ႁူဝ်ၶမ်ႈၵၢင်ဝၼ်းၸၢႆႉတူၵ်းမူၵ်းၸမ်ထိုင်လိၼ် ၼူၵ်ႉဢွၼ်ႇၵေႃႈၶဝ်ႈႁႃႁၢင်း တီႈၼိူဝ်ၵၢင်တၢင်းၼၼ်ႉ ၸင်ႇမီးလူတ်ႉလူင်မႃးၵိုတ်းဝႆႉယူႇၼႃႈႁိူၼ်းယိင်းသႅင်ၶႃယဝ်ႉ။ ယိင်းသႅင်လႆႈငိၼ်းသဵင်ယဝ်ႉၼႅတ်ႈမႃးတူၺ်း ၵွၺ်းဝႃႈပဵၼ်လႅင်းမိူင်းၶႃ။
“လွၵ်းလၢႆးၵေႃႉၸၢႆးၼႆႉဢမ်ႇငၢႆႈတေႉလူင်…”
“မၼ်းၵေႃႈၸႂ်ႈယူႇယဝ်ႉ…”
လႅင်းမိူင်ၶႃၵေႃႈ ဢွၼ်ၵၼ်တေႃႉတိူၵ်ႈယႃၶဝ်ႈမိူဝ်းဝႆႉၼႂ်းႁိူၼ်းၼၼ်ႉယဝ်ႉ။ ၸဵမ်မိူဝ်ႈၶဝ်ႈၽၵ်းတူမိူဝ်း သၢႆတႃလႅင်းမိူင်းၵေႃႈလွမ်ယၵ်ႉမုင်ႈတူၺ်းၵႂႃႇ မိူၼ်ဝႃႈၸွမ်းႁႃသေၸိူဝ်ႉသေလွင်ႈယူႇၼၼ်ႉယဝ်ႉ ဢွၵ်ႇႁိူၼ်းမႃးၶိုၼ်းၵေႃႈ ႁိုဝ်တေႃႈၵိုတ်းလိုဝ်ႈလွင်ႈမွင်းႁႃ လွမ်ယၵ်ႉတူၺ်းၵႂႃႇတၢင်းယဝ်ႉတၢင်းၵေႃႈ ဢမ်ႇလႆႈႁၼ်ၼင်ႇဢၼ်မုင်ႈမွင်းဝႆႉၼၼ်ႉလႄႈ သၢႆတႃဢၼ်ၽိတ်းပိူင်ႈၼၼ်ႉ ၼႄဢွၵ်ႇမႃးယူႇ။ မိူဝ်ႈတေပွၵ်ႈၶိုၼ်းၼၼ်ႉ ယိင်းသႅင်ၵေႃႈ ၸွမ်းလူၺ်ႈလွင်ႈထၢင်ႇပိူင်ႈသေ
“သူႁဵတ်းႁိုဝ်ႁၼ်ႁိူၼ်းႁဝ်းယူႇၶႃႈလႃႇ…ႁၢင်ႈႁဝ်းဢမ်ႇတွၼ်ႉလၢတ်ႈဝႆႉၶႃႈလူး…”
“ဝႆႉဝႃႈႁူႉၵူၺ်းလႄႈ…မီးလွင်ႈသင်ၵေႃႈႁဝ်းတေပွင်ႇလႅင်းပၼ်ၶိုၼ်းၵူၺ်း…”
သွင်ၶႃၵေႃႈ ဢွၵ်ႇလူတ်ႉမိူဝ်းၵႂႃႇယဝ်ႉ။ ဝၢႆးသေလႅင်းမိူင်းၶဝ်ပွၵ်ႈမိူဝ်းၵႂႃႇဢမ်ႇႁိုင်သင် ၶမ်းႁွမ်ၵေႃႈႁွတ်ႈႁိူၼ်းမႃးသေ
“လူတ်ႉၽႂ်လႃႇ…မႃးၵိုတ်းၼႃႈႁိူၼ်းႁဝ်းၼၼ်ႉ…”
“လူတ်ႉႁူဝ်ၼႃႈႁဝ်းဝႃႇ…”
“လႆႈထူပ်းႁူဝ်ၼႃႈသူယဝ်ႉႁႃႉ…သူၵေႃႈတေလႆႈၵႂႃႇပႅတ်ႈႁဝ်းႁေယဝ်ႉလေႃႇၼေႃႈ…”
“ႁဝ်း…တေဢမ်ႇလႆႈၵႂႃႇယဝ်ႉၵေႃႈပဵၼ်လႆႈ…”
“ၶႂ်ႈဝႃႈႁိုဝ်လႃႇ…”
“ပႂ်ႉလၢတ်ႈမိူဝ်ႈႁူႉၶေႃႈတွပ်ႇၸႅင်ႈလႅင်းၵွၼ်ႇ…ယဝ်ႉသူၵႂႃႇလႂ်မႃးလႃႇ…”
“ၵႂႃႇႁိူၼ်းလုင်းၵၢင်ႉၶဝ်မႃး…မိူဝ်ႈၽုၵ်ႈလူဝ်ႇပိုတ်ႇႁူင်းႁဵၼ်းယဝ်ႉ…ႁဝ်းၵေႃႈလူဝ်ႇႁၢင်ႈႁႅၼ်းဝႆႉၼၼ်ႉၼႃႇ…”
