လႅတ်ႇဢုၼ်ႇယၢမ်းၸဝ်ႉ တွၼ်ႈသွင်

ႁူင်းႁဵၼ်းၸၼ်ႉသုင်ဢၼ်ဝႃႈၼၼ်ႉ ဢမ်ႇလႆႈႁဵၼ်းႁွင်ႈပိူင်တၢႆဝႆႉ ပေႃးဝႃႈၶိင်ႇႁဵၼ်းၶွမ်းၼႆၵေႃႈ တေလႆႈမိူဝ်းႁဵၼ်းတီႈႁွင်ႈၶွမ်း ဢၼ်မီးယူႇၸၼ်ႉၼိူဝ်ၼၼ်ႉယဝ်ႉ။

ပေႃးဝႃႈၶိင်ႇႁဵၼ်းၶွမ်းၼႆ ၶိူဝ်းမိူင်းၼႆႉ တေဢမ်ႇပေႃးၵႆႉၶိုၼ်ႈၸွမ်းပိူၼ်ႈတၢင်းဢွၵ်ႇ တေၵႂႃႇၶိုၼ်ႈၶူဝ်လႆၽၢႆႇတၢင်းတူၵ်းသေယဝ်ႉ ၵႆႉၵႆႉၵႂႃႇလၵ်ႉတူၺ်း ႁွမ်လႅင်းဢၼ်ႁဵၼ်းယူႇၸၼ်ႉ 12 ၸၼ်ႉတႂ်ႈၼၼ်ႉတႃႇသေႇယဝ်ႉ။

ပေႃးဝႃႈထိုင်ၶိင်ႇ Writing လႄႈ Reading ၼႆ တေမႃးယူႇၼႂ်းႁူင်းႁေႃးႁူမ်ႈၵၼ်သေ ပေႃးပဵၼ် Writing ၼႆၵေႃႈ တေႁႃလူလိၵ်ႈ ၼႂ်းပပ်ႉ ဢမ်ႇၼၼ် ၼိူဝ်ဢွၼ်ႇလၢႆးၸိူဝ်းၼႆႉ မႃးႁုပ်ႈၶႆႈၼႄၵၼ်ၵႂႃႇယူႇယဝ်ႉ၊ ပေႃးပဵၼ် Reading ၼႆၵေႃႈ တေတႅမ်ႈလိၵ်ႈသေ ဢၼ်တႅမ်ႈၼၼ်ႉတေမႃးဢၢၼ်ႇၼႄၵၼ်ၵႂႃႇ ဢမ်ႇဝႃႈပဵၼ် ဝွၵ်း၊ လွၼ်ႉမွၼ်း၊ ၸိူင်း၊ လိၵ်ႈပွင်၊ ဢပုမ်ႇ၊ ပွင်ႈၵႂၢမ်းၸိူဝ်းၼႆႉ။

ပေႃးဝႃႈႁွမ်လႅင်းၶဝ်ႈႁွင်ႈႁဵၼ်းမႃးၼႆၵေႃႈ ၶိူဝ်းမိူင်းၼၼ်ႉ တေယူႇတၢင်းလင်ၵႆၵႆသေ ၵႆႉၵႆႉလွမ်တူၺ်းႁွမ်လႅင်းယူႇတႃႇသေႇ၊ ပေႃးဝႃႈ ႁွမ်လႅင်းလၢတ်ႈၼႆ သၢႆတႃၼၼ်ႉ ယၵ်ႉတူၺ်းပေႃးၼိမ်ၸိုင်ႈၸိုင်ႈ ပဵၼ်ဢၼ်ၶဝ်ႈၸႂ်ၶဝ်ႈၶေႃးၼႃႇ ၼႃႈယုမ်ႉဢွၼ်ႇမၼ်းၼၼ်ႉၵေႃႈ ၼင်ႇႁၢင်ႈသိူဝ်းၸႂ်ၼႃႇၼႃႇၼၼ်ႉယဝ်ႉ။

