ၵေႃႉၵူႈၸၢတ်ႈပၢၼ်ၼၼ်ႉ ဢမ်ႇၸႂ်ႈလွင်ႈတၢင်းႁၵ်ႉမဵဝ်းလဵဝ်ၵူၺ်း သမ်ႉဝႃႈႁၵ်ႉၵၼ်ၼႃႇၵေႃႈ သင်ဢမ်ႇဝူၼ်ႉလီလီ မၢင်ပွၵ်ႈလွင်ႈတေႇၼႃႈႁိူၼ်းၼၼ်ႉ ယင်းတေပဵၼ်တီႈတႄႇၶွင်ပၼ်ႁႃလိူဝ်သေတၢင်းသိူဝ်းလူးၵွၼ်ႇ၊ မိူဝ်ႈတေႁဵတ်းပၢင်ၶႅၵ်ႇၵေႃႈ ႁႂ်ႈထၢမ်တူၺ်းတူဝ်ၵဝ်ႇလီလီဝႃႈ ၽွမ်ႉယဝ်ႉႁႃႉ? ၽွမ်ႉတေႉတေႉႁႃႉ?
- တေယူႇၸွမ်းၵူၼ်းၵေႃႉၼႆႉၵႂႃႇတေႃႇၸူဝ်ႈလႆႈတေႉယူႇႁႃႉ?
ၵၢၼ်တေႇၼႃႈႁိူၼ်းၼၼ်ႉ ဢမ်ႇၸႂ်ႈဝႃႈႁဵတ်းပွႆးၶိုၵ်ႉယႂ်ႇယဝ်ႉတေယဝ်ႉ ၶႂ်ႈဝႃႈ ၵၢၼ်ၸႂ်ႉၸၢတ်ႈပၢၼ်ႁူမ်ႈၵၼ်ၵႂႃႇၶၢဝ်းႁိုင် ဢမ်ႇထိုင်ဝႃႈတေႃႇၸူဝ်ႈ ႁႂ်ႈမၼ်းၵႂႃႇလႆႈၶၢဝ်းယၢဝ်းၼၼ်ႉ တေလႆႈယူႇၸွမ်းတၢင်းယၢမ်ႈဢၼ်ႁၼ်ယူႇၵူႈဝၼ်း၊ ႁပ်ႉမိုဝ်းၸွမ်းတီႈယူပ်ႈယွမ်းဢၼ်ဝႃႈႁပ်ႉလႆႈၽွင်ႈယူႇၽွင်းပဵၼ်ၸူႉၵၼ် သင်ဝူၼ်ႉထိုင်လွင်ႈမိူဝ်းၼႃႈယဝ်ႉ ဢမ်ႇယုမ်ႇၸႂ်လႆႈၼႆၵေႃႈ လီလႆႈၶိုၼ်းမႄးဝူၼ်ႉႁႂ်ႈလီယူႇ။
- ယိူင်းမၢႆၸၢတ်ႈပၢၼ်ၼၼ်ႉ ၸွင်ႇသမ်ႉၵႂႃႇတၢင်းလဵဝ်ၵၼ်ယူႇႁိုဝ်?
