ၵၢင်ၼႂ်လႅတ်ႇဢွၵ်ႇ မွၵ်ႇၵုမ်ႈပၢင်ႇလီ ႁူဝ်ၸႂ်ၸိုၼ်ႈသႂ် မိူဝ်ႈလႆႈႁၼ်လုၵ်ႈႁဵၼ်းၶဝ် ယုမ်ႉယုမ်ႉယၢႆႈယၢႆႈဢွၼ်ၵၼ်ၶဝ်ႈႁူင်းႁဵၼ်း မႃးတူင်ႉတၵ်ႉမေႃသွၼ်ယူႇတၢင်းၶဝ်ႈႁူင်းႁဵၼ်းၼၼ်ႉလႄႈ ၶၢဝ်းယၢမ်းတၢင်ႇၸွမ်ပိဝ်ၼႆၵေႃႈ မေႃသွၼ်တင်းလုၵ်ႈႁဵၼ်း ဢွၼ်ၵၼ်တၢင်ႇၸွမ်ပိဝ်ၵႂႃႇ။ သမ်ႉဝႃႈလုၵ်ႈႁဵၼ်း ဢႃႇယုဢသၢၵ်ႈဢမ်ႇပႆႇပဵင်းၵၼ် ႁူႉမေႃဢမ်ႇမိူၼ်ၵၼ်သေတႃႉ မေႃသွၼ်ၵေႃႈ ၶတ်းၸႂ်သႂ်ႇၸႂ်သႂ်ႇႁႅင်းသေသွၼ်ပၼ်ယဝ်ႉ။
လုၵ်ႈႁဵၼ်းၸိူဝ်းဢၼ်ႁဵၼ်းလႆႈဝႆးၼၼ်ႉၵေႃႈ ၼင်ႇႁိုဝ်ပေႃးတေတိုတ်ႉတၢႆး ႁႂ်ႈၵႂႃႇလႆႈၸွမ်းၵၼ်ၼၼ်ႉ ၶိုၼ်းႁႂ်ႈၸွႆႈသိုပ်ႇသွၼ်ပၼ်ၸိူဝ်းဢၼ် ဢမ်ႇၶိုတ်းၸိူဝ်းၼၼ်ႉၵႂႃႇယူႇ။ တေဝႃႈႁိုဝ်ၵေႃႈ မီးမေႃသွၼ်ၵေႃႉလဵဝ်ၵူၺ်းလူး ၵူၺ်းၵႃႈ ၵၢၼ်မေႃသွၼ်ၼၼ်ႉ ၼမ်လိူဝ်သေႁႅင်းၵူၼ်းယဝ်ႉ တႄႇၸဵမ်လွင်ႈလုၵ်ႈႁဵၼ်း၊ လွင်ႈႁူင်းႁဵၼ်း၊ လွင်ႈသွၼ်လိၵ်ႈ ၸိူဝ်းၼႆႉ ပဵၼ်မေႃသွၼ်ဢဝ်ပုၼ်ႈၽွၼ်းမူတ်း။
ၼင်ႇႁိုဝ်ႁူင်းႁဵၼ်းပေႃးတေလီယူႇ ပေႃးတေၶႅမ်ႉလႅပ်ႈလီၼၼ်ႉ ၶမ်းႁွမ် လႆႈၶတ်းၸႂ်တႄႉတႄႉဝႃႈဝႃႈ။ ဝၼ်းၶိုၼ်ႈႁဵၼ်းဢွၼ်တၢင်းသုတ်း ပဵၼ်ဝၼ်းဢၼ်ႁိူဝ်ႉတေႉတေႉယဝ်ႉ ယွၼ်ႉပႆႇႁူႉလွင်ႈလုၵ်ႈႁဵၼ်းလူး တႃႇတေသွၼ်ၵေႃႈယၢပ်ႇဝႆႉယူႇ။ ၵူၺ်းၵႃႈ ဢမ်ႇၽွင်းလိူဝ်လႆႈၼမ်ႉၸႂ်မေႃသွၼ်သေ ၶတ်းၸႂ်ႁဵတ်းၵႂႃႇ ၼင်ႇႁိုဝ်ႁႂ်ႈမၼ်းပေႃးပဵၼ်လႆႈ၊ ႁဵတ်းလႆႈႁႂ်ႈလီမႃးၼၼ်ႉယဝ်ႉ။
