တၢင်းယုမ်ႉသိူင်ႇသိမ်းလွင်ႈတုၵ်ႉ “Smiling Depression”

မၢင်ပွၵ်ႈ တၢင်းယုမ်ႉဢၼ်သိူဝ်းၸႂ်ယူႇၼၼ်ႉ ပဵၼ်ၼႃႈၵၢၵ်ႇႁႄႉဝႆႉလွင်ႈၸဵပ်းဢၼ်မီးယူႇတၢင်းၼႂ်း မၢင်ၵေႃႉၶူဝ်သဵင်လင်ၼႃႇသေတႃႉ ၼႂ်းၸႂ်တႄႉတဵတ်ႇငဝ်ၼႃႇတေႉဢိူဝ်ႈ။

Smiling Depression ဢမ်ႇၼၼ် လွင်ႈၶီငဝ်ၽႆၢလင်တၢင်းယုမ်ႉ ၽၢင်ႁၢင်ႈ တၢင်းၼွၵ်ႈလီယူႇ ယုမ်ႉယႆၢႈ ၶူဝ်ငႆၢႈ ၸႂ်ႉၸၢတ်ႈပၢၼ်မိူၼ်ၵူၼ်းဢမ်ႇပဵၼ်သင် ၵူၺ်းၵႃႈလိုၵ်ႉလိုၵ်ႉၼႂ်းၸႂ်သမ်ႉ ၶီငဝ်မွင်ၸႂ် ၼၵ်းၸႂ် သဵင်ႈၸႂ် ၵူၼ်းဢၼ်ထူပ်းလွင်ႈၸိူင်ႉၼႆ ၶတ်းၸႂ်သိူင်ႇသိမ်းလွင်ႈပဵၼ်ယူႇၼႂ်းၸႂ်ၼၼ်ႉဝႆႉ ဢမ်ႇပၼ်ၽႂ်မႆႈၸႂ် လႄႈ ၵူဝ်ပိူၼ်ႈတေတူၺ်းႁၼ်ဝႃႈဢူၼ်ႈဢွၼ်ႇၼႃႇ၊ မၢင်ပွၵ်ႈၸဝ်ႈၵဝ်ႇၵေႃႈဢမ်ႇႁူႉတူဝ်ဝႃႈပဵၼ်ၼႆ တေႃႇထိုင် ပေႃးႁပ်ႉမိုဝ်းဢမ်ႇလႆႈ။

ၶေႃႈပၼ်ၾၢင်ႉဝႃႈပဵၼ် Smiling Depression

1. ယုမ်ႉယႆၢႈတေႃႇပိူၼ်ႈယူႇ ၵူၺ်းၵႃႈတေၶီငဝ်မိူဝ်ႈယူႇႁင်းၵူၺ်း မိူဝ်ႈယူႇႁူမ်ႈပိူၼ်ႈဢမ်ႇႁၼ်ပဵၼ်သင် မိူဝ်ႈယူႇႁင်းၵူၺ်း ပဵၼ်ၵူၼ်းဢမ်ႇမီးႁႅင်းလႄႈ မီးယူႇၵေႃႉလဵဝ်ၵူၺ်း။

2. ၶတ်းၸႂ်ႁဵတ်းၼႄဝႃႈတူဝ်ၵဝ်ႇ “ဢမ်ႇပဵၼ်သင်” ၼႆယူႇတႃႇသေႇ ၵူဝ်ဝႃႈပ်ိူၼ်ႈတေယၢပ်ႇၸႂ်ၸွမ်း ဝူၼ်ႉဝႃႈလွင်ႈဢူၼ်ႈဢွၼ်ႇတေႃႇပိူၼ်ႈၼၼ်ႉဢမ်ႇလီႁဵတ်း။

3. ႁိူဝ်ႉ ဢူၼ်ႈ ဢမ်ႇမီး ႁႅင်း သမ်ႉဝႃႈဢမ်ႇလႆႈၸႂ်ႉႁႅင်းၵေႃႈယဝ်ႉ မိူၼ်လႆႈၸိုၼ်ႇၸႂ်ႉၸၢတ်ႈပၢၼ်ယူႇၵူႈဝၼ်း။