မၢင်ၵေႃႉၶႂ်ႈမီးႁိူၼ်းဢၼ်ၵတ်းယဵၼ်၊ မၢင်ၵေႃႉသမ်ႉ ၶႂ်ႈယူႇလွတ်ႈလွတ်ႈလႅဝ်းလႅဝ်း ဢႅဝ်ႇလႄႇႁွပ်ႈလူၵ်ႈ သင်သဵၼ်ႈတၢင်းဢမ်ႇမိူၼ်ၵၼ် တၢင်းသိူဝ်းဝၢႆးတေႇၼႃႈႁိူၼ်းၵေႃႈ တေဢမ်ႇလႆႈမိူၼ်ၼင်ႇဢၼ်ဝူၼ်ႉဝႆႉၼၼ်ႉၼင်ႇၵဝ်ႇ၊ ဢုပ်ႇၵၼ်ႁႂ်ႈၸႅင်ႈလႅင်းဝႃႈ လွင်ႈဢၼ်ၶႂ်ႈႁဵတ်းၼၼ်ႉပဵၼ်သင်လႄႈ တေၸၢင်ႈလႅၵ်ႈလၢႆႈၶဝ်ႈႁႃၵၼ်လႆႈမွၵ်ႈႁိုဝ်? သင်ၵႂႃႇတၢင်းလဵဝ်ၵၼ်ဢမ်ႇလႆႈၵေႃႈ လီလႆႈဝူၼ်ႉထႅင်ႈဝႃႈ ၵၢၼ်တေႇၼႃႈႁိူၼ်းပွၵ်ႈၼႆႉ မၼ်းတေလီတေႉယူႇႁႃႉ?။
- တေႁပ်ႉမိုဝ်းၸွမ်းမိူဝ်ႈၽွင်းမီးပၼ်ႁႃၵၼ်ၸိူင်ႉႁိုဝ်?
မိူဝ်ႈပဵၼ်ၸူႉၵၼ်တေၸၢင်ႈမီးဝႃႈ ၸႂ်လမ်ၵၼ်ယူႇၽွင်ႈ၊ ယဵၼ်သႂ်ႇၵၼ် လိုၼ်းသုတ်းမႃးၵေႃႈလီၵၼ်ၶိုၼ်း၊ ၵူၺ်းၵႃႈ မိူဝ်ႈယူႇၸွမ်းၵၼ်မႃးယဝ်ႉ မၼ်းတေလႆႈထူပ်းၼမ်လိူဝ်သေၼၼ်ႉ တေၸၢင်ႈပဵၼ်လွင်ႈငိုၼ်း၊ လွင်ႈၵူၼ်းၼႂ်းၼႃႈႁိူၼ်းမႃးမိပ်ႇဢီး။ သင်ထဵင်ၵၼ်မႃးယဝ်ႉႁၢႆၵႂႃႇပႅတ်ႈ ဢမ်ႇမီးလွၵ်းလၢႆးၸတ်းၵၢၼ်ပၼ်ႁႃႁူမ်ႈၵၼ်ၼႆၵေႃႈ ၵမ်းလိုၼ်းမႃး တေႇၼႃႈႁိူၼ်းၵႂႃႇယဝ်ႉ မၼ်းၵေႃႈၵႂႃႇဢမ်ႇလွတ်ႈ တေလႆႈႁူႉဝႃႈၵူၼ်းၵေႃႉၼႆႉ ၽွမ်ႉတေယိပ်းမိုဝ်းၵၼ်သေဢဝ်ၶၢမ်ႈပူၼ်ႉၵႂႃႇၸွမ်းၵၼ် ဢမ်ႇၸႂ်ႈပႂ်ႉဝၼ်းႁႂ်ႈမၼ်းပူၼ်ႉၵႂႃႇၵူၺ်း။
- လွင်ႈငိုၼ်းလူးဢုပ်ႇၵၼ်ၸႅင်ႈလႅင်းယူႇႁိုဝ်?
