တွၼ်ႈသိပ်းၸဵတ်း
သဵင်ၵွင်သဵင်မွင်းလင်ယွၼ်ႈဢူၼ်ပၼ်း သဵင်ႁုၼ်ႉသႅၼ်ႇသေႃႇၵျေႃမူၼ်ႈၸွမ်းၵၼ် ပေႃးၼၼ်ႈတဵမ်ဝၢၼ်ႈ ၼုမ်ႇထဝ်ႈႁၢတ်ႈႁၢႆးၸၢႆးယိင်း ဢွၼ်ၵၼ်မႃးမူၼ်ႈမႃးၵျေႃႇ ၵမ်ႈၽွင်ႈၵေႃႈ မႃးၸွႆႈႁဵတ်းၸွႆႈသၢင်ႈႁုင်မိုဝ်ႉၵႅင် ယူႇတီႈၼႂ်းဝၢင်းႁိူၼ်းၶိင်းႁဵင်ၶဝ် ၼၼ်ႉယဝ်ႉ။
တၢင်းဝၢၼ်ႈဢုင်ၼၼ်ႉၵေႃႈ ႁၢင်ႈႁႅၼ်းတူဝ်ႈတၼ်းတႃႇဢွၼ်ၵၼ်မိူဝ်းလမ်ပွႆး တီႈဝၢၼ်ႈၸိင်ႇၶဝ် သဵင်ၵွင်သဵင်မွင်း ၸဵမ်ၼူၵ်ႉပႃးတူဝ်း၊ ၵူၼ်းၶူၼ်ၵေႃႈပႃး ၵႃႈယွပ်ႇယူဝ်ႉယွပ်ႇယႃႉ ႁုၼ်ႉသႅၼ်ႇ ႁွင်ႉၵၼ်မႃးၸူႉယူႇတီႈႁိူၼ်းၶိင်းၵႄႇၶဝ် ၼၼ်ႉယဝ်ႉ။
သႅင်ၼူၼ်းၼၼ်ႉၵေႃႈ ၼုင်ႈတင်း ၶူဝ်းတႆးတဵမ်ၸုမ်ႇ သိူဝ်ႈသွမ်ႇၼုမ်ႇ ယၢဝ်းလူင်းႁူမ်ႇၵုမ်ႇ မၢၵ်ႇတုမ်ႇၶွတ်ႇသၢၼ်သွတ်ႇၵွင်ႉၵၼ် ႁဵတ်းပဵၼ်ႁၢင်ႈၽၢင်ၼႃႈသိူဝ်ႈ လီလူလီယဵမ်ႈ၊ သိၼ်ႈတူင်ႇတႆးသွမ်ႇလၢႆးၶၼ်ႇပွင်ႈ ဝႅတ်ႉပၼ်ႇၼုင်ႈတႅတ်ႈၵႅတ်ႈလီ လၢမ်ႈယၢဝ်းႁူမ်ႇတႃတိၼ် တင်းၶႅပ်းတိၼ်ၶတ်ႈတီႇပႃႇမၢင်မၢင်ဢွၼ်ႇလႄႈ တင်းသႃႉသွင်းဢွၼ်ႇၵွင်ႉႁွႆႈၶႅၼ်သေ ၸုၵ်းယူႇတီႈၼႃႈၵိူၼ်ႇၽၵ်းတူႁိူၼ်းၶမ်းလၢဝ်ၶဝ်ၼၼ်ႉယဝ်ႉ။
“မေႃသွၼ်!! ၸွင်ႇပႃႈတၼ်းႁိုဝ်!..”
