တွၼ်ႈသီႇ
ဝၼ်းယဝ်ႉဝၼ်းၶၢဝ်းယၢမ်းၵေႃႈပူၼ်ႉၵႂႃႇ ၶမ်းႁွမ်ၵေႃႈ မိူဝ်ႈတႄႇတႄႉမီးလွင်ႈယၢပ်ႇၽိုတ်ႇယူႇ သမ်ႉဝႃႈယၢမ်ႈၶိုၼ်ႈပၢင်ၽိုၵ်းၽွၼ်ႉၼႆသေတႃႉ ဢမ်ႇမိူၼ်ၼင်ႇတူဝ်ထူပ်းလႆႈ ၵူၺ်းၵႃႈ ဢဝ်လွင်ႈယၢပ်ႇၽိုတ်ႇၸိူဝ်းၼၼ်ႉသေ ႁဵတ်းပဵၼ်ၵၢၼ်ႁဵၼ်းႁူႉၵႂႃႇ လႄႈ ၸွႆႈၵၢၼ်ၵႂႃႇဢမ်ႇတၼ်းႁူႉသင် ပေႃးမီးသွင်လိူၼ်ယဝ်ႉ။ မိူဝ်ႈလႆႈပဵၼ်မေႃသွၼ်မႃးတေႉတေႉယဝ်ႉၼၼ်ႉ မိူၼ်ဝႃႈၼမ်ႉၸႂ်ၶႂ်ႈႁဵတ်းမေႃသွၼ်ၵေႃႈ မီးမႃးသေ သႅင်ၽွင်းသမ်ႉ တိုၵ်းသူၼ်းႁႂ်ႈမၼ်းၸွႆႈထႅင်ႈ၊ ၸင်ႇႁႂ်ႈမၼ်းၵႂႃႇၶိုၼ်ႈပၢင်ၽိုၵ်းၽွၼ်ႉတီႈ “လွႆတႆးလႅင်း” ၼႆယဝ်ႉ။
“သႅင်ၽွင်း…ပဵၼ်သင်တေႁႂ်ႈႁဝ်း ၵႂႃႇပဵၼ်လွႆတႆးလႅင်းပုၼ်ႉလႃႇ!!… ”
“ၵႂႃႇၶိုၼ်ႈပၢင်ၽိုၵ်းၽွၼ်ႉၵူၺ်း…သူတေၵူဝ်သင်…ႁဝ်းၵႂႃႇယူႇၵူႈပီ… ”
“ငိၼ်းဝႃႈတီႈၼၼ်ႉမီးသိုၵ်းလၢႆလၢႆၼႆဢမ်ႇၸႂ်ႈႁ…”
“ၸႂ်ႈယူႇလႂ်…ပဵၼ်သိုၵ်းၵေႃႈပေႃးတၢၼ်ႇဢမ်ႇၸႂ်ႈၵူၼ်းယဝ်ႉ…ၶဝ်ၵေႃႈပဵၼ်ၵူၼ်းယူဝ်းယူဝ်းမိူၼ်ႁဝ်းၵူၺ်းလေႃႇ…သူတေၵူဝ်ႁဵတ်းသင်…ႁဝ်းၵေႃႈၵႂႃႇယူႇလူး… ”
“ဢမ်ႇၵႂႃႇဢမ်ႇလႆႈႁ… ”
“ႁဝ်းဝႃႈၵႂႃႇလီဢိူဝ်ႈ…သူတေလႆႈႁဵၼ်းႁူႉထႅင်ႈလၢႆၸိူဝ်ႉလၢႆလွင်ႈတင်းၼမ်…ပေႃးယူႇတီႈလဵဝ်ၵူၺ်း…သူၵေႃႈလႆႈလွင်ႈၵဝ်ႇလွင်ႈလဵဝ်ၵူၺ်းလေႃႇ…ၸၢမ်းလႅၵ်ႈလၢႆႈတူၺ်းတီႈမႂ်ႇ…ႁဵၼ်းႁူႉလွင်ႈမႂ်ႇမႂ်ႇ…မၼ်းၵေႃႈတေလႆႈတၢင်းႁူႉမႂ်ႇမႂ်ႇထႅင်ႈ…ၸၢမ်းၶတ်းၸႂ်ဢဝ်ဢမ်ႇပဵၼ်လႆႈၼၼ်ႉဢွၵ်ႇသေ…ႁဵတ်းၸၢမ်းတူၺ်းလႄႈ…မၼ်းတေၸၢင်ႈလီလိူဝ်ဢၼ်သူဝူၼ်ႉၼၼ်ႉၵေႃႈပဵၼ်လႆႈ…”
ၶမ်းႁွမ်ၵေႃႈၼင်ႈသေဝူၼ်ႉယူႇ ဢမ်ႇၸႂ်ႈဝႃႈၵူဝ်သိုၵ်းၼင်ႇၵဝ်ႇ ယွၼ်ႉလွင်ႈဝၼ်းလင်မႄႈ ဢၼ်ယၢမ်ႈလၢတ်ႈၼႄမႃးယူႇတႃႇသေႇၼၼ်ႉ မၼ်းႁဵတ်းႁႂ်ႈၶႂ်ႈဢွၵ်ႇႁၢင်ႇၵႆသိုၵ်းၼၼ်ႉယဝ်ႉ။
“သင်လၢတ်ႈၼႄမႄႈၵေႃႈ…မႄႈတေဢမ်ႇႁၼ်လီၸွမ်းယူႇယဝ်ႉ…သင်ဢမ်ႇလၢတ်ႈၵေႃႈ…သမ်ႉဢမ်ႇလီ…ပဵၼ်မႄႈၵေႃႉၼိုင်ႈလူး…”
ၶမ်းႁွမ်ၼင်ႈဝူၼ်ႉယူႇတင်းႁိုင်ယဝ်ႉ ယၢမ်းၼၼ်ႉ သဵင်ၽူင်းၵေႃႈမေႃးမႃး
“မႄႈ… ”
“မိူဝ်ႈလႂ်ယိင်းတေပွၵ်ႈမႃးလႃႇ”
“မႄႈ…သင်ယိင်းၶႂ်ႈသိုပ်ႇယူႇထႅင်ႈမႄႈၸွင်ႇတေႁႂ်ႈယိင်းယူႇႁိုဝ်…”
“လုၵ်ႈမီးတၢင်းသိူဝ်းယူႇႁ… ”
“ယိင်းဝူၼ်ႉဝႃႈယိင်းလႆႈၸႂ်ၵၢၼ်ဢၼ်ၼႆႉယဝ်ႉ…ယိင်းၶႂ်ႈသိုပ်ႇႁဵတ်းၵၢၼ်ဢၼ်ၼႆႉထႅင်ႈ… ”
“လႆႈယူႇလူး…”
“မႄႈ…သႅင်ၽွင်းႁႂ်ႈယိင်းၵႂႃႇၶိုၼ်ႈပၢင်ၽိုၵ်းၽွၼ်ႉ..တီႈ..လွႆတႆးလႅင်းဝႃႇ”
မႄႈၵေႃႈသဵင်ယဵၼ်ၵႂႃႇယဝ်ႉ…
“မႄႈ!..မႄႈၸွင်ႇလႆႈငိၼ်းႁိုဝ် ”
“မႄႈလၢတ်ႈယဝ်ႉ…ႁဵတ်းၸွမ်းၼင်ႇၵၢင်ၸႂ်ယိင်းၶႂ်ႈပဵၼ်ၼၼ်ႉလႄႈ…လွင်ႈဝၼ်းလင်မၼ်းလႅၵ်ႈလၢႆႈဢမ်ႇလႆႈ…ယၢမ်းမိူဝ်ႈလဵဝ်ၶတ်းၶႂၢင်လႆႈသေတႃႉ…မိူဝ်းၼႃႈမႃးတေပဵၼ်ႁိုဝ်ၵေႃႈဢမ်ႇႁူႉလႆႈ…ဢမ်ႇဝၼ်းၼိုင်ႈ…သင်မၼ်းထုၵ်ႇလီပဵၼ် မၼ်းၵေႃႈတေပဵၼ်ၵႂႃႇယူႇ…”
