ယၢမ်းၵၢင်ၶိုၼ်းလိုၵ်းယဵၼ် ၶမ်းႁွမ်ႁဵတ်းၵၢၼ်ယဝ်ႉၵေႃႈ ၶဝ်ႈမိူဝ်းၼွၼ်းၵႂႃႇ မိူဝ်ႈတိုၵ်ႉၼွၼ်းယူႇၼၼ်ႉ ယိင်းသႅင်ၵေႃႈၼွၼ်းဢမ်ႇလပ်းသေ
“ၶမ်းႁွမ်!…ၶႂ်ႈၼွၼ်းယဝ်ႉႁႃႉ…”
“ၼွၼ်းဢမ်ႇလပ်းႁႃႉ…မီးလွင်ႈသင်ၶမ်ၸႂ်လႃႇ…”
“မိူၼ်ဝႃႈ…ႁဝ်းတေႁၵ်ႉမႅၼ်ႈၵူၼ်းၵေႃႉၼိုင်ႈယဝ်ႉ…”
“ၸႂ်ႈႁႃႉ!…မိူဝ်ႈၼႆႉႁၢႆၵႂႃႇတၢင်းဝၼ်း…တၼ်းၵႂႃႇႁၵ်ႉမႅၼ်ႈမၢဝ်ႇၵေႃႉလႂ်ႁေယဝ်ႉလႃႇ…ဢဝ်မႃးပဵၼ်တၢင်းပဵၼ်ၼွၼ်းဢမ်ႇလပ်းၸိူင်ႉၼႆ…”
“ႁဝ်းၵေႃႈဢမ်ႇႁူႉယဝ်ႉ…မိူဝ်ႈတႄႇတႄႉဢမ်ႇလႆႈဝူၼ်ႉသင်…ၵူၺ်းၵႃႈမိူဝ်ႈၼႆႉၵေႃႈ…ႁဵတ်းႁႂ်ႈႁဝ်းမီးတၢင်းဝူၼ်ႉမႃးယဝ်ႉ…”
“ၶဝ်ပဵၼ်ၵူၼ်းၸိူင်ႉႁိုဝ်…ထိုင်တီႈၵူၼ်းၸိူင်ႉၼင်ႇ…ယိင်းသႅင်ဝူၼ်ႉၶမ်ၸႂ်ၸွမ်းပေႃးတၢၼ်ႇၼႆႉ…”
ယိင်းသႅင်ၵေႃႈ ဝူၼ်ႉႁၼ်ၼႂ်းတႃ..
“ၶဝ်ပဵၼ်ၵူၼ်းလဝ်း…လဝ်းထိုင်တီႈႁဝ်းတေထဵင်ဢမ်ႇလႆႈဝႃႈၶဝ်ဢမ်ႇလဝ်းၼၼ်ႉယဝ်ႉ…ႁဵတ်းႁႂ်ႈႁဝ်းတူၺ်းၶဝ်ပေႃးဢမ်ႇၶႂ်ႈၽၢတ်ႇသၢႆတႃလႆႈ…မိူဝ်ႈလႆႈႁၼ်ၶဝ်…ႁဵတ်းႁႂ်ႈႁဝ်းသိူဝ်းၸႂ်တေႉယဝ်ႉ…တၢင်းလဝ်းၶဝ်ၵူၺ်းၵေႃႈႁဵတ်းႁႂ်ႈႁဝ်းပေႃးမဝ်းၸွမ်းၶဝ်ၼႃႇယဝ်ႉ…ၵူၺ်းၵႃႈ…မိူဝ်ႈလႆႈႁူႉၸၵ်းၶဝ်မႃးထႅင်ႈ…ႁဵတ်းႁႂ်ႈႁဝ်းလႆႈသူၼ်ၸႂ်ၼိူဝ်ၶဝ်မႃးတႄႉတႄႉၼၼ်ႉယဝ်ႉ…တူၺ်းၶဝ်မိူၼ်ပဵၼ်ၵူၼ်းယဵၼ်ယဵၼ်…ၵူၺ်းၵႃႈၶဝ်ယဵၼ်းပဵၼ်ၵူၼ်းၵႆႉဢုပ်ႇၵႆႉလၢတ်ႈ…တူၺ်းၶဝ်မိူၼ်ပဵၼ်ၵူၼ်းထၢင်ႇယႂ်ႇတူဝ်…ၶဝ်သမ်ႉပဵၼ်ၵူၼ်းမေႃယွမ်းၼွမ်းထွမ်ႇတူဝ်…တူၺ်းမိူၼ်ပဵၼ်ၵူၼ်းယွင်ႇဢႃႇၼႃႇ…ၶဝ်သမ်ႉပဵၼ်ၵူၼ်းဢမ်ႇဢဝ်ၸၼ်ႉထၢၼ်ႈပုၼ်ႈၽွၼ်းပဵၼ်ယႂ်ႇ…တူၺ်းမိူၼ်ႁၼ်ပုၼ်ႈသုၼ်ႇတူဝ်…ၶဝ်ပဵၼ်ၵူၼ်းဢၼ်သႂ်ႇၸႂ်ၼိူဝ်ၵူၼ်းႁိမ်းႁွမ်းလႄႈ…မေႃပွင်ႇၸႂ်ၼိူဝ်ပိူၼ်ႈတေႉယဝ်ႉ…ၶဝ်မိူၼ်ၵူၼ်းဢၼ်ဢဝ်တူဝ်ပဵၼ်ယႂ်ႇ…ၵူၺ်းၶဝ်ပဵၼ်ၵူၼ်းဢၼ်မေႃၼပ်ႉယမ်ၼိူဝ်ၵၢင်ၸႂ်ပိူၼ်ႈ…ၶဝ်တေပဵၼ်ၵူၼ်းဢၼ်ၸၼ်ႉသုင်သေတႃႉ…ၶဝ်ဢမ်ႇလႆႈဝႆႉတူဝ်ပဵၼ်ၵူၼ်းၸၼ်ႉသုင်…ၵူၺ်းၵႃႈၼမ်ႉၸႂ်ၶဝ်ၼၼ်ႉၸၼ်ႉသုင်တေႉယဝ်ႉ…ယွၼ်ႉပိူဝ်ႈလႆႈႁၼ်ၸိူဝ်းၼႆႉ…ႁဵတ်းႁႂ်ႈတၢင်းႁၵ်ႉဢၼ်မီးၼိူဝ်ၶဝ်ၼၼ်ႉတိူဝ်းၶိုၼ်ႈပဵၼ်ႁဵင်…ပဵၼ်မိုၼ်ႇ…ပဵၼ်သႅၼ်ယဝ်…သၢႆတႃၶဝ်…တူၺ်းႁၼ်လႆႈဝႃႈပဵၼ်ၵူၼ်းမီးလွင်ႈဢုၼ်ႇၸႂ်တေႉၼၼ်ႉယဝ်ႉ…သဵင်ၶဝ်ဢူၼ်ႈဢွၼ်ႇလႄႈဝၢၼ်ႁူ…တၢင်းယုမ်ႉၶဝ်ၼၼ်ႉ…ပဵၼ်တီႈဢၼ်ၸၼ်ၸႂ်တေႉၼၼ်ႉယဝ်ႉ…မိူဝ်ႈၶဝ်ယုမ်ႉဢွၵ်ႇမႃး…ပႃးဢဝ်ႁူဝ်ၸႂ်ႁဝ်းၵႂႃႇမူတ်းမူတ်းယဝ်ႉ…”
“ၼႂ်းသၢႆတႃသူႁၼ်လဝ်းပေႃးတၢၼ်ႇၼၼ်ႉ…ၼႂ်းသၢႆတႃၵူၼ်းတၢင်ႇၵေႃႉၸွင်ႇတေတူၺ်းႁၼ်မိူၼ်သူႁိုဝ်…”
“ယႃႇပေလၢတ်ႈၸိူင်ႉၼၼ်လႄႈ…တင်းႁဝ်းၼွၼ်းသမ်ႉပေႃးဢမ်ႇလပ်းလႆႈႁေၼႆႉ…ႁဝ်းဝႃႈ…ႁဝ်းႁၵ်ႉမႅၼ်ႈၶဝ်ႁႅင်းႁႅင်းၼၼ်ႉယဝ်ႉ…ႁဝ်းဝူၼ်ႉဝႃႈ…ႁဝ်းၶႂ်ႈလၢတ်ႈၼႄၶဝ်..ႁႂ်ႈပေႃးႁူႉထိုင်ၵၢင်ၸႂ်ႁဝ်း…ၵူၺ်းၵႃႈ…ႁဝ်းၵေႃႈၵူဝ်ယူႇမိူၼ်ၵၼ်…ၵူဝ်ၶဝ်တေထဵင်ၶိုၼ်းၼၼ်ႉယဝ်ႉ…”
