ပႅတ်ႈ “လွင်ႈၶီႈၵေႉႁေႉတႃ” ၼၼ်ႉသေ မိူဝ်ႈဢဝ်တူဝ်ၵဝ်ႇၵႂႃႇတႅၵ်ႈၼိူင်းတင်းပိူၼ်ႈၼၼ်ႉ မၼ်းပၼ်ၽွၼ်းလီလႆႈၵေႃႈ မိူဝ်ႈမၼ်းပၼ်ႁႅင်းၸႂ်ႁႂ်ႈႁတ်းၶႄႉၶဵင်ႇလႄႈၽိူမ်ႉၼမ်ႉၵတ်ႉတူဝ်ၵဝ်ႇၼၼ်ႉၵူၺ်း မၼ်းတေဢမ်ႇလီလႆႈ သင်ဢဝ်လုၵ်ႈဢွင်ႇမၢၼ်ပိူၼ်ႈ မႃးႁဵတ်းႁႂ်ႈမေႃၶွႆလႄႈ ဢမ်ႇၸူမ်းၸွမ်းၵူၼ်းၵေႃႉၼၼ်ႉလႆႈ မၼ်းတေႁဵတ်းႁႂ်ႈတုၵ်ႉမႃးၼၼ်ႉယဝ်ႉ။
ပႅတ်ႈ “လွင်ႈၵူဝ်လႅၵ်ႈလၢႆႈ” သမ်ႉဝႃႈယူႇၼႂ်းငဝ်းလၢႆးဢၼ်ဢမ်ႇလီသေၵႃႈႁိုဝ်ၵေႃႈ မၢင်ၵေႃႉယင်းဢမ်ႇၶႂ်ႈလႅၵ်ႈလၢႆႈ ယွၼ်ႉၵူဝ်လွင်ႈမႂ်ႇလိူဝ်၊ ၵူၺ်းၵႃႈ ၸွင်ႇႁူႉႁိုဝ်ဝႃႈ မၢင်လွင်ႈဢၼ်မႂ်ႇမႂ်ႇၼၼ်ႉ တေႁဵတ်းႁႂ်ႈလီလိူဝ်သေဢၼ်ထူပ်းယူႇၵဝ်ႇၵဝ်ႇၼၼ်ႉ။
ပႅတ်ႈ “ပၢႆးဝူၼ်ႉဢၼ်ဝႃႈယူႇတႂ်ႈၵုမ်းၵမ်” ၵူၼ်းတင်းၼမ်ဢမ်ႇဢေႇ လႆႈၸႂ်လွင်ႈတႅတ်ႈတႅတ်ႈ ၶႂ်ႈႁႂ်ႈၵူႈလွင်ႈယူႇတႂ်ႈၵုမ်းၵမ် ၵႂႃႇၸွမ်းၽႅၼ်လီလီ ပေႃးဝႃႈမၼ်းဢမ်ႇပဵၼ်မႃးၵေႃႈ တေတုၵ်ႉ ၵွပ်ႈၼၼ် ပွႆႇဝၢင်းႁႂ်ႈတဵမ်တီႈ ဢမ်ႇဝႃႈမၼ်းတေဢွၵ်ႇမႃးၸိူင်ႉႁိုဝ်ၵေႃႈ ယွမ်းႁပ်ႉမၼ်းသေ ဢမ်ႇမီးသင်ဢၼ်ၵုမ်းၵမ်လႆႈမူတ်းလေႃႇ။
ပႅတ်ႈ “လွင်ႈႁဵတ်းၵၢၼ်ၼမ်ပူၼ်ႉတီႈ” တွၼ်ႈတႃႇလွင်ႈဢွင်ႇမၢၼ်၊ ႁႂ်ႈၼႃႈၵၢၼ်တႃငၢၼ်းၶိုပ်ႈၼႃႈ၊ ႁဵတ်းၵၢၼ်တႃႇငိုၼ်း ႁဵတ်းၵၢၼ်ထိုင်တီႈလိုမ်းၸႂ်ႉၸၢတ်ႈပၢၼ်ၼၼ်ႉ ဢမ်ႇလီပဵၼ်၊ သမ်ႉဝႃႈဢွင်ႇမၢၼ်မႃးၵေႃႈ တေၸၢင်ႈသုမ်းလၢႆလၢႆလွင်ႈၵႂႃႇလႄႈ ဢမ်ႇၸၢင်ႈဢဝ်မၼ်းၶိုၼ်းမႃးလႆႈ ၸိူင်ႉၼင်ႇ ၶၢဝ်းယၢမ်းလႄႈၼႃႈႁိူၼ်းၼၼ်ႉ။
