ၶႃႈၵေႃႈဢမ်ႇႁူႉဝႃႈမၼ်းတေမႃးတီႈႁိူၼ်း လုၵ်ႈမၼ်းႁၼ်ၼႃႈၵူၺ်းၵေႃႈ ပေႃးဢမ်ႇၶႂ်ႈတွင်းၼႃႈမၼ်းယဝ်ႉၼႃႇ။
“သူမႃးတီႈႁိူၼ်း သူဢမ်ႇလၢတ်ႈႁဝ်းလႃႇ”
“လၢတ်ႈယဝ်ႉသူတေတူၺ်းယူႇႁႃႉ သူတေတွပ်ႇယူႇၼႄႇ”
“ၶႂၢင်းပၼ်ႁဝ်း ႁဝ်းၽိတ်းၵူၺ်း ႁဝ်းတေဢမ်ႇႁဵတ်းထႅင်ႈယဝ်ႉ”
“ဢိုမ်ႈ..ၵိၼ်ၶဝ်ႈမႃးယဝ်ႉၼႄႇ”
“ၼႅတ်ႈမႃးႁိုဝ်တၼ်းလႆႈၵိၼ်”
ၶႃႈၵေႃႈၵွၼ်ႉၶဝ်ႈပၼ်မၼ်းသေ ၼင်ႈတူၺ်းမၼ်းၵိၼ်တေႃႇပေႃးယဝ်ႉ မၼ်းၵိၼ်ယဝ်ႉၵေႃႈ ပႆႇသိမ်းၽိူၼ်
“သူ..ႁဝ်းဝႃႈႁဝ်းပႅတ်ႈၵၼ်သေလႃႈ”
ဝၢၼ်ႇဢၼ်မၼ်းဢၢင်ႈယိပ်းၶိုၼ်ႈမႃးၼၼ်ႉၵေႃႈ လူၼ်ႇႁူင်ႈမိုဝ်းၵႂႃႇယဝ်ႉ။ မၼ်းယဵၼ်ၵႂႃႇတင်းႁိုင် ဢဝ်ၸႂ်ၶႃႈပေႃးသၼ်ႇမႃးယူႇ
“သူလၢတ်ႈၵႂၢမ်းၶေႃႈၼႆႉဢွၵ်ႇမႃး ဝူၼ်ႉလီယဝ်ႉႁႃႉ”
“ဢိုမ်ႈ..ဝူၼ်ႉယဝ်ႉဝူၼ်ႉထႅင်ႈၵေႃႈ မီးၶေႃႈတွပ်ႇဢၼ်ၼႆႉၵူၺ်း”
“မီးလွင်ႈသင်ၵေႃႈလၢတ်ႈမႃးသိုဝ်ႈသိုဝ်ႈလႄႈ..ဢမ်ႇႁူႉလွင်ႈႁူႉတၢင်းသေ ႁဝ်းပႅတ်ႈၵၼ်ၼႆႉ မၼ်းၸႂ်ႈယူႇႁႃႉ”
သဵင်ၶႃႈသၼ်ႇသၼ်ႇမႃးသေ
“ႁဝ်းဢမ်ႇမေႃယူႇတီႈႁိူၼ်းသူ”
“မႃးယူႇတီႈၼႆႈၵေႃႈလႆႈယူႇလူးႁဝ်းၸၢင်ႈဝႃႈသင်”
“ႁဝ်းၼွၵ်ႈၸႂ်သူ ႁဝ်းၵဝ်းၽူႈၸၢႆးတၢင်ႇၵေႃႉ”
သမ်ႉပေႃးဢဝ်မၼ်းငိူဝ်ႈလူင်ၵႂႃႇသေ တူၺ်းၼႃႈၶႃႈယဝ်ႉ သုတ်ႉမႃးၸမ်ၸမ်ၶႃႈသေ
“ႁဝ်းႁူႉၸၵ်းသူလီယူႇၼႃႈ ယႃႇမႃးလႅၼ်ႁဝ်းယူႇယဝ်ႉ”
“ၶႂ်ႈဝႃႈသူတေဢမ်ႇဢၢၼ်းပႅတ်ႈႁဝ်းႁႃႉ”
“ဢမ်ႇ..ႁႂ်ႈတၢႆၵေႃႈဢမ်ႇပႅတ်ႈလႆႈ”
“သူယၢမ်ႈႁၵ်ႉႁဝ်းတေႉယူႇႁႃႉ..”
