ဝၼ်းယဝ်ႉဝၼ်းပူၼ်ႉၵႂႃႇ ၸၢႆးၶိူဝ်းၵေႃႈ မိူဝ်းႁပ်ႉဢဝ်လႅင်းမိူင်းတီႈပၢင်သဝ်းၶဝ်ၼၼ်ႉသေ
“ပဵၼ်ႁိုဝ်ဢမ်ႇလႆႈႁၼ်ၵၼ်ႁိုင်ၼႃႇယဝ်ႉ…ဢမ်ႇၸႂ်ထိုင်ၵၼ်ၼႄႇ”
“သီႇသိပ်းႁႃႈဝၼ်းၵူၺ်း..ႁိုင်ယူႇႁႃႉ…”
“ၸွင်ႇႁူႉႁႃႉ…ၼိုင်ႈဝၼ်းၼႆႉႁိုင်တၢၼ်ႇႁိုဝ်ၼႆ…ယူႇၵိၼ်ၼွၼ်းၼႂ်းႁိူၼ်းဢမ်ႇလႆႈႁၼ်ၵူၼ်း…ဢမ်ႇမီးၵူၼ်းဢုပ်ႇ…မွင်းပႂ်ႉၶၢဝ်းယၢမ်းၸိူင်ႉၼႆၼႆႉပေႃးတၢၼ်ႇဝႃႈပဵၼ်ပီယဝ်ႉ…ပေႃးမိူဝ်းၵိုတ်းပၼ်တီႈႁိူၼ်း…”
“ႁူႉယဝ်ႉၶႃႈ……”
ၵူၺ်းၵႃႈၸၢႆးၶိူဝ်းဢမ်ႇလႆႈၵိုတ်းပၼ်လႄႈ ပူၼ်ႉမိူဝ်းတီႈတပ်ႉၶဝ်ပႅတ်ႈယူႇ။
“ပဵၼ်သင်လႄႈဢမ်ႇၵိုတ်းပၼ်လႃႇ…”
“ၶမ်းႁွမ်ဢမ်ႇယူႇႁိူၼ်းယဝ်ႉ…ႁၼ်ၽၵ်းတူဢိုတ်းဝႆႉသေ…”
“ဢမ်ႇလၢတ်ႈဝႃႈႁႃးမႃးယဝ်ႉၼႆႁႃႉ…”
“ဢမ်ႇတၼ်းလႆႈလၢတ်ႈၶႃႈ……”
“ၸူဝ်ႈဢမ်ႇလႆႈယူႇၼႆႉ…ႁတ်းပူၼ်ႉလိူဝ်ၵႂၢမ်းသင်ႇမႃးလွႆးလွႆးယဝ်ႉ…ၸွင်ႇႁူႉႁႃႉႁႃးလႆႈႁပ်ႉပုၼ်ႈၽွၼ်းၶိုၼ်းယဝ်ႉ…”
“ႁူႉယဝ်ႉၶႃႈ…”
လႅင်းမိူင်းၶႃၵေႃႈလူင်းၵႃးမႃး ဢမ်ႇလႆႈႁၼ်ၽႂ်လႄႈ ၸၢႆးၶိူဝ်းဢွၼ်ၵႂႃႇတီႈၵိၼ်ၶဝ်ႈၶဝ် လႆႈႁၼ်လုၵ်ႈၼွင်ႉမၼ်းၼင်ႈၸႅၼ်ႇၵၼ် ပႂ်ႉဝႆႉယူႇတီႈၽိူၼ်မူႇၶဝ်ႈၼၼ်ႉသေ ၸူမ်းႁပ်ႉတွၼ်ႈမၼ်းယူႇ။ ယၢမ်းၼၼ်ႉ ၶမ်းႁွမ်လႄႈယိင်းသႅင်ၵေႃႈၸုင်ဢဝ်ၼေႃႇမိူင်းမႃးယဝ်ႉ ၶမ်းႁွမ်ၵေႃႈ ၸွမ်းလူၺ်ႈ လွင်ႈၸူမ်းသိူဝ်းၼႃႇၼၼ်ႉ တၢင်းယုမ်ႉလႄႈသၢႆတႃမၼ်း တူၺ်းၸွမ်းလႅင်းမိူင်းဢမ်ႇၵိူင်းၵႂႃႇတၢင်းလႂ်လႆႈယဝ်ႉ။
