ၵူၺ်းၵႃႈ ဝၼ်းဢၼ်ဢမ်ႇထၢင်ႇၵေႃႈမႃးထိုင် ႁိုင်ၼႃႇယူဝ်ဝႃႈတေဢမ်ႇၶိုၼ်းပွၵ်ႈ မိူဝ်ႈယၢမ်းႁူဝ်ၶမ်ႈလပ်းသိင်ႇၸွမ်ႉႁွမ်ႉ လုၵ်ႈယိင်းဢွၼ်ႇလႅၼ်ႈဢွၵ်ႇႁိူၼ်းတူၺ်း
“ၽႂ်မႃးလႃႇလုၵ်ႈ”
“ပေႃႈပေႃႈမႃး”
“ၸႂ်ႈယူႇႁ”
ၶႃႈၵေႃႈဢွၵ်ႇမႃးတူၺ်း မိူဝ်ႈလႆႈႁၼ်ၵေႃႈတူၵ်းၸႂ်ယဝ်ႉ ပဵၼ်ၶဝ်တေႉဢိူဝ်ႈ၊ ၵူၺ်းၵႃႈဢမ်ႇထၢင်ႇတေလႆႈႁၼ် ယိင်းသၢဝ်ဢွၼ်ႇၵေႃႉၼိုင်ႈႁွတ်ႈမႃးၸွမ်း။
ၼႂ်းႁူဝ်ၸႂ်ၼႆႉတႄႉတိုဝ်တိပ်ႇတၼ်လူင်ဝႆႉယဝ်ႉၼႃႇ သမ်ႉပေႃးဢမ်ႇႁူႉတေလႆႈႁဵတ်းႁိုဝ်ယဝ်ႉဢိူဝ်ႈလေႃႇ၊ လုၵ်ႈဢွၼ်ႇတႄႉၵေႃႈႁိုဝ်တေႁူႉသင် ႁွင်ႉပေႃႈသေလႅၼ်ႈၶဝ်ႈၸူးမၼ်းၵႂႃႇၵမ်းလဵဝ်ယဝ်ႉ။
မိူဝ်ႈႁၼ်မၼ်းဢုမ်ႈႁွပ်ႇလႄႈလုၵ်ႈယူႇၸွမ်းၵၼ် ႁူမ်ႈလူၺ်ႈၽူႈယိင်းၵေႃႉၼၼ်ႉၸုၵ်းယူႇႁိမ်းမၼ်းၼႆ တၢင်းၸူမ်းသိူဝ်း ၵေႃႈ ပဵၼ်တၢင်းတုၵ်ႉၵႂႃႇယဝ်ႉ၊ ၶႃႈယဵၼ်ႉၸႂ်တူၺ်းႁၢင်ႈၼၼ်ႉဢမ်ႇလႆႈသေ ပၢႆႈၶဝ်ႈၼႂ်းႁိူၼ်းပႅတ်ႈယဝ်ႉ။
လုၵ်ႈဢွၼ်ႇဢၼ်ၶႂ်ႈႁူႉၶႂ်ႈႁၼ်ၼၼ်ႉၵေႃႈထၢမ်
“ဢူႈ ၼၼ်ႉၽႂ်”
ၶႃႈပႂ်ႉထွမ်ႇယူႇ ၵူၺ်းၵႃႈ…
“မႄႈသူလူးလုၵ်ႈ”
“မႄႈ မီးၼႂ်းႁိူၼ်း”
မၼ်းၵေႃႈႁွပ်ႈတင်းဢေးလုၵ်ႈသေ ၶဝ်ႈႁိူၼ်းမႃး ၶႃႈၵေႃႈၸဵတ်ႉၼမ်ႉတႃသေယဝ်ႉ
“ၵိၼ်ၶဝ်ႈယဝ်ႉႁႃႉ”
“ပႆႇသူလူး..”
“ၵိၼ်ယဝ်ႉ..”
