ၸၢႆးသၢႆၶိူဝ်းမႃးယူႇမိူင်းပၼ်ႇၼႆႉ မီးသိပ်းဝၼ်းပၢႆယဝ်ႉ
“ၸၢမ်ၶမ်း”
“ဢေႃႈၶႃႈ”
“မိူဝ်ႈၽုၵ်ႈၼႆႉပီႈတေလႆႈၵႂႃႇၼမ်ႉၸၢင်ဢိူဝ်ႈၼႃႉ”
“ပီႈသၢႆၶိူဝ်းတေၵႂႃႇလၢႆဝၼ်းၶႃႈလႃႇ”
“ပႆႇႁူႉလႆႈ ပီႈတေၵႂႃႇႁႃတူၺ်းၵႃး ပေႃးတီႈၼမ်ႉၸၢင်ဢမ်ႇမီးၵေႃႈတေ လႆႈၶိုၼ်ႈၵႂႃႇတီႈတူၼ်ႈတီးဢိူဝ်ႈ”
“တေၵႂႃႇၸွမ်းၵႃးလႅင်းၶႃႈႁႃႉ”
“ၸႂ်ႈယဝ်ႉဝႃႈ”
“ပီႈသၢႆၶိူဝ်းဢမ်ႇဢဝ်ၵႃးၼွင်ႉၼႆႉၵႂႃႇၶႃႈလႃႇ”
“ဢမ်ႇၸၢင်ႈဢဝ်ၵႂႃႇလေႃႇ ၵမ်းမႃးပီႈတေႁဵတ်းႁိုဝ် ပေႃးလႆႈၵႃးလူဝ်ႇ ႁေႃႈမႃးယဝ်ႉဢိူဝ်ႈလေႃႇ”
“တႄႉဢေႃႈၼေႃႈ ယႃႇပေႃးၼၢၼ်းမႃးၶႃႈၼႃႉ ၵူဝ်မီးၵူၼ်းၸႂ်ထိုင် ဢမ်ႇၼၼ် မီးၵူၼ်းပႂ်ႉမွင်းလႂ်ဢေႃႈ”
“ဢူႉ ၵူၼ်းၸိူင်ႉၼင်ႇပီႈၼႆႉ ၽၢတ်ႇလိပ်းၵေႃႈဢမ်ႇမီးၵေႃႉသေလၢႆ ၽၢတ်ႇတၢႆၵေႃႈ ဢမ်ႇမီးၵေႃႉႁႆႈၸွမ်း ၵႂႃႇမိူဝ်ႈလႂ်မႃးမိူဝ်ႈလႂ်ၵေႃႈၸၢင်ႈ ပဵၼ်သင်”
“မႃးလၢတ်ႈၼေၼွင်ႉႁဵတ်းသင်ၶႃႈလႃႇပေႃးၼၼ် ၵႂႃႇႁႃလၢတ်ႈတူၺ်း ပိူၼ်ႈတၢင်းၺွင်ႇၶမ်းပုၼ်ႉၶႃႈလေႃႇ”
“ၸၢမ်ၶမ်းတေႁႂ်ႈပီႈၵႂႃႇလၢတ်ႈၼေၽႂ် ပီႈတမ်ႉဢမ်ႇႁူႉၸၵ်းပိူၼ်ႈ”
“ဢမ်ႇႁူႉၸၵ်းၼႆၼၼ်ႉၼေႃႈ ဝၼ်းၼၼ်ႉဢုပ်ႇပၼ်သူပ်းပေႃးဢမ်ႇ ၸၢင်ႈဝၢင်း ၵၢင်းပေႃးဢမ်ႇလိုဝ်ႈၼၼ်ႉ”
“ပေႃးၼၼ်ၼွင်ႉတႄႉ ဢမ်ႇမွင်း ဢမ်ႇၸႂ်ထိုင်ယဝ်ႉၼႆဢိူဝ်ႈၼၼ်ႉ ၼေႃႈ ၵေႃႈယဝ်ႉလႄႈ တႃႉသေဝႃႈပိူၼ်ႈပဵၼ်လုၵ်ႈၽၢၼ်ၵၢမ်ႇဢွၼ်ႇ ၵူၺ်းလူး”
“ဢမ်ႇမွင်းၶႃႈလေႃႇ ၶွင်ၶႂ်ႈဝႃႈႁင်းၼွင်ႉ”
“ဢိူဝ်ႈ..ဢမ်ႇဝႃႈၶႃႈ ဢမ်ႇဝႃႈယဝ်ႉၶႃႈ”
မိူင်းလႅင်းမႃး ၸၢႆးသၢႆၶိူဝ်းဢဝ်ၶူဝ်းမၼ်းသေ