“ၸူမ်းယဝ်ႉၼႃႈ..ပွၵ်ႈမႃးၶိုၼ်း…” သၢႆတႃသွင်ၶႃယၵ်ႉၸူးၵၼ် ယုမ်ႉၸူးၵၼ် ပေႃးတၢၼ်ႇဝႃႈၼႂ်းမူႇၶဝ်ႈၼၼ်ႉမီးၶႃၵူၺ်းယဝ်ႉ။
ဝၢႆးသေၵိၼ်ၶဝ်ႈႁူမ်ႈမူႇၵၼ်ယဝ်ႉ ၶမ်းႁွမ်ၶႃၵေႃႈ ၸူဝ်းၵၼ်ပွၵ်ႈမိူဝ်းသေ လႅင်းမိူင်းၵေႃႉႁဵတ်းၵူၼ်းမိူဝ်းသူင်ႇပၼ်ယဝ်ႉ။ ၸၢႆးၶိူဝ်းယၵ်ႉတူၺ်းယိင်းသႅင်းၼၼ်ႉ လႅပ်ႈတေမိူၼ်ၵၢင်ႈၶမ်ၶေႃးပိူၼ်ႈဝႆႉလႄႈ ပႆမိူဝ်းၵႂႃႇၸွမ်းယိင်းသႅင် မိူဝ်းၵႂႃႇဢွၼ်တၢင်းလႅင်းမိူင်းၶႃယဝ်ႉ။
လႅင်းမိူင်းတင်းၶမ်းႁွမ်တႄႉ ဢုပ်ႇၵၼ်မိူဝ်းၵႂႃႇၸွမ်းတၢင်းၼၼ်ႉလွႆးလွႆး။ တီႈၼႂ်းၵၢင်တၢင်း ဢၼ်လပ်းသိင်ႇလူင်ၼၼ်ႉ လႅင်းမိူင်းၵိုင်ႉၵၢင်ႉၵိုတ်းၵႂႃႇ။
“ပဵၼ်သင်ယဝ်ႉလႃႇ……” ၶမ်းႁွမ်ၵိုင်ႉၵၢင်ႉၵိုတ်းၸွမ်း။
လႅင်းမိူင်းၶုၼ်ႇႁၢဝ်ႉၵွတ်ႇဢဝ်တူဝ်ၶမ်းႁွမ် ၶဝ်ႈမႃးယူႇၼႂ်းဢူၵ်းမၼ်းၼၼ်ႉၼင်ႇဢုၼ်ႇၸႂ်။ ၶမ်းႁွမ်ၵေႃႈႁိုဝ်ၸၢင်ႈတၵ်းသဵင်လႆႈ ဢဝ်မိုဝ်းသွင်ၶွၼ်မၼ်း ၵွတ်ႇဢဝ်လင်ၵႂၢင်ႈၼၼ်ႉလွႆးလွႆးယဝ်ႉ ၼိမ်ၵႂႃႇၵမ်းၼိုင်ႈသေ။ သဵင်ႁၢပ်ႇႁၢပ်ႇၼႂ်းၵူင်ၶေႃးၼၼ်ႉ လႆႈလၢတ်ႈဢွၵ်ႇမႃးႁိမ်းၸမ်ႁူ။
“ၶမ်းႁွမ်…ႁဝ်းၶႂ်ႈၵွတ်ႇသူဝႆႉ…ဢမ်ႇၶႂ်ႈႁႂ်ႈသူၵႂႃႇတၢင်းလႂ်ၼၼ်ႉယဝ်ႉ…” လပ်းတႃၵူမ်ႈၵွတ်ႇၶမ်းႁွမ် သမ်ႉပေႃးဢမ်ႇၸၢင်ႈတူင်ႉတူဝ်လႆႈ ပေႃးတၢၼ်ႇဝႃႈမၼ်းၼွၼ်းလပ်းၼၼ်ႉယဝ်ႉ။