ယၢမ်းၵၢင်ၼႂ်ၸဝ်ႉ ၶိူဝ်းမိူင်းလုၵ်ႉဢွၵ်ႇလႅင်းမႃးဢၢင်ႈတေၵႂႃႇသုၵ်ႉၼႃႈၼၼ်ႉ ၸင်ႇသမ်ႉလႆႈႁၼ် ႁွမ်လႅင်းယိပ်းတင်းၵၢၵ်ႇသေပႆၵႂႃႇတီႈႁုင်မိုဝ်ႉၼၼ်ႉၼႆၵေႃႈ ၼႅတ်ႈလႅၼ်ႈၵႂႃႇတၢင်းႁွင်ႈၼမ်ႉၼၼ်ႉဝႆးဝႃႈဝႆးယဝ်ႉ။

သမ်ႉဝႃႈၶၢဝ်းယၢမ်းပူၼ်ႉမႃးႁိုင်ယဝ်ႉသေတႃႉ တွၼ်ႈတႃႇၶိူဝ်းမိူင်းတႄႉ တိုၵ်ႉပဵၼ်ယၢပ်ႇယူႇ တႃႇလၢတ်ႈတေႃႇတင်းႁွမ်လႅင်း၊ မီးသၢႆတႃၵူၺ်း ဢၼ်မၼ်းသူင်ႇထိုင်ပၼ်လႆႈၵူႈဝၼ်း။

တီႈႁူင်းႁဵၼ်းၼႆၵေႃႈ တေၵႆႉၵႆႉမီးလွင်ႈတူင်ႉၼိုင်ႈ ၵၢၼ်ပၢႆးမွၼ်းပႃးယဝ်ႉ ၸိူဝ်းဢၼ်သူင်ႁွင်ႉၵႂၢမ်းၵေႃႈ ႁဵတ်းၸုမ်းသေ တွႆႇတိင်ႇႁွင်ႉၵႂၢမ်းၸွမ်းၵၼ်၊ ၸိူဝ်းသူင်ၸၼ်ႁၢင်ႈၼႆၵေႃႈ ၸၼ်ယူႇႁင်းၵူၺ်း၊ ၸိူဝ်းသူင်ၵႃႈၼႆၵေႃႈ ဢွၼ်ၵၼ်ႁဵတ်းၸုမ်းသေၽိုၵ်းၵႃႈယဝ်ႉ။ ၶိူဝ်းမိူင်းၵေႃႈ သူင်ထႆႇႁၢင်ႈၼႆလႄႈ တင်းၵွင်ႈထႆႇၵွင်ႉၶေႃးၼၼ်ႉသေ ၵႂႃႇႁႃထႆႇၸွမ်းႁူင်းႁဵၼ်းၸိူဝ်းၼၼ်ႉယဝ်ႉ။

မွင်းဝႃႈမၼ်းယိူင်းၵွင်ႈထႆႇၼႆၵေႃႈ ဢူၺ်းၵေႃႉမၼ်း သမ်ႉပေႃးလေႇႁဵတ်းပုင်ႇႁဵတ်းႁၢင်ႈယူႇၼႃႈၵွင်ႈမၼ်းၼၼ်ႉယဝ်ႉ။ ယိူင်းယိူင်းၵႂႃႇ ၵွင်ႈမၼ်းၵႂႃႇၵိုတ်းယူႇတီႈ ႁွမ်လႅင်းဢၼ်တိုၵ်ႉယုမ်ႉၶူဝ်ၸွမ်းဢူၺ်းၵေႃႉ မိူဝ်ႈၽွင်းႁၢင်ႈႁႅၼ်းတေၵႃႈယူႇတီႈသႃႇလႃးၼၼ်ႉလႄႈ လႆႈတဵၵ်းထႆႇၵႂႃႇယဝ်ႉ။

မိူဝ်ႈဢူၺ်းၵေႃႉမၼ်း ဢဝ်ၵွင်ႈထႆႇမႃးတူၺ်းၶႅပ်းႁၢင်ႈၼႆၵေႃႈ လႆႈႁၼ်ႁၢင်ႈႁွမ်လႅင်းၵူၺ်းၼၼ်ႉ ဢွၼ်ၵၼ်ယၵ်ႉတူၵ်းၼႃႈမၼ်းတင်းမူတ်းယဝ်ႉ။

ဢူၺ်းၵေႃႉမၼ်းၼၼ်ႉၵေႃႈ ႁၢင်ႈပဵၼ်ၸႂ်ၼႃႇ ပေႃးဝႃႈႁၼ်ႁွမ်လႅင်းတီႈလႂ်ၼႆၵေႃႈ ၵႆႉၵႆႉလၢၵ်ႈၸၼ်ဢဝ်မၼ်းၵႂႃႇတွႆးၸွမ်းႁွမ်လႅင်းတႃႇသေႇ၊ မၼ်းသမ်ႉဢၢႆဢမ်ႇႁတ်းလႄႈ ၵႆႉၵႆႉလႅၼ်ႈပၢႆႈတိၵ်းတိၵ်းယဝ်ႉ။

