သဵၼ်ႈတၢင်းလိၼ်ဢၼ်ပဵင်းလႄႈသိုဝ်ႈဝႆႉ တီႈဢၼ်ဢမ်ႇပေႃးၵႆဝၢၼ်ႈၵေႃႈ မီးသူၼ်မီးႁႆႈႁဵတ်းပဵၼ်ၶွပ်ႇပဵၼ်လႅၼ်တၢင်းသေ ၸႅၼ်ႇၵၼ်ၶပ်ႉယႆလူင်ၵႂႃႇ တီႈၵႆဝၢၼ်ႈၵႆဝဵင်းၵေႃႈ တေႃႈမီးပႃႇမႆႉယႂ်ႇမႆႉလူင်လွမ်ႉဝႆႉၶွပ်ႇၶၢင်ႈတၢင်း သမ်ႉပေႃးသုမ်ႇငမ်းငိုပ်းတၼ်ၵႂႃႇမူတ်း တူၺ်းၵႂႃႇၽၢႆႇလႂ်ႁၼ်ပဵၼ်တူၼ်ႈမႆႈတူၼ်ႈတွၵ်ႇ ဢွၵ်ႇပႃးမွၵ်ႇယိူဝ်ႈ ၵၢပ်ႇမိူဝ်ႈပေႃးမိၼ် သဵင်ၸွၼ်ႈသဵင်ၼႆႇတႆႇၶိုၼ်ႈတူၼ်ႈမႆႉ သဵင်ၼူၵ်ႉသဵင်ၼူႁွင်ႉမေႃးဢူၼ်ပၼ်း မိူၼ်လႆႈႁွတ်ႈၵႂႃႇတီႈၼႂ်းပႃႇထိူၼ်ႇၼၼ်ႉယဝ်ႉ။ မိူဝ်ႈလတ်းၽၢၼ်ႇၵႂႃႇသဵၼ်ႈတၢင်းၼႂ်းၵႄႈပႃႇမႆႉလူင်ၼႆႉ ၸိုင်ႉပေႉၵတ်းယဵၼ်ၸႂ်လီ လူမ်းမႆႈလူမ်းၶီပေႃးၶႂ်ႈႁၢႆၵႂႃႇမူတ်းယဝ်ႉ ယွၼ်ႉလႆႈသုတ်ႇလူမ်းလီလီလူး။
ႁူဝ်ႁိုဝ်ႉၵေႃႈၶဝ်ႈမႃးယဝ်ႉ ၽူၼ်ၵေႃႈတူၵ်းလူင်းပေႃးဢမ်ႇထၢတ်ႇဢမ်ႇဝၢႆး သဵၼ်ႈတၢင်းလီၵေႃႈၵွပ်ႈပဵၼ်တၢင်းလိၼ်လႄႈ ႁိုဝ်လွတ်ႈလႆႈတၢင်းဢုင်လႃႇ လိူဝ်သေဢုင်ယဝ်ႉသမ်ႉပိူဝ်ႉ ပိူဝ်ႉယဝ်ႉသမ်ႉမိုၼ်ႈထႅင်ႈ ပေႃးဢမ်ႇမေႃၵႂႃႇၵေႃႈမေႃလူမ်ႉၵူၺ်း။
လႅင်းမိူင်းတင်းၸၢႆးၶိူဝ်းၵေႃႈ လႆႈဢွၼ်ၶီႇတၢင်းလူတ်ႉၶိူင်ႈသေ လတ်းၶၢမ်ႈဝၢၼ်ႈၵႂႃႇယဝ်ႉ၊ မိူဝ်ႈမိူဝ်းၵႂႃႇၸွမ်းတၢင်းၼၼ်ႉ တေဢၢၼ်းၵႂႃႇလႄႇဝဵင်းၼႆလႄႈ ဢမ်ႇသၢင်ႇထုၵ်ႇ သမ်ႉလႆႈၵႂႃႇႁူပ်ႉၺႃးလူတ်ႉၶိူင်ႈလမ်းၼိုင်ႈလူမ်ႉယူႇတီႈၵၢင်တၢင်း ၶႃၵေႃႈၸင်ႇၵိုတ်းလူတ်ႉသေၶဝ်ႈၵႂႃႇၸွႆႈယူႇ။ လႆႈႁၼ်လူမ်ႉၸဵပ်းႁႅင်းၼႃႇလႄႈ ဢွၼ်ၵၼ်ႁိပ်ႈၼႅတ်ႈၸွႆႈဢဝ်ၶဝ်ႈမိူဝ်းၵႂႃႇၶိုၼ်းၼႂ်းဝၢၼ်ႈၼၼ်ႉယဝ်ႉ။ ၵွပ်ႈဝႃႈမၼ်းၵေႃႈဢမ်ႇလႆႈယူႇၵႆၼႂ်းဝၢၼ်ႈၼၼ်ႉၵႃႈႁိုဝ် သွင်ၶႃၵေႃႈဢဝ်မိူဝ်းသူင်ႇပၼ်တီႈႁိူၼ်းၵူၼ်းၵေႃႉၼၼ်ႉၵႂႃႇ ၵူၼ်းႁိူၼ်းၶဝ်ၼၼ်ႉၵေႃႈ ဢွၼ်ၵၼ်မႆႈၸႂ်မႆႈၶေႃးၸွမ်းၼႃႇသေ ၸင်ႇလႆႈၵႂႃႇၶႆႈမေႃယႃမႃးပၼ်ၼႆယူႇ။ မိူဝ်ႈမေႃယႃႁွတ်ႈမႃးထိုင်ၵေႃႈ သမ်ႉပေႃးဢမ်ႇလူဝ်ႇႁဵတ်းသင်ပၼ်ယဝ်ႉ။
“မိူၼ်ဝႃႈၶႃႈလႅပ်ႈတေဢမ်ႇလႆႈႁဵတ်းသင်ယဝ်ႉ…”
မေႃယႃလႆႈႁၼ်ဢၼ်လႆႈလုမ်းလႃးပၼ်ႁွႆးၸဵပ်းၵူၼ်းပဵၼ်ၼၼ်ႉၶႅမ်ႉလႅပ်ႈလီယူႇလႄႈ
“ၵူၼ်းပဵၼ်ဢမ်ႇပဵၼ်သင်ယဝ်ႉၶႃႈ…”
“ထၢင်ႇတႄႉ…တေပဵၼ်ၸၢႆးၼုမ်ႇၶဝ်သွင်ၵေႃႉၼၼ်ႉၵူၺ်းတႄႉယဝ်ႉ…”
မိူဝ်ႈငိၼ်းၸိူင်ႉၼၼ်ၵေႃႈ မေႃယႃၸင်ႇၵိုင်ႉၵၢင်ႉၶိုၵ်းၸႂ်လႆႈသေလွင်ႈလွင်ႈမႃးလႄႈ။
“ၸွင်ႇႁူႉၶႃႈႁ…ဝႃႈၶဝ်လႅပ်ႈတေၵႂႃႇတၢင်းလႂ်…”
“ၶႃႈၵေႃႈဢမ်ႇႁူႉယဝ်ႉမိူၼ်ၵၼ်…ၶႃႈၵေႃႈမႃးမိူဝ်ႈမေႃယႃၵူၺ်း…”
မေႃယႃၼႅတ်ႈလႅၼ်ႈလူင်းႁိူၼ်းၵႂႃႇၵမ်းလဵဝ် ၵႂႃႇထၢမ်ႁႃၶႃသွင်ၵေႃႉတီႈၼိုင်ႈယဝ်ႉတီႈၼိုင်ႈယူႇ ထၢမ်ၽႂ်ၵေႃႈဢမ်ႇႁူႉဝႃႈၶႃၵႂႃႇတၢင်းလႂ်လႄႈ ၵႃႈလႆႈပွၵ်ႈမိူဝ်းၶိုၼ်းႁိူၼ်းၵူၺ်း မိူဝ်ႈႁွတ်ႈၶိုၼ်းႁိူၼ်းမိူၼ်လႅပ်ႈႁိူဝ်ႉၼႃႇသေ
“သႅင်…ၵူၼ်းပဵၼ်ၼႃႇဝႆႉႁႃႉ…”
“ႁဝ်းယင်းဢမ်ႇလႆႈႁဵတ်းပၼ်သင်လူးၵွၼ်ႇ…”
“ပေႉလႅပ်ႈႁိူဝ်ႉဝႆႉလႃႇ…”