“ပွႆႇႁဝ်းလႆႈယဝ်ႉဝႃႈ…” သဵင်ႁၢပ်ႇဢၼ်မီးယူႇၼႂ်းၵူင်ၶေႃးၼၼ်ႉၵေႃႈ မေႃးယူႇႁိမ်းႁူမႃးထႅင်ႈ။
“ပၼ်ႁႂ်ႈႁဝ်းလႆႈၵွတ်ႇ…ႁၢႆၸႂ်ထိုင်…ဢိတ်းၼိုင်ႈလႄႈ”
မိူဝ်ႈယူႇၼႂ်းဢွင်ႈၵွတ်ႇလႅင်းမိူင်း တီႈၼႂ်းလပ်းသိင်ႇၼၼ်ႉ ၼႂ်းသၢႆတႃၵေႃႈၵိုင်ႉၵၢင်ႉလပ်းသိင်ႇ မႃးထႅင်ႈၵမ်းၼိုင်ႈလႄႈ ႁၼ်ၾႆးသၢႆႁိူဝ်ႈလႅင်းထွင်ႇမႃးယဝ်ႉ ထွင်ႇၶဝ်ႈတႃမႃးသေ မီးၵူၼ်းၵေႃႉၼိုင်ႈမႃးၵွတ်ႇမၼ်းဝႆႉ။ ၵိုင်ႉၵၢင်ႉပွႆႇတူဝ်ၵႂႃႇ မိူၼ်ၵူၼ်းၼွၼ်းလပ်းပႅတ်ႈ လႅင်းမိူင်းတူၵ်းၸႂ်သေ ၼႅတ်ႈႁွင်းႁပ်ႉဢဝ်တူဝ်ၶမ်းႁွမ်ယဝ်ႉ
“ၶမ်းႁွမ်!!..ၶမ်းႁွမ်..ပဵၼ်သင်ၵႂႃႇယဝ်ႉလႃႇ” ၸႂ်ၸႃႉၸႂ်သုၵ်ႉသၵ်ႉလူင်ၵႂႃႇမူတ်း။
ဢုမ်ႈဢဝ်ၶမ်းႁွမ်လႅၼ်ႈလူင်ၵႂႃႇႁႂ်ႈပေႃးၶိုတ်းၸၢႆးၶိူဝ်းၶႃယဝ်ႉ။
“မေႃယႃ!!”
“ၶမ်းႁွမ်ပဵၼ်သင်လႃႇ!!” ယိင်းသႅင်ထၢမ်။
“ဢမ်ႇႁူႉယဝ်ႉ ယူႇယူႇၵေႃႈပဵၼ်လူမ်းၵႂႃႇၸိူင်ႉၼၼ်”
“ၶိူင်ႈယႃႈယႃႁဝ်းမီးတီႈႁိူၼ်းမူတ်းယဝ်ႉ!!”
“မိူဝ်းႁဵတ်းတေႉလႄႈပေႃးၼၼ်!!”
လႅင်းမိူင်းဢုမ်ႈႁွပ်ႇၶမ်းႁွမ် ဢမ်ႇလႅပ်ႈၼၵ်းသေဢိတ်းၼၼ်ႉယဝ်ႉ၊ ၵမ်ႉၵူၺ်းၵေႃႈမိူဝ်းႁွတ်ႈထိုင်ႁိူၼ်းသေ ယိင်းသႅင်ၵေႃႈၼႅတ်ႈပိုတ်ႇၾႆးယဝ်ႉ၊ လႅင်းမိူင်းဢဝ်မိူဝ်းဝၢင်းဝႆႉလီလီသေ ယူႇယူႇ ၶမ်းႁွမ်ၵေႃႈ တိုၼ်ႇၶိုၼ်ႈမႃးၶိုၼ်းယဝ်ႉ။ လႆႈႁၼ်ၼႃႈလႅင်းမိူင်း ဢၼ်ငွၵ်ႈတူၺ်းမၼ်းယူႇၼၼ်ႉသေ
“ႁူႉတူဝ်ယဝ်ႉ!”
ယိင်းသႅင်တိုၵ်ႉဢၢင်ႈၵႂႃႇဢဝ်ၶိူင်ႈယႃမၼ်းယူႇ။
လႅင်းမိူင်းၼၼ်ႉၵေႃႈ ပႃးတင်းလွင်ႈမႆႈၸႂ်လူင်သေ “သူပဵၼ်ၸိူင်ႉႁိုဝ်” ႁွင်းဢဝ်တူဝ်ၶမ်းႁွမ်လုၵ်ႉၶိုၼ်ႈယဝ်ႉ။
“ဢမ်ႇ..ႁဝ်းဢမ်ႇပဵၼ်သင်ယဝ်ႉ..ႁဝ်းႁဵတ်းႁိုဝ်မႃးမီးယူႇတီႈၼႆႈလႃႇ”
“လႅင်းမိူင်းဢုမ်ႈသူလႅၼ်ႈမႃးတေႃႇပေႃးသုတ်းတၢင်းၼၼ်ႉယဝ်ႉ”
ၶမ်းႁွမ်ဝၢႆႇတူၺ်းလႅင်းမိူင်း ႁိူဝ်ႇတိုၵ်ႉၸမ်ႉယူႇသေ ဢဝ်မိုဝ်းဢွၼ်ႇမၼ်း ပွတ်ႈၼႃႈလႅင်းမိူင်းယဝ်ႉၸဵတ်ႉပၼ်ယူႇ။ ယိင်းသႅင်ၶႃ ယဵၼ်ႉတူၺ်းဢမ်ႇလႆႈယဝ်ႉလႄႈ သွတ်ႉသွတ်ႉဢွၵ်ႇၵႂႃႇပႅတ်ႈတၢင်းၼွၵ်ႈယဝ်ႉ။
“လိုၵ်းယဝ်ႉ..လိုဝ်ႈႁိူဝ်ႉသူလႄႈၼႃႈ..မိူဝ်ႈၽုၵ်ႈၵေႃႈလူဝ်ႇၵႂႃႇႁူင်းႁဵၼ်းတဵမ်ၸဝ်ႉလူး”
“ဢိုမ်ႈ..”
လႅင်းမိူင်းဢဝ်ၼႃႈယိုၼ်းၶဝ်ႈၵႂႃႇ ၸုပ်းသႂ်ႇတီႈၼႃႈၽၢၵ်ႇၶမ်းႁွမ်ၵမ်ႉၼိုင်ႈယဝ်ႉ ႁိပ်ႈၼႅတ်ႈဢွၵ်ႇႁိူၼ်းမႃးယဝ်ႉ။
“ၵႂႃႇ!..ၸၢႆးၶိူဝ်း…ႁႃးမိူဝ်း”
“ပေႉၸဵဝ်းဢွၵ်ႇမႃးလႃႇ..ဢၢင်ႈဝႃႈတေမိူဝ်းပႅတ်ႈယဝ်ႉၼႆႉ”
“ပႆႇၶႂ်ႈမိူဝ်းၵေႃႈယူႇတီႈၼႆႈလႄႈပေႃးၼႆ…” လႅင်းမိူင်းယုမ်ႉသေယၵ်ႉတူၺ်းၸၢႆးၶိူဝ်းၶႃယိင်းသႅင်ယူႇ။
ယၢမ်းၵၢင်ၼႂ် ၶမ်းႁွမ်ၵေႃႈၵႂႃႇႁူင်းႁဵၼ်းၸဵမ်ၸဝ်ႉသေ လႆႈႁၼ်လႅင်းမိူင်းမီးယူႇၼႃႈႁွင်ႈႁဵၼ်း ၼၼ်ႉလႄႈ
“ပေႉမႃးၸဝ်ႉလႃႇ…ၼေႃႇမိူင်းလူး”
“ပႆႇမႃး…ႁဝ်းမႃးႁႃသူၵူၺ်း…မီးလွင်ႈတေလၢတ်ႈ…” ၶမ်းႁွမ်ၵေႃႈၽုၺ်ႇၽၵ်းတူပၼ်ၶဝ်ႈၵႂႃႇယဝ်ႉ။ ဢဝ်ၼမ်ႉမႃးတမ်းပၼ် ၼင်ႇပဵၼ်ၶႅၵ်ႇသေ။
“ၶမ်းႁွမ်…”
“ဢေႃႈၶႃႈ..”
