ႁဵတ်းတူၺ်းၸင်ႇႁူႉ လႆႈဢမ်ႇလႆႈ

မၢင်ပွၵ်ႈၸၢတ်ႈပၢၼ်ႁဝ်းၼၼ်ႉ ဢမ်ႇပဵၼ်မႃးလႆႈၼင်ႇဢၢင်ႈဢၢၼ်းဝႆႉလႄႈ ႁဝ်းတေၸၢင်ႈၵိုတ်းဝႆႉယူႇတီႈၵဝ်ႇသေယဝ်ႉ ဢမ်ႇႁူႉတေသိုပ်ႇၵႂႃႇၸိူင်ႉႁိုဝ် ၵူၺ်းၵႃႈ သင်ႁဝ်းလႅၵ်ႈလႆၢႈ လႆၢးဝူၼ်ႉႁဝ်းဢိတ်ႉၼိုင်ႈတူၺ်းလူး ယူဝ်ၶေးမၼ်းတေၸၢင်ႈလႅၵ်ႈလႆၢႈမႃးယူႇ။

ၵူႈၸိူဝ်ႉၵူႈလွင်ႈၼၼ်ႉ ယူႇတီႈပႆၢးဝူၼ်ႉႁဝ်း သင်ဝူၼ်ႉဝႃႈႁဵတ်းလႆႈ တေႁႃတၢင်းႁဵတ်းႁႂ်ႈမၼ်းလႆႈယဝ်ႉ၊ သင်ဝူၼ်ႉဝႃႈႁဵတ်းဢမ်ႇလႆႈ သမ်ႉဝႃႈတိုဝ်ႉတၢင်းမီးယူႇပႃႈၼႃႈၵေႃႈဢမ်ႇႁတ်းၸၢမ်း။

ဢမ်ႇလူဝ်ႇလႆႈၵတ်ႉၶႅၼ်ႇၵူႈမဵဝ်း ႁဵတ်းၽိတ်းၽွင်ႈၵေႃႈဢမ်ႇပဵၼ်သင် ၵူၼ်းၵူႈၵေႃႉၼၼ်ႉ တိုၼ်းမီးလွင်ႈယူပ်ႈယွမ်းလႄႈလွင်ႈလီယူႇယဝ်ႉ။

ပၼ်ႁႃၼၼ်ႉမီးဝႆႉတႃႇၵႄႈၶႆ ဢမ်ႇၸႂ်ႈတမ်ႇတိူင်းတႃႇႁႄႉၵၼ်ႈဝႆႉ သင်ႁဝ်းၵႄႈၶႆဢဝ်ၶၢမ်ႈပူၼ်ႉမၼ်းၵႂႃႇလႆႈ တေႁဵတ်းႁႂ်ႈႁဝ်းၵႅၼ်ႇၶႅင်မႃးထႅင်ႈယဝ်ႉ။

တူၵ်းသုမ်းၵေႃႈဢမ်ႇပဵၼ်သင် ဢဝ်ဝႆႉပဵၼ်တွၼ်ႈသွၼ်သေလဵပ်ႈႁဵၼ်းၵႂႃႇ ဢမ်ႇၸႂ်ႈတႃႇမႃးတႅပ်းတတ်းတူဝ်ၸဝ်ႈၵဝ်ႇ။

လွင်ႈတႅၵ်ႈၼိူင်းတင်းပိူၼ်ႈၼၼ်ႉ တေၸွႆႈႁႂ်ႈႁဝ်းၶႂ်ႈၶတ်းၸႂ်မႃးထႅင်ႈယူႇ ၵူၺ်းၵႃႈ မိူဝ်ႈမၼ်းႁဵတ်းႁႂ်ႈၸႂ်ဢမ်ႇလီၸွမ်းၼၼ်ႉ သုတ်ႉႁူၼ်ပွၵ်ႈတူၺ်းတူဝ်ၵဝ်ႇယဝ်ႉ ၵႂႃႇၸွမ်းသဵၼ်ႈတၢင်းတူဝ်ၵဝ်ႇၶိုၼ်းၵေႃႈလႆႈ။

လူင်းမိုဝ်းႁဵတ်းၼၼ်ႉ လီလိူဝ်ၼင်ႈဝူၼ်ႉယဝ်ႉဢမ်ႇႁဵတ်းသေပွၵ်ႈ သမ်ႉဝႃႈမီးပႆၢးဝူၼ်ႉလီလီၵေႃႈယဝ်ႉ ပေႃးဢမ်ႇလူင်းမိုဝ်းႁဵတ်း မၼ်းၵေႃႈဢမ်ႇပဵၼ်မႃးလႆႈ။

လိုဝ်ႈႁိူဝ်ႉၼၼ်ႉၵေႃႈ လမ်ႇလွင်ႈမိူၼ်ၵၼ်တင်းႁဵတ်းၵၢၼ်ယဝ်ႉ၊ တူဝ်လႄႈၸႂ်ၼၼ်ႉ လူဝ်ႇလႆႈလိုဝ်ႈပၼ်ၽွင်ႈ ယႃႇလိုမ်းပၼ်ၶၢဝ်းယၢမ်းတႃႇတူဝ်ၵဝ်ႇၼႃႈ။

