ၶိင်ႇၶၢဝ်းမႂ်မႆႉလူၼ်ႇၽိူဝ် တီႈၼိူဝ်ၵွင်းသၼ်လွႆၼၼ်ႉၵေႃႈ ၽိူဝ်မႆႉပိဝ်ႁူင်ႈပေႃးမိူဝ် ဢၢႆမွၵ်ႇမႆႉႁွမ်တူဝ်ႈၸွမ်းလွႆပေႃးတဵမ်ၵႂႃႇသဵင်ႈ ၶိင်ႇၶၢဝ်းၵၢင်ဝၼ်းတဵင်ႈမႃးယဝ်ႉ ၸုမ်း ၼူၵ်ႉဢႅၼ်ႇၾႃႉ ၶဝ် ဢၼ်ဢွၵ်ႇၶၢဝ်းတၢင်းၵႂႃႇၼၼ်ႉ လႆႈတမ်းဝၢင်းၶူဝ်းၶွင်လိုဝ်ႈႁိူဝ်ႉၵႂႃႇပွတ်းတၢင်း ယူႇယဝ်ႉ။ ၶဝ်ၵေႃႈၸင်ႇဢွၼ်ၵၼ်ႁဵတ်းသုမ်ႉၽႃႈယၢင် ၵၢင်ႁဵတ်းတီႈၼွၼ်းၽႂ်မၼ်း ႁဵတ်းပဵၼ်ပၢင်သဝ်းၶဝ်ၵႂႃႇ ၸိူဝ်းတဵၵ်းၼမ်ႉၵေႃႈၸွႆႈတဵၵ်း ၸိူဝ်းႁဵတ်းၶဝ်ႈၽၵ်းၵေႃႈႁဵတ်းသေ ၶဝ်ၵေႃႈႁဵတ်းၵၢၼ်ၽႂ်ၵၢၼ်မၼ်းႁႂ်ႈပေႃးၸဵဝ်းယဝ်ႉၸဵဝ်းတူဝ်ႈၼႆယူႇယဝ်ႉ။
ၸၢႆးၶိူဝ်းလႄႈလႅင်းမိူင်းၵေႃႈ ဢွၼ်ၵၼ်ၵႂႃႇၵူတ်ႇထတ်းတူၺ်း ႁိမ်းႁွမ်းၸိူဝ်းၶဝ်ယူႇၼၼ်ႉသေၸင်ႇမုင်ႈၵႂႃႇတူၺ်းတီႈၵႆၵႆလႆႈႁၼ်မႅၼ်ႈၺႃးသၢႆသိုၵ်းၵူၼ်းၼမ်ပဵၼ်ၽုင်ပဵၼ်သၢႆလူင်မႃးယဝ်ႉ မႄးဢဝ်မၢၼ်ႇပျွင်းထွင်ႇတူၺ်းလီလီသေ
“ၺႃးယဝ်ႉၵမ်းၼႆႉႁႃး!!…”
မိူဝ်ႈႁၼ်ၸိူင်ႉၼၼ်ၵေႃႈ ၸင်ႇလႆႈႁိပ်ႈၼႅတ်ႈပွင်ႇၶၢဝ်ႇႁႂ်ႈၶၢႆႉတီႈယူႇၵမ်းလဵဝ်၊ တေၸၢင်ႈႁဵတ်းႁိုဝ်လႃႇသုမ်ႉဢၼ်ၵၢင်ယူႇၼၼ်ႉၵေႃႈ ၵႃႈလႆႈသိမ်းၽဵဝ်ႈၶိုၼ်းမူတ်း၊ ၾႆးဢၼ်ၵေႃႇဝႆႉယူႇၼၼ်ႉၵေႃႈ ၵႃႈလႆႈမွတ်ႇပႅတ်ႈထူမ်ပႅတ်ႈမူတ်း၊ ဢၼ်ႁိူဝ်ႉမႃးတၢင်းဝၼ်းၼၼ်ႉၵေႃႈ ႁိုဝ်တေၸၢင်ႈလိုဝ်ႈယဝ်ႉလႃႇ သမ်ႉဝႃႈတွင်ႉမႆႈၶဝ်ႈၼႃႇတၢၼ်ႇလႂ်ၵေႃႈယႃႇ ဢမ်ႇမီးႁႅင်းယဝ်ႉၼႆၵေႃႈ တေလႆႈၶဵင်ႇတႃႉတင်းၸႂ်ၸဝ်ႈၵဝ်ႇလႄႈ ၽူႈၶဵၼ်ၼၼ်ႉယဝ်ႉ။