“မႄႈပဵၼ်သင်ၵႂႃႇယဝ်ႉလႃႇ…ဢမ်ႇဝူၼ်ႉတႃႇတေႁၢမ်ႈယိင်းသေဢိတ်းၼိုင်ႈယဝ်ႉႁႃႉ”
“ႁၢမ်ႈ!…မၼ်းတေႁၢမ်ႈလႆႈၵႃႈႁိုဝ်…မႄႈဝူၼ်ႉဝႃႈလုၵ်ႈထုၵ်ႇလီၵႂႃႇထူပ်းလွင်ႈတေႉလႆႈယဝ်ႉ…ဢမ်ႇဝႃႈမီးလွင်ႈသင်ၵေႃႈ…ယႃႇလိုမ်းသိုပ်ႇၽူင်းၸူးမႄႈၼႃႈ…” ဝၢင်းၽူင်းၵႂႃႇယဝ်ႉ။ မႄႈၵေႃႈႁိုဝ်တေႁၢမ်ႈသင်လႆႈလႃႇ လိူဝ်သေဝႃႈ
“ၵူႈလွင်ႈမၼ်းထုၵ်ႇတႅပ်းတတ်းမႃးယဝ်ႉလူး…”
သၢႆလူမ်းထွင်းထွင်း ၼိူဝ်သဵၼ်ႈတၢင်းၵူတ်ႉငွၵ်း ၵွင်းႁူၺ်ႈလွႆၸၼ်း ပၢၼ်းတၢပ်ႈလႃႇႁႃႉႁိုၵ်း လူတ်ႉၵႃးလမ်းၵၼ်ၵႂႃႇပဵၼ်ယိုတ်ႈပဵၼ်သၢႆ။ တွၼ်ႈတႃႇၶမ်းႁွမ်ၼၼ်ႉၵေႃႈ ၶီႇႁိူဝ်းၶၢမ်ႈၶူင်းၵႂႃႇတေႃႇထိုင်ၽင်ႇ ႁိုဝ်တေငၢႆႈ ၸႂ်ႁၢႆယူႇဢိူဝ်ႈမိူဝ်ႈဝႃႈပဵၼ်ပွၵ်ႈဢွၼ်တၢင်းသုတ်းၵူၺ်း။
မိူဝ်ႈႁွတ်ႈမႃးၽႅဝ်ၼိူဝ်သဵၼ်ႈတၢင်းဢၼ်ဢမ်ႇပေႃးၵႂၢင်ႈယႂ်ႇ ဢၼ်တႆႇၶိုၼ်ႈၵႂႃႇၸွမ်းႁူၺ်ႈၸွမ်းႁွင်ႈ မုင်ႈတူၺ်းၵႂႃႇတၢင်းတူၵ်း လႆႈႁၼ်ပႃႇမႆႉသီၶဵဝ်လႄႈ သၼ်လွႆသွမ်ႇဢၼ်ယူႇၵႆ၊ ၽွင်းၵၢင်ဝၼ်းၸမ်တူၵ်း လုၵ်ႈလႅတ်ႇၸမ်လပ်ႉလွႆသီငဝ်းလိူင်ႁိူဝ်ႈထွင်ႇ ပဵၼ်ဢၼ်ႁၢင်ႈလီၼႃႇ တႃႇတေလႆႈမႃးႁၼ်သၽႃႇဝႁၢင်ႈလီၸိူင်ႉၼႆၼႆႉဢမ်ႇတေႃႈမီး။ ယၢမ်းၼၼ်ႉၵေႃႈ ႁွတ်ႈၵႂႃႇတီႈ “လွႆတႆးလႅင်း”ယဝ်ႉ ။