“ၸွင်ႇႁူႉႁႃႉ…ယွၼ်ႉသင်လႄႈႁဝ်းၵဵပ်းလဵင်ႉၼေႃႇမိူင်းၼႆ”
“ယွၼ်ႉသင်လႃႇ!”
“ၶဝ်ပဵၼ်လုၵ်ႈဢွၼ်ႇဢၼ်ဢမ်ႇမီးပေႃႈမႄႈမိူၼ်ႁဝ်းၼၼ်ႉၼႃႇ…”
ၶမ်းႁွမ်ၼိမ်သေထွမ်ႇယူႇ
“ပေႃႈၶဝ်မႃးႁဵတ်းသိုၵ်း…ၸဵမ်မိူဝ်ႈတိုၵ်ႉယူႇၼႂ်းတွင်ႉ…မႄႈၶဝ်လဵင်ႉလူမႃးတေႃႇပေႃးလႆႈၼိုင်ႈပီ…ၸပ်းတၢင်းပဵၼ်သေသဵင်ႈၵၢမ်ႇၵႂႃႇပႅတ်ႈ…ၼၢႆးၶဝ်လႆႈၵဵပ်းမိူဝ်းလဵင်ႉ…မိူဝ်ႈဢႃႇယုၶဝ်တိုၵ်ႉလႆႈသွင်ၶူပ်ႇၵူၺ်းၼၼ်ႉ…ၼၢႆးၶဝ်ၵေႃႈလူႉပႅတ်ႈထႅင်ႈ…ၼႂ်းၶၢဝ်းတၢင်းသွင်ပီ…ဢမ်ႇတွၼ်ႉလႆႈႁၼ်ၼႃႈပေႃႈၶဝ်သေပွၵ်ႈ…ဝၢႆးသေၼၢႆးၶဝ်လူႉပႅတ်ႈယဝ်ႉ…ပေႃႈၶဝ်ၸင်ႇႁူႉၶၢဝ်ႇသေ…လႆႈမိူဝ်းဢဝ်မႃးယူႇၸွမ်း…လႆႈယူႇၸွမ်းပေႃႈၶဝ်ဢမ်ႇတၼ်းႁိုင်…ပေႃႈၶဝ်ၵေႃႈလႆႈလူႉတၢႆပႅတ်ႈထႅင်ႈ..”
လႅင်းမိူင်းထူၺ်ႈၸႂ်လူင်မႃးသေ
“ႁဝ်းႁၼ်ၸိူင်ႉၼၼ်ယဝ်ႉ…ႁဵတ်းႁႂ်ႈႁဝ်းဝူၼ်ႉထိုင်ၶိုၼ်းတူဝ်ၸဝ်ႈၵဝ်ႇ…လႄႈလႆႈၵဵပ်းၶဝ်ဝႆႉ…ယွၼ်ႉႁဝ်းပဵၼ်ၽူႈၸၢႆးလႄႈ…ဢမ်ႇမီးတူဝ်ထူပ်းႁဝ်းၵေႃႈဢမ်ႇႁူႉဝႃႈ…ၸွင်ႇႁဝ်းလဵင်ႉလႆႈထုၵ်ႇမႅၼ်ႈယူႇႁႃႉ…တေပွႆႇၶဝ်ၵႂႃႇၵေႃႈၶဝ်ယင်းတိုၵ်ႉလဵၵ်ႉယူႇ…ယင်းပႆႇႁူႉလွင်ႈသင်…တေႁႂ်ႈႁဝ်းလဵင်ႉလူလုမ်းလႃးတူၺ်းထိုင်ၼႆ…သူၵေႃႈႁူႉယူႇ…ႁဝ်းဢမ်ႇမီးၶၢဝ်းယၢမ်းယူႇၸွမ်းလႆႈတႃႇသေႇ…မၢင်ပွၵ်ႈၶဝ်တေလႆႈယူႇႁင်းၵူၺ်းၸိူဝ်းၼႆႉ…ၸၢတ်ႈပၢၼ်ယူႇၵေႃႉလဵဝ်ၼၼ်ႉမၼ်းၶီငဝ်ၼႃႇ…ႁဝ်းတေလႆႈၸတ်းၵၢၼ်ၸိူင်ႉႁိုဝ်လႃႇ……”
“သမ်ႉဝႃႈၶဝ်တိုၵ်ႉလဵၵ်ႉယူႇသေတႃႉ..ၵူၺ်းၵႃႈၶဝ်ႁူႉလႆႈၵူႈလွင်ႈယူႇၼႃ..ႁူဝ်ၸႂ်ၶဝ်တေဢမ်ႇလႆႈၵႅၼ်ႇၶႅင်ၼင်ႇဢၼ်ႁၼ်ယူႇၼႆႉၵေႃႈပဵၼ်လႆႈ…သူႁဵတ်းလႆႈလီတေႉယဝ်ႉ..”
