ႁဵတ်းၽိတ်းၵေႃႈမႄးမႂ်ႇလႆႈယူႇလူး လွင်ႈၽိတ်းၵႂႃႇယဝ်ႉၼၼ်ႉဢမ်ႇၸႂ်ႈတီႈသုတ်းသဵင်ႈ ၵူၺ်းမၼ်းပဵၼ်သိၵ်ႈၶူဝ်လႆတႃႇယၢင်ႈၶိုၼ်ႈႁႂ်ႈသုင်ထႅင်ႈ၊ မိူဝ်ႈႁဵတ်းၽိတ်းၼၼ်ႉၵေႃႈ ပဵၼ်တွၼ်ႈသွၼ်ဢၼ်မႂ်ႇ သႂ်ႇဝႆႉၼႂ်းထူင်ၵႂႃႇ တႃႇသိုပ်ႇဢွၵ်ႇၶၢဝ်းတၢင်းထႅင်ႈ။
ဢမ်ႇဢဝ်လွင်ႈဢၼ်ႁဵတ်းၽိတ်းၵႂႃႇၼၼ်ႉမႃးတႅင်းႁူဝ်ၸႂ်ၶိုၼ်း ၵူၺ်းၵႃႈ လႅၵ်ႈလၢႆႈႁႂ်ႈမၼ်းပဵၼ်ၾႆးပိူင်းတႃႇႁႂ်ႈပေႃးၶတ်းၸႂ်ၵႂႃႇထႅင်ႈ မိူၼ်ၼင်ႇၵူၼ်းလႅၼ်ႈလူမ်ႉသေ ၶိုၼ်းလုၵ်ႉၵႂႃႇတႃႇသိုပ်ႇထိုင်ပဝ်ႉမၢႆထႅင်ႈၼၼ်ႉၼႃႇ။
သမ်ႉဝႃႈဝၢင်းၽႅၼ်လီတၢၼ်ႇႁိုဝ်ၵေႃႈယဝ်ႉ မၢင်လွင်ႈမၼ်းၵေႃႈယူႇၼွၵ်ႈၼိူဝ်ဢၼ်ႁဝ်းတေႁဵတ်းလႆႈ ဢၼ်ႁဵတ်းလႆႈၵေႃႈ ယွမ်းႁပ်ႉသေလႄႈလႅၵ်ႈလၢႆႈယူႇၸွမ်းမၼ်းၵႂႃႇ။
ဢမ်ႇဢဝ်တူဝ်ၵဝ်ႇတႅၵ်ႈၼိူင်းတင်းၽႂ် ယွၼ်ႉလွင်ႈတဵမ်ထူၼ်ႈၵူႈလွင်ႈၼၼ်ႉဢမ်ႇမီးယူႇတေႉ ၵူႈၵေႃႉတိုၼ်းမီးတီႈမီးတၢင်းၶွင်မၼ်း လိူဝ်သေဝႃႈတေၸႂ်ႉမၼ်းၸိူင်ႉႁိုဝ်ၼၼ်ႉၵူၺ်း။
ယုမ်ႉပၼ်လွင်ႈဢၼ်ႁဵတ်းၽိတ်းၵႂႃႇၼၼ်ႉသေ ယွၼ်ႉတၢင်းယုမ်ႉၼၼ်ႉႁဵတ်းႁႂ်ႈႁူဝ်ၸႂ်မဝ်မႃးလႄႈ ၸွႆႈပူတ်းပွတ်ႇလွင်ႈသုၵ်ႉၸႂ်ဢၼ်ၵဵပ်းဝႆႉၼၼ်ႉလႆႈယဝ်ႉ။
ၽႂ်ဢမ်ႇတႅပ်းတတ်းၵႃႈၶၼ်တူဝ်ၵဝ်ႇယွၼ်ႉႁဵတ်းၽိတ်းပွၵ်ႈလဵဝ် ၵူၺ်းၵႃႈ တႅပ်းတတ်းတီႈလွင်ႈၶတ်းၸႂ်ၵမ်းယဝ်ႉၵမ်း ဢၼ်ၼႄႁႂ်ႈႁၼ်ဝႃႈ ဢမ်ႇယၢမ်ႈယွမ်းၵၢၼ်ႉ။
