ၵူၼ်းမိူင်းၸိူဝ်းၵႂႃႇၸွႆႈလႆႈမႃးၼၼ်ႉ သူင်ႇပွၵ်ႈၶိုၼ်းႁိူၼ်းၶဝ်ယဝ်ႉ ၵူၼ်းၵေႃႉဢၼ်မၢတ်ႇၸဵပ်းၼၼ်ႉၵေႃႈသူင်ႇၵႂႃႇပၼ်တီႈႁူင်းယႃယူႇ။ ၵူၺ်းၵႃႈၵူၼ်းသိုၵ်းဢၼ်မၢတ်ႇၸဵပ်းၼၼ်ႉတႄႉ လႆႈဢွၼ်ၵၼ်ႁၢမ်ဢဝ်ၵႂႃႇတီႈပၢင်သဝ်းၶဝ်ၼၼ်ႉယူႇယဝ်ႉ။ ၵူၼ်းၵေႃႉၼၼ်ႉၵေႃႈ လိူတ်ႈလႆယွႆႉယွတ်ႇလူင်မိူဝ်းၵႂႃႇၸွမ်းတၢင်း သမ်ႉပေႃးဢမ်ႇလႆႈငိၼ်းသဵင်ၶၢင်းၸဵပ်းသင်လႄႈ ၶဝ်ဢွၼ်ၵၼ်ထၢင်ႇဝႃႈသၢႆၸႂ်ၶၢတ်ႇၵႂႃႇယဝ်ႉ ၵူၺ်းၵႃႈမိူဝ်ႈႁွတ်ႈထိုင်ပၢင်သဝ်း လႆႈႁၼ်ၶဝ်တိုၵ်ႉမီးသၢႆၸႂ်ယူႇသေ မိုၼ်းတႃဢွၵ်ႇမႃးလွႆးလွႆးယဝ်ႉ ၶတ်းၸႂ်ႁွမ်ႁႅင်းမၼ်းသေလၢတ်ႈၵႂၢမ်းဢွၵ်ႇမႃးယူႇ။
“ၸွႆႈ……လုမ်း……လႃး……တူၺ်း……ထိုင်……လုၵ်ႈ……ၶႃႈ……ၽွင်ႈ……”
လႅင်းမိူင်းမိပ်ႇၵၼ်ႈၼမ်ႉတႃမၼ်းဝႆႉသေ ၵူမ်ႈၼႃႈႁပ်ႉၵႂၢမ်းၵႂႃႇဝႃႈ “လႆႈဢေႃႈ…”
ယၢမ်းၼၼ်ႉလုၵ်ႈဢွၼ်ႇၵေႃႉၼိုင်ႈ ႁၼ်ၵူၼ်းၼမ်ႁွတ်ႈမႃးယဝ်ႉလႄႈ ႁွင်ႉလၢတ်ႈဝႃႈ
“ဢူႈႁဝ်းမႃးယဝ်ႉ…”
ၸူမ်းသိူဝ်းသေလႅၼ်ႈလူင်မႃး ၸင်ႇသမ်ႉမႃးၵိုတ်းယူႇၽၢႆႇၼႃႈၵူၼ်းၼမ် ၼင်ႈၸႅၼ်ႇၵၼ်သေငဝ်ယူႇၼၼ်ႉလႄႈ လွမ်မုင်ႈတူၺ်းၵႂႃႇတၢင်းၼိုင်ႈယဝ်ႉတၢင်းၼိုင်ႈ တူၺ်းၵႂႃႇတီႈဢၼ်ဢူႈၶဝ်ၵႆႉမႃးၼင်ႈယူႇတႃႇသေႇၼၼ်ႉ ဢမ်ႇႁၼ်ယဝ်ႉၵေႃႈ လႅၼ်ႈပၼ်ႇတူၺ်းၽုင်မူႇၵူၼ်း ၵႂႃႇၵႂႃႇမႃးမႃးယူႇပဵၼ်လၢႆၵမ်းၵေႃႈဢမ်ႇႁၼ်သေ ၸင်ႇထၢမ်ၵႂႃႇလူၺ်ႈတီႈၶႂ်ႈႁူႉၼႃႇဝႃႈ..
“ဢူႈၸၢႆးမီးလႂ်!!…”
ၽႂ်ၵေႃႈႁိုဝ်တေၸွပ်ႇပၼ်လႆႈ လိူဝ်သေၵူမ်ႈၼႃႈၵူမ်ႈတႃ မိပ်ႇၵၼ်ႈၼမ်ႉတႃဝႆႉႁင်းၽႂ်ႁင်းမၼ်းၼၼ်ႉၵူၺ်း ဢမ်ႇႁၼ်ၽႂ်တွပ်ႇလႄႈ ၸင်ႇဝၢႆႇတူၺ်းလႅင်းမိူင်းဢၼ်လပ်ႉၼႃႈဢူႈၶဝ်ဝႆႉၼၼ်ႉယဝ်ႉ ပႆၵႂႃႇၸူးလႅင်းမိူင်းၸမ်ၸမ်သေ ဢၢၼ်းတေထၢမ်ဢွၵ်ႇထႅင်ႈ ၵူၺ်းၵႃႈလႆႈႁၼ် ၵူၼ်းၵေႃႉၼိုင်ႈၼွၼ်းဢိူၵ်ႇလိူတ်ႈယူႇလႄႈ တူၺ်းၶဝ်ႈၸမ်ၸမ်ယဝ်ႉပဵၼ်ဢူႈၶဝ်ၼႆသေ။
“ဢူႈၸၢႆးပဵၼ်သင်…ပဵၼ်သင်လႄႈဢမ်ႇၼင်ႈမိူၼ်ပိူၼ်ႈယဝ်ႉလႃႇ…”
မိုဝ်းၼုမ်ႇၼုမ်ႇဢွၼ်ႇၸၢႆးၼၼ်ႉၵေႃႈယိပ်းဢဝ် မိုဝ်းဢူႈၶဝ် ဢၼ်ဢိူၵ်ႇလိူတ်ႈလႅင်ဝႆႉၼၼ်ႉ ႁႂ်ႈလုၵ်ႉမႃးၶိုၼ်းၼႆယူႇ ၵူၺ်းၵႃႈ မိူဝ်ႈမိုဝ်းဢွၼ်ႇၼၼ်ႉၵႂႃႇတိူဝ်ႉသႂ်ႇၵေႃႈ သၢႆၸႂ်ၼၼ်ႉ လႆႈသုတ်းသဵင်ႈၵႂႃႇၵမ်းလဵဝ်ယူႇယဝ်ႉ။ ၶိုၼ်းဝၢႆႇတူၺ်းလႅင်းမိူင်းသေ
“ပဵၼ်သင်လႄႈတူဝ်ပေႃႈမီးၼမ်ႉလႅင်ၸွမ်းလူင်ၵႂႃႇမူတ်း…ပဵၼ်သင်လႄႈဢူႈၸၢႆးဢမ်ႇလုၵ်ႉမႃးၼင်ႈၸွမ်းပိူၼ်ႈယဝ်ႉလႃႇ…ၸၢႆးဢမ်ႇလႆႈငိၼ်းသဵင်ဢူႈႁွင်ႉၸၢႆးသေၵမ်း…ဢူႈၸၢႆးပဵၼ်သင်လႃႇ…ဢူႈၸၢႆးၼွၼ်းလပ်းယူႇႁႃႉ…”
လႅင်းမိူင်းၵေႃႈၵွတ်ႇဢဝ်မၼ်းသေ
“ဢူႈၸၢႆးဢမ်ႇလုၵ်ႉမႃးလႆႈၶိုၼ်းယဝ်ႉ…ဢူႈၸၢႆးဢမ်ႇၸၢင်ႈမႃးလၢတ်ႈတေႃႇၸၢႆးလႆႈၶိုၼ်းယဝ်ႉ…ဢူႈၸၢႆးၼွၼ်းလပ်းၵႂႃႇဢမ်ႇတိုၼ်ႇမႃးၶိုၼ်းယဝ်ႉ…ပၼ်ႁႂ်ႈဢူႈၸၢႆးလႆႈၼွၼ်းလိုဝ်ႈႁိူဝ်ႉသေလႄႈ…”
“ၸၢႆးၶႂ်ႈၼွၼ်းၸွမ်း…”
“ဢူႈၸၢႆးတိုၵ်ႉၼွၼ်းလိုဝ်ႈႁိူဝ်ႉယူႇ…ပၼ်ႁႂ်ႈဢူႈလႆႈလိုဝ်ႈႁိူဝ်ႉၵႂႃႇၵတ်းၵတ်းယဵၼ်ယဵၼ်သေလႄႈ…”