“ဢေႃႈၶႃႈ..မေႃသွၼ်…”
ယၢမ်းၵၢင်ၼႂ်သၢႆလႅင်းလႅတ်ႇထွင်ႇႁိူဝ်ႈပိူင်းမႃး သဵင်လူတ်ႉၶိူင်ႈဢွၼ်ႇၼၼ်ႉၵေႃႈ လႆႈမႃးၵိုတ်းဝႆႉယူႇတီႈၼႃႈႁိူၼ်းယိင်းသႅင်ၶဝ်ၼၼ်ႉယဝ်ႉ။ ယိင်းသႅင်ၵေႃႈ ဢွၵ်ႇမႃးတူၺ်းသေ လႆႈႁၼ်ပဵၼ်ၸၢႆးၶိူဝ်းလႄႈ
“မႃးႁဵတ်းသင်ၸဵမ်ၸဝ်ႉလႃႇ…”
“ႁူဝ်ၼႃႈႁႂ်ႈႁဝ်းမႃးႁပ်ႉသူမိူဝ်း…မီးၵၢၼ်လမ်ႇလွင်ႈ…”
“ပႂ်ႉၵမ်ႉၼိုင်ႈလႄႈ…”
မိူဝ်ႈတိုၵ်ႉပႂ်ႉယိင်းသႅင်ယူႇၼၼ်ႉ ၸၢႆးၶိူဝ်းၵေႃႈလႆႈယၵ်ႉႁၼ်မႅၼ်ႈၺႃးတီႈႁူင်းႁဵၼ်း ဢၼ်မီးႁိမ်းၸမ်ႁိူၼ်းၼၼ်ႉ မီးၵူၼ်းၼမ်ဝႆႉလႄႈ ၸွမ်းလူၺ်ႈလွင်ႈထၢင်ႇပိူင်ႈသေ လွင်ႈၶႂ်ႈႁူႉၶႂ်ႈႁၼ်ၼၼ်ႉလႄႈ..
“ပိူၼ်ႈႁဵတ်းသင်လႃႇၼၼ်ႉ…”
“မိူဝ်ႈၼႆႉပိူၼ်ႈပိုတ်ႇႁူင်းႁဵၼ်းဝႃႇ…”
“ငိၼ်းဝႃႈတေမီးမေႃသွၼ်မႃးၵူၺ်း…သမ်ႉပေႃးတၼ်းမႃးထိုင်ယဝ်ႉႁႃႉၼႆႉ…”
“ၵေႃႈ..မႃးႁွတ်ႈမိူဝ်ႈလဵဝ်ၵၼ်တၢင်းႁဝ်းၼၼ်ႉၼႃႇ…”
ၸၢႆးၶိူဝ်းၵေႃႈမႄးငွၵ်ႈတူၺ်းၵႂႃႇၼႂ်းႁူင်းႁဵၼ်းၼၼ်ႉ မိူၼ်ႁၼ်မႅၼ်ႈသေၸိူဝ်ႉသေလွင်ႈလႄႈ ဢမ်ႇပေႃးၶႂ်ႈယုမ်ႇၵႃႈႁိုဝ် ၸင်ႇၶိုၼ်းမႄးတူၺ်းလီလီထႅင်ႈၵမ်းၼိုင်ႈ သီႁူသီတႃတူၺ်းလီလီယူႇ။
“ပဵၼ်ၶဝ်တေႉတေႉလူး…”
ယိင်းသႅင်ၵေႃႈၶီႇလူတ်ႉၵႂႃႇၸွမ်းၸၢႆးၶိူဝ်းသေ ဢွၼ်ၵၼ်ဢွၵ်ႇႁိူၼ်းၵႂႃႇယဝ်ႉ။
“ယၢမ်ႈႁူႉၸၵ်းၵၼ်တင်းမေႃသွၼ်သေႁႃႉ…”
“ယၢမ်ႈယူႇတၢၼ်ႇတၢၼ်ႇ…”
“လႆႈၸႂ်ၶဝ်ၶႃႈႁႃႉ…”
“သူဢမ်ႇလႆႈၸႂ်ၶဝ်ႁႃႉ…မီးလွင်ႈတၢင်းသင်တေဢမ်ႇလႆႈၸႂ်ၶဝ်လႃႇ…”
“ႁဝ်းဢမ်ႇၶႂ်ႈဝႃႈၸိူင်ႉၼၼ်…မိူၼ်ၼင်ႇဝႃႈ..လႆႈၸႂ်ၸိူင်ႉၼင်ႇမၢဝ်ႇသၢဝ်ၼၼ်ႉၵႂႃႈ…”
“မီးၵူၼ်းလႆႈၸႂ်ၶဝ်ဢေႃႈ…”
“လၢတ်ႈပေႃးတၢၼ်ႇဝႃႈဢမ်ႇၸႂ်ႈတူဝ်ၸဝ်ႈၵဝ်ႇယဝ်ႈ”
“မၼ်းဢမ်ႇၸႂ်ႈႁဝ်းၼႃ”
“ၸိူင်ႉၼၼ်ႁႃႉ!..”
