တွၼ်ႈပႅတ်ႇ
ၽဝလုၵ်ႈႁဵၼ်းဢၼ်ဝႃႈၼၼ်ႉ ပေႃးၽႂ်ဢမ်ႇယၢမ်ႈၽၢၼ်ႇပူၼ်ႉမၼ်းမႃး တေဢမ်ႇပွင်ႇၸႂ်ဝႃႈမၼ်းပဵၼ်ၸိူင်ႉႁိုဝ်၊ ပေႃးယူႇၽၢႆႇၼွၵ်ႈသေတူၺ်းၼၼ်ႉ ပဵၼ်လုၵ်ႈႁဵၼ်းၵူၺ်း လူဝ်ႇႁဵၼ်းလိၵ်ႈႁေၵႂႃႇႁူင်းႁဵၼ်းၵူၺ်း လွင်ႈငၢႆႈငၢႆႈမွၵ်ႈၼၼ်ႉ ပဵၼ်သင်လႄႈဢမ်ႇႁဵတ်းလႆႈ၊ သင်လႆႈမႃးႁဵတ်းၵၢၼ်ႁႃငိုၼ်းႁႃတွင်း မိူၼ်ႁဝ်းၼႆႉတေမိူၼ်ႁိုဝ်၊ တမ်ႉဢမ်ႇလႆႈယၢပ်ႇၸႂ်လွင်ႈသင် လူဝ်ႇႁဵၼ်းလိၵ်ႈမဵဝ်းလဵဝ်ၵူၺ်း တေမီးလွင်ႈတုၵ်ႉၶယၢပ်ႇၽိုတ်ႇသင်။ တေႃႈၼင်ႇၵေႃႉၼၼ်ႉယင်းႁဵတ်းလႆႈ လွင်ႈငၢႆႈငၢႆႈဢွၼ်ႇၵူၺ်း ႁဵတ်းဢမ်ႇလႆႈႁႃႉ။
သမ်ႉဝႃႈလုၵ်ႈႁဵၼ်းၼၼ်ႉ ဢမ်ႇလႆႈႁဵတ်းၵၢၼ်ႁႃငိုၼ်းၵၢင်ၶမ်ႈၵၢင်ၼႂ်သေတႃႉ၊ ၸွမ်းၼင်ႇပုၼ်ႈၽွၼ်းလုၵ်ႈႁဵၼ်းၼၼ်ႉ တေလႆႈႁဵၼ်းလိၵ်ႈႁႃပၺ်ႇၺႃႇ တၢင်းႁူႉတၢင်းမေႃၼႆ မႅၼ်ႈယူႇ၊ ၵူၺ်းၵႃႈ ၸွင်ႇမီးဢူႈမႄႈၵူၼ်းလူင်ၵေႃႉလႂ် ပွင်ႇၸႂ်ဝႃႈ ၵၢၼ်ႁဵၼ်းၼၼ်ႉ မၼ်းၵေႃႈပဵၼ်ၵၢၼ်ၼၵ်း တွၼ်ႈတႃႇလုၵ်ႈႁဵၼ်းမိူၼ်ၵၼ်ယဝ်ႉ၊ ဢမ်ႇၸႂ်ႈဝႃႈႁဵၼ်းယဝ်ႉတေမေႃၵႂႃႇၵမ်းလဵဝ်၊ မိူဝ်ႈဝူၼ်ႉဢမ်ႇဢွၵ်ႇ၊ မိူဝ်ႈႁဵတ်းဢမ်ႇလႆႈ၊ မိူဝ်ႈၶႆႈဢမ်ႇတွင်း မၼ်းၵေႃႈပဵၼ်ပၼ်ႁႃ ဢၼ်ႁဵတ်းႁႂ်ႈယၢပ်ႇၽိုတ်ႇမိူၼ်ၵၼ်၊ မၢင်ပွၵ်ႈၵေႃႈ ႁူဝ်ထၢၼ်ပေႃးၶႆႈ ဢွၵ်းဢေႃသမ်ႉပေႃးလိူတ်ႇပေႃးမႆႈၵႂႃႇမူတ်း ပၢၼ်ပဵၼ်လုၵ်ႈႁဵၼ်းၼၼ်ႉ မၼ်းဢမ်ႇငၢႆႈငၢႆႈ။
လုၵ်ႈႁဵၼ်းၼႂ်းႁွင်ႈၼၼ်ႉၵေႃႈ ဢွၼ်ၵၼ်ၼင်ႈၼိမ်ယဵၼ်သေ ၶူးၸင်ႇတႅမ်ႈသႂ်ႇတီႈၼႃႈပႅၼ်ႈပုၼ်းၼၼ်ႉၵႂႃႇဝႃႈ
“မီးႁိူၼ်းလင်ၼိုင်ႈ ၵေႃႉပဵၼ်ပေႃႈၸဝ်ႈႁိူၼ်းၼၼ်ႉ တေဢဝ်ငိုၼ်းသၢမ်ႁဵင် ပၼ်ၵူၼ်းၼႂ်းႁိူၼ်း ဢၼ်မီးသၢမ်ၵေႃႉ ၼႂ်းၼၼ်ႉပဵၼ် မႄႈၸဝ်ႈႁိူၼ်း၊ လုၵ်ႈဢွၼ်ႇ၊ ၵူၼ်းထဝ်ႈ ဢၼ်ၼွၼ်းပဵၼ်ယူႇ ၼင်ႇႁိုဝ်ၶဝ်ပေႃးလႆႈၸႂ်ႉသုင်း ႁႂ်ႈပဵၼ်ၽွၼ်းလီမိူၼ်ၵၼ်ၼၼ်ႉ ထုၵ်ႇလီပၼ်ၸိူင်ႉႁိုဝ်”
ယၵ်ႉတူၺ်းလုၵ်ႈႁဵၼ်းၶဝ် မိူၼ်တေၶဝ်ႈၸႂ်ဝႆႉလႄႈ
“ငၢႆႈယူႇၸွင်ႇၸႂ်ႈႁိုဝ်!”