ၽွင်းၶၢဝ်းလူင်းႁူင်းႁဵၼ်း ၾူၼ်သမ်ႉယွႆးတူၵ်းမႃးယဝ်ႉ ၶိူဝ်းမိူင်းလႆႈႁၼ်ႁွမ်လႅင်းပႆတၢၵ်ႇၾူၼ်ၸိူင်ႉၼၼ်ၵေႃႈ ဢဝ်ၸွင်ႈမၼ်းယိုၼ်ႈပၼ်သေ ဢမ်ႇလၢတ်ႈသင်ယဝ်ႉ ဢႅၼ်ႇလႅၼ်ႈပႅတ်ႈယူႇ။ ႁွမ်လႅင်းယၵ်ႉတူၺ်းၸွမ်းလင်ၵႂႃႇ ၼႃႈဢွၼ်ႇမၼ်းယုမ်ႉၵီႈမႃးယဝ်ႉ။

မိူဝ်ႈၸမ်တေထိုင်ၶိင်ႇ Writing ၼၼ်ႉ ၶိူဝ်းမိူင်းၵေႃႈ ဢမ်ႇမီးလိၵ်ႈတႃႇဢၢၼ်ႇၼႆလႄႈ ၵိၼ်ၶဝ်ႈဢၢပ်ႇၼမ်ႉယဝ်ႉ ၸင်ႇၵႂႃႇႁႃပပ်ႉတီႈႁွင်ႈလူလိၵ်ႈသေ လိူၵ်ႈလိူၵ်ႈ သမ်ႉလႆႈႁၼ်ႁွမ်လႅင်းၼင်ႈတႅမ်ႈလိၵ်ႈယူႇတီႈၼႂ်းႁွင်ႈၼၼ်ႉယဝ်ႉ ဢဝ်မၼ်းသမ်ႉပေႃးၵိုတ်းၵႂႃႇ တေယၢင်ႈၶဝ်ႈယူႇႁႃႉ ဢမ်ႇၼၼ်ၵေႃႈ ထွႆဢွၵ်ႇၶိုၼ်းႁိုဝ် မိူဝ်ႈတိုၵ်ႉၵႂင်ၸႂ်ယူႇၼၼ်ႉ ႁွမ်လႅင်းယၵ်ႉတူၺ်းၸူး ၼင်ႇဢမ်ႇသူၼ်ၸႂ်သေ မႄးသိုပ်ႇတႅမ်ႈလိၵ်ႈမၼ်းၵႂႃႇၶိုၼ်း။

ၼႂ်းႁွင်ႈဢၼ်ယူႇၸွမ်းၵၼ်တင်း ႁွမ်လႅင်းသွင်ၵေႃႉၵူၺ်းၼၼ်ႉ ႁဵတ်းႁႂ်ႈမၼ်းသမ်ႉပေႃးၵႂင်ၵႂင်ၵႃးၵႃး လိုမ်းၼႃႈလိုမ်းလင်ၵႂႃႇမူတ်းယဝ်ႉ။ မၼ်းၵေႃႈပႆလွႆးလွႆးၼင်ႇၵူဝ်ၼင်လိၼ်မိူင်းလူမ်ႇၼၼ်ႉသေ ၼႅတ်ႈၵႂႃႇလၢၵ်ႈလိၵ်ႈၸၼ်ဢဝ်မႃး ပပ်ႉဢၼ်ၼိုင်ႈ ၽိူဝ်ႇတေမႃးတႅမ်ႈၼႂ်းသၢႆမၢႆယိမ်ပပ်ႉၼၼ်ႉသမ်ႉ ပဵၼ်ပပ်ႉလိၵ်ႈထႆး မၼ်းသမ်ႉဢမ်ႇမေႃလႄႈ သွတ်ႉသွတ်ႉ ဢဝ်ၵႂႃႇဝႆႉၶိုၼ်းယူႇ။ ဢမ်ႇႁူႉတေႁိမ်ပပ်ႉသင် ပပ်ႉလိၵ်ႈတႆးဢၼ်မီးယူႇၼႂ်းႁွင်ႈလူလိၵ်ႈၼၼ်ႉၵေႃႈ လႆႈဝႃႈဢေႇၼႃႇ ပပ်ႉလိၵ်ႈထႆးတႄႉလႆႈဝႃႈၼမ်လိူဝ်ပိူၼ်ႈယဝ်ႉ။

