ယၢမ်းႁူဝ်ၶမ်ႈ ဢၢႆႈၶိူဝ်းၼင်ႈၵိၼ်လဝ်ႈယူႇၸွမ်းဢူၺ်းၵေႃႉမၼ်း တီႈၼႂ်းသႅင်ႇၶဝ်ႈၽၵ်းတီႈၼိုင်ႈ၊ တီႈၼၼ်ႈသမ်ႉပိုတ်ႇဝႆႉ TV သေယဝ်ႉ မီးၵူၼ်းၽူႈၸၢႆးလဝ်း ၸိုဝ်ႈသဵင်လိုဝ်းလင်ၵေႃႉၼိုင်ႈ ဢွၵ်ႇၶၢဝ်ႇယူႇၼႂ်း TV ၼၼ်ႉလႄႈ ၸင်ႇသမ်ႉမီးသၢဝ်သၢဝ်တင်းၼမ် မိူဝ်ႈဢၼ်ႁၼ်မၼ်းၼၼ်ႉၼႆ ႁုၼ်ႉသႅၼ်ႉႁွင်ႉၸွမ်းလင် ပေႃးၼၼ်ႈၸွင်ႇၸွင်ႇ၊ ႁိမ်းၶဝ်ၼင်ႈယူႇၼၼ်ႉၵေႃႈ လႆႈႁၼ်သၢႆတႃၵူၼ်းယၵ်ႉတူၺ်း ၼႂ်း TV ၼၼ်ႉသေယဝ်ႉ လၢတ်ႈယွင်ႈၵူၼ်းၵေႃႉၼၼ်ႉ ယူႇႁိမ်းၶဝ်သဵင်ပေႃးပၼ်းလူင်ၵႂႃႇသဵင်ႈ။
“ဢၢႆႈမွင်ႇ မႂ်းဝႃႈၵဝ်လႄႈတင်းဢၢႆႈၼႂ်း TV ၼၼ်ႉ ၸွင်ႇမၼ်းငၢႆးၵၼ်ႁႃႉဝႃႈ”
ပေႃးယၵ်ႉတူၺ်းလီလီၵေႃႈ သမ်ႉၶႂ်ႈငၢႆးဝႆႉယူႇ ၼႃႈသဵမ်ႈတူဝ်သုင်ၶူၼ်တႃလမ်ယၢဝ်း တင်းၼႃႈတႃ တူဝ်ၶိင်းၵေႃႈ ဢမ်ႇပၢႆႈပိူင်ႈၵၼ်သေၵႃႈႁိုဝ်၊ ဢၼ်ပိူင်ႈၼၼ်ႉတႄႉ ၵူၼ်းၼႂ်း TV ၼၼ်ႉ ၼႃႈတႃၸိုၼ်ႈပၢင်ႇမူတ်းၵဵင်ႈသႂ်လီ ၵူၺ်းၵႃႈဢၢႆႈၶိူဝ်းၼႆႉသမ်ႉ ႁူဝ်ယုင်ႈၼႃႈဝုၺ်း ၶီႈလဝ်ႈ ၽႂ်ၵေႃႈဢမ်ႇတွၼ်ႉတူၺ်းႁၼ်တၢင်းလဝ်းမၼ်း ၵွပ်ႈလႆႈဢဝ်ၶီႈၶႆးၶီႈၶၢၼ်ႉသိူင်ႇသိမ်းဝႆႉၶႅမ်ႉၼႃႇၼၼ်ႉယိုင်။
ဢၢႆႈမွင်ႇၶႃဢၢႆႈၶမ်းၵေႃႈ ယၵ်ႉတူၺ်းလီလီသေယဝ်ႉ
“ဢိူဝ်ႈၵဝ်ဝႃႈၶႂ်ႈငၢႆးဝႆႉမႂ်း ဢမ်ႇဝႃႈၼၼ်ႁႃႉ ဢၢႆႈၶမ်း”
“ႁႃး…ႁႃး…မိူၼ်ၵမ်းလဵဝ်ၵွၼ်ႇဢိူဝ်ႈၵဝ်ဝႃႈ…” ဢၢႆႈၶမ်းဢိုၵ်ႉလဝ်ႈၵွၵ်းၼိုင်ႈယဝ်ႉ“မိူၼ်ၶီႈလဝ်ႈလီလီ ႁႃးႁႃး…ႁႃး..”
