼ် ၶိုင်ႈၸူဝ်ႈမူင်းပၢႆၵမ်းလဵဝ်၊ ဢမ်ႇလီသေလၢႆၶႃႈႁႃႉ ၶူးဢမ်ႇမႆႈၸႂ်ၼိူဝ်လုၵ်ႈႁဵၼ်းဢၼ် တင်ႈၸႂ်ႁဵၼ်းၼၵ်းၼၵ်းၼႃၼႃၼၼ်ႉၽွင်ႈၶႃႈၼႄႇ၊ ၵူၼ်းၸိူင်ႉၼင်ႇၶႃႈ ဢမ်ႇမီးၵႃႈၶၼ် ပၼ်ႁႂ်ႈၶူးတေလႆႈမႃးသႂ်ႇၸႂ်ထိုင်တၢၼ်ႇၼၼ်ႉ ၶူးထုၵ်ႇလီဝႆႉၵႃႈၶၼ်တီႈ လုၵ်ႈႁဵၼ်းဢၼ်တင်ႈၸႂ်ၼၼ်ႉဢမ်ႇၸႂ်ႈၶႃႈႁိုဝ်”
ပေႃးဝႃႈတေႉ ၶူးပိုၼ်ၼၼ်ႉ သမ်ႉပေႃးမီးလုၵ်ႈမီးမေးယူႇယဝ်ႉလူးၵွၼ်ႇ။ ၵူၺ်းၵႃႈ ၶဝ်ဢမ်ႇလႆႈယူႇၸွမ်းၵၼ် လုၵ်ႈမေးမၼ်းၼၼ်ႉ တေႁဵတ်းၵၢၼ်ဝႆႉတၢင်ႇဝဵင်းယဝ်ႉ။ ၶူးမူဝ်ႁွမ်ၼၼ်ႉ တိုၵ်ႉႁႃမႃးပီႊၼႆႉၵူၺ်း လႅပ်ႈတေဢမ်ႇႁူႉလွင်ႈမၼ်းၵေႃႈပဵၼ်လႆႈ။
“လၢတ်ႈယဝ်ႉမိူဝ်ႈၼႆႉတေဢမ်ႇသွၼ်ၼႆ”
“ၶူးတေသွၼ်ႁိုဝ်ဢမ်ႇသွၼ် မၼ်းၵေႃႈဢမ်ႇလႆႈၵဵဝ်ႇသင်ၶႃႈၼင်ႇၵဝ်ႇ ၵူၺ်းၵႃႈ ၶူးမူဝ်ႁွမ် ၶဝ်ႁူႉယူႇၶႃႈႁႃႉ ဝႃႈၶူးမီးၼႃႈႁိူၼ်းယဝ်ႉၼႆ”
“ႁတ်းမႃးလွၵ်ႇၵၼ်ၸိူင်ႉၼႆႁႃႉ! ပဵၼ်လုၵ်ႈႁဵၼ်းႁဵတ်းတူဝ်ၸိူင်ႉၼႆဢမ်ႇလီၼႃ ”
“ဢမ်ႇလႆႈလွၵ်ႇၶႃႈ လၢတ်ႈလွင်ႈတေႉၵူၺ်း ပဵၼ်ၶူးၸိူင်ႉၼႆၵေႃႈ ပဵၼ်တူဝ်ယၢင်ႇဢၼ်ဢမ်ႇလီ တေႃႇလုၵ်ႈႁဵၼ်းမိူၼ်ၵၼ်ၼၼ်ႉၶႃႈယဝ်ႉ၊ ပဵၼ်သင်လႄႈတေလႆႈဢဝ်ၵူၼ်းဢၵျၢင်ႉၸိူင်ႉၼႆမႃးႁဵတ်းၶူးလႃႇ ၼႂ်းမိူင်းၼႆႉ ဢမ်ႇမီးၶူးသွၼ်ယဝ်ႉႁႃႉ”
“ဝႃႈၸိူင်ႉႁိုဝ်ၵေႃ!..” တူၺ်းမၼ်းၵမ်တႃမိုဝ်းသမ်ႉပေႃးၵႅၼ်ႇၵႅၵ်းၵႅၵ်း မိူၼ်တေမႃးတွႆႇၶႃႈယူႇယဝ်ႉ။