မိူဝ်ႈၼႆႉႁဵတ်းၽိတ်း ဝၼ်းၼိုင်ႈတေၸၢင်ႈပဵၼ်လွင်ႈလီၶႂ်ႈၶူဝ်ၵႂႃႇၵူၺ်း မၢင်ပွၵ်ႈယင်းပဵၼ်ႁႅင်းၸႂ်ႁႂ်ႈၽႂ်သေၵေႃႉၵေႃႉလႆႈလိူၵ်ႈလူးၵွၼ်ႇ။
ဢမ်ႇၵူဝ်တေတႄႇမႂ်ႇ ယွၼ်ႉၵၢၼ်တႄႇမႂ်ႇၼၼ်ႉဢမ်ႇလႆႈတႄႇတီႈသုၼ် ၵူၺ်းၵႃႈ တႄႇတီႈတူဝ်ထူပ်းလႄႈတွၼ်ႈသွၼ်ဢၼ်မီးၼမ်မႃးၼၼ်ႉ။
တႅၼ်းတီႈတေထၢမ်ဝႃႈ ႁဝ်းႁဵတ်းႁိုဝ်သေႁဵတ်းၽိတ်း ႁႂ်ႈထၢမ်ဝႃႈ ႁဝ်းတေႁဵတ်းႁႂ်ႈမၼ်းလီမႃးလႆႈၸိူင်ႉႁိုဝ် မိူဝ်ႈလႅၵ်ႈလၢႆႈၶေႃႈထၢမ် သဵၼ်ႈတၢင်းၸၢတ်ႈပၢၼ်ၵေႃႈတေလႅၵ်ႈလၢႆႈၸွမ်း။
ဢမ်ႇၸူမ်ယူႇၸွမ်းလွင်ႈဝူၼ်ႉၼမ် ယွၼ်ႉႁူႉဝႃႈမၼ်းဢမ်ႇဢမ်ႇလႆႈပိူင်ႈသင်တင်း တဝ်သၢႆးႁႂ်ႈၼမ်ႉၶုၼ်ႇ တီႈတေႉၼမ်ႉမၼ်းၵေႃႈသႂ်လႆႈႁင်းမၼ်းယူႇယဝ်ႉ သင်ပွႆႇႁႂ်ႈမၼ်းယူႇႁင်းၵူၺ်း။
လၢတ်ႈၼႄလွင်ႈဢၼ်ႁဝ်းႁဵတ်းၽိတ်းၵႂႃႇၼၼ်ႉပၼ်ပိူၼ်ႈထွမ်ႇၽွင်ႈလႄႈ မၼ်းတေႁဵတ်းႁႂ်ႈၸႂ်မဝ်မႃးလႄႈ တေႁဵတ်းႁႂ်ႈႁဝ်းႁၼ်ဝႃႈဢမ်ႇလႆႈတေႃႇသူႈယူႇႁင်းၵူၺ်း။
ဢမ်ႇၼႄးဝူတ်ႈၼႄးၵၢမ်ႇ လွင်ႈဢၼ်ႁဵတ်းၽိတ်းၵႂႃႇၼၼ်ႉ မၼ်းၸၢင်ႈၽိူမ်ႉထႅမ်ၼမ်ႉၵတ်ႉၵႂႃႇလႆႈထႅင်ႈလႄႈ ႁဵတ်းႁႂ်ႈၸဝ်ႈၵဝ်ႇမီးၵႃႈၶၼ်မႃးထႅင်ႈ။
တူၺ်းလွင်ႈဢၼ်ၽိတ်းၵႂႃႇၼၼ်ႉပဵၼ်ၵၢၼ်ၸၢမ်း မိူဝ်ႈဢမ်ႇဢွင်ႇမၢၼ်ပွၵ်ႈဢွၼ်တၢင်းၵေႃႈ ၸၢမ်းထႅင်ႈပွၵ်ႈသွင်ပွၵ်ႈသၢမ် တေႃႇထိုင်မၼ်းပေႃးႁဵတ်းပဵၼ်မႃး။
ယူႇၸွမ်းမိူဝ်ႈၼႆႉ ဢမ်ႇႁွင်ႉႁႃဝၼ်းမိူဝ်ႈဝႃးဢၼ်ပူၼ်ႉမႃး ဢမ်ႇၸွမ်းႁႃဝၼ်းမိူဝ်ႈၽုၵ်ႈဢၼ်ဢမ်ႇပႆႇထိုင်။
ပိၼ်ႇ-ငဝ်မွင်မိုတ်းမူဝ်း
