တွၼ်ႈၸဵတ်း
သၢႆလႅင်းတႃဝၼ်းထွင်ႇမႃး တွင်ႉၾႃႉၸိုၼ်ႈပၢင်ႇသႂ် မွၵ်ႇၵုမ်ႈၶပ်ႉယႆၸႅၼ်ႇ မွင်းၶမ်းႁွမ်ပိုတ်ႇၾူၼ်းၵူၺ်း လႅင်းမိူင်းပေႃးၵပ်းသိုပ်ႇမႃးၵမ်းလဵဝ်ယဝ်ႉ။
“မႂ်ႇသုင်ၵၢင်ၼႂ်ၶႃႈ ”
“ဢေႃႈ…မိူၼ်ၵၼ်ၶႃႈ..သိုပ်ႇၾူၼ်းမႃးၸိူင်ႉၼႆ..ၼွင်ႉႁဝ်းပဵၼ်သင်ၶႃႈလႃႇ”
“ၼွင်ႉသူဢမ်ႇပဵၼ်သင်ၶႃႈ..ႁဝ်းဢေႃႈပဵၼ်”
“ပဵၼ်သင်ၶႃႈ”
“ၸႂ်ထိုင်ဢေႃႈ”
“ဝၢင်းယဝ်ႉၶႃႈၼႃႉ..”
“ႁဵတ်းၵၢၼ်ယူႇၶႃႈႁႃႉ”
“ဢေႃႈ..” ၵူဝ်မၼ်းယၢဝ်းၵႂႃႇထႅင်ႈလႄႈ ၶမ်းႁွမ်ၼႅတ်ႈတဵၵ်းဝၢင်းၵမ်းလဵဝ်ယဝ်ႉ။
ၶမ်းႁွမ်လႄႈသႅင်ၽွင်းၵေႃႈဢွၼ်ၵၼ်ပႆၵႂႃႇ မိူဝ်ႈၸမ်ထိုင်ႁူင်းႁေႃးလူင်ၼၼ်ႉ ၸင်ႇမီးၵႃးလူင်လမ်းၼိုင်ႈ လတ်းပူၼ်ႉၶႃၵႂႃႇလွႆးလွႆးယဝ်ႉ ၵိုတ်းယူႇတၢင်းၼႃႈႁူင်းႁေႃးၼၼ်ႉသေ ၵူၼ်းလူင်ၵေႃႉၼိုင်ႈလူင်းၵႃးမႃး ႁဵတ်းႁႂ်ႈၶမ်းႁွမ်မိူၼ်ႇမိုင်တူၺ်းၵူၼ်းၵေႃႉၼၼ်ႉ ၼင်ႇဝႃႈယၢမ်ႈႁူႉၸၵ်းဝႆႉယဝ်ႉ။ ၵႃးလမ်းၼၼ်ႉၵေႃႈ ၶိုၼ်းႁူၼ်ပွၵ်ႈ ၽႅတ်ႈမႃးၸမ်ႁိမ်းၶႃၼၼ်ႉလႄႈ ၵူၼ်းႁေႃႈၵႃးၼၼ်ႉ ၼင်ႇႁၢင်ႈၶႂ်ႈမိူၼ်ၵူၼ်းႁူႉၸၵ်းဝႆႉသေ ဢဝ်ၶမ်းႁွမ်ဝိၼ်ႇဝၢႆႇတူၺ်းၵႂႃႇၸွမ်းယဝ်ႉ။
ပွၵ်ႈဢွၼ်တၢင်းသုတ်းၼႂ်းၸူဝ်ႈပၢၼ် လႆႈၶဝ်ႈႁူမ်ႈၸွမ်းပၢင်ၵုမ်လူင် ၵူၼ်းၼမ်ဝႃႈၼမ် မီးၸဵမ်ၵူၼ်းသိုၵ်း လႄႈ ၵူၼ်းမိူင်းၶိုၼ်ႈႁွတ်ႈ၊ ၶမ်းႁွမ်တႄႉဢမ်ႇၵဵဝ်ႇသင်ၼင်ႇၵွၼ်ႇ ၵူၺ်းၵႃႈ ၽူႈၸွႆႈၽူႈမၢႆသႅင်ၽွင်းဢမ်ႇတၼ်းလႄႈ လႆႈၵႂႃႇၸွႆႈသႅင်ၽွင်းမၢတ်ႈမၢႆပၢင်ၵုမ်ၼႆၼၼ်ႉယဝ်ႉ။
“သူႁွင်ႉႁဝ်းမႃးႁဵတ်းသင်လႃႇၼႆႉ..သႅင်ၽွင်း”
“မႃးၸွႆႈႁဝ်းၼၼ်ႉၼႃႇ..”