မၼ်းၵေႃႈၵႂႃႇၸၼ်ဢဝ် ပပ်ႉသႅင်သယၢမ်ၼၼ်ႉသေ တႅမ်ႈယိမ်ၼႂ်းသၢႆမၢႆမၼ်းယဝ်ႉ ၼႅတ်ႈဢွၵ်ႇမႃးပႅတ်ႈၵမ်းလဵဝ် မိူဝ်ႈၶိုၼ်းဝိၼ်ႇယၵ်ႉတူၺ်းႁွမ်လႅင်းၼၼ်ႉ ဢမ်ႇလႆႈသူၼ်ၸႂ်မၼ်းသေဢမ်ႇၵႃး မိူၼ်ဝႃႈဢမ်ႇလႆႈႁူႉၸၵ်းၵၼ်သေဢိတ်းၸိူင်ႉၼၼ် ႁဵတ်းႁႂ်ႈၸႂ်ပေႃးဢမ်ႇလီမႃး ပႃးဢဝ်ၸႂ်လဵၵ်ႉပဵၼ်ၵမ်းယဝ်ႉ မၢင်ၵမ်းၵေႃႈႁူဝ်ၸႂ်ၼႆႉသမ်ႉပေႃးၵႅၼ်းၸီႈလူင်ဝႆႉ ထၢၼ်ႇတေတႅၵ်ႇလႅဝ်ၵႂႃႇၼၼ်ႉယူႇ။

လိူဝ်သေႁဵၼ်းလိၵ်ႈယဝ်ႉ သမ်ႉပၢႆမီးဝၼ်းဢၼ်လႆႈႁဵတ်းၵၢၼ်ထႅင်ႈ ဢမ်ႇဝႃႈၵၢၼ်ၽုၵ်ႇသွမ်ႈ၊ ၽဵဝ်ႈတီႇႁဵတ်းလိူမ်ႈလႆႇၸွမ်းႁူင်းႁဵၼ်းၸိူဝ်းၼႆႉ ႁူဝ်ၼႃႈလုၵ်ႈႁဵၼ်း တေလႆႈထတ်းတူၺ်းတီႈလႂ်လူဝ်ႇႁဵတ်း လူဝ်ႇၵူၼ်းၵႃႈႁိုဝ် ၶိူင်ႈၵမ်ႉၵႅမ်မီးၸိူင်ႉႁိုဝ်လၢႆလၢႆ လႆႈၸတ်းလႆႈၽႅၼ်ႁဵတ်းၵႂႃႇ၊ ၵၢၼ်ယဝ်ႉဢမ်ႇယဝ်ႉၼႆၵေႃႈ တေလႆႈတူၺ်းၸွမ်းယဝ်ႉ။

ၶၢဝ်းယၢမ်းပူၼ်ႉၵႂႃႇ ပၢင်တွပ်ႇလိၵ်ႈပွၵ်ႈၵမ်းၼိုင်ႈယဝ်ႉသေ ၽွင်းဢွၵ်ႇဝႃႇဢိုတ်းႁဵၼ်း လုၵ်ႈႁဵၼ်းဢၼ်ယူႇတီႈႁူင်းသဝ်းတႄႉ မီးယူႇတီႈႁူင်းႁဵၼ်းၵူၺ်း၊ လုၵ်ႈႁဵၼ်းဢၼ်မီးႁိူၼ်းဝႆႉတီႈလွႆတႆးလႅင်း ၼၼ်ႉတႄႉ တေမိူဝ်းယူႇတီႈႁိူၼ်းၵမ်ႈၽွင်ႈယဝ်ႉ။

