တွၼ်ႈသွင်
လႅင်းမိူင်းယူႇၼႂ်းၵႃးသေ တူၺ်းၶမ်းႁွမ်ၶႃဢၼ်ပႆယူႇႁိမ်းၶၢင်ႈတၢင်းၼၼ်ႉ တင်းတူၺ်းတင်းယုမ်ႉယူႇ။
ၸၢႆးၶိူဝ်းဢၼ်ႁၼ်ၸိူင်ႉၼၼ်တႄႉၵေႃႈ “ၽူႈယိင်းႁင်လႃႇ…ႁတ်းႁၢၼ်…ၵႅၼ်ႇၶႅင်တၢၼ်ႇပဵၼ်ၽူႈၸၢႆးယဝ်ႈဝႃႈ… ၽႂ်လႆႈတႄႇၼႃႈႁိူၼ်းၸွမ်းတႄႉ…ယႃႇထၢင်ႇတေလႆႈဢွၵ်ႇႁိူၼ်း… ”
လႅင်းမိူင်းၵေႃႈယုမ်ႉယဝ်ႉတွပ်ႇၶိုၼ်း“မၼ်းႁၢႆႉတေႃႇၵူၼ်းတိုဝ်မွၵ်ႈၼၼ်ႉၵူၺ်းၵႂႃႈ…”
လႅင်းမိူင်းႁႂ်ႈၵိုတ်းၵႃးၵႂႃႇၽၢႆႇၼႃႈၶႃယဝ်ႉ “တေၵႂႃႇတၢင်းလႂ်…ႁႂ်ႈႁႃးၵႂႃႇသူင်ႇၼႄႇ… ”
“ပီႈၸၢႆးၸွႆႈၶႃႈၽွင်ႈ… ”
ၶမ်းႁွမ်ပႆႇတၼ်းတွပ်ႇ ၶမ်းမိူင်းၵေႃႈ ဢဝ်မိုဝ်းတၢဝ်းၸၼ်ဢဝ်ၽၵ်းတူသေ ၶဝ်ႈၵႂႃႇၼင်ႈယူႇၼႂ်းၵႃးၼၼ်ႉယဝ်ႉ။ ၶမ်းႁွမ်ၵေႃႈတေၸၢင်ႈႁဵတ်းႁိုဝ်လႃႇ ၵူဝ်ၶမ်းမိူင်းဢမ်ႇႁွတ်ႈထိုင်ႁိူၼ်းလႆႈလႄႈ ၵႃႈလႆႈၶဝ်ႈၼႂ်းၵႃးၵႂႃႇၸွမ်းယဝ်ႉ။ လႆႈဢဝ်တိုဝ်ႉတၢင်း ဢၼ်ၼႆႉသေ ၼင်ႇႁိုဝ်တေမိုတ်ႈၵၼ်တၢင်းၶမ်းႁွမ်ၼၼ်ႉ လႅင်းမိူင်းၸင်ႇၼႄႉၼမ်းတူဝ်ၵႂႃႇ…
“ႁဝ်းၸိုဝ်ႈလႅင်းမိူင်း…ၵူၼ်းႁေႃႈၵႃးၼၼ်ႉသမ်ႉ…ၸိုဝ်ႈၸၢႆးၶိူဝ်း…”
“ဢေႃႈ…ႁဝ်းၸိုဝ်ႈၶမ်းႁွမ်…”
“ၶႃႈၸိုဝ်ႈၶမ်းမိူင်းၶႃႈပီႈဢၢႆႈ..”