“ႁဝ်းၵႂႃႇၸွမ်းႁႃၵူၼ်းဢၼ်တေမႃးႁပ်ႉႁဝ်းၼၼ်ႉၼႃႇ…ႁဝ်းၵေႃႈယူႇတီႈၼႆႈမႃးမီးပဵၼ်သွင်ဝၼ်းယဝ်ႉ…ဢမ်ႇႁၼ်ၽႂ်မႃးထၢမ်ႁႃႁဝ်းသေၵေႃႉလႃႈ…”
“ၸၢင်ႈပဵၼ်သင်…ယူႇၸွမ်းႁဝ်းတီႈၼႆႈၵေႃႈလႆႈယူႇလူး…တင်းႁဝ်းၵေႃႈဢမ်ႇမီးၵေႃႉသေ…”
“ႁဝ်းၵေႃႈၶႂ်ႈယူႇယူႇ…ၵူၺ်းၵႃႈဢမ်ႇလိူဝ်လႆႈၶေႃႈၸီႉသင်ႇလူး…တေႁဵတ်းႁိုဝ်ၸၢင်ႈထဵင်ၶိုၼ်းလႆႈ…”
ပေႃးဝႃႈၼၼ်ၵေႃႈ ၶမ်းႁွမ်ယဵၼ်ၵႂႃႇပႅတ်ႈယဝ်ႉ။
“ၸႂ်လမ်ႁဝ်းႁႃႉ… ”
“ဢမ်ႇ…ႁဝ်းတိုၵ်ႉဝူၼ်ႉသေလွင်ႈလွင်ႈယူႇၵူၺ်း…”
“ၸႂ်ႈတေႉ…မိူၼ်သူၶႂ်ႈလၢတ်ႈဝႃႈ…ႁဝ်းႁဵတ်းလႆႈတေႃႇသူၼၼ်ႉယဝ်ႉ…”
“ဢမ်ႇၶႂ်ႈဝႃႈၸိူင်ႉၼၼ်…ၵူၺ်းၵႃႈ……ပဵၼ်သင်လႄႈသိုၵ်းၼႆႉတေလႆႈႁဵတ်းၸွမ်းၶေႃႈၸိသင်ႇတိၵ်းတိၵ်းလႃႇ…” ၶမ်းႁွမ်မိူၼ်တေမီးသတိမႃးသေ
“ၵေႃႈယဝ်ႉလႄႈ…ထၢင်ႇႁဝ်းတေတတ်းၸႂ်ပႆႇလႆႈ…”
ယိင်းသႅင်ၵေႃႈႁၢင်ႈႁႅၼ်းတူဝ်မၼ်းသေ
“သူတေၵႂႃႇလႂ်လႃႇ…”
“ႁဝ်းတေမိူဝ်းဝဵင်း…သူၸွင်ႇလူဝ်ႇသင်ႁိုဝ်…တေပိုတ်ႇႁဵၼ်းယဝ်ႉ…ဢမ်ႇလူဝ်ႇၶိူင်ႈၵမ်ႉၵႅမ်သင်ႁ…”
“ဢမ်ႇယဝ်ႉဝႃႈ…ၵူဝ်သူဢမ်ႇပေႉမႃး”
ယိင်းသႅင်ၵေႃႈဢဝ်တင်းလူတ်ႉၶိူင်ႈသေ ႁေႃႈမိူဝ်းၵႂႃႇတၢင်းဝဵင်းၼၼ်ႉလွႆးလွႆး။ ၸင်ႇမိူဝ်းႁွတ်ႈၵႂႃႇတီႈႁိူၼ်းလင်ၼိုင်ႈ ႁၼ်ၽူႈၸၢႆးသွင်ၵေႃႉ ၼင်ႈယူႇတီႈႁပ်ႉၶႅၵ်ႇၼၼ်ႉသေ ယွၼ်ႉဢမ်ႇယၢမ်ႈႁၼ်လႄႈဢမ်ႇႁတ်းလၢတ်ႈတေႃႇ ၸင်ႇသမ်ႉမိူဝ်းထၢမ်တူၺ်းတီႈၸဝ်ႈႁိူၼ်း လွင်ႈၵူၼ်းဢၼ်တေမႃးႁပ်ႉမၼ်းမိူဝ်းၼၼ်ႉၼႆယူႇ လိူၵ်ႈလိူၵ်ႈသမ်ႉၺႃးၵူၼ်းသွင်ၵေႃႉၼၼ်ႉလႄႈ မၼ်းၵေႃႈၶဝ်ႈၵႂႃႇၸူးၶႃယဝ်ႉတူင်ႉတၵ်ႉၵႂႃႇ