ယူႇတီႈၵႆသေမုင်ႈတူၺ်း ႁၼ်သိုၵ်းပိူၼ်ႈမႃးၼမ်ၼႃႇလႄႈ မႃးတႅၵ်ႈတူၺ်းၶိုၼ်းႁႅင်းသိုၵ်း ဢၼ်မီးဢဝ်ၽိတ်ႇၶဝ်ၵူၺ်းၼၼ်ႉ ပေႃးတေႁဵတ်းပၢင်တိုၵ်း ႁႅင်းၵူၼ်းဢမ်ႇငၢမ်ႇၵၼ်ၼႆလႄႈ ၵူၼ်းၵေႃႈသမ်ႉပေႃးႁိူဝ်ႉမႃးတၢင်းဝၼ်းယဝ်ႉ ၸင်ႇလႆႈၶၢမ်ႇဝႄႈပၼ်သိုၵ်းၶဝ်ပွၵ်ႈၼႆႉၼႆယူႇ။ သင်တေႁႂ်ႈသိုၵ်းၽၢႆႇၼၼ်ႉဝႄႈၵႂႃႇၼႆတႄႉဢမ်ႇပဵၼ်လႆႈ လႅင်းမိူင်းၵေႃႈၸူဝ်းဢွၼ်ဢဝ်လုၵ်ႈၼွင်ႉမၼ်း လတ်းပႃႇႁူၵ်ႉယုမ်းၼၢမ် လတ်းၶိူဝ်းထိူၼ်ႇပႃႇၵႂႃႇတၢင်ႇတၢင်းပႅတ်ႈယဝ်ႉ။ ၶမ်ႈၵေႃႈၶမ်ႈမႃးၼႃႇယဝ်ႉလႄႈ ၶဝ်ၵေႃႈၸင်ႇတေႁႃတီႈလိုဝ်ႈသဝ်းလႆႈ ၽႂ်ၽႂ်ၵေႃႈဢွၼ်ၵၼ်တွင်ႉမႆႈၶဝ်ႈယူႇႁင်းၽႂ်ႁင်းမၼ်း ယၢမ်းၼၼ်ႉ ၸၢႆးလၢဝ်ၵေႃႈဢဝ်မေႃႈၶဝ်ႈဢွၵ်ႇမႃးယဝ်ႉ ၽႂ်ၵေႃႈထၢင်ႇဝႃႈမၼ်းတေႁုင်ၶဝ်ႈ ႁိုဝ်တေၵႂႃႇၸႂ်ႈ ပဵၼ်ၶဝ်ႈသုၵ်းလၢႆလၢႆပေႃးတဵမ်မေႃႈ ဢမ်ႇႁူႉဝႃႈတၼ်းႁုင်မိူဝ်ႈလႂ်။
“တၼ်းႁုင်ၶဝ်ႈသုၵ်းယူႇႁႃႉမိူဝ်ႈၵႆႈၼၼ်ႉ…”
“ဢေႃႈၶႃႈ…ၵူၼ်းၸိူင်ႉၼင်ႇၸၢႆးလၢဝ်ပေႃးတိုၵ်ႉပဵၼ်ၵူၼ်းႁုင်ၶဝ်ႈၽၵ်းယူႇ…ႁိုဝ်ပၼ်ႁႂ်ႈဢိုပ်းလႃႇ…”
ၶဝ်ၵေႃႈဢွၼ်ၵၼ်ၵိၼ်ၶဝ်ႈၵပ်းၽၵ်းႁႅင်ႈ ဢၼ်ပိူၼ်ႈပၼ်ၶဝ်မႃးၼၼ်ႉသေ ယဝ်ႉၵႂႃႇတႃႇၼိုင်ႈယူႇယဝ်ႉ။
ၶိင်ႇယၢမ်းၶမ်ႈၶိုၼ်း လၢဝ်လႅင်းပေႃးတဵမ်ၾႃႉယူႇသေတႃႉ ဢမ်ႇပိူင်းပၼ်ႁႂ်ႈႁၼ်လႅင်းလႆႈ ဢမ်ႇၸွႆႈႁူမ်ႇငမ်းပၼ်ႁႂ်ႈဢုၼ်ႇၸႂ်မႃး သမ်ႉဝႃႈလႆႈၼွၼ်းတူၺ်းလၢဝ်ႁၢင်ႈလီၼႆၵေႃႈ တေႃႈႁိုဝ်တေလပ်းလႆႈလႃႇ တႃတႄႉၶႂ်ႈလပ်းၼႃႇယဝ်ႉၼႆ ၸႂ်ၼၼ်ႉတႄႉတိုၼ်းၵိုၵ်းၸပ်းၸွမ်းၵွင်ႈၼၼ်ႉယူႇတႃႇသေႇယဝ်ႉ။