“ႁဝ်းၶႂ်ႈၼွၼ်းၼႃႇယဝ်ႉဝႃႈ”
“ယဵၼ်ႉသေထွမ်ႇလႄႈ..သူတေလႆႈႁူႉဝႃႈၵၢၼ်ပဵၼ်ၽူႈမၢႆၼႆႉ…မၼ်းဢမ်ႇငၢႆႈၼႆ…တေလႆႈယဵၼ်ႉၶၢမ်ႇတႃၼွၼ်းမွၵ်ႈႁိုဝ်”
“ႁႂ်ႈႁဝ်းႁဵတ်းၶူးဢမ်ႇၵႃး…ႁႂ်ႈႁဝ်းမႃးႁဵတ်းၽူႈမၢႆထႅင်ႈၵွၼ်ႇ”
“ဢိူဝ်ႈၼႃႈ…ၸၢမ်းႁဵတ်းတူၺ်းလႄႈ…ယူဝ်သူတေလႆႈၸႂ်ၶႂ်ႈႁဵတ်းၸွႆႈႁဝ်းမႃးထႅင်ႈဢိူဝ်ႈ”
“ၸဵမ်မိူဝ်ႈမႃး…ၸွႆႈႁဵတ်းယူႇၵူႈဝၼ်းၼႆႉ..ပႆႇၼပ်ႉဝႃႈၸွႆႈလႆႈၵွၼ်ႇႁႃႉ”
“ၸွႆႈၶႃႈဢေႃႈ..ၸွႆႈလႆႈၼမ်တေႉယဝ်ႉၶႃႈ…ဢၼ်ႁႂ်ႈသူမႃးၸွမ်းၼႆႉၵေႃႈ…ၶႂ်ႈႁႂ်ႈသူလႆႈႁဵၼ်းႁူႉပႃးလႄႈ..မိူဝ်းၼႃႈမႃးယူဝ်သူၸၢင်ႈဢဝ်ၸႂ်ႉတိုဝ်းလႆႈ..ဢၼ်လႆႈမႃးထွမ်ႇမႃးငိၼ်းယူႇၸိူဝ်းၼႆႉၼၼ်ႉၼႃႇ”
“ဢေႃႈၶႃႈ..ၵူၼ်းဝူၼ်ႉလီတေႃႇႁဝ်း”
ၼင်ႈႁေထွမ်ႇႁၢင်ႈၼႂ်ပေႃးၵူၼ်ႉၼႃႇယဝ်ႉ ဝၢႆးဝၼ်းၼင်ႈထွမ်ႇထႅင်ႈၵေႃႈ ႁူဝ်တႃၼၼ်ႉပေႃးဢမ်ႇၶႂ်ႈယွင်ႈပေႉလႆႈယဝ်ႉၼႃႇ။ ၵမ်ႈၽွင်ႈယင်းလၵ်ႉၼွၼ်းလပ်းယူႇလႃႈ။
ပၢင်ၵုမ်တင်းဝၼ်းပႆႇယဝ်ႉ မိူဝ်ႈၽုၵ်ႈသိုပ်ႇထႅင်ႈလႄႈ ထိုင်ၶိင်းၶၢဝ်းလူင်းယဝ်ႉ ၶမ်းႁွမ်ၶႃၵေႃႈ ဢွၼ်ၵၼ်ပႆမိူဝ်းၵႂႃႇၸွမ်းပိူၼ်ႈလွႆးလွႆး။ ၵမ်ႈၽွင်ႈၸိူဝ်းမီးလူတ်ႉမီးၵႃးၵေႃႈၶီႇလူတ်ႉၶီႇၵႃး ၸိူဝ်းဢမ်ႇမီးလူတ်ႉမီးၵႃးၵေႃႈပႆတိၼ်ယဝ်ႉ။