“ယိၼ်းၸူမ်းလႆႈႁူႉၸၵ်းၶႃႈ… ”
“ယိၼ်းၸူမ်းမိူၼ်ၵၼ်ၶႃႈ…ႁွတ်ႈႁိူၼ်းယဝ်ႉဢေႃႈ…”
“တၼ်းႁွတ်ႈယဝ်ႉႁ…” လႅင်းမိူင်းတႄႉၼႂ်းၸႂ်ၼႆႉ ၶႂ်ႈႁႂ်ႈသဵၼ်ႈတၢင်းၵႂႃႇၵႆလိူဝ်ၼႆႉၼၼ်ႉယဝ်ႉ။
ၶမ်းႁွမ်ၵေႃႈလူင်းၵႃးသေ ၶမ်းမိူင်းတႄႉ လႅၼ်ႈဢွၵ်ႇၵႂႃႇထႅင်ႈတၢင်းၼိုင်ႈ ဢၢၼ်းတေပၢႆႈၼႆသေတႃႉ ၵူၺ်းသမ်ႉဢမ်ႇပၢႆႈပူၼ်ႉသၢႆတႃၶမ်းႁွမ်လႆႈ ၶမ်းႁွမ်ၼႅတ်ႈလမ်းလႅၼ်ႈၵႂႃႇႁၢဝ်ႉဢဝ်ႁူဝ်မႃႇမၼ်း ယဝ်ႉသိုပ်ႇႁၢဝ်ႉဢဝ်ၶႅၼ်ထႅင်ႈၽၢႆႇၼိုင်ႈသေလွၵ်ႉပႅတ်ႈ သမ်ႉပေႃးဢမ်ႇၸၢင်ႈတူင်ႉ။ မိူဝ်ႈတေႇတႄႉလႅင်းမိူင်းၶႃဢၢင်ႈၸွႆႈၼႆယူႇ မိူဝ်ႈလႆႈႁၼ်ၸိူင်ႉၼၼ်ယဝ်ႉ ပေႃးၶႂ်ႈႁူၼ်လင်ၵႂႃႇၶိုၼ်းလူးၵွၼ်ႇ ယၢမ်းၼၼ်ႉ မႄႈၶဝ်ၵေႃႈဢွၵ်ႇမႃးသေ ႁၼ်လႅင်းမိူင်းၶႃလႄႈ
“ၽႂ်လႃႇၼႆႉ!… ”
“ဢေႃႈ…ၶႃပဵၼ်ၵူၼ်းၺွပ်းၶမ်းမိူင်းၸွႆႈဢေႃႈ…”
“ဢေႃ…ငိၼ်းၸူမ်းယဝ်ႉၼႃႈၸၢႆး… ၶဝ်ႈမႃးၼႂ်းႁိူၼ်းၵွၼ်ႇလႄႈ..ယင်းဢမ်ႇလူဝ်ႇၵႂႃႇတၢင်း လႂ်ဢမ်ႇၸႂ်ႈႁိုဝ်…”
“ဢမ်ႇ…ဢမ်ႇၶႃႈ!…”
ဢွၼ်ၵၼ်ၶဝ်ႈၵႂႃႇၼႂ်းႁိူၼ်းသေဢုပ်ႇၵၼ်ယဝ်ႉ။
“ၸူမ်းတႄႉယဝ်ႉ…ၸွႆႈၺွပ်းပၼ်လုၵ်ႈၸၢႆးႁဝ်း…သင်ဢမ်ႇမီးသူသွင်ၵေႃႉတႄႉ…ပီႈၼၢင်းၶဝ်တေႁိူဝ်ႉပေႃးၵႃႈႁိုဝ်…”
“ဢမ်ႇပဵၼ်သင်ၶႃႈ…ယိၼ်းလီၸွႆႈထႅမ်ယူႇ..မၼ်းၵႂႃႇႁဵတ်းသင်ၶႃႈလႃႇပႃႈ သမ်ႉပေႃးလႆႈလမ်းဢဝ်ၸိူင်ႉၼၼ်…”