“မႂ်ႇသုင်ၶႃႈ…ၶႃႈၸိုဝ်ႈယိင်းသႅင်…ပဵၼ်မေႃယႃဢၼ်ပိူၼ်ႈသူင်ႇမႃးၼၼ်ႉဢေႃႈ…ၵူၺ်းၵႃႈၶႃႈပႂ်ႉသူၸဝ်ႈ…ပေႃးမီးၵႂႃႇသွင်ဝၼ်းယဝ်ႉၵေႃႈ…ဢမ်ႇႁၼ်သူမႃးႁပ်ႉသေပွၵ်ႈ…ဢမ်ႇလႆႈပွင်ႇၶၢဝ်ႇၸူးၵၼ်ၶႃႈႁိုဝ်…ဢမ်ႇၼၼ်ၵႃႈဢမ်ႇတၼ်းၶႃႈႁႃႉ…မီးပၼ်ႁႃၸိူင်ႉႁိုဝ်လႄႈဢမ်ႇလႆႈမႃးႁပ်ႉၶႃႈလႃႇ…သင်ဢမ်ႇတၼ်းႁပ်ႉၵေႃႈ…ပွင်ႇၶၢဝ်ႇပၼ်ၶိုၼ်းၵေႃႇလႆႈယူႇၶႃႈ…”
မိူၼ်ဝႃႈၵႂၢမ်းတူင်ႉတၵ်ႉမၼ်းၶႂ်ႈယၢဝ်းဝႆႉလႄႈ လႅင်းမိူင်းၵေႃႈဢွၵ်ႇၵႂႃႇပႅတ်ႈယဝ်ႉ ဢၢပ်ႈပၼ်ပုၼ်ႈၽွၼ်းၸၢႆးၶိူဝ်းဝႆႉသေ ယိင်းသႅင်ၵေႃႈ ၸွမ်းလူၺ်ႈလွင်ႈၶမ်ၸႂ်ဢၼ်ၵဵပ်းသိမ်းဝႆႉဢမ်ႇလႆႈယဝ်ႉၼၼ်ႉ လၢတ်ႈဢွၵ်ႇမႃးယဝ်ႉၵေႃႈၸႂ်ပေႃးလီလူင်ၵႂႃႇယူႇ။ ၸၢႆးၶိူဝ်းၵေႃႈဝႆႉသဵင်ၶႅင်ၶႅင်သေ
“မႂ်ႇသုင်…ႁဝ်းၸိုဝ်ႈၸၢႆးၶိူဝ်း…”
“သူပဵၼ်ႁူဝ်ၼႃႈၶႃႈႁ…”
ၸွမ်းလူၺ်ႈလွင်ႈၶမ်ၸႂ်ဢၼ်ၶႂ်ႈႁူႉၼၼ်ႉလႄႈ ၸၢႆးၶိူဝ်းဢမ်ႇတၼ်းတွပ်ႇ ယိင်းသႅင်သိုပ်ႇလၢတ်ႈထႅင်ႈ…
“ၶႃႈၶႂ်ႈႁူႉဝႃႈ..ပဵၼ်သင်လႄႈ…ဢမ်ႇမႃးႁပ်ႉၶႃႈလႃႇ…ပိူၼ်ႈသင်ႇႁဝ်းမႃးဝႃႈပေႃးႁွတ်ႈယဝ်ႉ…တေမီးၵူၼ်းမႃးပႂ်ႉႁပ်ႉၼႆ…ႁဝ်းမႃးၼင်ႈပႂ်ႉပဵၼ်ၶိုင်ႈဝၼ်းၵေႃႈဢမ်ႇႁၼ်ၽႂ်မႃး…”
“ႁဝ်းယွမ်းၼွမ်းယူႇၶႃႈ…”
“ႁဝ်းၶႂ်ႈလႆႈလွင်ႈတၢင်း…လိူဝ်သေတေမႃးယွမ်းၼွမ်းၶႃႈဢေႃႈ…”