“မႃးၵၼ်သွင်ၵေႃႉၵူၺ်းႁႃႉ…”
“ၸႂ်ႈယဝ်ႉဝႃႈ”
ဢေးဢွၼ်ႇၼၼ်ႉတႄႉယူႇဝႆႉတၢင်းၼွၵ်ႈလႄႈ မၼ်းငွၵ်ႈၽၵ်းတူသေယဝ်ႉ”ဢေးၼွင်ႉ ၶဝ်ႈ
မႃးၼႂ်းႁိူၼ်းၼႆႉလႄႈ”
ၶႃႈတႄႉၼႃႈဢမ်ႇၵီႈသေဢိတ်းယဝ်ႉ မၼ်းတႄႉတူၺ်းၼႃႈၶႃႈသေယုမ်ႉယူႇ
“ၼႆႉပဵၼ် ၼွင်ႉၶမ်းဢွင်ႇ ၼွင်ႉၸၢႆးပၢင်ႇ မၼ်းတိုၵ်ႉဢႃႇယုလဵၵ်ႉယူႇ ႁဝ်းဝႃႈႁႂ်ႈမၼ်းမႃးၶိုၼ်ႈႁူင်းႁဵၼ်းတၢင်းၼႆႉသေ ၸွင်ႇလႅပ်ႈပူၼ်ႉပႅတ်ႈႁသူဝႃႈ ”
မိူဝ်ႈငိၼ်းၼင်ႇၼၼ် တူဝ်ၸႂ်သမ်ႉပေႃးမဝ်လူင်ၵႂႃႇၵမ်းလဵဝ်ယူႇ။ ၶႃႈၸင်ႇႁူႉတူဝ်ၵူၺ်းဝႃႈၶႃႈၵေႃႈၶီႈၶႅၼ်ဝႆႉၼင်ႇၵဝ်ႇၼႆ။
ၵူၺ်းၵႃႈသင်ၵေႃႉၼၼ်ႉ ဢမ်ႇၸႂ်ႈၼွင်ႉၸၢႆးပၢင်ႇတေႉလူး ၶႃႈတေႁဵတ်းၸိူင်ႉႁိုဝ် လုၵ်ႈလူးတေပဵၼ်ၸိူင်ႉႁိုဝ်၊ တေပဵၼ်လုၵ်ႈဢမ်ႇမီးပေႃႈၵႂႃႇႁိုဝ်၊ တေပၼ်ႁႂ်ႈမၼ်းမီးမႄႈသွင်ၵေႃႉႁိုဝ်၊ သင်ဢမ်ႇဝူၼ်ႉထိုင်လုၵ်ႈ ၶႃႈပႅတ်ႈမၼ်းၸဵမ်မိူဝ်ႈမၼ်းႁၢႆၵႂႃႇပုၼ်ႉယဝ်ႉ။
ၵိၼ်ၶဝ်ႈၵိၼ်သင်ယဝ်ႉ ပၼ်ၶႃပေႃႈလုၵ်ႈလဵၼ်ႈၵေႃႉၵၼ်သေ ၶႃႈၸင်ႇထၢမ်ၸူးၼွင်ႉဢွၼ်ႇၵေႃႉၼၼ်ႉ
“ဢသၢၵ်ႈၵႃႈႁိုဝ်ယဝ်ႉလႃႇ”
“သိပ်းသီႇယဝ်ႉၶႃႈ”
“ယူႇတၢင်းပုၼ်ႉ ယဝ်ႉၸၼ်ႉသင်မႃးလႃႇ”
“ယဝ်ႉၸၼ်ႉႁူၵ်းသေ ႁဵတ်းၵၢၼ်ၸွႆႈတီႈႁိူၼ်းသေ ဢမ်ႇလႆႈသိုပ်ႇႁဵၼ်းယဝ်ႉၶႃႈ”
“ၼွင်ႉမႃးၼႆႉ မႄႈဢမ်ႇဝႃႈသင်ႁႃႉ”
“မႄႈၶႃႈလႆႈသဵင်ႈၵႂႃႇယဝ်ႉဢေႃႈ”
“ၸႂ်ဢမ်ႇလီၸွမ်းတေႉဢိူဝ်ႈ တီႈႁိူၼ်းသမ်ႉမီးၽႂ်ၵူၺ်းယဝ်ႉလႃႇ ၼွင်ႉမႃးၸိူင်ႉၼႆ”