ယိင်းသႅင်ၵေႃႈၶဝ်ႈမိူဝ်းႁွတ်ႈၵႂႃႇတီႈၼႂ်းသႃလႃး ဢၼ်မီးၵူၼ်းသိုၵ်းယူႇဝႆႉပေႃးတဵမ်ၵႂႃႇမူတ်းၼၼ်ႉသေ ၵူၼ်းၸိူဝ်းၼၼ်ႉၵေႃႈဝႄႈတၢင်းပၼ်တီႈၼင်ႈယိင်းသႅင်ယူႇ။ ယိင်းသႅင်ၵေႃႈမိူၼ်ၼင်ႇဝႃႈဢမ်ႇပေႃးယၢမ်ႈၵႃႈႁိုဝ်လႄႈ မိူၼ်ၶႂ်ႈယူႇယၢပ်ႇမႃးဝႆႉယဝ်ႉ မိူဝ်ႈယၢမ်းၼင်ႇၼၼ် လႅင်းမိူင်းၵေႃႈၸွမ်းလူၺ်ႈပဵၼ်ႁူဝ်ၼႃႈပိူၼ်ႈၼႆသေ
“ဝၼ်းမိူဝ်ႈၼႆႉ…ဢၼ်ႁဝ်းမႃးၼင်ႈဢုပ်ႇၵုမ်ၵၼ်ယူႇၼႆႉၵေႃႈ…တွၼ်ႈတႃႇႁႂ်ႈပေႃးလႆႈမႃးႁူႉၸၵ်းမိုတ်ႈၵိုဝ်းၵၼ်တင်းမေႃယႃမႂ်ႇႁဝ်းၼၼ်ႉယဝ်ႉ…မေႃယႃၵေႃႈလႆႈၶဝ်ႈမႃးယူႇၼႂ်းၸုမ်းႁဝ်းယဝ်ႉလႄႈ…ထုၵ်ႇလီႁူႉၸၵ်းၵူၼ်းၼႂ်းၸုမ်း…ၸဵမ်ပုၼ်ႈၽွၼ်းၼႃႈၵၢၼ်ၵူၼ်းၼႂ်းၸုမ်းပဵၼ်သင်ပဵၼ်ၸိူဝ်ႉႁိုဝ်ၽွင်ႈယူႇ…လွင်ႈၼႃႈၵၢၼ်ဢၼ်ၸုမ်းႁဝ်းႁဵတ်းသၢင်ႈတႄႉသူတေႁူႉယူႇဢမ်ႇၸႂ်ႈႁိုဝ်…ၸုမ်းၼူၵ်ႉဢႅၼ်ႇၾႃႉၼႆ…”
“ဢေႃႈ…ႁူႉယူႇၶႃႈ…”
“ၸုမ်းႁဝ်းပဵၼ်ၸုမ်းႁဵတ်းၵၢၼ်လပ်ႉၸုမ်းၼိုင်ႈ…ႁဝ်းတေယူႇတီႈဢၼ်မီးၵူၼ်းႁူႉၸၵ်းႁဝ်းဢေႇလႄႈ…တေယူႇတီႈဢၼ်ၵူၼ်းႁူႉၸၵ်းႁဝ်းလီလီသေ…ပဵၼ်တီႈဢၼ်ႁဝ်းဝႆႉၸႂ်လႆႈၼၼ်ႉယဝ်ႉ…ယိုင်ႈၵူၼ်းႁူႉၸၵ်းႁဝ်းဢေႇၵႃႈႁိုဝ်…လွင်ႈႁူမ်ႇလူမ်ႈၸုမ်းႁဝ်းၵေႃႈတေလီၵၼၼ်ႉ…ယဝ်ႉၵေႃႈဢၼ်ႁဝ်းမႃးယူႇသဝ်းတီႈၼႆႈၼႆႉ…ႁဝ်းယူႇၸွမ်းလူၺ်ႈပဵၼ်သိုၵ်းယူဝ်းယူဝ်းၵူၺ်း…ဢမ်ႇမီးၽႂ်ႁူႉဝႃႈႁဝ်းပဵၼ်ၵူၼ်းႁဵတ်းၵၢၼ်လပ်ႉ…မီးၵူၼ်းၼႂ်းၸုမ်းႁဝ်းလႄႈ…ၵူၼ်းၼႂ်းတပ်ႉသိုၵ်းႁဝ်းၵူၺ်း…မိူဝ်ႈသူၶဝ်ႈမႃးယဝ်ႉ…သူၵေႃႈထုၵ်ႇလီႁူႉဝႆႉ…”
လႅင်းမိူင်းၵေႃႈတႄႇမႄးၵပ်းသိုပ်ႇၸိုဝ်ႈၵႂႃႇ