“ငၢႆႈဢေႃႈ..ႁဝ်းပေႃးဝူၼ်ႉလႆႈၵမ်းလဵဝ်ယဝ်ႉၶႃႈ”
“ဢမ်ႇပႆႇလူဝ်ႇတွပ်ႇၵမ်းလဵဝ်ၵေႃႈလႆႈ ဝူၼ်ႉလီလီယဝ်ႉၸင်ႇတွပ်ႇ ယဝ်ႉၵေႃႈ.. ၶေႃႈတွပ်ႇၵေႃႉၼိုင်ႈလႄႈၵေႃႉၼိုင်ႈၼၼ်ႉ ဢမ်ႇလူဝ်ႇမိူၼ်ၵၼ်ၵေႃႈဢမ်ႇပဵၼ်ႁင် တွပ်ႇမႃးၸွမ်းၼင်ႇဢၼ်သူဝႃႈ မၼ်းၸိုဝ်ႈၸႂ်ႈမၢၼ်ႇမႅၼ်ႈ တွၼ်ႈတႃႇသူယဝ်ႉၼႆလႄႈ ပၼ်ၶၢဝ်းယၢမ်းႁႃႈမိၼိတ်ႉ”
ၶူးၵေႃႈဢွၵ်ႇႁွင်ႈၵႂႃႇပႅတ်ႈႁေ၊ လုၵ်ႈႁဵၼ်းဢၼ်ယူႇၼႂ်းႁွင်ႈၼၼ်ႉၵေႃႈ မိူၼ်ဝႃႈမၼ်းငၢႆႈၼႃႇလႄႈ ဢွၼ်ၵၼ်တွပ်ႇၵႂႃႇ သမ်ႉပေႃးယဝ်ႉၵၼ်မူတ်းယူႇ။
“ၶေႃႈတွပ်ႇငၢႆႈငၢႆႈဢွၼ်ႇၸိူင်ႉၼႆၵူၺ်း ပဵၼ်သင်လႄႈၶူးႁႂ်ႈႁဝ်းမႃးႁဵတ်းလႃႇ”
“ၵေႃႈၼၼ်ႉယဝ်ႉ! ၵူၺ်းၵႃႈလီယူႇမိူၼ်ၵၼ် တေဢမ်ႇလႆႈႁူဝ်ၶႆႈၸွမ်း ဢၼ်တွၵ်ႈတႃပေႃးလဵၼ်းပေႃးလၢႆးလူင်ၵႂႃႇမူတ်းၸိူင်ႉၼၼ်”
ၶမ်းလိုၼ်းဢၼ်ၼင်ႈႁိမ်းသႅင်ဢွင်ႇၼၼ်ႉၵေႃႈ ငွၵ်ႈတူၺ်းပပ်ႉပၢႆးၼပ်ႉၼၼ်ႉသေ
“သႅင်ဢွင်ႇပေႃးတၼ်းႁဵတ်းယဝ်ႉယဝ်ႉႁႃႉ ၵၢၼ်ႁိူၼ်းဢၼ်ၶူးပၼ်ၼၼ်ႉ”
“ဝႆးတေႉယဝ်ႉ..မီးလႂ်မီးလႂ် ပၼ်ႁဝ်းတူၺ်းဢိတ်ႉၼိုင်ႈလူႉ” ၼုမ်ႇႁွမ်လၢတ်ႈ။
“ယွၼ်းၵူးဢိတ်ႉလူႉ..” သႅင်လိုၼ်းလၢတ်ႈၸူး ၼႃႈဢမ်ႇဢၢႆသေဢိတ်းယဝ်ႉ။
“ႁဵတ်းႁင်းၵူၺ်းလေႃႇ! ပိူၼ်ႈၸႂ်ႉႁဵတ်း ပဵၼ်သင်လႄႈတေလႆႈမႃးၵူးႁင်းပိူၼ်ႈလႃႇ”
“ဢမ်ႇပၼ်ၵေႃႈဢမ်ႇပၼ်လေႃႇ တေလႃႇႁဵတ်းသင်လႃႇ” သႅင်လိုၼ်းၼၼ်ႉၵေႃႈ လၢတ်ႈယဝ်ႉသေ ၵႂႃႇငွၵ်ႈတူၺ်းတီႈၼူၼ်းမူဝ်ယူႇ။
“ႁူဝ်ၼႃႈၵေႃႈႁဵတ်းယဝ်ႉယဝ်ႉႁႃႉ!..”