“ႁႃး..ႁႃးႁႃး…” သွင်ၶႃၵေႃႈၶူဝ်သႂ်ဢၢႆႈၶိူဝ်းၼၼ်ႉယူႇယဝ်ႉ။
ဢၢႆႈၶိူဝ်းၼႆႉဢမ်ႇပေႃးတၼ်းၶိုတ်းပၢႆးဝူၼ်ႉပိူၼ်ႈသေၵႃႈႁိုဝ်လႄႈ ၵႆႉလႆႈၶၢမ်ႇဢူၺ်းၵေႃႉမၼ်းယဝ်ႉလဵၼ်ႈ၊ လႃႇလဵၼ်ႈ ယူႇတႃႇသေႇ။ ပိူၼ်ႈလၢတ်ႈယဝ်ႉၵႂႃႇတင်းႁိုင် မၼ်းၸင်ႇတေပွင်ႇၸႂ်လႄႈ သမ်ႉပၢႆပဵၼ်ၵူၼ်းသိုဝ်ႈလႂ်သိုဝ်ႈၼၼ်ႉထႅင်ႈႁေ။ ၵမ်းၼၼ်ႉ ဢၢႆႈမွင်ႇၵေႃႈ မႃးတဝ်ႉႁူဝ်မႃႇမၼ်းသေယဝ်ႉ။
“ၵဝ်ႁူႉဢိူဝ်ႈ..မႂ်းၶႂ်ႈပဵၼ်ၵူၼ်းလင်သေၵႂႃႇယူႇၼႂ်းၼၼ်ႉ ၸိူင်ႉဢၢႆႈၼၼ်ႉၸွင်ႇၸႂ်ႈ”
“ဢိုမ်ႈ!” ဢၢႆႈၶိူဝ်းငွၵ်းႁူဝ်ၼႄလွႆးလွႆး။
“မီးလၢႆးမၼ်းဢိူဝ်ႈ! ႁဵတ်းမိူဝ်ႈၼႆႉ မိူဝ်ႈၽုၵ်ႈမႂ်းလင်ၵမ်းလဵဝ် ၸွင်ႇမႂ်းတေႁဵတ်း!!”
“တေႉႁႃႉ!..”
“ၵဝ်ထၢမ်ဝႃႈၸွင်ႇမႂ်းတေႁဵတ်းဢမ်ႇႁဵတ်းၵူၺ်း ပေႃးမႂ်းႁဵတ်းၵေႃႈၵဝ်တေလၢတ်ႈ ပေႃးဢမ်ႇႁဵတ်းၵေႃႈၵဝ်ဢမ်ႇ..လၢတ်ႈယဝ်ႉ”
ဢၢႆႈၶိူဝ်းၵေႃႈၵွပ်ႈၶႂ်ႈပဵၼ်ၵူၼ်းၸိုဝ်ႈသဵင်လင်ၼႃႇလႄႈ လႆႈတွပ်ႇတီႈဢၢႆႈမွင်ႇၵႂႃႇ
“ႁဵတ်းၵႂႃႈမႂ်းၵေႃႈ”
“ၵူၺ်းၵႃႈလၢႆးၼႆႉဢမ်ႇပေႃးၵိုင်ႇဢၢပ်ႈတင်းမႂ်းၼေႈၵဝ်ဝႃႈ”
“ဢႃ..လၢတ်ႈမႃးလႃႈ ၵဝ်ႁဵတ်းလႆႈယူႇၵူၺ်းဢိူဝ်ႈ”
ဢၢႆႈမွင်ႇၵေႃႈ လၵ်ႉသွပ်ႉသႅပ်ႉႁိမ်းႁူဢၢႆႈၶိူဝ်းသေယဝ်ႉ ၼင်ႈၶူဝ်ယူႇၶိၵ်းၶိၵ်း။