လႅင်းမိူင်းၵေႃႈၸုင်ဢဝ်မၼ်းဢွၵ်ႇၵႂႃႇပႅတ်ႈၶဝ်ၸိူဝ်းၼၼ်ႉယဝ်ႉ။
“ဢူႈၸၢႆးၼွၼ်းလိုဝ်ႈႁိူဝ်ႉၵႂႃႇမိူၼ်မႄႈမႄႈလႄႈၼၢႆးၼၢႆးၸွင်ႇၸႂ်ႈႁိုဝ်…မီးၵူၼ်းလၢတ်ႈၼႄၸၢႆးဝႃႈ…ပေႃးၶဝ်တိုၼ်ႇမႃး…ၶဝ်တေၵႂႃႇယူႇၼိူဝ်မိူင်းၾီၼႆ…ပေႃးဝႃႈၸၢႆးၵေႃႉယႂ်ႇၸၢႆးၵေႃႈတေလႆႈၵႂႃႇယူႇၸွမ်းၶဝ်ၼႆဝႃႇ…”
လႅင်းမိူင်းၵေႃႈ ပေႃးဢမ်ႇၶႂ်ႈၸၢင်ႈလၢတ်ႈသင်ထႅင်ႈယဝ်ႉ ၵႂၢမ်းပိူၼ်ႈလွၵ်ႇမႃးၼၼ်ႉ မၼ်းသမ်ႉပေႃးတွင်းမူတ်းယဝ်ႉ တေဢဝ်သင်မႃးႁဵတ်းၶေႃႈဢၢင်ႈလႆႈထႅင်ႈလႃႇ ၸၢတ်ႈပၢၼ်မၼ်း ဢမ်ႇၸႂ်ႈဝႃႈဢမ်ႇယၢမ်ႈထူပ်းလွင်ႈၸိူင်ႉၼႆပွၵ်ႈၼႆႉၵူၺ်းလူး။
ၽူႈႁတ်းႁၢၼ်ဢၼ်လႆႈလူႉတၢႆၵႂႃႇၼႂ်းပၢင်တိုၵ်းၼၼ်ႉ ၼႂ်းတပ်ႉသိုၵ်းၶဝ်ၵေႃႈ လႆႈယုၵ်ႉယွင်ႈဢဝ်ၵုင်ႇမုၼ်မွင်ၸႂ်ၵႂႃႇၸွမ်းယဝ်ႉ။ ၸုမ်းၶဝ်လႆႈႁၢင်ႈႁႅၼ်းၶပ်းၶိုင်ပၼ် ပၢင်မႃႇသႃႇ ႁႂ်ႈပေႃးၵိုင်ႇတၢၼ်ႇတၢင်းၽူႈၵေႃႉဢၼ် လႆႈလူႇၼိူဝ်ႉလိူတ်ႈသၢႆၸႂ်ၵႂႃႇ ပုၼ်ႈတႃႇၵူၼ်းတင်းၼမ်ၼၼ်ႉယူႇယဝ်ႉ။
သမ်ႉဝႃႈဢူႈၸၢႆးတၢႆၵႂႃႇသေတႃႉ လႅင်းမိူင်းၵေႃႈတူၺ်းထိုင်လုမ်းလႃးပၼ် ၼင်ႇဢၼ်ဢူႈၶဝ်ယၢမ်ႈႁဵတ်းပၼ်မႃးၸိူဝ်းၼၼ်ႉယူႇ။ ယူႇတီႈၽူႈၸၢႆးၵေႃႉၼိုင်ႈ ဢၼ်တိုၵ်ႉပဵၼ်မၢဝ်ႇယူႇလႄႈၵိုင်ႉၵၢင်ႉမီးလုၵ်ႈၼႆၼၼ်ႉ မၼ်းၵေႃႈၶႂ်ႈပိူင်ႈႁူပိူင်ႈတႃဝႆႉယူႇ မိူဝ်ႈတႄႇတႄႉၶႂ်ႈယၢပ်ႇၸႂ်ဝႆႉဢိတ်းၼိုင်ႈ ၵူၺ်းၵႃႈႁိုင်ႁိုင်မႃးၵေႃႈယၢမ်ႈၵႂႃႇယဝ်ႉ။ ၸၢႆးၵေႃႈႁပ်ႉႁူႉလႆႈလွင်ႈဢၼ်လႅင်းမိူင်းတူၺ်းထိုင်မၼ်း မိူၼ်ၼင်ႇဢူႈၶဝ်ၼၼ်ႉလႄႈ မၢင်ပွၵ်ႈၵေႃႈသမ်ႉပေႃးဝူၼ်ႉဝႃႈပဵၼ်ဢူႈၶဝ်သေ ႁွင်ႉ“ဢူႈ!”ၵႂႃႇၵေႃႈမီးယဝ်ႉ။