“ဢိုမ်ႈ!” မိူဝ်ႈၼူၼ်းမူဝ်လၢတ်ႈၸိူင်ႉၼၼ်ၵေႃႈ သၢႆတႃသႅင်ဢွင်ႇၼၼ်ႉ ယၵ်ႉတူၺ်းၸူး ၼင်ႇမီးၸႂ်ၶီႈၵေႉၵမ်းလဵဝ်ယူႇ။
ပေႃးပဵၼ်ၼူၼ်းမူဝ်ၼႆတႄႉ ၶဝ်ၸိူဝ်းၼၼ်ႉ ပေႃးဢဝ်ပပ်ႉမၼ်းၵႂႃႇတူၺ်းယူႇယဝ်ႉ။ သမ်ႉဝႃႈၶႂ်ႈလၢတ်ႈတၢၼ်ႇႁိုဝ်ၵေႃႈ ၶဝ်ၸိူဝ်းၼၼ်ႉတႄႉႁိုဝ်တေသူၼ်ၸႂ်သင်၊ လၢတ်ႈလၢတ်ႈသမ်ႉပေႃးၶႂ်ႈၶၢၼ်ႉလၢတ်ႈၵူၺ်းယဝ်ႉ၊ တေဢမ်ႇပၼ်ၵေႃႈ ပဵၼ်ဢူၺ်းၵေႃႉၵၼ်လူး ၵူၼ်းမိုတ်ႈၵၼ်လၢတ်ႈၵၼ်လီလီမၼ်းယၢပ်ႇ ပေႃးလၢတ်ႈဢမ်ႇလီသမ်ႉ ၽိတ်းၵၼ်ႁေၼႆၼၼ်ႉၼႃႇ။
ထိုင်ၶၢဝ်းယၢမ်းယဝ်ႉ ၶူးၵေႃႈၶဝ်ႈႁွင်ႈမႃးသေ
“လႆႈၶေႃႈတွပ်ႇၵၼ်ၵူႈၵေႃႉယဝ်ႉၸွင်ႇၸႂ်ႈ”
“လႆႈယဝ်ႉၶႃႈ!” ၽွမ်ႉၵၼ်တွပ်ႇၵႂႃႇယူႇ။
“ႁဵတ်းႁိုဝ်လႆႈၵၼ်လႃႇ ၶူးဝူၼ်ႉဝႃႈ မၼ်းတေပဵၼ်ၶေႃႈထၢမ်ဢၼ်ယၢပ်ႇ တွၼ်ႈတႃႇသူယူႇၼႃ”
ယၵ်ႉတူၺ်းလုၵ်ႈႁဵၼ်းၼႂ်းႁွင်ႈၼၼ်ႉသေယဝ်ႉ ယုမ်ႉယူႇၸုတ်းၵုတ်း
“ၶႂ်ႈႁူႉတေႉယဝ်ႉ သူၶဝ်တေတွပ်ႇၸိူင်ႉႁိုဝ်ၵၼ်.. ၽႂ်တေတွပ်ႇဢွၼ်တၢင်း”
“ၶႃႈဢေႃႈ! ၶႃႈတေတွပ်ႇ!..” မိူၼ်တေပဵၼ်ၸၢႆးယွတ်ႈသႅင်ၼၼ်ႉယဝ်ႉၵေႃႉလၢတ်ႈ။
“လၢတ်ႈမႃးတူၺ်းလႄႈ”
“ယွၼ်ႉမီးငိုၼ်းသၢမ်ႁဵင်လႄႈ တေဝႆႉပၼ်ႁႂ်ႈၽဵင်ႇပဵင်းၵၼ်သေ တေလႆႈယူႇၵေႃႉႁဵင်ႁဵင်”
“မီးၽႂ်လႆႈၶေႃႈတွပ်ႇၸိူင်ႉၼႆၽွင်ႈ! ၸၢမ်းယုၵ်ႉမိုဝ်းတူၺ်းၽွင်ႈၶႃႈ”
လုၵ်ႈႁဵၼ်းၸမ်ၸမ်တင်းႁွင်ႈ ဢွၼ်ၵၼ်ယုၵ်ႉမိုဝ်း၊ ၵိုတ်းဢဝ်လၢႆၵေႃႉၵူၺ်းယူႇ၊ မိူၼ်ႁဝ်းၸိူဝ်းဢၼ်ၼင်ႈတၢင်းလင်ၼၼ်ႉ ဢမ်ႇမီးၽႂ်ယုၵ်ႉၸွမ်းႁေၵေႃႉၼၼ်ႉယဝ်ႉ။ ယၢမ်းၼၼ်ႉ ၶူးၵေႃႈ ထၢမ်ၵႂႃႇတီႈဢၢႆႈယီႈ−