ပႃႈၽွင်ထူၺ်ႈၸႂ်လူင်ၵမ်းၼိုင်ႈယဝ်ႉ “မၼ်းၵႆႉလႄႇၼႃႇ…ႁိူၼ်းၵေႃႈဢမ်ႇမႃးသေပွၵ်ႈ…ႁူင်းႁဵၼ်းၵေႃႈဢမ်ႇၵႂႃႇ…သမ်ႉၵႂႃႇႁိူၼ်းဢူၺ်းၵေႃႉမၼ်းဝႃႇ…လၢၼ်ႉၵဵမ်းဝႃႇၸိူဝ်းၼႆႉတိၵ်းတိၵ်း…ပေႃးပီႈၼၢင်းၶဝ်ဢမ်ႇၵႂႃႇၶႆႈၵေႃႈဢမ်ႇမႃး…ပေႃးဢမ်ႇၺွပ်းၵေႃႈဢမ်ႇထိုင်ႁိူၼ်းၼၼ်ႉၼႃႇ…ၸၢႆးၶဝ်ၵေႃႈႁၼ်ယူႇလူး……ပႃႈၵေႃႈဢမ်ႇႁူႉဝႃႈတေႁဵတ်းႁိုဝ်တီႈမၼ်းယဝ်ႉ…တၢင်းၵၢပ်ႈပၢၼ်မိူဝ်ႈလဵဝ်ၼႆႉ…ယႃႈမယႃႈၾိၼ်ႇၵေႃႈၼမ်ၼႃႇသေ…ပႃႈၵူဝ်ဝႃႈမၼ်းတေၶႂ်ႈၵိၼ်ၶႂ်ႈၸၢမ်းသေ…ၵူဝ်မၼ်းပဵၼ်ၵူၼ်းပႅတ်ႈလၢႆၵႂႃႇဢိူဝ်ႈ…ပႃႈၵူဝ်ဢၼ်ၼႆႉလိူဝ်ပိူၼ်ႈယဝ်ႉ…ၸၢႆးၶဝ်ဢူၺ်ႉ!…”
“ၸႂ်ႈၶႃႈဢေႃႈ…ပႃႈမီးလုၵ်ႈၸၢႆးၵေႃႉလဵဝ်ၵူၺ်းၶႃႈႁႃႉ…”
“ၸႂ်ႈယဝ်ႈ…မီးၵေႃႉလဵဝ်ၵူၺ်း…မီးၵေႃႉလဵဝ်ၵေႃႈပၼ်တၢင်းမႆႈၸႂ်ၼႃႇ…ၸႂ်ၵေႃႈဢမ်ႇၸႂ်ယႂ်ႇလႆႈ…တေပွႆႇၵႂႃႇႁဵတ်းၵၢၼ်ၵေႃႈသမ်ႉဢမ်ႇလႆႈၸႂ်ႉၵိၼ်ႁႅင်းမၼ်းယူဝ်ႉပႃႈဝႃႈ…ပွႆႇဝႆႉႁဵတ်းၼႆသမ်ႉ…ယၢပ်ႇၸႂ်ပီႈၼၢင်းမၼ်းယူႇၵူၺ်း…”
“မၼ်းသမ်ႉသူၼ်ၸႂ်ၶႂ်ႈႁဵတ်းသင်ၶႃႈလႃႇ…ၶႃႈဝူၼ်ႉဝႃႈလုၵ်ႈဢွၼ်ႇမွၵ်ႈၼႆႉတေမီးယိူင်းဢၢၼ်း…တေမီးလွင်ႈဢၼ်သူၼ်ၸႂ်ၶႂ်ႈႁဵတ်းၶႂ်ႈသၢင်ႈယူႇၶႃႈၼႃ…သင်ၸိူဝ်ႉဝႃႈ..ၶဝ်လႆႈႁဵတ်းၸွမ်းၼင်ႇဢၼ်ၶဝ်ၶႂ်ႈပဵၼ်…ၶဝ်ၵေႃႈတေဢမ်ႇပဵၼ်ၵူၼ်းပႅတ်ႈလၢႆၵႂႃႇ…ဢမ်ႇၸၢင်ႈဝႃႈသင်ၶဝ်လႆႈႁဵတ်းၼင်ႇဢၼ်ၶဝ်ၶႂ်ႈႁဵတ်းမႃး…မၼ်းၵေႃႈတေၸၢင်ႈႁဵတ်းလႆႈၶႅမ်ႉလႅပ်ႈထိုင်တီႈလႆႈၵေႃႈပဵၼ်လႆႈ…”
“ၸွမ်းၼင်ႇၸၢႆးလၢတ်ႈမႃးၵေႃႈလီဝူၼ်ႉယူႇ…ၵူၺ်းၵႃႈ…မၼ်းတႄႉဝႃႈၶႂ်ႈၵႂႃႇႁဵတ်းသိုၵ်းၼႆဝႃႇ…ပႃႈပေႃးဝူၼ်ႉဢမ်ႇပွင်ႇၸႂ်ၸွမ်းယဝ်ႉ…တေဢမ်ႇပၼ်ၵႂႃႇၵေႃႈသမ်ႉတေပဵၼ်ၵူၼ်းၸိူင်ႉၼႆၵႂႃႇ…ၼႃႈႁိူၼ်းႁဝ်းၵေႃႈဢမ်ႇမီးၽူႈၸၢႆးသေၵေႃႉ…မၢင်ပွၵ်ႈသမ်ႉလူဝ်ႇၸႂ်ႉၵိၼ်ယူႇ…သင်ဢမ်ႇသင်..