မေႃသွၼ်တၼ်းဢမ်ႇတၼ်းတႄႉဢမ်ႇႁူႉ ဢၼ်ဢမ်ႇပႆႇတူဝ်ႈတၼ်းသေ ငိၼ်းသဵင်ၵူၼ်းႁွင်ႉမၼ်းလႄႈၼႅတ်ႈဢွၵ်ႇမႃးၼၼ်ႉတႄႉ လႅင်းမိူင်းသႂ်ၵူၺ်းယဝ်ႉ။ တင်းသိူဝ်ႈတႆးဝၼ်ႈၶွၼ်ႇ ဢၼ်မၢတ်ႇမၢၵ်ႇတုမ်ႇပႆႇယဝ်ႉၼၼ်ႉ လႅၼ်ႈလူင်ဢွၵ်ႇမႃးငွၵ်ႈႁႃတူၺ်းသဵင်ၵူၼ်းႁွင်ႉၵမ်းလဵဝ်။
“မႃးယဝ်ႉႁႃႉ!! ၶိုၼ်ႈမႃးပႂ်ႉၼိူဝ်ႁိူၼ်းၵွၼ်ႇလႄႈ”
သၢႆတႃဢမ်ႇၶႂ်ႈယၵ်ႉတူၺ်း သမ်ႉလႆႈႁၼ်မႅၼ်ႈၺႃး ၼႃႈဢူၵ်းလူင်းထိုင်ၼႃႈတွင်ႉ ၶွင်လႅင်းမိူင်းသႂ် မီးတင်းၵၢမ်ႈတွင်ႉပဵၼ်လုၵ်ႈပဵၼ်ႁူၺ်ႇၼႅၼ်ႈၵႅၼ်ႇၼႃဝႆႉၼၼ်ႉ ဢဝ်မၼ်းသမ်ႉပေႃးၼႃႈလႅင်ဝိၼ်ႇဝၢႆႇၵႂႃႇပႅတ်ႈတၢင်ႇတၢင်း ယူႇယဝ်ႉ။
ၶမ်းလၢဝ်ၵေႃႈ ဢွၵ်ႇႁိူၼ်းမႃးသေ
“မၢတ်ႇသိူဝ်ႈလီလီႁေၵွၼ်ႇလႄႈ..”
ၶမ်းလၢဝ်တႄႉ ဢမ်ႇၼုင်ႈသိၼ်ႈသင် ၼုင်ႈသႂ်ႇၵူၼ်ၵျိၼ်းသေ လူင်းႁိူၼ်းၵႂႃႇယဝ်ႉ။ တႄႇၸဵမ်မိူဝ်ႈမၼ်းမႃးယူႇတီႈဝၢၼ်ႈၼႆႉ ဝၼ်းဢၼ်မၼ်းၼုင်ႈသိၼ်ႈၵေႃႈ မိူဝ်ႈဝၼ်းပိူၼ်ႈၽုၺ်ႇႁူင်းႁဵၼ်းၼၼ်ႉၵူၺ်း ၶူဝ်းၼၼ်ႉ သမ်ႉပၢႆပဵၼ်ၶူဝ်းၼၢႆးၶမ်းလႅင် ၵဵပ်းဝႆႉမိူဝ်ႈမၼ်းယင်းတိုၵ်ႉပဵၼ်သၢဝ်ယူႇၼၼ်ႉယဝ်ႉ၊ ၶူဝ်းမၼ်းဢၼ်ပႃးမႃးတႄႉ သိူဝ်ႈၶူဝ်းတႆး သိၼ်ႈတူင်ႇၼုင်ႈၵေႃႈ ဢမ်ႇမီးႁေၽိုၼ်။
ၶဝ်သၢမ်ၵေႃႉၵေႃႈ ဢွၼ်ၵၼ်ၵႂႃႇၸွမ်းပိူၼ်ႈတင်း ၵူၼ်းဝၢၼ်ႈၶဝ် ဢွၼ်ႁႆႇၵွင်ႁႆႇမွင်း ၸွမ်းၵၼ်ၵႂႃႇပဵၼ်မူႇပဵၼ်ၸုမ်းလွႆးလွႆး ၾူၼ်တူၵ်းၾူၼ်ဢွႆၵေႃႈ ၵင်ႈၸွင်ႈတိုဝ်းၵုပ်းသူပ်းၼုင်ႈၽႃႈယၢင်ၵႂႃႇ။
ၶမ်းလၢဝ်ၼၼ်ႉတႄႉ တင်းၵႂႃႇတင်းပွင်ႉယူႇယဝ်ႉ “တေႁွင်ႉၵၼ်မႃးႁဵတ်းႁင်တိၵ်းတိၵ်းၸိူင်ႉၼႆ ၾူၼ်တူၵ်းပေႉတၢၼ်ႇၼၢႆႉၼႆႉ သင်ယူႇႁိူၼ်းႁေၼွၼ်းပေႃးတေၼွၼ်းဢုၼ်ႇၼႃႇယဝ်ႉ”
“လေႇပွႆးၼၼ်ႉၼႃႇပီႈ!!”
“ၵျေႃႇယူႇႁႃႉဝႃႈ…မိူၼ်ၼႆၼႆႉ!!”
“ဢိူဝ်ႈ..ပီႈပဵၼ်ထိုင်မေႃသွၼ်ၵေႃႉၼိုင်ႈယဝ်ႉ ပဵၼ်ပွႆးပဵၼ်လၢမ်းၼႆၵေႃႈ လီလႆႈၵႂႃႇၶဝ်ႈႁူမ်ႈၼႄၼႃႈၼႄတႃယူႇဢိတ်ႉၼိုင်ႈၵႂႃႈ ၵမ်ႉပိူၼ်ႈဝႃႈ ဢမ်ႇမေႃၶဝ်ႈဢွၵ်ႇပိူၼ်ႈၼႆႁေယဝ်ႉလေႃႇ”
“ၸႂ်ႈယဝ်ႉ” သႅင်ၼူၼ်းမႃးၵွင်ႉၶႅၼ်ၶမ်းလၢဝ်သေ “တီႈပုၼ်ႉပိူၼ်ႈလဵင်ႉၶဝ်ႈၽၵ်းဝၢၼ်ၼႃႇၵူၺ်ႉပီႈ”
“ၸႂ်ႈႁႃႉ! ၸွင်ႇမီးၼိူဝ်ႉမူၼႄႇ” ႁူၺ်ႇတႃလမ်လိူမ်ႈလူင်မႃးၵမ်းလဵဝ်ယဝ်ႉ “ၸဵမ်မိူဝ်ႈမႃးယူႇတီႈၼႆႈ ပႆႇလႆႈၵိၼ်ၼိူဝ်ႉမူႁေပွၵ်ႈၵူၺ်ႉၼႆႉ”
ၵမ်းၼႆႉတႄႉၼင်ႇႁၢင်ႈၶႂ်ႈၵႂႃႇဝႆးလိူဝ်သေပိူၼ်ႈယူႇ။
ၸဝ်ႈပွႆးၵေႃႈ ဢွၼ်ၵၼ်ႁႆႇၵွင်ႁႆႇမွင်းပႂ်ႉႁပ်ႉတွၼ်ႈသေ ၶဝ်ႈမိူဝ်းၼႂ်းဝၢင်းႁိူၼ်း ႁူမ်ႈလူႇႁူမ်ႈတၢၼ်းၵၼ်ၵႂႃႇယဝ်ႉ၊ ၸဝ်ႈပွႆးၶဝ် ဢွၼ်ၵၼ်ၸႃႇၵႃႉလဵင်ႉၶဝ်ႈတမ်းၽၵ်း ၵိၼ်ၶဝ်ႈၵၼ်ၵႂႃႇ၊ ၶမ်းလၢဝ်ၼၼ်ႉတႄႉ မိူဝ်ႈႁၼ်ပိူၼ်ႈမႃးတမ်းၽၵ်းၼႂ်းၽိူၼ်ၼၼ်ႉ ၼႅတ်ႈငွၵ်ႈတူၺ်းၸွမ်းဝၢၼ်ႇၽၵ်းယဝ်ႉ ဢၼ်မၼ်းလႆႈႁၼ်တႄႉ ၽၵ်းၵၢတ်ႇၵူဝ်ႈလႄႈ ၼေႃႇၸေႃးၽဵတ်းလေႃးလုပ်ႇမူ၊ မိူၼ်တေပဵၼ်ၽၵ်းဝၢၼ်ယူႇ ၵူၺ်းၵႃႈ ၼႃႈတႃမၼ်းၼၼ်ႉတႄႉဢမ်ႇသိူဝ်းၸွမ်းလႆႈ လွင်ႈမုင်ႈမွင်း ဢၼ်ဝူၼ်ႉမႃးၸွမ်းတၢင်းၼၼ်ႉ ႁၢႆလၢႆၵႂႃႇၸွမ်းၼေႃႇၸေႃးမူတ်းယဝ်ႉ။ ၼင်ႈႁေတူၺ်းဝၢၼ်ႇၶဝ်ႈမၼ်းယူႇၵူၺ်း ၵိၼ်ၵေႃႈဢမ်ႇၵိၼ်၊ သႅင်ၼူၼ်းၵေႃႈ ၸေႃႉဢဝ်လုပ်ႇၼၼ်ႉသႂ်ႇပၼ်ၼႂ်းဝၢၼ်ႇၶမ်းလၢဝ်ၵႂႃႇ