“ႁၵ်ႉၵႂႃႇလူၺ်ႈၶဝ်ဢမ်ႇႁူႉတူဝ်…ယင်းဢမ်ႇလီၵူဝ်တၢၼ်ႇၶဝ်ထဵင်ၶိုၼ်းလူးၵွၼ်ႇ…”
“ၼၼ်ႉယဝ်ႉ…ႁဝ်းတေလႆႈႁဵတ်းႁိုဝ်လႃႇ…လၢတ်ႈၵႂႃႇၵေႃႈ…ႁဝ်းၵေႃႈဢမ်ႇမီးတိုဝ်ႉတၢင်း…ဢမ်ႇလၢတ်ႈၵေႃႈ…ဢမ်ႇမီးတိုဝ်ႉတၢင်းမိူၼ်ၵၼ်ၵူၺ်းၼင်ႇၵဝ်ႇ…သင်လႆႈလၢတ်ႈ…မၢင်ၽဝ်ႇ…ယူဝ်ၶဝ်တေႁပ်ႉႁူႉထိုင်ၵေႃႈပဵၼ်လႆႈ…သူဢမ်ႇဝႃႈၼၼ်ႁႃႉ…”
“ဢိုမ်ႈ…” သဵင်ၶမ်းႁွမ်မေႃးယူႇတၢင်းၼႂ်းပုၼ်ႉယဝ်ႉ။ ယိင်းသႅင်ၵေႃႈ မိူၼ်ဝႃႈၶမ်းႁွမ်တေၶႂ်ႈၼွၼ်းယဝ်ႉၼႆလႄႈ ဢမ်ႇသိုပ်ႇလၢတ်ႈၵႂႃႇထႅင်ႈယဝ်ႉ။
ယၢမ်းလႃႈယဝ်ႉၼၼ်ႉ သဵင်လူတ်ႉလင်မေႃးမႃးယူႇတီႈၼႃႈႁိူၼ်း ယိင်းသႅင်ဢၼ်တိုၵ်ႉ ႁဵတ်းၵၢၼ်ယူႇၼၼ်ႉၵေႃႈ ၼႅတ်ႈဢွၵ်ႇမႃးတူၺ်းသေ လႆႈႁၼ်ပဵၼ်ၸၢႆးၶိူဝ်းလႄႈ
“မႃးသေႁႃႉ…”
“ဢိုမ်ႈ!…ႁူဝ်ၼႃႈႁႂ်ႈႁဝ်းမႃၸွႆႈ…”
သွင်ၶႃၵေႃႈလႆႈဢွၼ်ၵၼ် ၵႂႃႇႁဵတ်းၵၢၼ်ၶႃယူႇယဝ်ႉ။ မိူဝ်ႈတိုၵ်ႉၸွႆႈၵၼ်ႁဵတ်းၵၢၼ်ယူႇၼၼ်ႉ သဵင်ယဵၼ်ၼႃႇပူၼ်ႉတီႈလႄႈ ႁဵတ်းႁႂ်ႈယိင်းသႅင်ဢမ်ႇပေႃးမေႃယူႇၵႃႈႁိုဝ် ၸင်ႇတႄႇပိုတ်ႇလၢတ်ႈၵႂၢမ်းဢွၵ်ႇမႃးယဝ်ႉ
“သူမႃးႁဵတ်းသိုၵ်းႁိုင်ၵႃႈႁိုဝ်ယဝ်ႉလႃႇ…”
“ႁိုင်ယူႇၸမ်သိပ်းပီႊၼႆႉယဝ်ႉ…”
“သူႁဵတ်းႁိုဝ်ႁူႉၸၵ်းၵၼ်တၢင်းႁူဝ်ၼႃႈႁဝ်းလႃႇ…”
“ႁူႉၸၵ်းၵၼ်မိူဝ်ႈၶဝ်ၶိုၼ်ႈႁူင်းႁဵၼ်းၽူႈမီးၸၼ်ႉသိုၵ်းၼၼ်ႉယဝ်ႉ…ႁဝ်းပဵၼ်မေႃယႃ…ၶဝ်ပဵၼ်လုၵ်ႈႁဵၼ်းဢၼ်ၵႆႉမီးတၢင်းပဵၼ်လေႉၶၢၼ်ႉလိူဝ်ပိူၼ်ႈၼၼ်ႉၼႃႇ…ၵႆႉၵႂႃႇတီႈႁွင်ႈယႃၼႃႇ…ထိုင်တီႈမိုတ်ႈၵၼ်ၵႂႃႇပႅတ်ႈၼၼ်ႉယဝ်ႉ…”
