လႅင်းမိူင်းလႆႈထုၵ်ႇၵုမ်းၶင်တူဝ်ဝႆႉ ဢမ်ႇပၼ်ၵႂႃႇတၢင်းလႂ်ၼႆယူႇ၊ မိူၼ်ႁၢင်ႈၼႂ်းၸႂ်ဢမ်ႇပေႃးလီ လႅပ်ႈတေမီးလွင်ႈဢမ်ႇလီသေလွင်ႈလွင်ႈဝႆႉလႄႈ လၵ်ႉႁႂ်ႈၵူၼ်းပႂ်ႉယၢမ်းမၼ်းၸွႆႈၵပ်းသိုပ်ႇတူၺ်းပၼ်တီႈ ၸၢႆးၶိူဝ်းၶဝ်သေ မိူဝ်ႈတိုၵ်ႉဢုပ်ႇတင်းၸၢႆးၶိူဝ်းယူႇၼၼ်ႉ ငိၼ်းသဵင်ႁွင်ႉမေႃးမႃး
“ႁၼ်ၶမ်းႁွမ်ယဝ်ႉႁႃႉ!!” သဵင်လင်ယူႇတၢၼ်ႇတၢၼ်ႇ တွင်းလႆႈဝႃႈပဵၼ်သဵင်ယိင်းသႅင်
“ၶမ်းႁွမ်ပဵၼ်ႁင်လႃႇ!!…”
“မၼ်းႁၢႆတူဝ်ၵႂႃႇလႆႈ သွင်ၶိုၼ်းယဝ်ႉ”
လႅင်းမိူင်းၼၼ်ႉတႄႉ ၸႂ်ဢမ်ႇၼိမ်သဝ်းလႆႈ သမ်ႉပေႃးလိူတ်ႇႁွၼ်ႉမႆႈလူင်မႃးၵမ်းလဵဝ် မၼ်းၶတ်းၸႂ်ဢီးၽၢင်ႈၽၵ်းတူဢွၵ်ႇၵႂႃႇယဝ်ႉ၊ ၵွပ်ႈပိူဝ်ႈမၼ်းဢမ်ႇၸႂ်ႈၶွၵ်ႈလႄႈ ပဵၼ်ႁွင်ႈၵဵပ်းၶူဝ်းၶွင်ဢွၼ်ႇၼၼ်ႉၵူၺ်း။ ဢွၵ်ႇၽၵ်းတူယဝ်ႉ မီးၵူၼ်းမႃးၺွပ်းဝႆႉပဵၼ်လၢႆလၢႆၵေႃႉသေ မတ်ႉမိုဝ်းမၼ်းဝႆႉလႄႈ ငွပ်းၶဝ်ႈၵႂႃႇၶိုၼ်းယူႇ။ မၼ်းၼၼ်ႉၵေႃႈ ၼင်ႈၵူမ်ႈၼႃႈလေႃးပႃးလွင်ႈၶီမွင် ႁူမ်ႈပႃးတၢင်းဝူၼ်ႉဢၼ်မီးၶမ်းႁွမ်ၼၼ်ႉ..