“ၸိုင်ပီႈလၢတ်ႈဝႃႈၶႂ်ႈၵိၼ်ၼႃႇၼႆ ပဵၼ်သင်လႄႈဢမ်ႇၵိၼ်လႃႇ”
ဢမ်ႇလၢတ်ႈသင်သေ လုၵ်ႉၵႂႃႇပႅတ်ႈၵမ်းလဵဝ်၊ ၶမ်းလၢဝ်ၼၼ်ႉၵေႃႈ လဵပ်ႈပၼ်ႇၵႂႃႇတၢင်းလင်ႁိူၼ်းၼၼ်ႉယဝ်ႉ ၼင်ႈဢေႃႉယူႇႁင်းမၼ်း ၼင်ႇၶၢၼ်ၸႂ်ၶၢၼ်ၶေႃးတေႉယူႇ ယၢမ်းၼၼ်ႉ ၸင်ႇသမ်ႉမီးၵူၼ်းယိုၼ်ႈၵွၵ်းၼမ်ႉမႃးပၼ်မၼ်းၵႂႃႇ မၼ်းၵေႃႈမႃးပုၼ်ႈပၢၵ်ႇမၼ်းသေ “ၸူမ်းယဝ်ႉ”
“ပဵၼ်သင်ၵႂႃႇလႃႇ..ဢမ်ႇယူႇလီႁႃႉ!!” မေႃယႃၵေႃႈ မႃးယူႇႁိမ်းမၼ်းသေ ထွင်ႇၾႆးပၼ်ယူႇ။
“ပီႈမေႃ..ၸွႆႈၶႃႈလုၵ်ႉဢိတ်ႉၼိုင်ႈ”
“ဢမ်ႇယူႇလီႁမ်ႉတေမႃးႁဵတ်းသင်လႃႇ..”
“ထၢၼ်ႇဝႃႈၶႃႈၶႂ်ႈမႃးၼႃႇယဝ်ႉ မိူဝ်ႈၵႆႈတႄႉဢမ်ႇပဵၼ်ၼင်ႇၵဝ်ႇ ၵူၺ်းၵႃႈ ငိၼ်းသႅဝ်ၼေႃႇယဝ်ႉၵေႃႈ ၸင်ႇလႆႈပဵၼ်ၸိူင်ႉၼႆၼၼ်ႉယိုင်”
“ဢမ်ႇမႅၼ်ႈတင်းၼေႃႇႁႃႉ..”
ၶမ်းလၢဝ်ၵေႃႈ ငွၵ်းႁူဝ်ၼႄၵႂႃႇ၊ မေႃယႃၵေႃႈ တေဢွၼ်ဢဝ်ၶဝ်ႈမိူဝ်းၼႂ်းႁိူၼ်းလူင်သမ်ႉ ၵူၼ်းၼမ်ၼႃႇလႄႈ လႆႈဢွၼ်ၶဝ်ႈၵႂႃႇတၢင်းၽၵ်းတူလင် တီႈၼႂ်းႁွင်ႈၼွၼ်းမၼ်းၼၼ်ႉသေ ပၼ်ႁႂ်ႈၶမ်းလၢဝ်လိုဝ်ႈႁိူဝ်ႉၵႂႃႇယဝ်ႉ ႁႃယႃမႃးပၼ်မၼ်းယူႇ ၵူၺ်းၵႃႈ ဢမ်ႇပႆႇၸၢင်ႈပၼ်ၵိၼ်ယႃလႆႈ ပေႃးပႆႇလႆႈၵိၼ်ၶဝ်ႈၼႆလႄႈ
“ၵိၼ်ၶဝ်ႈယဝ်ႉႁႃႉ!”