“ၶဝ်လႅပ်ႈပဵၼ်လုၵ်ႈႁဵၼ်းဢၼ်ၵႆႉလေႉၶၢၼ်ႉၼႃႇၼေႃ…ထိုင်တီႈပေႃးမိုတ်ႈၵၼ်တၢင်းသူလႆႈၸိူင်ႉၼၼ်…”
“လႆႈဝႃႈပဵၼ်ထီႉၼိုင်ႈၼႂ်းသၢႆမၢႆၵူၼ်းပဵၼ်ၼၼ်ႉယဝ်ႉ…”
“ႁူႉယူႇဝႃႈၶဝ်လေႉၶၢၼ်ႉသူသမ်ႉႁဵတ်းႁိုဝ်ယူတ်းယႃပၼ်ၶဝ်လႃႇ…”
“ႁဝ်းဢမ်ႇတၼ်းလႆႈယူတ်းယႃ…မွင်းၶဝ်ႈမႃးၼႂ်းႁွင်ႈၵူၺ်း…ပဵၼ်သဵင်မၼ်းဢုပ်ႇလၢႆလၢႆယဝ်ႉ…ပေႃးလႆႈလၢတ်ႈ..မႃးၼင်ႈႁေလၢတ်ႈပဵၼ်ၶိုင်ႈၸူဝ်ႈမူင်းႁင်းၵူၺ်းမၼ်းၵေႃႈမီး…ႁဝ်းတေထၢမ်ဝႃႈမီးတၢင်းပဵၼ်သင်ၼႆၵေႃႈ…သမ်ႉပေႃးဢမ်ႇၸၢင်ႈ…လိူဝ်သေၼင်ႈထွမ်ႇ…ဢမ်ႇၸၢင်ႈလၢတ်ႈသင်ၸွမ်းလႆႈသေဢိတ်း…”
“ၶဝ်သမ်ႉၵႆႉမႃးလၢတ်ႈသင်လႃႇ…”
“ၵမ်ႈၼမ်ၵေႃႈတေၵႆႉမႃးပွင်ႉလွင်ႈၶူးသွၼ်ၶဝ်…ပေႃးလႆႈပွင်ႉၼႆ…ၵႃႈၵႂၢမ်းပႆႇသုတ်းတိုၼ်းပႆႇၵိုတ်း…မၢင်ပွၵ်ႈၶူးမၼ်းမႃးၵေႃႈ…ယင်းတိုၵ်ႉသိုပ်ႇပွင်ႉယူႇ…လွင်ႈၺႃးတၢမ်ႇၵေႃႈပဵၼ်ထီႉၼိုင်ႈၼၼ်ႉယဝ်ႉ…သင်ဝႃႈလႆႈသွၼ်ၼႂ်းႁွင်ႈႁဵၼ်းၼႆ…တေမႃးယဝ်ႉႁႃႁဝ်းယဝ်ႉ…ပေႃးမႃးႁွတ်ႈၵေႃႈၼွၼ်းသေဢမ်ႇလၢတ်ႈသင်…ၵမ်ႉၵေႃႈၼွၼ်းလပ်းၵႂႃႇယဝ်ႉ…”
“ၶဝ်ႁဵတ်းႁိုဝ်ၽၢၼ်ႇပူၼ်ႉၵၢၼ်သွၼ်လႆႈလႃႇ…”
“လႆႈၶိုၼ်းၶိုၼ်ႈၶိုၼ်းၼၼ်ႉၼႃႇ…”
“ၶိုၼ်းၶိုၼ်ႈၶိုၼ်းထႅင်ႈ!…ၶႅၼ်းပွင်ႉထူၼ်ႈယဝ်ႉယူဝ်ႉ…”