ယၢမ်းၵၢင်ၶမ်ႈ ၶမ်းႁွမ်ၼင်ႈယူႇတီႈႁူးလႅင်းသေ ငွၵ်ႈတူၺ်းၵိင်ႇမႆႉသၢင်းတူင်ႉၼိုင်ၶွၼ်းယူႇၼၼ်ႉ ၼင်ႇၵူၼ်းမွင်းသေလွင်ႈလွင်ႈဝႆႉလႄႈ သႅင်ၽွင်းႁၼ်လၢႆးႁဵတ်းသၢင်ႈၼၼ်ႉ
“မွင်းၽႂ်ယူႇလႃႇ…လႅင်းမိူင်းဢၼ်ဝႃႈၼၼ်ႉႁႃႉ… ”
“ဢမ်ႇ!…ဢမ်ႇ!!…” ၶိုၼ်ႈသဵင်ဢိတ်းၼိုင်ႈ၊ “ႁဝ်းၶႂ်ႈႁူႉဝႃႈသင်ပေႃႈႁဝ်းတိုၵ်ႉမီးယူႇ…တေပဵၼ်ၸိူင်ႉႁိုဝ်ၼေႃ…”
သႅင်ၽွင်းပႆႇတၼ်းလၢတ်ႈသင် သဵင်ၾူၼ်းမေႃးမႃး ၶမ်းႁွမ်ၼႅတ်ႈႁပ်ႉယဝ်ႉ ဢွၵ်ႇၵႂႃႇပႅတ်ႈၵမ်းလဵဝ်။
“ သိုပ်ႇမႃးၶၢဝ်းၼႆႉ…မီးလွင်ႈသင်ၶႃႈ… ”
“ၶႂ်ႈငိၼ်းသဵင်သူဢေႃႈ…”
ၶေႃႈၵႂၢမ်းဢွၼ်ႇၶေႃႈလဵဝ်ၵူၺ်း ဢမ်ႇႁူႉဝႃႈမၼ်းသႂ်ႇလေႃးသင် ႁဵတ်းႁႂ်ႈၶမ်းႁွမ်ယုမ်ႉဢွၵ်ႇမႃးပေႃးဢမ်ႇတုပ်ႇလႆႈယဝ်ႉ။
“မိူဝ်ႈၼႂ်ၵႆႈႁၼ်ႁဝ်းယူႇႁႃႉ…ႁဝ်းတႄႉႁၼ်သူဢေႃႈ…”
“သူၵႂႃႇသေၶႃႈႁႃႉ…”
“ၵေႃႈ…ၵႂႃႇသူင်ႇပေႃႈႁဝ်းၼၼ်ႉၼႃႇ…”
“ဢေႃ..ၵူၼ်းၼမ်ၵူၼ်းလၢႆဢမ်ႇတွင်းၽႂ်ယဝ်ႉၶႃႈ”
“သူပေႃးဢမ်ႇၵဵပ်းတွင်းဝႆႉၼႂ်းသၢႆတႃသေဢိတ်းၼေႃ…”
“ႁဝ်းတေၼွၼ်းၵွၼ်ႇယဝ်ႉၶႃႈ…”
“မိူဝ်ႈၽုၵ်ႈထူပ်းၵၼ်ၶႃႈ…ၸွင်ႇႁဝ်းတေလႆႈၵႂႃႇႁပ်ႉႁိုဝ်…”
“ဢမ်ႇပဵၼ်သင်ၶႃႈ…” ၶမ်းႁွမ်ၵေႃႈဝၢင်းၵႂႃႇပႅတ်ႈၵမ်းလဵဝ်။
လႅင်းမိူင်းတိုၵ်ႉဢၢင်ႈဝႃႈ “ၾၼ်လီၶႃႈ” ၼႆယူႇၵေႃႈ ၵူၼ်းထွမ်ႇမၼ်းဢမ်ႇတၼ်းထွမ်ႇယဝ်ႉ။
“လၢတ်ႈတေႃႇသၢဝ်တၢင်းလႂ်ထႅင်ႈယဝ်ႉလႃႇ…ၶၢဝ်းၼႆႉတိုၵ်ႉမႃးၼင်ႈပႂ်ႉယၢမ်းယူႇ” ၸၢႆးၶိူဝ်းမႃးယူႇႁိမ်းမၼ်းသေလၢတ်ႈ။
