ႁူဝ်ၶမ်ႈမိူင်းၸမ်လပ်းသိင်ႇ လႅင်းမိူင်းၵေႃႈၶီႇလူတ်ႉမႃးၵိုတ်းတီႈႁိူၼ်းၶမ်းႁွမ်ၶဝ်သေ ပႆၶဝ်ႈၵႂႃႇၼႂ်းဝၢင်းႁိူၼ်း ဢမ်ႇလႆႈႁၼ်ၽႂ်လႄႈ ၼႂ်းၸႂ်ယဵၼ်ႁၢႆ သၢႆငၢႆဢမ်ႇပေႃးလီၵႃႈႁိုဝ် ၽၵ်းတူၵေႃႈႁပ်းဝႆႉယူႇ ၸင်ႇဢီးတူၺ်းသမ်ႉဢမ်ႇလွၵ်ႉ ၶဝ်ႈမိူဝ်းပိုတ်ႇၾႆးဝႆႉယူႇၼႂ်းႁိူၼ်းၼၼ်ႉယဝ်ႉ။
ၶမ်းႁွမ်ၵေႃႈ ၵွပ်ႈမီးၵၢၼ်လႄႈ ၸူဝ်းဢဝ်တင်းၼေႃႇမိူင်းသေ လႆႈမိူဝ်းတီႈႁိူၼ်းလုင်းၵၢင်ႉၶဝ် ႁိုင်ၼႃႇသမ်ႉပေႃးလိုၵ်းယဝ်ႉ။ မိူဝ်ႈမႃးတီႈႁိူၼ်းၶိုၼ်း လႆႈႁၼ်ၾႆးလႅင်းယူႇၼႂ်းႁိူၼ်း ၽၵ်းတူၵေႃႈပိုတ်ႇဝႆႉ ၶမ်းႁွမ် ဢဝ်ၼေႃႇမိူင်းဝႆႉတၢင်းလင်မၼ်းယဝ်ႉ ငွႆးၶဝ်ႈၵႂႃႇလွႆးလွႆး ႁၼ်လႅင်းမိူင်းၼွၼ်းယူႇၼႂ်းၵၢင်ႁိူၼ်းၼင်ႇလပ်းလီလပ်းငၢမ်းၼၼ်ႉ။
“ယူဝ်ဝႃႈပဵၼ်ၽႂ်” ၸင်ႇတေလူမ်ၸႂ်မႃးယဝ်ႉ။
လႅင်းမိူင်းၵေႃႈတိုၼ်ႇမႃးသေ ယၵ်ႉတူၺ်းၶမ်းႁွမ်ၶႃ
“မႃးယဝ်ႉႁႃႉ..”
“မႃးႁိုင်ယဝ်ႉႁႃႉ..”
“မႃးမိူဝ်ႈႁူဝ်ၶမ်ႈၼၼ်ႉ..ၵႂႃႇလႂ်မႃးလႃႇ..ၽၵ်းတူၵေႃႈဢမ်ႇလွၵ်ႉ”
“မိူဝ်းႁိူၼ်းလုင်းၵၢင်ႉၶဝ်…ဢၢင်ႈဝႃႈတေမိူဝ်းၵႅပ်ႉၼိုင်ႈၵူၺ်း…လႆႈမိူဝ်းႁိုင်ပႅတ်ႈ” ၶမ်းႁွမ်ယၵ်ႉတူၺ်းလႅင်းမိူင်းသေ “မႃးႁဵတ်းသင်လႃႇၶၢဝ်းၼႆႉ…ဢမ်ႇမီးၵၢၼ်ႁဵတ်းယဝ်ႉႁႃႉ”
“ၸႂ်ထိုင်လႄႈမႃးႁႃၽွင်ႈဢမ်ႇလႆႈၵႃႈ…” သီၼႃႈမွင်မွင်သေယၵ်ႉတူၺ်းၶမ်းႁွမ်ယူႇ။
“တေလႆႈၵႂႃႇထႅင်ႈယဝ်ႉၸွင်ႇၸႂ်ႈႁိုဝ်…”
ၶႂ်ႈယုမ်ႉၼႄယူႇၵေႃႈ ဢမ်ႇယုမ်ႉဢွၵ်ႇမႃးလႆႈယဝ်ႉ ၵပ်ႉတိပ်ႇယူႇၼႂ်းၵူင်ၶေႃးဝႆႉၵူၺ်း။
ၼႂ်းႁိူၼ်းၼၼ်ႉၵေႃႈ သမ်ႉပေႃးယဵၼ်သီႇသီႇ ၼေႃႇမိူင်းၼၼ်ႉတႄႉ မွင်းထိုင်ႁိူၼ်းၵူၺ်း သမ်ႉပေႃးၵႂႃႇၼွၼ်းသေလပ်းယူႇၽေႃႈၽေႃႈယဝ်ႉ။
“တေၵႂႃႇမိူဝ်ႈလႂ်”
“မိူဝ်ႈၽုၵ်ႈၼႆႉယဝ်ႉ..”