“ႁဝ်းၸိုဝ်ႈလႅင်းမိူင်း…ဢဝ်ဝႆႉပုၼ်ႈၽွၼ်းပဵၼ်ႁူဝ်ၼႃႈၼႂ်းၸုမ်း…ပဵၼ်ဝႆႉၸၼ်ႉၶုၼ်သိုၵ်း”
လႄႈသိုပ်ႇႁႂ်ႈၸၢႆးၶိူဝ်းၼႄႉၼမ်းၵႂႃႇယဝ်ႉ
“ႁဝ်းၸိုဝ်ႈၸၢႆးၶိူဝ်း…ပဵၼ်မေႃယႃလႄႈ…ဢဝ်ဝႆႉပုၼ်ႈၽွၼ်းၵႅမ်ႁူဝ်ၼႃႈၸုမ်း…ၸၼ်ႉၵႅမ်ၶုၼ်ႁၢၼ်”
“ႁဝ်းၸိုဝ်ႈၸၢႆးဢွင်ႇ…ပဵၼ်ဝႆႉၽူႈမၢႆ…ၸၼ်ႉႁူဝ်သိုၵ်း”
ယုမ်ႉၸူးယိင်းသႅင်မိူၼ်ပဵၼ်ၵူၼ်းမိုတ်ႈၵၼ်ငၢႆႈယူႇၼၼ်ႉယဝ်ႉ။
“ႁဝ်းၸိုဝ်ႈၸၢႆးႁၢၼ်…ပဵၼ်သၢႆလူမ်းလႄႈၽၢႆႇIT…ၸၼ်ႉႁူဝ်သိုၵ်း”
သဵင်ဝၢၼ်မိူၼ်ၼင်ႇသဵင်ၵႂၢမ်းၼၼ်ႉယဝ်ႉ ယိင်းသႅင်မႄးယၵ်ႉတူၺ်းၼႃႈလီလီသေ ဢဝ်ၼႃႈၸၢႆးႁၢၼ်သမ်ႉပေႃးလႅင်လူင်မႃးၵမ်းလဵဝ်။
“ၶႃႈၸိုဝ်ႈၸၢႆးလၢဝ်…ပဵၼ်ၵူၼ်းႁုင်မိုဝ်ႉၵႅင်…သိုၵ်းႁၢၼ်”
တူၺ်းယဝ်ႉၼႃႈတႃၶႂ်ႈငၢႆးၶႄႇဝႆႉယူႇဢိတ်းၼိုင်ႈ ၵိုင်ႇတၢင်းပဵၼ်ၵူၼ်းႁုင်မိုဝ်ႉၵႅင်ယူႇၵူၺ်း။
“ၶႃႈၸိုဝ်ႈၶမ်းမိူင်း…ပဵၼ်ဝႆႉၽူႈၸွႆႈသၢႆလူမ်းလႄႈၽၢႆႇIT… ”
ၼႃႈယုမ်ႉၸိုၼ်ႈပၢင်ႇသႂ် သၢႆတႃပဵၼ်ဢၼ်ၸၼ်ၸႂ် ႁၼ်ယဝ်ႉပေႃးဢမ်ႇၶႂ်ႈပၢႆႈသၢႆတႃၼၼ်ႉယဝ်ႉ။ၵူၼ်းၸိူဝ်းဢၼ်ၵိုတ်းၸိူဝ်းၼၼ်ႉၵေႃႈ ဢွၼ်ၵၼ်ၼႄႉၼမ်းတူဝ်ၵႂႃႇၵေႃႉလႂ်ၵေႃႉၼၼ်ႉ။ ထိုင်ၵမ်းယိင်းသႅင်မႃးယဝ်ႉၵေႃႈ
“ၶႃႈၸိုဝ်ႈယိင်းသႅင်…ပဵၼ်ဝႆႉမေႃယႃယိင်း…ၸၼ်ႉႁူဝ်ႁၢၼ်”
ဝၢႆးၼၼ်ႉလႅင်းမိူင်းၵေႃႈ သိုပ်ႇလၢတ်ႈၵႂႃႇထႅင်ႈ
“တေယွၼ်းလၢတ်ႈဝႆႉတီႈၼႆႈ…ၵူဝ်ၵူႈၵေႃႉဢမ်ႇပွင်ႇၸႂ်…ယိင်းသႅင်…ပဵၼ်မေႃယႃၼႂ်းၸုမ်းႁဝ်းယဝ်ႉသေတႃႉ…ဢမ်ႇၸၢင်ႈယူႇၸွမ်းၸုမ်းႁဝ်း…ၵွပ်ႈပိူဝ်ႈတေလႆႈႁဵတ်းၵၢၼ်တီႈၼႂ်းဝၢၼ်ႈ…ၸွႆႈတူၺ်းထိုင်ယူတ်းယႃပၼ်ၵူၼ်းမိူင်းၼႂ်းဝၢၼ်ႈၵႂႃႇ…သင်မီးၵၢၼ်ၸမ်ပဵၼ်မႃး…မေႃယႃၵေႃႈတေလႆႈမႃးႁဵတ်းၵၢၼ်ၼႂ်းၸုမ်းႁဝ်းၶိုၼ်းယူႇ…ၸွင်ႇမီးၽႂ်ဢမ်ႇပွင်ႇၸႂ်ႁိုဝ်…”