“မႃးၵေႃႈလီယဝ်ႉ ပႂ်ႉၼႆႈတင်းၶိုၼ်းလႄႈ” လုၵ်ႉၵႂႃႇပႅတ်ႈၸၢႆးၶိူဝ်းသေယဝ်ႉ။
မိူဝ်းၼွၼ်းသေတႅမ်ႈသူင်ႇၶေႃၵႂၢမ်းၵႂႃႇ “ၾၼ်လီၶႃႈ”
ၶမ်းႁွမ်ဢၼ်တေၼွၼ်းယူႇၼၼ်ႉ ငိၼ်းသဵင်ၶေႃႈၵႂၢမ်းလင်မေႃးမႃးလႄႈ ၽုၺ်ႇၾူၼ်းတူၺ်း ႁၼ်ယဝ်ႉၵေႃႈ မိုဝ်းၶႂ်ႈဝႆးလိူဝ်သေၸႂ်ယဝ်ႉ တွပ်ႇၵႂႃႇၶိုၼ်း “မိူၼ်ၵၼ်ၶႃႈ” တွပ်ႇၵႂႃႇယဝ်ႉ လႅင်းမိူင်းတူၺ်းၵမ်းလဵဝ်လႄႈ ၶေႃႈၵႂၢမ်းသွင်ၶႃၵေႃႈသိုပ်ႇၵႂႃႇတေႃႇထိုင်တဵင်ႈၶိုၼ်းယဝ်ႉ။
လၢတ်ႈဝႃႈတေၼွၼ်းလၢႆၵမ်းၵေႃႈ ဢမ်ႇပဵၼ်ၼွၼ်းလႆႈ ၶႂ်ႈၼွၼ်းဢၼ်ဝႃႈၼၼ်ႉၵေႃႈ သမ်ႉပေႃးလိုမ်းမၼ်းၵႂႃႇယဝ်ႉ ဢၵျွင်းဝႃႈမၢဝ်ႇသၢဝ်ၶဝ်ၵဝ်းၵၼ်ၼႆႉ ဢမ်ႇမီးတီႈသုတ်းတိူၵ်ႈလႆႈ ၶၢဝ်းယၢမ်းၼႆႉပေႉမႃးၽၢၼ်ႇပူၼ်ႉဝႆးလႃႇၼႆၵူၺ်း။
လႅင်းမိူင်းၵေႃႈမိူၼ်ဝႃႈ လွင်ႈၾၼ်ႁၢႆႉလူင်ယူႇၵူႈၶိုၼ်းၼၼ်ႉ တေႁၢႆၵႂႃႇပႅတ်ႈယူႇ။ ဢၼ်ၵႆႉတိုၼ်ႇၵၢင်ၶမ်ႈၵၢင်ၶိုၼ်းၼၼ်ႉၵေႃႈဢမ်ႇပဵၼ်ယဝ်ႉ။ ဢၼ်ၵႆႉၼွၼ်းဢမ်ႇလပ်းၼၼ်ႉလႅပ်ႈတေဢမ်ႇမီးယဝ်ႉ တေႃႈၼင်ႇၵၢင်ဝၼ်းလႃႈ လႅတ်ႇပေႃးဢွၵ်ႇ ယင်းတိုၵ်ႉၼွၼ်းဝၢၼ်ယူႇ။ ၵူၼ်းယူႇၸွမ်းမၼ်းၸိူဝ်းၼၼ်ႉ ၶႂ်ႈႁၼ်လၢၵ်ႇလၢႆးဝႆႉလႄႈ ဢမ်ႇတွၼ်ႉႁၼ်လႅင်းမိူင်း လုၵ်ႉလႃႈသေပွၵ်ႈလူး။ ၸင်ႇၸႂ်ဢမ်ႇပူၵ်း ပွႆႇႁႂ်ႈမၼ်းၼွၼ်းၵႂႃႇယဝ်ႉ။