ပွႆႇၵႂႃႇႁဵတ်းၵၢၼ်ႁႃငိုၼ်းမႃးၸွႆႈၵေႃႈ..ယင်းတေလီလိူဝ်ၼႆႉထႅင်ႈၼႆၵႂႃႈ…ပေႃးဝႃႈမၼ်းဢမ်ႇယူႇႁိူၼ်းၵေႃႈ…တေဢၢၼ်းပွႆႇၵႂႃႇႁႃႁဵတ်းၵၢၼ်မိူင်းပိူၼ်ႈယဝ်ႉ…ဝူၼ်ႉဝႃႈမၼ်းတေၶႅၼ်းလိူဝ်သေယူႇတီႈမိူင်းႁဝ်းၼႆႉယူႇ…မၼ်းယင်းၵႆယၢၼ်တင်းၽေးယႃႈမဝ်းၵမ်ဢိတ်းၼိုင်ႈၼၼ်ႉၼႃႇ”
“ၽေးယႃႈမဝ်းၵမ်ၼၼ်ႉ…လီၵူဝ်တႄႉဢေႃႈ…ၵူၺ်းၵႃႈ…တွၼ်ႈတႃႇၶမ်းမိူင်းၼၼ်ႉသင်တူၺ်းပုၼ်ႈၼႃႈႁိူၼ်းတႄႉမၼ်းၵေႃႈလီယူႇၶႃႈ…ၶႃႈဝူၼ်ႉဝႃႈတႃႇမၼ်းတႄႉတေဢမ်ႇပေႃးလီၵႃႈႁိုဝ်ၶႃႈၼႃ…သင်ၸိူဝ်ႉဝႃႈမၼ်းဢမ်ႇတဵမ်ၸႂ်…ႁဝ်းသမ်ႉပွႆႇၵႂႃႇ…တေၸႂ်ယႂ်ႇလႆႈလႄႈတေပိုင်ႈဢိင်လႆႈၼႆၼၼ်ႉ…မၼ်းၵေႃႈလၢတ်ႈဢမ်ႇလႆႈတဵမ်တဵမ်…သင်ၸိူဝ်ႉဝႃႈမၼ်းပဵၼ်ၸိူင်ႉၼႆ…ယူႇၵႆယိုင်ႈၶႅၼ်းထိင်းဢမ်ႇလႆႈ…ၵႂႃႇႁဵတ်းၵၢၼ်မိူင်းပိူၼ်ႈၵေႃႈ…ဢမ်ႇၸႂ်ႈဝႃႈမီးၵူၼ်းမေႃႁႃငိုၼ်းၵူၺ်း…ၵူၼ်းၸိူဝ်းဢၼ်ပႅတ်ႈလၢႆၵေႃႈမီးယူႇ…သင်ပဵၼ်လႆႈ…ပၼ်ႁႂ်ႈၶဝ်ႁဵတ်းၸွမ်းတၢင်းၶႂ်ႈပဵၼ်ၶဝ်ၼၼ်ႉ…မၼ်းလီလိူဝ်သေပိူၼ်ႈၶႃႈဢေႃႈ…”
“ပႃႈၵေႃႈၶႂ်ႈႁႂ်ႈမၼ်းႁဵတ်းၸွမ်းဢၼ်မၼ်းၶႂ်ႈပဵၼ်ယူႇ…ၵူၺ်းၵႃႈ…မၼ်းသမ်ႉၶႂ်ႈႁဵတ်းသိုၵ်းလႄႈ…ပႃႈသမ်ႉဢမ်ႇပေႃးၶႂ်ႈပၼ်မၼ်းႁဵတ်းၼၼ်ႉၼႃႇ…ၵူဝ်မၼ်းလႆႈတုၵ်ႉၶဢိူဝ်ႈ…”
“ယူႇတီႈလႂ်ၵေႃႈ…တိုၼ်းတုၵ်ႉၶၼၼ်ႉၶႃႈယဝ်ႉ…ၵႂႃႇႁဵတ်းၵၢၼ်မိူင်းပိူၼ်ႈၵေႃႈ…ၵမ်ႈၼမ်လႆႈႁဵတ်းလုၵ်ႈၸၢင်ႈပိူၼ်ႈၵူၺ်း…ဢၼ်လႆႈပဵၼ်ၸဝ်ႈၵၢၼ်ၼၼ်ႉမီးဢေႇၼႃႇ…ပိူၼ်ႈဝႃႈႁိုဝ်ၵေႃႈလႆႈဝႃႈၸွမ်းၸိူင်ႉၼၼ်…ပိူၼ်ႈၸႂ်ႉႁဵတ်းသင်ၵေႃႈလႆႈႁဵတ်းၼၼ်…ပေႃးဢမ်ႇမေႃႁဵတ်းၵေႃႈ…လႆႈႁႃၵၢၼ်မႂ်ႇထႅင်ႈ…ပေႃးၺႃးပေႃႈလဵင်ႉလီမႄႈလဵင်ႉလီယင်းၶႅၼ်း…သင်ၺႃးတီႈဢမ်ႇလီၼၼ်ႉ…ပိူၼ်ႈယင်းတေၸၢင်ႈပေႉၵိၼ်ၼိူဝ်ႁဝ်းလႆႈထႅင်ႈ…ႁဝ်းတေၵႂႃႇႁဵတ်းၵၢၼ်…ႁဝ်းၵေႃႈဢမ်ႇႁူႉလူးဝႃႈတေထူပ်းၵူၼ်းလီႁိုဝ်ၵူၼ်းဢမ်ႇလီ…ၽႂ်ၵေႃႈဢမ်ႇလႆႈတႅမ်ႈဝႆႉတီႈၼႃႈတႃပိူၼ်ႈၶႃႈလူး…ၼႂ်းၸႂ်တႄႉဝူၼ်ႉဝႃႈပဵၼ်ၵၢၼ်သေ…ႁႃငိုၼ်းၼမ်ၼမ်ၵူၺ်းၵေႃႈလႆႈယဝ်ႉ…ၵူၺ်းၵႃႈမၼ်းၵေႃႈဢမ်ႇမိူၼ်ၼင်ႇၵၢင်ၸႂ်ဢၼ်ႁဝ်းဝူၼ်ႉလႆႈ…ႁဝ်းလႆႈႁဵတ်းၵၢၼ်ထိုင်တီႈဢမ်ႇမီးၶၢဝ်းယၢမ်းလိုဝ်ႈ…ပေႃးဢမ်ႇႁဵတ်းၵေႃႈဢမ်ႇလႆႈၵိၼ်…ပေႃးဢမ်ႇမီးဝတ်းဝႂ်ၵေႃႈဢမ်ႇယူႇလႆႈ…ႁဵတ်းၵၢၼ်ႁိူဝ်ႉမႃးယဝ်ႉ…လႆႈငိုၼ်းလိူၼ်မႃးၵေႃႈ..ပေႃးလူဝ်ႇငိုၼ်းဢွၵ်ႇယူႇယဝ်ႉ…ၵမ်ႉၵႃႈႁွင်ႈဝႃႇၵႃႈၼမ်ႉၵႃႈၾႆးဝႃႇ…ၵႃႈႁဵတ်းဝတ်းဝႃႇ…တႃႇၵိၼ်ၵေႃႈလူဝ်ႇၵိၼ်…ငိုၼ်းၵဵပ်းၵေႃႈပေႃးဢမ်ႇၶႂ်ႈမီး…”
“ဢၼ်ၵႂႃႇလႆႈၵၢၼ်လီသေ…မီးငိုၼ်းသူင်ႇမႃးပၼ်ပေႃႈပၼ်မႄႈၸိူဝ်းၼၼ်ႉၵေႃႈမီးတင်းၼမ်ယူႇလူး…”
“မၢင်ၵေႃႉတွၼ်ႈတႃႇတူဝ်ၸဝ်ႈၵဝ်ႇၵူၺ်း…ယင်းဢမ်ႇၵုမ်ႈထူၼ်ႈၵေႃႈမီး…မၢင်ၵေႃႉပေႃႈမႄႈပွႆႇၵႂႃႇယဝ်ႉ…ႁၢႆၵႂႃႇဢမ်ႇပွၵ်ႈၶိုၼ်းႁိူၼ်းၶိုၼ်းယေးၵေႃႈမီး…မၢင်ၵေႃႉပွႆႇၵႂႃႇယဝ်ႉသမ်ႉပၢႆပၼ်တၢင်းတုၵ်ႉပေႃႈမႄႈၶိုၼ်းၵေႃႈမီး…ပေႃးလၢတ်ႈသိုဝ်ႈသိုဝ်ႈ…ၵူၼ်းၵႂႃႇႁဵတ်းၵၢၼ်ၼွၵ်ႈမိူင်းသေ…ႁႂ်ႈပေႃးမီးငိုၼ်းတဵမ်ထူၼ်ႈ…လဵင်ႉပေႃႈမႄႈလႆႈဢိမ်ႇတဵမ်ၼၼ်ႉ…မီးတႄႉမီးယူႇ..မီးၵမ်ႈဢေႇၵူၺ်း…ၵမ်ႈၼမ်ၵေႃႈ…ပၼ်လႆႈပဵၼ်မိူဝ်ႈပဵၼ်ပွၵ်ႈ…တွၼ်ႈတႃႇတူဝ်ၵဝ်ႇၵေႃႈလူဝ်ႇၸႂ်ႉထႅင်ႈသေ…သမ်ႉႁဵတ်းၵၢၼ်လႆႈၸွမ်းငိုၼ်းလိူၼ်ၵူၺ်း…ပေႃးပၼ်တၢင်းႁိူၼ်းၵေႃႈ..