“ဢမ်ႇမီးၶႃႈ…”
“ၸွင်ႇမီးၽႂ်ၶႂ်ႈထၢမ်သင်…မိူဝ်ႈလႂ်မိူဝ်ႈႁူပ်ႉထူပ်းၵၼ်ယဝ်ႉၵေႃႈ…မီးလွင်ႈသင်ၶႂ်ႈလၢတ်ႈၵေႃႈလၢတ်ႈလႆႈယူႇ…”
“ၸွမ်းလူၺ်ႈၼႂ်းၸုမ်းႁဝ်းဢမ်ႇတွၼ်ႉယၢမ်ႈမီးၽူႈယိင်းသေပွၵ်ႈ…ပဵၼ်သင်လႄႈယူႇယူႇၵေႃႈမီးၽူႈယိင်းမႃးၼႂ်းၸုမ်းႁဝ်းၶႃႈလႃႇ…ႁူဝ်ၼႃႈတၢင်ႇယွၼ်းႁႃႉ…ဢမ်ႇၼၼ်ၵေႃႈပိူၼ်ႈသူင်ႇမႃးပၼ်…”
မိူဝ်ႈၶေႃႈၵႂၢမ်းၼႆႉထၢမ်ဢွၵ်ႇမႃး သၢႆတႃၸုမ်းလုၵ်ႈၼွင်ႉမၼ်းဢွၼ်ၵၼ်ယၵ်ႉတူၺ်းၵႂႃႇတီႈလႅင်းမိူင်းတင်းမူတ်းယဝ်ႉ မုင်ႈမွင်းပႂ်ႉထွမ်ႇယူႇ။ လႅင်းမိူင်းၵေႃႈႁူႉယူႇဝႃႈ ၼမ်ႉၵႂၢမ်းၶဝ်ၶႂ်ႈဝႃႈသင်ၼႆ မီးယိင်းသႅင်လႄႈၶဝ်ဢမ်ႇလၢတ်ႈဢွၵ်ႇသိုဝ်ႈသိုဝ်ႈၵူၺ်း။
“ၼႃႈၵၢၼ်ႁဝ်း…ၵမ်ႈၼမ်ပဵၼ်ၵၢၼ်ဢၼ်လႆႈၸွႆႈထႅမ်ၵူၼ်း…မၢင်ပွၵ်ႈၵူၼ်းပဵၼ်တေၼမ်…မေႃယႃဢမ်ႇၵုမ်ႇထူၼ်ႈ…ႁဝ်းၵေႃႈလူဝ်ႇမေႃယႃ…မေႃယႃတွၼ်ႈတႃႇၼႂ်းသိုၵ်းတႄႉ…မီးၽူႈၸၢႆးၵူၺ်းၵေႃႈဢမ်ႇပဵၼ်သင်…ၵူၺ်းၵႃႈတွၼ်ႈတႃႇၼႂ်းၼႃႈၵၢၼ်ႁဝ်း…ထုၵ်ႇလီမီးမေႃယႃယိင်းၼၼ်ႉယဝ်ႉ…ယူႇတီႈၽူႈယႂ်ႇၵူၼ်းလူင်ပႃႈၼိူဝ်ၵေႃႈ…ႁၼ်ဝႃႈ…မေႃယႃၶိူဝ်းႁဝ်း…မီးလွင်ႈယၢပ်ႇၽိုတ်ႇၼႂ်းၼႃႈၵၢၼ်မၢင်တွၼ်ႈၼႆသေ…တႃႇႁႂ်ႈပေႃးၸၢင်ႈႁဵတ်းသၢင်ႈၵၢၼ်ငၢႆႈၼၼ်ႉ…လႆႈသူင်ႇမေႃယႃယိင်းမႃးၼၼ်ႉၼႃႇ…ၼႂ်းၸုမ်းႁဝ်းၵေႃႈလူဝ်ႇတင်းမေႃယႃယိင်းလႄႈမေႃယႃၸၢႆးလူး…”
“ဢေႃႈ…ပွင်ႇၸႂ်ယဝ်ႉၶႃႈ…”
