မိူဝ်ႈဢမ်ႇမီးငိုၼ်း ၵေႃႉဢွၼ်တၢင်းသုတ်းဢၼ်ၸႂ်ထိုင်ၵေႃႈ ပဵၼ်ပေႃႈမႄႈ
ၽိူဝ်ႇမီးငိုၼ်းမႃး ၵူၼ်းၵေႃႉဢၼ်ၸႂ်ထိုင်ၵေႃႈပဵၼ် ၵေႃႉႁၵ်ႉလႄႈဢူၺ်းၵေႃႉ။
ၶႂ်ႈလႆႈလူတ်ႉ ၵေႃႉဢွၼ်တၢင်းသုတ်းဢၼ်ၸႂ်ထိုင်ၵေႃႈ ပေႃႈမႄႈ။
ၽိူဝ်ႇမီးလူတ်ႉ ၵေႃႉဢၼ်တေၵႂႃႇႁပ်ႉသူင်ႇၼၼ်ႉသမ်ႉပဵၼ် ၵေႃႉႁၵ်ႉလႄႈဢူၺ်းၵေႃႉ။
သႅင်ႇၶိုၵ်ႉၶႅမ်ႉလႄႈလွင်ႈၵတ်းယဵၼ်ၸႂ်ၼၼ်ႉ မီးဝႆႉတွၼ်ႈတႃႇၵေႃႉႁၵ်ႉလႄႈဢူၺ်းၵေႃႉ တၢင်းၵိၼ်ၼိူဝ်ၽိူၼ်တီႈႁိူၼ်းၼၼ်ႉ မီးဝႆႉတွၼ်ႈတႃႇပေႃႈလႄႈမႄႈ။
ပေႃႈမႄႈဝူၼ်ႉသွၼ်ႇၼပ်ႉငိုၼ်း ၵႃႈၸႂ်ႉၸၢႆႇမိူဝ်ႈတေၼွၼ်း တႃႇလွင်ႈယူႇလွတ်ႈ လုၵ်ႈၼွၼ်းလဵၼ်ႈၽူင်းဢွၼ်တၢင်းတေၼွၼ်း တႃႇႁႂ်ႈလပ်းၾၼ်လီ။
မိူဝ်ႈႁဝ်းမီးတၢင်းသိူဝ်း တေတူၺ်းႁၼ်ၵေႃႉႁၵ်ႉလႄႈဢူၺ်းၵေႃႉ။
ၽိူဝ်ႇႁဝ်းမီးလွင်ႈမႆႈၸႂ် လွင်ႈတုၵ်ႉၸႂ်မႃး ၵေႃႉဢၼ်ဝူၼ်ႉထိုင်သမ်ႉပဵၼ်ပေႃႈမႄႈ။
မိူဝ်ႈႁဝ်းဢွင်ႇမၢၼ်ၼၼ်ႉ တေတူၺ်းႁၼ်ၵေႃႉႁၵ်ႉလႄႈဢူၺ်းၵေႃႉ တႃႇႁွင်ႉၵိၼ်လဵင်ႉၵၼ် ၵူၺ်းၵႃႈ ၵူၼ်းၵေႃႉဢၼ်ၸူမ်းသိူဝ်းလိူဝ်ပိူၼ်ႈၼၼ်ႉတႄႉပဵၼ်ပေႃႈမႄႈၼၼ်ႉယဝ်ႉ။
ၵူၺ်းၵႃႈပေႃႈမႄႈပဵၼ်ၵူၼ်းၵေႃႉဢၼ်တူၺ်းၶၢမ်ႈၵႂႃႇသေ ၵုမ်ႇလဵၼ်ႈၵျေႃႇမူၼ်ႈသိူဝ်းယူႇၵူၺ်း။