“ႁိုင်ယူႇႁႃႉ…”
သဵင်တဵတ်ႇယဵၼ်ၵႂႃႇတင်းႁိုင် လႅင်းမိူင်းဢမ်ႇတွပ်ႇ ၶမ်းႁွမ်ၸင်ႇဢဝ်ၶေႃႈတွပ်ႇမၼ်းႁင်းၵူၺ်း “ၶႂ်ႈဝႃႈႁိုင်ယူႇ..”
“ႁဝ်းတေဢမ်ႇၸၢင်ႈမႃးၶိုၼ်းတီႈၼႆႈၵေႃႈပဵၼ်လႆႈ…”
“သူတေၵႂႃႇတၢင်းလႂ်လႃႇ..သူဢမ်ႇၸၢင်ႈမႃးသေတႃႉ..ၸွင်ႇႁဝ်းသမ်ႉတေၸၢင်ႈၵႂႃႇႁႃသူလႆႈႁိုဝ်” သဵင်ၶမ်းႁွမ်သၼ်ႇမႃး သီႇသူပ်းသမ်ႉပေႃးသၼ်ႇတိၼ်းတိၼ်း ၼမ်ႉတႃယိုင်ႈႁူၺ်ႇဝႆႉ “သူၵေႃႈလၢတ်ႈဢမ်ႇလႆႈၸွင်ႇၸႂ်ႈႁိုဝ် ယွၼ်ႉမၼ်းပဵၼ်ၵၢၼ်လပ်ႉ”
ၶမ်းႁွမ်ဢဝ်မိုဝ်းၸဵတ်ႉၼမ်ႉတႃဢၼ်ၸိုမ်ႉဝႆႉၼၼ်ႉသေ “ၵေႃႈယဝ်ႉလႄႈ ၸိူင်ႉႁိုဝ်ၵေႃႈသူႁဵတ်းၵၢၼ်ပုၼ်ႈတႃႇၵူၼ်းတင်းၼမ်လူး ပေႃးဢမ်ႇၸႂ်ႈမိူဝ်ႈၽုၵ်ႈၵေႃႈ မိူဝ်းၼႃႈသူၵေႃႈတေၵႂႃႇပႅတ်ႈယူႇၵူၺ်း ၶွပ်ႈၸႂ်ၼႃႈ ဢၼ်သူပၼ်ၶၢဝ်းယၢမ်းသေမႃးလၢတ်ႈၼႄႁဝ်း”
“ႁဝ်းၼွမ်းၽိတ်းတေႉဢိူဝ်ႈ…”
ၶမ်းႁွမ်ယုမ်ႉသေယဝ်ႉ“ၼႂ်းၵၢင်ၸႂ်သူသမ်ႉၶႂ်ႈၵႂႃႇယူႇႁႃႉ…ႁဝ်းႁူႉႁဝ်းပွင်ႇၸႂ်ယူႇၼႃႈ…ၵူၺ်းၵႃႈ..မၼ်းၵေႃႈမီးဢၼ်ႁဝ်းၶႂ်ႈထၢမ်သူမႃးႁိုင်ယဝ်ႉ…မိူဝ်ႈလႂ်မိူဝ်ႈတေဢမ်ႇလႆႈထူပ်းၵၼ်ထႅင်ႈယူႇယဝ်ႉ…ႁဝ်းၵေႃႈတေယွၼ်းထၢမ်သူမိူဝ်ႈလဵဝ်ၼႆႉယဝ်ႉ”