“ဢမ်ႇမီးၽႂ်ယဝ်ႉၶႃႈ မီးမႄႈလႄႈတင်းၶႃႈသွင်ၵေႃႉယူႇၸွမ်းၵၼ် မႄႈဢမ်ႇမီးယဝ်ႉၵေႃႈၵိုတ်းၶႃႈၵူၺ်းယဝ်ႉဢေႃႈ”
“သမ်ႉႁဵတ်းႁိုဝ်ႁူႉၸၵ်းလုင်းသူလႃႇ”
“လုင်းမိူဝ်းထၢမ်ႁိူၼ်းပီႈပၢင်ႇၶဝ်သေ လႆႈႁူႉၸၵ်းလုင်းဢေႃႈ”
“တင်းၸၢႆးပၢင်ႇသမ်ႉဢမ်ႇၸႂ်ႈပီႈၼွင်ႉဢွၵ်ႇၵၼ်ၵႃႈပေႃးၼႆ”
“ဢမ်ႇၸႂ်ႈၶႃႈ ပဵၼ်ပီႈၼွင်ႉၶႅၼ်ႈတွင်ႉၵၼ်ၵူၺ်းဢေႃႈ”
“သမ်ႉႁဵတ်းႁိုဝ်သေမႃးၸွမ်းၵၼ်တင်းလုင်းၼႆႉလႃႇ ဝႆႉၸႂ်မၼ်းလႆႈယူႇႁႃႉ ၸွင်ႇမၼ်းႁဵတ်းႁင်ၼွင်ႉၵွၼ်ႇၼႄႇ”
“ဢမ်ႇၶႃႈ မၼ်းဝႆႉၶႃႈမိူၼ်လုၵ်ႈမၼ်းဢေႃႈ မၼ်းဝႃႈလုၵ်ႈၸၢႆးမၼ်းၵေႃႈၵေႃႉယႂ်ႇမွၵ်ႈၶႃႈၼႆႉ လႄႈ မီးလုၵ်ႈယိင်းၵေႃႉၼိုင်ႈ တေပဵၼ်ဢေးၼွင်ႉၼႆႉၶႃႈယူဝ်ႉ မၼ်းဝႃႈလုၵ်ႈမၼ်းလီႁၵ်ႉၼႃႇ တူဝ်ဢွၼ်ႇမီးမွၵ်ႈသွၵ်ႇၼႆႉၵူၺ်း မႃးၸွမ်းတၢင်းၵေႃႈ ၵုမ်ႇ လၢတ်ႈဝႃႈ ၶႂ်ႈႁၼ်ၼႃႈလုၵ်ႈၼႃႇယဝ်ႉၼႆတိၵ်းတိၵ်းဢေႃႈ”
သၢႆတႃလႄႈသဵင်လၢတ်ႈဢေးၼွင်ႉၼႆႉ ၶႃႈၵေႃႈဢုၼ်ႇၸႂ်တမ်းၸႂ်ယဝ်ႉ၊ ဢမ်ႇၸႂ်ႈဝႃႈၶႃႈဢမ်ႇယုမ်ႇၸႂ်မေႃၼၼ်ႉ လိူဝ်သေဝႃႈၶႃႈယုမ်ႇဢမ်ႇလႆႈႁူဝ်ပၢၵ်ႇတဵမ် ယွၼ်ႉပိူဝ်ႈယူႇၸွမ်းၸိူဝ်းၶဝ် မႃးႁိုင်လႄႈ ပေႃးပဵၼ်လွင်ႈၽူႈယိင်းၼႆႉ ၶဝ်မေႃလိင်ႉမေႃလႄႉ မေႃႁႄႉလၢတ်ႈတၢင်ၵၼ်ၼႃႇၽႅဝ်၊ သမ်ႉဝႃႈပဵၼ်ၽူဝ်ၵေႃႈ ၶႃႈတိုၼ်းဢမ်ႇတမ်းၸႂ်။
ပိူၼ်ႈဝႃႈပေႃးၶဝ်ႁၵ်ႉႁဝ်းတေႉၶဝ်ဢမ်ႇႁဵတ်းလေႃႇ ၼႆႉမၼ်းဢမ်ႇၸႂ်ႈတၢင်းႁၵ်ႉၵူၺ်း မၼ်းပဵၼ်တၢင်းၵျေႃႇၶဝ်ယဝ်ႉ၊ မၢင်ၵေႃႉၼႆႉ ႁၵ်ႉလုၵ်ႈႁၵ်ႉမေးတၢၼ်ႇႁိုဝ်ၵေႃႈ ႁၵ်ႉၽၢႆႇၼႃႈၵူၺ်း ပေႃး
