ၶၢဝ်းမႆႈၵေႃႈၸမ်သဵင်ႈ ၶၢဝ်းၾူၼ်ၵေႃႈယဵပ်ႇၶဝ်ႈမႃး ၶၢဝ်းၶိုၼ်ႈႁူင်းႁဵၼ်းၵေႃႈႁွတ်ႈထိုင် ပီပူၼ်ႉမႃးၼၼ်ႉ ႁဵတ်းႁႂ်ႈမၢၵ်ႉလိၵ်ႈငိုၼ်းသႅင် ၼမ်တိူဝ်းမႃးတႄႉတႄႉ၊ ပဵၼ်ယွၼ်ႉႁႅင်းၸႂ်ႁႃႉ ပဵၼ်ယွၼ်ႉတၢင်းၶတ်းၸႂ်ဢၼ်မီးႁႅင်းၸုင်ၸၼ်ၼၼ်ႉႁိုဝ်ဢမ်ႇႁူႉယဝ်ႉ။
ငိုၼ်းသႅင်ၵေႃႈၵႆႉၵႆႉမႃးၼင်ႈလဵၼ်ႈယူႇတႂ်ႈႁူမ်ႈမႆႉမိူၼ်ၼင်ႇၵူႈပွၵ်ႈယူႇ၊ ၵူၺ်းၵႃႈတေဢမ်ႇၵႆႉငွၵ်ႈၼင်ႇပူၼ်ႉမႃးယဝ်ႉ။ သမ်ႉဝႃႈဢမ်ႇႁူႉသႅင်ပိုၼ်းတေပွၵ်ႈမႃးၼႆၵေႃႈ ယင်းတိုၵ်ႉမွင်းပႂ်ႉယူႇတႂ်ႈႁူမ်ႈမႆႉၼၼ်ႉတႃႇသေႇ။ ၶၢဝ်းယၢမ်းၵေႃႉမွင်းၼၼ်ႉၸိုင်ပေႉႁိုင်ၼႃႇၵေႃႈဢမ်ႇႁူႉယဝ်ႉ၊ သမ်ႉဝႃႈႁိုင်ၵႃႈႁိုဝ်ၵေႃႈ လွင်ႈၸႂ်ထိုင်ၼၼ်ႉ ဢမ်ႇႁဵတ်းႁႂ်ႈၶၢၼ်ႉမွင်း ၵူဝ်ဝႃႈၶဝ်တေပွၵ်ႈမႃးသေဢမ်ႇတွင်းၵူၺ်းယဝ်ႉ။
ၶၢဝ်းၾူၼ်ၵေႃႈသုတ်းၵႂႃႇ ၶၢဝ်းၵတ်းၵေႃႈၶွပ်ႈထိုင်မႃး ဝၼ်းဢၼ်လႆႈထူပ်းၵၼ်ၼၼ်ႉၵေႃႈ ၶွပ်ႈၶိုၼ်းယဝ်ႉလူး။ ၼင်ႇႁၢင်ႈ ငိၼ်းၶၢဝ်ႇဝႃႈၶဝ်တေပွၵ်ႈမႃးၶိုၼ်းယူႇ ၼႆၵေႃႈ ၸူမ်းသိူဝ်းၼပ်ႉဝၼ်းၼပ်ႉၶိုၼ်းပႂ်ႉယူႇယဝ်ႉၼႃႇ။ လႆႈငိၼ်းၸိုဝ်ႈၶဝ်ၼႆၵူၺ်းၵေႃႈ ႁူဝ်ၸႂ်သမ်ႉပေႃးတွတ်ႇတဵၼ်ႈပႂ်ႉထႃႈယူႇယဝ်ႉဢိူဝ်ႈ။
ငိုၼ်းသႅင် ၶီႇတင်းလႅင်ထိပ်ႇမၼ်းသေ မိူဝ်းလႄႇၶိူဝ်းႁွမ်မႃးယဝ်ႉ မိူဝ်းႁူပ်ႉၵႃးလမ်းၼိုင်ႈတီႈၼႃႈႁိူၼ်းသႅင်ပိုၼ်းၶဝ် ၼႂ်းၸႂ်ၼၼ်ႉၵေႃႈ လၵ်ႉဝူၼ်ႉယူႇဝႃႈ ၶဝ်ပွၵ်ႈမႃးယဝ်ႉႁိုဝ် ႁူဝ်ၸႂ်ၶုၼ်ႇၵီႈပိုဝ်းမႃးၵမ်းလဵဝ်။ မိူဝ်ႈယင်းတိုၵ်ႉမိူၼ်ႇတူၺ်းယူႇၼၼ်ႉ လႆႈႁၼ်သႅင်ပိုၼ်း ယဝ်ႉၼႆၵေႃႈ တၢင်းၸူမ်းသိူဝ်းမၼ်း သမ်ႉပေႃးဢဝ်လႅင်ထိပ်ႇမၼ်းလူမ်ႉၵႂႃႇ ၽၢႆႇၼႃႈသႅင်ပိုၼ်းၼၼ်ႉယဝ်ႉ။