“ပႆႇလႆႈၵိၼ်”
“ၽၵ်းၵၢတ်ႇၸွင်ႇၵိၼ်လႆႈ”
ၶမ်းလၢဝ်ၶွၼ်းႁူဝ်ၼႄသေ “ဢိမ်ႇၼႃႇယဝ်ႉ” တင်းမီႇၼႃႈၸူး၊ မေႃယႃၵေႃႈ ဢမ်ႇလၢတ်ႈသင်သေ ဢွၵ်ႇႁွင်ႈၵႂႃႇယဝ်ႉယူႇဢမ်ႇႁိုင် မေႃယႃယိပ်းတင်းဝၢၼ်ႇၶဝ်ႈလႄႈၽၵ်းသေ သႅင်ၼူၼ်းသမ်ႉ ယိပ်းတင်းၵွၵ်းၼမ်ႉမႃးၸွမ်းယူႇ။
“ပီႈဢမ်ႇပဵၼ်သင်ၸွင်ႇၸႂ်ႈ ငိၼ်းမေႃယႃဝႃႈပီႈဢမ်ႇပေႃးလီၼႆ”
“ဢိုမ်ႈ!” တွင်ႉၵေႃႈႁွင်ႉမႃးယဝ်ႉ မေႃယႃ ဢဝ်တင်းၶဝ်ႈတင်းၽၵ်း မႃးတမ်းဝႆႉတီႈႁိမ်းၽိူၼ်ဢွၼ်ႇၼႂ်းႁွင်ႈၼၼ်ႉလႄႈ “ၵိၼ်ၶဝ်ႈသေ ၵိၼ်ယႃ လိုဝ်ႈႁိူဝ်ႉလႄႈၼႃႈ ႁဝ်းတေၵႂႃႇၸွႆႈပိူၼ်ႈတၢင်းၼွၵ်ႈၵွၼ်ႇ”
ၽၵ်းဢၼ်မေႃယႃႁႃမႃးပၼ်ၼၼ်ႉတႄႉ ပဵၼ်ၼမ်ႉၽၵ်းၼိူဝ်ႉလွင်းၼၼ်ႉယဝ်ႉ၊ သမ်ႉဝႃႈၼမ်ႉၽၵ်းမၼ်းဢမ်ႇဢုၼ်ႇသေတႃႉ မိူဝ်ႈႁၼ်ၼိူဝ်ႉလွင်း ဢၼ်ၵိင်ႈယူႇၼႂ်းဝၢၼ်ႈၼၼ်ႉၼႆၵေႃႈ မၢၵ်ႇတႃလိူမ်ႈလိူၵ်ႇ ဢဝ်ၸေႃႉတၵ်းၵိၼ်သႂ်ႇသူပ်းဝႆးၼႃႇဢမ်ႇတၼ်းႁူႉ ၵမ်ႉၵေႃႈမူတ်းၵႂႃႇယဝ်ႉ၊ သႅင်ၼူၼ်းၵေႃႈ ၽဵဝ်ႈၽိူၼ်ၶဝ်ႈပၼ်မၼ်းသေ
“ပီႈၸွင်ႇၶႂ်ႈၵႂႃႇတူၺ်းပိူၼ်ႈၵႃႈၸၢတ်ႈတၢင်းၼွၵ်ႈၼၼ်ႉႁႃႉ ”
“ဢမ်ႇၵႂႃႇယဝ်ႉ ႁူဝ်ၶႆႈၼႃႇ ၵိၼ်ယႃယဝ်ႉၵေႃႈ တေၼွၼ်းပႂ်ႉဝႆႉယူႇတီႈၼႆႈၵူၺ်းယဝ်ႉၼႃႈ”
“ၵမ်ႉပေႃးတေမိူဝ်းၶႃႈၸင်ႇမႃးႁွင်ႉၼႃႈ”
သႅင်ၼူၼ်းၼၼ်ႉၵေႃႈ ႁိပ်ႈၼႅတ်ႈဢွၵ်ႇၵႂႃႇၵမ်းလဵဝ်ယူႇ။ ၶမ်းလၢဝ် ၵိၼ်ၶဝ်ႈယဝ်ႉ ၼွၼ်းၵႂႃႇၼိူဝ်ၵူႇၼွၼ်းမေႃယႃ ဢၼ်မီးၽႃႈသိူဝ်ႇဝႆႉတႅတ်ႈၼႅတ်ႈလီ ႁူမ်ႈပႃးဢၢႆတူဝ်ႁွမ်ဢုၼ်ႇဢုၼ်ႇၸပ်းယူႇၸွမ်းၽႃႈႁူမ်ႇ၊ သမ်ႉဝႃႈသဵင်လင်ၼႃႇတၢၼ်ႇႁိုဝ်ၵေႃႈ ၶမ်းလၢဝ်တႄႉလႆႈၼွၼ်းလပ်းၵႂႃႇယဝ်ႉ။