ယူႇၽၢႆႇလပ်ႉတႃမႃးယဝ်ႉတႄႉ ဢွၵ်ႇဝၢၼ်ႈဢွၵ်ႇဝဵင်းၵႂႃႇၵေႃႈပဵၼ်မၢဝ်ႇယဝ်ႉလူး။
ၶဝ်ႁဵတ်းႁိုဝ်ဢမ်ႇႁဵတ်းၼၼ်ႉ ၶႃႈဢမ်ႇၶႂ်ႈႁူႉတၢၼ်ႇဢၼ်ဝႃႈ ၶဝ်မီးလွင်ႈသိုဝ်ႈယူဝ်းတေႃႇၶႃႈမွၵ်ႈႁိုဝ်ၼႆၼၼ်ႉယဝ်ႉ။ သင်ယူႇၸွမ်းၵၼ်တႃႇသေႇ ၶႃႈၵေႃႈဢမ်ႇလႆႈသႂ်ႇၸႂ်ၵႃႈႁိုဝ်၊ ၵူၺ်းၵႃႈဢမ်ႇလႆႈယူႇၸမ်ၵၼ်ပဵၼ်သီႇပီယဝ်ႉလႄႈ ၵူႈလွင်ႈမေႃလႅၵ်ႈလၢႆႈ သင်ဝႃႈၶဝ်လႅၵ်ႈလၢႆႈၵႂႃႇ ၶႃႈၵေႃႈတေလႆႈႁပ်ႉမိုဝ်းၵႂႃႇၸူဝ်ႈၵႃႈ မၼ်းပႆႇၵႂႃႇၵႆလိူဝ်ၼႆႉထႅင်ႈၼၼ်ႉယဝ်ႉ။
ဢမ်ႇႁူႉၶဝ်လႆႈၵႂႃႇႁဵတ်းသင်မႃး ၸွမ်းတူဝ်ၵေႃႈပေႃးပဵၼ်ႁွႆးဢၢတ်းၵႂႃႇသဵင်ႈ၊ ပေႃးဝႃႈလွင်ႈၵၢၼ်ၶဝ်ၼႆ ၶႃႈတေဢမ်ႇထၢမ်ၸွမ်းယဝ်ႉ လိူဝ်သေဝႃႈ သူတေၵႂႃႇမိူဝ်ႈလႂ် မႃးလၢႆဝၼ်းလႃႇပွၵ်ႈၼႆႉ မွၵ်ႈၼႆႉၵူၺ်း၊ ပေႃးဝႃႈမၼ်းၵႂႃႇၼႆ ဢမ်ႇပေႃးသူႈၵပ်းသိုပ်ႇမႃး ၶၢဝ်းတၢင်းသီႇပီ မၼ်းၵႂႃႇပႅတ်ႈႁႃးမႄႈလုၵ်ႈ ဢမ်ႇၵပ်းသိုပ်ႇသင်မႃးသေဢိတ်း ၶႂ်ႈပွင်ႉၶႂ်ႈလႃႇယူႇၵေႃႈ မိူဝ်ႈလႆႈႁၼ်ၶဝ် ၶႃႈပေႃးလိုမ်းၵႂၢမ်းဢၼ်ၶႂ်ႈလၢတ်ႈၶဝ် ဢၼ်ၵဵပ်းမႃးၶၢဝ်းတၢင်းသီႇပီၼၼ်ႉမူတ်းယဝ်ႉ။
“သူ ႁဝ်းဝႃႈႁဝ်းမႃးယူႇၸွမ်းသူႁေဢမ်ႇလီႁႃႉ”
“သူတေဢမ်ႇႁဵတ်းယဝ်ႉၵႃႈၵၢၼ်ဢၼ်သူႁၵ်ႉၼၵ်းႁၵ်ႉၼႃၼၼ်ႉ”
“ပေႃးသူလဵင်ႉႁဝ်းလႆႈတႄႉ ႁဝ်းတေဢမ်ႇႁဵတ်းယဝ်ႉ”