လိုမ်းလၢတ်ႈထႅင်ႈ ၶဝ်ပဵၼ်လၢၼ်ၶူၺ်ၶူးၸၢႆးလူင် ၽူႈၵွၼ်းႁူင်းႁဵၼ်းႁဝ်းၼၼ်ႉယဝ်ႉ။ သမ်ႉဝႃႈမၼ်းတေႁဵတ်းၽိတ်းႁိုဝ် ႁဵတ်းဢမ်ႇထုၵ်ႇမႅၼ်ႈၵေႃႈ ဢမ်ႇမီးၽႂ်ႁတ်းဝႃႈႁင်မၼ်းလႄႈ တေဢၢင်ႈထိုင်ဢႃမၼ်းၼၼ်ႉတႃႇသေႇယဝ်ႉ။
“တေႁဵတ်းႁိုဝ်လႃႇ သင်လွင်ႈၼႆႉၵႂႃႇထိုင်ႁူၶူးလူင် လၢၼ်ၶူၺ် ဢၼ်ႁဵတ်းတေႃႇလၢၼ်ယိင်းမၼ်းၸိူင်ႉၼႆ၊ မၼ်းတေပဵၼ်ၸိူင်ႉႁိုဝ်မႃး ၶႃႈပေႃးဝူၼ်ႉႁၼ်ႁၢင်ႈမၼ်းယဝ်ႉၼႆႉ ႁႃး..ႁႃး”
“ဢိူဝ်ႈ! ၵႂႃႇၵေႃႈလႆႈ ၵူၺ်းၵႃႈ လွင်ႈၼႆႉ မႂ်းတေလႆႈဢိုတ်းသူပ်းဝႆႉ ၸွင်ႇငိၼ်းႁိုဝ်”
လႆႈမႃးႁူႉၵႂၢမ်းလပ်ႉၵူၼ်းဢၼ်ၶႃႈဢမ်ႇလႆႈၸႂ်ၸိူင်ႉၼႆ ပဵၼ်ဢၼ်ၵၢမ်ႇလီႁႃႉ ၵၢမ်ႇႁၢႆႉႁိုဝ်၊ ဝႆႉဝႃႈပဵၼ်လွင်ႈၵၢမ်ႇလီႁေလႄႈ တေၸၢင်ႈဢဝ်မႃးလွၵ်ႇၶဝ်လႆႈ မိူဝ်ႈၶဝ်ႁဵတ်းလွင်ႈဢၼ်ဢမ်ႇလီတေႃႇၶႃႈမႃး။ ၶႃႈၼၼ်ႉ ပဵၼ်ၵူၼ်းၸိူင်ႉႁိုဝ်ၵေႃႈ ပေႃးဢမ်ႇပွင်ႇၸႂ်ယဝ်ႉ၊ မိူဝ်ႈၸွမ်းႁႃၵူၼ်းႁၼ်ယဝ်ႉၼၼ်ႉ ၵူၼ်းၵေႃႉဢၼ်ႁၢႆသမ်ႉပဵၼ်ၶႃႈၼႆၼေႈ။
ထိုင်မႃးထႅင်ႈဝၼ်းၼိုင်ႈ မိူဝ်ႈၼႆႉ.. သမ်ႉဝႃႈၾူၼ်ဢမ်ႇတူၵ်းသေတႃႉ၊ မွၵ်ႇၵုမ်ႈၼမ်ႉၼၢႆးယင်းတိုၵ်ႉသုမ်ႇယူႇလႄႈ ၶႃႈၵေႃႈလိုမ်းၵႂႃႇယဝ်ႉဝႃႈ လူဝ်ႇမၢႆယိူဝ်ႈၼႆ ထိုင်ၶၢဝ်းလူင်းႁူင်းႁဵၼ်းယဝ်ႉၼႆၵေႃႈ ဢွၵ်ႇမိူဝ်းၵႂႃႇၸွမ်းပိူၼ်ႈယူႇ၊ ဢၢႆႈဝိၵေႃႈဢမ်ႇလႆႈဝႃႈၸိူင်ႉႁိုဝ်ႁင်းၶႃႈ။ လိူဝ်သေၼၼ်ႉ မိူဝ်ႈၼႆႉၵေႃႈ ပဵၼ်ဝၼ်းလိုၼ်းသုတ်းဝၼ်းၶိုၼ်ႈႁဵၼ်းယဝ်ႉ၊ မိူဝ်ႈၶုၵ်းၸႂ်လႆႈၵေႃႈ ၶႃႈသမ်ႉပေႃးမႃးထိုင်ပွတ်းတၢင်းယဝ်ႉၼႃႇ။ တေႁူၼ်ၶိုၼ်းႁႃႉ တေမိူဝ်းႁိူၼ်းႁႃႉ ႁဵတ်းႁႂ်ႈၶႃႈၸုၵ်းမိုင်ယူႇၵႅပ်ႉၼိုင်ႈ၊ ဢၼ်ဢမ်ႇထၢင်ႇဢမ်ႇထိူမ်ၼၼ်ႉၵေႃႈ မႃးထႅင်ႈယဝ်ႉ