မိူဝ်ႈႁွတ်ႈၵႂႃႇၼႂ်းဝၢၼ်ႈလွႆတႆးလႅင်းယဝ်ႉၼၼ်ႉ လင်ႁိူၼ်းၵူၼ်းမီးၽၢၵ်ႇလဵဝ်ၶပ်ႉယႆၸႅၼ်ႇၵၼ် မုင်ႈႁၼ်ၵႂႃႇပႃးလွႆသွင်ၼၢင်းတမ်းၶၢင်းႁိမ်းၸမ် လႄႈ သၼ်လွႆယၢဝ်းပႃႇမႆႉၶဵဝ်ၸၢဝ်းငၢဝ်း လႅပ်ႈလီၵျေႃႇၼႃႇ တူၺ်းၵႂႃႇၼႃႈတၢင်းဢွၵ်ႇၵေႃႈ ႁၼ်ၵႂႃႇလွႆလူင်သွင်လုၵ်ႈလႄႈသၼ်လွႆယၢဝ်းၵႆၵႂႃႇ ဢဝ်သၢႆတႃတူၺ်းပေႃးဢမ်ႇတိူၵ်ႈလႆႈ တွင်ႉၾႃႉသွမ်ႇသွမ်ႇလႄႈမွၵ်ႇၵုမ်ႈတမ်းယႆၸွမ်း တူၺ်းႁူမ်ႈၸွမ်းၵၼ် ပဵၼ်ဢၼ်ၸႂ်ၵတ်းၸႂ်ယဵၼ်ၸိုၼ်ႈပၢင်ႇသႂ် မိူဝ်ႈလႂ်မိူဝ်ႈမႃးထိုင်ယဝ်ႉၵေႃႈ ဢဝ်ၽူင်းဢွၵ်ႇမႃးထႆႇၶႅပ်းႁၢင်ႈႁေဢိတ်းၼိုင်ႈၵႂႃႈ။
“ႁွတ်ႈယဝ်ႉၵမ်းၼႆႉ…”
“တီႈၼႆႈႁႃႉ…လွႆတႆးလႅင်း”
ၸဝ်ႈၵႃးၵေႃႈ ႁေႃႈပၼ်ႇလူင်ၵႂႃႇတၢင်း ႁူင်းႁဵၼ်းၸိူဝ်ႉၸၢတ်ႈ ၼၼ်ႉသေ ပၼ်ႇလဵပ်ႈၵႂႃႇတၢင်းႁူင်းသဝ်းလုၵ်ႈႁဵၼ်း ႁွတ်ႈထိုင်ၵႂႃႇတီႈႁူင်းသဝ်းၶူး သွင်ၸၼ်ႉ ဢၼ်ယူႇဝႆႉၼႂ်းႁူၺ်ႈၼၼ်ႉယဝ်ႉ ၵိုတ်းၵႃးၶဝ်သေ ဢွၼ်ၵၼ်တေႃႉၶူဝ်းၶိုၼ်ႈႁွင်ႈၵၼ်ယူႇယဝ်ႉ။
တႃႇတေထိုင်ပၢင်ၽိုၵ်းၽွၼ်ႉၵေႃႈ ၵိုတ်းထႅင်ႈႁိုင်ယူႇ။ ႁႂ်ႈလႆႈလိုဝ်ႈႁိူဝ်ႉလိုဝ်ႈၸႂ်လီငၢမ်းငၢမ်းၼႆသေ သႅင်ၽွင်းဢွၼ်ဢဝ် ၶမ်းႁွမ်ၵႂႃႇလႄႇၼႂ်းသႅင်ႇ ဢွၼ်ၵႂႃႇသိုဝ်ႉၶူဝ်းၸႂ်ႉၸိူဝ်းၼႆႉ။ မိူဝ်ႈၶဝ်ႈၵႂႃႇတီႈၼႂ်းသႅင်ႇၼၼ်ႉ လႆႈႁၼ်မၢၵ်ႇၸွၵ်းသုၵ်းလိူင်လီဝႆႉ လႅပ်ႈဝၢၼ်ၼႃႇလႄႈ လႆႈထၢမ်ၵႂႃႇတီႈၸဝ်ႈသႅင်ႇ
“မၢၵ်ႇၸွၵ်းၼႆႉႁဵတ်းႁိုဝ်ၶၢႆ…” လႄႈမီးထႅင်ႈသဵင်ၼိုင်ႈ ထၢမ်မႃးတၢင်းလင်မိူဝ်ႈလဵဝ်ၵၼ်။