“ၸၢမ်ၶမ်းမႃးႁဝ်းၵႂႃႇသူင်ႇပီႈတီႈလႅင်းၵႃးၵမ်းလႄႈၼွင်ႉ” ၼႆပႃးၵၼ်မႃးသေ ၸၢႆးသၢႆၶိူဝ်းၵႃႈၶီႇၵႃးလႅင်းဢွၵ်ႇယၢၼ်ဝဵင်းမိူင်းပၼ်ႇမႃးယဝ်ႉ။
ၼႂ်ၼႆႉၼၢင်းၸၢမ်ၶမ်းလုၵ်ႉမႃးၸဵမ်ၸဝ်ႉသေ “ပီႈၶမ်းလိုၼ်း”
“ႁႆႉ ၸၢမ်ၶမ်းပေႉလုၵ်ႉၸဝ်ႉလႃႇၼွင်ႉ ၼွင်ႉတေၵႂႃႇလႂ်”
“ၼွင်ႉဢမ်ႇၵႂႃႇလႂ်ၶႃႈ ၼွင်ႉတေၸွႆႈပီႈၶမ်းလိုၼ်းမိုဝ်ႉၶဝ်ႈၽၵ်းဢေႃႈ”
“ဢူး ဢမ်ႇတၢပ်ႈလူဝ်ႇၸွႆႈၵေႃႈလႆႈယဝ်ႉဝႃႈ ပီႈၶမ်းလိုၼ်းႁဵတ်းႁင်း ၵူၺ်းၵေႃႈလႆႈယူႇ” ၼၢင်းၶမ်းလိုၼ်းတင်းသႂ်ႇၾႆးတင်းလၢတ်ႈတေႃႇမၼ်းၼၢင်း။
ၸၢမ်ၶမ်းၸင်ႇဝႃႈ “မႃးၼွင်ႉၵေႃႉသႂ်ႇပီႈၶမ်းလိုၼ်းၼႆၵေႃႈ”
မႃးယိပ်းဢဝ်ၾႆးၶိတ်ႇၽၢႆႇၼိုင်ႈ သိၵ်ႈပႅၵ်ႇၽၢႆႇၼိုင်ႈယူႇ။
“ၸၢမ်ၶမ်းၼႆႉၵေႃႈ ယႃႇမႃးၵဝ်းပီႈၶမ်းလိုၼ်းလူႉ တင်းပီႈတိုၼ်ႇလႃႈ ႁေလႄႈ ၵူၼ်းပေႃးပဵၼ်သၢဝ်ယဝ်ႉ တိုၵ်ႉမႃးႁဵတ်းမိူၼ်လုၵ်ႈဢွၼ်ႇယူႇ ဝႃႈ။ ၵမ်ႉမႃးပီႈၶမ်းလိုၼ်းတေဢမ်ႇၸႂ်ယၢဝ်းလႆႈယဝ်ႉဝႃႈ လုၵ်ႈဢွၼ်ႇ ၵေႃႈဢမ်ႇၸႂ်ႈ၊ မႃးပီႈၶမ်းလိုၼ်းၵေႃႉသႂ်ႇ သႂ်ႇၸိူင်ႉၼႆမိူဝ်ႈလႂ်တေၸပ်း လႃႇ တင်းပီၵေႃႈဢမ်ႇၸပ်းလႆႈယူဝ်ႉ တင်းပိူၼ်ႈၼႅတ်ႈၼႆႉ”
ၼၢင်းၶမ်းလိုၼ်းၼႆႉၵွပ်ႈဝႃႈ ယူႇၸွမ်းဢႃသၢင်ႇၶဝ် လုင်းသၢင်ႇ မွင်ႇၶဝ်ၼႆႉမႃးၸဵမ်မိူဝ်ႈ ၸၢမ်ၶမ်းပႆႇၵိူတ်ႇပုၼ်ႉလႄႈ လႆႈလုမ်းလႃးၸၢမ် ၶမ်းမႃး ၸဵမ်မိူဝ်ႈၼၢင်းၶမ်းလိုၼ်းဢႃႇယု 12 ၼၼ်ႉလႄႈ ၼၢင်းၸၢမ် ၶမ်းၼႆႉတိုၼ်းဝႃႈဝႆႉမိူၼ်ၼွင်ႉတေႉꧦ ၼွင်ႉဢွၵ်ႇဢွၵ်ႇမၼ်းၼၼ်ႉ သေ တင်းပွင်ႉႁင်းၸၢမ်ၶမ်းသေ သႂ်ႇၾႆးမၼ်းယူႇ။