“ၵိုတ်းႁဵတ်းသင်လႃႇ! ” သဵင်ၶူးၽိဝ်ၾႃႉ။
“ပဵၼ်သင်လႄႈၶူးပႆမႃးဢဝ်ၶႃႈလႃႇ”
“ပီႈပိူင်းၾႃႉဢဝ်ၵႃးမိူဝ်းႁိူၼ်းၸဵမ်ၵႆႈယဝ်ႉ လူဝ်ႇၵႂႃႇသူင်ႇပီႈလူဝ်းႁဝ်းတီႈႁူင်းယႃၼႆဝႃႇ”
ၶႃႈၵေႃႈသိုပ်ႇယၢင်ႈပႆၸွမ်းၶူးမိူဝ်းၵႂႃႇလွႆးလွႆးယူႇ။ ၶႃႈၵေႃႈ ဢမ်ႇႁူႉဝႃႈတေလၢတ်ႈသင်ယဝ်ႉလႄႈ
“ၶူး… ယွၼ်ႉသင်လႄႈလွင်ႈၽဵင်ႇပဵင်းၸႂ်ႉတီႈၵူၼ်းဢမ်ႇလႆႈလႃႇ”
“မိူၼ်ဝႃႈသူပွင်ႇၸႂ်မၼ်းလီယူႇလူး.. တူၺ်းလႄႈ..ဝၼ်းၼၼ်ႉ ဢမ်ႇလႆႈႁၼ်သူလၢတ်ႈထိုင်လွင်ႈၽဵင်ႇပဵင်းသေဢိတ်း”
“ပေႃးပၼ်ၽဵင်ႇၽဵင်ႇၵၼ်မူတ်း မၼ်းၵေႃႈဢမ်ႇသၢင်ႇထုၵ်ႇၶႃႈလူး ၵေႃႉၼိုင်ႈလႄႈၵေႃႉၼိုင်ႈ၊ ငဝ်းလၢႆးဢၼ်လႄႈဢၼ်၊ ယင်းဢမ်ႇမိူၼ်ၵၼ် တေႁဵတ်းႁိုဝ်ပၼ်ႁႂ်ႈမိူၼ်ၵၼ်မူတ်းလႆႈၶႃႈလႃႇ”
“မိူၼ်ဝႃႈပွင်ႇၸႂ်လီယူႇလူး”
“ၵူၼ်းဢၼ်ႁၼ်သုၼ်ႇတူဝ်၊ ၵူၼ်းဢၼ်မီးဢႃႇၼႃႇႁေပေႉၵိၼ်ပိူၼ်ႈၸိူဝ်းၼၼ်ႉ ၸွင်ႇတေမီးသင်ပေႉၶဝ်လႆႈၶႃႈႁႃႉ”
“မီးဢိူဝ်ႈ! လွင်ႈသိုဝ်ႈယူဝ်းၼၼ်ႉၼႃႇ”
“ယဝ်ႉပဵၼ်သင်လႄႈ ၵူၼ်းၸိူဝ်းၼၼ်ႉယင်းတိုၵ်ႉမီးၼမ်ၶိုၼ်ႈမႃးတိၵ်းတိၵ်းလႃႇ”
“ၵွပ်ႈဝႃႈ လွင်ႈသိုဝ်ႈယူဝ်းၼၼ်ႉ မၼ်းဢူၼ်ႈဢွၼ်ႇလူင်းတိၵ်းတိၵ်းလႄႈ ႁဵတ်းႁႂ်ႈ ၵူၼ်းၸိူဝ်းၼၼ်ႉၵႅၼ်ႇၶႅင်ၶိုၼ်ႈတိၵ်းတိၵ်းယဝ်ႉ၊ ပေႃးၶႂ်ႈဢဝ်ပေႉမၼ်းလႆႈၵေႃႈ လွင်ႈသိုဝ်ႈယူဝ်းၼၼ်ႉ တေလႆႈမီးလွင်ႈၵႅၼ်ႇၶႅင်လိူဝ်သေၵူၼ်းၸိူဝ်းၼၼ်ႉၼႃႇ”
“ပေႃးဝႃႈၼၼ် မိူဝ်ႈၶဝ်ၽိတ်းပၵ်းပိူင်ၼၼ်ႉ ပၵ်းပိူင်ဢမ်ႇႁဵတ်းသင်ၶဝ်လႆႈႁႃႉ”