“ၸၢႆးလူး! တွပ်ႇၸိူင်ႉႁိုဝ်ဝႆႉ”
“ဢမ်ႇလႆႈတွပ်ႇၶႃႈ”
“ႁၼ်ထိုင်ၸိူင်ႉႁိုဝ်ၼိူဝ်ၶေႃႈထၢမ်ၼႆႉလႃႇ”
မၼ်းၵေႃႈလူတူၺ်းၶေႃႈထၢမ်ၼၼ်ႉၵမ်ႉၼိုင်ႈသေယဝ်ႉ
“ၶႃႈဝႃႈ..မၼ်းတေပၼ်တီႈမႄႈၸဝ်ႈႁိူၼ်း”
“ယွၼ်ႉသင်လႃႇ”
“ၵွပ်ႈဝႃႈ ၵမ်ႈၼမ်ၵေႃႈ ပဵၼ်မႄႈၸဝ်ႈႁိူၼ်းၵူၺ်းၶႃႈလူးၵေႃႉယိပ်းငိုၼ်း ပေႃးၽူဝ်မၼ်းမီးငိုၼ်းၼႆ မေးမၼ်းပေႃးဢဝ်ဝႆႉမူတ်းယဝ်ႉ”
ၵူၼ်းၼႂ်းႁွင်ႈၶဝ်ၵေႃႈ ဢွၼ်ၵၼ်ၶူဝ်မၼ်းယူႇ။ ၶူးၵေႃႈ ႁႂ်ႈၶဝ်ၵိုတ်းၶူဝ်သေ သိုပ်ႇထၢမ်ထႅင်ႈတီႈဢၢႆႈဝိယူႇ
“ယဝ်ႉၸၢႆးလူး ”
“ဢမ်ႇၸမ်ပဵၼ်တေလႆႈပၼ်ၵူႈၵေႃႉၵေႃႈလႆႈၸွင်ႇၸႂ်ႈၶႃႈ”
“ပေႃးယုမ်ႇယမ်ဝႃႈ ဢၼ်တူဝ်ၸဝ်ႈၵဝ်ႇတွပ်ႇၼၼ်ႉ မၼ်းထုၵ်ႇမႅၼ်ႈယဝ်ႉၵေႃႈလႆႈယဝ်ႉ ၶေႃႈတွပ်ႇၼၼ်ႉ ယူႇတီႈသူၵူၺ်း ဢမ်ႇလႆႈမီးတီႈၶူး”
“တွပ်ႇၸိူင်ႉႁိုဝ်ၵေႃႈလႆႈၶႃႈၼေႃႈ”
ဢၢႆႈဝိၼၼ်ႉၵေႃႈ ၼင်ႇႁၢင်ႈမီးလွင်ႈမၼ်ႈၸႂ်မႃးသေ
“ၶႃႈတေပၼ်လုၵ်ႈဢွၼ်ႇ ယွၼ်ႉမၼ်းဢမ်ႇပႆႇမေႃႁႃငိုၼ်းႁင်းၵူၺ်း၊ ၶႃႈတေပၼ်ၵူၼ်းထဝ်ႈဢၼ်ၼွၼ်းပဵၼ်ယူႇ ယွၼ်ႉမၼ်းဢမ်ႇၸၢင်ႈႁဵတ်းၵၢၼ်ယဝ်ႉ မႄႈၸဝ်ႈႁိူၼ်း ႁဵတ်းၵၢၼ်လႆႈလီယူႇယဝ်ႉ ယွၼ်ႉၼၼ် ၶႃႈတေဢမ်ႇပၼ်တီႈမႄႈၸဝ်ႈႁိူၼ်း”
ၶူးၵေႃႈ ငွၵ်းႁူဝ်ၼႄ ၼင်ႇဝႃႈထုၵ်ႇမႅၼ်ႈယဝ်ႉၼႆလႄႈ ၸင်ႇသိုပ်ႇထၢမ်မႃးတီႈၶႃႈယူႇ။
တႄႇၸဵမ်မိူဝ်ႈၶူးတႅမ်ႈၼႄၼၼ်ႉ ၶႃႈယင်းဢမ်ႇတၼ်းလႆႈဢၢၼ်ႇၶေႃႈထၢမ်မၼ်းလီလီလႃႈ ၶႃႈၸင်ႇႁၼ်ၶေႃႈထၢမ်ၼၼ်ႉလီလီၵေႃႈ မိူဝ်ႈလုၵ်ႉၸုၵ်းႁေတူၺ်းၼၼ်ႉယဝ်ႉ။ မၼ်းၵေႃႈၶႂ်ႈလီသူၼ်ၸႂ်ဝႆႉလႄႈ ၶႃႈၸင်ႇလၢတ်ႈၵႂႃႇ