“ၶႂၢင်းပၼ်ႁဝ်း……ႁဝ်းယွမ်းၼွမ်းယူႇ…ဢမ်ႇလႆႈမီးယူႇႁိမ်းၸမ်သူ…မိူဝ်ႈသူထူပ်းတၢင်းယၢပ်ႇ…”
ၼင်ႈငဝ်ဢဝ်ၼမ်ႉတႃလႆယွႆႉယွတ်ႇၵႅမ်ႈမႃးယဝ်ႉ။
ၾူၼ်တူၵ်းႁႃႇယႂ်ႇႁႃလူင် လေႃးပႃးသဵင်ၾႃႉလင်တွင်ႈမေႃးႁႅင်း ၾႃႉမႅပ်ႈထွင်ႇလႅင်းၶဝ်ႈၼႂ်းႁိူၼ်း ဢဝ်ၶမ်းႁွမ်သမ်ႉပေႃးပၢႆႈၶူတ်းၸွၵ်ႉသေ ၼင်ႈသၼ်ႇတိုၼ်းတိုၼ်းယူႇၼႂ်းႁိူၼ်းၼၼ်ႉ ဢမ်ႇႁတ်းတၵ်းသဵင်သင်သေဢိတ်းယဝ်ႉ။
ယၢမ်းၵၢင်ၼႂ် ၶမ်းႁွမ်တိုၼ်ႇမႃးၶိုၼ်းၼႆၵေႃႈ ၵႂႃႇၶူတ်းၵွင်ယူႇၸွမ်းထူင်ၶဝ်ႈသၢၼ်ပိူၼ်ႈၼၼ်ႉယဝ်ႉၼႃႇ။ မၼ်းၵႂႃႇၸူးၸဝ်ႈႁိူၼ်းယူႇၼႂ်းသွင်ႇၾႆး ၸဝ်ႈႁိူၼ်းႁၼ်မၼ်းယဝ်ႉၵေႃႈ
“မႄႈပႃႈဢၢင်ႈႁွင်ႉၼၢင်းယူႇ..ႁၼ်တိုၵ်ႉၼွၼ်းဝၢၼ်ယူႇလႄႈဢမ်ႇလႆႈႁွင်ႉ”
“မႄႈပႃႈတူၵ်းၸႂ်ၵႂႃႇယဝ်ႉၶႃႈယူဝ်ႉ..ၵၼ်ႇတေႃးၶႃႈၼႃႈ..ၶႃႈၵႆႉၼွၼ်းၵႂင်ၸိူင်ႉၼႆၶႃႈဢေႃႈ”
“ၼၢင်းၼွၼ်းၾၼ်ႁၢႆႉပႃးယူႇႁႃႉ!..”
“ၵႆႉၼွၼ်းၾၼ်ႁၼ်လႆႈပၢႆႈတိၵ်းတိၵ်းၶႃႈဢေႃႈ..”
“ဢိူဝ်ႈ…လီႁွင်ႉၾၼ်ဢိူဝ်ႈၼၼ်ႉပႃႈဝႃႈ…”
ၶမ်းႁွမ်ယဵၼ်ၵႂႃႇၵႅပ်ႉၼိုင်ႈယဝ်ႉ ၸင်ႇၶိုၼ်းတွပ်ႇၸူး “ပေႃးႁွတ်ႈဝၢၼ်ႈၶိုၼ်း…ၸွင်ႇၵွႆႈမိူဝ်းႁႂ်ႈပိူၼ်ႈႁွင်ႉပၼ်ၶႃႈ..ပေႃးၼႆတႄႉ..”
“လီဢိူဝ်ႈလီဢိူဝ်ႈ..”
ၵိၼ်ၶဝ်ႈၵိၼ်သင်ယဝ်ႉ ၵူၼ်းတီႈႁိူၼ်းၼၼ်ႉၵေႃႈ ဢဝ်တင်းလူတ်ႉၶိူင်ႈသေ မိူဝ်းသူင်ႇၶမ်းႁွမ်တေႃႇပေႃးႁွတ်ႈထိုင်တီႈယူႇ။
ယိင်းသႅင်ၶဝ်ႁၼ်ၶမ်းႁွမ်ပွၵ်ႈမႃးႁိူၼ်းၶိုၼ်းယဝ်ႉၼႆၵေႃႈ ၸူမ်းၸူမ်းပေႃးႁႆႈယဝ်ႉ၊ ၶမ်းမိူင်းၼၼ်ႉတႄႉတင်းၵွတ်ႇတင်းႁႆႈ ၶမ်းႁွမ်သမ်ႉပေႃးဢမ်ႇၸၢင်ႈထူၺ်ႈၸႂ်လႆႈလူးၵွၼ်ႇ။
ၶမ်းႁွမ်ပွၵ်ႈမႃးၶိုၼ်း လႆႈႁၼ်ၵူၼ်းသိုၵ်းလႅင်းမိူင်းၶဝ်ၵူႈၵေႃႉယဝ်ႉ ၵူၺ်းၵႃႈ ဢမ်ႇႁၼ်ၺႃးလႅင်းမိူင်းသေဢိတ်းလႄႈ
“ႁူဝ်ၼႃႈသူၶဝ်လူး ၵႂႃႇလႂ်ယဝ်ႉလႃႇ..”