“ထၢမ်မႃးလႄႈ..လိူဝ်သေလွင်ႈၵၢၼ်ႁဝ်းတွပ်ႇပၼ်သူလႆႈၵူႈလွင်ႈယဝ်ႉ”
“သူတေတွပ်ႇႁိုဝ်ဢမ်ႇတွပ်ႇ…ယူႇတီႈသူၵူၺ်း…ႁႂ်ႈႁဝ်းလႆႈထၢမ်ၵူၺ်းၵေႃႈလႆႈယဝ်ႉ”
“ထၢမ်မႃးၶႃႈလႄႈ..ဝႃႈႁိုဝ်”
“သူႁဵတ်းႁိုဝ်လႄႈမႃးႁဵတ်းသိုၵ်းလႃႇ..”
ၶိူဝ်းမိူင်းယဵၼ်ၵႂႃႇၵႅပ်ႉၼိုင်ႈယဝ်ႉ ဢဝ်ႁူဝ်မၼ်းမွၼ်သႂ်ႇတၵ်းၶမ်းႁွမ်ၼၼ်ႉသေယဝ်ႉ
“ပေႃးႁႂ်ႈလၢတ်ႈ…လွင်ႈမၼ်းတေယၢဝ်းဢိူဝ်ႈၼႃႈ..”
“ႁဝ်းၽွမ်ႉထွမ်ႇယူႇၶႃႈ..”
“တီႈတေႉ..ႁဝ်းဢမ်ႇလႆႈမႃးႁဵတ်းသိုၵ်းၼႃ…ၸွမ်းလူၺ်ႈႁဝ်းပဵၼ်ၵေႃႉၸၢႆးသေ…ၼိူဝ်ႉလိူတ်ႈႁဝ်းတိုၼ်းပဵၼ်သိုၵ်းဝႆႉယူႇတႃႇသေႇယဝ်ႉ…ႁဝ်းပဵၼ်သိုၵ်းဝႆႉၸဵမ်မိူဝ်ႈၵေႃႉလဵၵ်ႉၼၼ်ႉယဝ်ႉ…”
“တူၺ်းသူတေၶႂ်ႈပဵၼ်သိုၵ်းၼႃႇတေႉၼၼ်ႉယဝ်ႉဝႃႈ”
“ႁဝ်းၵေႃႈဢမ်ႇမီးတၢင်းလိူၵ်ႈမိူၼ်ၵၼ်…ၽဝႁဝ်း…ၸၢတ်ႈပၢၼ်ႁဝ်း…ထုၵ်ႇႁဵတ်းႁႂ်ႈႁဝ်းၶႂ်ႈပဵၼ်မၼ်းယဝ်ႉ”
“ၸိူင်ႉႁိုဝ်လႃႇ..”
“ႁဝ်းယူႇမႃးၼႂ်းၽဝလုၵ်ႉၽိုၼ်ႉ…ယူႇၸွမ်းသိုၵ်းမႃးၸဵမ်မိူဝ်ႈၵေႃႉလဵၵ်ႉလဵၵ်ႉၼၼ်ႉယဝ်ႉ…
သိုပ်ႇလူထႅင်ႈတွၼ်ႈတေမႃးၶႃႈ