ၸၢႆးၵႆႉၵႆႉႁွင်ႉလႅင်းမိူင်းဝႃႈဢူႈမႃးတိၵ်းတိၵ်းလႄႈ ႁွင်ႉႁွင်ႉသမ်ႉပေႃးယၢမ်ႈၵႂႃႇယူႇ။ မိူဝ်ႈယၢမ်းလႅင်းမိူင်းလႄႈၸၢႆးၶိူဝ်းတိုၵ်ႉဢုပ်ႇၵုမ်ၵၼ်ယူႇၼၼ်ႉ ၸၢႆးၵေႃႈမႃးယူႇၸွမ်းယဝ်ႉႁွင်ႉလႅင်းမိူင်း
“ဢူႈ…” ၼႆယူႇတေႃႇၼႃႈၶႃ။ သမ်ႉဝႃႈၵႆႉငိၼ်းသေတၵေႃႈဢမ်ႇတွၼ်ႉယၢမ်ႈႁူသေပွၵ်ႈ။
“ႁွင်ႉၸိူင်ႉၼႆတေလႆႈမေးယူႇႁႃႉၼႆႉၵဝ်…”
ၸၢႆးၶိူဝ်းယုမ်ႉၵိူဝ်ႉယုမ်ႉၵိူဝ်ႉသေ“ဢမ်ႇဢဝ်မေးၵေႃႈလႆႈယဝ်ႉ…ပဵၼ်ပေႃႈၵူၼ်းယဝ်ႉလူး…” ၼႅတ်ႈလႅၼ်ႈဢွၵ်ႇၵႂႃႇပႅတ်ႈၵမ်းလဵဝ်။
သမ်ႉဝႃႈတေၵႆႉၺႃးလုၵ်ႈၼွင်ႉမၼ်းၵိူဝ်ႉလဵၼ်ႈ တေတူၺ်းမိူၼ်ပဵၼ်ပေႃႈၵူၼ်း ႁၼ်မိူၼ်ၵူၼ်းၵႄႇယဝ်ႉၼႆၵေႃႈ မၼ်းၵေႃႈ ပၼ်လွင်ႈဢုၼ်ႇၸႂ်လႆႈတီႈၵူၼ်းၵေႃႉၼိုင်ႈ ဢၼ်ၸူမ်ယူႇၼႂ်းလပ်းသိင်ႇ၊ မၼ်းပၼ်ၸၢတ်ႈပၢၼ်ၵူၼ်းၵေႃႉၼိုင်ႈ ႁႂ်ႈၸိုၼ်ႈသႂ်မႃး၊ မၼ်းပၼ်တၢင်းသိူဝ်းလႄႈပၼ်တၢင်းယုမ်ႉၶဝ်လႆႈ မွၵ်ႈၼႆႉၵူၺ်းၵေႃႈပဵင်းပေႃးယဝ်ႉ။ မိူဝ်ႈတႄႇတႄႉဢမ်ႇယၢမ်ႈၼႆၵေႃႈ ဝၢႆးမႃးၵေႃႈယၢမ်ႈၵႂႃႇယူႇ။
လႅင်းမိူင်းၵေႃႈသမ်ႉဝႃႈတူၺ်းထိုင်ၸၢႆးလႆႈလီမိူၼ်ဢူႈၶဝ်ၼႆသေတႃႉ မၼ်းၵေႃႈတူၺ်းထိုင်လႆႈတၢင်းၼွၵ်ႈမၼ်းၵူၺ်း တၢင်းၼႂ်းၸႂ်ၸၢႆးၼၼ်ႉ မၼ်းၵေႃႈဢမ်ႇၸၢင်ႈတူၺ်းထိုင်လုမ်းလႃးပၼ်ႁႂ်ႈတဵမ်ထူၼ်ႈလႆႈ မၢင်ပွၵ်ႈၸၢႆးၵေႃႈတေၵႆႉထၢမ်ႁႃဢူႈၶဝ်ယူႇ တေၵႆႉႁွင်ႉႁႃလႄႈၵႆႉလၢတ်ႈထိုင်ယူႇတႃႇသေႇၼၼ်ႉယဝ်ႉ။ ဢူႈၶဝ်တေဢမ်ႇပွၵ်ႈမႃးၸူးမၼ်းၶိုၼ်းၼၼ်ႉ မၼ်းၵေႃႈႁိုဝ်တွၼ်ႉႁူႉသေပွၵ်ႈ လိူဝ်သေဝႃႈ မုင်ႈမွင်းႁႂ်ႈၵေႃႉယႂ်ႇယဝ်ႉ မုင်ႈမွင်းၶႂ်ႈထူပ်းႁၼ်ဢူႈၶဝ်ယူႇၵူၺ်း။ မၢင်ပွၵ်ႈၶေႃႈၵႂၢမ်းယွၵ်ႇလႅၼ်ၼၼ်ႉ မိူၼ်လႆႈႁဵတ်းၽိတ်းတေႃႇမၼ်းၼၼ်ႉယဝ်ႉ။