မၢင်ပွၵ်ႈၵေႃႈႁိူဝ်ႉၼႃႇသေ ၶႂ်ႈလိုဝ်ႈၼႃႇသေတႃႉ ယွၼ်ႉဢၼ်ႁၢပ်ႇဝႆႉပုၼ်ႈၽွၼ်းဝႃႈမေႃသွၼ်ၼၼ်ႉ မၼ်းၼၵ်းၼႃၼႃႇလႄႈ တေၸၢင်းႁဵတ်းႁိုဝ်လႃႇ မိူဝ်ႈႁၼ်လုၵ်ႈဢွၼ်ႇတႃလမ်လမ် ဢၼ်ဢမ်ႇပႆႇႁူႉသင်ၼၼ်ႉ ယင်းတိုၵ်ႉလူဝ်ႇတၢင်းၸွႆႈထႅမ်ယူႇၼႆသေ သမ်ႉဝႃႈတေထူပ်းပၼ်ႁႃ ထူပ်းလွင်ႈယၢပ်ႇၽိုတ်ႇၵေႃႈ ႁူႉၵႃႈတေလႆႈႁႃလွၵ်းလၢႆးၵႄႈၶႆၵႂႃႇ တွၼ်ႈတႃႇတေယူႇလွတ်ႈၵႂႃႇလႆႈၼၼ်ႉယဝ်ႉ။
ၶမ်းမိူင်း ဢၼ်မၢတ်ႇၸဵပ်းသေ ၼွၼ်းယူႇၼၼ်ႉၵေႃႈ ႁူႉတူဝ်မႃးယဝ်ႉ ဢမ်ႇႁၼ်မိူၼ်ပဵၼ်တီႈၼွၼ်းမၼ်းလႄႈ တူၺ်းၶိုၼ်ႈၵႂႃႇတီႈၸွမ်းႁိူၼ်းၼၼ်ႉယဝ်ႉ ဝၢႆႇသၢႆႉဝၢႆႇၶႂႃသေ ႁၼ်ၼမ်ႉၵိူဝ်ၽႅၼ်ဝႆႉယူႇတီႈၶႅၼ်မၼ်းၼၼ်ႉလႄႈ။ ႁၼ်ယိင်းသႅင်ၼင်ႈမီးယူႇႁိမ်းမၼ်း
“မေႃယႃ…တီႈၼႆႈပဵၼ်တီႈလႂ်…”
“တီႈႁိူၼ်းႁဝ်းယူႇ!…”
“ၶႃႈမႃးၼွၼ်းတီႈၼႆႈၸဵမ်လႂ်ယဝ်ႉ…”
“မိူဝ်ႈၶမ်ႈဝႃး…ႁူဝ်ၼႃႈဢဝ်မႃးဝႆႉတီႈၼႆႈ…” မၼ်းၵေႃႈ ဝူၼ်ႉၶိုၼ်း ဝၼ်းမိူဝ်ႈဝႃး ဢၼ်လႆႈၶဝ်ႈပၢင်တိုၵ်းမိူၼ်ၼႂ်းၾၼ် ဢၼ်ႁၼ်မိူၼ်ၼႂ်းၸိူင်းၼၼ်ႉ တူၺ်းၶႅၼ်မၼ်းယဝ်ႉၵေႃႈ။
“ဢမ်ႇၸႂ်ႈလွင်ႈၼွၼ်းၾၼ်လူး…” ယုမ်ႉဢွၵ်ႇမႃးၼင်ႇၸူမ်းသိူဝ်းတေႉတေႉယဝ်ႉ။