ၼႂ်းၶမ်ႈဝၼ်းၽိတ်ႈတေၶဝ်ႈဝႃႇ ၵူၼ်းလၢႆဝၢၼ်ႈၵေႃႈ မႃးၵိုၼ်းၶွၼ်ႈၵၼ်ယူႇတီႈႁိူၼ်းလုင်းႁဵင်ၶဝ် ၵူၼ်းၶၢဝ်ႉၵူၼ်းၼုမ်ႇ ဢွၼ်ၵၼ်ၵႃႈပၼ်ၵွင်ယူႇၼႂ်းၵၢင်တၢင်း ဢိၵ်ႇတင်းသဵင်ၵွင်မွင်းသိူင်း ၵႃႈပဵၼ်ဝူင်းပဵၼ်ဝူင်း ၵူၼ်းမၢဝ်ႇၼုမ်ႇသၢဝ်ၶဝ်ၼႆၵေႃႈ ယူႇပဵၼ်ၵူႈပဵၼ်တွႆးသေၵႃႈၸွမ်းၵၼ်ၵႂႃႇယဝ်ႉ၊ သႅင်ၼူၼ်းလႄႈလႅင်းမိူင်းသႂ်ၵေႃႈ ၵႃႈမူၼ်ႈတွႆးၵၼ်ၵႂႃႇၸွမ်းပိူၼ်ႈယူႇ။
ၽၢႆႇတၢင်းၵူၼ်းထဝ်ႈၵမ်ႈၽွင်ႈၼႆၵေႃႈ ယူႇၼိူဝ်ႁိူၼ်းသေ ထွမ်ႇၸရေးႁေႃးတြႃးၵၼ်ၵႂႃႇ၊ မၢင်ၸိူဝ်းၵေႃႈ ၼင်ႈႁေတူၺ်းၸၢတ်ႈယဝ်ႉႁုၼ်ႉၵျေႃႇၸွမ်းၵၼ်ၵႂႃႇ တွၼ်ႈတႃႇၵူၼ်းဝၢၼ်ႈၶဝ်ၶမ်ႈၼႆႉ ပဵၼ်ၶမ်ႈၶိုၼ်း ဢၼ်သိူဝ်းမူၼ်ႈၵျေႃႇဝႆႉႁင်းၶဝ်တေႉတေႉယဝ်ႉ။
လႅင်းမိူင်းသႂ်လႄႈတင်းသႅင်ၼူၼ်းၼၼ်ႉၵေႃႈ တေႃႈတေၵျေႃႇယူႇမိူၼ်ၵၼ်၊ ၵႃႈပၼ်ႇၵွင်မႃးယဝ်ႉၵေႃႈ ဢွၼ်ၵၼ်မႃးၼင်ႈထွမ်ႇပိူၼ်ႈႁွင်ႉၵႂၢမ်းဝၢၵ်ႇၵၼ်ယူႇတီႈ ၸၢတ်ႈသႅင်းၼၼ်ႉယဝ်ႉ။ ၼင်ႈယူႇႁိမ်းၵၼ်ၵႂႃႇ မိုဝ်းၵတ်းၵတ်းဢွၼ်ႇသႅင်ၼူၼ်း ဢၼ်တမ်းတဝ်ႉၶၢႆႉယူႇၼၼ်ႉ ၵိုင်ႉၵၢင်ႉတုမ်ႉလေႃႇၺႃးသၼ်မိုဝ်းလႅင်းမိူင်းသႂ်သေ သၢႆတႃသွင်ၶႃၶုၼ်ႇယၵ်ႉတုမ်ႉတူၺ်းၸူးၵၼ် မိုဝ်းလႅင်းမိူင်းသႂ်ၼၼ်ႉၵေႃႈ ယိပ်းၵမ်သွတ်ႇၶဝ်ႈၼိဝ်ႉသႅင်ၼူၼ်းၵႂႃႇလွႆးလွႆး၊ မိုဝ်းဢွၼ်ႇသႅင်ၼူၼ်းၵေႃႈ ၵမ်ဝႆႉသမ်ႉပေႃးမၼ်ႈလႄႈ ၸၢတ်ႈသႅင်းၶမ်ႈၶိုၼ်းၼႆႉ ၼင်ႇဝႃႈ ပဵၼ်ၶမ်ႈၶိုၼ်းဢၼ်လီတူၺ်းလိူဝ်ပိူၼ်ႈ သမ်ႉပေႃးလိုမ်းတၢင်းမိူဝ်းႁိူၼ်း ၵႂႃႇယဝ်ႉ။