“မၼ်းၵေႃႈမီးလွင်ႈတၢင်း…ဢၼ်ဢမ်ႇၸၢင်ႈၸႅင်ႈပၼ်သူလႆႈလႄႈ…ႁဝ်းၵေႃႈပႆႇလႆႈၶေႃႈတွပ်ႇ..ပႆႇၸၢင်ႈတွပ်ႇပၼ်သူလႆႈ…”
“တေမီးလွင်ႈသင်ဢၼ်ဢမ်ႇၸႅင်ႈလႅင်းၶႃႈလႃႇ…ၽၢႆႇတၢင်းၼိူဝ်ၶဝ်သင်ႇမႃးဝႃႈႁႂ်ႈၶႃႈမႃးပဵၼ်မေႃယႃ…တီႈၼႂ်းၸုမ်းသူၼႆၶႃႈလူး…”
“မိူၼ်ဝႃႈတေမီးသေၸိူဝ်ႉသေလွင်ႈလႅၵ်ႈလၢႆႈဢိတ်းၼိုင်ႈဢေႃႈ…”
ၸၢႆးၶိူဝ်းၵေႃႈဢမ်ႇပေႃးမေႃလၢတ်ႈၵႃႈႁိုဝ်သေ မိူဝ်ႈမႃးၺႃးၵူၼ်းၵႆႉလၢတ်ႈၸိူင်ႉၼင်ႇယိင်းသႅင်ၼႆႉၼႆ တေလၢတ်ႈၸိူင်ႉႁိုဝ်ၵေႃႈပေႃးၵႂင်ၵႂႃႇမူတ်း ဢမ်ႇႁူႉဝႃႈတေလႆႈလၢတ်ႈၸူင်ႉႁိုဝ်ယဝ်ႉ။ ယၢမ်းၼၼ်ႉ…
“သူတေပဵၼ်သိုၵ်း..ဢၼ်ႁဵတ်းၸွမ်းၶေႃႈသင်ႇလႆႈလီတေႉၶႃႈယဝ်ႉ…ႁဝ်းၵေႃႈႁဵတ်းၸွမ်းၶေႃႈသင်ႇမိူၼ်ၵၼ်…ၶေႃႈသင်ႇလူင်းမႃးဝႃႈႁႂ်ႈႁဝ်းမႃးႁပ်ႉမေႃယႃတီႈဝဵင်းၼႆၵူၺ်း…ၶဝ်ၵေႃႈဢမ်ႇလႆႈလၢတ်ႈဝႃႈၶၢဝ်းယၢမ်းလႂ်မေႃယႃတေမႃး…”
“ႁဝ်းမိူဝ်းပႂ်ႉတီႈၼႂ်းဝၢၼ်ႈၼႆ…ၽူႈမီးပုၼ်ႈၽွၼ်းတီႈၼႆႈဢမ်ႇလႆႈပွင်ႇပၼ်ၶႃႈႁႃႉ…ဢမ်ႇၼၼ်သၢႆလူမ်းတၢင်းပုၼ်ႉဢမ်ႇပွင်ႇပၼ်သူၶိုၼ်း…ၼင်ႇႁိုဝ်သူပေႃးတေဢမ်ႇလႆႈၵႂႃႇႁပ်ႉၵႆ…ႁဝ်းပေႃးၶၢမ်ႇမိူဝ်းပႂ်ႉတီႈဝၢၼ်ႈပုၼ်ႉယဝ်ႉ…ပႂ်ႉပဵၼ်လၢႆဝၼ်းၵေႃႈဢမ်ႇႁၼ်ၽႂ်သေၵေႃႉ…”
“သူထုၵ်ႇလီပႂ်ႉတေႃႇႁဝ်းပေႃးတေမႃးႁပ်ႉၼၼ်ႉယဝ်ႉ…”
“ပဵၼ်သင်ၶႃႈလႃႇ…ဢမ်ႇၼၼ်ၵေႃႈတေႁႂ်ႈၶႃႈပွၵ်ႈမိူဝ်းၶိုၼ်း…”