ယၢမ်းၵၢင်ၶမ်ႈ ၶိုၼ်းဢွၵ်ႇဝႃႇ ၶူးၶဝ်ၵေႃႈ ဢွၼ်လုၵ်ႈႁဵၼ်းၵႂႃႇၶဝ်ႈႁူမ်ႈပွႆးပိူၼ်ႈယူႇယဝ်ႉ။ ၸုမ်းလုၵ်ႈႁဵၼ်းၶဝ်ၵေႃႈ ဢွၼ်ၵၼ်ၵႂႃႇၵႃႈသေ ၶိူဝ်းမိူင်းၼၼ်ႉၵေႃႈ ပႃးဢဝ်ၵွင်ႈထႆႇမၼ်းၵႂႃႇၸွမ်းယဝ်ႉ။

“ၶိူဝ်းမိူင်း..ထႆႇၶႅပ်းႁၢင်ႈပၼ်ၸုမ်းႁဝ်းၽွင်ႈ” ဢူၺ်းၵေႃႉႁွမ်လႅင်းႁွင်ႉမၼ်း။

မိူဝ်ႈတေၶိုၼ်ႈၶဵင်ႇၼၼ်ႉ ၸုမ်းႁွမ်လႅင်းၶဝ်မႃးၸုၵ်းၸႅၼ်ႇၵၼ်သေ ႁႂ်ႈၶိူဝ်းမိူင်းထႆႇပၼ်ၶဝ်ယူႇ။ တႂ်ႈသၢႆလႅင်းၾႆးထွင်ႇႁိူဝ်ႈ ပိူင်းပၼ်ႁႂ်ႈၼႃႈပေႃးငဝ်း တွၵ်ႈတုမ်ႉယွၵ်ႇၸၼ်ႁူဝ်ၸႂ်ၸၢႆးႁဝ်း ပေႃးမိူၼ်ႇမိုင်တူၺ်းဢမ်ႇဢိမ်ႇလႆႈယဝ်ႉ။

“ယဝ်ႉယဝ်ႉႁႃႉ!”

“ဢေႃႈ..ၵမ်ႉၶႃႈ..” ၵႂင်ၵႂင်ၵႃးၵႃးသေၶိုၼ်းမႄးၶဵင်ႇၵွင်ႈထႆႇမၼ်းယူႇ။

ၼုမ်ႇယိင်းသၢဝ် ၼုင်ႈၶူဝ်းတႆးတဵမ်ၸုမ်ႇ ယုၵ်ႉတိၼ်တမ်း ယုၵ်ႉမိုဝ်းၵႃႈ ၸွမ်းသဵင်ၽဵင်း ၸၢႆးၼုမ်ႇယိပ်းၵွင်ႈထႆႇၼၼ်ႉၵေႃႈ မိူၼ်ႇတူၺ်းပေႃးလိုမ်းထႆႇပၼ်ၸုမ်းၶဝ်ယဝ်ႉၼႃႇ။ သႅင်ၾႆးလႅင်းလႅင်းၼိူဝ်ၶဵင်ႇၼၼ်ႉၵေႃႈ ႁၼ်မႅၼ်ႈတၢင်းယုမ်ႉသီႇသူပ်းလႅင်ၶွင်ႇ ဢဝ်ၸႂ်ၵူၼ်းပေႃးၶႂ်ႈယွင်ႇၸွမ်းမၼ်းၼႆ ၵူၼ်းၼိူဝ်ၶဵင်ႇၼၼ်ႉ ၸွင်ႇတေႁူႉပွင်ႇၸွမ်းတႄႉဢမ်ႇႁူႉယဝ်ႉ။

ပေႃးဝႃႈၶိုၼ်ႈႁူင်းႁဵၼ်းၶိုၼ်းၼႆၵေႃႈ ႁူဝ်ၼႃႈလုၵ်ႈႁဵၼ်းၼၼ်ႉ လႆႈၶိုၼ်းမႄးလႅၵ်ႈလၢႆႈပဵၼ်ထႅင်ႈၸုမ်းၼိုင်ႈယဝ်ႉ၊ ၵွပ်ႈပိူဝ်ႈ ၸၼ်ႉ 12 ၶဝ် ၵၢၼ်တေၼမ်လႄႈ တေလႆႈၽိုၵ်းၵၢၼ်ထႅင်ႈၼႆၼၼ်ႉယဝ်ႉ ႁွမ်လႅင်းၵေႃႈ ဢမ်ႇလႆႈပဵၼ်ႁူဝ်ၼႃႈလုၵ်ႈႁဵၼ်းယဝ်ႉ။