“ၸၢမ်ၶမ်းတေၸွႆႈပီႈၶမ်းလိုၼ်းဢေႃႈ”
“ပေႃးဝႃႈၸွႆႈၵၼ်ၼႆၵေႃႈ ပိူၼ်ႈႁဵတ်းၵေႃႉမဵဝ်းမဵဝ်းလေႃႇၸၢမ်ၶမ်း”
“ပေႃးၼၼ်ႉၼွင်ႉတေလႆႈၸွႆႈပီႈၶမ်းလိုၼ်းႁဵတ်းမဵဝ်းလႂ်ၶႃႈလႃႇ”
“ဢမ်ႇတၢပ်ႈၸွႆႈယဝ်ႉ ပီႈၶမ်းတေႁဵတ်းႁင်းၵူၺ်းၵႂႃႈလႆ”
“ပီႈၶမ်းလိုၼ်းၼႆႉၵေႃႈဝႃႈ ဢမ်ႇပၼ်ပိူၼ်ႈၸွႆႈဝႃႇ”
“မိူဝ်ႈလႂ်ၼွင်ႉတေမေႃလႃႇ ၼွင်ႉၵေႃႈၶႂ်ႈမေႃႁဵတ်းၵၢၼ်ႁိူၼ်းၼင်ႇၵဝ်ႇ ဢေႃႈ”
ၼၢင်းၶမ်းလိုၼ်းလႆႈငိၼ်းၸိူင်ႉၼၼ်ယဝ်ႉယၵ်ႉတူၺ်းၼၢင်းၸၢမ်ၶမ်းသေ လၵ်ႉဢၢမ်းယူႇႁင်းမၼ်းဝႃႈ “ဢေႃ ၵႃႈပူၼ်ႉမႃး ဢမ်ႇတွၼ်ႉယၢမ်ႈ ငိၼ်းၼွင်ႉၵဝ်လၢတ်ႈၸိူင်ႉၼႆသေပွၵ်ႈလႃႇ။ ၸၢမ်ၶမ်းဢူၺ် မိူဝ်ႈလဵဝ် သမ်ႉၼွင်ႉၵဝ်ဝႆႉၸိူင်ႉႁိုဝ်လႃႇၼႆႉ ဝႃႈလႃးၵေႃႈ လၵ်ႉလွမ်လွမ်မီးၵေႃႉ ႁၵ်ႉဢွၼ်ႇသေယဝ်ႉ တေႁၢင်ႈႁႅၼ်းတူဝ်ႈတၼ်းဝႆႉတႃႇႁပ်ႉဢဝ်ပုၼ်ႈ ၽွၼ်းမေႈၸဝ်ႈႁိူၼ်းၼႆလႄႈ ၸင်ႇၼႅတ်ႈတိုၼ်ႇတူဝ်ႁႃႉတေႃႈ။ ဢေႃ ဢၼ်ပိူၼ်ႈဝႃႈ ၵွပ်ႈၶၢဝ်းယၢမ်းၼႆႉလႅၵ်ႈလၢႆႈယူႇတႃႇသေႇလႄႈ ႁူဝ်ၸႂ် ၵူၼ်းႁဝ်းၵေႃႈၸၢင်ႈမေႃလႅၵ်ႈလၢႆႈၸွမ်းၶၢဝ်းယၢမ်းၼၼ်ႉယူႇၼႆၼၼ်ႉတႄႉ ၸႂ်ႈတေႉယဝ်ႉ ၸႂ်ႈတေႉယဝ်ႉ”
“ပီႈၶမ်းလိုၼ်းတေႁႂ်ႈၼွင်ႉၸွႆႈႁဵတ်းဢၼ်လႂ်ၼႆၵေႃႈ”
“ပေႃးၸိူင်ႉၼၼ်ၵေႃႈ လၢင်ႉမေႃႈၶဝ်ႈယဝ်ႉ ဢဝ်ၶဝ်ႈသၢၼ်သႂ်ႇသၢမ် ၵွၵ်းယဝ်ႉသုၵ်ႈသေ မႃးတင်ႈယဝ်ႉၶိုၼ်းၵႂႃႇလၢင်ႉဝၢၼ်ႇလႄႈ ၵူၺ်းၼႃႇ တႄႉမေႃႈၶဝ်ႈဢၼ်တင်ႈဝႆႉၼႆႉၵေႃႈ တေလႆႈၵႆႉၵႆႉတူၺ်း ၵူဝ်မၼ်းၶႅမ်ႈ ဢမ်ႇၼၼ် ၵူဝ်မၼ်းဢမ်ႇသုၵ်း ဢမ်ႇၼၼ်ၵူဝ်မၼ်းပိူဝ်ႉ ပေႃးယဝ်ႉ ၸိူဝ်းၼႆႉယဝ်ႉ ၶိုၼ်းမႃးသွႆးၽၵ်းၼႆဢိူဝ်ႈ ပေႃးဝႃႈၶဝ်ႈသုၵ်းယဝ်ႉၶိုၼ်း တၢင်ႇသွမ်းၽြႃးလႄႈ ယဝ်ႉၵေႃႈ လူင်းမႃးႁုင်ၽၵ်း ပေႃးၽၵ်းသုၵ်း ယဝ်ႉ သမ်ႉမိူဝ်းလွင်းသွမ်းတီႈၵျွင်းယဝ်ႉ ၶိုၼ်းမႃးၽဵဝ်ႈၽဵဝ်ႈပတ်းပတ်း ၼိူဝ်ႁိူၼ်းၼႂ်းႁိူၼ်းလႄႈ ၼႂ်းႁွင်ႉမိုဝ်ႉသေ တူမ်ႈၼမ်ႉသႂ်ႇဝႆႉၼႂ်းတဝ်ႈ ထၢတ်ႈလႄႈ တင်းတႃႇႁဵတ်းၼမ်ႉတူမ်ႈၵတ်းၼႆဢိူဝ်ႈ”
ၼၢင်းၸၢမ်ၶမ်းၵေႃႈ ၵွပ်ႇပႆႇယၢမ်ႈႁဵတ်းလႄႈ ပဵၼ်သုၵ်ႉပဵၼ် သၵ်ႉယူႇႁင်းမၼ်း ပေႃးမူၼ်းဝိၼ်ႈဝိၼ်ႈယဝ်ႉ၊ ၼၢင်းၶမ်းလိုၼ်းတိုၼ်း တင်ႈၸႂ်ၶႂ်ႈၸၢမ်းတူၺ်းမၼ်းၼၢင်းၼႆၵေႃႈ မၼ်းၼၢင်းတႄႉဢမ်ႇႁူႉ တူဝ်သေ တင်ႈၸႂ်တင်ႈၶေႃးႁဵတ်းပေႃးဢမ်ႇၶၢၼ်ႉယဝ်ႉ။ ၼၢင်းၶမ်း လိုၼ်းၵေႃႉၼိုင်ႈတႄႉ ဝူၼ်ႉယူႇႁင်းမၼ်းဝႃႈ
“ၵဝ်ၼႆႉၵေႃႈ ပေႉမႃးမိူၵ်ႈၼိူဝ်ၼွင်ႉၵဝ်ပေႃးတၢၼ်ႇၼႆႉၼေႃ ၸၢမ်ၶမ်း ဢူၺ်ႉၶႂၢင်းပၼ် ပီႈၶမ်းလိုၼ်းဢိတ်ႉၼိုင်ႈၼႃႈ ပီႈလႆႈမိူၵ်ႈၼိူဝ်ၼွင်ႉ ပူၼ်ႉတီႈၵႂႃႇပႅတ်ႈယဝ်ႉ” ၼႆယူႇ။
ၵွပ်ႈဝႃႈၵႃႈပူၼ်ႉမႃးၼႆႉ ၼၢင်းၶမ်းလိုၼ်းဝူၼ်ႉဝႃႈ ၸၢမ်ၶမ်း ဢမ်ႇမီးမႄႈ ဢမ်ႇလႆႈယူႇတႂ်ႈႁူမ်ႈငဝ်းမႅတ်ႉတႃႇမႄႈၼႆသေ တိုၼ်းႁၵ်ႉ လႄႈ ၸွမ်းၸႂ်ၸၢမ်ၶမ်းမႃးတႃႇသေႇသေ မိူဝ်ႈၼႆႉသမ်ႉလႆႈၸႂ်ႉၼၢင်း ၸၢမ်ၶမ်းႁဵတ်းၵၢၼ်တေႉတေႉဝႃႈဝႃႈၸိူင်ႉၼႆၼႆႉ ပဵၼ်ဢၼ်ငိၼ်းၼႅင် ၸႂ်ၶိုၼ်းသေ ၶဝ်ႈၵႂႃႇယူႇၼႂ်းႁွင်ႈၽၢႆႈယဝ်ႉ လၵ်ႉႁႆႈယူႇႁင်းမၼ်း။
သိုပ်ႇလူထႅင်ႈတွၼ်ႈတေမႃးၶႃႈ