လိူၵ်ႈယူႇၸွမ်းၵူၼ်းဢၼ်ထႅမ်ႁႅင်းပၼ်ႁဝ်း သင်ႁိမ်းႁွမ်းႁဝ်းမီးၵူၼ်းမေႃတူၺ်းလွင်ႈလီ မေႃၵမ်ႉထႅမ်ၵၼ် ႁဝ်းၵေႃႈတေမီးႁႅင်းမႃးၼၼ်ႉယဝ်ႉ။

ၵႂၢမ်းလၢတ်ႈႁဝ်းၼၼ်ႉ မၼ်းမီး ႁႅင်းၼႃႇ မၢင်ၶေႃႈၸၢင်ႈႁဵတ်းႁႂ်ႈၽႂ်သေၵႃႉၵေႃႉ မီးႁႅင်းၸႂ်မႃးလႆႈ လႅၵ်ႈလႆၢႈၸၢတ်ႈပၢၼ်ၶဝ်လႆႈ ၵွပ်ႈၼၼ် ၸႂ်ႉၶေႃႈၵႂၢမ်းဢၼ်ပၼ်လွင်ႈလီသေလၢတ်ႈလႄႈ။

ယႃႇၵုမ်ႇမိုင်ႉၸူမ်ယူႇၸွမ်းလွင်ႈဝၼ်းလင်သေ လိုမ်းၸႂ်ႉၸၢတ်ႈပၢၼ်ယူႇၸွမ်းၶၢဝ်းယၢမ်းမိူဝ်ႈလဵဝ် လွင်ႈဝၼ်းလင်ၼၼ်ႉ သွၼ်ႁဝ်းဝႆႉၼမ်ၵေႃႈယဝ်ႉ ၸၢင်ႈႁဵတ်းႁႂ်ႈလႆႈသုမ်းလွင်ႈလီလီ ဢၼ်မီးယူႇပႃႈၼႃႈၼၼ်ႉလႆႈ။

ပႆၢးယူႇလီၸႂ်ၼၼ်ႉၵေႃႈ လမ်ႇလွင်ႈမိူၼ်ၵၼ်တင်းပႆၢးယူႇလီတူဝ်ယဝ်ႉ မိူဝ်ႈၸႂ်ဢမ်ႇလီ ယႃႇၵဵပ်းမၼ်းဝႆႉ ပူတ်းပွႆႇမၼ်းဢွၵ်ႇမႃး လၢတ်ႈၼႄၽႂ်ၵေႃႈလႆႈ ႁဵတ်းလွင်ႈဢၼ်ႁဝ်းလူမ်ၸႂ်ၸိူဝ်းၼႆႉၵေႃႈလႆႈ။

ယႃႇပႂ်ႉႁႂ်ႈၵူႈလွင်ႈၽွမ်ႉယဝ်ႉၸင်ႇတေႇႁဵတ်း သင်ပႂ်ႉႁႂ်ႈမၼ်းတဵမ်ထူၼ်ႈ တေဢမ်ႇၸၢင်ႈႁဵတ်းသင်လႆႈၵွၼ်ႇယဝ်ႉ တႄႇတီႈလွင်ႈဢၼ်မီးသေ ႁဵတ်းၵႂႃႇၵမ်းဢိတ်းဢိတ်း မႄးၵႂႃႇၵမ်းလွႆးလွႆးတူၺ်း။

ငိုၼ်းဢမ်ႇၸႂ်ႈၵူႈလွင်ႈသေတႃႉ မၼ်းၵေႃႈလမ်ႇလွင်ႈယူႇ ငိုၼ်းၼၼ်ႉၸွႆႈႁႂ်ႈမီးလွင်ႈလွတ်ႈလႅဝ်းၼႂ်းၵၢၼ်ၸႂ်ႉၸၢတ်ႈပၢၼ် ဢမ်ႇထုၵ်ႇလီတူၺ်းၶၢမ်ႈ။

လွင်ႈယိုၼ်ႈမႅင်ႇၼၼ်ႉ ႁဵတ်းႁႂ်ႈႁဝ်းမီးတၢင်းသိူဝ်းလိူဝ်သေဢၼ်ဝူၼ်ႉဝႆႉလူးၵွၼ်ႇ မိူဝ်ႈလႆႈၸွႆႈထႅမ်ပိူၼ်ႈသေ ဢမ်ႇမုင်ႈမွင်းသင်ၼၼ်ႉ တေႁဵတ်းႁႂ်ႈႁဝ်းဢိမ်ႇၸႂ်လႄႈသိူဝ်းၸႂ်မႃးယဝ်ႉ။