မၢင်ပွၵ်ႈတီႈႁူင်းႁဵၼ်းၼႆၵေႃႈ တေၵႆႉမီးပၼ်ပႃး ပၢင်ႁိမ်ၼမ်ႉၵႂၢမ်း၊ ပၢင်ၽိုၵ်းမွၵ်ႇလၢတ်ႈၶေႃႈၵႂၢမ်း ၽၢႆႇၼႃႈၵူၼ်းတင်းၼမ်ၸိူဝ်းၼႆႉယူႇ။ ပေႃးဝႃႈ ႁွမ်လႅင်းၶိုၼ်ႈလၢတ်ႈၼႆတႄႉ လႆႈငိၼ်းသဵင်ၸႅင်ႈတႅတ်ႈတေႃးၶိုၵ်ႉၶႅမ်ႉ လီထွမ်ႇၼႃႇ ၶိူဝ်းမိူင်းၼၼ်ႉတႄႉ ယၵ်ႉတူၺ်းထွမ်ႇၸွမ်းၵူႈၶေႃႈၵူႈၵမ်းပေႃးဢမ်ႇဢိမ်ႇ သဵင်တူပ်းမိုဝ်းသမ်ႉပေႃးလင်လိူဝ်ပိူၼ်ႈၵႂႃႇယဝ်ႉ။ ၵူၺ်းၵႃႈ တူဝ်ၸဝ်ႈၵဝ်ႇတႄႉ ပေႃးတေၶိုၼ်ႈၶဵင်ႇမိူဝ်ႈလႂ် ထူၺ်ႈၸႂ်လူင်ပေႃးဢမ်ႇယဝ်ႉလႆႈ ၶိုၼ်ႈလၢတ်ႈပေႃးလိုမ်းဢၼ်ၶႂ်ႈလၢတ်ႈၼၼ်ႉၵႂႃႇယဝ်ႉ၊ သင်ဝႃႈ ဢမ်ႇမီးၸေႈပႃးၵႂႃႇၸွမ်းတႄႉ ၶေးတေၵႂႃႇၸုၵ်းပႂ်ႉၶၢဝ်းယၢမ်းသေ လူင်းၶဵင်ႇၶိုၼ်းၵူၺ်းတမ်ႉဢမ်ႇႁူႉ။

ဢူၺ်းၵေႃႉၶိူဝ်းမိူင်းၼၼ်ႉၵေႃႈ ႁၼ်မၼ်းဢမ်ႇၵႂႃႇထိုင်လႂ်လႄႈ ဢဝ်ၸႂ်ၸွႆႈယူႇၵေႃႈ ဢမ်ႇတူင်ႉဢမ်ႇၼိုင်သင်သေဢိတ်း မီးတီႈၵပ်းသိုပ်ႇၵၼ်ယူႇၵေႃႈ ဢမ်ႇႁတ်းလၢတ်ႈတေႃႇ၊ ႁၼ်ၼႃႈၵၼ်ယူႇၵေႃႈ ဢမ်ႇႁတ်းတၵ်ႉလၢတ်ႈ ၵိုတ်းလၢႆးလဵဝ်ၵူၺ်းယဝ်ႉ

“ပိူၼ်ႈတေၵႂႃႇပႅတ်ႈမႂ်းယဝ်ႉဢိူဝ်ႈ..ဢမ်ႇႁတ်းလၢတ်ႈၵေႃႈ..တႅမ်ႈလိၵ်ႈဢဝ်လႄႈ”

ၽွင်းၶၢဝ်းလိုဝ်ႈ 15 မိၼိတ်ႉၼၼ်ႉ ၶိူဝ်းမိူင်းလႄႈဢူၺ်းၵေႃႉ ဢွၼ်ၵၼ်ၵႂႃႇငွၵ်ႈယူႇတီႈၽၵ်းတူၼၼ်ႉသေ ဢဝ်ၽိုၼ်လိၵ်ႈဢၼ်ၶဝ်တႅမ်ႈပၼ်ၶိူဝ်းမိူင်းၼၼ်ႉ ႁႂ်ႈမႃးပၼ်တီႈႁွမ်လႅင်းၼႆသေ ဢီးၶိူဝ်းမိူင်းၶဝ်ႈၽၵ်းတူၵႂႃႇယဝ်ႉ၊ မိူဝ်ႈယင်းတိုၵ်ႉပႆၵႂႃႇၸူးႁွမ်လႅင်းဢၼ်တိုၵ်ႉငဝ်လပ်းယူႇၼၼ်ႉလႄႈ ၸႂ်ၼိုင်ႈၵေႃႈၵူဝ် ၸႂ်ၼိုင်ႈၵေႃႈ “ ၶဝ်တမ်ႉဢမ်ႇလႆႈသူၼ်ၸႂ်ႁဝ်း ႁူႉယူႇတီႈၸႂ်လူး ပၼ်ၵႂႃႇၵေႃႈၶဝ်တေထဵင်ၶိုၼ်းၵူၺ်း လိၵ်ႈၽိုၼ်ၼႆႉၵေႃႈ ၸၢင်ႈတေမီးတီႈပွင်ႇသင်” ၼႆလႄႈ သိၵ်ႇၽိုၼ်လိၵ်ႈၼၼ်ႉ ပႅတ်ႈသေ ပႆဢွၵ်ႇႁွင်ႈမႃးၶိုၼ်းယူႇ။