ယၢမ်းတဵင်ႈၶိုၼ်းလိုၵ်းယဵၼ် ပွႆးၵေႃႈဝၢႆး ၵူၼ်းၵေႃႈႁၢင်ႇႁီႇႁၢင်ႇႁၢႆးၸၢႆးၵၼ်မိူဝ်းၵႂႃႇ ႁင်းၽႂ်ႁင်းမၼ်း။ သႅင်ၼူၼ်းလႄႈလႅင်းမိူင်းသႂ်ၶႃ ဢွၼ်ၵၼ်မႃးပူၵ်းၶမ်းလၢဝ်ယူႇ၊ ၶမ်းလၢဝ်ၼၼ်ႉတႄႉ တင်းတႃၶႂ်ႈမိုၼ်းဢမ်ႇၶႂ်ႈမိုၼ်းသေ လုၵ်ႉပႆၵႂႃႇၸူးၽၵ်းတူဢၼ်ပိၵ်ႉဢိုတ်းယူႇၼၼ်ႉ ဢၢင်ႈတေပိုတ်ႇယူႇ ၵူၺ်းသမ်ႉမီးၵူၼ်းပိုတ်ႇဢွၼ်တၢင်းလႄႈ ႁႅင်းၵူၼ်းပိုတ်ႇၽၢႆႇၼွၵ်ႈၼၼ်ႉ ဢီးပၼ်မၼ်းပေႃးလူမ်ႉၵႂႃႇယဝ်ႉ။
“ၸွင်ႇပဵၼ်သင်ႁိုဝ်!!” မေႃယႃ တူၵ်းၸႂ်သေၵိုင်ႉၵၢင်ႉထၢမ်ၸူး။
“ၸဵပ်း!!…” ဢဝ်တႃၼွၼ်းမၼ်းပေႃးပေႇလူင်ၵႂႃႇ။
“မွၵ်ႈၼႆႉၵူၺ်း မၼ်းဢမ်ႇပဵၼ်သင်ၶႃႈပီႈမေႃ ” လႅင်းမိူင်းသႂ်ၵေႃႈ ၸၼ်ဢဝ်ၶႅၼ်ၶမ်းလၢဝ်လုၵ်ႉသေ “ၵႂႃႇလႄႈပီႈႁဝ်းမိူဝ်း”
“ဢမ်ႇပဵၼ်သင်ၵေႃႈလီယဝ်ႉ ဢွၼ်ၵၼ်မိူဝ်းလီလီလႄႈၼႃႈ”
“ၸူမ်းယဝ်ႉၶႃႈပီႈမေႃ ” လႅင်းမိူင်းသႂ်ၶိုၼ်းလၢတ်ႈတုမ်ႉတွပ်ႇၸူးၵႂႃႇၶိုၼ်း။
ၶဝ်ၵေႃႈဢွၼ်ၵၼ်ပွၵ်ႈမိူဝ်းၵႂႃႇၸွမ်းပိူၼ်ႈလွႆးလွႆး၊ ၶမ်းလၢဝ်တႄႉၵေႃႈ ပေႃးဝႃႈမိူဝ်းၼႆ တိုၼ်းဢမ်ႇၵွင်လင်ၶိုၼ်းသေဢိတ်းယဝ်ႉ ယဵပ်ႇတမ်းယၢင်ႈတိၼ်ၵႂႃႇတၢင်းၼႃႈ ၵူဝ်ဢမ်ႇတၼ်းႁွတ်ႈထိုင်ႁိူၼ်းၵူၺ်းယဝ်ႉ၊ လႅင်းမိူင်းသႂ်လႄႈသႅင်ၼူၼ်းၶႃတႄႉၵေႃႈ ၵူဝ်ၶမ်ႈၶိုၼ်းၼႆႉတေသုတ်းသဵင်ႈၵႂႃႇ၊ ၵူဝ်တေၸဵဝ်းႁွတ်ႈထိုင်ႁိူၼ်းတေႉၼၼ်ႉယဝ်ႉ။
သိုပ်ႇလူၵႂႃႇထႅင်ႈၶႃႈ။