“ၸွင်ႇမီးၶေႃႈထၢမ်သင်ထႅင်ႈႁိုဝ်…”
“ဢမ်ႇမီးယဝ်ႉၶႃႈ…”
“မေႃယႃလူး…”
“ဢမ်ႇပႆႇမီးၶႃႈ…”
“ပေႃးၼၼ်ပၢင်ႁူပ်ႉထူပ်းႁဝ်းဝၼ်းမိူဝ်ႈၼႆႉၵေႃႈယဝ်ႉၵႂႃႇတီႈၼႆႈၵူၺ်းယဝ်ႉ…”
ပၢင်ႁူပ်ႉထူပ်းယဝ်ႉ ၵူၼ်းၵေႃႈယၢႆႈၵၼ်ၵႂႃႇႁဵတ်းၵၢၼ်ယူႇယဝ်ႉ။ တီႈၼႂ်းသႃလႃးၼၼ်ႉၵေႃႈ မီးလႅင်းမိူင်း၊ ၸၢႆးၶိူဝ်းလႄႈ ယိင်းသႅင်ၶဝ်သၢမ်ၵေႃႉၵူၺ်း။
“ၸွမ်းလူၺ်ႈသူပဵၼ်မေႃယႃသေ…မီးလွင်ႈသင်ၵေႃႈဢုပ်ႇၵၼ်ၵႂႃႇလႄႈၼႃႈ…လူဝ်ႇသင်ၵေႃႈလၢတ်ႈတီႈၸၢႆးၶိူဝ်းလႆႈယူႇ…ဢမ်ႇၼၼ်ၵေႃႈလၢတ်ႈတီႈႁဝ်းၵေႃႈလႆႈ…”
“ဢေႃႈၶႃႈ…”
လႅင်းမိူင်းၵေႃႈပၼ်ႁႂ်ႈၸၢႆးၶိူဝ်းၶႃဢုပ်ႇၵုမ်ၵၼ်ၵႂႃႇ..
“ႁူဝ်ၼႃႈ…တၼ်းမီးတၢင်းယၢမ်ႈၸိူင်ႉၼႆၸဵမ်မိူဝ်ႈလႂ်လႃႇၼႆႉ…” ၸၢႆးဢွင်ႇလၢတ်ႈ။
“ၸိူင်ႉႁိုဝ်လႃႇ…”
“မိူၼ်ၸိူင်ႉဝႃႈ…ႁူဝ်ၼႃႈဢဝ်ၶူဝ်းတွၼ်ႈပၼ်မေႃသွၼ်…မေႃသွၼ်သမ်ႉဢဝ်မႃးပၼ်ၶႃႈၸိူင်ႉၼၼ်…”
“တေၶႂ်ႈလႆႈသူးၸိူင်ႉႁိုဝ်လႃႇ…မူပ်ႇတဝ်ႉႁႃႉ…ဢမ်ႇၼၼ်တဵင်ႇမၢၵ်ႇႁိၼ်သေလႅၼ်ႈ…တေလႆႈၵႅၼ်ႇၶႅင်မီးႁႅင်း…”
“ယင်းဢမ်ႇပႆႇလႆႈလၢတ်ႈၸိုဝ်ႈၶဝ်သေၵမ်း…ပေႃးတၼ်းပၼ်သူးၵၼ်ယဝ်ႉႁႃႉ…ၸႂ်ထိုင်ၵေႃႈၵႂႃႇႁႃၵေႃႈလႆႈယူႇလူး…ယူႇၵႂႃႇၸိူင်ႉၼႆမၼ်းသမ်ႉတေလႆႈလွင်ႈသင်…တေပၢႆႈၼႃႈၶဝ်ၵေႃႈပၢႆႈဢမ်ႇလွတ်ႈၼင်ႇၵဝ်ႇ…”
“ႁဵတ်းၸိူင်ႉႁိုဝ်ႁူႉလႃႇ…”
“လိူဝ်သေႁူဝ်ၼႃႈယဝ်ႉ…ၼႂ်းၸုမ်းႁဝ်းဢမ်ႇမီးၵႂၢမ်းလပ်ႉတေႃႇၵၼ်…”
“လိူဝ်သေလွင်ႈႁႃးယဝ်ႉ…ဢၼ်ၶႂ်ႈႁူႉထႅင်ႈတၢင်ႇမဵဝ်းၼႆႉဢမ်ႇမီးယဝ်ႉႁႃႉ…”
“လွင်ႈဢၢႆႈၸၢႆးၼၼ်ႉလူး…တေႁဵတ်းႁိုဝ်လႃႇ…တေပွႆႇၶိုၼ်ႈႁူင်းႁဵၼ်းမိူဝ်ႈလႂ်…”