“ၶဝ်မိူဝ်းႁဵတ်းၵၢၼ်တီႈဝဵင်း ၸဵမ်မိူဝ်ႈဝၼ်းဢၼ်ႁဝ်းမႃးၸွႆႈသူၼၼ်ႉယဝ်ႉဝႃႈ” ၸၢႆးၶိူဝ်းလၢတ်ႈ။
ၶမ်းႁွမ်ဝူၼ်ႉၶိုၼ်းၶေႃႈၵႂၢမ်းဢၼ်လႅင်းမိူင်းယၢမ်ႈလၢတ်ႈတီႈမၼ်းဝႆႉ“ႁဝ်းႁူႉ..ႁဝ်းပဵၼ်သိုၵ်း..ႁဝ်းၵေႃႈဢမ်ႇႁဵတ်းသင်လႆႈ…တေႃႈၼင်ႇၶႂ်ႈယူႇႁိမ်းၶၢင်ႈသူၵူၺ်းၵေႃႈ..ႁဵတ်းဢမ်ႇလႆႈ..ၵူၺ်းၵႃႈ…ႁႂ်ႈသူႁူႉဝႆႉဝႃႈ..ၼႂ်းႁူဝ်ၸႂ်ႁဝ်းၼၼ်ႉမီးသူယူႇတႃႇသေႇဢိူဝ်ႈၼႃႈ…” မိူၼ်တေပွင်ႇၸႂ်ယဝ်ႉလႄႈ။
“ၸိူင်ႉၼၼ်ႁႃႉ…” ဢဝ်သီၼႃႈမၼ်းမွင်သေ ယဵၼ်ၵႂႃႇပႅတ်ႈယူႇ။
ၸူဝ်ႈၽွင်းၶမ်းႁွမ်ဢမ်ႇယူႇ ၵူၼ်းသိုၵ်းတီႈၼိူဝ်တပ်ႉၵေႃႈ ဢွၼ်ၵၼ်လူင်းမႃးၸွႆႈ သွၼ်လိၵ်ႈပၼ်တီႈလုၵ်ႈဢွၼ်ႇႁဵၼ်းၶဝ်ၵႂႃႇ၊ သမ်ႉဝႃႈၶမ်းႁွမ်မႃးၶိုၼ်းယဝ်ႉၵေႃႈ ယင်းတိုၵ်ႉဢွၼ်ၵၼ်မႃးၸွႆႈယူႇ။
ၶမ်းႁွမ်ၵေႃႈ မိူဝ်ႈလႆႈႁၼ်ၶဝ်ၸိူဝ်းၼၼ်ႉသေ ဢမ်ႇလႆႈႁၼ်လႅင်းမိူင်းၼႆ ၼႂ်းၸႂ်ၼႆႉၸိုင်ပေႉမႃးငိၼ်းငႅဝ်ဝႆႉၸိူင်ႉႁိုဝ်ဢမ်ႇႁူႉယဝ်ႉ ဢၼ်ႁူႉလီလိူဝ်ပိူၼ်ႈတႄႉ ၸႂ်ထိုင်ၶဝ်ၼႃႇၼၼ်ႉယဝ်ႉ။ ၶမ်းႁွမ်လၢတ်ႈၵႂႃႇတီႈ ၸၢႆးၶိူဝ်း ဢၼ်ဢွၼ်လုၵ်ႈၼွင်ႉမၼ်းမႃးၸွႆႈၼၼ်ႉ
“ႁဝ်းမႃးၶိုၼ်းယဝ်ႉ..သူၶဝ်ၵေႃႈ..ပွၵ်ႈမိူဝ်းႁဵတ်းၵၢၼ်ၶိုၼ်းလႆႈယဝ်ႉၼႃႈ..မႃးယူႇၵူႈဝၼ်း..တၢၼ်ႇၵူၼ်းဢမ်ႇမီးၵၢၼ်ယဝ်ႉ…လၢႆလၢႆၵၢၼ်သူၼႆႉၼမ်ၼႃႇဢမ်ႇႁိုဝ်လႃႇ”