“ႁၵ်ႉဢိူဝ်ႈ ပေႃးဢမ်ႇႁၵ်ႉႁဝ်းတေဢမ်ႇတေႇၼႃႈႁိူၼ်းၸွမ်းသူလေႃႇၼႃႈ”
“သူၵေႃႈမီးမႂ်ႇယဝ်ႉလူး ပေႃးသူႁၵ်ႉႁဝ်းယူႇၵေႃႈ ပၼ်ႁဝ်းသၢင်ႈၼႃႈႁိူၼ်းမႂ်ႇသေလႄႈ”
“မိူဝ်ႈသူႁူႉယဝ်ႉ ႁဝ်းၵေႃႈဢမ်ႇထဵင်မိူၼ်ၵၼ် ၸႂ်ႈဢိူဝ်ႈႁဝ်းၵဝ်းထႅင်ႈၽူႈယိင်းတၢင်ႇၵေႃႉ ဢမ်ႇၸႂ်ႈဝႃႈႁဝ်းတေပႅတ်ႈသူၼႃ”
“ပေႃးၼၼ် သင်ႁဝ်းမီးၵူၼ်းဢၼ်ႁဝ်းၵျိူၵ်ႈသေ မီးလုၵ်ႈၸွမ်းၶဝ် သူတိုၵ်ႉတေယွမ်းႁပ်ႉႁဝ်းယူႇၼႄႇ”
ၼမ်ႉတႃၶႃႈၵေႃႈၸိုမ်းႁူၺ်ႇတႃပႃးလေႃးသဵင်လၢတ်ႈယဝ်ႉ။
မၼ်းၵေႃႈယဵၼ်ၵႂႃႇ ဢမ်ႇတွပ်ႇသင်
“ႁဝ်းၽိတ်းၵႂႃႇယဝ်ႉ ႁဝ်းလႆႈႁဵတ်းၽိတ်းတေႃႇသူတေႉဢိူဝ်ႈ ႁဝ်းဢမ်ႇပႅတ်ႈသူလႆႈၼႃ”
“မၼ်းဢမ်ႇပဵၼ်လႆႈယဝ်ႉ ႁဝ်းဢမ်ႇပဵၼ်လႆႈတေႉဢိူဝ်ႈ ၸွင်ႇႁူႉႁႃႉ မၼ်းၸဵပ်းမွၵ်ႈႁိုဝ်ၼႆ ႁူဝ်ၸႂ်ႁဝ်းတေတႅၵ်ႇလႅဝ်ယူႇယဝ်ႉ”
ၶႃႈၵေႃႈႁႆႈဢွၵ်ႇမႃးတေႃႇၼႃႈမၼ်းၼၼ်ႉယူႇ။ မၼ်းၵေႃႈပႂ်ႉၶႃႈႁႆႈယဝ်ႉသေ ၶျေႃးၶႃႈၶိုၼ်းလႄႈ
“လွင်ႈဢၼ်ႁဝ်းလႆႈႁဵတ်းၵႂႃႇ မၼ်းၽိတ်းတေႉယဝ်ႉ သူၸွႆႈပႂ်ႉႁဝ်းဢိတ်ႉၼိုင်ႈၸွင်ႇလႆႈႁိုဝ် ႁဝ်းတေၸတ်းၵၢၼ်ႁႂ်ႈမၼ်းယဝ်ႉၵႂႃႇၵူၺ်း ဝူၼ်ႉႁၼ်ထိုင်ၼႃႈလုၵ်ႈႁဝ်းဢိူဝ်ႈၼႃႈ”
“ပေႃးထၢၼ်ႈဝႃႈသူဝူၼ်ႉယူႇ သူသမ်ႉတေႁဵတ်းၸိူင်ႉၼၼ်ႁဵတ်းသင် ႁဝ်းၵေႃႈဢမ်ႇလီမိူၼ်ၵၼ် ဢမ်ႇပၼ်တၢင်းသိူဝ်းသူလႆႈ လုၵ်ႈႁဝ်းႁဝ်းလဵင်ႉမၼ်းလႆႈယူႇ”