လႅင်းမိူင်းထူၺ်ႈၸႂ်လူင်ယဝ်ႉ။
“ယၢပ်ႇလိူဝ်သေတေထူပ်းၼႃႈၶဝ်ၼႆႉ…ဢမ်ႇမီးသင်ထႅင်ႈယဝ်ႉ…”
“မၼ်းယင်းတေဢမ်ႇယၢပ်ႇတၢၼ်ႇ..ၶတ်းၶႂၢင်ၶိုၼ်းၶေႃႈၸိသင်ႇလူးၵွၼ်ႇ…တီႈတေႉၵေႃႈၶႂ်ႈႁၼ်ၶဝ်ယူႇၵူၺ်းၼင်ႇၵဝ်ႇ…ၵႂႃႇထူပ်းၶဝ်တူၺ်းၵွၼ်ႇလႄႈ…ပဵၼ်ႁိုဝ်မီးႁိုဝ်ဝၢႆးလင်ၸွင်ႇတေၶိုၼ်းဝူၼ်ႉၵေႃႈလႆႈ…”
“ပေႃးၼၼ်..ၸၢမ်းဢဝ်လိၼ်သေထူင်ၼိုင်ႈတၢင်ႇမႃႇသေလႅၼ်ႈလႄႈၼႃႈ…ႁဵတ်းငၢႆႈငၢႆႈၵူၺ်း…”
“ၶႃႈတဵင်ႇလႅၼ်ႈၵူႈၶမ်ႈပၢႆးယူႇလီၶႃႈၶႅမ်ႉၼႃႇယဝ်ႉဝႃႈ…”
“မၼ်းယင်းဢမ်ႇယၢပ်ႇတၢၼ်ႇၶတ်းၶႂၢင်ၶိုၼ်းၶေႃႈၸိသင်ႇလူး…တဵင်ႇတူၺ်းၵွၼ်ႇလႄႈ…ပဵၼ်ႁိုဝ်မီးႁိုဝ်ဝၢႆးလင်ၸွင်ႇၵွႆႈဝႃႈၵၼ်ထႅင်ႈ…ၸၢမ်းလႅၼ်ႈပၼ်ႇတပ်ႉသေႁႃႈႁွပ်ႈၵေႃႈလႆႈယဝ်ႉၵဝ်ႇ…”
“ႁူႉယဝ်ႉ…ၵွပ်ႈသင်လႄႈဢမ်ႇႁတ်းတေႃႇၼႃႈၶဝ်…ပဵၼ်ၵူၼ်းၸႂ်ႁၢႆႉၸိူင်ႉၼႆလူး…”
“သိပ်းႁႃႈႁွပ်ႈ!…”
ဢဝ်ၸၢႆးဢွင်ႇပေႃးဢမ်ႇၸၢင်ႈလၢတ်ႈၵႂၢမ်းထႅင်ႈသင်ထႅင်ႈ ၸၢႆးၶိူဝ်းၶႃၵေႃႈ ဢုပ်ႇၵုမ်ၵၼ်ယဝ်ႉၵႂႃႇသေ ယိင်းသႅင်မႃးၸူးတီႈလႅင်းမိူင်း..
“မေႃယႃလူဝ်ႇသင်မီးၸိူင်ႉႁိုဝ်ၵေႃႈလၢတ်ႈလႆႈယူႇၼႃႈ…”
“ဢေႃႈ…ၶႃႈတေလႆႈႁဵတ်းၵၢၼ်ၸွမ်းၶၢဝ်းယၢမ်းၶႃႈႁ…ဢမ်ႇၼၼ်ၵေႃႈတေလႆႈႁဵတ်းၸွမ်းၵၢၼ်…”
“မေႃယႃဝူၼ်ႉဝႃႈႁဵတ်းၸိူင်ႉႁိုဝ်တေလီလႃႇ…ယူႇတီႈမေႃလိူၵ်ႈၵူၺ်း…”
“ႁဝ်းမၼ်းၵေႃႈဢမ်ႇၸႂ်ႈႁူင်းယႃ…သင်ဝႃႈႁဵတ်းၸွမ်းၶၢဝ်းယၢမ်း…ပေႃးဢမ်ႇမီးၵူၼ်းပဵၼ်ၵေႃႈသမ်ႉယူႇလၢႆၵူၺ်း…မၢင်ပွၵ်ႈပူၼ်ႉၶၢဝ်းယၢမ်းယဝ်ႉမီးၵူၼ်းပဵၼ်ၵေႃႈတိုၵ်ႉတေလႆႈႁဵတ်းယူႇ…ႁဵတ်းၸိူင်ႉႁိုဝ်ၵေႃႈမေႃယႃၵေႃႈဢမ်ႇလႆႈႁဵတ်းၸွမ်းၼင်ႇၶၢဝ်းယၢမ်းမီးယူႇယဝ်ႉ…ၶႃႈတေလိူၵ်ႈႁဵတ်းၸွမ်းၵၢၼ်ၵူၺ်းယဝ်ႉ…”