“မၼ်းတေလီလိူဝ်သေၼႆႉယူႇ…သင်ဝႃႈၶဝ်မီးမႄႈၸိူင်ႉၼင်ႇသူၼႆ…”
ဢဝ်ၶမ်းႁွမ်ယဵၼ်ၼိမ်ၵႅပ်ႉၼိုင်ႈသေ လႅင်းမိူင်းၼင်ႈယၵ်ႉတူၺ်းသၢႆတႃပေႃးဢမ်ႇၽၢတ်ႇ ၶမ်းႁွမ်ယုမ်ႉယဝ်ႉ
“ဢိုမ်ႈ…ၵေႃႈလႆႈႁဝ်းတေၶတ်းၸႂ်တူၺ်း”
လႅင်းမိူင်းယိပ်းဢဝ်မိုဝ်းၶမ်းႁွမ်သေယဝ်ႉ “ၸူမ်းယဝ်ႉၼႃႈ..” ထူၺ်ႈၸႂ်လူမ်ဢွၵ်ႇမႃးသေယဝ်ႉ ယုမ်ႉၸူးၶမ်းႁွမ် “ၼေႃႇမိူင်းႁွင်ႉႁဝ်းဝႃႈပေႃႈ…တေႁႂ်ႈမၼ်းႁွင်ႉသူဝႃႈမႄႈ…ပေႃႈမႄႈလုၵ်ႈၼႆၵေႃႈပဵၼ်ၼႃႈႁိူၼ်းယဝ်ႉၸွင်ႇဢမ်ႇၸႂ်ႈႁိုဝ်လႃႇၼႆႉ”
“လႆႈၶိုပ်ႈၶႂ်ႈဢဝ်သွၵ်ႇ” ၶမ်းႁွမ်ဢီးမိုဝ်းမၼ်းမၼ်းပႅတ်ႈသေ “လုၵ်ႈႁဵၼ်းၶဝ်မႃးယဝ်ႉ…မိူဝ်ႈၼႆႉၸွင်ႇတေယူႇၸွႆႈႁိုဝ်ႁိုဝ်”
“ဢိုမ်ႈ…” သဵင်ယဵၼ်ၵႂႃႇ။
“မိူဝ်းႁဵတ်းၵၢၼ်သူၶိုၼ်းလႄႈ..”
“လိုပ်ႈၵၼ်ပႃႈၼႃႈပႃႈတႃၸိူင်ႉၼႆႁႃႉၼႆႉ…မိူဝ်ႈၼႆႉႁဝ်းဢမ်ႇတၼ်းတေႉဢိူဝ်ႈၼႃႈ…”
“ဢေႃႈၶႃႈ..ႁဝ်းပွင်ႇၸႂ်ယဝ်ႉ..”
“လၢတ်ႈၶေႃႈၼႆႉမိူဝ်ႈလႂ်…ၸဵပ်းၸီႈထိုင်ၸႂ်ယဝ်ႉဝႃႈ”
လႅင်းမိူင်းၵေႃႈဢွၵ်ႇမိူဝ်းၵႂႃႇ၊ ၶမ်းႁွမ်ၵေႃႈ မႄးႁႃဢဝ်မၢႆၾၢင်ပိုၼ်းတူဝ် ၼေႃႇမိူင်းမႃးထႅမ်သႂ်ႇပဵၼ်ၸိုဝ်ႈမၼ်းၵႂႃႇယဝ်ႉ။