ၶမ်းႁွမ် ဢဝ်သၢႆတႃယၵ်ႉတူၺ်းၸွမ်းႁၢင်ႈၽၢင်ၵူၼ်းၵေႃႉၼၼ်ႉ တူဝ်ၶိင်းယွမ်သုင် ၼုင်ႈသႂ်ႇၶူဝ်းလၢႆးသိုၵ်းတဵမ်ၸုမ်ႇ ပတ်ႉၶႅၼ်သိူဝ်ႈၶိုၼ်ႈသွင်ၽၢႆႇ ႁၼ်ဢဵၼ်ၶႅၼ်မၼ်းၽူၵ်ႉဢွၵ်ႇမႃး၊ ၶူဝ်းၼုင်ႈသုပ်းမႅၼ်ႈတူဝ် ႁူဝ်တေႃႇတိၼ်သမ်ႉပေႃးတႅတ်ႈၼႅတ်ႈလူင်ဝႆႉ၊ တင်းၵူၼ်းလႄႈတင်းၶူဝ်း ၸိုင်ပေႉမႃးလႅပ်ႈဝႃႈလဵပ်ႈၵၼ်၊ ဢမ်ႇတွၼ်ႉယၢမ်ႈႁၼ်သိုၵ်းတႆးႁႃႉ ဢမ်ႇၼၼ်ၵေႃႈ ၶဝ်ပဵၼ်ၵူၼ်းလဝ်းလႄႈသႂ်ႇသင်ၵေႃႈလဝ်းႁိုဝ်၊ ၶေႃးႁွႆတူင်ႉလႆမိူဝ်ႈဢိုၼ်ၼမ်ႉလၢႆး ၼႃႈလုပ်ႇလုပ်ႇၶဝ်လႄႈ မၢၵ်ႇႁူဝ်သမ်ႉမႃးသုမ်ႇၼႃႈဝႆႉဢိတ်းၼိုင်ႈၼၼ်ႉ ၸိုင်ပေႉမႃးလဝ်းၸပ်းၸႂ် လၵ်ႉႁူဝ်ၸႂ်ၶမ်းႁွမ်သမ်ႉပေႃးသၼ်ႇဝႆၸွမ်းယဝ်ႉ။ သၢႆတႃၵူၼ်းၵေႃႉၼၼ်ႉၵေႃႈ ဝၢႆႇယၵ်ႉၸူးမၼ်းၶိုၼ်းသေ
“ၶမ်းႁွမ်!…ႁဵတ်းၸိူင်ႉႁိုဝ်မႃးယူႇတီႈၼႆႈလႃႇ…”
“ႁဝ်းယၢမ်ႈႁူႉၸၵ်းၵၼ်ယူႇၶႃႈႁႃႉ… ”
“ဢမ်ႇတွင်းႁဝ်းယဝ်ႉႁႃႉ…လႅင်းမိူင်း ဢၼ်ၸွႆႈမိူဝ်းၺွပ်းပၼ်ၼွင်ႉၸၢႆးသူၼၼ်ႉၼႃႇ… ”
ၶမ်းႁွမ်မႄးတူၺ်းႁူဝ်တေႃႇတိၼ်လီလီသေ “ၸႂ်ႈယူႇ..ၶႃႈႁႃႉ…”
“ဢိုမ်ႉ!…သူၸင်ႇၸႂ်လိုမ်းႁႃႉ…ဢမ်ႇၼၼ်ၵေႃႈတင်ႈၸႂ်ဢမ်ႇၶႂ်ႈတွင်း… ”
“ဢမ်ႇၸႂ်ႈတင်းသွင်လွင်ႈၶႃႈ…ၵွပ်ႈဝႃႈ…သူသႂ်ႇၶူဝ်းသိုၵ်းယဝ်ႉ…မိူၼ်ဝႃႈသူလႅၵ်ႈလၢႆႈမႃးလႄႈႁဝ်းဢမ်ႇတွင်းၵူၺ်း…”