မိူၼ်ဝႃႈ သႅင်ပိုၼ်းၵေႃႈဢမ်ႇလႆႈသူၼ်ၸႂ်မၼ်းသေ ယုၵ်ႉယွင်ႈၶူဝ်းမၼ်းၶဝ်ႈႁိူၼ်းၵႂႃႇပႅတ်ႈယဝ်ႉ မႃးၶိုၼ်းပွၵ်ႈၼႆႉ သီႈၼႃႈ၊ သၢႆတႃ၊ လွင်ႈႁဵတ်းသၢင်ႈမၼ်းလႅၵ်ႈလၢႆႈမႃးတင်းၼမ် ႁဵတ်းႁႂ်ႈငိုၼ်းသႅင်ၵိုတ်းလိုဝ်ႈ လွင်ႈတေဢမ်ႇဝူၼ်ႉၼမ်ဢမ်ႇလႆႈယဝ်ႉ။ မၼ်းၵေႃႈ ယုၵ်ႉဢဝ်တင်းလႅင်ထိပ်ႇမၼ်းၼၼ်ႉသေ ၼမ်ႉတႃၸိုမ်းႁႆႈလူင်မိူဝ်းၵႂႃႇယဝ်ႉ။
သႅင်ပိုၼ်းပွၵ်ႈမႃးပွၵ်ႈၼႆႉ ဢမ်ႇမိူၼ်မိူဝ်ႈၵူႈပွၵ်ႈယဝ်ႉလႄႈ မိူၼ်ၼင်ႇၵူၼ်းဢမ်ႇယၢမ်ႈႁူႉၸၵ်းၵၼ်တင်းငိုၼ်းသႅင်ၼၼ်ႉၵူၺ်းယဝ်ႉၼႃႇ၊ ဢမ်ႇၵႆႉလၢတ်ႈတေႃႇငိုၼ်းသႅင်ဢမ်ႇၵႃး တီႈလၢၼ်ႉၵေႃႈဢမ်ႇၵႆႉၵႂႃႇ၊ လိူဝ်သေၼၼ်ႉတႄႉ မိူၼ်ၵဝ်ႇၵူႈလွင်ႈ ၵႆႉလၢတ်ႈတေႃႇၵူၼ်းတၢင်ႇၵေႃႉလိူဝ်သေမၼ်း ၶိူဝ်းႁွမ်ဝႃႇ ၸိူဝ်းၼႆႉတႄႉ ယုမ်ႉယုမ်ႉယၢႆႈယၢႆႈသေလၢတ်ႈတေႃႇယူႇ ပေႃးႁၼ်ငိုၼ်းသႅင်ၼႃႈတူႇသႂ်ႇသေ ပၢႆႈပႅတ်ႈ ၼင်ႇဝႃႈမီးလွင်ႈၸၢၼ်ႈၸင်းၼိူဝ်မၼ်းဝႆႉယူႇ။
လွင်ႈႁဵတ်းသၢင်ႈၶဝ်ၼင်ႇၼၼ်ၼၼ်ႉ ႁဵတ်းႁႂ်ႈငိုၼ်းသႅင်ၸႂ်လဵၵ်ႉမႃးယူႇဢိူဝ်ႈ မၢင်ပွၵ်ႈၵေႃႈဢၢၼ်းတတ်းၸႂ်မႃးယဝ်ႉ ၵူၺ်းၵႃႈ မိူဝ်ႈလႂ်ၸႂ်ဢၢၼ်းတတ်း ၶဝ်ၵေႃႈၶဝ်မႃးယုမ်ႉႁဵတ်းပၼ်လွင်ႈလီ ထိုင်တီႈတတ်းဢမ်ႇၶၢတ်ႇလႆႈသေပွၵ်ႈ။ လၵ်ႉႁၵ်ႉယူႇၸိူင်ႉၼႆ ၸႂ်ၵေႃႈတုၵ်ႉယူႇဢိူဝ်ႈပဵၼ်ပွၵ်ႈ တေပွႆႇဝၢင်းၵေႃႈတိုၵ်ႉသေလၢႆ တေဢဝ်ၵေႃႈသမ်ႉဢမ်ႇလႆႈၸိူင်ႉၼၼ်။