“ယၢပ်ႇၸႂ်မေႃယႃယဝ်ႉ…ပေႃးၸၢႆးၶိူဝ်းတၼ်းၵေႃႈတေႁႂ်ႈမၼ်းမိူဝ်းၸွႆႈ…”
“ဢေႃႈ…ပေႃးၼၼ်ၶႃႈတေယွၼ်းမိူဝ်းၵွၼ်ႇၶႃႈယဝ်ႉ…”
“မိူဝ်ႈလဵဝ်ၵေႃႈၵၢင်ဝၼ်းတဵင်ႈယဝ်ႉ…ၵိၼ်ၶဝ်ႈႁူမ်ႈၵၼ်သေၸင်ႇမိူဝ်းလႄႈ…”
ၸၢႆးဢွင်ႇၵေႃႈၵိုတ်းလိုဝ်ႈႁိူဝ်ႉယဝ်ႉ တင်းႁိူဝ်ႉတင်းထူၺ်ႈၸႂ်လူင်သေ
“ၸႂ်ႈယဝ်ႉ…မေႃယႃ…ပႂ်ႉၵိၼ်…ႁွႆးမိုဝ်း…ၵူၼ်းႁဵတ်း…ၶဝ်ႈၽၵ်း…ႁဝ်းသေ…ၸင်ႇမိူဝ်းလႄႈ…”
“ၵႂႃႇႁဵတ်းသင်မႃးၶႃႈလႃႇ…တေႃႉလိၼ်ၶႃႈႁႃႉ…တေႁိူဝ်ႉတေႉယဝ်ႉ…”
“ႁူႉယဝ်ႉ…ပဵၼ်သင်ပိူၼ်ႈသူင်ႇမႃးမေႃယႃၽူႈယိင်း…ယွၼ်ႉပိူဝ်ႈမေႃသႂ်ႇၸႂ်မေႃမႆႈၸႂ်ၸိူင်ႉၼႆလူး…ပေႃးမီးၵူၼ်းမႆႈၸႂ်ၸိူင်ႉၼႆၵေႃႈ…ႁိူဝ်ႉသမ်ႉပေႃးႁၢႆၵႂႃႇယဝ်ႉ…” တူၺ်းၼႃႈလႅင်းမိူင်းသေလၢတ်ႈၶိတ်ႈလၢတ်ႈပၢႆႇၵႂႃႇယူႇ။
တီႈၼိူဝ်ၽိူၼ်မူႇၶဝ်ႈဢၼ်ယၢဝ်းၸႅၼ်ႇၵၼ်ဝႆႉ မီးၶဝ်ႈၽၵ်းတမ်းတဵမ်ၽိူၼ် ၶဝ်ၵေႃႈဢွၼ်ၵၼ်ၼင်ႈၵိၼ်ၶဝ်ႈၵုမ်းၵၼ်ၵႂႃႇ။ လႅင်းမိူင်းၵေႃႈ သွတ်ႇၼင်ႈၶဝ်ႈၵႂႃႇၼႂ်းၵႄႈလုၵ်ႈၼွင်ႉမၼ်းသေ ၵိၼ်ၶဝ်ႈႁူမ်ႈမူႇၵၼ်သေ ၼင်ႈဢုပ်ႇၵၼ်ၵႂႃႇယူႇ။ မိူဝ်ႈလႆႈႁၼ်ၸိူင်ႉၼၼ် သၢႆတႃယိင်းသႅင်ယၵ်ႉတူၺ်းလႅင်းမိူင်းပေႃးဢမ်ႇၽႅပ်ႉလႆႈ ၼင်ႈၵိၼ်ၶဝ်ႈယူႇၵေႃႈ ပေႃးဢမ်ႇပဵၼ်ၵိၼ်ယဝ်ႉ ၼင်ႈသေယုမ်ႉယူႇ မိူဝ်ႈတိုၵ်ႉမိုင်တူၺ်းလႅင်းမိူင်းယူႇၼၼ်ႉ ၵိုင်ႉၵၢင်ႉငိၼ်းသဵင်ၸၢႆးၶိူဝ်းမႃးၵမ်းလဵဝ်ယဝ်ႉ။
“ၶဝ်ႈသူတေၵတ်းမူတ်းယဝ်ႉ…”
“ဢေႃ…ၸႂ်ႈႁႃႉ…” ၸင်ႇတေၵိၼ်ၶဝ်ႈမၼ်းၵႂႃႇယဝ်ႉ။