သမ်ႉဝႃႈတေႁဵတ်းပုၼ်ႈၽွၼ်းပေႃႈလႆႈတဵမ်ထူၼ်ႈယဝ်ႉသေတႃႉ တွၼ်ႈတႃႇလွင်ႈမိူဝ်းၼႃႈၸၢႆးၼၼ်ႉ ပဵၼ်လွင်ႈဢၼ်ၶမ်ၸႂ်တေႉယဝ်ႉ ၸွမ်းလူၺ်ႈပဵၼ်သိုၵ်းၵေႃႉၼိုင်ႈ ဢမ်ႇလႆႈမီးတီႈယူႇဢၼ်မၼ်ႈၵိုမ်း ဢမ်ႇလႆႈယူႇတီႈၼႂ်းဝၢၼ်ႈၼႂ်းဝဵင်း တီႈဢၼ်မီးႁူင်းႁဵၼ်းလႄႈပူင်သွၼ်ပၼ်ပၺ်ႇၺႃႇတႃႇမၼ်းလႆႈ သင်တေပွႆႇၵႂႃႇယူႇတၢင်ႇတီႈၵေႃႈ ဢႃႇယုယင်းတိုၵ်ႉလဵၵ်ႉႁႅင်းၼႃႇ ယင်းဢမ်ႇပႆႇပေႉတူဝ်လူး ပေႃႈမႄႈၵေႃႈဢမ်ႇမီးမိူၼ်ပိူၼ်ႈ သင်လႆႈယူႇတီႈဢၼ်ဢမ်ႇမီးလွင်ႈဢုၼ်ႇၸႂ်မႃး တေၸၢင်ႈႁဵတ်းႁႂ်ႈတုမ်ႉတိူဝ်ႉပၢႆးၸႂ်လုၵ်ႈဢွၼ်ႇမႃးၼၼ်ႉယဝ်ႉ။ ၸူးၸႂ်တႄႉၶႂ်ႈယူႇႁိမ်းၸမ်သေလုမ်းလႃးတူၺ်းထိုင် ပၼ်လွင်ႈဢုၼ်ႇၸႂ်သေ ႁႂ်ႈတူဝ်လႄႈၸႂ်ၵႅၼ်ႇၶႅင်ယဝ်ႉၸင်ႇတေပွႆႇၵႂႃႇၼႆယူႇ။ ပေႃးတူၺ်းတၢင်းပၢႆးပၺ်ႇၺႃႇသမ်ႉ ထိုင်ၶိင်ႇၶၢဝ်းဢၼ်လီၶိုၼ်ႈႁူင်းႁဵၼ်းယဝ်ႉလူး လုၵ်ႈဢွၼ်ႇၵေႃႈထုၵ်ႇလီပွႆႇႁူင်းႁဵၼ်းယဝ်ႉ ဢမ်ႇၶႂ်ႈႁႂ်ႈလုၵ်ႈဢွၼ်ႇလႆႈႁၢမ်းသုၼ်ႇလႆႈၶိုၼ်ႈႁူင်းႁဵၼ်းမိူၼ်ပိူၼ်ႈၼႆသေ လႅင်းမိူင်းၵေႃႈဝူၼ်ႉတွၼ်ႈတႃႇၸၢႆးလႄႈလုၵ်ႈဢွၼ်ႇထႅင်ႈလၢႆလၢႆၵေႃႉ ဢၼ်လုတ်ႈႁၢမ်းၵၢၼ်ႁဵၼ်းၼႆသေ ဝူၼ်ႉႁႃလွၵ်းလၢႆးတႃႇႁႂ်ႈပၢႆးပၺ်ႇၺႃႇ ၶဝ်ႈမႃးထိုင်ၼႂ်းဝၢၼ်ႈဢၼ်လႆႈမႃးသဝ်းယူႇႁိမ်းၸမ်ၼၼ်ႉယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