“ၶႅၼ်တိုၵ်ႉၸဵပ်းယူႇႁႃႉ…” မိူဝ်ႈယိင်းသႅင်ထၢမ်မႃးၵေႃႈ သမ်ႉပေႃးၵိုင်ႉၵၢင်ႉၸဵပ်းမႃးၵမ်းလဵဝ်။
“မေႃတေလၢတ်ႈႁဵတ်းသင်လႃႇ…ၶႅၼ်ၶႃႈၸဵပ်းၶိုၼ်းယဝ်ႉၼႆႉ…တင်းၵူၼ်းတိုၵ်ႉမီးတၢင်းသိူဝ်းယူႇ…”
“လိူဝ်သေမၢၵ်ႇၵွင်ႉတိူဝ်ႉၺႃးတီႈၶႅၼ်းယဝ်ႉ…ၵွၵ်းႁူဝ်ၵေႃႈတုမ်ႉတိူဝ်ႉပႃးႁႃႉၼႆႉ…”
“ၶႃႈဢမ်ႇလႆႈယွင်ႇၼႃ…”
“ဢိူဝ်ႈ…ဢမ်ႇယွင်ႇၵေႃႈဢမ်ႇယွင်ႇလႄႈ…တေဢမ်ႇမီးၵူၼ်းယွင်ႇတီႈလႂ်ဢၼ်ဝႃႈတူဝ်ၵဝ်ႇယွင်ႇၼင်ႇၵဝ်ႇ…”
တူၺ်းမိူၼ် ၶမ်းမိူင်းတေၶႅၼ်းမႃးယဝ်ႉ ၵူဝ်မၼ်းတေထဵင်ၵႂၢမ်းၶိုၼ်းလႄႈ ၼႅတ်ႈဢွၵ်ႇၵႂႃႇပႅတ်ႈယူႇ ၵူၺ်းၵႃႈ မိူဝ်ႈဢွၵ်ႇၽၵ်းတူၵႂႃႇ သမ်ႉႁၼ်မႅၼ်ႈလႅင်းမိူင်းယဝ်ႉ မၼ်းၵေႃႈ ႁိုဝ်တေႁတ်းယၵ်ႉတူၺ်းတေႃႇၼႃႈ ၶၢႆႉသၢႆတႃၵႂႃႇတၢင်ႇတၢင်းသေ
“မႃးၸႂ်းၶမ်းမိူင်းၶႃႈႁႃႉ…”
“ဢိုမ်ႈ!…ၶဝ်ပဵၼ်ၸိူင်ႉႁိုဝ်…”
“ၶႅၼ်းမႃးယဝ်ႉၶႃႈ…”
“ယိၼ်းၸူမ်းယဝ်ႉ…”
သဵင်လၢတ်ႈၶဝ်လႄႈ တၢင်းယုမ်ႉၶဝ်ဢၼ်ယုမ်ႉၸူးၼၼ်ႉ ၶဝ်ႇၶွၼ်းႁူဝ်ၸႂ် ယိင်းသႅင် ထိုင်တီႈထိင်းပေႃးဢမ်ႇလႆႈ ၼႅတ်ႈလႅၼ်ႈဢွၵ်ႇၵႂႃႇ တွၼ်ႈတႃႇပၢႆႈႁႂ်ႈပေႃးပူၼ်ႉသၢႆတႃလႅင်းမိူင်းၼၼ်ႉယဝ်ႉ။ လႅင်းမိူင်းၵေႃႈ ၶဝ်ႈၼႂ်းႁိူၼ်းၵႂႃႇ လႆႈႁၼ်ၶမ်းမိူင်းၼင်ႈယူႇလႄႈ။
“ပဵၼ်ႁိုဝ်လႃႇ…ၸွင်ႇၸဵပ်းယူႇႁႃႉ…”
“လၢတ်ႈယဝ်ႉၵေႃႈ…ၸဵပ်းမႃးၵမ်းလဵဝ်ယဝ်ႉ…”