ပႅတ်ႈ “လွင်ႈၼေးတၢင်းၽိတ်းပိူၼ်ႈ” လၢႆလၢႆၵေႃႉ မိူဝ်ႈမီးပၼ်ႁႃမႃး တေလႆႈၸႂ်ႁႃသေလွင်ႈလွင်ႈမႃးႁပ်ႉတႅၼ်းႁႂ်ႈလႆႈ တေၼႄးၵေႃႉပုၼ်ႉၵေႃႉၼႆႉတႃႇသေႇ၊ သင်ဢဝ်ဢၼ်ပဵၼ်ပၼ်ႁႃယူႇၼၼ်ႉ ႁႃတၢင်းၵႄႈၶႆၵႂႃႇၼႆ တေလီလိူဝ်ၼၼ်ႉယဝ်ႉ။
ပႅတ်ႈ “ပၢႆးဝူၼ်ႉဢၼ်ဝႃႈၸဝ်ႈၵဝ်ႇထုၵ်ႇတႃႇသေႇ” ၸၢင်ႉသီႇတိၼ်ယင်းၸၢင်ႈပလၢတ်ႈ ဢမ်ႇမီးၽႂ်ၶႅၼ်ႇလႆႈၵူႈလွင်ႈ။ တေမႃးၼင်ႈႁေၶမ်ၸႂ်ဝႃႈ ၸွင်ႇမၼ်းတေႁဵတ်းလႆႈလီၼၼ်ႉ မၼ်းႁဵတ်းႁႂ်ႈဢမ်ႇမီးတၢင်းသိူဝ်းလႆႈလႄႈ ပွႆႇဝၢင်းသေယွမ်း ယွမ်းႁပ်ႉဝႃႈမၼ်းပဵၼ်သၽႃႇဝၵူၺ်းၼႆလႄႈ။
ပႅတ်ႈ “လွင်ႈဝႃႈဢမ်ႇမီးၼမ်ႉၵတ်ႉၼႆၼၼ်ႉၽွင်ႈ” မၢင်ၵေႃႉတေလၢတ်ႈဝႃႈ ႁဵတ်းဢၼ်ပုၼ်ႉဢၼ်ၼႆႉဢမ်ႇလႆႈ ႁဵတ်းလႆႈမွၵ်ႈၼႆႉၵူၺ်းၵေႃႈ ပေႃးယဝ်ႉ၊ ပၢႆးဝူၼ်ႉၸိူဝ်းၼႆႉ ပဵၼ်ပၼ်ႁႃဢၼ်ယႂ်ႇလူင်ၼႂ်းၸၢတ်ႈပၢၼ် တေႁဵတ်းႁႂ်ႈႁဝ်းဢမ်ႇလႆႈႁဵတ်း လွင်ႈဢၼ်ႁဝ်းႁၵ်ႉလႄႈ လွင်ႈတိုၼ်ႇတဵၼ်ႈၼၼ်ႉၵႂႃႇလႆႈ။
ပႅတ်ႈ “ဢူၺ်းၵေႃႉဢမ်ႇလီ” တူင်ႇဝူင်းႁဝ်းတေပဵၼ်ၵူၼ်းၸိူင်ႉႁိုဝ်ဢၼ်ဝႃႈၼၼ်ႉၵေႃႈ ယူႇတီႈလဵၼ်ႈၵေႃႉၵူၼ်းၸိူင်ႉႁိုဝ်ၼႆၼၼ်ႉယဝ်ႉ၊ သင်လဵၼ်ႈၵေႃႉၵူၼ်းလီၵေႃႈ တေပဵၼ်ၵူၼ်းလီ၊ သင်လဵၼ်ႈၵေႃႉၵူၼ်းဢမ်ႇလီၵေႃႈ တေဢမ်ႇလီၸွမ်း။
ပႅတ်ႈ “လွင်ႈဝၼ်းလင်” လွင်ႈဝၼ်းလင်ၼၼ်ႉ ပၼ်တင်းတွၼ်ႈသွၼ်ဢၼ်လီလႄႈဢမ်ႇလီယဝ်ႉ ၵူၺ်းၵႃႈ ဢမ်ႇထုၵ်ႇလီၵႂႃႇတိူဝ်ႉၸႂ်သေလၢႆၸွမ်းမၼ်း ထိုင်တီႈပေႃးႁဵတ်းႁႂ်ႈၵႂႃႇတၢင်းၼႃႈဢမ်ႇလႆႈ ၵွပ်ႈၼၼ် မၼ်းပဵၼ်ၵႂႃႇယဝ်ႉၼႆၵေႃႈ ပွႆႇဝၢင်းမၼ်းၽွင်ႈ။
ပိၼ်ႇ-ငဝ်မွင်မိုတ်းမူဝ်း