ငိုၼ်းၼၼ်ႉပဵၼ်လွင်ႈတၢင်းဢၼ်ၵႆႉႁဵတ်းႁႂ်ႈဝၢႆးတေႇၼႃႈႁိူၼ်းယဝ်ႉ မီးပၼ်ႁႃမႃး ငိုၼ်းၶဝ်ႈၽႂ်တူၺ်းထိုင်ၸိူင်ႉႁိုဝ်၊ ပၼ်ၵႃႈၸႂ်ႉၸၢႆႇၸိူင်ႉႁိုဝ်၊ မီးၼီႈမီးလွင်ႈဢၼ်တေလႆႈဢဝ်ပုၼ်ႈၽွၼ်းၸွမ်းၵၼ်ယူႇႁိုဝ်၊ သင်ဝူၼ်ႉဝႃႈ တေႇၵႂႃႇယဝ်ႉၸွင်ႇၵွႆႈဝႃႈၵၼ် ၵမ်းလိုၼ်းမႃးၵေႃႈ ပၼ်ႁႃမၼ်းတေလၢမ်းယႂ်ႇႁႅင်း ၵႂႃႇၸွမ်းၵၼ်ဢမ်ႇလႆႈၵူၺ်း။
- သင်ဝၼ်းၼိုင်ႈဢမ်ႇလႆႈဝူၼ်ႉတေႃႇၵၼ်မိူၼ်ၵဝ်ႇ ၸွင်ႇတေၶႂ်ႈယူႇၸွမ်းၵၼ်ႁိုဝ်?
တၢင်းႁၵ်ႉမၼ်းၵေႃႈဢမ်ႇလႆႈၶိူင်ႇၶမ်ႉယူႇတႃႇသေႇ မၼ်းတေၸၢင်ႈမီးမိူဝ်ႈဝၢၼ်၊ မိူဝ်ႈၸၢင်ၽွင်ႈ မၢင်ပွၵ်ႈၸၢင်ႈဝူၼ်ႉဢမ်ႇမိူၼ်ၵဝ်ႇ တိုၼ်ႇမႃးယဝ်ႉဢမ်ႇလႆႈဝူၼ်ႉမိူၼ်ဝၼ်းဢွၼ်တၢင်းသုတ်း ၸွင်ႇယင်းတိုၵ်ႉၶႂ်ႈယူႇယူႇႁိုဝ်၊ ၸၢတ်ႈပၢၼ်ၵေႃႉၵူႈၼၼ်ႉ ဢမ်ႇလႆႈယူႇၸွမ်းသဵင်ႁူဝ်ၸႂ်ၼၼ်ႉၵူၺ်း ယင်းမီးထႅင်ႈလွင်ႈၸမ်ၸႂ်ၵၼ်၊ လွင်ႈသႂ်ႇၸႂ်ၵၼ်၊ လွင်ႈပွင်ႇၸႂ်ၵၼ် ယင်းတိုၵ်ႉယူႇၸွမ်းၵၼ်ယူႇ သမ်ႉဝႃႈမၼ်းဢမ်ႇမိူၼ်ၵဝ်ႇၵေႃႈယဝ်ႉ။
ၵၢၼ်တေႇၼႃႈႁိူၼ်း ဢမ်ႇၸႂ်ႈလွင်ႈမိူဝ်ႈၼႆႉႁိုဝ်မိူဝ်ႈၽုၵ်ႈၵူၺ်း မၼ်းပဵၼ်လွင်ႈၶွင်ၸၢတ်ႈပၢၼ်ၵူၼ်းဢၼ်တေလႆႈၵႂႃႇၸွမ်းၵၼ် ၸၢမ်းထၢမ်တူဝ်ၵဝ်ႇႁႂ်ႈၸႅင်ႈလႅင်းလႄႈ တွပ်ႇႁႂ်ႈလႆႈၵူႈၶေႃႈယဝ်ႉ ၸင်ႇတေတႅပ်းတတ်း သင်ဝႃႈၽွမ်ႉတေႉယဝ်ႉ ၸၢတ်ႈပၢၼ်ၵေႃႉၵူႈၼၼ်ႉ ဢမ်ႇၸႂ်ႈလွင်ႈဝႃႈၶတ်းၸႂ်ၵူၺ်း ယင်းတေမီးတၢင်းသိူဝ်းၵႂႃႇၸွမ်းၵၼ်ထႅင်ႈၵွၼ်ႇယဝ်ႉ။
ပိၼ်ႇ-ငဝ်မွင်မိုတ်းမူဝ်း