လိူဝ်သေၼၼ်ႉ ၵူၼ်းႁိမ်းၶၢင်ႈၵေႃႈ မႃးလၢတ်ႈလွင်ႈၶဝ်ၼႄထႅင်ႈ လွင်ႈသူၼ်ဢူၵ်းသူၼ်ၸႂ်ၼိူဝ်ၶဝ်ၼၼ်ႉ ႁၢမ်ႈယူႇၵေႃႈ မၼ်းဢမ်ႇထွမ်ႇ ယိင်ႈပၢႆႈယိင်ႈသုတ်ႉၸမ် ယိင်ႈၵႆႉႁၼ်ယိင်ႈၶၢၼ်ၸႂ်ငိုၼ်းသႅင်ၼႃႇတေႉယဝ်ႉ၊ ယိင်ႈဢၢၼ်းလိုမ်း ယိင်ႈၵိုမ်းမၼ်ႈ။
မိူဝ်ႈၵူႈလွင်ႈလႅၵ်ႈလၢႆႈ ငိုၼ်းသႅင်ၵေႃႈလႅၵ်ႈလၢႆႈၵႂႃႇ ငိူင်ႉဝႄႈတၢင်းသဵၼ်ႈၼၼ်ႉသေ ဝႄႈတူၼ်ႈမႆႉတူၼ်ႈၼၼ်ႉသေ ဢမ်ႇၸွမ်းႁွႆးၵဝ်ႇ၊ ဢမ်ႇၶူၼ်ႉပိုၼ်းၼၼ်ႉထႅင်ႈယဝ်ႉ။
ဝၢႆးသေၶၢဝ်းၵတ်းသုတ်းၵႂႃႇ ၶၢဝ်းမႆႈၵေႃႈထိုင်မႃး သႅင်ပိုၼ်းပွၵ်ႈၵႂႃႇၶိုၼ်းယဝ်ႉ။
မၼ်းၵေႃႈ ဢဝ်လွင်ႈၸႂ်ထိုင် လွင်ႈၼႂ်းၸႂ်ဢၼ်ဢမ်ႇၸၢင်ႈလၢတ်ႈမွၵ်ႇၼႄၽႂ်ၼၼ်ႉ တႅမ်ႈလူင်းၵႂႃႇၽိုၼ်ၼိုင်ႈယဝ်ႉၽိုၼ်ၼိုင်ႈ။
ၸဵမ်မိူဝ်ႈသႅင်ပိုၼ်းယၢၼ်ဢွၵ်ႇၵႂႃႇပွၵ်ႈၼႆႉၵေႃႈဢမ်ႇၶိုၼ်းမႃးယဝ်ႉ၊ ၼႃႈႁိူၼ်းၶဝ်ၵေႃႈၶၢႆႉၵႂႃႇယူႇထႅင်ႈတၢင်ႇတီႈသေ လွင်ႈၵပ်းသိုပ်ႇၵွင်ႉသၢၼ်ၵၼ်ၵေႃႈ ဢမ်ႇမီးလႄႈ ၵူၺ်းၵိုတ်းႁူမ်ႈမႆႉဢွၼ်ႇႁိမ်းႁိူၼ်းၼၼ်ႉၵူၺ်းယဝ်ႉႁဵတ်းသၢၵ်ႈသေႇဝႆႉယူႇ။
ပီႊ 2026
တီႈၼႂ်းလုမ်းဢၼ်မီးၵူၼ်းႁဵတ်းၵၢၼ် ၼင်ႈႁူပ်ႉတေႃႇၼႃႈၶွမ်းဝႆႉယူႇ ႁင်းၽႂ်ႁင်းမၼ်းၼၼ်ႉ ႁူဝ်ၼႃႈမႃးငွၵ်ႈတူၺ်းသေ
“ၼေႈ သူၸိူဝ်းၼႆႉ ႁဵတ်းသင်ယူႇလႃႇ”
“ဢမ်ႇႁဵတ်းသင်ၶႃႈ”
“ၼႆႉမၼ်းဢီႈသင်လႃႇ ယဝ်ႉၼႄႇၵၢၼ်သူ”
“ယဝ်ႉၶႃႈ..”