တေလႆႈလူတ်းယွမ်းတႃႇတူဝ်ၵဝ်ႇၽွင်ႈယဝ်ႉ…ပေႃးၶႂ်ႈလႆႈငိုၼ်းၼမ်ၵေႃႈ…တေလႆႈႁဵတ်းၵၢၼ်ၼမ်…တူဝ်ၸဝ်ႈၵဝ်ႇၵေႃႈတေလႆႈႁိူဝ်ႉထႅင်ႈ…သင်မီးပၢႆးဝူၼ်ႉမေႃႁဵတ်းမေႃသၢင်ႈ…ႁဵတ်းၵၢၼ်တီႈၼႂ်းမိူင်းႁဝ်းၵေႃႈ..လႆႈငိုၼ်းၼမ်မိူၼ်ၵၼ်ၼၼ်ႉၶႃႈယဝ်ႉ…”
“ပေႃးယူႇမိူင်းႁဝ်းသမ်ႉ..ယႃႈမဝ်းၵမ်လိူင်ႇၼႃႇ…ၵူဝ်ဝႃႈတေပဵၼ်ၵူၼ်းယွင်ႇယႃႈယွင်ႇၾိၼ်ႇပႅတ်ႈၼၼ်ႉယိုင်…”
“ယူႇမိူင်းပိူၼ်ႈၵေႃႈ…ဢမ်ႇၸႂ်ႈဝႃႈဢမ်ႇမီးၶႃႈၼႃ…ဢမ်ႇၸႂ်ႈယႃႈမယႃႈၾိၼ်ႇၵေႃႈ…လွင်ႈၵျေႃႇမူၼ်ႈၸွမ်းၽူႈယိင်းမႄႈယႃႈၸိူဝ်းၼၼ်ႉ…ပိူၼ်ႈၵေႃႈမီးယူႇ…ၵူၼ်းယွင်ႈမႃႇၸွမ်းလႄႈ..ပႅတ်ႈလၢႆၵႂႃႇၸွမ်းလွင်ႈၸိူင်ႉၼႆၵေႃႈမီးယူႇၶႃႈလူး…ၸိူင်ႉႁိုဝ်ၵေႃႈ..မၼ်းယူႇတီႈတူဝ်မၼ်းတင်းမူတ်းၼၼ်ႉၶႃႈယဝ်ႉ…ႁဝ်းၵုမ်းၵမ်မၼ်းဢမ်ႇၶႂ်ႈႁႂ်ႈမၼ်းႁဵတ်းၼႆၼၼ်ႉ…ၵုမ်းလႆႈၸူဝ်ႈၶၢဝ်းၵူၺ်း…ႁဝ်းတေယူႇၸွမ်းဢမ်ႇလႆႈတႃႇသေႇ…သမ်ႉဝႃႈႁဝ်းမတ်ႉတူဝ်မၼ်းလႆႈၵေႃႈ…ႁဝ်းမတ်ႉၸႂ်မၼ်းဢမ်ႇလႆႈ…မိူဝ်ႈမၼ်းလွတ်ႈဢွၵ်ႇမႃးၼၼ်ႉ…မၼ်းတိုၼ်းတေၵႂႃႇၸွမ်းဢၼ်မၼ်းၶႂ်ႈႁဵတ်းၼၼ်ႉယူႇယဝ်ႉ…သင်ႁဝ်းႁႄႉႁၢမ်ႈမၼ်းၵႂႃႇတိၵ်းတိၵ်း…မၼ်းယိုင်ႈၶႅၼ်းဢမ်ႇၶႂ်ႈႁဵတ်းၵၢၼ်သင်လူးၵွၼ်ႇ…မၼ်းတေပဵၼ်ၵူၼ်းၸိူင်ႉႁိုဝ်ၼႆၼၼ်ႉ…ယူႇတီႈတူဝ်မၼ်းတႅပ်းတတ်းၵူၺ်းၶႃႈဢေႃႈ…”
မႄႈၵေႃႈၼင်ႈယဵၼ်လူင်ၵႂႃႇၵမ်းၼိုင်ႈယဝ်ႉ။
“မႄႈၸၢႆးၶႂ်ႈၵႂႃႇႁဵတ်းသိုၵ်းဢေႃႈ!…ပၼ်ၸၢႆးၵႂႃႇႁေလႄႈ…ပေႃႈဝႃႈၸၢႆးလႆႈႁဵတ်းသိုၵ်း…ၸၢႆးတေဢမ်ႇလႄႇလဵၼ်ႈမိူၼ်ၼႆထႅင်ႈယဝ်ႉ…”