“ႁဝ်းလႆႈႁၼ်ၶဝ်မႃးထႅင်ႈ…ႁဝ်းၵေႃႈတူၵ်းၸႂ်ယူႇ…ၵူဝ်ဝႃႈၶဝ်တေမိူၼ်မိူဝ်ႈဢွၼ်တၢင်း…ၵူၺ်းၵႃႈ…မိူၼ်ဝႃႈၶဝ်ဢမ်ႇၸႂ်ႈၵေႃႉလဵဝ်ၵၼ်ၼၼ်ႉယဝ်ႉ…ၶတ်းၸႂ်ၸွမ်းပိူင်…ဢမ်ႇလေႉၶၢၼ်ႉ…လႆႈဝႃႈပဵၼ်တူဝ်ယၢင်ႇလီတွၼ်ႈတႃႇၼႂ်းၸုပ်ႈၼၼ်ႉဝႆႉတေႉၼင်ႇၵဝ်ႇ…”
ၸၢႆးၶိူဝ်းၵေႃႈ ၸွႆႈယိင်းသႅင်ႁဵတ်းၵၢၼ်ယဝ်ႉသေ ဢမ်ႇမီးၵၢၼ်သင်ယဝ်ႉလႄႈ ၸင်ႇၶိုၼ်းမိူဝ်းၶိုၼ်းတီႈယူႇၶဝ်ၵႂႃႇယဝ်ႉ။ မိူဝ်းႁွတ်ႈၵႂႃႇတီႈပၢင်သဝ်း ႁၼ်လႅင်းမိူင်းၼင်ႈငဝ်သေ တူၺ်းၼေႃႇမိူင်းဢၼ်လႅၼ်ႈလဵၼ်ႈယူႇႁင်းၵူၺ်းၼႂ်းပၢင်ၶဝ်ၼၼ်ႉလႄႈ မိူၼ်တေမီးလွင်ႈၶမ်ၸႂ်သေလွင်ႈလွင်ႈဝႆႉ။
“ဝူၼ်ႉသင်ယူႇလႃႇ…ဝူၼ်ႉထိုင်မေႃသွၼ်ယူႇႁႃႉ…”
“ဢိုမ်ႈ!…”
“ၸႂ်ထိုင်ၶဝ်ၵေႃႈ…ဢမ်ႇၵႂႃႇၸူးၶဝ်သေ”
“ၸႂ်ထိုင်ၶဝ်…ယင်းဢမ်ႇယၢပ်ႇတၢၼ်ႇဢၼ်တေၵႂႃႇတေႃႇၼႃႈၶဝ်ၼၼ်ႉလႃႈ…”
“ၸိူင်ႉႁိုဝ်ၵေႃႈတေလႆႈၵႂႃႇယူႇဢမ်ႇၸႂ်ႈႁႃႉ…တူၺ်းလႄႈ…ဢၢႆႈၸၢႆး…မိူဝ်ႈလဵဝ်ပေႃးထုၵ်ႇလီၶိုၼ်ႈႁူင်းႁဵၼ်းမိူၼ်ပိူၼ်ႈယဝ်ႉႁိုဝ်…ပေႃးၼၢၼ်းၵႂႃႇၵေႃႈတေတူၵ်းလိုၼ်းၵူၺ်း…”
“မၼ်းၵေႃႈၸႂ်ႈယူႇၵူၺ်း…” ထူၺ်ႈၸႂ်လူင်မႃးၵမ်းၼိုင်ႈသေ သိုပ်ႇလၢတ်ႈၵႂႃႇထႅင်ႈ
“ပႃးတၢင်းလုၵ်ႈဢွၼ်ႇသေ…တေၵႂႃႇထူပ်းၶဝ်ၼႆႉ…ၶဝ်တေဢမ်ႇထၢင်ႇၽိတ်းၵႂႃႇႁႃႉ…”
“တေႁႂ်ႈၶဝ်ထၢင်ႇၽိတ်းႁဵတ်းသင်လႃႇ…”
ၸၢႆးၶိူဝ်းတူပ်းၶႅၼ်မၼ်းၵမ်းၼိုင်ႈသေ လုၵ်ႉၵႂႃႇပႅတ်ႈ၊ လႅင်းမိူင်းႁိုဝ်တေလၢတ်ႈသင်လႆႈထႅင်ႈယဝ်ႉလႃႇ လိူဝ်သေၼင်ႈထူၺ်ႈၸႂ်လူင်ၵမ်းၼိုင်ႈယဝ်ႉၵမ်းၵူၺ်း။