ႁူဝ်ၼႃႈငွၵ်ႈႁူဝ်တူၺ်းၸွမ်း “မႂ်းလူဢီႈႁင်ၼႆႉ”
“ၸိူင်းဢေႃႈ..”
“ၼႂ်းလႂ်လႃႇဢႃႈ မီးၸိူင်းၸိူင်ႉၼႆႁေႁႃႉ”
“မီးဢေႃႈ ဝႅပ်ႉသၢႆႉလူၸိူင်းတႆး ႁူဝ်ၼႃႈႁဝ်းဢမ်ႇယၢမ်ႈငိၼ်းၼႄႇ TN ၸိူင်းတႆးၼႆ”
“ဢမ်ႇယၢမ်ႈငိၼ်းႁေပွၵ်ႈဢေႉ”
“မၼ်းၸႂ်ႈ တေႁဵတ်းႁိုဝ်ၶဝ်ႈၵႂႃႇတူၺ်းလႃႇၼၼ်ႉ”
“တႅမ်ႈၶဝ်ႈၵႂႃႇၼႂ်းၵူႇၵိူဝ်ႇ ယဝ်ႉတႅမ်ႈၵႂႃႇဝႃႈ TN ၸိူင်းတႆး ပေႃးၶႂ်ႈႁႂ်ႈမၼ်းဢွၵ်ႇၼႃႈဝႅပ်ႉမႃးၵေႃႈ သႂ်ႇၵႂႃႇဝႃႈ tainovel.com ၼႆၵေႃႈ ၵႂႃႇလိူၵ်ႈႁႃလူဢၢၼ်ႇလႆႈယဝ်ႉဝႃႈ ၶႂ်ႈလူဢၢၼ်ႇၸိူင်ႉႁိုဝ်ၵေႃႈ တႅမ်ႈၵႂႃႇႁႃတီႈသွၵ်ႈႁႃၼၼ်ႉၼႃႇ ပေႃးဢမ်ႇႁူႉတေဢၢၼ်ႇသင်ၼႆၵေႃႈ ၶဝ်ႈၵႂႃႇတီႈတၢင်းၼိူဝ်ဢၼ်တႅမ်ႈဝႆႉဝႃႈ ၸိူင်းတႆး ၼႆၼၼ်ႉသေ တဵၵ်းၵႂႃႇတူၺ်းၼိုင်ႈသွင်သၢမ်တၢင်းတႂ်ႈမၼ်းၼၼ်ႉၵေႃႈလႆႈ”
“ႁႅင်းမၼ်းပေႉသုၵ်ႉသၵ်ႉလႃႇၵဝ်ဝႃႈ”
“ၶႃႈၵေႃႈဢမ်ႇႁူႉၵွၼ်ႇ သင်မီးဢႅပ်းတႄႉၶိုၵ်ႉၵျႃႉၼႆႉ ၵူၺ်းၵႃႈ ၶႅၼ်းႁေယိပ်းပပ်ႉၵႂႃႇၵႂႃႇမႃးမႃးယူႇၵဝ်ႇ မီးၾူၼ်းၵူၺ်းၵေႃႈ တူၺ်းလႆႈလူလႆႈယဝ်ႉလႂ်”
ယၢမ်းၼၼ်ႉ ႁူဝ်ၼႃႈၵေႃႈ ၵႂႃႇၸူးတီႈငိုၼ်းသႅင် ဢၼ်ပဵၼ်ၽူႈမၢႆမၼ်းၼၼ်ႉလႄႈ “ငိုၼ်းသႅင် မႃးၸူးႁဝ်းၵမ်ႉၼိုင်ႈလူး”
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ
