“လွင်ႈႁဝ်းလႄႈတင်းၶဝ်ၼၼ်ႉ..မၼ်းသုတ်းသဵင်ႈၵႂႃႇၸဵမ်မိူဝ်ႈသီႇပီပူၼ်ႉယဝ်ႉ”
“တိူၵ်ႈတီႈႁၵ်ႉယူႇ…ၵွပ်ႈသင်လႄႈသူလိူၵ်ႈတေယၢၼ်ၽၢတ်ႇၶဝ်တႃႇသေႇလႃႇ..ႁဝ်းဢမ်ႇပွင်ႇၸႂ်သူတေႉယဝ်ႉ”
“တေပဵၼ်ယွၼ်ႉႁဝ်းၵူဝ်ယူဝ်ႉ…ႁဝ်းၸူမ်ယူႇၸွမ်းတၢင်းဝူၼ်ႉဢၼ်ဝႃႈ…ၵူဝ်လုၵ်ႈမီးပေႃႈပဵၼ်သိုၵ်း…ၵူဝ်လုၵ်ႈတေမိူၼ်ႁဝ်း..ဢမ်ႇလႆႈႁၼ်ၼႃႈပေႃႈ…ၽိူဝ်ႇႁူႉတူဝ်ၵေႃႈႁဝ်းပေႃးႁဵတ်းႁႂ်ႈလုၵ်ႈႁဝ်းပဵၼ်ၸိူင်ႉၼၼ်ၵႂႃႇၼၼ်ႉၼႃႇ…ႁဝ်းၸင်ႇလႆႈဢွၼ်ၶဝ်မႃးတီႈၼႆႈယဝ်ႉ..”
“မီးပေႃႈပဵၼ်သိုၵ်းမၼ်းဢမ်ႇလီတီႈလႂ်လႃႇ…သင်ဢမ်ႇသင်မၼ်းၵေႃႈပဵၼ်ပေႃႈလႆႈယူႇလူး..”
“ယွၼ်ႉႁဝ်းယၢမ်ႈထုၵ်ႇပေႃႈပွႆႇပႅတ်ႈလႄႈ…ၸင်ႇလႆႈမီးတၢင်းဝူၼ်ႉၽင်ၸႂ်မႃးယူဝ်ႉ”
“ၵူၺ်းၵႃႈမၼ်းဢမ်ႇၸႂ်ႈတၢင်းၽိတ်းလုၵ်ႈဢွၼ်ႇလူး…ႁဝ်းဝႃႈသူဝူၼ်ႉၽိတ်းလႄႈႁဵတ်းၽိတ်းတေႃႇလုၵ်ႈသူႁႅင်းၼႃႇယဝ်ႉ…တိူၵ်ႈတီႈၶဝ်ထုၵ်ႇလီလႆႈယူႇၸွမ်းပေႃႈယူႇယဝ်ႉ…သူႁၼ်ၶဝ်ပဵၼ်ၵူၼ်းၸိူင်ႉႁိုဝ်လႃႇ…ပဵၼ်သိုၵ်းၵေႃႈမေႃဢဝ်ပုၼ်ႈၽွၼ်းယူႇၵူၺ်းဢိူဝ်ႈ…”
“ႁဝ်းဝႃႈမၼ်းတူၵ်းလိုၼ်းယဝ်ႉၼႃႈ…”
“ၶဝ်ယင်းတိုၵ်ႉပႂ်ႉသူယူႇတႃႇသေႇဢိူဝ်ႈ…တေႃႈၼင်ႇတေတေႇၼႃႈႁိူၼ်း…မၼ်းယင်းမႃးၼင်ႈၵိၼ်လဝ်ႈသေႁႆႈယူႇတီႈႁိူၼ်းႁဝ်းယဝ်ႉ..”
ၶမ်းႁွမ်ၼင်ႈၼိမ်ယဵၼ်ဢမ်ႇတၵ်းသဵင်ယဝ်ႉ။ ၸၢႆးၶိူဝ်းၵေႃႈႁွတ်ႈမႃးတီႈသႅင်ႇၼၼ်ႉသေ
“ဢမ်ႇၸႂ်ႈၶမ်းႁွမ်ႁိုဝ်လႃႇၼႆႉ…”
“မႂ်ႇသုင်ၶႃႈ..”
“မႂ်ႇသုင်ၼႃ…မႃးမိူဝ်ႈလႂ်လႃႇ…မႃးလိုဝ်ႈတီႈလႂ်” တင်းႁွပ်ႇလုၵ်ႈဢုမ်ႈပၼ်ယိင်းသႅင်သေတၵ်ႉလၢတ်ႈတေႃႇၶမ်းႁွမ်ၵႂႃႇမိူဝ်ႈလဵဝ်ၵၼ်။
“မႃးယူႇတီႈႁိူၼ်းဢူၺ်းၵေႃႉ…”
“တေႇၼႃႈႁိူၼ်းၵၼ်မႃးႁိုင်ယဝ်ႉႁႃႉၼႆႉ”
“ဝၢႆးသေႁဝ်းၵႂႃႇၶိုၼ်ႈႁဵၼ်းႁူၵ်းလိူၼ်မႃးၵေႃႈ…မၼ်းယွၼ်းတေႇၸွမ်းႁဝ်းၵမ်းလဵဝ်ယဝ်ႉဝႃႈ”
ၶမ်းႁွမ်ၵေႃႈယုမ်ႉယုမ်ႉၼႄၵႂႃႇ ၸၢႆးၶိူဝ်းၸင်ႇထၢမ်ၵႂႃႇၼင်ႇဢမ်ႇႁူႉလွင်ႈသင်ၼၼ်ႉသေ
“သူလူးမီးၼႃႈႁိူၼ်းယဝ်ႉႁႃႉ!…ဢမ်ႇလႆႈငိၼ်းၶၢဝ်ႇႁိုင်ၼႃႇယဝ်ႉ”
ၶမ်းႁွမ်ယုမ်ႉၵႂႃႇသေ “လုၵ်ႈဢွၼ်ႇတေတွင်ႉမႆႈၶဝ်ႈယဝ်ႉယူဝ်ႉ…သင်ႇတၢင်းၵိၼ်ၵၼ်ၵွၼ်ႇလႄႈ” လုၵ်ႈဢွၼ်ႇၵေႃႈပႆမႃးတၢင်းၶမ်းႁွမ်ၶဝ်ၼၼ်ႉသေ ၶမ်းႁွမ်ၵေႃႈသင်ႇတၢင်းၵိၼ်ၵႂႃႇတီႈၸဝ်ႈသႅင်ႇႁႂ်ႈႁဵတ်းပၼ်ယူႇ။ တွၼ်ႈတႃႇလုၵ်ႈဢွၼ်ႇတႄႉ ဢဝ်ဢၼ်ၸဵဝ်းယဝ်ႉမၼ်းပၼ်ၵိၼ်ပႂ်ႉထႃႈယဝ်ႉ။
“လုၵ်ႈသူႁႃႉ!!..ဢမ်ႇၸႂ်ႈၼေႃႇမိူင်းႁိုဝ်လႃႇၵေႃႉယႂ်ႇၼၼ်ႉ…ပေႃးဢမ်ႇၶႂ်ႈတွင်းတေႉလူင်” ယၵ်ႉတူၺ်းၼေႃႇမိူင်းသေ “ၸွင်ႇတွင်းလုင်းယူႇႁႃႉၼေႃႇမိူင်း…ဢူၺ်းၵေႃႉဢူႈသူမိူဝ်ႈၼၼ်ႉဢႃႈ”
ၼေႃႇမိူင်းယၵ်ႉတူၺ်းမိူၼ်တွင်းဢမ်ႇတွင်းဝႆႉသေယဝ်ႉ ငွၵ်းႁူဝ်ၼႄၵႂႃႇ
“ၵေႃႉလဵၵ်ႉၼႆႉလူးၸိုဝ်ႈသင်လႃႇ”
“ၸိုဝ်ႈ သႅင်လႅင်း ၶႃႈ”
“လၢႆၶူပ်ႇယဝ်ႉလႃႇၼႆႉ…”
“သၢမ်ၶူပ်ႇပၢႆယဝ်ႉၶႃႈ…”
“ၶႂ်ႈဝႃႈဢၼ်ဢမ်ႇမႃးသွၼ်လိၵ်ႈၶိုၼ်းၼၼ်ႉၵေႃႈ…တေႇၼႃႈႁိူၼ်းပႅတ်ႈယဝ်ႉၵႃႈၼႆ…ႁူဝ်ၼႃႈတင်းမိူဝ်းၶႆႈသူၶိုၼ်းယူႇဢိူဝ်ႈၼၼ်ႉ…တီႈၶမ်းမိူင်းၵေႃႈမၼ်းတင်းၵႆႉၵႆႉထၢမ်ထိုင်သူတႃႇသေႇယဝ်ႉ…တေႃႈၼင်ႇမိူဝ်ႈမၼ်းဝႃႈမၼ်းတေတေႇၼႃႈႁိူၼ်း…မၼ်းတင်းမႃးၼင်ႈႁႆႈယူႇတီႈႁိူၼ်းတေႃႈၼႃႈႁႃးၽူဝ်မေးယဝ်ႉ..ဢမ်ႇၸႂ်ႈဝႃႈမၼ်းၶႂ်ႈတေႇသေၵႃႈႁိုဝ်လေႃႇ…မၼ်းႁၵ်ႉသႅင်ႁွမ်မိူၼ်ၼင်ႇၼွင်ႉယိင်းမၼ်းၼၼ်ႉယဝ်ႉ…ၵူၺ်းၵႃႈသႅင်ႁွမ်ၼၼ်ႉသမ်ႉလႆႈၸႂ်မၼ်းၼႃႇၵႃႈ…လၢတ်ႈဢူႈၶဝ်ႁႂ်ႈလႅင်းမိူင်းတေႇၼႃႈႁိူၼ်းၸွမ်းၼၼ်ႉၼႃႇ…ၸူးၸႂ်မၼ်းတႄႉႁိုဝ်ၶႂ်ႈတေႇၼႄႇ”
ဢဝ်ၶမ်းႁွမ်သမ်ႉပေႃးၼင်ႈငဝ်မိုင်ၵႂႃႇၸွမ်းၵႂၢမ်းလၢတ်ႈၸၢႆးၶိူဝ်းၼၼ်ႉယူႇ
“ၶဝ်ပႆႇလႆႈတေႇၼႃႈႁိူၼ်း” ယိင်းသႅင်သွပ်ႉသႅပ်ႉၸၢႆးၶိူဝ်း
“ၼၼ်ႁႃႉ…ယဝ်ႉလုၵ်ႈဢွၼ်ႇၼၼ်ႉလူး…”
“လုၵ်ႈႁူဝ်ၼႃႈ…”
“ၼၼ်ႁႃႉ!!”
သမ်ႉဝႃႈသွပ်ႉသႅပ်ႉယူႇၵေႃႈ ၶမ်းႁွမ်လႆႈငိၼ်းၵူႈၶေႃႈၵူႈၵမ်းလႄႈ ယၵ်ႉတူၺ်းၶႃၽူဝ်မေးၼၼ်ႉသေ မိူၼ်တၢင်းဝူၼ်ႉမၼ်းၵေႃႈမီးလွင်ႈၸႅင်ႈလႅင်းမႃးယူႇယဝ်ႉ။
ယၢမ်းၼၼ်ႉလႅင်းမိူင်းၵေႃႈႁွတ်ႈမႃးထိုင်
“မႃးမီးယူႇတီႈၼႆႈၵူၺ်းလူး..”
ၶမ်းႁွမ်ယုမ်ႉၸူးမၼ်းၼင်ႇၵူၼ်းမိုတ်ႈၵေႃႉၼိုင်ႈသေ “မႃးၼင်ႈၵွၼ်ႇလႄႈပေႃးတၼ်းၵေႃႈ”
လႅင်းမိူင်းၵႂႃႇၼင်ႈယူႇႁိမ်းၶမ်းႁွမ်ၼၼ်ႉယူႇ။
“ဢေႃႈၼွင်ႉမိူဝ်ႈၵႆႈဝႃႈၶႂ်ႈသိုဝ်ႉၶူဝ်းၼႆဢမ်ႇၸႂ်ႈႁိုဝ်လႃႇၼၼ်ႉ…”
“ဢေႃႈၸႂ်ႈဢိူဝ်ႈ” ၸၢႆးၶိူဝ်းၶႃၽူဝ်မေးၵေႃႈႁႃတၢင်းပၢႆႈၵႂႃႇပႅတ်ႈယဝ်ႉ။
“တေၵႂႃႇလႂ်ပႅတ်ႈၵၼ်ယဝ်ႉလႃႇ” ၶမ်းႁွမ်တူၺ်းၼႃႈၶႃသေ
“ႁဝ်းၵႂႃႇၵွၼ်ႇၼႃႈ”
“ၵိၼ်ၶဝ်ႈယဝ်ႉႁႃႉ” ၶမ်းႁွမ်ထၢမ်လႅင်းမိူင်း
“ပႆႇၵိၼ်ၼႃ”
“သင်ႇဝႆႉယဝ်ႉၶႃသွင်ၵေႃႉဢမ်ႇၵိၼ်ၵေႃႈ သူၸွႆႈၵိၼ်ၽွင်ႈလႄႈၼႃႈ”
ပိူၼ်ႈၵေႃႈဢဝ်ၶဝ်ႈသွႆးမႃးတမ်းပၼ်တီႈၶႃၼၼ်ႉသၢမ်ဝၢၼ်ႇယဝ်ႉ။
“လုၵ်ႈလုၵ်ႈလူးၵိၼ်ယဝ်ႉႁႃႉ”