“ၶႃႈ! ယွၼ်းတွပ်ႇပဵၼ်ၵေႃႉလိုၼ်းသုတ်းၶႃႈ”
“လႆႈၵႂႃႈ!..ယဝ်ႉၸၢႆးဢွင်ႇလူး ႁၼ်ထိုင်ၸိူင်ႉႁိုဝ်”
“ငၢႆႈငၢႆႈၵူၺ်းၶႃႈ ဢမ်ႇႁူႉဝႃႈတေႁဵတ်းၸိူင်ႉႁိုဝ်ၵေႃႈ ဢမ်ႇပၼ်ႁေယဝ်ႉၼႃႇ”
ၶူးၸင်ႇသိုပ်ႇထၢမ်ထႅင်ႈ ၸၢႆးၶမ်းၶိူဝ်းယူႇ။
“ၶႃႈႁၼ်ထိုင်ဝႃႈ လုၵ်ႈဢွၼ်ႇဢမ်ႇလူဝ်ႇၸႂ်ႉငိုၼ်းၼမ်ၵႃႈႁိုဝ်၊ ၵူၼ်းပဵၼ်ဢၼ်ၼွၼ်းယူႇၼၼ်ႉၵေႃႈ ဢမ်ႇၸၢင်ႈၸႂ်ႉငိုၼ်း ၵူၺ်းၵႃႈ မေးၼၢင်းမၼ်းၼၼ်ႉ ပဵၼ်ၵူၼ်းဢၼ်တေလႆႈလုမ်းလႃးၼႃႈႁိူၼ်းလႄႈ ၸမ်ပဵၼ်လူဝ်ႇၸႂ်ႉငိုၼ်းလိူဝ်ပိူၼ်ႈယဝ်ႉ တႅၼ်းတီႈမၼ်းတေၽႄပၼ် ၵူၼ်းၼႂ်းႁိူၼ်းႁႂ်ႈၽဵင်ႇၽဵင်ႇၵၼ် ပၼ်ၵူၼ်းဢၼ်လူဝ်ႇတႄႉတႄႉၼၼ်ႉၸႂ်ႉတိုဝ်း ၼႆၸင်ႇတေပဵၼ်ၽွၼ်းလီယဝ်ႉ၊ လုၵ်ႈဢွၼ်ႇၼၼ်ႉၵေႃႈ ပၼ်တၢၼ်ႇၵႃႈၶဝ်ႈမုၼ်းၵူၺ်းၵေႃႈလႆႈ၊ တွၼ်ႈတႃႇၵူၼ်းပဵၼ်ၼၼ်ႉမၼ်းဢမ်ႇၸၢင်ႈၸႂ်ႉၸၢႆႇသင်ႁင်းၵူၺ်း၊ ပဵၼ်တိုၼ်းပဵၼ်မႄႈၸဝ်ႈႁိူၼ်းတူၺ်းထိုင်ယူႇယဝ်ႉ၊ ဢၼ်လိူဝ်ၵႃႈၶဝ်ႈမုၼ်းလုၵ်ႈဢွၼ်ႇၼၼ်ႉၵေႃႈ ပၼ်တီႈမႄႈၸဝ်ႈႁိူၼ်းဝႆႉၶႃႈဢေႃႈ ယုမ်ႇဝႃႈပေႃးငိုၼ်းၼၼ်ႉယူႇတီႈမႄႈၸဝ်ႈႁိူၼ်းၼႆ တေသုင်းၸႂ်ႉလႆႈမိူၼ်ၵၼ်သေဢမ်ႇၵႃး မီးၽွၼ်းလီတင်းသၢမ်ၵေႃႉယူႇ”
ယဝ်ႉၶူးသိုပ်ႇထၢမ်တီႈလုၵ်ႈႁဵၼ်းဢၼ်ပၼ်ၽဵင်ႇၽဵင်ႇၵၼ်ၼၼ်ႉသေ
“ယွၼ်ႉသင်လႄႈၵူႈၵေႃႉတေလႆႈၸႅၵ်ႇပၼ်ၽဵင်ႇၽဵင်ႇၵၼ်လႃႇ ၸွႆႈလၢတ်ႈၼႄလွင်ႈတၢင်းမၼ်းတူၺ်းလူ”
“ပေႃးပၼ်ၵေႃႉၼမ်ၵေႃႉၵေႇၵေႃႈ ၸၢင်ႈမီးပၼ်ႁႃၽိတ်းမေႃးၵၼ်မႃးလႆႈယဝ်ႉ”
“ပဵၼ်ၵူၼ်းႁိူၼ်းလဵဝ်ၵၼ် မီးႁင်ၵေႃႈၽႄမႅင်ႇၵၼ်ႁႂ်ႈၽဵင်ႇပဵင်းၵၼ်ၼၼ်ႉ ၸင်ႇတေလီၶႃႈၼႃႇ”