“ၸၢႆးဢမ်ႇၵူဝ်တၢႆႁႃႉ…ဢမ်ႇၵူဝ်တၢႆပႅတ်ႈမႄႈလႄႈတင်းပီႈမႂ်းႁႃႉ…”
“ၵူၼ်းႁဝ်းမၼ်းၵေႃႈတိုၼ်းတေလႆႈတၢႆယူႇယဝ်ႉ…ဢမ်ႇၸၢင်ႈဝႃႈသင်ၸၢႆးယူႇၸိူင်ႉၼႆ..ယိုင်ႈၶႅၼ်းတေၸဵဝ်းတၢႆလိူဝ်သေၵႂႃႇႁဵတ်းသိုၵ်းၵွၼ်ႇယဝ်ႈ…ဢမ်ႇတၢႆယွၼ်ႉလူတ်ႉၽႃႇ၊လူမ်ႉလူတ်ႉ၊ၽိတ်းႁူဝ်ပိူၼ်ႈၵေႃႈ…လဵပ်ႈတေတၢႆယွၼ်ႉလႅၼ်ႈပၢႆႈပီႈၶမ်းႁွမ်ယူႇၵူၺ်းၼင်ႇၵဝ်ႇ…”
“ၽႂ်ၸႂ်ႉမႂ်းလၢတ်ႈမႃးၸိူင်ႉၼၼ်လႃႇ…ဢမ်ႇႁၵ်ႉသေဢိတ်းယဝ်ႉႁႃႉမႄႈၼႆႉ…ပေႃႈမႂ်းၵေႃႈၵႂႃႇယဝ်ႉၵေႃႉၼိုင်ႈ…” ဢဝ်သဵင်ၼၼ်ႉယဵၼ်လူင်ၵႂႃႇသေ ၼမ်ႉတႃၸိုမ်ႉၸမ်ႉဢွၵ်ႇမႃးတီႈလၢႆႇတႃဢိတ်းၼိုင်ႈယဝ်ႉ။
“တေႁၢမ်ႈတၢၼ်ႇႁိုဝ်ၵေႃႈ…မိူဝ်ႈမၼ်းထုၵ်ႇလီပဵၼ်ယဝ်ႉမၼ်းၵေႃႈတိုၼ်းတေပဵၼ်…တေဢဝ်လွင်ႈဝၼ်းလင်မႃးၵိုတ်းယင်ႉပႅတ်ႈၶၢဝ်းယၢမ်းမိူဝ်ႈလဵဝ်…မၼ်းၵေႃႈယင်းၵိုတ်းဢမ်ႇလႆႈ…ပေႃးဝႃႈႁဵတ်းသိုၵ်းသေတၢႆ…သိုၵ်းၵေႃႈတေဢမ်ႇမီးယဝ်ႉ…ၵူၺ်းၵႃႈ…ၵူၼ်းၵေႃႉဢၼ်တၢႆၵႂႃႇၵေႃႈ…ဢမ်ႇၸၢင်ႈပွၵ်ႈမႃးၶိုၼ်းလႆႈ…” မႄႈထူၺ်ႈၸႂ်လူင်ဢွၵ်ႇမႃးၵမ်းၼိုင်ႈသေ သိုပ်ႇလၢတ်ႈထႅင်ႈဝႃႈ “ၵၢပ်ႈပၢၼ်မၼ်းလႅၵ်ႈလၢႆႈယဝ်ႉ…တေဢဝ်ပၢႆးဝူၼ်ႉၵဝ်ႇၵဝ်ႇမႃးတႅပ်ႈတတ်းဢမ်ႇလႆႈယဝ်ႉ…ၸွမ်းၼင်ႇၸၢႆးၶဝ်လၢတ်ႈမႃး…လိူဝ်သေတူဝ်မၼ်းတႅပ်းတတ်း…ႁဝ်းတေႁႄႉႁၢမ်ႈမၼ်းဢမ်ႇလႆႈ…”
“ၶႂ်ႈဝႃႈမႄႈပၼ်ၶႂၢင်ႉယဝ်ႉၸွင်ႇၸႂ်ႈႁိုဝ်…”