“တိုၵ်ႉၵိၼ်ယဝ်ႉၼၼ်ႉ…” ယၵ်ႉတူၺ်းသေယုမ်ႉယူႇ။
“ၸွင်ႇတေၵိၼ်ႁင်းထႅင်ႈႁိုဝ်လုၵ်ႈ” ယၵ်ႉတူၺ်းလုၵ်ႈမၼ်းသေထၢမ်။
“ၶႂ်ႈၵိၼ်ၸိူင်ႉၼင်ႇမႄႈမႄႈ” လုၵ်ႈယိင်းဢွၼ်ႇၸိၼႄ
“မႃးၼင်ႈႁိမ်းမႄႈၼႆႉလႄႈ” လုၵ်ႈယိင်းဢွၼ်ႇၵၢၼ်းမႃးႁိမ်းမၼ်းသေ ၶမ်းႁွမ်ၵေႃႈဢဝ်တင်းဝၢၼ်ႇဢၼ်မၼ်းၵိၼ်သဵင်ႈၵႂႃႇမိူဝ်ႈၵႆႈၼၼ်ႉမႃးပၼ်ၶမ်းႁွမ်သႂ်ႇပၼ်ယူႇ။
“မႆႈၼႃႇဢိူဝ်ႈလုၵ်ႈ..” ယၵ်ႉတူၺ်းၼေႃႇမိူင်းသေ “လုၵ်ႈၸၢႆးလူးၸွင်ႇတေၵိၼ်ႁိုဝ်” ၼေႃႇမိူင်းငွၵ်းၼႃႈၼႄယဝ်ႉ။
ဝၢၼ်ႇၼိုင်ႈၼၼ်ႉတႄႉၽႄပၼ်သွင်ပီႈၼွင်ႉၵိၼ်ၵႂႃႇသေ လႅင်းမိူင်းၸင်ႇဢဝ်ဝၢၼ်ႇဢၼ်ပိူၼ်ႈမႃးတမ်းပၼ်တီႈမၼ်းသွင်ဝႂ်ၼၼ်ႉ ယိုၼ်ႈပၼ်ၶမ်းႁွမ်ၵႂႃႇ။ လႅင်းမိူင်းၼၼ်ႉတႄႉၵေႃႈ ၼင်ႈတူၺ်းၶမ်းႁွမ်ၶဝ်မႄႈလုၵ်ႈ ၼင်ႈၵိၼ်ယူႇၸိူင်ႉၼၼ် လူၺ်ႈသၢႆတႃဢၼ်မွင်မွင်ယူႇၼၼ်ႉယဝ်ႉ။
“သူဢမ်ႇၵိၼ်ႁႃႉ..”
“ဢိုမ်ႈ..” ယင်းတိုၵ်ႉၼင်ႈမိူၼ်ႇယူႇ။
“ၵိၼ်ၶဝ်ႈၸွမ်းၵၼ်သေတႃႇၼိုင်ႈၵေႃႈ..ၶဝ်ဢမ်ႇဝႃႈသင်ၼင်ႇၵဝ်ႇယူဝ်ႉ”
လႅင်းမိူင်းၵေႃႈသမ်ႉဝႃႈၵိၼ်ဢမ်ႇလူင်းသေတႃႉ တူၺ်းၼႃႈလုၵ်ႈဢွၼ်ႇၼၼ်ႉသေ ၵိၼ်ၵႂႃႇတေႃႇပေႃးမူတ်း ၶမ်းႁွမ်ၸၢႆႇၵႃႈမၼ်းယဝ်ႉၵေႃႈ ၸူဝ်းၵၼ်ဢွၵ်ႇလၢၼ်ႉမႃး။
“သူတေၵႂႃႇတၢင်းလႂ်ထႅင်ႈ…”
“မိူဝ်းႁိူၼ်းၵူၺ်းယဝ်ႉယူဝ်ႉ…”
“လႄႇပွႆးယူႇႁႃႉၵၢင်ၶမ်ႈ…”
“ဢိုမ်ႈ…ၵႃႈလႆႈဢွၼ်လုၵ်ႈဢွၼ်ႇၵႂႃႇလႄႇယူႇၵူၺ်းယူဝ်ႉ..”
“ၸွင်ႇၵွႆႇထူပ်းၵၼ်ၼႃႈ…ႁဝ်းတေၵႂႃႇၵွၼ်ႇယဝ်ႉ”
ၶမ်းႁွမ်ဢမ်ႇတၼ်းလၢတ်ႈသင် လႅင်းမိူင်းပေႃးလႅၼ်ႈပၢႆႈၵႂႃႇပႅတ်ႈယူႇယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