“ဢမ်ႇထုၵ်ႇလီတူၺ်းၼႃႈလဵၵ်ႉၼႃႈယႂ်ႇႁေ ၽႄမႅင်ႇပၼ်ၵၼ်ၽဵင်ႇၽဵင်ႇၼၼ်ႉၸင်ႇတေလီယဝ်ႉ”
ၵေႃႉၼိုင်ႈတွပ်ႇယဝ်ႉထႅင်ႈၵေႃႉၼိုင်ႈၵေႃႈတွပ်ႇ ၵူၺ်းၶေႃႈတွပ်ႇၶဝ်ၼၼ်ႉၶႂ်ႈငၢႆးငၢႆးၵၼ်ဝႆႉၵူၺ်း။ ၶဝ်တွပ်ႇႁင်ၵႂႃႇ ၶႃႈဢမ်ႇတၼ်းႁူႉသင် ၵမ်ႉၵူၺ်း ပေႃးထိုင်ၵမ်းၶႃႈယဝ်ႉ။ ဢၼ်ၶႃႈသူၼ်ၸႂ်ႁေပိူၼ်ႈၼၼ်ႉတႄႉ ဢမ်ႇၸႂ်ႈသင်ၼင်ႇၵဝ်ႇ ၼႃႇရီႇၼႂ်းႁွင်ႈၼၼ်ႉၵူၺ်း မိူဝ်ႈထိုင်ၵမ်းၶႃႈၼၼ်ႉ ၶၢဝ်းယၢမ်းလိုဝ်ႈထိုင်မႃးယဝ်ႉလႄႈ ၶူးၵေႃႈသမ်ႉဢဝ်ၶၢဝ်းယၢမ်းလိူဝ်မႃး ၼိုင်ႈမိၼိတ်ႉပၢႆ သၢဝ်းႁႃႈသႅၵ်ႉၵၢၼ်ႉယဝ်ႉလူး။
“ၶႂၢင်ႉပၼ်ဢိတ်ႉၼိုင်ႈၶႃႈၶူး ထိုင်ၶၢဝ်းယၢမ်းလူင်းလိုဝ်ႈယဝ်ႉဢေႃႈ.. ၶူးဢဝ်လိူဝ်မႃးၼိုင်ႈမိၼိတ်ႉပၢႆသၢဝ်းႁႃႈသႅၵ်ႉၵၢၼ်ႉယဝ်ႉ”
ၶူးၵေႃႈတူၺ်းၼႃႈၶႃႈႁေ ယုမ်ႉဢွၵ်ႇမႃးယဝ်ႉ
“ပေႃးၼၼ်ၵေႃႈ..မွၵ်ႈၼႆႉၵူၺ်းယဝ်ႉၶႃႈၵူႈၵေႃႉ…လူင်းလိုဝ်ႈၵၼ်လႆႈယဝ်ႉ”
ဝၢႆးသေလူင်းႁူင်းႁဵၼ်းယဝ်ႉၼၼ်ႉ ၶႃႈတႄႉလႆႈၸုၵ်းပႂ်ႉတူၺ်းပိူၼ်ႈမိူဝ်းၵူၺ်း ဢမ်ႇပႆႇၸၢင်ႈမိူဝ်း လႆႈဝၢင်းထူင်သေ ပႃးတၢင်းသဵမ်ၵႂႃႇၸွၼ်ႉမၢႆယိူဝ်ႈ ယူႇတၢင်းၶၢင်ႈႁူင်းႁဵၼ်းၼၼ်ႉယူႇ။ ယိူဝ်ႈၸိူဝ်းၼၼ်ႉ ၸွၼ်ႉၵႃႈႁိုဝ်ၵေႃႈ ပေႃးဢမ်ႇလိူမ်ႈၵႂႃႇသေဢိတ်း။
“ပဵၼ်သင်လႄႈဢၢႆႈၼၼ်ႉ ၽႂ်ဢမ်ႇဝႃႈႁင်ႁင်းမၼ်းႁေပွၵ်ႈလႃႇ ၽိတ်းႁူဝ်ပိူၼ်ႈ၊ ပေႉၵိၼ်ပိူၼ်ႈၸိူဝ်းၼႆႉၵေႃႈ ဢမ်ႇႁၼ်ၺႃးတၢမ်ႇႁေပွၵ်ႈ”
“ပေႃးမီးငိုၼ်းမီးဢႃႇၼႃႇၵေႃႈႁဵတ်းလႆႈၵူႈလွင်ႈၼၼ်ႉယဝ်ႉ.. ၵူၼ်းဢမ်ႇမီးသင်ၵေႃႈ ပဵၼ်ၵူၼ်းၵေႃႉၶၢမ်ႇၼၼ်ႉၼႃႇ”