ၵၢင်ၼႂ်မိူင်းတိုၵ်ႉလပ်းသိင်ႇ ဢွၼ်ၵၼ်သိမ်းၶူဝ်းသိမ်းလဵင်း ႁၢင်ႈႁႅၼ်းဢွၵ်ႇၶၢဝ်းတၢင်းထႅင်ႈ။ ပႆလတ်းၶၢမ်ႈထိူၼ်ႇပႃႇ ပႆၵႂႃႇၸွမ်းၼိူဝ်လွႆၸၼ်း ပႆယူႇတၢင်းဝၼ်းတၢင်းဝၼ်း ဢမ်ႇတၼ်းႁူႉသင် ပေႃးတၼ်းႁွတ်ႈၵႂႃႇယဝ်ႉ။ မိူဝ်ႈႁွတ်ႈၵႂႃႇၼိူဝ်သဵၼ်ႈတၢင်းၵႃး ၸင်ႇမီးလူတ်ႉလူင်မႃးပႂ်ႉႁပ်ႉၶဝ်ယူႇ ၶဝ်ၵေႃႈဢွၼ်ၵၼ်ၶီႇၵႃးလူင် ၽႅတ်ႈၵႂႃႇဝၢၼ်ႈယဝ်ႉဝၢၼ်ႈ မၢဝ်ႇၼုမ်ႇလဝ်းလဝ်းလၢႆလၢႆ သၢႆတႃသၢဝ်သၢဝ်ၶဝ် ဢၼ်လႆႈႁၼ်ၵႂႃႇၼၼ်ႉ ၸၢႆႉဝၢႆႇတူၺ်းၸွမ်းပေႃးၶႂ်ႈလမ်းၵူၼ်ႈၵႃးၵႂႃႇယဝ်ႉ။
ဝႂ်မႆႉႁူင်ႈၵႂႃႇယဝ်ႉ မွၵ်ႇမႆႉၵေႃႈၵီႈတႅၼ်းတၢင်ၶိုၼ်း ပေႃးၶွင်ႇၶၢဝ်လိူင်လႅင်ၵႂႃႇသဵင်ႈၸွမ်းပၢၼ်းတၢပ်ႈလွႆ ဢၢႆႁွမ်မွၵ်ႇၼၼ်ႉၵေႃႈပိဝ်ထွင်းၸွမ်းလူမ်းမႃး ၶဝ်ႈၶူႈၼင်ပဵၼ်ၵမ်းပဵၼ်ၵမ်း ယၢမ်းဢၼ်ၸႂ်ပိဝ်သေ ၼင်ႈလဵၼ်ႈယူႇတႂ်ႈႁူမ်ႈမႆႉယူႇၼၼ်ႉ သဵင်ၸၢၵ်ႈၵိုင်ႉၵၢင်ႉလင်မႃးလႄႈ လႅင်းမိူင်းၼႅတ်ႈသင်ႇလုၵ်ႈၼွင်ႉမၼ်း ႁၢင်ႈႁႅၼ်းတူဝ်ၵမ်းလဵဝ်။
မိူဝ်ႈတူဝ်ႈတၼ်းယဝ်ႉၼၼ်ႉ ဢွၼ်ၵၼ်ဢွၵ်ႇၶၢဝ်းတၢင်းၵႂႃႇ ပိုၼ်ႉတီႈသုၵ်ႉယုင်ႈၼၼ်ႉၵမ်းလဵဝ်၊ ႁွတ်ႈထိုင်ယဝ်ႉလႄႈ ၶဝ်ႈၵေႃႈလႆႈႁဵတ်းၸွမ်းၼင်ႇၽႅၼ်ၵၢၼ်ၶဝ်မီးၼၼ်ႉသေ လႅင်းမိူင်းလႄႈၵူၼ်းမၼ်းသွင်ၵေႃႉ လွမ်ငွႆးၶဝ်ႈၵႂႃႇၸွႆႈၵူၼ်းဝၢၼ်ႈဢၼ်ထုၵ်ႇၺွပ်းၵႂႃႇၼၼ်ႉယဝ်ႉ ၽွင်းမိူဝ်ႈၶဝ်ႈၵႂႃႇၸမ်ပဝ်ႉမၢႆမႃးလွႆးလွႆးၼၼ်ႉ လႆႈႁၼ်ၵူၼ်းၸိူဝ်းၼၼ်ႉ လွမ်ႉႁွပ်ႈဝႆႉၵူၼ်းမိူင်းၸိူဝ်းထုၵ်ႇတီႉငွပ်းၸိူဝ်းၼၼ်ႉလႄႈ ၵမ်ႈၽွင်ႈၵေႃႈယင်းတိုၵ်ႉၸွပ်ႇထၢမ်ၶဝ်ယူႇ။ ယၢမ်းၼၼ်ႉလႅင်းမိူင်းၶဝ်ၸင်ႇ လွမ်ငွႆးၶဝ်ႈၵႂႃႇလွႆးလွႆးၽၢႆႇလင်ၵူၼ်းပႂ်ႉယၢမ်းၶဝ် ႁၵ်းၶေႃးၵႂႃႇၵမ်းၵေႃႉၵမ်းၵေႃႉပႅတ်ႈယဝ်ႉ။ မိူဝ်ႈႁွတ်ႈၵႂႃႇပဝ်ႉမၢႆတီႈၸမ်ၸမ်ၼၼ်ႉ ႁၢင်ႈႁႅၼ်းဢဝ်တီႈယူႇလီငၢမ်းယဝ်ႉပႂ်ႉတိုဝ်ႉတၢင်းမၼ်းဝႆႉယူႇ။
မိူဝ်ႈတိုၵ်ႉၸွပ်ႇထတ်းၵူၼ်းမိူင်းၸိူဝ်းၼၼ်ႉယူႇ ၸင်ႇမီးၵူၼ်းၵေႃႉၼိုင်ႈ ၶိုၼ်ႈသဵင်ႁိုတ်းထလႃႇပွင်ႉမေႃးလင်မႃးတိၵ်းတိၵ်းသေဢမ်ႇၵႃး ဢဝ်တိၼ်ပိတ်ႉထိပ်ႇၵူၼ်းဢၼ်ၼင်ႈယူႇၸိူဝ်းၼၼ်ႉ မူပ်ႇလူမ်ႉလူင်ၵႂႃႇၵေႃႉယဝ်ႉၵေႃႉ ပိူၼ်ႈလူမ်ႉယဝ်ႉၵျွၵ်းထိပ်ႇသႂ်ႇထႅင်ႈ သမ်ႉပေႃးၵမ်ႇပေႃးမၢၼ်ႉၵႂႃႇတင်းတူဝ် ၼႃႈပေႃးလိူတ်ႈပေႃးယၢင်လူင်ၵႂႃႇမူတ်း ၼၼ်ႉသေဢမ်ႇၵႃး ဢဝ်ၵွင်ႈငႃသႂ်ႇထႅင်ႈလႄႈ သဵင်ၵွင်ႈၼၼ်ႉၵေႃႈလင်မေႃးၵမ်းလဵဝ်၊ ၵူၼ်းၵေႃႉဢၼ်လူမ်ႉတၢႆၵႂႃႇၼၼ်ႉ ဢမ်ႇၸႂ်ႈၵူၼ်းဢၼ်ၼင်ႈယူႇ ၵူၺ်းပဵၼ်ၵူၼ်းၵေႃႉဢၼ်ယိပ်းၵွင်ႈၸိူဝ်းၼၼ်ႉသေ ႁဵတ်းႁႂ်ႈၼႂ်းၸုမ်းၶဝ်ပေႃး ဢွၼ်ၵၼ်သူၼ်ႈသိၼ်းသၢၼ်ၵႂႃႇမူတ်းယဝ်ႉ။