ၶူးၵေႃႈယၵ်ႉတူၺ်းၼႃႈၶႃႈသေ “တူၺ်းသူတေသူၼ်ၸႂ်တေႉယဝ်ႉၼႃ”
“တေႁႂ်ႈၶႃႈတူၺ်း ၵူၼ်းၸိူဝ်းၼၼ်ႉလၢႆလၢႆဢမ်ႇလႆႈၶႃႈလေႃႇ၊ ဢမ်ႇႁၼ်ထိုင်ၵၢင်ၸႂ်ပိူၼ်ႈ၊ ပေႉၵိၼ်ပိူၼ်ႈ၊ ဢဝ်တူဝ်ၵဝ်ႇပဵၼ်ယႂ်ႇ ပေႃးတၢၼ်ႇဝႃႈ မိူင်းၵူၼ်းၼႆႉ မီးၶဝ်ယူႇၵူၺ်းယဝ်ႉ သင်ပဵၼ်လႆႈၶႃႈၶႂ်ႈၸၼ်ႁႂ်ႈၶဝ်လူင်းမႃး ႁႂ်ႈၶဝ်ၺႃးမိူၼ်ဢၼ်ၶဝ်ႁဵတ်းတေႃႇပိူၼ်ႈၼၼ်ႉယဝ်ႉ”
“မိူဝ်းၼႃႈမႃး ၵႂႃႇပဵၼ်ၽူႈတႅပ်းတတ်းတြႃးဢမ်ႇလီႁႃႉ တေလႆႈပၼ်တၢမ်ႇၵူၼ်းဢၼ်ႁဵတ်းၽိတ်းၸိူဝ်းၼၼ်ႉ”
“ပဵၼ်လႆႈယူႇၶႃႈႁႃႉ ”
“လႆႈဢိူဝ်ႈ တိုၼ်းပဵၼ်လႆႈယူႇယဝ်ႉ ပေႃးၶတ်းၸႂ်မၼ်းတိုၼ်းႁဵတ်းလႆႈ”
ၽူႈတႅပ်းတတ်းတြႃးၼႆ ၶႃႈဢမ်ႇယၢမ်ႈဝူၼ်ႉမႅၼ်ႈ၊ ၵူၺ်းၵႃႈ မၼ်းၵေႃႈႁဵတ်းႁႂ်ႈၶႃႈ ၶႂ်ႈပဵၼ်မႃးၵမ်းလဵဝ်။ ဝၼ်းမိူဝ်ႈၼႆႉ မိူၼ်ၶႃႈမီးတၢင်းယိူင်းဢၢၼ်း ဢၼ်ၶႃႈၶႂ်ႈႁဵတ်းယဝ်ႉၼႃ၊ ႁူဝ်ၸႂ်ၶႃႈၵီႈပွင်းမႃး မီးတၢင်းသိူဝ်း လႄႈ တၢင်းယိူင်းဢၢၼ်းဢၼ်ယိုင်ႈယႂ်ႇတႄႉတႄႉယဝ်ႉ။
“ၶႃႈတေလႆႈႁဵတ်းၸိူင်ႉႁိုဝ်ၶႃႈလႃႇ!”
“ၶတ်းၸႂ်ပဵၼ်လုၵ်ႈႁဵၼ်းလီလႄႈ ပေႃးဝႃႈႁဵတ်းလႆႈလီ ၵူႈလွင်ႈ တိုၼ်းတေမီးမႃးၸွမ်းၶၵ်ႉၸွမ်းတွၼ်ႈမၼ်းယူႇ”
ၶိုၼ်းၼႆႉ လွင်ႈဝႃႈၽူႈတႅပ်းတတ်းတြႃးၼႆၼၼ်ႉ မီးယူႇၼႂ်းဢွၵ်းဢေႃၶႃႈ ႁဵတ်းႁႂ်ႈၶႃႈသမ်ႉပေႃးၼွၼ်းဢမ်ႇလပ်းတၢင်းၶိုၼ်းယဝ်ႉ။
တွၼ်ႈသိပ်းသွင်သုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းသၢမ်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