“မၼ်းပေႉပဵၼ်ၽႂ်လႃႇ! ၽႂ်ပေႃးဢမ်ႇႁဵတ်းသင်လႆႈၸိူင်ႉၼၼ်”
“ၶႂ်ႈႁူႉႁႃႉ” သွပ်ႉသႅပ်ႉလၢတ်ႈလွႆးလွႆးႁိမ်းႁူၶႃႈၵႂႃႇ “ဢူႈၶဝ်ပဵၼ်ၵွၼ်းဝဵင်းဢၼ်ႁဝ်းယူႇၼႆႉၼႃႇ”
“လဵင်ႉလုၵ်ႈမႃးပဵၼ်ၵူၼ်းၸိူင်ႉၼႆလႆႈၸိူင်ႉႁိုဝ်လႃႇ ပဵၼ်ထိုင်ၵွၼ်းဝဵင်း ထုၵ်ႇလီႁဵတ်းၸွမ်းလွင်ႈထုၵ်ႇမႅၼ်ႈဢမ်ႇၸႂ်ႈႁႃႉ၊ ပေႃးဝႃႈငိုၼ်းလႄႈဢႃႇၼႃႇ ပဵၼ်ဢၼ်တႅပ်းတတ်းၵူႈလွင်ႈ သမ်ႉတေမီးပိူင်မႃးႁဵတ်းသင်လႃႇ”
“တႃႇမႃးတဵၵ်းတဵင်ၵူၼ်းဢၼ်ဢမ်ႇမီးသင်ၼၼ်ႉၼႃႇ”
“ဝႆႉၵႃႈၶၼ်ၵူၼ်းမီးဢႃႇၼႃႇ ႁၼ်ၵူၼ်းမီးငိုၼ်းပဵၼ်ယႂ်ႇ ပိူင် မီးဝႆႉတွၼ်ႈတႃႇၵူၼ်းႁဵတ်းသင်ဢမ်ႇလႆႈ ဝၢၼ်ႈမိူင်းၼႆႉ လီယူႇတေႉတေႉယဝ်ႉ မီးၵူၼ်းဢမ်ႇလီဢုပ်ႉပိူင်ႇ ႁဝ်းသမ်ႉတေပဵၼ်ၵူၼ်းလီႁဵတ်းသင်လႃႇ ဢမ်ႇဝႃႈႁႃႉ”
“မီးႁူင်းႁဵၼ်းပၼ်ၵူၼ်းၸိူင်ႉၼင်ႇႁဝ်းယူႇၵေႃႈ ၵၢမ်ႇလီၼႃႇယဝ်ႉ ၶတ်းၸႂ်မၢႆယိူဝ်ႈၵႂႃႇလႄႈ”
“ၵူၼ်းၸိူင်ႉၼၼ် ဢမ်ႇမီးသင်တေဢဝ်ပေႉၶဝ်လႆႈႁႃႉ”
“ပေႃးႁၵ်ႉတူဝ်ႁၵ်ႉၸႂ်ၵေႃႈ ဢမ်ႇလူဝ်ႇၵႂႃႇသုၵ်ႉယုင်ႈၼၼ်ႉလီလိူဝ်ပိူၼ်ႈယဝ်ႉ”
မိူၼ်ဝႃႈႁႃးသွင်ၵေႃႉဢၢႆႈဝိၼၼ်ႉၵေႃႈ တေၶဝ်ႈၵၼ်မႃးယူႇယဝ်ႉ။
မိူဝ်ႈဢၼ်ပၼ်ႇလူတ်ႉထိပ်ႇမိူဝ်းၵႂႃႇလွႆးလွႆးယူႇၼၼ်ႉ ယူႇယူႇၵေႃႈ မီးၵူၼ်းလႅၼ်ႈၽႅတ်ႈမႃးႁိမ်းၸမ်သေ သဵင်ၼၼ်ႉမေႃးႁိမ်းႁူမႃးယဝ်ႉ