ၵိုင်ႉၵၢင်ႉတူၵ်းၸႂ်လႄႈ သႂၢင်းၵွင်ႈယိုဝ်းပေႃးၸွတ်ႇ ၸင်ႇတေလႅၼ်ႈႁႃတီႈမႅပ်ႉၶဝ်ယဝ်ႉ ၵူၼ်းမိူင်းၸိူဝ်းဢၼ်ထုၵ်ႇၺွပ်းမႃးၼၼ်ႉတႄႉ ဢမ်ႇၸၢင်ႈပၢႆႈ ယွၼ်ႉထုၵ်ႇမတ်ႉဝႆႉမူတ်းယဝ်ႉ မိူဝ်ႈၵူၼ်းၶဝ်ၸႅၵ်ႇၽႄၵၼ်ဢွၵ်ႇၵႂႃႇၼၼ်ႉ ၸုမ်း ၼူၵ်ႉဢႅၼ်ႇၾႃႉ ၶဝ်ၵေႃႈ ၶဝ်ႈမႃးၽိူမ်ႉထႅမ်ႁႅင်းထႅင်ႈ ယိုဝ်းဢဝ်ၵူၼ်းၸိူဝ်းၼၼ်ႉလူမ်ႉမူပ်ႇတၢႆမၢၵ်ႇတၢႆမိူဝ်ၵႂႃႇသဵင်ႈ။ လႅင်းမိူင်းၶဝ်သၢမ်ၵေႃႉ ၸွႆႈဢဝ်ၵူၼ်းမိူင်းပၢႆႈဢွၵ်ႇမႃးၼႂ်းပိုၼ်ႉတီႈၼၼ်ႈ လႆႈယဝ်ႉၵေႃႈ ၸုမ်းၶဝ်ဢွၼ်ၵၼ်ထွႆၵႂႃႇၶိုၼ်း။
မိူဝ်ႈလႆႈၸွႆႈၵူၼ်းမိူင်းၸိူဝ်းၼၼ်ႉမႃး မီးၵူၼ်းမိူင်းၵေႃႉၼိုင်ႈ လႆႈဝၢတ်ႇၸဵပ်းတီႈၶႃႁၢဝ်ႉႁႅင်းလႄႈ ၵူၼ်းဢဝ်ႁူမ်ႇလူမ်ႈၵေႃႉၼိုင်ႈ လႆႈၽႃၽိူဝ်းၵႂႃႇ ယွၼ်ႉပဵၼ်ၵူၼ်းဝၢတ်ႇၸဵပ်းသေလႆႈပႆၵႂႃႇလွႆးလွႆးၵူၺ်း တေတူၵ်းလိုၼ်းလင်ပိူၼ်ႈယဝ်ႉ။ မိူဝ်ႈတိုၵ်ႉဢွၼ်ၵၼ်ထွႆယူႇၼၼ်ႉ မီးၵူၼ်းလမ်းမႃးၸွမ်းၶဝ်သေ ဢဝ်မၢၵ်ႇလူင်ဝိုတ်ႉသႂ်ႇၸုမ်းၶဝ်ယဝ်ႉ ႁဵတ်းႁႂ်ႈၵူၼ်းဢၼ်ယူႇတၢင်းလင်လႅၼ်ႈပၢႆႈဢမ်ႇတၼ်းၶိုတ်းလႄႈ ၵူၼ်းဢဝ်ႁူမ်ႇလူမ်ႈၼၼ်ႉဢီးၵူၼ်းမၢတ်ႇၸဵပ်းပႅတ်ႈသေ ၶိုၼ်းဢဝ်တူဝ်မၼ်းမႃးႁႄႉတၢင်ၵႂႃႇ။ ၸၢၵ်ႇမၢၵ်ႇဢၼ်တႅၵ်ႇယဝ်ႉၼၼ်ႉ ပိဝ်ၽူင်ႉမႃးတိူဝ်ႉသႂ်ႇလင်မၼ်း ထိုင်တီႈလူမ်ႉလူင်းၵႂႃႇၵမ်းလဵဝ် ႁူမ်ႇလူမ်ႈဢၼ်ယူႇတၢင်းၼႃႈၸိူဝ်းၼၼ်ႉၵေႃႈ ၼႅတ်ႈဢွၼ်ၵၼ်မႃးၵႅတ်ႇၶႄ ၵူၼ်းတၢင်းလင်ၶိုၼ်းသေ ဢဝ်တူဝ်ၵူၼ်းဝၢတ်ႇၸဵပ်းၵႂႃႇယဝ်ႉ ၸင်ႇလႆႈပွႆႇမၢၵ်ႇလူင်ၵႂႃႇၸူးၶဝ်ၶိုၼ်း ၼင်ႇႁိုဝ်ပေႃးတေဢမ်ႇၸၢင်ႈလမ်းၸွမ်းၼၼ်ႉယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ။