“ပဵၼ်ၵေႃႉၸၢႆးၵမ်းလဵဝ်…မေႃၶၢင်းၸဵပ်းတေႃႇၼႃႈပိူၼ်ႈလႆႈၸိူင်ႉႁိုဝ်…”
“ပိူၼ်ႈတီႈလႂ်…ႁူဝ်ၼႃႈၵူၺ်း…”
“မိူၼ်ႁိုဝ်လႃႇ…ပွၵ်ႈဢွၼ်တၢင်းသုတ်း…”
“ၶႃႈဝူၼ်ႉဝႃႈတူဝ်ၶႃႈတေဢမ်ႇလွတ်ႈယဝ်ႉ…”
“ႁၼ်ထိုင်ၸိူင်ႉႁိုဝ်လႃႇ…ဢၼ်လႆႈမၢတ်ႇၸဵပ်းမႃးၸိူင်ႉၼႆ…ယွၼ်ႉသင်”
“ၵွပ်ႈပိူဝ်ႈ…ၶႃႈၸႂ်ဝႆးၼႃႇပူၼ်ႉတီႈ…ယုမ်ႇယမ်တူဝ်ၵဝ်ႇၼႃႇၽႅဝ်…ဝူၼ်ႉဝႃႈမၼ်းတေဢမ်ႇပဵၼ်သင်လႄႈလႆႈၶဝ်ႈၵႂႃႇ…လႄႈ…ၶႃႈၵေႃႈဢမ်ႇႁူႉဝႃႈငဝ်းလၢႆးမၼ်းပဵၼ်ၸိူင်ႉႁိုဝ်…ၶႃႈဢမ်ႇမီးပဝ်ႉမၢႆၵူၺ်း…ဢမ်ႇမီးၽႅၼ်ပႃး…ပေႃးလၢတ်ႈသိုဝ်ႈသိုဝ်ႈၵေႃႈ…ၶႃႈဝႆႉမၼ်းလူမ်လၢမ်ၼႃႇပူၼ်ႉတီႈ…ဢမ်ႇၾၢင်ႉတူဝ်…ၶႃႈၵေႃႈဢမ်ႇယၢမ်ႈမီးတူဝ်ထူပ်း…”
“ပေႃးဢမ်ႇႁဵတ်း…တေႁဵတ်းႁိုဝ်မီးတူဝ်ထူပ်းမႃးလႃႇ…လွင်ႈလီမၼ်းလူး…ဢမ်ႇလႆႈသင်မႃးၽွင်ႈႁႃႉ…”
“လႆႈဢေႃႈ…ၶႃႈလႆႈႁၼ်ဝႃႈ…ၶႃႈၵေႃႈမီးၼမ်ႉၵတ်ႉယူႇမိူၼ်ၵၼ်…ၶႃႈလႆႈႁၼ်…ၵၢၼ်ၽိုၵ်းၽွၼ်ႉမႃးၶၢဝ်းတၢင်းႁိုင်ၼၼ်ႉ…မၼ်းဢွင်ႇမၢၼ်ၵႂႃႇလူၺ်ႈတီႈၶႃႈဢမ်ႇတၼ်းႁူႉတူဝ်ၼၼ်ႉယဝ်ႉ…ဝူၼ်ႉယဝ်ႉၵေႃႈ…ပေႉၵျေႃႇၸႂ်ၵေႃႈဢမ်ႇႁူႉ…မိူဝ်ႈၶႃႈပတ်ႉလၢႆးပၼ်ဢၢႆႈၸိူဝ်းၼၼ်ႉ…ပေႃးလူမ်ႉလူင်ၵႂႃႇၵေႃႉလႂ်ၵေႃႉၼၼ်ႉ…သင်ပဵၼ်ၵူၼ်းယူဝ်းယူဝ်း…ဢမ်ႇမီးၼမ်ႉၵတ်ႉ…ဢမ်ႇလႆႈၽိုၵ်းၽွၼ်ႉသင်…ၶႃႈလႅပ်ႈတေတၢႆယဝ်ႉ…ၶႃႈၶႂ်ႈငိၼ်းၶွပ်ႈၸႂ်ထိုင်…ၶူးသွၼ်ဢၼ်ၽိုၵ်းၽွၼ်ႉသွၼ်ပၼ်ၵၢၼ်…ႁဵတ်းႁႂ်ႈၶႃႈမီးၼမ်ႉၵတ်ႉမေႃဢဝ်တူဝ်လွတ်ႈမႃးလႆႈၼႂ်းဝၼ်းမိူဝ်ႈၼႆႉတႄႉယဝ်ႉ…”
“ၵၢၼ်ၽိုၵ်းလႄႈ ၵၢၼ်တိုၵ်းတေႉၼႆႉ မၼ်းပိူင်ႈၵၼ်ၸိူင်ႉႁိုဝ်လႃႇ…”
“မၼ်းၵေႃႈပိူင်ႈယူႇယဝ်ႉ…မၢၵ်ႇၵွင်ႈသူပ်းလႄႈ…မၢၵ်ႇၵွင်ႈတေႉ…ယိုဝ်းတေႉၵေႃႈတၢႆတေႉ…ဢမ်ႇမီးၽႂ်မႃးၸွမ်းသင်လၢတ်ႈၼႄမိူၼ်ၼင်ႇမိူဝ်ႈၽိုၵ်း…တူဝ်ၸဝ်ႈၵဝ်ႇတေလႆႈပိုင်ႈဢိင်တူဝ်ၸဝ်ႈၵဝ်ႇ…ငဝ်းလၢႆးၵၢၼ်ၽိုၵ်းလႄႈၵၢၼ်တိုၵ်းၼၼ်ႉ…မၼ်းဢမ်ႇလႆႈမိူၼ်ၵၼ်ၵူႈတီႈ…ၵၢၼ်ၽိုၵ်း…မၼ်းၵေႃႈပဵၼ်ငဝ်ႈၶၢမ်ႇပိုၼ်ႉ…ၵၢၼ်တိုၵ်းၵူၺ်း…”
“လီတႄႉယဝ်ႉ…တႄႇဢဝ်ဝၼ်းမိူဝ်ႈၼႆႉၵႂႃႇ…သူပဵၼ်ၸုမ်းၼူၵ်ႉဢႅၼ်ႇၾႃႉပဵၼ်တၢင်းၵၢၼ်ယဝ်ႉ…ၽၢၼ်ႇပူၼ်ႉၵၢၼ်ၽိုၵ်းၽွၼ်ႉယဝ်ႉ…”
“ယဝ်ႉၵေႃႈ…ပဵၼ်သင်တေလႆႈဢဝ်ၶႃႈမႃးတီႈႁိူၼ်းၼႆႉလႃႇ…”
“ပဵၼ်ပေႃးဢမ်ႇႁူႉတူဝ်…ၵႂႃႇပေႃးဢမ်ႇလႆႈယဝ်ႉတိုၵ်ႉႁႃမႃးထၢမ်ယူႇ…”
“ဢမ်ႇၸႂ်ႈဝႃႈ…ဢဝ်ၶေႃႈဢၢင်ႈၶႂ်ႈမႃးၸႂ်းၶႃႈလႄႈ…မႃးႁႃပီႈၼၢင်းၶႃႈၼႆၵူၺ်းၵဝ်ႇ…” ဢဝ်လႅင်းမိူင်းမိူၼ်ႇတူၺ်းၼႃႈ ၶမ်းမိူင်းၵႂႃႇၵမ်းၼိုင်ႈယဝ်ႉသေ
“ပၢႆးဝူၼ်ႉလီတႄႉၼွင်ႉၸၢႆး…ၶမ်ႈဝႃးႁၢင်ႈဢမ်ႇတၼ်းဝူၼ်ႉၺႃးၸိူင်ႉၼႆသႄႈ…သင်ႁူႉၼၼ်တေႁႂ်ႈလိုဝ်ႈသေသွင်သၢမ်ဝၼ်းၵႂႃႈ…”