ပဵၼ်ပွၵ်ႈဢွၼ်တၢင်းသုတ်း ဢၼ်ၶႃႈဢမ်ႇယွမ်းပၼ်မၼ်းလႆႈ။ ပေႃးမီးပွၵ်ႈၼိုင်ႈၵေႃႈ ႁူႉတိုၼ်းမီးပွၵ်ႈသွင် လွင်ႈၸႂ်ၼမ်ၼႆႉမၼ်းတိုၼ်းမီးၼႂ်းတူဝ်ၶဝ်ယူႇယဝ်ႉလူး လိူဝ်ၼၼ်ႉမၼ်းသမ်ႉလဝ်းႁေ မီးငိုၼ်းထႅင်ႈ၊ မၢင်ပွၵ်ႈလီၶႂ်ႈၶႅၼ်ယူႇၵေႃႈ ၶႃႈဢမ်ႇၸၢင်ႈၸွမ်းႁေႉၸွမ်းၶႅၼ်မၼ်းလႆႈ တေႁႂ်ႈမၼ်းပႅတ်ႈဢၵျၢင်ႉၼၼ်ႉႁူႉတေပႅတ်ႈဢမ်ႇလႆႈမိူၼ်ၵၼ်။ ၶႃႈဝႆႉၸႂ်မၼ်းသေ ယူႇၸွမ်းမၼ်းမႃးထိုင်ဝၼ်းမိူဝ်ႈၼႆႉ လွင်ႈဢၼ်ဢမ်ႇၶႂ်ႈပဵၼ်ၵေႃႈလႆႈပဵၼ်မႃးယဝ်ႉၼႃႇ။
ပၢၼ်ပဵၼ်မေးၼွႆႉ ၶႃႈယၢမ်ႈလႆႈႁၼ်ၵူၺ်း ၶႃႈဝႃႈမၼ်းၵေႃႈဢမ်ႇႁၢင်ႈႁၢႆႉၼင်ႇၵဝ်ႇ လႆႈႁၼ်ဢူၺ်းၵေႃႉၶႃႈယူႇၸိူင်ႉၼၼ်။ ၵူၺ်းၵႃႈ မိူဝ်ႈဝႃႈ တူဝ်ၶႃႈပဵၼ်ၵေႃႉထူပ်း ဢၼ်ဝႃႈၽူဝ်ၶႃႈၵႂႃႇၵဝ်းထႅင်ႈၽူႈယိင်းတၢင်ႇၵေႃႉၼၼ်ႉ မၼ်းပေႉမႃးၸဵပ်းၵႅၼ်းၼႃႇဢမ်ႇႁူႉယဝ်ႉ ၶႃႈဢမ်ႇၶႂ်ႈၶၢမ်ႇမၼ်းလႆႈယဝ်ႉ။
တႃႉတေၶၢမ်ႇၸဵပ်းၶၢမ်ႇၸွမ်းႁေႉၸွမ်းၶႅၼ်ယူႇၼၼ်ႉ ပၼ်ႁႂ်ႈၶႃႈလႆႈယူႇၵတ်းယဵၼ်ယူႇၸွမ်းလုၵ်ႈၵူၺ်းၵေႃႈ ၶႃႈသိူဝ်းၸႂ်ယဝ်ႉ။ ပေႃးဝႃႈဢမ်ႇၵဵဝ်ႇၵၼ်ယဝ်ႉ ဢမ်ႇလႆႈဝူၼ်ႉသင်ၸွမ်း၊ မိူဝ်ႈတိုၵ်ႉၵဵဝ်ႇၶွင်ႈၵၼ်ယူႇၼႆ ၸႂ်ၵေႃႈတိုၼ်းပႆႇၽၢတ်ႇဢွၵ်ႇလႆႈ။