ဢၢႆႈၶိူဝ်းတႄႉ မိူဝ်ႈလႆႈငိၼ်းဢၼ်ဢၢႆႈမွင်ႇလၢတ်ႈယဝ်ႉၼႆၵေႃႈ ၼႅတ်ႈလုၵ်ႉဢွၵ်ႇလၢၼ်ႉၵႂႃႇၵမ်းလဵဝ် ဢၢႆႈမွင်ႇသမ်ႉပေႃးဢမ်ႇတၼ်းႁၼ်ၵူၼ်ႈမၼ်းယဝ်ႉ။
ထိုင်မႃးၵၢင်ၼႂ်ၸဵမ်ၸဝ်ႉ ဢၢႆႈၶိူဝ်းၵေႃႈၵိုင်ႉၵၢင်ႉမီးၸိုဝ်ႈသဵင်လင်မႃးၵမ်းလဵဝ် ၵွပ်ႈပိူဝ်ႈမိူဝ်ႈၶမ်ႈဝႃးၼၼ်ႉ ဢၢႆႈမွင်ႇလၢတ်ႈႁႂ်ႈမၼ်း ၵႂႃႇလၵ်ႉၽွၵ်ႈလၢၼ်ႉၶမ်းၶိင်းၶႄႇ ၼႂ်းၵၢင်ဝဵင်းၼၼ်ႉၼႆလႄႈ မၼ်းၵေႃႈႁဵတ်းတေႉသေ ထုၵ်ႇပိူၼ်ႈၺွပ်းလႆႈၵမ်းလဵဝ်၊ မၼ်းၼၼ်ႉၵေႃႈ လႆႈဢွၵ်ႇၶၢဝ်ႇၵႂႃႇ တၢင်း TV သေဢမ်ႇၵႃး ၵူၼ်းပဵၼ်ၽုင်ဢွၼ်ၵၼ်ဢုမ်ႇသႂ်ႇမၼ်းလႄႈ ၵွင်ႈထႆႇဢမ်ႇႁူႉလၢႆတီႈလၢႆတၢင်း ၸွမ်းထႆႇမၼ်း မၼ်းၼၼ်ႉတႄႉၵေႃႈ ယၵ်ႉတူၺ်းဢၢႆႈမွင်ႇၶႃ ဢၼ်ၸုၵ်းပႂ်ႉတူၺ်းမၼ်းယူႇၼၼ်ႉယဝ်ႉ ယုမ်ႉၸူးၵႂႃႇယူႇ။
“တၢႆႁေလႃႈမႂ်းဢၢႆႈမွင်ႇ..တေႁဵတ်းႁိုဝ်တီႈမၼ်းယဝ်ႉလႃႇၼၼ်ႉမႂ်းဝႃႈ..”
ဢၢႆႈမွင်ႇၼၼ်ႉတႄႉ သမ်ႉပေႃးဢမ်ႇၸၢင်ႈဝႃႈႁိုဝ်ယဝ်ႉ ၵႃႈလႆႈၸုၵ်းငိူဝ်ႈသေတူၺ်းယူႇႁဵတ်းၼၼ်ၵူၺ်း။
ၵွပ်ႈၼၼ်လႄႈ ပဵၼ်ၵူၼ်းၵႆႉယဝ်ႉၵႆႉယွၵ်ႇၼႆၵေႃႈ လီလႆႈမေႃတူၺ်းၵူၼ်းသေယွၵ်ႇယူႇ၊ သင်ယွၵ်ႇၽိတ်းၵေႃႉမၼ်းၵေႃႈ ၸၢင်ႈမေႃပဵၼ်ၵူၼ်းၸိုဝ်ႈသဵင်လင်ၵႂႃႇ ၸိူင်ႉၼင်ႇဢၢႆႈၶိူဝ်းၼႆႉယိုင်။
သုတ်းယဝ်ႉ
ပၢႆၵမ်−ငဝ်မွင်မိုတ်းမူဝ်း
တႅမ်ႈမိူဝ်ႈ 18.5.2020 လႆႈမႄးဢဝ်မႃးတႅမ်ႈၶိုၼ်း 13.2.2024