“ဢေးၼွင်ႉ!” တင်းသဵင်ၼၼ်ႉႁေ တင်းဢၼ်မၼ်းလႅၼ်ႈမႃးႁိမ်းၼၼ်ႉ ႁဵတ်းႁႂ်ႈၶႃႈတူၵ်းၸႂ်လူင်ၵႂႃႇ၊ ထိင်းလူတ်ႉထိပ်ႇပေႃးဢမ်ႇလႆႈယဝ်ႉလႄႈ ဢဝ်ၶႃႈသမ်ႉပေႃးလူမ်ႉယူႇ။ ယၢမ်းၼၼ်ႉ ၶူးၽိဝ်ၾႃႉၵေႃႈ ယိုၼ်းမိုဝ်း ၸၼ်ၶႃႈလုၵ်ႉၶိုၼ်ႈသေ ၽွင်းၼၼ်ႉ ဢမ်ႇႁူႉဝႃႈလႅတ်ႇမႆႈႁိုဝ် တူၵ်းၸႂ်ႁိုဝ် ၼင်ႇႁၢင်ႈထူၺ်ႈၸႂ်ၵပ်ႉဝႃႈၵပ်ႉယဝ်ႉဝႃႈ ႁူဝ်ၸႂ်ၼၼ်ႉၵေႃႈတွတ်ႇႁႅင်းဝႃႈႁႅင်း ၶႃႈမီးလူမ်းႁူဝ်ၸႂ်ယူႇၸွင်ႇၸႂ်ႈ။
“ၶီႇလူတ်ႉထိပ်ႇၸိူင်ႉႁိုဝ်လႃႇ တၢင်းၵေႃႈလီယူႇ”
“ၶူးတေမႃးႁွင်ႉၶႃႈႁဵတ်းသင်!..”
“ၶႅၼ်းယူႇၵူၺ်း ၶႅၼ်းသေလႅၼ်ႈပၢႆႈယူႇ” ယုမ်ႉၸုတ်းၵုတ်းသေ ယၵ်ႉတူၺ်းၶႃႈယူႇယဝ်ႉ။
လိူၵ်ႈလိူၵ်ႈ လူတ်ႉထိပ်ႇၶႃႈၼၼ်ႉသမ်ႉ သၢႆလႅၼ်ႈမၼ်းလုတ်ႈထႅင်ႈႁေ ဢမ်ႇၸၢင်ႈၶီႇမိူဝ်းယဝ်ႉၼႆၵေႃႈ ၵႃႈလႆႈထူဝ်းမိူဝ်းၵူၺ်းယဝ်ႉလေႃႇ။ ၽိူဝ်လိူဝ်လႆႈမိူဝ်းႁိူၼ်းၶမ်ႈယဝ်ႉ သမ်ႉလႆႈပႆမိူဝ်းထႅင်ႈႁေ တေႃႇႁွတ်ႈႁိူၼ်းၵေႃႈ ၵၢင်ဝၼ်းပေႃးၸမ်ၸူမ်လွႆယဝ်ႉယူဝ်ႉ။ သင်ဢမ်ႇမီးလူတ်ႉထိပ်ႇတႄႉ လႅၼ်ႈမိူဝ်းၵမ်ႉၵေႃႈႁွတ်ႈယဝ်ႉ ၵွပ်ႈလူတ်ႉထိပ်ႇၼႆႉၼၼ်ႉၼႃႇ။ မၢင်ၵမ်းမႃးၵေႃႈ ၶႂ်ႈဢဝ်ဝႆႉတီႈၵၢင်တၢင်းၼၼ်ႉႁေ လႅၼ်ႈမိူဝ်းၵႂႃႇပႅတ်ႈႁေယဝ်ႉဝႃႈ ၶႃႈၼၼ်ႉၵေႃႈ ၶတ်းၸႂ်ပႆဝႆးဝႆးႁႂ်ႈပူၼ်ႉ ၶူးၽိဝ်ၾႃႉၵႂႃႇယူႇ။ ဢမ်ႇႁူႉဝႃႈၶႃႈပဵၼ်ႁင် ၵူၺ်းၵႃႈ ၶႂ်ႈႁႂ်ႈပူၼ်ႉၼႃႈပူၼ်ႉတႃၶူးၵႂႃႇၵူၺ်းၼၼ်ႉယဝ်ႉ။
“ၵူဝ်ႁင်လႃႇ! ပႆႁိပ်ႈပႆၼႅတ်ႈၸိူင်ႉၼၼ် ပၢႆႈၼႃႈၵၼ်ယူႇႁႃႉ!”
ၶႃႈၵေႃႈမိုင်ၵိုတ်းၵႂႃႇႁေ ဝိၼ်ႇဝၢႆႇတူၺ်းၸူးၶဝ်ယဝ်ႉ ၶဝ်ႁူႉဝႃႈၶႃႈဝူၼ်ႉသင်ယူႇၸိူင်ႉၼၼ်ႁႃႉ။
တွၼ်ႈပႅတ်ႇသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈၵဝ်ႈၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