ၸၢတ်ႈပၢၼ်ႁဝ်းၵေႃႈပဵၼ်ႁင်းႁဝ်းၵူၺ်း ဢမ်ႇမီးၽႂ်တႅပ်းတတ်းပၼ်ႁဝ်းလႆႈ လိူဝ်သေတူဝ်ၸဝ်ႈၵဝ်ႇ။

ပိၼ်ႇ-ငဝ်မွင်မိုတ်းမူဝ်း

ၵႂၢမ်းလႅၼ်ၽၢင်း

သိုဝ်ႉၵိၼ်ဢမ်ႇမူတ်း ၵူတ်ႉၵိၼ်ဢမ်ႇႁိုင် မိူဝ်ႈထိုင်ၶၢဝ်းယၢမ်း မၼ်းတေၼႄဢွၵ်ႇမႃးၵူၺ်း ၽႂ်ထုၵ်ႇလီလႆႈႁပ်ႉလွင်ႈယုမ်ႇယမ်။ ၵႂၢမ်းလႅၼ်ၽၢင်းၼၼ်ႉ မၼ်းတုမ်ႉတိူဝ်ႉလႆႈၶၢဝ်းယၢဝ်းယဝ်ႉ သမ်ႉဝႃႈဝၼ်းၼိုင်ႈ ၶႂ်ႈလၢတ်ႈလွင်ႈတေႉယူႇၵေႃႈ ဢမ်ႇမီးၼမ်ႉၼၵ်းႁႂ်ႈပိူၼ်ႈပေႃးယုမ်ႇၸႂ်လႆႈ။ ၵႂၢမ်းယွၵ်ႇလႅၼ်...

ၵႂၢမ်းလၢတ်ႈဢၼ်ႁဵတ်းႁႂ်ႈလီထွမ်ႇ

သင်ထူပ်းၺႃးၵူၼ်းတိုၵ်ႉမွင်ၸႂ်ယူႇ ဢမ်ႇလၢတ်ႈဝႃႈ “သူတေလႆႈၵႅၼ်ႇၶႅင်ဢိူဝ်ႈ ၽႂ်ၵေႃႈမီးလွင်ႈဢမ်ႇလီၵၼ်ၵူႈၵေႃႉယဝ်ႉ” သင်ၸၢမ်းလၢတ်ႈဝႃႈ“ႁဝ်းဢမ်ႇႁူႉသူလႆႈထူပ်းလွင်ႈသင်မႃးလၢႆလၢႆ သူပဵၼ်ယူႇယၢမ်းလဵဝ်ၼႆႉလႆႈၵေႃႈ ၶႅၼ်ႇၼႃႇယဝ်ႉဢိူဝ်ႈၼႃႈ” သင်ထူပ်းၺႃးၵူၼ်းၵေႃႉဢၼ်ဝူၼ်ႉၽိတ်းယူႇ ဢမ်ႇလၢတ်ႈဝႃႈ “လၢတ်ႈယဝ်ႉဝႃႈယႃႇႁဵတ်းၸိူင်ႉၼၼ်ၼႆ” သင်လၢတ်ႈဝႃႈ “ၽႂ်ၵေႃႈယၢမ်ႈႁဵတ်းၽိတ်းၵၼ်ၵူႈၵေႃႉယဝ်ႉ ၵူၺ်းၵႃႈ လွင်ႈဢၼ်သူႁတ်းယွမ်းႁပ်ႉမၼ်းၼႆႉၵူၺ်းၵေႃႈ...

ပၢႆးဝူၼ်ႉၵူၼ်းၶႂ်ႈၶိုၼ်ႈယႂ်ႇ

ပေႃးၶႂ်ႈႁႂ်ႈတူဝ်ၵဝ်ႇပဵၼ်ၵူၼ်းလီၼၼ်ႉ ဢမ်ႇလူဝ်ႇလႆႈပႂ်ႉႁႅင်းၸႂ်တီႈၽႂ်သေၸင်ႇတႄႇၵေႃႈလႆႈ ႁဝ်းၸၢင်ႈသၢင်ႈဢဝ်ႁင်းၵူၺ်းလႆႈ ယူႇတီႈတၢင်းဝူၼ်ႉႁဝ်းၵူၺ်း။ ယုမ်ႇယမ်ဝႃႈတူဝ်ၵဝ်ႇ မီးလွင်ႈၶိုပ်ႈၼႃႈလႆႈတႃႇသေႇ ဢမ်ႇဝူၼ်ႉဝႃႈတူဝ်ၵဝ်ႇဢမ်ႇၵတ်ႉၶႅၼ်ႇ မၼ်းယင်းပႆႇထိုင်ၶိင်ႇထိုင်ၶၢဝ်းမၼ်းၵူၺ်း ၵူၼ်းၶႅၼ်ႇၵေႃႈပဵၼ်ၵူၼ်းၵေႃႉဢၼ်ႁတ်းႁဵတ်းႁတ်းၸၢမ်း ဢမ်ႇၵူဝ်ဝႃႈတေၽိတ်း...