“ၼႆႉယဝ်ႉၵၢၼ်ႁဝ်းၶႃႈ…ၸွႆႈၵၢၼ်မေႃသွၼ်ႁႂ်ႈမဝ်လူင်း…”
“ၵႂၢမ်းသင်ႇၽႂ်လႃႇ…လႅင်းမိူင်းႁႃႉ…”
“ဢမ်ႇၸႂ်ႈၶႃႈ…ႁူဝ်ၼႃႈႁဝ်းဢမ်ႇလႆႈသင်ႇဝႆႉ…ႁဝ်းၶႂ်ႈၸွႆႈၵူၺ်းဢေႃႈ..ႁဝ်းမႃးသၢႆႈတႅၼ်းတၢင်းၽိတ်း…ဢၼ်ႁဵတ်းႁႂ်ႈပီႈလူဝ်းႁဝ်းလႆႈႁၢႆၵႂႃႇ…ယွၼ်ႉႁဝ်းဢမ်ႇလႆႈလူင်းမႃးဝၼ်းၼၼ်ႉ”
“သူဢမ်ႇလႆႈမီးတၢင်းၽိတ်းသင်တေလႆႈသၢႆႈတႅၼ်းလေႃႇၼႃႈ…လွင်ႈမၼ်းၵေႃႈပူၼ်ႉၵႂႃႇယဝ်ႉ..ပွႆႇႁႂ်ႈမၼ်းပူၼ်ႉၵႂႃႇသေ…ႁဝ်းၵေႃႈပွၵ်ႈမႃးလွတ်ႈၽေးလီယူႇလူး…ပေႃးႁူဝ်ၼႃႈသူမႃးၶိုၼ်း…ဢမ်ႇႁဵတ်းၵၢၼ်သင်ၵမ်ႉတေပွင်ႉသူၶဝ်ဢိူဝ်ႈ..”
“ၵၢၼ်မေႃသွၼ်ၵေႃႈ..မိူၼ်တင်းၵၢၼ်ႁူဝ်ၼႃႈႁဝ်းယဝ်ႉၶႃႈ…”
သမ်ႉပေႃးဢဝ်ၶမ်းႁွမ်ထူၺ်ႈၸႂ်လူင်မႃးၼင်ႇၵပ်ႉဢူၵ်းၵပ်ႉၸႂ်ဝႆႉယဝ်ႉ။
“ၶဝ်တေမႃးမိူဝ်ႈလႂ်..ၸွင်ႇသူႁူႉႁႃႉ” သဵင်ယဵၼ်ၵႂႃႇယဝ်ႉ “ၵေႃႈယဝ်ႉလႄႈ..ႁဝ်းဢမ်ႇထုၵ်ႇလီထၢမ်ယူႇယဝ်ႉ”
ဝၼ်းယဝ်ႉဝၼ်း ဢမ်ႇလႆႈႁၼ်လႅင်းမိူင်း သမ်ႉပေႃးပူၼ်ႉၵႂႃႇ ၼိုင်ႈဝူင်ႈယဝ်ႉသေ ထိုင်ၵႂႃႇသွင်ဝူင်ႈယဝ်ႉ ပဵၼ်ႁိုဝ်ၵေႃႈဢမ်ႇလႆႈႁူႉၶၢဝ်ႇၶဝ်ၶိုၼ်းထႅင်ႈသေဢိတ်း။ ယၢမ်းၵၢင်ၶမ်ႈ ၶမ်းႁွမ်ၵေႃႈၼွၼ်းသေဢုပ်ႇယိင်းသႅင်ယူႇ။
“သႅင်…ၸွင်ႇၶဝ်တေပွၵ်ႈမႃးၶိုၼ်းႁႃႉ…”
“ထၢမ်လွင်ႈၶဝ်ႁဵတ်းသင်…ၸႂ်ထိုင်ၶဝ်ႁႃႉ…”
“ၵေႃႈ…ဢမ်ႇထိုင်တၢၼ်ႇၼၼ်ႉၼင်ႇၵဝ်ႇ…ႁဝ်းမီးလွင်ႈၶႂ်ႈလၢတ်ႈၶဝ်မွၵ်ႈၼၼ်ႉၵူၺ်း…”
“လွင်ႈသင်လႃႇ…လၢတ်ႈႁဝ်းဢမ်ႇလႆႈႁႃႉ…”
“ဢမ်ႇလႆႈ!…သူလၢတ်ႈႁဝ်းၸွင်ႇလႆႈႁႃႉ…ဢမ်ႇလၢတ်ႈမူတ်းၵေႃႈ…လၢတ်ႈဢိတ်းၼိုင်ႈၵေႃႈလႆႈ…ၸွင်ႇၶဝ်တေမႃးၶိုၼ်းႁႃႉ…”
“ဢမ်ႇႁူႉယဝ်ႉ…ပေႃးၶဝ်ဢမ်ႇမႃးလူး…သူတေႁဵတ်းႁိုဝ်လႃႇ…”
“ပေႃးၶဝ်ဢမ်ႇမႃး…ႁဝ်းၵေႃႉတေၵႂႃႇၸွမ်းႁႃသေ…လၢတ်ႈႁႂ်ႈလႆႈၼၼ်ႉယဝ်ႉ… ”
“လွင်ႈယႂ်ႇတၢၼ်ႇၼၼ်ႉႁႃႉ…”
“ဢိုမ်ႉ!…”
“ယႃႇမႆႈၸႂ်…ၶဝ်တေပွၵ်ႈမႃးၶိုၼ်းယူႇ…”
“ၶႂ်ႈဝႃႈသူႁူႉဝႃႈၶဝ်ၵႂႃႇလႂ်ၸွင်ႇၸႂ်ႈႁိုဝ်…လၢတ်ႈလႆႈမၼ်ႈၸႂ်ထိုင်တၢၼ်ႇၼႆႉတႄႉ…”
ယိင်းသႅင်ၵေႃႈဢမ်ႇတွပ်ႇၶိုၼ်းသင်ယဝ်ႉ… ႁဵတ်းမိူၼ်ၼင်ႇၼွၼ်းလပ်းၵႂႃႇယူႇ။
ဝၢႆးလူင်းႁူင်းႁဵၼ်း ၶမ်းႁွမ်ၵေႃႈမိူဝ်းဢဝ်ၶူဝ်းၼေႃႇမိူင်းတီႈၼိူဝ်တပ်ႉၼႆသေ သမ်ႉႁူပ်ႉႁၼ်မႅၼ်ႈၽွင်း သၢႆလူမ်းတိုၵ်ႉလၢႆးငၢၼ်းၸၢႆးၶိူဝ်းၵႂႃႇဝႃႈ
“ၽၢႆႇတၢင်းပုၼ်ႉလၢတ်ႈမႃးဝႃႈ…ႁူဝ်ၼႃႈထုၵ်ႇၵုမ်းၶင်ၵႂႃႇထႅင်ႈ 1 လိူၼ် ယွၼ်ႉဢၢၼ်းလၵ်ႉဢွၵ်ႇပၢႆႈ..”
ၶမ်းႁွမ်လႆႈငိၼ်းၼင်ႇၼၼ် ဢဝ်ထူင်ၶူဝ်းလူၼ်ႇတူၵ်းမိုဝ်းၵႂႃႇသေ ၸၢႆးၶိူဝ်းၶႃဝၢႆႇတူၺ်း ၼင်ႇတူၵ်းၸႂ်
“ၶမ်းႁွမ်!”
“ၸိုင်ဝႃႈၶဝ်ၵႂႃႇႁဵတ်းၵၢၼ်..ပဵၼ်သင်လႄႈလႆႈထုၵ်ႇၵုမ်းၶင်ဝႆႉလႃႇ..”