4. မီးပၼ်ႁႃလွင်ႈၼွၼ်း ဢမ်ႇဝႃႈၼွၼ်းဢမ်ႇလပ်းႁိုဝ် ၼွၼ်းၼမ်ပူၼ်ႉတီႈ ဢွၵ်းဢေႃႁဵတ်းၵၢၼ်ၼၵ်းယွၼ်ႉဝူၼ်ႉပၼ်ႇတူင်ႇယူႇလႄႈ မၢင်ပွၵ်ႈၸႂ်ႉၵၢၼ်ၼွၼ်းပႆၢႈလွင်ႈဢၼ်ပဵၼ်ယူႇ။

5. ဢမ်ႇမီးတၢင်းသိူဝ်းၸွမ်ႈလွင်ႈဢၼ်ယၢမ်ႈလႆႈၸႂ် လွင်ႈဢၼ်ယၢမ်ႈႁဵတ်းႁႂ်ႈသိူဝ်းၸႂ်ၼၼ်ႉၵေႃႈ ဢဝ်ယူဝ်းၵႂႃႇသေဢမ်ႇၶႂ်ႈႁဵတ်းယဝ်ႉ။

6. ဝူၼ်ႉဝႃႈတူဝ်ၵဝ်ႇဢမ်ႇမီးၵႃႈၶၼ် ဢမ်ႇလမ်ႇလွင်ႈပုၼ်ႈတႃႇၽႂ် သမ်ႉဝႃႈမီးၵူၼ်းယူႇႁိမ်းၸမ်ၵေႃႈ မိူၼ်ဢမ်ႇလိူဝ်ၽႂ် ဢမ်ႇလႆႈႁပ်ႉလွင်ႈပွင်ႇၸႂ်။

7. မၢင်ပွၵ်ႈမီးပႆၢးဝူၼ်ႉမေႃသဵင်ႈၸႂ်လႄႈၶႂ်ႈႁႆၢၵႂႃႇပႅတ်ႈ သမ်ႉဝႃႈဢမ်ႇၼႄဢွၵ်ႇမႃးၵေႃႈ ၼႂ်းၸႂ်ၼၼ်ႉၼၵ်းၼႃၼႃႇၽႂ်ပေႃးဢမ်ႇႁၼ်လႆႈ။

သင်ႁၼ်ၵူၼ်းႁိမ်းႁွမ်းမီးၾၢင်ႁၢင်ႈၸိူင်ႉၼႆ ယႃႇပေတူၺ်းၶၢမ်ႈ
ဢၼ်ႁၼ်ယုမ်ႉယူႇၼၼ်ႉ ဢမ်ႇၸႂ်ႈဝႃႈလီယူႇတႃႇသေႇ
ဢၼ်ႁၼ်သိူဝ်းၸႂ်ယူႇၼၼ်ႉ ဢမ်ႇၸႂ်ႈဝႃႈဢမ်ႇလူဝ်ႇတၢင်းၸွႆႈထႅမ်။

သင်ၵေႃႉလႂ်ၽႂ်ပဵၼ်ၼႆယူႇ ႁႂ်ႈႁူႉဝႃႈ ဢမ်ႇလႆႈယူႇၵေႃႉလဵဝ်ၵူၺ်း တႃႇယွၼ်းတၢင်းၸွႆႈထႅမ်ၽႂ်သေၵေႃႉၼၼ်ႉ ဢမ်ႇၸႂ်ႈလွင်ႈၽိတ်းလႄႈဝႃႈဢူၼ်ႈဢွၼ်ႇ၊ တႃႇလႆႈဢုပ်ႇၽႂ်သေၵေႃႉ မၼ်းတေၸွႆႈႁႂ်ႈၸႂ်မဝ်မႃးလႆႈယဝ်ႉ။

ပိၼ်ႇ – ငဝ်မွင်မိုတ်းမူဝ်း