မိူဝ်ႈလႅင်းမိူင်းတိုၼ်ႇမႃးဢမ်ႇႁၼ်ၽႂ်သေၵေႃႉ ၽိူဝ်ႇလႆႈႁၼ်ဢွမ်မွင်းယဝ်ႉ ၵိုင်ႉၵၢင်ႉတူၵ်းၸႂ်သေၶုၼ်ႇလုၵ်ႉမႃး ၵူဝ်ဢမ်ႇတၼ်းၶိုတ်းၶၢဝ်းယၢမ်းလႄႈ ၼႅတ်ႈတိုဝ်းတင်းသွၵ်းတိၼ်သေ ၵေႃႉပဵၼ်ၸၢႆးလၢဝ်ၵူၼ်းႁုင်မိုဝ်ႉၶဝ်ၼၼ်ႉ လႆႈႁၼ်…
“ႁူဝ်ၼႃႈႁဝ်းတေၵႂႃႇလႂ်လႃႇၼၼ်ႉ”
“ၵႂႃႇသူင်ႇပေႃႈႁဝ်းၵႂႃႇပၢင်ၵုမ်…”
“ၽူႈမၢႆဢွင်ႇႁဝ်းၵႂႃႇသူင်ႇပၼ်ယဝ်ႉ…”
“ၸိူင်ႉၼၼ်ႁႃႉ… ” ၸင်ႇတေမႄးထွတ်ႇသွၵ်းမၼ်းၶိုၼ်းယဝ်ႉ။
“ပဵၼ်သင်လႄႈၽႂ်ပေႃးဢမ်ႇပူၵ်းႁႃးသေၵေႃႉလႃႇ… ”
“ဢမ်ႇတွၼ်ႉယၢမ်ႈႁၼ်ႁူဝ်ၼႃႈ…လုၵ်ႉလႃႈသေပွၵ်ႈလူး…ၶႂ်ႈႁူႉဝႃႈတေလုၵ်ႉလႃႈထိုင်လၢႆမူင်းၼႆၵႂႃႈ…”
ၶၢဝ်းလူင်းပၢင်ၵုမ်ၼႆၵေႃႈ လႅင်းမိူင်းသမ်ႉဢမ်ႇတၼ်းလႄႈ ဢမ်ႇလႆႈၵႂႃႇႁပ်ႉပေႃႈၶဝ်ထႅင်ႈယဝ်ႉ။ ၶမ်းႁွမ်ၵေႃႈလွမ်မွင်းဝႃႈတေလႆႈႁူပ်ႉယူႇ ၵူၺ်းၵႃႈဢမ်ႇလႆႈႁၼ်ၸိူင်ႉၼႆ ၼႂ်းၸႂ်ၵေႃႈဢမ်ႇပေႃးသိူဝ်းၵႃႈႁိုဝ်။ လႅင်းမိူင်းၵေႃႈဝူၼ်ႉၽိတ်းယူႇႁင်းမၼ်း ဢမ်ႇႁူႉဝႃႈတေႁဵတ်းႁိုဝ် ၼႂ်းၸႂ်ၼႆႉပေႉမႃးဢမ်ႇႁတ်းၵေႃႈဢမ်ႇႁူႉ ဢၢႆၶိုၼ်းၵႂၢမ်းလၢတ်ႈတူဝ်ၵဝ်ႇ သမ်ႉပေႃးဢမ်ႇႁတ်းတေႃႇၼႃႈၶဝ်ယဝ်ႉ။ တေလၢတ်ႈသမ်ႉမိူၼ်ၵႄႈတူဝ် တေဢမ်ႇလၢတ်ႈၵေႃႈသမ်ႉမိူၼ်ႁဵတ်းၽိတ်းတေႃႇၶဝ်ဝႆႉ တေလၢတ်ႈၵေႃႈၶႂ်ႈၵူဝ်မႃးယဝ်ႉ ဢၼ်ၵူဝ်လိူဝ်ပိူၼ်ႈတၢင်းလူင်ၼႂ်းၸၢတ်ႈပၢၼ်ၼႆႉ ၵူဝ်ၶမ်းႁွမ်ဢိမ်ၸၢၼ်ႈၼၼ်ႉၵူၺ်း။