“ၵွပ်ႈပဵၼ်သိုၵ်းလႄႈ..လႆႈႁဵတ်းၸွမ်းၶေႃႈသင်ႇၵူၺ်း..မိူဝ်ႈလႂ်ႁဵတ်းၽိတ်းမႃးၵေႃႈ..တေလႆႈႁပ်ႉဢဝ်တၢင်းၽိတ်းၸွမ်းၼင်ႇပိူင်မီးဝႆႉၼၼ်ႉယဝ်ႉ…”
“ပဵၼ်သိုၵ်းၼႆႉၸႂ်ၵႅပ်ႈတေႃႇၵၼ်လႆႈထိုင်တၢၼ်ႇၼႆႉႁႃႉ…ၸၢတ်ႈပၢၼ်ၶဝ်ပေႃးဢမ်ႇပဵၼ်ၶွင်ၶဝ်လႆႈယူႇယဝ်ႉ…ၸွႆႈထႅမ်ၵူၼ်းၵေႃႈယင်းတိုၵ်ႉဝႃႈမီးတၢင်းၽိတ်းယူႇ…”
မၢင်ၵမ်းမၢင်ၵမ်း ၸိူဝ်းၶဝ်ၵေႃႈ ယင်းလၵ်ႉယုမ်ႉၸွမ်းၵႂၢမ်းလၢတ်ႈၶမ်းႁွမ်ယူႇၵူၺ်းၼင်ႇၵဝ်ႇ။
မိူဝ်ႈလႂ်မိူဝ်ႈၶမ်းႁွမ်မႃးယဝ်ႉ ၸၢႆးၶိူဝ်းၵေႃႈ ႁႂ်ႈသၢႆလူမ်းႁၢင်ႈႁႅၼ်းၵပ်းသိုပ်ႇပၼ်ႁႂ်ႈလႆႈလၢတ်ႈတေႃႇလႅင်းမိူင်းၵႂႃႇ။
“သူပဵၼ်ၸိူင်ႉႁိုဝ်…ယူႇလီယူႇႁႃႉ…”
“ဢိုမ်း!…ႁဝ်းယူႇလီယူႇ…သူပဵၼ်ၸိူင်ႉႁိုဝ်လႃႇ…ၸွင်ႇၸဵပ်းတီႈလႂ်ႁႃႉ…ႁဝ်းယွမ်းၼွမ်း…ႁဝ်းဢမ်ႇၸၢင်ႈၵႂႃႇၸွႆႈသူလႆႈ…ႁဝ်းဢမ်ႇၸၢင်ႈႁဵတ်းႁိုဝ်ၵႂႃႇ…”
“သူႁူႉယူႇႁႃႉ…”
“ဢိုမ်ႈ!… ”
“ပဵၼ်သင်…လွင်ႈႁဝ်းသူႁူႉၵူႈလွင်ႈ…လွင်ႈသူသမ်ႉဢမ်ႇယွမ်းလၢတ်ႈၼႄၵၼ်ၸိူင်ႉၼႆ…မၼ်းၽဵင်ႇပဵင်းယူႇႁႃႉ…”
“လႆႈငိၼ်းသဵင်ပွင်ႉၸိူင်ႉၼႆ…တေဢမ်ႇပဵၼ်သင်ယဝ်ႉ…”
“ဢမ်ႇပဵၼ်သင်တီႈလႂ်…သူထုၵ်ႇၶင်ဝႆႉၸိူင်ႉၼၼ်…ႁဝ်းတေယူႇၵတ်းၸႂ်လႆႈၸိူင်ႉႁိုဝ်…”
“ႁဝ်းဢမ်ႇလႆႈထုၵ်ႇၶင်ဝႆႉၼႃ…မိူၼ်ႁဝ်းမႃးလိုဝ်ႈႁိူဝ်ႉၵူၺ်း…လိူဝ်သေဝႃႈဢမ်ႇၸၢင်ႈၵႂႃႇတၢင်းလႂ်ၼၼ်ႉယဝ်ႉ…”
“ၸွင်ႇႁွင်ႈၵႅပ်ႈႁႃႉ…ၸွင်ႇထူၺ်ႈၸႂ်ယၢပ်ႇၼႄႇ…ၸွင်ႇလႆႈၵိၼ်ၶဝ်ႈဢိမ်ႇ…ၸွင်ႇလႆႈၼွၼ်းၵတ်းႁႃႉ…ၸွင်ႇမီးၵူၼ်းဢုပ်ႇႁိုဝ်…”
“ႁဝ်းၸႂ်ထိုင်သူ…”
“ႁဝ်းၵေႃႈမိူၼ်ၵၼ်…”
သဵင်ယဵၼ်ထွမ်ႇတူၺ်းသဵင်ထူၺ်ႈၸႂ်ၵၼ်ယူႇတၢင်းႁိုင်ယဝ်ႉ။
သိုပ်ႇလူဢၢၼ်ႇတွၼ်ႈတေမႃးၶႃႈ