ပေႃႈမႄႈသမ်ႉလႆႈႁဵတ်းၵၢၼ် ၼွၼ်းသေဝူၼ်ႉတႃႇႁဵတ်းၵၢၼ်ထႅင်ႈမိူဝ်ႈၽုၵ်ႈ တႃႇလႅၵ်ႈဢဝ်တၢင်းသိူဝ်းလုၵ်ႈ ၶႂ်ႈႁႂ်ႈလုၵ်ႈလႆႈႁဵၼ်းသုင်။
မိူဝ်ႈတေႇၼႃႈႁိူၼ်းၵေႃႈ ၵူၼ်းၵေႃႉဢၼ်ႁႃငိုၼ်းပၼ်ၼၼ်ႉပဵၼ်ပေႃႈမႄႈယဝ်ႉ ၵူၼ်းၵေႃႉဢၼ်မီးတၢင်းသိူဝ်းသမ်ႉပဵၼ်လုၵ်ႈ။
ပေႃႈမႄႈလၢတ်ႈၼႄမၢင်ပွၵ်ႈ ၸွမ်းလူၺ်ႈလွင်ႈမႆႈၸႂ်သေ ႁႂ်ႈလုၵ်ႈလႆႈလီ ၵူၺ်းၵႃႈ လုၵ်ႈသမ်ႉဝူၼ်ႉဝႃႈ လွင်ႈဢၼ်ပေႃႈလႄႈမႄႈလၢတ်ႈၼၼ်ႉ ဢမ်ႇမီးၽွၼ်းလီသင်။
ပေႃႈမႄႈပဵၼ်ၵူၼ်းၵေႃႉဢၼ်ဢဝ်ၶၢမ်ႈပူၼ်ႉပၼ်ႁႃၼပ်ႉဢၢၼ်ႇပေႃးဢမ်ႇလႆႈတွၼ်ႈတႃႇလုၵ်ႈ ၵူၺ်းၵႃႈ မိူဝ်ႈလုၵ်ႈမီးပၼ်ႁႃမႃးသမ်ႉ ယွမ်းသုမ်းငၢႆႈ ၶႂ်ႈတၢႆပႅတ်ႈႁေယဝ်ႉၼႆ။
ပေႃႈမႄႈၼၼ်ႉပဵၼ်ၵူၼ်းၵေႃႉဢၼ်ၵႅတ်ႇၶႄပၼ်လုၵ်ႈ လႄႈ ယူႇႁိမ်းၸမ်လုၵ်ႈတေႃႇထိုင်ၸၢတ်ႈပၢၼ်ၵမ်းလိုၼ်းၵွၼ်ႇယဝ်ႉ။
လုၵ်ႈသမ်ႉၵုမ်ႇဝူၼ်ႉထိုင်လွင်ႈသင်ယူႇ။
ၶေႃႈၵႂၢမ်းဢၼ်ဝႃႈ ပေႃႈ လႄႈ မႄႈၼၼ်ႉ ပဵၼ်ၶေႃႈဢွၼ်တၢင်းသုတ်း ဢၼ်ႁဝ်းႁွင်ႉဢွၵ်ႇသူပ်း။
မိူဝ်ႈႁဝ်းယင်းတိုၵ်ႉမီးၶဝ်ယူႇၼၼ်ႉ သႂ်ႇၸႂ်လႄႈတူၺ်းထိုင်ၶဝ်လီလီလႄႈ ဝၼ်းၼိုင်ႈပေႃးဝႃႈၶဝ်ဢမ်ႇလႆႈယူႇယဝ်ႉ သမ်ႉဝႃႈႁဝ်းၶႂ်ႈႁွင်ႉႁႃၶဝ်ပွၵ်ႈမႃးၶိုၼ်းၵေႃႈ ၶဝ်ဢမ်ႇမီးဝၼ်းမႃးယူႇၸွမ်းႁဝ်းလႆႈယဝ်ႉ။
ပိၼ်ႇ-ငဝ်မွင်မိုတ်းမူဝ်း