“ဢမ်ႇၵူဝ်တုၵ်ႉၶႁႃႉ…မၼ်းဢမ်ႇလႆႈယူႇမိူၼ်ၼႂ်းဝဵင်း…ဢမ်ႇလႆႈယူႇမိူၼ်ယူႇၸွမ်းမႄႈ…ဢမ်ႇလႆႈၵိၼ်တၢင်းၵိၼ်ၼင်ႇဢၼ်မႂ်းၶႂ်ႈၵိၼ်ၼၼ်ႉလႆႈတႃႇသေႇ…ဢမ်ႇလႆႈၼွၼ်းတီႈၼွၼ်းဢၼ်ဢုၼ်ႇၸိူင်ႉၼင်ႇမႂ်းၼွၼ်းၼႆႉလႆႈ…မႂ်းတေဢမ်ႇလႆႈလႄႇ…ဢမ်ႇလႆႈႁၼ်ဢူၺ်းၵေႃႉမႂ်းထႅင်ႈ…မႂ်းတေယူႇလႆႈယူႇႁႃႉ…ၵူၼ်းဢမ်ႇယၢမ်ႈတုၵ်ႉၶၸိူင်ႉၼင်ႇမႂ်းၼႆႉ…”
“မၼ်းၵေႃႈယၢပ်ႇသင်လႃႇ…ငၢႆႈငၢႆႈၵေႃႈ…ပိူၼ်ႈယူႇလႆႈၸၢႆးၵေႃႈယူႇလႆႈ…ႁဵတ်းသိုၵ်းၼႆႉမၼ်းၵေႃႈတိုၼ်းတုၵ်ႉၶယဝ်ႉဢမ်ႇၸႂ်ႈႁိုဝ်…တႃႉတေၵႂႃႇႁဵတ်းၵၢၼ်မိူင်းပိူၼ်ႈ…ပူၵ်းပွင်ပၼ်မိူင်းပိူၼ်ႈၶိုၼ်ႈယႂ်ႇ…တႃႉႁဵတ်းၵၢၼ်ၸွႆႈၸိူဝ်ႉၸၢတ်ႈႁဝ်းလႃႈ…မၼ်းလီၵႃႈႁိုဝ်…မႄႈဝူၼ်ႉတူၺ်းလႄႈ…ပေႃးဝႃႈမီးၵူၼ်းမႃးပေႉၵိၼ်မႄႈၼႆ…ၸၢႆးၵေႃႈတေလႆႈတွပ်ႇတႅၼ်းပၼ်မႄႈလႆႈ…မႄႈဝူၼ်ႉတူၺ်းလူး…ၸၢႆးၼုင်ႈတင်းၶူဝ်းသိုၵ်းသေယိပ်းတင်းၵွင်ႈယဝ်ႉ…ယိူင်းယိုဝ်းပၼ်ဢၢႆႈၸၸိူဝ်းဢၼ်မႃးပေႉၵိၼ်မႄႈၼၼ်ႉ..တၢႆၵႂႃႇၵေႃႉလႂ်ၵေႃႉၼၼ်ႉၵမ်းလဵဝ်လူး…”
“သမ်ႉဝႃႈၵဝ်တေလဵင်ႉမႂ်းမႃးလူၺ်ႈၼႂ်းမိုဝ်းၵဝ်ၵေႃႈ…လိူတ်ႈဢူႈသူၵေႃႈယင်းတိုၵ်ႉမီးၼႂ်းတူဝ်မႂ်းယူႇ…ၵဝ်ဢမ်ႇမုင်ႈမွင်းႁႂ်ႈမႂ်းမႃးပႂ်ႉၵႅတ်ႇၶႄပၼ်ၵဝ်ယဝ်ႉ…ၵဝ်မုင်ႈမွင်းႁႂ်ႈမႂ်းမီးၶၢဝ်းယၢမ်းမႃးၸႂ်းၵဝ်ၵူၺ်းၵေႃႈလႆႈယဝ်ႈ…”
“သူသွင်ၵေႃႉၵေႃႈ…ၸွႆႈၵပ်းသိုပ်ႇႁႃတိုဝ်ႉတၢင်းပၼ်ၶမ်းမိူင်းၽွင်ႈၸွင်ႇတေလႆႈႁိုဝ်…”
“ဢေႃႈ…တေၸၢမ်းႁႃတူၺ်းပၼ်ၶႃႈၼႃ…”
“ပႃႈၽၢၵ်ႇၸၢႆးၶႃယဝ်ႉၼႃႈ…”
“ဢေႃႈၶႃႈ…”
ၶဝ်ၵေႃႈဢုပ်ႇၵၼ်ထိုင်ၵၢင်ဝၼ်းသမ်ႉပေႃႈၶမ်ႈယဝ်ႉ လႅင်းမိူင်းၶႃၵေႃႈ ၵိၼ်ၶဝ်ႈႁဵတ်းၶႅၵ်ႇသေၸင်ႇတေ ဢွၼ်ၵၼ်ပွၵ်ႈမိူဝ်းၵႂႃႇယူႇ။
သိုပ်ႇလူထႅင်ႈတွၼ်ႈတေမႃးၶႃႈ။