ပေႃးဝႃႈတေႉ ၸူဝ်ႈဢဝ်ၵၼ်မႃး ၶႃႈၵေႃႈဢမ်ႇတွၼ်ႉယွၼ်းငိုၼ်းမၼ်းသေပွၵ်ႈ မၼ်းၵေႃႈႁႂ်ႈလႆႈဝႃႈဢဝ်ငိုၼ်းမႃးပၼ်ၶႃႈမွၵ်ႈၼၼ်ႉမွၵ်ႈၼႆႉဢိူဝ်ႈၼႆၵေႃႈဢမ်ႇမီး ၶွင်ႁႃးၵေႃႈဢမ်ႇသူႈလႆႈယူႇၸွမ်းၵၼ်ႁေတီႈ၊ မၼ်းမီးငိုၼ်းႁဢမ်ႇမီးၶႃႈၵေႃႈဢမ်ႇထၢမ် မၼ်းမီးပၢႆးမၢၵ်ႈမီးသင်ၼႆၵေႃႈၶႃႈဢမ်ႇႁူႉ၊ ၵူၺ်းႁူႉမိူဝ်ႈမၼ်းမႃးႁေမိူဝ်ႈမၼ်းၵႂႃႇၼၼ်ႉၵူၺ်း။ တေဝႃႈႁိုဝ်ၵေႃႈ ၼႃႈႁိူၼ်းၶဝ်တႄႉပဵၼ်ၵူၼ်းမၢၵ်ႈမီးၵေႃႈဝႃႈယူႇ၊ မႄႈၶဝ်တႄႉၵႆႉဝႃႈယူႇၵူၺ်း လူဝ်ႇသင်ၵေလၢတ်ႈလႄႈလူဝ်ႇငိုၼ်းၵေႃႈလၢတ်ႈလႆႈတႃႇသေႇၼ၊ မၢင်ပွၵ်ႈၶႃႈတမ်ႉဢမ်ႇလႆႈလၢတ်ႈ ၶဝ်ပေႃးႁႃမႃးပၼ်ယဝ်ႉ ၼင်ႇၽႃႈဢွမ်ႈဢေးလုၵ်ႈ၊ သိူဝ်ႈၶူဝ်းတၢင်းလဵၼ်ႈဢေးလုၵ်ႈၸိူဝ်းၼႆႉ ၶဝ်သိုဝ်ႉမႃး ၶႃႈတင်းဢမ်ႇလႆႈသိုဝ်ႉသင်ပၼ်မၼ်းတေႉတေႉၵွၼ်ႇလႃႈ၊ ၵႃႈၶဝ်ႈမုၼ်းမၼ်းၵူၺ်းၵေႃႈ ၶဝ်ပၼ်ၵူႈလိူၼ်ယဝ်ႉ။ ၶႃႈၵေႃႈၼႃႈၵၢၼ်တႃငၢၼ်းလီယူႇလႄႈ ဢမ်ႇပေႃးလႆႈမႆႈၸႂ်လွင်ႈငိုၼ်းသေၵႃႈႁိုဝ် ဢမ်ႇပေႃးသူၼ်ၸႂ်မၼ်းသေ ဢမ်ႇႁူႉလွင်ႈမၼ်းၵႂႃႇပႅတ်ႈယဝ်ႉ။
“လဵင်ႉလႆႈၼႃႇ..ပိူၼ်ႈလိုပ်ႈသူယဝ်ႉၵႃႈ”
“ဢမ်ႇလိုပ်ႈႁဝ်းဢမ်ႇၶႂ်ႈယူႇၵူၺ်း”
“လၢတ်ႈမႃးသိုဝ်ႈသိုဝ်ႈလႄႈ..”
“ႁဝ်းယွၼ်းလိုဝ်ႈဝႆႉၸူဝ်ႈၶၢဝ်း”
“ၸူဝ်ႈၶၢဝ်းသူၼႆႉ လၢႆဝၼ်းၵူၺ်း”
“မိူဝ်ႈၼႆႉၵူၺ်း”
“ၵႂႃႇယူႇၸွမ်းၸုမ်းသူၶိုၼ်းလႃႈ”
“သွင်ပီၸွင်ႇပေႃး”
“တေႃႇၸူဝ်ႈၵေႃႈဢမ်ႇပေႃးလႃႈ”
“သွင်ပီတႄႉပေႃးလႆႈၼွင်ႉဢေးလုၵ်ႈႁဝ်းထႅင်ႈယူႇၵႂႃႈၼေႃႈ”
“သူၵေႃႉလဵင်ႉလႄႈပေႃးၼၼ်”
သုတ်းယဝ်ႉ
ပၢႆၵမ် – သႅၼ်ငဝ်း
6/12/2025 – 9/12/2025