ဝၢႆးသေဝၼ်းၼႆႉပူၼ်ႉၵႂႃႇ သွင်ၶႃၵေႃႈဢမ်ႇလႆႈၵပ်းသိုပ်ႇၵၼ်ၶိုၼ်း ယဵၼ်ၵႂႃႇႁင်းၽႂ်ႁင်းမၼ်း။ ပၢင်ၵုမ်ဢၼ်ၶိုၼ်ႈယူႇၵူႈဝၼ်းၼၼ်ႉၵေႃႈ လႆႈယဝ်ႉတူဝ်ႈၵႂႃႇယဝ်ႉလႄႈ ႁူဝ်ၶမ်ႈမႃး မီးပၢင်ၵိၼ်လဵင်ႉၼႆသေ ၶမ်းႁွမ်ၶႃၵေႃႈၵွပ်ႈတေဢမ်ႇပႂ်ႉၵိၼ်လဵင်ႉၸွမ်းပိူၼ်ႈလႄႈ ပွၵ်ႈမိူဝ်းထႃႈဢွၼ်တၢင်းယဝ်ႉ။ ၸင်ႇသမ်ႉငိၼ်းသဵင်တဵၵ်းႁွၼ်းၵႃးသွင်ၵမ်း ၶႃၵေႃႈဝၢႆႇတူၺ်း ၵူၼ်းၵေႃႉၼၼ်ႉၵေႃႈၵိုတ်းၵႃးသေ
“ပွၵ်ႈမိူဝ်းယဝ်ႉႁႃႉ..”
ၶမ်းႁွမ်တင်ႈၸႂ်ဢမ်ႇဝၢႆႇတူၺ်းၵူၼ်းၵေႃႉၼၼ်ႉ မီးသႅင်ၽွင်းၵူၺ်းတွပ်ႇ “ၸႂ်ႈယဝ်ႉၶႃႈ…တေၵႂႃႇလႂ်ၶႃႈလႃႇ”
“ၵႂႃႇႁပ်ႉပေႃႈႁဝ်းဝႃႇ…ၵႂႃႇၵေႃႈလႅပ်ႈလႆႈၵႂႃႇပႂ်ႉၵူၺ်း…ႁႂ်ႈႁဝ်းမိူဝ်းသူင်ႇၶႃႈၼႄႇ”
“ဢမ်ႇပဵၼ်သင်ၶႃႈၸမ်ၸမ်ၵူၺ်း…သမ်ႉလူဝ်ႇမိူဝ်းဝႄႉသိုဝ်ႉၶွင်တီႈလၢၼ်ႉထႅင်ႈသေဢိတ်ႉၼိုင်ႈ”
“ၸိူင်ႉၼၼ်ႁႃႉ…လွႆးလွႆးၶႃႈပေႃးၼႆ”
လႅင်းမိူင်းၼၼ်ႉတႄႉ သမ်ႉဝႃႈၶႂ်ႈလၢတ်ႈတေႃႇၶမ်းႁွမ်ယူႇၵေႃႈ ၶွင်ၸဝ်ႈပိူၼ်ႈသမ်ႉဢမ်ႇယၵ်ႉတူၺ်းၼႃႈလူး ၸၢင်ႈတေႁဵတ်းႁိုဝ်။
“သူမေႃးၵၼ်တင်းမၼ်းႁႃႉ”
“ဢမ်ႇၼႃ..ဢမ်ႇလႆႈလၢတ်ႈတေႃႇၵၼ်လူးၵွၼ်ႇ”
“ၼၼ်ႉယဝ်ႉ…သူယဵၼ်သႂ်ႇမၼ်းႁႃႉပေႃးၼႆ..ၵၢၼ်ႉၵိုတ်းလူတ်ႉသေတၵ်ႉ…ပေႃးဢမ်ႇယၵ်ႉတူၺ်းပိူၼ်ႈသေဢိတ်း”