“သူၵေႃႈႁၢင်ႈလီမႃးမိူၼ်ၵၼ်…ၵူၺ်းၵႃႈႁဝ်းၵေႃႈတိုၵ်ႉတွင်းသူလႆႈယူႇၼႃ…ႁဝ်းယိၼ်းၸူမ်းတႄႉယဝ်ႉ လႆႈမႃးႁၼ်သူၸိူင်ႉၼႆ… ”
“တီႈတေႉသူၵေႃႈပဵၼ်သိုၵ်းလူး…ဝႃႈယူႇယဝ်ႉ..ပဵၼ်သင်လႄႈမႄႈဢဝ်ၼွင်ႉႁဝ်းဢၢပ်ႈပၼ်သူ…”
“ၵေႃႈၼၼ်ႉယဝ်ႉ…ႁဝ်းၶၢမ်ႇပွမ်တူဝ်လူးၵွၼ်ႇ…ယင်းဢမ်ႇလွတ်ႈလႆႈသၢႆတႃမႄႈသူလူး…”
“ၼွင်ႉႁဝ်းလူးယူႇတီႈလႂ်ဝႆႉၶႃႈလႃႇ…”
“တိုၵ်ႉသွၼ်ၵၢၼ်ဝႆႉယူႇ…ယႃႇမႆႈၸႂ်..ႁဝ်းတူၺ်းထိုင်ၶဝ်ယူႇၵူၺ်း…”
“ဢေႃႈ…ၶဝ်ယူႇလီယူႇၶႃႈႁႃႉမိူဝ်ႈလဵဝ်…”
“လီယူႇ…”
ၶမ်းႁွမ်လႄႈသႅင်ၽွင်းၵေႃႈ သိုဝ်ႉၶူဝ်းၶွင်ၶႃသေ ဢွၵ်ႇလၢၼ်ႉမႃးယဝ်ႉ။
“ပဵၼ်ၽႂ်လႃႇ…ႁူႉၸၵ်းသေႁႃႉ…”
“ၵူၼ်းၵေႃႈဢၼ်ဢွၼ်ဢဝ်ၼွင်ႉႁဝ်းမႃးၼၼ်ႉယဝ်ႉ…”
“ယူဝ်ဝႃႈႁူပ်ႉၺႃးၵူၼ်းယၢမ်ႈၵဝ်းၵၼ်ၼႆၵႂႃႈ…ႁၼ်ဢုပ်ႇၵၼ်လႅပ်ႈမိုတ်ႈမိုတ်ႈဢၢႆဢၢႆၵၼ်ဝႆႉ…”
“လႃႈလီႈလၢတ်ႈလိတ်ႈလူင်ၵႂႃႇ…ပေႃးၵေႃႉႁၵ်ႉပိူၼ်ႈမႃးငိၼ်းတေႁဵတ်းႁိုဝ်…”
“ၶဝ်ယူႇတီႈၼႆႈႁႃႉမိူၼ်ဢမ်ႇယၢမ်ႈႁၼ်ၶဝ်သေပွၵ်ႈ…ယဝ်ႉၵေႃႈၶဝ်ပဵၼ်သိုၵ်းတႆးတေႉယူႇႁႃႉ…ပေႉလဝ်းလႃႇ…”
“ႁဝ်းၵေႃႈဢမ်ႇႁူႉၼႃလိူဝ်သေသူယူႇႁိုင်လိူဝ်ႁဝ်း…ၸႂ်ႈသိုၵ်းတႆးဢမ်ႇၸႂ်ႈၼၼ်ႉတႄႉ…ပေႃးဢမ်ႇၸႂ်ႈၽႂ်ဢမ်ႇမႃးယူႇတီႈၼႆႈၼင်ႇၵဝ်ႇယူဝ်ႉဝႃႈ…”
“ၽႂ်တေၵၢမ်ႇလီသေပဵၼ်ၵေႃႉႁၵ်ႉၶဝ်ၼေႃ…”
“ၼွၼ်းၾၼ်ၵၢင်ဝၼ်းထႅင်ႈယဝ်ႉသႅင်ၽွင်း…”
သိုပ်ႇလူထႅင်ႈတွၼ်ႈတေမႃးၶႃႈ။