ဢူၺ်းၵေႃႉမၼ်းၼၼ်ႉၵေႃႈ သမ်ႉပေႃးဢမ်ႇၸၢင်ႈႁဵတ်းႁိုဝ်တီႈမၼ်းယဝ်ႉ ၶွၼ်းႁူဝ်ဝႆဝုတ်းဝုတ်းၸူးမၼ်းၵူၺ်း။ ႁွမ်လႅင်းၼၼ်ႉၵေႃႈ တိုၼ်ႇမႃးတၼ်းႁၼ်လင်ၶိူဝ်းမိူင်းၶဝ်ၼၼ်ႉၵူၺ်း။

သမ်ႉဝႃႈႁၵ်ႉၶဝ် ၵျိူၵ်ႈၶဝ်ယူႇသေတႃႉ မၼ်းပဵၼ်ႁၵ်ႉၽၢႆႇလဵဝ်ၵူၺ်း၊ ပေႃးဝႃႈၶဝ်ဢမ်ႇႁၵ်ႉ ယိုင်ႈၶဝ်ႈတၵ်ႉၸူး ၶဝ်ယိုင်ႈၶႅၼ်းတေပၢႆႈၵႆ ယိုင်ႈၶဝ်ႈၸမ်ၸမ် ယိုင်ႈၶႅၼ်းယၵ်ႉတူၺ်းၼႃႈၶဝ်ဢမ်ႇလႆႈထႅင်ႈၼၼ်ႉယဝ်ႉ။ ၶဝ်ၼၼ်ႉ မိူၼ်ပဵၼ်လုၵ်ႈတႃဝၼ်းဢွၼ်ႇ ဢၼ်ပိူင်းပၼ်ယၢမ်းႁူဝ်ၼႂ် တိုၵ်ႉဢုၼ်ႇႁွၼ်ႁွၼ်  ၶဝ်ႈၸမ်ဢမ်ႇလႆႈ ၵုမ်းၵမ်ဢမ်ႇလႆႈ ၵူၺ်းၵႃႈ လႆႈႁၼ်ယူႇလႄႈ လႆႈႁပ်ႉဢၢႆဢုၼ်ႇမၼ်းယူႇၵႆၵႆၸိူင်ႉၼၼ်ၵူၺ်းၵေႃႈ လႆႈယဝ်ႉ။

ဢမ်ႇႁိုင်ႁွမ်လႅင်းၵေႃႈ လႆႈၵႂႃႇၽိုၵ်းၵၢၼ်ပႅတ်ႈသေ ၶိူဝ်းမိူင်းၼၼ်ႉၵေႃႈ ဢမ်ႇၵႆႉလႆႈႁၼ်ႁွမ်လႅင်းယဝ်ႉ။ ၵူၺ်းၵႃႈ တၢင်းယၢမ်ႈဢၼ်ၵႆႉလႄႇငွၵ်ႈၽၵ်းတူၼၼ်ႉၵေႃႈ မိူၼ်တေယၢမ်ႈၵႂႃႇယဝ်ႉႁိုဝ် ယၵ်ႉတူၺ်းဢမ်ႇႁၼ် ပၼ်ႁႂ်ႈလႆႈထူၺ်ႈၸႂ်လူင်သေပူၼ်ႉၵႂႃႇၵူၺ်း။

သိုပ်ႇလူတွၼ်ႈတေမႃးၶႃႈ