ဝၢႆးသေပၢင်ၵုမ်ယဝ်ႉၵႂႃႇ ၵၢၼ်ၵေႃႈၼမ်မႃးထႅင်ႈသမ်ႉႁိပ်ႈ ပွႆးၵေႃႈသမ်ႉၸမ်မႃးတိၵ်းတိၵ်း၊ ပေႃးဢမ်ႇယဝ်ႉၵၢၼ်ၵေႃႈတေဢမ်ႇလႆႈလႄႇပွႆး လႄႇၵေႃႈတေဢမ်ႇၵျေႃႇၼၼ်ႉယဝ်ႉ၊ ၶမ်းႁွမ်ၼၼ်ႉၵေႃႈ ၸွႆႈသႅင်ၽွင်းပေႃးဢမ်ႇလႆႈလိုဝ်ႈမိူၼ်ၵၼ်။
တႃဝၼ်းလပ်ႉလွႆၵႂႃႇ သၢႆငဝ်းလိူၼ်ထွင်ႇတႅၼ်း ၶမ်ႈမႃးယဝ်ႉၶမ်းႁွမ်ၶႃ တိုၵ်ႉႁဵတ်းၵၢၼ်ယဝ်ႉၵူၺ်းလႄႈ ၶမ်းႁွမ်ၼၼ်ႉတႄႉ ပွႆႇတူဝ်ပွႆႇၸႂ်လူမ်ႉလူင်းၵႂႃႇတီႈၼွၼ်းမၼ်းၼၼ်ႉၵႅပ်ႉၼိုင်ႈ မိူဝ်ႈတိုၵ်ႉမွႆႈလပ်းယူႇ သဵင်သႅင်ၽွင်းၵေႃႈၶဝ်ႈႁူမႃး
“ၶမ်းႁွမ်ဢမ်ႇၵႂႃႇလႄႇပွႆးႁၶမ်ႈၼႆႉ… ”
“မီးပွႆးႁေႁႃႉၶမ်ႈၼႆႉ”
“ၵႂႃႇယူႇလႂ်မႃးလႃႇ ပိူၼ်ႈႁဵတ်းပွႆးၵေႃႈဢမ်ႇႁူႉ”
“သူၼၼ်ႉယဝ်ႈ..ႁႂ်ႈႁဝ်းႁဵတ်းၵၢၼ်ယူႇတိၵ်းတိၵ်း”
“သူၸွင်ႇတေၵႂႃႇႁိုဝ်လႃႇ”
“ဢမ်ႇယဝ်ႉ…သူၵႂႃႇလႃႈ…ႁဝ်းႁိူဝ်ႉၼႃႇယဝ်ႉ…ယွၼ်းၼွၼ်းလိုဝ်ႈႁိူဝ်ႉၵွၼ်ႇ…”
“ဢမ်ႇၵႂႃႇဢမ်ႇလႆႈ…ပိူၼ်ႈၵႂႃႇပွႆးမူတ်းယဝ်ႉ…ၵိုတ်းသူၵေႃႉလဵဝ်ၵူၺ်း…ႁတ်းယူႇယူႇၼႄႇ…”
“ဢိုမ်ႈ…” သဵင်ၶမ်းႁွမ်ၵေႃႈယဵၼ်ၵႂႃႇ။
ယၢမ်းၼၼ်ႉသဵင်ၾူၼ်းၶမ်းႁွမ်မေႃးမႃးလႄႈ သႅင်ၽွင်းႁၼ်ပဵၼ်ၸိုဝ်ႈလႅင်းမိူင်းၼႆသေႁပ်ႉၵႂႃႇယဝ်ႉ။ ဝၢႆးၼၼ်ႉသႅင်ၽွင်းၵေႃႈဢမ်ႇသိုပ်ႇႁွင်ႉၶမ်းႁွမ်ထႅင်ႈ မၼ်းၵေႃႈၶီႇၵႃးလူင်ၵႂႃႇၸွမ်းပိူၼ်ႈယူႇယဝ်ႉ။
သိုပ်ႇလူၵႂႃႇထႅင်ႈၶႃႈ