“ပိူင်သိုၵ်းၵေႃႈတေလႆႈႁဵတ်းၸွမ်းၶၵ်ႉၸွမ်းတွၼ်ႈ…ယူႇၼႂ်းၶွပ်ႇၼၼ်ႉယဝ်ႉ…ယွၼ်ႉၼၼ်..တွၼ်ႈတႃႇတေပွင်ႇလႅင်းပၼ်သူၼၼ်ႉ…ႁဝ်းၵေႃႈတိုၼ်းတေလႆႈၸႂ်ႉၶၢဝ်းယၢမ်းယူႇ…”
“ၵႂၢမ်းသင်ႇလူင်းမႃးယဝ်ႉဢမ်ႇၸႂ်ႈၶႃႈႁိုဝ်…”
“ယွၼ်ႉၼၼ်ယဝ်ႉ…တေႁႂ်ႈႁဝ်းႁဵတ်းၵႂႃႇလူၺ်ႈဢမ်ႇပွင်ႇၶိုၼ်းလႆႈယူႇႁႃႉ…”
“ၸိူင်ႉႁိုဝ်ၶႃႈ…”
“ၸွမ်းလူၺ်ႈသူပဵၼ်ၽူႈယိင်း…သမ်ႉမီးၵေႃႉလဵဝ်ၵူၺ်းသေ…တေႁႂ်ႈၵႂႃႇယူႇၸွမ်းႁဝ်းၵူၼ်းၸၢႆးလၢႆလၢႆမၼ်းတေဢမ်ႇသၢင်ႇထုၵ်ႇ…ႁဝ်းၵေႃႈမီးၽႅၼ်ႁၢင်ႈႁႅၼ်းဝႆႉပၼ်သူ…ႁႂ်ႈသူယူႇၵႂႃႇၼႂ်းဝၢၼ်ႈ…ယူတ်းယႃပၼ်ၵူၼ်းၼႂ်းဝၢၼ်ႈၵႂႃႇသေ…ပေႃးဝႃႈႁဝ်းလူဝ်ႇၵၢၼ်လမ်ႇလွင်ႈမႃးၼႆ…ႁဝ်းၸင်ႇတေႁွင်ႉႁဵတ်းၵၢၼ်…ၵူၺ်းၵႃႈႁဝ်းပႆႇလႆႈၶေႃႈတွပ်ႇမႃးလႄႈဢမ်ႇပႆႇၸၢင်ႈပွင်ႇလႅင်းပၼ်သူလႆႈ…”
“ဢေႃႈ…ပွင်ႇၸႂ်ယဝ်ႉၶႃႈ…သင်လၢတ်ႈဝႆႉၸဵမ်တေႇမၼ်းၵေႃႈလီယူႇ…ၼႆႉသမ်ႉႁွတ်ႈမႃးယဝ်ႉတေလႆႈၵႂႃႇႁိုဝ်တေဢမ်ႇလႆႈၵႂႃႇၵေႃႈဢမ်ႇႁူႉ…သမ်ႉပေႃးဢမ်ႇလၢတ်ႈပွင်ႇလႅင်းပၼ်ၵၼ်ၶိုၼ်းၶႃႈလူး…ႁဝ်းယွမ်းၼွမ်းယူႇၶႃႈ…ဢၼ်လႆႈၶိုၼ်ႈသဵင်ၵႂႃႇမိူဝ်ႈၵႆႈၼၼ်ႉ…”
လႅင်းမိူင်းယၵ်ႉတူၺ်းၸၢႆးၶိူဝ်းယဝ်ႉယုမ်ႉဢိတ်းၼိုင်ႈသေ ႁဵတ်းႁႂ်ႈတၢင်းယုမ်ႉလႅင်းမိူင်းၼၼ်ႉ သၢႆတႃယိင်းသႅင် ပၢႆႈၽၢတ်ႇပေႃးဢမ်ႇလႆႈယဝ်ႉ။
“ၽိတ်းၵေႃႉမၼ်းယဝ်ႉ…ၽၢႆႇႁဝ်းၵေႃႈယွမ်းၼွမ်းယူႇမိူၼ်ၵၼ်…ဢၼ်ဢမ်ႇလႆႈပွင်ႇလႅင်းပၼ်သူႁႂ်ႈတႅတ်ႈတႅတ်ႈတေႃး…”
သၢႆတႃယိင်းသႅင်ၸဵမ်မိူဝ်ႈႁၼ်မႅၼ်ႈတၢင်းယုမ်ႉလႅင်းမိူင်းယဝ်ႉၵေႃႈ ႁိုဝ်တေႃႈၶၢႆႉသၢႆတႃၽၢတ်ႇလႆႈ မိူၼ်ႇယၵ်ႉတူၺ်းၸွမ်းလွင်ႈႁဵတ်းသၢင်ႈလႅင်းမိူင်း ၸဵမ်မိူဝ်ႈတူင်ႉၼိုင်၊ လွင်ႈလၢတ်ႈၸႃ၊ လွင်ႈဢၼ်ၶဝ်ႁဵတ်းယူႇၵူႈလွင်ႈလႄႈ လွင်ႈဢၼ်တူၺ်းႁၼ်လႆႈမိူဝ်ႈမီးယူႇၽၢႆႇၼႃႈၼၼ်ႉ သိုပ်ႇယၵ်ႉတူၺ်းႁူဝ်တေႃႇတိၼ်ယဝ်ႉ သမ်ႉပၢႆမႄးတဝ်ႉၵၢင်းသေယၵ်ႉတူၺ်းလီလီထႅင်ႈလူးၵွၼ်ႇ မိူဝ်ႈတိုၵ်ႉမိူၼ်ႇတူၺ်းယူႇၼၼ်ႉ
“သူ…မီးလွင်ႈသင်တီႈႁဝ်းၶႃႈ…”
သဵင်ၸၢႆးၶိူဝ်းၼၼ်ႉယႃႉသတိမၼ်း သမ်ႉပေႃးတိုၼ်ႇၽႅတ်းလူင်ၵႂႃႇၵမ်းလဵဝ်။
“ၶဝ်!…ၶဝ်တၼ်းၵႂႃႇမိူဝ်ႈလႂ်ယဝ်ႉလႃႇ…”
“ႁူဝ်ၼႃႈႁႃႉ…ဢွၵ်ႇၵႂႃႇႁိုင်ယဝ်ႉ…ယူဝ်သူမီးလွင်ႈတေလၢတ်ႈတီႈႁဝ်း…ႁၼ်သူၼင်ႈယၵ်ႉတူၺ်းၼႃႈႁဝ်းယူႇၸဵမ်ၵႆႈၼၼ်ႉယဝ်ႉ…”
“ပဵၼ်သူႁႃႉ!…” မိူၼ်ႁၢင်ႈတူၵ်းၸႂ်သေ မႄးသီတႃမၼ်းလီလီယဝ်ႉ။
“တႃလၢႆးၵူၺ်းႁႃႉၼႆႉ…”
“ၸွင်ႇမီးလွင်ႈသင်ထႅင်ႈတေႁႂ်ႈၸွႆႈယူႇႁႃႉ…မိူၼ်ၼင်ႇၶူဝ်းၶွင်ဢၼ်လူဝ်ႇဢဝ်မိူဝ်းၼၼ်ႉၸွင်ႇမီးႁိုဝ်…ႁဝ်းတေလႆႈဢဝ်မိူဝ်းပၼ်…”
“မီးတိူၵ်ႈယႃသွင်တိူၵ်ႈၵူၺ်းၼင်ႇၵဝ်ႇ…တိူၵ်ႈမၼ်းၶႂ်ႈႁၢမ်ႉယႂ်ႇဝႆႉၶႃႈၼေႈ…ၵူၺ်းၵႃႈသူတေၸၢင်ႈဢဝ်မိူဝ်းယူႇႁႃႉ…”
“ၸၢင်ႈယူႇ…ဢမ်ႇၸၢင်ႈၵေႃႈမီးလွၵ်းလၢႆးမၼ်းယူႇၵူၺ်း…ယႃႇမႆႈၸႂ်…သူမိူဝ်းၵႂႃႇလႃႈ…”
“ႁဝ်းၽၢၵ်ႇသူဝႆႉယဝ်ႉပေႃးၼၼ်…”
သိုပ်ႇလူထႅင်ႈတွၼ်ႈတေမႃးၶႃႈ။
